Chapter
၁၆
သၢမ်ႇသုၼ်ႇလႄႈတေႇလိလ
၁ လိုၼ်းၼၼ်ႉ သၢမ်ႇသုၼ်ႇ ၵႂႃႇၵႃႈတီႈဝဵင်းၵႃႇၸလႄႈထူပ်းႁၼ်မေႈမွၵ်ႇယႃႈသေယဝ်ႉ ၶဝ်ၸူးၵႃႈတီႈမၼ်း ႁႂ်ႈလႆႈၼွၼ်းၶိုၼ်းၼိုင်ႈဢေႃႈ။
၂ ၵူၼ်းဝဵင်းၵႃႇၸၸိူဝ်းၼၼ်ႉလႆႈငိၼ်းလွင်ႈဢၼ် သၢမ်ႇသုၼ်ႇ ယူႇၵႃႈတီႈၼၼ်ႉလႄႈ ၶဝ်ဢွၼ်ၵၼ်လွမ်ႉႁွပ်ႈဝဵင်းၼၼ်ႉသေယဝ်ႉလွမ်ပႂ်ႉလွမ်တူၺ်းယူႇတဵတ်ႇတဵတ်ႇ ၵႃႈ တီႈႁူးၽၵ်းတူဝဵင်းၼၼ်ႉတင်းၶိုၼ်းလႄႈဝႃႈ၊-ပေႃးႁွတ်ႈၶိင်ႇၵၢင်ၼႂ်မိူဝ်ႈဢၼ်မိူင်းလႅင်းၼၼ်ႉ ႁဝ်းတၵ်းဢဝ်မၼ်းတၢႆ ဢေႃႈ၊ဝႃႈၼင်ႇၼႆဢေႃႈ။
၃ သၢမ်ႇသုၼ်ႇၼၼ်ႉၼွၼ်းတေႃႇထိုင်ႁွတ်ႈၶိင်ႇတဵင်ႈၶိုၼ်းလႄႈ လုၵ်ႉၶိင်ႇတဵင်ႈၶိုၼ်းၼၼ်ႉ သေယဝ်ႉယႃႉလႅဝ်ထွၼ်ဢဝ်မႆႉၽၵ်းတူဝဵင်းဢိၵ်ႇတင်း သဝ်ၽၵ်းတူသွင်လႅမ်ႈၼၼ်ႉသေယဝ်ႉထူၺ်ႈဢဝ်ပႃး ၵိူၼ်ႇၽၵ်းတူၵႃႈမီးၸိူဝ်းၼၼ်ႉသေယဝ်ႉႁၢပ်ႇတၢင်ႇႁူဝ်မႃႇမၼ်းၵႂႃႇပႅတ်ႈဝႆႉ ၵႃႈၼိူဝ်ပၢႆလွႆၵႃႈတီႈၽၢႆႇၼႃႈဝဵင်းႁေႇပုၼ်ႇဢေႃႈ။
၄ လိုၼ်းၼၼ်ႉ ႁိုင်တၢၼ်ႇတၢၼ်ႇသေယဝ်ႉ မၼ်းသမ်ႉငိၼ်းႁၵ်ႉငိၼ်းပႅင်း မေႈယိင်းၵေႃႉၼိုင်ႈ ဢၼ်လႆႈၸိုဝ်တေႇလိလ ဢၼ်ယူႇၵႃႈတီႈၶူင်ႈႁူၺ်ႈၸေႃႇရိ ၼၼ်ႉ ဢေႃႈ။
