Chapter
၁၈
ၵူၼ်းမဵဝ်းတၼ်ႇၶဝ်ယူႇသဝ်းတီႈဝဵင်းလေႇသ
၁ မိူဝ်ႈၶိင်ႇၼၼ်ႉ ၵူၼ်းမဵဝ်းဢိသရေႇလၶဝ်ဢမ်ႇပႆႇမီးၶုၼ်ႁေႃၶမ်း။မိူဝ်ႈၶိင်ႇၼၼ်ႉၵူၼ်းမဵဝ်းတၼ်ႇတင်းလၢႆ ႁႃလိၼ်တီႈဢၼ်ၶဝ်တၵ်းလႆႈယူႇၼၼ်ႉဢေႃႈ။လွင်ႈမၼ်းၸမ်း တေႃႇထိုင်ႇႁွတ်ႈၶိင်ႇမိူဝ်ႈဝၼ်းၼၼ်ႉလႄႈၶဝ်ယင်းဢမ်ႇပႆႇလႆႈၶၢမ်ႇဢဝ်ဢမူၺ်ႇၵႃႈၼႂ်းမဵဝ်း ဢိသရေႇလတင်းလၢႆၼၼ်ႉ။
၂ ပိူဝ်ႈၼႆလႄႈၵူၼ်းမဵဝ်းတၼ်ႇ ၸိူဝ်းၼၼ်ႉပွႆႇၸႂ်ႉၵူၼ်းသိုၵ်းဢၼ်ႁႅင်းယႂ်ႇၼႃႇၵႃႈၼႂ်းၶဝ်ႁႃႈၵေႃႉ ဢွၵ်ႇသေၵႃႈတီႈဝဵင်းၸေႃႇရဢိၵ်ႇတင်းဝဵင်းဢေႇသတေႃႇလ ၵႂႃႇႁႂ်ႈလႆႈႁဵတ်းၵူၼ်းၽႆးၼႂ်းတီႈမိူင်းၼၼ်ႉဢေႃႈ။ၶဝ်သင်ႇလၢတ်ႈတီႈၶဝ်လႄႈဝႃႈ၊-ၵႂႃႇလႄႈလွမ်တူၺ်းမိူင်းၼၼ်ႉတႃႉ၊ဝႃႈၼင်ႇၼႆဢေႃႈ။ၶဝ်ၼၼ်ႉႁွတ်ႈထိုင်ၵႃႈၼိူဝ်ႁၢၼ်ႉလွႆဢေႇၽရိမ်ႇၵႃႈတီႈႁိူၼ်းမိၶႃႇၼၼ်ႉသေယဝ်ႉ သွၼ်ႈပိုင်ႈယူႇၵႃႈ တီႈၼၼ်ႉဢေႃႈ။
၃ မိူဝ်ႈဢၼ်ၶဝ်ယင်းမီးယူႇၵႃႈတီႈႁိမ်းႁိူၼ်း မိၶႃႇ ၼၼ်ႉၸိုင်ၶဝ်တွင်းသဵင်ၵႂၢမ်းၵူၼ်းဢွၼ်ႇမဵဝ်း လေႇဝိ ၼၼ်ႉလႄႈၶဝ်ဝႄႉၶဝ်ႈၸူးၵႃႈတီႈမၼ်းၼၼ်ႉသေယဝ်ႉတွင်ႉထၢမ်ႇလႄႈဝႃႈ၊-ၽူႈ လႂ်ဢဝ်မႂ်းမႃးသူင်ႇႁွတ်ႈၵႃႈတီႈၼႆႉ။မႂ်းႁဵတ်းၵၢၼ်ငၢၼ်းသင်ယူႇၵႃႈတီႈၼႆႉ။
၄ မႂ်းမီးလွင်ႈၵႃႈသင်ၵႃႈတီႈၼႆႉ၊ မိူဝ်ႈဢၼ်ဝႃႈ ၼင်ႇၼႆၸိုင် မၼ်းၶိုၼ်းလၢတ်ႈၼႄလွင်ႈတၢင်းဢၼ်မိၶႃႇႁဵတ်းတီႈမၼ်းၼၼ်ႉလႄႈဝႃႈ၊-မိၶႃႇၸၢင်ႈၵဝ်ႁႂ်ႈၵဝ်လႆႈႁဵတ်းယိတ်ႉပရေႃးႁိၵ်ႈမၼ်းဢေႃႈ၊ ဝႃႈၼင်ႇ ၼႆဢေႃႈ။
