Chapter
၇
ၵိတိဢုၼ်ႇတိုၵ်းပႄႉမိတျၢၼ်ႇ
၁ ယေႇရုပ်ႉပႃႇလဢၼ်ဝႃႈၵိတိဢုၼ်ႇၼၼ်ႉ ဢိၵ်ႇလူၺ်ႈၵၼ်တင်းၶဝ်ၸိူဝ်းဢၼ်မီးတီႈမၼ်း ၵႃႈမီးတင်းသဵင်ႈတင်းလူင်ၼၼ်ႉဢွၼ်ၵၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ၶျႃးတပ်ႉၶဝ်ၵႃႈတီႈႁိမ်းၼမ်ႉဢွၵ်ႇႁူးႁႃႇရုတ်ႉလႄႈ တပ်ႉမိတျၢၼ်ႇၼၼ်ႉမီးၵႃႈတီႈၽၢႆႇတၢင်းႁွင်ႇၶဝ်ၵႃႈတီႈႁိမ်းလွႆမေႃႇရေႇ ၵႃႈၼႂ်းပၢင်ႇႁူၺ်ႈၼၼ်ႉဢေႃႈ။
၂ ထႃႇဝရႃႉၽြႃးၵေႃႈ မီးဢမိင်ႉတီႈ ၵိတိဢုၼ်ႇ လႄႈဝႃႈ၊-ၵူၼ်းဢၼ်ပႃးတီႈမႂ်းၼႆႉပဵၼ်ဢၼ်ၼမ်ၼႃႇလူင်လၢင်လႄႈ ၵဝ်တၵ်းဢမ်ႇဢဝ်ၵူၼ်းမိတျၢၼ်ႇတင်းလၢႆဢၢပ်ႈပၼ်ၵႃႈၼႂ်းမိုဝ်းၶဝ်။ပေႃးဢမ်ႇၼၼ်ၵူၼ်းမဵဝ်းဢိသရေႇလ တၵ်းယူႇၽၢႆႇၼိုင်ႈတင်းၵဝ်သေလႄႈဢုပ်ႇဢၢတ်ႇဝႃႈ၊-ႁႅင်းမိုဝ်းၵဝ်ၼႆႉၵႄႇသႄႇၶျွတ်ႈဢဝ် ၵဝ်ယဝ်ႉ၊ဝႃႈၼင်ႇၼႆဢိူဝ်ႈ။
၃ ပိူဝ်ႈၼႆႉလႄႈမႂ်းၵႂႃႇလႄႈပဝ်ႇသေႃႇထိုင်ႁူၵူၼ်းတင်းလၢႆလႄႈဝႃႈ၊- ႁႂ်ႈၵေႃႉဢၼ်ၸၢင်ႊၵူဝ်ၸၢင်ႊႁလေႄႈ တူၵ်းၸႂ်ၼၼ်ႉဝၢႆႇၶိုၼ်းလႄႈလုၵ်ႉသေၵႃႈတီႈလွႆၵိလတ်ႉၼႆႉၶိုၼ်းမိူဝ်းၵႂႃႇတႃႉ၊ ဝႃႈၼင်ႇၼႆလႄႈ ၵူၼ်းသွင်မိုၼ်ႇပၢႆသွင်ႁဵင် ဢွၼ်ၵၼ်ၶိုၼ်းမိူဝ်းၵႂႃႇဢေႃႈ။ၵိုတ်းဝႆႉၵူၼ်းမိုၼ်ႇၼိုင်ႈၵူၺ်း ဢေႃႈ။
၄ ထႃႇဝရႃႉၽြႃးသမ်ႉမီးဢမိင်ႉတီႈၵိတိဢုၼ်ႇထႅင်ႈလႄႈဝႃႈ၊- ၵူၼ်းၸိူဝ်းၼႆႉယင်းၼမ်ၼႃႇလူင်လၢင်ဢေႃႈ။ႁွင်ႉၶဝ်လူင်းၸူးၵႃႈတီႈတႃႈၼမ်ႉတႃႉ။ၵဝ်တၵ်းၸၢမ်းတူၺ်းၶဝ် ၵႃႈတီႈၼၼ်ႉပုၼ်ႈမႂ်းဢေႃႈ။မိူဝ်ႈၼၼ်ႉပေႃးၵဝ်လၢတ်ႈဝႃႈ၊- ႁွင်ႉဢဝ်ၵူၼ်းၸိူဝ်းၼၼ်ႉၵႂႃႇၵႃႈတီႈတႃၼမ်ႉတႃႉ။ၵဝ်တၵ်းလိူၵ်ႈပုၼ်ႈမႂ်းဢေႃႈ။ၵေႃႉဢၼ်ၵဝ်ဝႃႈတၵ်းလႆႈၵႂႃႇ လူၺ်ႈၵၼ်တင်းမႂ်းၼၼ်ႉၵေႃႉၼၼ်ႉတၵ်းလႆႈၵႂႃႇဢေႃႈ။ၵေႃႉဢၼ်ၵဝ်ဝႃႈ တၵ်းဢမ်ႇလႆႈၵႂႃႇလူၺ်ႈၵၼ်တင်းမႂ်းၼၼ်ႉ ၵေႃႉၼၼ်ႉတၵ်းဢမ်ႇလႆႈၵႂႃႇၵူၺ်း၊ ဝႃႈၼင်ႇၼႆ လႄႈ
၅ ၵိတိဢုၼ်ႇၵေႃႈႁွင်ႉဢဝ်ၵူၼ်းၸိူဝ်းၼၼ်ႉလူင်းၸူးၵႃႈတီႈတႃၼမ်ႉလႄႈ ထႃႇဝရႃႉၽြႃးမီးဢမိင်ႉတီႈမၼ်းလႄႈဝႃႈ၊- ၽႄဢဝ်ၵေႃႉဢၼ်ဢဝ်လိၼ်ႉသေလႄႈလေးၵိၼ်ၼမ်ႉ ၸိူဝ်ႉၼင်ႇမႃႇၼၼ်ႉၸုမ်းၼိုင်ႈဢိၵ်ႇတင်း ၵေႃႉဢၼ်ဢဝ်ႁူဝ်ၶဝ်ႇတဝ်ႉသေလႄႈၵူမ်ႈၵိၼ်ၼမ်ႉၼၼ်ႉၸုမ်းၼိုင်ႈ၊ ဝႆႉႁင်းၽႂ်ႇႁင်းမၼ်းတႃႉ၊ဝႃႈ ၼင်ႇၼႆဢေႃႈ။
၆ မိူဝ်ႈၼၼ်ႉၶဝ်ၸိူဝ်းဢၼ်ဢဝ်ဢူင်ႈမိုဝ်းၶဝ်ၵွၼ်ႉၼမ်ႉသေလႄႈ လေးၵိၼ်ၼၼ်ႉၼပ်ႉဢၢၼ်ႇပွင်းၵၼ်မီႈၵူၼ်းသၢမ်ပၢၵ်ႇဢေႃႈ။ၵူၼ်းဢၼ်ၵိုတ်းဢၼ်ၵျၢၼ်ႇၵႃႈမီးၸိူဝ်းၼၼ်ႉ ၶဝ်ဢဝ်ႁူဝ်ၶဝ်ႇၶဝ်တဝ်ႉသေလႄႈလေးၵူမ်ႈမူပ်ႇၵိၼ်ၼမ်ႉဢေႃႈ။
၇ ထႃႇဝရႃႉၽြႃးမီးဢမိင်ႉတီႈၵိတိဢုၼ်ႇလႄႈဝႃႈ၊- ၵဝ်တၵ်းဢဝ်တင်းၵူၼ်းဢၼ်လေးလႄႈၵိၼ်ၼမ်ႉ သၢမ်ပၢၵ်ႇၵေႃႉၼၼ်ႉသေလႄႈ ၵဝ်တၵ်းၵႄႇသႄႇၶျွတ်ႈဢဝ်မႂ်းလႄႈ ဢဝ်ၵူၼ်းမိတျၢၼ်ႇ တင်းလၢႆ ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။ႁႂ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉႁႂ်ႈၶဝ်မိူဝ်းၵႂႃႇၵႃႈတီႈတီႈယူႇၶဝ်သေတႃႉ၊ ဝႃႈၼင်ႇၼႆဢေႃႈ။