၅ ၵူၼ်းၽိလိတ်ႉတိတင်းလၢႆမႃးၸူးၵႃႈတီႈမေႈယိင်းၼၼ်ႉလႄႈလၢတ်ႈဝႃႈ၊-မႂ်းၶျေႃးဝွၼ်းမၼ်းလႄႈတွင်ႉထၢမ်တူၺ်းမၼ်း လွင်ႈဢၼ်ႁႅင်းဢၼ်ယႂ်ႇတီႈမၼ်းၼၼ်ႉ တႄႇယူႇၵွပ်ႈပိူဝ်ႈလွင်ႈတၢင်းဢီသင်၊ဢိၵ်ႇတင်းလွင်ႈဢၼ်ႁဝ်းတၵ်းလႆႈႁဵတ်းႁိုဝ်လႄႈ ပႄႉၼဵင်ႈလႆႈမၼ်းႁႂ်ႈလႆႈမတ်ႉၽုၵ်ႇဢဝ်မၼ်းလႄႈ ၼိၵ်ႈၸၢၵ်ႈငႅၼ်းသေးမၼ်း။ႁဝ်းတၵ်းၽွမ်ႉၵၼ်ပၼ်ငိုၼ်းမႂ်းႁဵင်ပၢႆပၢၵ်ႇၵျၢပ်ႈဢေႃႈ၊ဝႃႈၼင်ႇၼႆဢေႃႈ။
၆ တေႇလိလ ၵေႃႈလၢတ်ႈတီႈသၢမ်ႇသုၼ်ႇလႄႈဝႃႈ၊ၶႅၼ်းတေႃႈမွၵ်ႇလၢတ်ႈ လွင်ႈဢၼ်ႁႅင်းဢၼ်ယႂ်ႇၼႃႇတီႈၸဝ်ႈၼၼ်ႉတႄႇယူႇၵွပ်ႈပိူဝ်ႈလွင်ႈတၢင်း လႂ်၊ ဢိၵ်ႇတင်းလွင်ႈဢၼ် တၵ်းလႆႈဢဝ်ၵႃႈသင်လႄႈ မတ်ႉၽုၵ်ႇၸဝ်ႈႁႂ်ႈၼိၵ်ႈၸၢၵ်ႈငိၼ်းသႄးၸဝ်လႆႈၼၼ်ႉ တီႈၵဝ်ၶႃႈသေၵမ်း။ၵဝ်ၶႃႈတွင်းပၢၼ်ႇၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ သၢမ်ႇသုၼ်ႇၵေႃႈလၢတ်ႈတီႈမၼ်း လႄႈဝႃႈ၊-
၇ ပေႃးဢဝ်ၸိူၵ်ႈၼင် ဢၼ်လိပ်းၸဵတ်းသဵၼ်ႈ ဢၼ်ဢမ်ႇပႆႇတၢၵ်ႇႁႅင်ႈသပွေၵ်ႈၼၼ်ႉ မတ်ႉၽုၵ်ႇၵဝ်ၸိုင် ႁႅင်းၵဝ်တၵ်းဢူၼ်ႈၵႂႃႇလႄႈၵဝ်တၵ်းပဵၼ်မိူၼ်ၸိူဝ်ႉၼင်ႇပိူၼ်ႈတၢင်ႇၵေႃႉၼၼ်ႉဢေႃႈ၊ ဝႃႈၼင်ႇ ၼႆဢေႃႈ။
၈ မိူဝ်ႈၼၼ်ႉၶုၼ်ၽိလိတ်ႉတိၸိူဝ်းၼၼ်ႉဢဝ်ၸိူၵ်ႈၼင် ဢၼ်လိပ်းၸဵတ်းသဵၼ်ႈဢၼ်ဢမ်ႇပႆႇတၢၵ်ႇႁႅင်ႈသပွေၵ်ႈၼၼ်ႉ မႃးတီႈမေႈယိင်းၼၼ်ႉလႄႈမၼ်း ၵေႃႈဢဝ်မတ်ႉသၢမ်ႇသုၼ်ႇဢေႃႈ။
