Chapter
၁၅
သၢမ်ႇသုၼ်ႇတွပ်ႇသူၺ်ႈၽိလိပ်ႉတိ
၁ လိုၼ်းၼၼ်ႉႁိုင်တၢၼ်ႇတၢၼ်ႇသေယဝ်ႉ ၼႂ်းၶိင်ႇမိူဝ်ႈဢၼ်ပၢတ်ႇၶဝ်ၵျူင်ႇၼၼ်ႉ သၢမ်ႇသုၼ်ႇ ပႃးဢဝ်ပႄႉဢွၼ်ႇသေလႄႈ ၵႂႃႇႁႂ်ႈလႆႈသူႇလႆႈၸႂ်းမေးမၼ်းလႄႈၵျၢမ်ႇငႃ တၵ်းၶဝ်ၸူးတီႈမၼ်းၵႃႈၼႂ်းလုၵ်းမၼ်းၼၼ်ႉၸိုင် ပူႇၼၢႆးမၼ်းႁႄႉၶႅၼ်မၼ်းဢမ်ႇႁႂ်ႈလႆႈၶဝ်ႈၸူး လႄႈဝႃႈ၊-
၂ ၵွပ်ႈပိူဝ်ႈၵဝ်ထၢင်ႇမႂ်းၸင်းမၼ်းတႄႉတႄႉဝႃႈဝႃႈယဝ်ႉလႄႈ ၵဝ်လႆႈဢဝ်မၼ်းပၼ်တီႈၵေႃႉသႄႈမႂ်းယဝ်ႉ။ၼွင်ႉယိင်းမၼ်းၼၼ်ႉယိင်ႈၶႅၼ်းႁၢင်ႊလီသေမၼ်းဢမ်ႇၸႂ်ႈႁိုဝ်။ဢဝ်ၼွင်ႉယိင်းမၼ်းၼၼ်ႉပုၼ်ႈ တၢင်တူဝ်မၼ်းတႃႉ၊ဝႃႈၼင်ႇၼႆဢေႃႈ။
၃ သၢမ်ႇသုၼ်ႇလၢတ်ႈတီႈၶဝ်လႄႈဝႃႈ၊- ၵမ်းၼႆႉၵဝ်မီးလွင်ႈတၢင်းဢၼ်တၵ်းလႆႈႁဵတ်းတေႃႇၵူၼ်းၽိလိတ်ႉတိ တင်းလၢႆ ယႂ်ႇယႂ်ႇၼမ်ၼမ်ယဝ်ႉဝႃႈၼင်ႇၼႆသေယဝ်ႉ
၄ သၢမ်ႇသုၼ်ႇၵႂႃႇၺွပ်းဢဝ်မႃၼႆးသၢမ်ပၢၵ်ႇသေလႄႈ ဢဝ်ႁၢင်မႃၼႆးသွင်တူဝ်သွင်တူဝ် မတ်ႉၸပ်းၵၼ်သေယဝ်ႉ ဢဝ်ၵၢၼ်ႈၽႆးမတ်ႉၸပ်းႁၢင်ၶဝ်လႄႈ ဢဝ်ၽႆးတုတ်ႇၸပ်း ၵၢၼ်ႈၽႆးၸိူဝ်းၼၼ်ႉသေယဝ်ႉ
၅ ပွႆႇၶဝ်လႅၼ်ႈၵႂႃႇၵႃႈၼႂ်းတူင်ႈၼႃးၶဝ်ႈၵျူင်ႇၶဝ် တင်းသူၼ်ဢူးယဵၼ်ႇသၢၼ်ႇလုၼ်ႇၶဝ်ၼၼ်ႉဢေႃႈ။
၆ ၵူၼ်းၽိလိတ်ႉတိ တင်းလၢႆၵေႃႈတွင်ႉထၢမ်လႄႈဝႃႈ၊-ၽူႈ လႂ်ႁဵတ်းဢမူႉၼႆႉ၊ ဝႃႈၼင်ႇၼႆၸိုင်ၶဝ်ၶိုၼ်းလၢတ်ႈလႄႈဝႃႈ၊-ပဵၼ်သၢမ်ႇသုၼ်ႇ လုၵ်ႈၶူၺ်ၵူၼ်းဝဵင်းတိမၼၼၼ်ႉႁဵတ်းယဝ်ႉ။ၶဝ်ဢဝ်မေးမၼ်းပၼ်တီႈၵေႃႉသေႈမၼ်းဢိူဝ်ႈ၊ ဝႃႈၼင်ႇၼႆသေယဝ်ႉၵူၼ်းၽိလိတ်ႉတိတင်းလၢႆဢွၼ်ၵၼ်မႃးလႄႈ ဢဝ်မေႈယိင်းၼၼ်ႉဢိၵ်ႇတင်း ပေႃႈမၼ်းတုတ်ႇၽဝ်ၽႆးပႅတ်ႈဢေႃႈ။