၈ ၶဝ်ဢွၼ်ၵၼ်ဢဝ်ၸရိပ်ႈတၢင်းၵိၼ်ၵူၼ်းတင်းလၢႆဢိၵ်ႇတင်း ၼႄးၶရႃႇၶဝ်ၼၼ်ႉသေလႄႈမၼ်းပွႆႇၵူၼ်းမဵဝ်းဢိသရေႇလ ဢၼ်ၵိုတ်းဢၼ်ၵျၢၼ်ႇတင်းသဵင်ႈတင်းလူင် ၼၼ်ႉမိူဝ်းၵႂႃႇၸူးၵႃႈတီႈသုမ်ႉထဵင်ၶဝ်သေယဝ်ႉ၊ဝႆႉၵိုတ်းၵူၼ်းသၢမ်ပၢၵ်ႇၼၼ်ႉၵူၺ်းဢေႃႈ။တပ်ႉၵူၼ်းမိတျၢၼ်ႇ ၸိူဝ်းၼၼ်ႉမီးၵႃႈတီႈႁၢၼ်ႉတႂ်ႈမၼ်းၵႃႈၼႂ်းပၢင်ႇႁူၺ်ႈဢေႃႈ။
၉ၼႂ်းၶမ်ႈၼၼ်ႉၵမ်းလဵဝ် ထႃႇဝရႃႉၽြႃးမီႈဢမိင်ႉတီႈမၼ်းလႄႈဝႃႈ၊- လုၵ်ႉတႃႉ။ၶီႇသိုၵ်းလူင်းၵႂႃႇၸူးၵႃႈ တီႈတပ်ႉၼၼ်ႉတႃႉ။
၁၀ ၵဝ်လႆႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉ။ပေႃးမႂ်းဢမ်ႇႁတ်းၶီႇသိုၵ်းလူင်းၵႂႃႇၸူးၸိုင်ပႃးဢဝ်ၶႃႈမႂ်းၽုရသေလႄႈ လူင်းၸွမ်းမၼ်းၵႂႃႇတႃႉ။မႂ်းတၵ်းငိၼ်းလွင်ႈဢၼ်ၶဝ်လၢတ်ႈၵၼ် ၸိူဝ်ႉၼင်ႇ ႁိုဝ်ၼၼ်ႉဢေႃႈ။
၁၁ လိုၼ်းၼၼ်ႉမႂ်းတၵ်းမီးၸႂ်ႁႅင်းယႂ်ႇမႃးႁႂ်ႈလႆႈၶီႇသိုၵ်း လူင်းၵႂႃႇၸူးၵႃႈတီႈတပ်ႉၼၼ်ႉဢေႃႈ၊ဝႃႈၼင်ႇၼႆလႄႈ မၼ်းပႃးဢဝ်ၶႃႈမၼ်း ၽုရသေလႄႈ လူင်းၵႂႃႇၸူးၵႃႈတီႈႁိမ်းတီႈသုတ်းတပ်ႉ တီႈဢၼ်ၵူၼ်းတင်းလၢႆမႄးႁႅၼ်းလၢၵ်ႈၼၢၵ်ႈဝႆႉယဝ်ႉ ၼၼ်ႉဢေႃႈ။
၁၂ ၵူၼ်းမိူင်းမိတျၢၼ်ႇဢိၵ်ႇတင်းၵူၼ်းမိူင်းဢႃႇမလိၵ်ႉ တင်းၵူၼ်းမိူင်းဝၼ်းဢွၵ်ႇတင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်ၶျႃးၼွၼ်းယူႇၵႃႈတီႈပၢင်ႇႁူၺ်ႈၼၼ်ႉၼမ်ၼႃႇ ထၼ်ႈပေႃး မိူၼ်ႇၸိူဝ်ႉၼင်ႇမႅင်းၵႅင်းဢေႃႈ။ၵလႃႇဢုၵ်ႉၶဝ်ၵေႃႈၼမ်ၼႃႇမိူၼ်ၸိူဝ်ႉၼင်ႇမဵတ်ႉသၢႆးၼမ်ႉသမ်ႇမုၵ်ႉတြႃႇ ထၼ်ႈပေႃးဢမ်ႇ ႁူႉလႆႈဢေႃႈ။