၉ မေႈယိင်းၼၼ်ႉႁႂ်ႈၶဝ်ၸိူဝ်းဢၼ် လွမ်ပႂ်ႉလွမ်တူၺ်းယူႇၸိူဝ်းၼၼ်ႉ ပၢႆႈတဵတ်ႇယူႇၵႃႈၼႂ်းလုၵ်းတၢင်းၼႂ်းၼၼ်ႉလႄႈ မၼ်းလၢတ်ႈလႄႈဝႃႈ၊-သၢမ်ႇသုၼ်ႇဢူၺ်း။ၵူၼ်းၽိလိတ်ႉတိၶဝ်မႃးတိုၵ်းၸဝ်ႈယဝ်ႉ၊ဝႃႈၼင်ႇၼႆဢေႃႈ။သၢမ်ႇသုၼ်ႇၼၼ်ႉတိုတ်ႉၸိူၵ်ႈၸိူဝ်းၼၼ်ႉၶၢတ်ႇပႅတ်ႈမိူၼ်ၸိူဝ်ႉၼင်ႇ တိုတ်ႉမႆပၢၼ်ႇဢၼ်မႆႈၽႆးၼၼ်ႉဢေႃႈ။ၼင်ႇၼၼ်လႄႈ ၶဝ်ဢမ်ႇလႆႈႁူႉလွင်ႈႁႅင်းမၼ်း။
၁၀ တေႇလိလၵေႃႈလၢတ်ႈတီႈသၢမ်ႇသုၼ်ႇလႄႈဝႃႈ၊-ၸဝ်ႈႁဝ်းယဝ်ႉယွၵ်ႇၵဝ်ၶႃႈလႄႈ လၢတ်ႈၵႂၢမ်းမူႉသႃႇတီႈၵဝ်ၶႃႈလူင်ပေႇ။တေႃႈလဵဝ်ၼႆႉၶႅၼ်းတေႃႈလၢတ်ႈပၼ်လွင်ႈဢၼ်တၵ်းလႆႈဢဝ်ၵႃႈသင် မတ်ႉၽုၵ်ႇၸဝ်ႈႁဝ်းၼၼ်ႉသေၵမ်း၊ၵဝ်ၶႃႈ တွင်းပၢၼ်ႇၶႃႈဢေႃႈ၊မိူဝ်ႈ ဢၼ်ဝႃႈၼင်ႇၼႆၸိုင်၊မၼ်းလၢတ်ႈလႄႈဝႃႈ၊-
၁၁ ပေႃးဢဝ်ၸိူၵ်ႈဢၼ်မႂ်ႇ ဢၼ်ဢမ်ႇပႆႇတွၼ်ႉသုင်းတိုဝ်းသေပွၵ်ႈၼၼ်ႉ မတ်ႉၽုၵ်ႈၵဝ်ၼႃၼႃၸိုင်ႁႅင်းၵဝ်တၵ်းဢူၼ်ႈၵႂႃႇလႄႈၵဝ်တၵ်းပဵၼ်မိူၼ်ၸိူဝ်ႉၼင်ႇပိူၼ်ႈတၢင်ႇၵေႃႉၼၼ်ႉဢေႃႈဝႃႈၼင်ႇၼႆဢေႃႈ။
၁၂ တေႇလိလ ၵေႃႈဢဝ်ၸိူၵ်ႈဢၼ်မႂ်ႇတင်းလၢႆလႄႈမတ်ႉၽုၵ်ႉမၼ်းသေယဝ်ႉလၢတ်ႈတီႈမၼ်းလႄႈဝႃႈ၊-သၢမ်ႇသုၼ်ႇဢူၺ်း။ၵူၼ်းၽိလိတ်ႉတိၶဝ်မႃးတိုၵ်းၸဝ်ႈႁဝ်းယဝ်ႉ၊ဝႃႈၼင်ႇၼႆဢေႃႈ။ၶဝ်ၸိူဝ်းဢၼ်လွမ်ပႂ်ႉလွမ်တူၺ်းၸိူဝ်းၼၼ်ႉၵေႃႈ မီးဝႆႉယူႇၵႃႈၼႂ်းလုၵ်းတၢင်းၼႂ်းဢေႃႈ။မၼ်းၵေႃႈတိုတ်ႉၸိူၵ်ႈၼၼ်ႉၶၢတ်ႇသေၵႃႈတီႈၶႅၼ်မၼ်းၼၼ်ႉ မိူၼ်ၸိူဝ်ႉၼင်ႇမႆၶဵမ်ၼၼ်ႉၵူၺ်း ဢေႃႈ။
