Chapter
၁၁
၁ ယေႇၽသ၊ ၵူၼ်းမဵဝ်းၵိလတ်ႉ၊ ၼၼ်ႉပဵၼ်ၵူၼ်းသိုၵ်းဢၼ်ႁႅင်းယႂ်ႇၼႃႇလူင်လၢင်ဢေႃႈ။မၼ်းပဵၼ်လုၵ်ႈၸၢႆးမေႈမွၵ်ႇယႃႈဢေႃႈ။ပေႃႈမၼ်းပဵၼ်ၵိလတ်ႉဢေႃႈ။
၂ မေးၵိလတ်ႉ ၵိူတ်ႇလဵင်ႉလုၵ်ႈၸၢႆးတင်းလၢႆတီႈမၼ်းလႄႈ မိူဝ်ႈဢၼ်လုၵ်ႈၸၢႆးမၼ်းၸိူဝ်းၼၼ်ႉယႂ်ႇမႃးၼၼ်ႉၸိုင် ၶဝ်ဢွၼ်ၵၼ်ႁေႃႈယေႇၽသဢွၵ်ႇပႅတ်ႈသေလႄႈလၢတ်ႈတီႈမၼ်းဝႃႈ၊-ၵွပ်ႈပိူဝ်ႈမႂ်းပဵၼ်လုၵ်ႈၸၢႆးမေႈယိင်းတၢင်ႇၵေႃႉလႄႈမႂ်းဢမ်ႇလႆႈၶၢမ်ႇဢမူၺ်ႇလူၺ်ႈၵၼ်တင်းပီႈၼွင်ႉၸိူဝ်ႉၶိူဝ်းႁဝ်း၊ ဝႃႈၼင်ႇၼႆ ဢေႃႈ။
၃ မိူဝ်ႈၼၼ်ႉယေႇၽသ ဢွၵ်ႇပၢႆႈသေၵႃႈတီႈပီႈၼွင်ႉမၼ်းၸိူဝ်းၼၼ်ႉၵႂႃႇလႄႈ ယူႇၵႃႈတီႈမိူင်းတေႃႇၽ ဢေႃႈ။ၵူၼ်းၸိူဝ်းဢၼ်လႄႇလၢဝ်းမဝ်မၢင်ႇၸိူဝ်းၼၼ်ႉ ဢွၼ်ၵၼ်ၸူႉၵၼ်တုမ်ၵၼ်တီႈမၼ်းလႄႈၸွမ်း လင်မၼ်းယူႇဢေႃႈ။
၄ လိုၼ်းၼၼ်ႉႁိုင်တၢၼ်ႇတၢၼ်ႇယဝ်ႉၵူၼ်းမဵဝ်းဢမ်ႇမုၼ်ႇ ၸိူဝ်းၼၼ်ႉၶိုၼ်းတိုၵ်းတေႃး မဵဝ်းဢိသရေႇလဢေႃႈ။
၅ မိူဝ်ႈဢၼ်ၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉတိုၵ်းတေႃးမဵဝ်းဢိသရေႇလ ၼၼ်ႉၸိုင်ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်းၵိလတ်ႉ ၸိူဝ်းၼၼ်ႉ ဢွၼ်ၵၼ််ၵႂႃႇႁႂ်ႈလႆႈႁွင်ႉဢဝ်ယေႇၽသသေၵႃႈၼႂ်းမိူင်းတေႃႇၽ ၼၼ်ႉလႄႈ၆လၢတ်ႈတီႈယေႇၽသ လႄႈဝႃႈ၊-
၆ မႃးလႄႈႁဵတ်းၶုၼ်ပူဝ်ႇၶျူၵ်ႉႁဝ်းႁႂ်ႈႁဝ်းလႆႈတိုၵ်းၵၼ်တင်းၵူၼ်းမဵဝ်းဢမ်ႇမုၼ်ႇ ၸိူဝ်းၼၼ်ႉသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်၊ ယေႇၽသ လၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်းၵိလတ်ႉ ၸိူဝ်း ၼၼ်ႉလႄႈဝႃႈ၊-