၁၃ မိူဝ်ႈဢၼ်ၵိတိဢုၼ်ႇႁွတ်ႈထိုင်ၼၼ်ႉၸိုင်ၵူၼ်းၵေႃႉၼိုင်ႈ ၶိုၼ်းလၢတ်ႈလွင်ႈ ဢၼ်မၼ်းလႆႈၼွၼ်းၽၼ်ႁၼ်ၼၼ်ႉ တီႈၵေႃႉသေႈမၼ်းလႄႈဝႃႈ၊-ဢၼ်ၵဝ်ၼွၼ်းၽၼ်ႁၼ်ၸမ်း ၶဝ်ႈမုၼ်းမူႉယေႃးၶႅပ်းၼိုင်ႈၵိင်ႈမႃးသႂ်ႇၵႃႈတီႈၼႂ်းတပ်ႉမိတျၢၼ်ႇလႄႈ တိူဝ်ႉထုၵ်ႇမႅၼ်ႈသုမ်ႉထဵင်လင်ၼိုင်ႈသေယဝ်ႉ ၶႂၢမ်ႈဝိၼ်ႈၵိူၼ်ႇ ၶျႃးတူၵ်းပႅတ်ႈသေဢေႃႈ၊ မိူဝ်ႈဢၼ်ဝႃႈၼင်ႇၼႆၼၼ်ႉၸိုင်၊ၵေႃႉသေႈမၼ်းၼၼ်ႉၶိုၼ်းလၢတ်ႈလႄႈဝႃႈ၊-
၁၄ ပဵၼ်တၢင်ႇၸိူဝ်ႉတၢင်မဵဝ်းဢမ်ႇၸႂ်ႈ။ပဵၼ်လၢပ်ႈၵိတိဢုၼ်ႇလုၵ်ႈၸၢႆးယေႃးသၵူၼ်းမဵဝ်းဢိသရေႇလ ၼၼ်ႉဢေႃႈ။ၽြႃးပဵၼ်ၸဝ်ႈလႆႈဢဝ်ၵူၼ်းမဵဝ်းမိတျၢၼ်ႇ ဢိၵ်ႇတင်းပူဝ်ႇပႃႇၶဝ်တင်းသဵင်ႈတင်းလူင် ဢၢပ်ႈပၼ်ၵႃႈၼႂ်းမိုဝ်း မၼ်းယဝ်ႉ၊ဝႃႈၼင်ႇၼႆဢေႃႈ။
၁၅ မိူဝ်ႈဢၼ်ၵိတိဢုၼ်ႇငိၼ်းတၢင်းဢၼ်ၶႆႊဢၼ်လၢတ်ႈ တၢင်းဢၼ်ၼွၼ်းၽၼ်ႁၼ် ဢိၵ်ႇတင်းဢၼၢၵ်ႈ ဢထိၵ်ႈပႄႇမၼ်းၼၼ်ႉၸိုင်မၼ်းႁဵတ်းဝၢတ်ႈလႄႈ ၶိုၼ်းမိူဝ်းၸူးၵႃႈတီႈတပ်ႉဢိသရေႇလသေယဝ်ႉလၢတ်ႈဝႃႈ၊-ဢွၼ်ၵၼ်လုၵ်ႉတႃႉ။ထႃႇဝရႃႉၽြႃးလႆႈဢဝ်ပူဝ်ႇပႃႇမိတျၢၼ်ႇတင်းလၢႆဢၢပ်ႈပၼ်ၵႃႈၼႂ်းမိုဝ်းသူယဝ်ႉ၊ ဝႃႈၼင်ႇၼႆဢေႃႈ။
၁၆ မိူဝ်ႈၼၼ်ႉ မၼ်းၽႄၵူၼ်းသၢမ်ပၢၵ်ႇၼၼ်ႉႁဵတ်းသၢမ်မုၵ်ႉသၢမ်ၸုမ်းသေလႄႈ ဢဝ်ၼႄးၶရႃႇတင်းလၢႆ ဢိၵ်ႇတင်း မေႃႈဢၼ်ပဝ်ႇတင်းလၢႆတင်းၵၢၼ်ႈၽႆးဢၼ်ပႃးၵႃႈၼႂ်းမေႃႈၸိူဝ်းၼၼ်ႉ သႂ်ႇပၼ်ၵႃႈၼႂ်းမိုဝ်းၶဝ်ၵူႈၵေႃႉဢေႃႈ။
၁၇ မၼ်းသင်ႇလၢတ်ႈလႄႈဝႃႈ၊- တူၺ်းၵဝ်လႄႈ ႁဵတ်းၸွမ်းၵႃႈၼင်ႇဢၼ်ၵဝ်ႁဵတ်းၼၼ်ႉတႃႉ။မိူဝ်ႈဢၼ်ၵဝ် ႁွတ်ႈထိုင်ၵႃႈတီႈႁိမ်း တီႈသုတ်းတပ်ႉၼၼ်ႉၸိုင် သူဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ၵဝ်ႁဵတ်းၼၼ်ႉတႃႉ။