၁၃ တေႇလိလၵေႃႈလၢတ်ႈတီႈသၢမ်ႇသုၼ်ႇလႄႈဝႃႈ၊-တေႃႇထိုင်ႁွတ်ႈမိူဝ်ႈလဵဝ်ၼႆႉလႄႈၸဝ်ႈယဝ်ႉယွၵ်ႇၵဝ်ၶႃႈသေလႄႈလၢတ်ႈမူႉသႃႇတီႈၵဝ်ၶႃႈယဝ်ႉ။လၢတ်ႈပၼ်လွင်ႈဢၼ် တၵ်းလႆႈဢဝ်ၵႃႈသင်မတ်ႉၽုၵ်ႇၸဝ်ႈ ၼၼ်ႉတီႈၶႃႈသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈလၢတ်ႈလႄႈဝႃႈ၊-ပေႃးဢဝ်ၶူၼ်ႁူဝ်ၵဝ်ၸဵတ်းယွမ်ႇ တေႃးသႂ်ႇၵႃႈၼႂ်းႁုၵ်ႇလႄႈ ဢဝ်လႅမ်ႈတွၵ်ႇၸပ်းၵိုမ်းၸိုင် ႁႅင်းၵဝ်တၵ်းဢူၼ်ႈၵႂႃႇဢေႃႈ၊ ဝႃႈၼင်ႇၼႆဢေႃႈ။
၁၄ မေႈယိင်းၼၼ်ႉၵေႃႈႁဵတ်းၸိူဝ်ႉၼင်ႇၼၼ်လႄႈ ဢဝ်လႅမ်ႈတွၵ်ႇၸပ်းဝႆႉၵႃႈတီႈၵီႇသေလႄႈလၢတ်ႈဝႃႈ၊-သၢမ်ႇသုၼ်ႇဢူၺ်း။ၵူၼ်းၽိလိတ်ႉတိၶဝ်မႃးတိုၵ်းၸဝ်ႈယဝ်ႉ မိူဝ်ႈဢၼ်ဝႃႈၼင်ႇၼႆၸိုင် သၢမ်ႇသုၼ်ႇ တိုၼ်ႇလႄႈ ပႃးဢဝ်တႅမ်သဝ်လၵ်းၵီႇဢိၵ်ႇတင်းႁုၵ်ႇၸိူဝ်းၼၼ်ႉပႅတ်ႈဢေႃႈ။
၁၅ မေႈယိင်းၼၼ်ႉၵေႃႈလၢတ်ႈလႄႈဝႃႈ၊- ၸဝ်ႈတၵ်းႁဵတ်းႁိုဝ်လႄႈဝႃႈလႆႈ ၸဝ်ႈႁၵ်ႉႁဝ်း ပေႃးၸဝ်ႈယင်းဢမ်ႇယုမ်ႇၶႃႈလႄႈလၢတ်ႈၼႄၶႃႈ။ၸဝ်ႈယဝ်ႉယွၵ်ႇၵဝ်ၶႃႈတေႃႇထိုင်ႁွတ်ႈသၢမ်ပွၵ်ႈၶႃႈယဝ်ႉ။ယင်းဢမ်ႇပႆႇမွၵ်ႇလၢတ်ႈ လွင်ႈဢၼ်ႁႅင်းဢၼ်ယႂ်ႇတီႈၸဝ်ႈၼၼ်ႉတႄႇယူႇၵွပ်ႈပိူဝ်ႈသင်ၼၼ်ႉတီႈၵဝ်ၶႃႈလူင်ပေႇ၊ ဝႃႈ ၼင်ႇၼႆဢေႃႈ။
၁၆ ၼင်ႇၼၼ်လႄႈမၼ်းတုၵ်းတဝ်ႈယူႇၵူႈမိုဝ်ႉၵူႈဝၼ်းလႄႈ တိုၵ်းယူင်းမၼ်းတေႃႇထိုင်ႁွတ်ႈႁူဝ်ၸႂ်မၼ်း ပဵၼ်ဢၼ်ႁိူဝ်ႉၼူၼ်းယၢပ်ႇၽိုတ်ႇၼႃႇ ထၢၼ်ႈပေႃးတၵ်းတၢႆဢေႃႈ။