၇ သၢမ်ႇသုၼ်ႇၵေႃႈလၢတ်ႈတီႈၶဝ်လႄႈဝႃႈ၊- ပေႃးသူႁဵတ်းၸိူဝ်ႉၼင်ႇၼၼ်ၸိုင် ၵဝ်တၵ်းႁဵတ်းႁႂ်ႈပျေႇၸႂ်ၵဝ်လူးၵွၼ်ႇ။
၈ ပေႃးပျေႇၸႂ်ၵဝ်ယဝ်ႉၵဝ်ၸင်ႇတၵ်းယူႇၼိမ်ၼိမ်လီလီဢေႃႈ၊ ဝႃႈၼင်ႇၼႆယူႇသေယဝ်ႉ၊ မၼ်းၽၼ်းဢဝ်တၢႆၵူၼ်းၶဝ် ၼမ်ၼႃႇလူင်လၢင်သေယဝ်ႉၵႂႃႇယူႇၵႃႈၼႂ်းထမ်ႈမၢၵ်ႇႁိၼ်ဢေႇတမ်ႇဢေႃႈ။
၉ လၢႆးသမ်ႉၵူၼ်းၽိလိတ်ႉတိ တင်းလၢႆၶီႇသိုၵ်းၶိုၼ်ႈၵႂႃႇလႄႈၶျႃးတပ်ႉၶဝ်ၵႃႈၼႂ်းမိူင်းယုတသေလႄႈ ယူႇ ၸွတ်ႇၸႅတ်ႇၵႂႃႇၵႃႈတီႈလေႇႁိဢေႃႈ။
၁၀ ၵူၼ်းယုတတင်းလၢႆၵေႃႈတွင်ႉထၢမ်လႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူၶီႇသုၵ်းမႃး၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၶိုၼ်းလၢတ်ႈလႄႈဝႃႈ၊-ႁဝ်းၶီႇသိုၵ်းမႃးႁႂ်ႈလႆႈတီႉမတ်ႉဢဝ်သၢမ်ႇသုၼ်ႇလႄႈ ႁဵတ်းတီႈမၼ်း မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈႁဝ်းၼၼ်ႉဢိူဝ်ႈ၊ ဝႃႈၼင်ႇ ၼႆဢေႃႈ။
၁၁ မိူဝ်ႈၼၼ်ႉၵူၼ်းယုတသၢမ်ႇႁဵင်ဢွၼ်ၵၼ်လူင်းၸူးၵႃႈတီႈၵႄႈငၢပ်ႇမၢၵ်ႇႁိၼ်မၢၵ်ႇၽႃ ဢေႇတမ်ႇၼၼ်ႉသေယဝ်ႉ တွင်ႉထၢမ်ႇတီႈသၢမ်ႇသုၼ်ႇလႄႈဝႃႈ၊-ၸွင်ႇမႂ်းဢမ်ႇႁူႉလွင်ႈဢၼ်ၵူၼ်းၽိလိတ်ႉတိ တင်းလၢႆပဵၼ်ၸဝ်ႈႁဝ်းၼၼ်ႉႁိုဝ်။မႂ်းႁဵတ်းၸိူဝ်ႉၼင်ႇႁိုဝ်တီႈႁဝ်းဝႃႈၼင်ႇၼႆလႄႈ မၼ်းၶိုၼ်းလၢတ်ႈတီႈၶဝ်လႄႈဝႃႈ၊ၵဝ်ႁဵတ်းတီႈၶဝ်မိူၼ်ၸိူဝ်ႉၼင်ႇဢၼ်ၶဝ်ႁဵတ်းတီႈၵဝ် ၼၼ်ႉဢိူဝ်ႈ၊ဝႃႈၼင်ႇၼႆဢေႃႈ။