၁၈ မိူဝ်ႈဢၼ်ၵဝ်ဢိၵ်ႇတင်းၶဝ်ၸိူဝ်းဢၼ်ပႃးတီႈၵဝ်ၵႃႈမီးၼၼ်ႉ ပဝ်ႇၼႄးၶရႃႇၼၼ်ႉၸိုင် သူဢွၼ်ၵၼ်ပဝ်ႇၼႄးၶရႃႇသူ ၵႃႈတီႈႁိမ်းႁွမ်းတပ်ႉၼၼ်ႉတင်းတပ်ႉၵူႈၽၢႆႇၵူႈပႃႈသေလႄႈႁွင်ႉသဵၼ်ႇဝႃႈ၊-ပုၼ်ႈထႃႇဝရႃႉၽြႃးဢိၵ်ႇတင်းပုၼ်ႈၵိတိဢုၼ်ႇဢေႃႈ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၉ ၼင်ႇၼၼ်လႄႈ ၵိတိဢုၼ်ႇ ဢိၵ်ႇတင်းၵူၼ်းပၢၵ်ႇၼိုင်ႈ ဢၼ်ပႃးတီႈမၼ်းၸိူဝ်းၼၼ်ႉႁွတ်ႈထိုင်ၵႃႈတီႈႁိမ်းတီႈသုတ်းတပ်ႉ ၼႂ်းငဝ်ႈၶိင်ႇတဵင်ၶိုၼ်းမိူဝ်ႈဢၼ်ၶဝ်ၸင်ႇၸႃႉပုတ်ႉၵၼ်ပႂ်ႉၵင်ႈၼၼ်ႉလႄႈၶဝ်ဢွၼ်ၵၼ်ပဝ်ႇၼေးၶရႃႇ လႂ် ပေႃႉမေႃႈၶဝ်ဢၼ်မိုဝ်းၶဝ်ယိပ်းၵမ်ယူႇ ၸိူဝ်းၼၼ်ႉတႅၵ်ႇဢေႃႈ။
၂၀ ၵူၼ်းသၢမ်မုၵ်ႉသၢမ်ၸုမ်းၸိူဝ်းၼၼ်ႉပဝ်ႇၼႄး ၶရႃႇလႄႈပေႃႉမေႃႈတႅၵ်ႇသေယဝ်ႉၵႃႈတီႈမိုဝ်းၶွၼ်သၢႆႉသမ်ႉယိပ်းၵမ်ၵၢၼ်ႈၽႆးယူႇ၊ ၵႃႈတီႈမိုဝ်းၶွၼ်ၶႂႃ သမ်ႉယိပ်းၵမ်ၼႄးၶရႃႇပုၼ်ႈဢၼ်တၵ်းပဝ်ႇၼၼ်ႉယူႇသေလႄႈဢွၼ်ၵၼ်ႁွင်ႉသဵၼ်ႇဝႃႈ၊-ပဵၼ်လၢပ်ႇပုၼ်ႈထႃႇဝရႃႉၽြႃးဢိၵ်ႇတင်း ၵိတိဢုၼ်ႇဢေႃႈ၊ ဝႃႈၼင်ႇၼႆဢေႃႈ။
၂၁ ၶဝ်ၸုၵ်းယူႇၵႃႈၼႂ်းတီႈၽႂ်ႇတီႈမၼ်းၵူႈၵေႃႉၵူႈၵူၼ်း ၵႃႈတီႈလဵပ်ႈႁွပ်ႈတပ်ႉၼၼ်ႉလႄႈပူဝ်ႇပႃႈၵူၼ်းသိုၵ်းတင်းသဵင်ႈတင်းလူင် ၸိူဝ်းၼၼ်ႉ ၶုၼ်ႇလႅၼ်ႈယူႇ၊ ႁွင်ႉသႅၼ်ႇယူႇသေလႄႈဢွၼ်ၵၼ်ဢွၵ်ႇပၢႆဢေႃႈ။