၁၇ မၼ်းၸင်ႇဢဝ်ၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉသေလႄႈလၢတ်ႈဝႃႈ၊-ၶူၼ်ႁူဝ်ၵဝ်ၼႆႉဢမ်ႇပႆႇတွၼ်ႉထႃသပွေၵ်ႈ။ၸႃႉၸဵမ်ၵႃႈၼႂ်းတွင်ႉမေႈၵဝ်လႄႈ ၵဝ်ပဵၼ်ၵူၼ်းၼႃႇၸရိ ဢၼ်ၽႄဝႆႉပုၼ်ႈၽြႃးပဵၼ်ၸဝ်ႈဢေႃႈ။ပေႃးထႃၶူၼ်ႁူဝ်ၵဝ်ၸိုင်ႁႅင်းၵဝ်တၵ်းဢူၼ်ႈၵႂႃႇလႄႈ ၵဝ်တၵ်းပဵၼ်မိူၼ်ၸိူဝ်ႉၼင်ႇတၢင်ႇၵေႃႉၼၼ်ႉဢေႃႈ၊ ဝႃႈၼင်ႇၼႆဢေႃႈ။
၁၈ တေႇလိလ ႁူႉႁၼ်လွင်ႈဢၼ်မၼ်းဢဝ်ၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉလၢတ်ႈပၼ်ၼၼ်ႉ သေယဝ်ႉမၼ်းသမ်ႉပွႆႇၸႂ်ႉၵႂႃႇႁွင်ႉဢဝ်ၶုၼ်ၽိလိတ်တိ ၸိူဝ်းၼၼ်ႉလႄႈဝႃႈ၊-မႃးထႅင်ႈပွၵ်ႈၼိုင်ႈလူးၵွၼ်ႇသေၵမ်း။မၼ်းဢဝ်ၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉ လၢတ်ႈပၼ်ၶႃႈယဝ်ႉ၊ဝႃႈၼင်ႇၼႆသေယဝ်ႉ၊ ၶုၼ်ၽိလိတ်ႉတိၸိူဝ်းၼၼ်ႉၵေႃႈ ပႃးဢဝ်တင်းငိုၼ်းၵႃႈၼႂ်းမိုဝ်းၶဝ်သေလႄႈမႃးတီႈမၼ်းဢေႃႈ။
၁၉ မၼ်းဢဝ်ႁူဝ်ၶဝ်ႇမၼ်းမွၼ် သၢမ်ႇသုၼ်ႇ ႁႂ်ႈၼွၼ်းလပ်းသေယဝ်ႉ ႁွင်ႉဢဝ်ၵူၼ်းၵေႃႉၼိုင်ႈမႃးထႃၶူၼ်ႁူဝ်မၼ်းၸဵတ်းယွမ်ႇၼၼ်ႉပႅတ်ႈသေယဝ်ႉတီႉမတ်ႉဢဝ်မၼ်းဢေႃႈ။ႁႅင်းမၼ်းၵေႃႈသုတ်ႈယွမ်းႁၢႆၵႂႃႇဢေႃႈ။