၇ သူၸင်းၵဝ်လႄႈ ႁေႃႈၵဝ်ဢွၵ်ႇသေၵႃႈၼႂ်းႁိူၼ်းပေႃႈၵဝ်မႃးယဝ်ႉဢမ်ႇၸႂ်ႈႁိုဝ်။တေႃႈလဵဝ်ၼႆႉ မိူဝ်ႈဢၼ်သူႁွတ်ႈထိုင်တုၵ်ႉၶႃႉတၢင်းၽၢၼ်ၼၼ်ႉၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူမႃးၵႃႈတီႈၵဝ်၊ ဝႃႈၼင်ႇ ၼႆဢေႃႈ။
၈ ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်း မိူင်းၵိလတ်ႉၸိူဝ်းၼၼ်ႉ ၶိုၼ်းတွင်းပၢၼ်ႇတီႈ ယေႇၽသလႄႈဝႃႈ၊-ၼႂ်းဝႃႈၼၼ်သေၵေႃႈမိူဝ်ႈလဵဝ်ၼႆႉႁဝ်းသမ်ႉမႃးတီႈၸဝ်ႈႁဝ်း ႁႂ်ႈၸဝ်ႈႁဝ်းလႆႈၵႂႃႇလူၺ်ႈၵၼ်တင်းႁဝ်း လႄႈတိုၵ်းၵၼ်တင်းၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉသေယဝ်ႉႁႂ်ႈ ၸဝ်ႈႁဝ်းပဵၼ်ၸိၵ်းပဵၼ်ၸွမ်ၵူၼ်းဝၢၼ်ႈၵူၼ်းမိူင်းၵိလတ်ႉတင်းလၢႆၶႃႈဢေႃႈ၊ မိူဝ်ႈ ဢၼ်ဝႃႈၼင်ႇၼႆၸိုင်၊ ယေႇၽသ ထၢမ်ႇတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်း မိူင်းၵိလတ်ႉ ၸိူဝ်းၼၼ်ႉလႄႈဝႃႈ၊-
၉ ပေႃးသူသမ်ႉၶိုၼ်းဢဝ်ၵဝ်မိူဝ်းႁႂ်ႈလႆႈတိုၵ်းၵၼ်တင်းၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉလႄႈ ထႃႇဝရႃႉၽြႃး ဢဝ်ၶဝ်ဢၢပ်ႈပၼ်ၵႃႈတီႈၽၢႆႇၼႃႈၵဝ်ၸိုင်ၵဝ်တၵ်းလႆႈပဵၼ််ၸိၵ်းပဵၼ်ၸွမ်သူႁိုဝ်၊ ဝႃႈၼင်ႇၼႆဢေႃႈ။
၁၀ ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်းၵိလတ်ႉၸိူဝ်းၼၼ်ႉ ဢွၼ်ၵၼ်ၶိုၼ်းလၢတ်ႈတီႈ ယေႇၽသလႄႈဝႃႈ၊- ပေႃးႁဝ်းဢမ်ႇႁဵတ်းၸွမ်းၵႃႈၼင်ႇၵႂၢမ်းဢၼ်ၸဝ်ႈႁဝ်း လၢတ်ႈၼၼ်ႉၸိုင်ႁႂ်ႈထႃႇဝရႃႉၽြႃးပဵၼ်သၢၵ်ႈသေႇ ၵႃႈတီႈဝူင်ႈၵၢင်ၸဝ်ႈႁဝ်းတင်းႁဝ်းၶႃႈသေၵမ်းလူၺ်ႈ၊ဝႃႈၼင်ႇဢေႃႈ။