၂၂ ၶဝ်ပဝ်ႇၼႄးၶရႃႇသၢမ်ပၢၵ်ႇၼၼ်ႉလႄႈ ထႃႇဝရႃႉၽြႃးႁႂ်ႈၵူၼ်းသိုၵ်းၶဝ်ၵႃႈမီးၼၼ်ႉၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ် ဢဝ်လၢပ်ႇၶဝ်ၽၼ်းၵၼ်လႄႈ ပူဝ်ႇပႃႇၵူၼ်းသိုၵ်းၸိူဝ်းၼၼ်ႉဢွၼ်ၵၼ်ပၢႆၸူးၵႃႈတီႈဝဵင်းဝိတ်ႉသိတ်ႉတႃႇၼႂ်းတီႈ ၸေႇရရတ်ႉ ဢိၵ်ႇတင်းၵႃႈတီႈလိၼ်ဢႃႇပေႇရမႁေႃႇလ ၵႃႈႁိမ်းဝဵင်း တပ်ႉပတ်ႉၼၼ်ႉဢေႃႈ။
၂၃ ၵူၼ်းမဵဝ်းဢိသရေႇလတင်းလၢႆဢွၵ်ႇသေၵႃႈတီႈဢိူင်ႇၼပ်ႉထလိ ဢိူင်ႇဢႃႇသႃႇတင်းဢိူင်ႇမၼႃႇသေႇ မႃးၸူႉၵၼ်တုမ်ၵၼ်သေလႄႈလိုပ်ႈၸွမ်းလမ်းၸွမ်းၵူၼ်းမိတျၢၼ်ႇၸိူဝ်းၼၼ်ႉဢေႃႈ။
၂၄ ၵိတိဢုၼ်ႇ ၵေႃႈပွႆႇၸႂ်ႉတမၢၼ်ႇတင်းလၢႆၵႂႃႇၵႃႈတီႈၼိူဝ်ႁၢၼ်ႉလွႆဢေႇၽရိမ်ႇ ၵူႈတီႈၵူႈလႅၼ်လႄႈသင်ႇလၢတ်ႈလႄႈဝႃႈ၊-ဢွၼ်ၵၼ်လူင်းမႃးႁႂ်ႈလႆႈႁႄႉတၢင်းၵူၼ်းမိတျၢၼ်ႇၸိူဝ်းၼၼ်ႉလႄႈ ဢဝ်ၼမ်ႉႁွင်ႊတေႃႇထိုင်ႁွတ်ႈဝၢၼ်ႈပိတ်ႉပႃႇရ ဢၼ်ဝႃႈၼမ်ႉႁွင်ႊယေႃးတၢၼ်ႇၼၼ်ႉဢွၼ်တၢင်းၶဝ်တႃႉ၊ ဝႃႈၼင်ႇၼႆလႄႈၵူၼ်းဢေႇၽရိမ်ႇ တင်းသဵင်ႈတင်းလူင်ၸူႉၵၼ်တုမ်ၵၼ်လႄႈဢဝ်ၼမ်ႉႁွင်ႊတေႃႇထိုင်ႁွတ်ႈဝၢၼ်ႈ ပိတ်ႉပႃႇရ ဢၼ်ဝႃႈၼမ်ႉႁွင်ႊယေႃႇတၢၼ်ႇၼၼ်ႉဢေႃႈ။
၂၅ ၶဝ်တိၵမ်ဢဝ်ၶုၼ်ပူဝ်ႇၶျူၵ်ႉမိတျၢၼ်ႇသွင်ၵေႃႉ ဢၼ်ဝႃႈ ဢေႃႇရၽတင်းၸေႇၽ လႄႈ ဢဝ်ဢေႃႇရၽတၢႆၵႃႈၼိူဝ်မၢၵ်ႇႁိၼ်ဢေႃႇရၽ ဢဝ်ၸေႇၽတၢႆၵႃႈတီႈၶိူင်ႈၼူတ်ႈမၢၵ်ႇၸပိတ်ႉၸေႇၽ ၼၼ်ႉသေယဝ်ႉ၊လိုပ်ႈၸွမ်းလမ်းၸွမ်းၵူၼ်းမိတျၢၼ်ႇ ၸိူဝ်းၼၼ်ႉလႄႈဢဝ်ၵွၵ်းႁူဝ်ဢေႃႇရၽ တင်းၵွၵ်းႁူဝ်ၸေႇၽ ၼၼ်ႉမႃးၸူးၵႃႈတီႈ ၵိတိဢုၼ်ႇၽၢႆႇပုၼ်ႉၼမ်ႉႁွင်ႊယေႃးတၢၼ်ႇၼၼ်ႉဢေႃႈ။