၂၀ မၼ်းၼၼ်ႉမေႈယိင်းၼၼ်ႉလၢတ်ႈဝႃႈ၊-သၢမ်ႇသုၼ်ႇဢူၺ်း။ၵူၼ်းၽိလိတ်ႉတိၶဝ်မႃးတိုၵ်းၸဝ်ႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်မၼ်းတိုၼ်ႇလႄႈဝႃႈ၊-ၵဝ်တၵ်းဢွၵ်ႇၵႂႃႇမိူၼ်ၸိူဝ်ႉၼင်ႇၵူႈပွၵ်ႈၼၼ်ႉလႄႈႁႂ်ႈ လႆႈလွတ်ႈဢေႃႈ၊ဝႃႈၼင်ႇၼႆဢေႃႈ။ၵူၺ်းၵႃႈမၼ်းဢမ်ႇႁူႉလွင်ႈဢၼ် ထႃႇဝရႃႉၽြႃးယင်းပေႃးၸုၼ်ႉပႅတ်ႈ မၼ်းယဝ်ႉ။
၂၁ ၵူၼ်းၽိလိတ်ႉတိၸိူဝ်းၼၼ်ႉတိၵမ်ဢဝ်မၼ်းလႄႈ ၶွၵ်းႁူၺ်ႇတႃမၼ်းပႅတ်ႈသေယဝ်ႉ ဢဝ်မၼ်းလူင်းၵႂႃႇၵႃႈတီႈဝဵင်းၵႃႇၸ သေလႄႈဢဝ်တင်းၸိူၵ်ႈတွင်းလိူင်မတ်ႉၽုၵ်ႈမၼ်းလႄႈႁႂ်ႈမၼ်းလုၺ်ၶိုတ်ႈယူႇၵႃႈၼႂ်းထွင်ႇဢေႃႈ။
၂၂ လိုၼ်းသထေႃၶူၼ်ႁူဝ်မၼ်းယဝ်ႉ ဢမ်ႇႁိုင်ဢမ်ႇၼၢၼ်းၶူၼ်ႁူဝ်မၼ်းသမ်ႉၶိုၼ်းဢွၵ်ႇမႃးဢေႃႈ။
သၢမ်ႇသုၼ်ႇၼွၼ်းၽေး
၂၃ ၶုၼ်ၽိလိတ်ႉတိ ၸိူဝ်းၼၼ်ႉၸူႉၵၼ်တုမ်ၵၼ်ႁႂ်ႈလႆႈပုၵ်ႉၸေႃႇယိၸ်ႉလူင် တီႈၽြႃးၶဝ်တႃၵုၼ်ၼၼ်ႉလႄႈႁဵတ်းတၢင်းဢၼ်ၸူမ်းသိူဝ်းမူၼ်ႈပျေႃႇဢေႃႈ။လွင်ႈမၼ်းၸမ်းၶဝ်ဝႃႈ၊-ၽြႃးႁဝ်းဢဝ် သၢမ်ႇသုၼ်ႇ ဢၼ်ပဵၼ်ရၢၼ်ႇသူႇႁဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်းႁဝ်း ယဝ်ႉ၊ဝႃႈၼင်ႇၼႆဢေႃႈ။
၂၄ ၵူၼ်းတင်းလၢႆၸိူဝ်းၼၼ်ႉမိူဝ်ႈဢၼ်ႁၼ်မၼ်းၼၼ်ႉၸိုင် ဢွၼ်ၵၼ်ယွင်ႈယေႃးၽြႃးၶဝ်လႄႈဝႃႈ၊-ၽြႃးႁဝ်းဢဝ်ရၢၼ်ႇသူႁဝ်းဢၼ်ယႃႉၽဵဝ်ႈမိူင်းႁဝ်းပႅတ်ႈလႄႈ ဢဝ်ၵူၼ်းႁဝ်းတၢႆၼမ်ၼႃႇၼၼ်ႉဢၢပ်ႈပၼ်ၵႃႈၼႂ်းမိုဝ်းႁဝ်းယဝ်ႉ၊ဝႃႈၼင်ႇၼႆ ဢေႃႈ။