၁၁ မိူဝ်ႈၼၼ်ႉယေႇၽသ ၵႂႃႇလူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်း မိူင်းၵိလတ်ႉ ၸိူဝ်းၼၼ်ႉလႄႈၵူၼ်းတင်းလၢႆ ဢဝ်မၼ်းၶၢၼ်းဝႆႉၼႂ်းဢရႃႇၸိၵ်းၸွမ်ၶုၼ်ပူဝ်ႇၶျုၵ်ႉဢေႃႈ။ယေႇၽသၵေႃႈဢဝ်ၵႂၢမ်းမၼ်းၵူႈၸိူဝ်ႉၵူႈပိူင်ႈ ၶိုၼ်းလဝ်ႈၶိုၼ်းလၢတ်ႈၵႃႈတီႈၽၢႆႇၼႃႈထႃႇဝရႃႉၽြႃးၵႃႈၼႂ်းဝဵင်းမိၸပႃႇဢေႃႈ။
၁၂ လိုၼ်းၼၼ်ႉယေႇၽသ ပွႆႇၸႂ်ႉၽူႈတၢင်တူဝ်တင်းလၢႆၵႂႃႇၸူးၵႃႈတီႈၶုၼ်ႁေႃၶမ်းမဵဝ်းဢမ်ႇမုၼ်ႇ လႄႈတွင်ႉထၢမ်လႄႈဝႃႈ၊-ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်လႄႈၸဝ်ႈႁဝ်းမႃးႁႂ်ႈလႆႈတိုၵ်းတေႃး ဝၢၼ်ႈမိူင်းႁဝ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်
၁၃ ၶုၼ်ႁေႃၶမ်းမဵဝ်းဢမ်ႇမုၼ်ႇၵေႃႈၶိုၼ်းလၢတ်ႈတီႈၽူႈတၢင်တူဝ်ယေႇၽသ ၸိူဝ်းၼၼ်ႉလႄႈဝႃႈ၊- ၵွပ်ႈပိူဝ်ႈမဵဝ်းဢိသရေႇလ ႁိမ်ဢဝ်လိၼ်ၵဝ်ၸႃႉၸဵမ်ၼမ်ႉႁွင်ႊ ဢႃႇၼုၼ်ႇ တေႃႇထိုင်ႁွတ်ႈၼမ်ႉႁွင်ႊယပ်ႇပုတ်ႉတင်း ၼမ်ႉႁွင်ႊယေႃးတၢၼ်ႇမိူဝ်ႈဢၼ်ၶဝ်လုၵ်ႉသေၵႃႈ တီႈမိူင်းဢေႇၵႅပ်ႉတုမႃးၼၼ်ႉလႄႈၵဝ်ၸင်ႇလႆႈႁဵတ်းဢေႃႈ။လိၼ်ၼၼ်ႉၸိုင်မိူဝ်ႈလဵဝ်ၼႆႉၶိုၼ်းပၼ်လီလီငၢမ်းငၢမ်းတီႈၵဝ်သေၵမ်း၊ ဝႃႈၼင်ႇၼႆဢေႃႈ။
၁၄ ယေႇၽသ ၶိုၼ်းပွႆႇၸႂ်ႉၽူႈတၢင်တူဝ်တင်းလၢႆၵႂႃႇၸူးၵႃႈတီႈၶုၼ်ႁေႃၶမ်းမဵဝ်း ဢမ်ႇမုၼ်ႇ ၼၼ်ႉလႄႈ လၢတ်ႈဝႃႈ၊-
၁၅ ယေႇၽသသင်ႇလၢတ်ႈမႃးလႄႈဝႃႈၸမ်း၊ မဵဝ်းဢိသရေႇလ ႁိမ်ဢဝ်လိၼ်မေႃႇၽ ဢိၵ်ႇ တင်းလိၼ်ၵူၼ်းမဵဝ်းဢမ်ႇမုၼ်ႇဢမ်ႇၸႂ်ႈ။