၅ ၶဝ်ၼၼ်ႉၵေႃႈလၢတ်ႈတီႈမၼ်းလႄႈဝႃႈ၊-ၶႅၼ်းတေႃႈတွင်ႉထၢမ်ၽြႃးပဵၼ်ၸဝ်ႈ ႁႂ်ႈႁဝ်းၶႃႈလႆႈႁူႉလွင်ႈဢၼ် သဵၼ်ႈတၢင်းဢၼ်ႁဝ်းၶႃႈတၵ်းၵႂႃႇၼၼ်ႉ တၵ်းပဵၼ်ႁိုဝ်၊ဢမ်ႇပဵၼ်ႁိုဝ်ၼၼ်ႉသေၵမ်း။
၆ ႁဝ်းၶႃႈတွင်းပၢၼ်ႇၶႃႈဢေႃႈ၊ဝႃႈၼင်ႇၼႆလႄႈ၊ ယိတ်ႉပရေႃးႁိၵ်ႈၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ၵႂႃႇၼိမ်ၼိမ်တႃႉ။ထႃႇဝရႃႉၽြႃး လူႈတူၺ်းသဵၼ်ႈတၢင်းဢၼ်သူၵႂႃႇၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။
၇ မိူဝ်ႈၼၼ်ႉၵူၼ်းႁႃႈၵေႃႉၼၼ်ႉဢွၵ်ႇၵႂႃႇလႄႈ ႁွတ်ႈထိုင်ၵႃႈတီႈဝဵင်းလေႇသ သေယဝ်ႉႁၼ်လွင်ႈဢၼ်ၵူၼ်းဝဵင်းၸိူဝ်းၼၼ်ႉယူႇလူင်ႉလီလွတ်ႈလီ၊ ဢမ်ႇထၢင်ႇဢမ်ႇထိူမ်လႄႈ ယူႇၼိမ်ၼိမ်လီလီမိူၼ်ၸိူဝ်ႉၼင်ႇ ၵူၼ်းဝဵင်းၸိတုၼ်ႇၸိူဝ်းၼၼ်ႉယူႇဢေႃႈ။ၵွပ်ႈပိူဝ်ႈၼႂ်းမိုဝ်းၶဝ်ဢမ်ႇလူဝ်ႇၵႃႈသင်လႄႈ ၶဝ်လႆႈလီလႆႈပဵၼ်ယူႇဢေႃႈ။ၶဝ်ယူႇၵႆႈၵၼ်တင်းၵူၼ်းဝဵင်းၸိတုၼ်ႇလႄႈ ၶဝ်ဢမ်ႇမီးတၢင်းဢၼ်ၶဝ်ႈဢွၵ်ႇၵၼ်တင်းပိူၼ်ႈတၢင်ႇၵေႃႉ။
၈ မိူဝ်ႈဢၼ်ၶဝ်ၶိုၼ်းႁွတ်ႈထိုင်ဝဵင်း ၸေႃႇရ တင်းဝဵင်းဢေႇသတေႃႇလ တီႈဢၼ်ၸိူဝ်ႉၶိူဝ်းပီႈၼွင်ႉၶဝ်မီးၼၼ်ႉၸိုင်ပီႈၼွင်ႉၸိူဝ်ႉၶိူဝ်းၶဝ်ၸိူဝ်းၼၼ်ႉ ဢွၼ်ၵၼ်ထၢမ်ႇလႄႈဝႃႈ၊- သူမီးလွင်ႈဢၼ်တၵ်းၶိုၼ်းလၢတ်ႈၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉဢွၼ် ၵၼ်ၶိုၼ်းလၢတ်ႈလႄႈဝႃႈ၊-