၁၂ ၶဝ်ၼၼ်ႉၵေႃႈလၢတ်ႈလႄႈဝႃႈ၊- မိူဝ်ႈလဵဝ်ၼႆႉႁဝ်းမႃးႁႂ်ႈလႆႈတီႉမတ်ႉမႂ်းသေလႄႈ ဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၵူၼ်းၽိလိတ်ႉတိၸိူဝ်းၼၼ်ႉယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင် သၢမ်ႇသုၼ်ႇ ၵေႃႈလၢတ်ႈတီႈၶဝ်လႄႈဝႃႈ၊- သူၵိၼ်ႇဝႃႈတီႈၵဝ် တူဝ်သူတၵ်းဢမ်ႇဢဝ်ၵဝ်တၢႆဢၼ်ဝႃႈၼၼ်ႉ သေၵမ်း၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉၵေႃႈဢွၼ်ၵၼ်ၶိုၼ်းလၢတ်ႈတီႈမၼ်းလႄႈဝႃႈ၊-ႁဝ်းၽွမ်ႉဢေႃႈ။ႁဝ်းတေဢမ်ႇဢဝ်မႂ်းတၢႆ။
၁၃ ႁဝ်းတၵ်းမတ်ႉၽုၵ်ႇမႂ်းလႄႈဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၶဝ်ၼၼ်ႉၵူၺ်းဢေႃႈ၊ ဝႃႈၼင်ႇၼႆယူႇသေယဝ်ႉ ဢဝ်ၸိူၵ်ႈမႂ်ႇသွင်သဵၼ်ႈမတ်ႉၽုၵ်ႇမၼ်းလႄႈ ဢဝ်မၼ်းဢွၵ်ႇသေၵႃႈၼႂ်းမၢၵ်ႇႁိၼ်မၢၵ်ႇၽႃၸိူဝ်းၼၼ်ႉသေယဝ်ႉၶိုၼ်းၶိုၼ်ႈမႃးဢေႃႈ။
၁၄ မိူဝ်ႈဢၼ်မၼ်းႁွတ်ႈထိုင်ၵႃႈတီႈ လေႇႁိ ၼၼ်ႉၸိုင်ၵူၼ်းၽိလိတ်ႉတိ တင်းလၢႆဢွၼ်ၵၼ်ႁုၼ်ႉဢေႃႈ။ဝိၺိၺ်ႇထႃႇဝရႃႉၽြႃး ႁွတ်ႈထိုင်မႃးၵႃႈၼိူဝ်မၼ်းၼႂ်းတၢင်းဢၼ်ႁႅင်းယႂ်ႇၼႃႇၼၼ်ႉလႄႈ ၸိူၵ်ႈဢၼ်မတ်ႉၽုၵ်ႇၵႃႈတီႈမိုဝ်းမၼ်းၸိူဝ်းၼၼ်ႉပဵၼ်ၸိူဝ်ႉၼင်ႇမႆပၼ်ႇဢၼ် တိူဝ်ႉၽႆးၼၼ်ႉသေယဝ်ႉ ၶၢတ်ႇတူၵ်းသေ ၵႃႈတီႈမိုဝ်းမၼ်းၵႂႃႇဢေႃႈ။
၁၅ မၼ်းတူၺ်းႁၼ်လုပ်ႇၵၢင်းမႃႉလီႈ ဢၼ်ယင်းလိပ်းယူႇၼၼ်ႉ ဢၼ်ၼိုင်ႈလႄႈမၼ်းယိုၼ်းမိုဝ်းယိပ်းၵမ်ဢဝ်သေယဝ်ႉ ဢဝ်ၵူၼ်းတၢႆ ႁဵင်ၼိုင်ႈဢေႃႈ။