၁၆ မိူဝ်ႈဢၼ်မဵဝ်း ဢိသရေႇလ လုၵ်ႉသေၵႃႈတီႈမိူင်းဢေႇၵႅပ်ႉတုမႃးၼၼ်ႉ ၶဝ်ပႆလတ်းၵႃႈၼႂ်းထိူၼ်ႇၸူးပၢင်ႇလၢႆႇသေယဝ်ႉႁွတ်ႈထိုင်ၵႃႈတီႈဝၢၼ်ႈၵႃႇတေႇသ ၼၼ်ႉၸိုင် မဵဝ်းဢိသရေႇလ ပွႆႇၸႂ်ႉၽူႈတၢင်တူဝ်တင်းလၢႆၵႂႃႇၸူးၵႃႈတီႈၶုၼ်ႁေႃၶမ်းဢေႇတုမ်ႇ လႄႈယွၼ်းဢၶႂၢင်ႉႁႂ်ႈလႆႈပႆ လတ်းၵႃႈၼႂ်းမိူင်းၶုၼ်လူင်ၵႂႃႇဢေႃႈ။
၁၇ ၶုၼ်ႁေႃၶမ်းဢေႇတူမ်ႇၵေႃႈပၼ်ဢၶႂၢင်ႉဢေႃႈ။မိူၼ်ၸိူဝ်ႉၼင်ႇၼၼ်ၶဝ်သမ်ႉပွႆႇၸႂ်ႉၵႂႃႇၵႃႈတီႈၶုၼ်ႁေႃၶမ်းမေႃႇၽ သေၵေႃႈမၼ်းဢမ်ႇပၼ်ဢၶႂၢင်ႉလႄႈမဵဝ်းဢိသရေႇလ တင်းလၢႆ လႆႈယူႇၵႃႈတီႈၵႃႇတေႇသဢေႃႈ။
၁၈ လိုၼ်းၼၼ်ႉၶဝ်ပႆလတ်းၵႂႃႇၼႂ်းထိူၼ်ႇယူႇလဵပ်ႈၸွမ်းႁိမ်းမိူင်း ဢေႇတုမ်ႇဢိၵ်ႇတင်းမိူင်းမေႃႇၽသေလႄႈ ႁွတ်ႈထိုင်ၵႃႈတီႈၽၢႆႇဝၼ်းဢွၵ်ႇမိူင်းမေႃႇၽ သေယဝ်ႉၶျႃးတပ်ႉၶဝ်ၵႃႈတီႈၽၢႆႇပုၼ်ႉၼမ်ႉႁွင်ႊဢႃႇၼုၼ်ႇဢေႃႈ။မိူဝ်ႈၼၼ်ႉၶဝ်ဢမ်ႇၶဝ်ႈၵႂႃႇၵႃႈၼႂ်းၼမ်ႉၼႂ်းလိၼ်မိူင်းမေႃႇၽ။ၼမ်ႉႁွင်ႊဢႃႇၼုၼ်ႇ ၼၼ်ႉပဵၼ်ၶွပ်ႇၼမ်ႉလႅၼ်လိၼ်မိူင်းမေႃႇၽဢေႃႈ။
၁၉ မဵဝ်းဢိသရေႇလ သမ်ႉပွႆႇၸႂ်ႉၽူႈတၢင်တူဝ်တင်းလၢႆၵႂႃႇၸူးၵႃႈတီႈသိႁူၼ်ႇ၊ၶုၼ်ႁေႃၶမ်းႁေႇသၽုၼ်ႇ၊မဵဝ်းဢႃႇမေႃးရိ၊ၼၼ်ႉလႄႈမဵဝ်းဢိသရေႇလ ယွၼ်းဢၶႂၢင်ႉႁႂ်ႈလႆႈပႆလတ်းၵႃႈၼႂ်းမိူင်းၶုၼ်လူင်ၵႂႃႇၸူး ၵႃႈတီႈယူႇႁဝ်းၶႃႈၼၼ်ႉၵေႃႈ
၂၀ သိႁုၼ်ႇ ဢမ်ႇယုမ်ႇမဵဝ်း ဢိသရေႇလလႄႈ ဢမ်ႇပၼ်ဢၶႂၢင်ႉႁႂ်ႈၶဝ်ပႆလတ်းၵႂႃႇ ၵႃႈၼႂ်းမိူင်းမၼ်းၼၼ်ႉၵူၺ်းဢမ်ႇၵႃး သိႁုၼ် ၼၼ်ႉႁႂ်ႈၵူၼ်းမၼ်းတင်းသဵင်ႈတင်းလူင် ၸူႉၵၼ်တုမ်ၵၼ်လႄႈၶျႃးတပ်ႉၵႃႈတီႈဝဵင်း ယႃႇႁတ်ႉ သေယဝ်ႉတိုၵ်းတေႃးမဵဝ်း ဢိသရေႇလဢေႃႈ။