၉ ႁဝ်းဢွၼ်ၵၼ်ၵႂႃႇတိုၵ်းတေႃးၶဝ်တႃႉႁဝ်း။ႁဝ်းႁၼ်မိူင်းၼၼ်ႉပဵၼ်မိူင်းဢၼ်လီဢၼ်ငၢမ်းဢေႃႈ။သူယင်းယူႇၼိမ်ၼိမ်လီလီယူႇႁိုဝ်။ယႃႇပေႁဵတ်းၵူၺ်ႈႁဵတ်းထိူင်းလွင်ႈဢၼ်တၵ်း လႆႈၵႂႃႇလႄႈၶဝ်ႈသိမ်းဢဝ်ၸၢမ်ႇၸႃးမိူင်းၼၼ်ႉ။
၁၀ မိူဝ်ႈဢၼ်သူၵႂႃႇၼၼ်ႉ သူတၵ်းထူပ်းႁၼ်ၵူၼ်းမဵဝ်းဢၼ်ဢမ်ႇၽၢင်ႉဢမ်ႇထိူမ်ၵႃႈသင်ဢိၵ်ႇတင်း မိူင်းဢၼ်ၵႂၢင်ႈလီလႃးလီၼၼ်ႉဢေႃႈ။ၽြႃးပဵၼ်ၸဝ်ႈဢၢပ်ႈပၼ်ၵႃႈၼႂ်းမိုဝ်းသူယဝ်ႉ။တီႈဢၼ်လူဝ်ႇထႅင်ႈသေၸိူဝ်ႉသေပိူင်ၵႃႈၼိူဝ်လိၼ်မိူင်းၼၼ်ႉဢမ်ႇမီးသင်ယဝ်ႉ၊ ဝႃႈၼင်ႇၼႆဢေႃႈ။
၁၁ မိူဝ်ႈၼၼ်ႉ ၵူၼ်းမဵဝ်းတၼ်ႇႁူၵ်းပၢၵ်ႇၵေႃႉပႃးဢဝ်တင်းလၢၵ်ႈၼၢၵ်ႈတိုၵ်းသိုၵ်းသေလႄႈ ၶီႇသိုၵ်းဢွၵ်ႇသေၵႃႈတီႈဝဵင်းၸေႃႇရ တင်းဝဵင်းဢေႇသတေႃႇလလႄႈၵႂႃႇ ဢေႃႈ။
၁၂ ၶဝ်ၶီႇသိုၵ်းၵႂႃႇလႄႈၶျႃးတပ်ႉၶဝ်ၵႃႈတီႈဝဵင်းၵိရယတ်ႉယႃႇရိမ်ႇၼႂ်းဢိူင်ႇယုတဢေႃႈ။ပိူဝ်ႈၼႆလႄႈၶဝ်ႁွင်ႉႁိၵ်ႈၸိုဝ်တီႈၼၼ်ႉဝႃႈ တပ်ႉမဵဝ်းတၼ်ႇဝႃႈၼႆတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။မီးၵႃႈတီႈၽၢႆႇ လင်ဝဵင်းၵိရယတ်ႉယႃႇရိမ်ႇဢေႃႈ။
၁၃ ၶဝ်ၼၼ်ႉသမ်ႉလုၵ်ႉသေၵႃႈတီႈၼၼ်ႉ ၵႂႃႇၵႃႈၼိူဝ်ႁၢၼ်ႉလွႆဢေႇၽရိမ်ႇႁွတ်ႈထိုင်ၵႃႈတီႈႁိူၼ်းမိၶႃႇဢေႃႈ။