၁၆ သၢမ်ႇသုၼ်ႇၼၼ်ႉလၢတ်ႈလႄႈဝႃႈ၊-ဢဝ်တင်းလုပ်ႇၵၢင်းမႃႉလီႈလႄႈ ၵဝ်ႁဵတ်းပဵၼ်ၵွင်ပဵၼ်ၵွင်ဢေႃႈ။ဢဝ်တင်းလုပ်ႇၵၢင်းမႃႉလီႈလႄႈ ၵဝ်ဢဝ် ၵူၼ်းတၢႆႁဵင်ၼိုင်ႈဢေႃႈ၊ဝႃႈၼင်ႇၼႆဢေႃႈ။
၁၇ လိုၼ်းသေဝႃႈၼင်ႇၼၼ်ယဝ်ႉ မၼ်းဢဝ်လုပ်ႇၵၢင်းမႃႉလီႈၼၼ်ႉထိမ်ႈပႅတ်ႈသေၵႃႈၼႂ်းမိုဝ်းမၼ်းလႄႈ ၵႃႈတီႈၼၼ်ႉလႆႈႁွင်ႉႁိၵ်ႉၸိုဝ်ဝႃႈရႃႇမတ်ႉလေႇႁိဝႃႈၼႆဢေႃႈ။
၁၈ မၼ်းယၢၵ်ႇၼမ်ႉၼႃႇလူင်လၢင်လႄႈ သူးတွင်းတီႈထႃႇဝရႃႉၽြႃးလႄႈဝႃႈ၊-ၸဝ်ႈႁဝ်းဢဝ်မိုဝ်းၶႃႈၸဝ်ႈႁဝ်းပၼ်တၢင်းဢၼ်ၵႄႇသႄႇၶျွတ်ႈဢဝ် ဢၼ်ယႂ်ႇၼႃႇယဝ်ႉလႄႈ မိူဝ်ႈလဵဝ်ၼႆႉၶႃႈၸဝ်ႈယၢၵ်ႇၼမ်ႉၼႃႇယူႇလႄႈ တၵ်းလႆႈတၢႆလႄႈႁွတ်ႈထိုင်ၵႃႈၼႂ်းၵူၼ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၸိူဝ်းၼၼ်ႉ ၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ ၽြႃးပဵၼ်ၸဝ်ႈၽႃႇသပ်းၵႃႈတီႈၼိူဝ်လိၼ် လေႇႁိ ၼၼ်ႉလႄႈ ၼမ်ႉဢွၵ်ႇသေၵႃႈတီႈၼၼ်ႉမႃးဢေႃႈ။
၁၉ မၼ်းၵိၼ်ၼမ်ႉသေယဝ်ႉၶိုၼ်းထူၺ်ႈၸႂ်လႄႈႁွမ်ႁႅင်းဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈ ၼမ်ႉဢွၵ်ႇႁူးၼၼ်ႉလႆႈၶၢမ်ႇတၢင်းဢၼ်ႁွင်ႉႁိၵ်ႈၸိုဝ် ဢိၼ်ႇႁၵ်ႉၵေႃႇရ လႄႈမီးယူႇၵႃႈတီႈလေႇႁိ ၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၀ သၢမ်ႇသုၼ်ႇ ၵေႃႈဢွၼ်ႁူဝ်ၵူၼ်းမဵဝ်း ဢိသရေႇလၶဝ် ၼႂ်းၸူဝ်ႈပၢၼ်ၵူၼ်း ၽိလိတ်ႉတိ ၼၼ်ႉသၢဝ်းပီႊဢေႃႈ။