၂၁ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ ၼၼ်ႉဢဝ်ၶုၼ်သိႁုၼ်ႇတင်းၵူၼ်းမၼ်းၵႃႈမီးၸိူဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်းဢိသရေႇလ လႄႈၶဝ်တိုၵ်းတေႃးယႃႉပႅတ်ႈၶဝ်ၼၼ်ႉဢေႃႈ။ၼင်ႇၼၼ်လႄႈမဵဝ်းဢိသရေႇလသိမ်းဢဝ် ၼမ်ႉဢဝ်လိၼ်ၵူၼ်းဢႃႇမေႃးရိဢၼ်မီးယူႇၵႃႈ တီႈမိူင်းၼၼ်ႉတင်းသဵင်ႈတင်းမူတ်းဢေႃႈ။
၂၂ ၶဝ်သိမ်းဢဝ်ၼမ်ႉဢဝ်လိၼ်ၵူၼ်းဢႃႇမေႃးရိ ၸိူဝ်းၼၼ်ႉတင်းသဵင်ႈတင်းမူတ်းၸႃႉၸဵမ်ၼမ်ႉႁွင်ႊဢႃႇၼုၼ်ႇ တေႃႇထိုင်ႁွတ်ႈ ၼမ်ႉႁွင်ႊယပ်ႉပုတ်ႉ ဢိၵ်ႇတင်းၸႃႉၸဵမ်ထိူၼ်ႇ တေႃႇထိုင်ႁွတ်ႈ ၼမ်ႉႁွင်ႊ ယေႃးတၢၼ်ႇ ဢေႃႈ။
၂၃ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉၼုၵ်ႉဢဝ်ၼမ်ႉဢဝ်လိၼ် ၵူၼ်းဢႃႇမေႃးရိၸိူဝ်းၼၼ်ႉပၼ်တီႈၵူၼ်းမဵဝ်းဢိသရေႇလ ယဝ်ႉလႄႈၸဝ်ႈ ႁဝ်းတၵ်းလႆႈသိမ်းဢဝ်ၸိူဝ်ႉၼင်ႇႁိုဝ်။
၂၄ ၸဝ်ႈႁဝ်းတၵ်းဢမ်ႇသိမ်းဢဝ်ၼမ်ႉလိၼ်ဢၼ်ၽြႃးၸဝ်ႈႁဝ်း ၶေႇမုသု ပၼ်တီႈၸဝ်ႈႁဝ်းၼၼ်ႉႁိုဝ်။မိူၼ်ၸိူဝ်ႉၼင်ႇၼၼ်ႁဝ်းတၵ်းလႆႈသိမ်းဢဝ်ၼမ်ႉလိၼ်ဢၼ် ထႃႇဝရႃႉၽြႃး ၽြႃးပဵၼ်ၸဝ်ႈပၼ်တီႈႁဝ်းၼၼ်ႉဢေႃႈ။
၂၅ ၸဝ်ႈႁဝ်းယိင်ႈၶႅၼ်းမျၢတ်ႈလီၼႃႇသပေႃႇလၵ်ႉ၊ လုၵ်ႈၸၢႆးၸိၽေႃႇ၊ၶုၼ်ႁေႃၶမ်းမေႃႇၽ၊ၼၼ်ႉႁိုဝ်။ၸွင်ႇမၼ်း ယၢမ်ႈၽိတ်းၵၼ်တင်းမဵဝ်းဢိသရေႇလႁိုဝ်။
၂၆ ယၢမ်ႈတိုၵ်းသိုၵ်းၵၼ်တင်းၶဝ်ႁိုဝ်။ၼႂ်းမိူဝ်ႈဢၼ်မဵဝ်းဢိသရေႇလယူႇၵႃႈတီႈဝဵင်း ႁေႇသၽုၼ်ႇ ဢိၵ်ႇတင်းဝၢၼ်ႈမၼ်းတင်းလၢႆဝဵင်း ဢႃႇရေႃႇ ဢိၵ်ႇတင်းဝၢၼ်ႈမၼ်းတင်းလၢႆ ဝၢၼ်ႈဝဵင်းဢၼ်မီးၸွမ်း ၼမ်ႉႁွင်ႊဢႃႇၼုၼ်ႇ တင်းသဵင်ႈတင်းလူင်သၢမ်ႇပၢၵ်ႇပီႊတဵမ်တဵမ်မႃးယဝ်ႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူဢမ်ႇဢဝ် ၶိုၼ်းမိူဝ်ႈယၢမ်းၼၼ်ႉ။