၁၄ မိူဝ်ႈၼၼ်ႉၵူၼ်းႁႃႈၵေႃႉ ဢၼ်ၵႂႃႇႁႂ်ႈလႆႈလွမ်တူၺ်းလိၼ်ဝဵင်းလေႇသ ၼၼ်ႉလၢတ်ႈတီႈပီႈၼွင်ႉၸိူဝ်ႉၶိူဝ်းၶဝ်ၼၼ်ႉလႄႈဝႃႈ၊- ၸွင်ႁူႁူႉလွင်ႈဢၼ်ဝႃႈၵႃႈၼႂ်းႁိူၼ်းၼႆႉႁိူၼ်း ၼိုင်ႈမီးသိူဝ်ႈသုပ်းၸဝ်ႈ၊ရုၵ်ႉထူႉတေႇရၽိမ်ႇ၊ရုၵ်ႉထူႉဢၼ်တွင်ႈႁဵတ်းၶႅၵ်းႁဵတ်း၊ရုၵ်ႉထူႉဢၼ်သွၼ်းႁဵတ်းလေႃႇႁဵတ်းၼၼ်ႉဢၼ်ဝႃႈၼၼ်ႉႁိုဝ်။ဢွၼ်ၵၼ်ႁူႉလွင်ႈဢၼ် သူတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉ တႃႉ၊မိူဝ်ႈဢၼ်ဝႃႈၼင်ႇၼႆဢေႃႈ။
၁၅ ၶဝ်ၸိူဝ်းၼၼ်ႉၵေႃႈဢွၼ်ၵၼ်ငိၵ်းၵႂႃႇၸူးၵႃႈတီႈၼၼ်ႉသေယဝ်ႉ ႁွတ်ႈထိုင်ၵႃႈတီႈႁိူၼ်းတီႈယူႇၵူၼ်းဢွၼ်ႇမဵဝ်းလေႇဝိ ဢၼ်ဝႃႈႁိူၼ်းမိၶႃႇ ၼၼ်ႉလႄႈတၵ်းလၢတ်ႈၵၼ်တင်းမၼ်း ၼၼ်ႉဢေႃႈ။
၁၆ ၵူၼ်းမဵဝ်းတၼ်ႇႁူၵ်းပၢၵ်ႇဢၼ်ပႃးလၢၵ်ႈၼၢၵ်ႈတိုၵ်းသိုၵ်းၸိူဝ်းၼၼ်ႉ ဢွၼ်ၵၼ်ၸုၵ်းယူႇၵႃႈ တီႈႁူးၽၵ်းတူဢေႃႈ။
၁၇ ၵူၼ်းႁႃႈၵေႃႉဢၼ်ၵႂႃႇႁႂ်ႈလႆႈလွမ်တူၺ်းမိူင်းၸိူဝ်းဢွၼ်တၢင်းၼၼ်ႉ ၶဝ်ႈၵႂႃႇၵႃႈၼႂ်းႁိူၼ်းသေယဝ်ႉ သိမ်းဢဝ်ရုၵ်ႉထူႉဢၼ်တွင်ႈႁဵတ်းၶႅၵ်းႁဵတ်း၊သိူဝ်ႈသုပ်းၸဝ်ႈ၊ရုၵ်ႉထူႉတေႇရ ၽဵမ်ႇ၊ရုၵ်ႉထူႉဢၼ်သွၼ်းႁဵတ်းလေႃႇႁဵတ်းၸိူဝ်ႉၼၼ်ႉဢေႃႈ။ယိတ်ႉပရေႃးႁိၵ်ႈၼၼ်ႉ ၸုၵ်းယူႇၵႃႈႁူးၽၵ်းတူဢိၵ်ႇလူၺ်ႈၵၼ်တင်း ၵူၼ်းႁူၵ်းပၢၵ်ႇဢၼ်ပႃးလၢၵ်ႈၼၢၵ်ႈတိုၵ်းသိုၵ်း ၸိူဝ်းၼၼ်ႉဢေႃႈ။