၂၅ မိူဝ်ႈဢၼ်ႁူဝ်ၸႂ်ၶဝ်သႂၢင်ႇသိူဝ်းၼၼ်ႉၸိုင်ၶဝ်လၢတ်ႈလႄႈဝႃႈ၊- ႁွင်ႉဢဝ်သၢမ်ႇသုၼ်ႇမႃးတႃႉ။ႁႂ်ႈမၼ်းမႃးလဵၼ်ႈမၼ်းပျႃႉၼႄပုၼ်ႈႁဝ်းသေၵမ်း၊ ဝႃႈၼင်ႇၼႆသေယဝ်ႉ ၶဝ်ႁွင်ႉဢဝ်သၢမ်ႇသုၼ်ႇဢွၵ်ႇသေၵႃႈၼႂ်းထွင်ႇမႃးလႄႈ မၼ်းလႆႈလဵၼ်ႈလႆႈပျႃႉၼႄၵႃႈတီႈၽၢႆႇၼႃႈၶဝ်ဢေႃႈ။ၶဝ်ဢဝ်မၼ်းဝႆႉၵႃႈၼႂ်းၵႄႈဝူင်ႈ ၵၢင်သဝ်ႁိူၼ်းတိူၵ်ႈဢေႃႈ။
၂၆ သၢမ်ႇသုၼ်ႇၵေႃႈ လၢတ်ႈတီႈၵူၼ်းဢွၼ်ႇဢၼ်ၸုင်မိုဝ်းမၼ်းၼၼ်ႉ လႄႈဝႃႈ၊-ပၼ်ဢၶႂၢင်ႉ ဢၼ်မိုဝ်းၵဝ်လႆႈၵမ်ထူပ်းသဝ်ဢၼ်ထွၵ်ႈၵမ်ႉႁိူၼ်းတိူၵ်ႈၼႆႉ ႁႂ်ႈၵဝ်လႆႈဢိင်ႈသဝ်ၸိူဝ်းၼၼ်ႉယူႇ သေၵမ်း၊ဝႃႈၼင်ႇၼႆဢေႃႈ။
၂၇ ၵႃႈတီႈႁိူၼ်းတိူၵ်ႈၼၼ်ႉမီးတဵမ်ဝႆႉတင်းၵူၼ်းၸၢႆးၵူၼ်းယိင်းဢေႃႈ။ၶုၼ်ၽိလိတ်ႉတိ တင်းသဵင်ႈတင်းလူင်ၵေႃႈမီးၵႃႈတီႈၼၼ်ႉဢေႃႈ။ၵႃႈၼိူဝ်မူင်းႁိူၼ်းတိူၵ်ႈၼၼ်ႉၵေႃႈ ၵူၼ်းၸၢႆးၵူၼ်းယိင်းဢၼ်လူႈတူၺ်း သၢမ်ႇသုၼ်ႇ လဵၼ်ႈယူႇပျႃႉယူႇ ၼၼ်ႉမီးသသေၢမ်ႇႁဵင်ၼိုင်ႈဢေႃႈ။
၂၈ သၢမ်ႇသုၼ်ႇၵေႃႈသူးတွင်းတီႈထႃႇဝရႃႉၽြႃးလႄႈဝႃႈ၊-ၸဝ်ႈထႃႇဝရႃႉၽြႃးတီႈၶႃႈ။ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈႁဝ်းသေၵမ်းတီႈၶႃႈ။ၶႅၼ်းတေႃႈၶိုၼ်းပၼ်ႁဵင်းထႅင်ႈတီႈၵဝ်ၶႃႈပွၵ်ႈလဵဝ်ၼႆႉသေၵမ်းၶႃႈ။ၶိင်ႇမိူဝ်ႈလဵဝ်ၼႆႉႁႂ်ႈၶႃႈၸဝ်ႈလႆႈပၼ်တၢမ်ႇဢပျႅတ်ႈတီႈၵူၼ်းၽိလိတ်ႉတိ တင်းလၢႆဢၼ်ၶွၵ်းမၢၵ်ႇတႃၶႃႈၸဝ်ႈသွင်ၽၢႆႇ ဢွၵ်ႇပႅတ်ႈၼၼ်ႉသေၵမ်းတီႈၶႃႈၸဝ်ႈၽြႃး၊ဝႃႈၼင်ႇၼႆသေယဝ်ႉ၊