၂၇ ၵဝ်ဢမ်ႇႁဵတ်းၽိတ်းပိူင်ႈၸဝ်ႈႁဝ်း။ၸဝ်ႈႁဝ်းတိုၵ်းတေႃးၵဝ်လႄႈႁဵတ်းၽိတ်းပိူင်ႈၵဝ်ဢေႃႈ။ႁႂ်ႈထႃႇဝရႃႉၽြႃးဢၼ်ပဵၼ်ၵူၼ်းလူင်ဢၼ်ၸီႇယၢင်ႇတြႃးၼၼ်ႉ ၸီႇယၢင်တႅပ်းတတ်းတြႃးဝၼ်းမိူဝ်ႈၼႆႉ ၵႃႈတီႈဝူင်ႈၵၢင်ၵူၼ်းမဵဝ်းဢိသရေႇလ တင်းၵူၼ်းမဵဝ်း ဢမ်ႇမုၼ်ႇ သေၵမ်းလူၺ်ႈ၊ ဝႃႈၼင်ႇၼႆ ဢေႃႈ။
၂၈ ၵူၺ်းၵႃႈၶုၼ်ႁေႃၶမ်းၼၼ်ႉယင်းဢမ်ႇထွမ်ႇဢမ်ႇဢဝ်ၵႂၢမ်းဢၼ်ယေႇၽသ သင်ႇလၢတ်ႈၵႂႃႇၼၼ်ႉလႄႈယူႇဢေႃႈ။
၂၉ မိူဝ်ႈၼၼ်ႉဝိၺိၺ်ႇထႃႇဝရႃႉၽြႃး တူၵ်းႁွတ်ႈၵႃႈၼိူဝ်ယေႇၽသ လႄႈမၼ်းၽႃႇလတ်းမိူင်းၵိလတ်ႉ တင်းမိူင်းမၼႃႇသေႇ သေယဝ်ႉပူၼ်ႉဝဵင်းမိၸပႃႇမိူင်းၵိလတ်ႉၵႂႃႇလႄႈ ၶီႇသိုၵ်းၵႂႃႇၸူးၵႃႈတီႈဢၼ်ၵူၼ်းမဵဝ်း ဢမ်ႇ မုၼ်ႇ မီးၼၼ်ႉဢေႃႈ။
၃၀ ယေႇၽသ ၼၼ်ႉႁဵတ်းၵတိသႅတ်ႈၸႃႇတီႈထႃႇဝရႃႉၽြႃးသေလႄႈဝႃႈ၊- ပေႃးၸဝ်ႈႁဝ်းဢဝ်ၵူၼ်းမဵဝ်း ဢမ်ႇမုၼ်ႇ တင်းလၢႆဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈဢမၢၼ်ႇၶၼ်ပဵၼ်ၸိုင် မိူဝ်ႈဢၼ်ၶႃႈၸဝ်ႈ
၃၁ ပႄႉသိုၵ်းဢမ်ႇမုၼ်ႇလႄႈၶိုၼ်ပွၵ်ႈမႃး ၼၼ်ႉၵေႃႉဢၼ်ဢွၵ်ႇသေ ၵႃႈၼႂ်းႁူးၽၵ်းတူႁိူၼ်းၶႃႈၸဝ်ႈမႃး ႁႂ်ႈလႆႈႁပ်ႉႁူဝ်တၢင်းၶႃႈၸဝ်ႈၵႃႈမီးၼၼ်ႉၶႃႈၸဝ်ႈတၵ်းႁႂ်ႈၶဝ်လႆႈပဵၼ်ဢုၵ်ႉၸႃႇထႃႇဝရႃႉၽြႃး ဢမၢၼ်ႇၶၼ်ပဵၼ်လႄႈ ၶႃႈၸဝ်ႈတၵ်းႁဵတ်းယိၸ်ႉဢၼ်တုတ်ႇၽႆးပုၵ်ႉၸေႃႇတီႈၸဝ်ႈႁဝ်းၶႃႈဢေႃႈ၊ ဝႃႈၼင်ႇၼႆသေယဝ်ႉ ယေႇၽသ ၶီႇသုၵ်းၵႂႃႇၸူးၵႃႈတီႈၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉလႄႈ တိုၵ်းၵၼ်တင်းၶဝ် ဢေႃႈ။