၁၈ မိူဝ်ႈဢၼ်ၵူၼ်းၸိူဝ်းၼၼ်ႉၶဝ်ႈၵႂႃႇၼႂ်းႁိူၼ်းမိၶႃႇလႄႈ သိမ်းဢဝ်ရုၵ်ႉထူႉဢၼ်တွင်ႈႁဵတ်းၶႅၵ်းႁဵတ်း၊သိူဝ်ႈသုပ်းၸဝ်ႈ၊ရုၵ်ႉထူႉတေႇရၽဵမ်ႇ၊ ရုၵ်ႉထူႉဢၼ်သွၼ်းႁဵတ်းလေႃႇႁဵတ်းၸိူဝ်းၼၼ်ႉ ယိတ်ႉပရေႃးႁိၵ်ႈၼၼ်ႉထၢမ်ဝႃႈ၊-သူႁဵတ်းၵႃႈသင်ၼႆႉ၊မိူဝ်ႈဢၼ်ဝႃႈ ၼင်ႇၼႆၸိုင် ၶဝ်ၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊-
၁၉ ယူႇတဵတ်ႇတဵတ်ႇသေၵမ်း။ဢဝ်မိုဝ်းၸဝ်ႈတူမ်းသူပ်းၸဝ်ႈသေလႄႈ ၵႂႃႇလူၺ်ႈၵၼ်တင်းႁဝ်းၶႃႈသေၵမ်း။ႁဵတ်းပေႃႈႁဝ်းၶႃႈ၊ယိတ်ႉပရေႃးႁိၵ်ႈႁဝ်းၶႃႈသေၵမ်း။လွင်ႈတၢင်းဢၼ်ႁဵတ်းယိတ်ႉပရေႃးႁိၵ်ႈၵူၼ်းမဵဝ်းၸိူဝ်ႉၶိူဝ်းဢိသရေႇလ ၼၼ်ႉယိင်ႈၶႅၼ်းလီသေ ႁဵတ်းယိတ်ႉပရေႃးႁိၵ်ႈတီႈႁိူၼ်းလဵဝ်ၵူၺ်းဢမ်ႇၸႂ်ႈႁိုဝ်၊ ဝႃႈ ၼင်ႇၼႆဢေႃႈ။
၂၀ ယိတ်ႉပရေႃးႁိၵ်ႈၼၼ်ႉမီးၸႂ်ဢၼ်ၸူမ်းသိူဝ်းမူၼ်ႈပျေႃႇၼႃႇလႄႈ ဢဝ်သိူဝ်ႈသုပ်း၊ရုၵ်ႉထူႉတေႇရၽဵမ်ႇ၊ရုၵ်ႉထူႉဢၼ်တွင်ႈႁဵတ်းၶႅၵ်းႁဵတ်းၸိူဝ်းၼၼ်ႉသေယဝ်ႉ ပႃးၸွမ်းၵႂႃႇ ၵႃႈၼႂ်းမုၵ်ႉၵူၼ်းၸိူဝ်းၼၼ်ႉ ဢေႃႈ။
၂၁ ၶဝ်ဢဝ်လုၵ်ႈဢွၼ်ႇ လႂ်၊တရိၵ်ႉသၢၼ်ႇ လႂ်၊ၶူဝ်းႁၢပ်ႇ လႂ်ၸိူဝ်းၼၼ်ႉဝႆႉဢွၼ်တၢင်းၶဝ်လႄႈ ဝၢႆႇၶိုၼ်းၵႂႃႇဢေႃႈ။
၂၂ မိူဝ်ႈဢၼ် ၵႆၵၼ်တင်းႁိူၼ်းမိၶႃႇယဝ်ႉၼၼ်ႉၵူၼ်းဢၼ်ယူႇႁိူၼ်းၸမ်ၵၼ်တင်းႁိူၼ်းမိၶႃႇ ၸိူဝ်းၼၼ်ႉဢွၼ်ၵၼ်ၸူႉၵၼ်တုမ်ၵၼ်သေလႄႈ လိုပ်ႈၸွမ်းလမ်းၸွမ်းတေႃႇပေႃးၶိုတ်းၵူၼ်းမဵဝ်းတၼ်ႇၸိူဝ်းၼၼ်ႉဢေႃႈ။