၂၉ သၢမ်ႇသုၼ်ႇယိပ်းၵမ်သဝ်ၵၢင်သွင် လႅမ်ႈဢၼ်ထွၵ်ႈၵမ်ႉႁိူၼ်းတိူၵ်ႈၼၼ်ႉသေယဝ်ႉ ဢဝ်မိုဝ်းၶွၼ်ၶႂႃမၼ်းတဝ်ႉလႅမ်ႈၼိုင်ႈ၊မိုဝ်းၶွၼ်သၢႆႉ မၼ်းတဝ်ႉလႅမ်ႈၼိုင်ႈယူႇသေ ယဝ်ႉ၊သၢမ်ႇသုၼ်ႇသူးတွင်းလႄႈဝႃႈ၊-
၃၀ ႁႂ်ႈၶႃႈၸဝ်ႈလႆႈတၢႆလူၺ်ႈၵၼ်တင်းၵူၼ်းၽိလိတ်ႉတိ ၸိူဝ်းၼႆႉသေၵမ်း လူၺ်ႈ၊ဝႃႈၼင်ႇၼႆသေလႄႈဢဝ်ႁႅင်းဢွၵ်ႇလႄႈတဝ်ႉႁိူၼ်းတိူၵ်ႈၼၼ်ႉ လူမ်ႉတူၵ်းသႂ်ႇၵႃႈၼိူဝ်ၶုၼ်တင်းလၢႆဢိၵ်ႇတင်းၵႃႈၼိူဝ်ၵူၼ်းတင်းသဵင်ႈတင်းလူင်ဢၼ်မီးၵႃႈၼႂ်းၼၼ်ႉဢေႃႈ။ၼင်ႇၼၼ်လႄႈၶဝ်ၸိူဝ်းဢၼ်မၼ်းဢဝ်တၢႆမိူဝ်ႈဢၼ်မၼ်းတၢႆၼၼ်ႉ ယိင်ႈၶႅၼ်းၼမ်ၼႃႇသေ ၶဝ်ၸိူဝ်းဢၼ်မၼ်းဢဝ်တၢႆမႃးမိူဝ်ႈဢၼ်မၼ်းယင်းဢသၢၵ်ႈလိပ်းယူႇ ၼၼ်ႉဢေႃႈ။
၃၁ မိူဝ်ႈၼၼ်ႉၼွင်ႉၸၢႆးမၼ်းတင်းလၢႆဢိၵ်ႇတင်း ပီႈၼွင်ႉၸိူဝ်ႉၶိူဝ်းမၼ်းတင်းသဵင်ႈတင်းလူင် ဢွၼ်ၵၼ်လူင်းမႃးလႄႈႁၢမ်ဢဝ်တူဝ်တၢႆမၼ်းၶိုၼ်ႈၵႂႃႇသေယဝ်ႉ၊ သႂၢင်းၵျူဝ်ႇၵႃႈတီႈဝူင်ႈၵၢင်ဝဵင်း ၸေႃႇရ တင်းဝဵင်း ဢေႇသတေႃႇလ ၵႃႈၼႂ်းသၢင်းၶျႅင်းပေႃႈမၼ်းမႃႇၼေႃႇၼၼ်ႉဢေႃႈ။မၼ်းလႆႈဢွၼ်ႁူဝ်ၵႃႈၼိူဝ်မဵဝ်းဢိသရေႇလ သၢဝ်းပီႊဢေႃႈ။