၃၂ ထႃႇဝရႃႉၽြႃးဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမၼ်းသေယဝ်ႉ မၼ်းတိုၵ်းတေႃးယႃႉပႅတ်ႈဝဵင်းသၢဝ်း ၼိုင်ႈၸႃႉၸဵမ်ဝဵင်းဢႃႇရေႃႇ တေႃႇထိုင်ႁွတ်ႈဝဵင်းမိၼ်ႇၼိတ်ႉ ဢိၵ်ႇတင်း ဢႃႇပေႇလႃႉၶေႇရမိမ်ႇၼၼ်ႉလႄႈဢဝ်ၶဝ်တၢႆၼမ်ၼႃႇလူင်လၢင်ဢေႃႈ။
၃၃ ၼင်ႇၼၼ်လႄႈ ၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉလႆႈတူၵ်းသုမ်းၵႃႈတီႈၽၢႆႇၼႃႈၵူၼ်းမဵဝ်းဢိသရေႇလ တင်းလၢႆဢေႃႈ။
၃၄ မိူဝ်ႈဢၼ်ယေႇၽသ ၶိုၼ်းႁွတ်ႈမႃးၵႃႈတီႈႁိူၼ်းမၼ်းၵႃႈၼႂ်းဝဵင်းမိၸပႃႇ ၼၼ်ႉၸိုင်လုၵ်ႈယိင်းမၼ်းႁႆႇၵွင်ယူႇၵႃႈဝႅၼ်ယူႇသေလႄႈ ဢွၵ်ႇမႃးႁႂ်ႈလႆႈႁပ်ႉႁူဝ်တၢင်းမၼ်းဢေႃႈ။မၼ်းပဵၼ်လုၵ်ႈယိင်းၵေႃႉလဵဝ်ၵူၺ်းၵႃႈတီႈမၼ်းလႄႈ ၼွၵ်ႈသေမၼ်းၼၼ်ႉမၼ်းဢမ်ႇမီးလုၵ်ႈ ၸၢႆးလုၵ်ႈယိင်း။
၃၅ မၼ်းႁၼ်လုၵ်ႈယိင်းမၼ်းၼၼ်ႉသေယဝ်ႉ တိုတ်ႉသိၵ်ႇၶူဝ်းၼုင်ႈမၼ်းသေလႄႈ လၢတ်ႈဝႃႈ၊-ဢလူဝ်ႉ၊ဢလူဝ်ႉ။လုၵ်ႈယိင်းၵဝ်ဢူၺ်း။မႂ်းႁဵတ်းႁႂ်ႈလႆႈ ယၢပ်ႇၸႂ်ၶၢၼ်ၸႂ်ၼႃႇလူင်လၢင်ယဝ်ႉလူင်ပေႇ။ႁဵတ်းႁႂ်ႈၵဝ်လူႉသုမ်းယဝ်ႉလူင်ပေႇ။ၵဝ်ယင်းပေႃးလႆႈႁဵတ်းၵတိသႅတ်ႈၸႃႇတေႃႇထႃႇဝရႃႉၽြႃးဝႆႉယဝ်ႉ။
၃၆ ဢ ၶႂၢင်ႉဢၼ်တၵ်းလႆႈၼုၵ်ႉဢဝ်ၼၼ်ႉဢမ်ႇမီး၊ မိူဝ်ႈဢၼ်ဝႃႈၼင်ႇၼႆၸိုင် လုၵ်ႈယိင်းမၼ်းၼၼ်ႉလၢတ်ႈလႄႈဝႃႈ၊-ၸဝ်ႈပေႃႈဢူၺ်း။ပေႃးၸဝ်ႈပေႃႈလႆႈဝႃႈဢွၵ်ႇသူပ်းႁဵတ်းသႅတ်ႈ ၸႃႇတီႈထႃႇဝရႃႉၽြႃးယဝ်ႉၸိုင်ႁဵတ်းတီႈၵဝ်ၶႃႈ ၸွမ်းၵႃႈၼင်ႇဢၼ် လႆႈဝႆႉသႅတ်ႈၸႃႇယဝ်ႉၼၼ်ႉသေၵမ်းၶႃႈ။လွင်ႈမၼ်းၸမ်းထႃႇဝရႃႉၽြႃး ယင်းပေႃးတွပ်ႇတႅၼ်းပၼ်ဢပျႅတ်ႈတီႈရၢၼ်ႇသူႇၸဝ်ႈပေႃႈ ဢၼ်ပဵၼ်ၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉႁႂ်ႈၸႂ်ၸဝ်ႈပေႃႈလႆႈပျေႇယဝ်ႉ၊ ဝႃႈၼင်ႇၼႆလႄႈ သမ်ႉလၢတ်ႈတီႈပေႃႈမၼ်းထႅင်ႈလႄႈဝႃႈ၊-
၃၇ ၶႅၼ်းတေႃႈပၼ်ဢၶႂၢင်ႉဢၼ်ၼိုင်ႈတီႈၵဝ်ၶႃႈသေၵမ်းၶႃႈ။ႁႂ်ႈၵဝ်ၶႃႈလႆႈယူႇလွတ်ႈလႅဝ်းသွင်လိူၼ်တဵမ်တဵမ်လႄႈ ႁႂ်ႈၵဝ်ၶႃႈလႆႈၵႂႃႇလႄႇလဵပ်ႈ ၵႃႈၼိူဝ်သၼ်လွႆတေးလွႆတင်းလၢႆႇလႄႈ လႆႈႁႆႈႁွင်ႉလူၺ်ႈၵၼ်တင်းၵေႃႉသေႈၵဝ်ၶႃႈတင်းလၢႆ ၵွပ်ႈပိူဝ်ႈၵဝ်ၶႃႈယင်းပဵၼ်သၢဝ်ၵၢၼ်ၺႃႇယူႇၼၼ်ႉသေၵမ်းၶႃႈ၊ ဝႃႈၼင်ႇၼႆလႄႈ ပေႃႈ မၼ်းၵေႃႈလၢတ်ႈဝႃႈ၊-
၃၈ ၵႂႃႇတႃႉ၊ဝႃႈၼင်ႇၼႆသေလႄႈၶိၼ်းဝႆႉသွင်လိူၼ်လႄႈပွႆႇမၼ်းၵႂႃႇသေဢေႃႈ။မၼ်းဢိၵ်ႇတင်း ၵေႃႉသေႈမၼ်းတင်းလၢႆ ဢွၼ်ၵၼ်ၵႂႃႇလႄႈ ႁွင်ႉႁႆႈလူၺ်ႈလွင်ႈဢၼ်မၼ်းယင်းပဵၼ်သၢဝ်ၵၢၼ်ႇၺႃႇယူႇၼၼ်ႉ ၵႃႈၼိူဝ်သၼ်လွႆတေးလွႆဢေႃႈ။
၃၉ မိူဝ်ႈဢၼ်ၸေးသွင်လိူၼ်ယဝ်ႉၼၼ်ႉ မၼ်းၶိုၼ်းမႃးၸူးတီႈပေႃႈမၼ်းလႄႈပေႃႈမၼ်းဢဝ်မၼ်းႁဵတ်းၸွမ်းၵႃႈၼင်ႇဢၼ်ၵတိသႅတ်ႈၸႃႇ ဢၼ်မၼ်းႁဵတ်းဝႆႉၼၼ်ႉမီးၼၼ်ႉဢေႃႈ။မၼ်းပဵၼ်ၵေႃႉဢၼ်ဢမ်ႇပႆႇ တွၼ်ႉယၢမ်ႈတိူဝ်ႉထုၵ်ႇၵၼ်တင်းၵူၼ်းၸၢႆး။
၄၀ လိုၼ်းသေလွင်ႈၼၼ်ႉယဝ်ႉ ပဵၼ်မႃးထုင်းၸၢမ်ႇၵူၼ်းမဵဝ်းဢိသရေႇလၶဝ်ဢၼ်လုၵ်ႈယိင်းသၢဝ်ဢိသရေႇလ တင်းလၢႆဢွၼ်ၵၼ်ဢွၵ်ႇၵႂႃႇႁႂ်ႈလႆႈယွင်ႈယေႃး လုၵ်ႈယိင်းသၢဝ်ယေႇၽသ၊ၵူၼ်းမဵဝ်းၵိလတ်ႉ၊ ၼၼ်ႉသီႇဝၼ်းတဵမ်တဵမ်ၵူႈပီႊဢေႃႈ။