၂၃ မိူဝ်ႈဢၼ်ၶဝ်ႁွင်ႉသဵၼ် တီႈၵူၼ်းမဵဝ်းတၼ်ႇၸိူဝ်းၼၼ်ႉၸိုင် ၵူၼ်းမဵဝ်းတၼ်ႇ ၸိူဝ်းၼၼ်ႉဝၢႆႇၼႃႈၶဝ်ၶိုၼ်းတေႃႇမိၶႃႇလႄႈဝႃႈ၊-မႂ်းမီးလွင်ႈတၢင်းၵႃႈသင်လႄႈပႃးဢဝ်မုၵ်ႉၵူၼ်းၸိူဝ်းၵူၼ်းၸိူဝ်းၼႆႉၸွမ်းမႃး၊မိူဝ်ႈဢၼ်ဝႃႈၼင်ႇၼႆၸိုင် မၼ်းၵေႃႈလၢတ်ႈလႄႈဝႃႈ၊-
၂၄ သူဢဝ်ၽြႃး ဢၼ်ၵဝ်ႁဵတ်းၸိူဝ်းၼၼ်ႉ ဢိၵ်ႇတင်းယိတ်ႉပရေႃးႁိၵ်ႈၵဝ်ၵႂႃႇယဝ်ႉလူင်ပေႇ။ဢီသင်ယင်းၵိုတ်းၵျၢၼ်ႇပုၼ်ႈၵဝ်လူးၵွၼ်ႇ။ႁဵတ်းႁိုဝ်လႄႈသူယင်းထၢမ်ဝႃႈမီးလွင်ႈၵႃႈသင်ဝႃႈၼင်ႇၼႆလူင်ပေႇ၊ ဝႃႈၼင်ႇၼႆ ဢေႃႈ။
၂၅ ၵူၼ်းမဵဝ်းတၼ်ႇၸိူဝ်းၼၼ်ႉၵေႃႈလၢတ်ႈတီႈမၼ်းလႄႈဝႃႈ၊- ယႃႇပေႁႂ်ႈၵူၼ်းႁဝ်းလႆႈငိၼ်းၵႂၢမ်းမႂ်းၼႆႉသေၵမ်း။ပေႃးဢမ်ႇၼၼ်ၵူၼ်းဢၼ်ၸႂ်လမ်သႆႈၵမ်ႇၸိူဝ်းၼၼ်ႉ တၵ်းဢွၼ်ၵၼ်ႁဵတ်းတီႈမႂ်းလႄႈ ဢသၢၵ်ႈမႂ်းဢိၵ်ႇတင်း ဢသၢၵ်ႈၵူၼ်းႁိူၼ်းၵူၼ်းယေးမႂ်းတင်းလၢႆတၵ်းလူႉသုမ်းဢေႃႈ၊ဝႃႈၼင်ႇၼႆဢေႃႈ။
၂၆ ၵူၼ်းမဵဝ်းတၼ်ႇၸိူဝ်းၼၼ်ႉသိုပ်ႇပႆတၢင်းၵႂႃႇဢေႃႈ။မိၶႃႇၼၼ်ႉ ႁူႉႁၼ်လွင်ႈဢၼ်ၶဝ်ႁႅင်းယႂ်ႇၼႃႇသေမၼ်းၼၼ်ႉလႄႈ ဝၢႆႇၶိုၼ်းမိူဝ်းၵႂႃႇၸူးၵႃႈတီႈႁိူၼ်းမၼ်းသေဢေႃႈ။
၂၇ ၶဝ်ဢဝ်ၶိူင်ႈပိုင်ႈဢၼ်မိၶႃႇ ႁဵတ်းၸိူဝ်းၼၼ်ႉဢိၵ်ႇတင်းယိတ်ႉပရေႃးႁိၵ်ႈ ဢၼ်ယူႇၵႃႈတီႈမၼ်းၼၼ်ႉသေယဝ်ႉၵႂႃႇႁွတ်ႈထိုင်ၵႃႈတီႈဝဵင်းလေႇသ တီႈဢၼ်ၵူၼ်းတင်းလၢႆဢမ်ႇထၢင်ႇဢမ်ႇထိူမ်လႄႈယူႇၼိမ်ၼိမ်လီလီၼၼ်ႉသေယဝ်ႉ တိုၵ်းတေႃးယႃႉၶဝ်ပႅတ်ႈ လူၺ်ႈၶူမ်းလၢပ်ႇ ၶူမ်းလႅဝ်းလႄႈ ဢဝ်ၽႆးတုတ်ႇပႅတ်ႈဢေႃႈ။
၂၈ ၵွပ်ႈပိူဝ်ႈၶဝ်ၵႆၵၼ်တင်းဝဵင်းၸိတုၼ်ႇ ဢမ်ႇမီးတၢင်းဢၼ်ၶဝ်ႈဢွၵ်ႇပိူၼ်ႈသေၵေႃႉသေၵူၼ်းၼၼ်ႉလႄႈ ၶဝ်ဢမ်ႇမီးၵေႃႉဢၼ်ၵႄႇသႄႇၶဝ်။ဝဵင်းၼၼ်ႉမီးယူႇၵႃႈၼႂ်းပၢင်ႈႁူၺ်ႈဢၼ်မီးၵႃႈတီႈႁိမ်းဝဵင်းပိတ်ႉရႁေႃႇၽ ၼၼ်ႉဢေႃႈ။ၵႃႈတီႈၼၼ်ႉၶဝ်တႄႇႁဵတ်းဝဵင်းဢၼ်မႂ်ႇဢေႃႈ။
၂၉ ဝဵင်းၼၼ်ႉၸိုင်ၶဝ်ၸွမ်းလူၺ်ႈၸိုဝ်သဵင်တၼ်ႇ ဢၼ်ပဵၼ်ပေႃႈမဵဝ်းၶဝ် ဢၼ်ပဵၼ်လုၵ်ႈၸၢႆး ဢိသရေႇလၼၼ်ႉသေလႄႈ ႁွင်ႉႁိၵ်ႈၸိုဝ်ဝဵင်းၼၼ်ႉဝႃႈ ဝဵင်းတၼ်ႇဝႃႈၼႆဢေႃႈ။ၸိုဝ်ၵဝ်ႇၸမ်းပဵၼ်လေႇသဢေႃႈ။
၃၀ ၵူၼ်းမဵဝ်းတၼ်ႇၸိူဝ်ႉၼၼ်ႉ ဢဝ်ရုၵ်ႉထူႉဢၼ် မိၶႃႇတွင်ႈႁဵတ်းၶႅၵ်းႁဵတ်းၼၼ်ႉ တႄႇဝႆႉတင်ႈဝႆႉပုၼ်ႈၶဝ်လႄႈယေႃးၼသၼ်ႇလုၵ်ႈၸၢႆးၵေႇရသုၼ်ႇ လုၵ်ႈၸၢႆးမုဝ်သေႇ ဢိၵ်ႇလူၺ်ႈၵၼ်တင်း လုၵ်ႈၸၢႆးမၼ်းတင်းလၢႆ ၶဝ်ႁဵတ်းယိတ်ႉပရေႃးႁိၵ်ႈတီႈ ၵူၼ်းမဵဝ်းတၼ်ႇတေႃႇထိုင်ႁွတ်ႈ ဝၼ်းမိူဝ်ႈဢၼ်လႆႈၶၢႆႉဢွင်ႈၶၢႆႉတီႈၵႂႃႇ ၼၼ်ႉဢေႃႈ။
၃၁ ၼင်ႇၼၼ်လႄႈၶဝ်ဢဝ်ရုၵ်ႉထူႉဢၼ်မိၶႃႇ သွၼ်းႁဵတ်းလေႃႇႁဵတ်းၼၼ်ႉတႄႇဝႆႉတင်ႈဝႆႉၼႂ်းၶိင်ႇၵႃႇလႃႉၸူဝ်ႈပၢၼ်ဢၼ် ႁိူၼ်းၽြႃးပဵၼ်ၸဝ်ႈမီးယူႇၵႃႈတီႈဝဵင်းသိလေႃႇၼၼ်ႉဢေႃႈ။