Chapter
၁၃
သၢမ်ႇသုၼ်ႇၵိုတ်ႇလဵင်ႉမႃး
၁ ၵူၼ်းမဵဝ်းဢိသရေႇလ တင်းလၢႆသမ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ထႃႇဝရႃႉၽြႃးဢဝ်ၶဝ်ဢၢပ်ႈပၼ်ၵႃႈၼႂ်းၵူၼ်းမဵဝ်းၽိလိတ်ႉတိ တင်းလၢႆသီႇသိပ်းပီႊတဵမ်တဵမ်ဢေႃႈ။
၂ မိူဝ်ႈၼၼ်ႉ မီးၵူၼ်းၵေႃႉၼိုင်ႈဢၼ်မီးၸိုဝ်ဝႃႈမႃႇၼေႃႇဢၼ်ပဵၼ်ၵူၼ်းဝဵင်းၸေႃးရ မဵဝ်းၸိူဝ်ႉၶိူဝ်းတၼ်ႇၼၼ်ႉဢေႃႈ။မေးမၼ်းၼၼ်ႉဢမ်ႇၵိူတ်ႇလဵင်ႉလုၵ်ႈလဵင်ႉလၢင်း လႄႈပဵၼ်ဢၼ်မၼ်ဢေႃႈ။
၃ တမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမေႈယိင်းၼၼ်ႉသေလႄႈ လၢတ်ႈတီႈမၼ်းလႄႈဝႃႈ၊-တူၺ်းလူး။မိူဝ်ႈလဵဝ်ၼႆႉမႂ်းၼႆႉပဵၼ်ဢၼ်မၼ်လႄႈဢမ်ႇၵိူတ်ႇလဵင်ႉလုၵ်ႈလဵင်ႉလၢင်း။ၵူၺ်းၵႃႈ မႂ်းတၵ်းပႃးပတိၵ်ႉသၼ်ႇထေႇလႄႈၵိူတ်ႇလဵင်ႉလုၵ်ႈ ၸၢႆးမႃးဢေႃႈ။
၄ ပိူဝ်ႈၼႆလႄႈႁဵတ်းသတိတႃႉ။မႂ်းယႃႇပေၵိၼ်ၼမ်ႉၸပိတ်ႉ။ယႃႇပေၵိၼ်လဝ်ႈ။ယႃႇပေၵိၼ်တၢင်းၵိၼ်ဢၼ်ဢမ်ႇမူတ်းၸၢင်ႇၼၼ်ႉ။လွင်ႈမၼ်းၸမ်း၊ မႂ်းတၵ်းပႃးပတိၵ်ႉသၼ်ႇထေႇလႄႈၵိူတ်ႇလဵင်ႉ လုၵ်ႈၸၢႆးမႃးဢေႃႈ။
၅ မၼ်းတၵ်းဢမ်ႇလႆႈၶၢမ်ႇတၢင်းဢၼ်ထႃႁူဝ်။လွင်ႈမၼ်းၸမ်းလုၵ်ႈၸၢႆးၼၼ်ႉပဵၼ်ၵူၼ်းၼႃႇၸရိၽြႃးပဵၼ်ၸဝ်ႈၸႃႉၸဵမ်ၼႂ်းတွင်ႉမေႈမၼ်း တေႃႇထိုင်ႁွတ်ႈမၼ်းပေႃးတၢႆၼၼ်ႉဢေႃႈ။မၼ်းတၵ်းၸႃႉႁဵတ်းတၢင်းဢၼ်ၵႄႇသႄႇၼုၵ်ႉဢဝ် ၵူၼ်းမဵဝ်းဢိသရေႇလ တင်းလၢႆဢွၵ်ႇသေၵႃႈၼႂ်းမိူင်းၵူၼ်းၽိလိတ်ႉတိတင်း လၢႆဢေႃႈ၊ဝႃႈၼင်ႇၼႆဢေႃႈ။
၆ မေႈယိင်းၼၼ်ႉၵေႃႈ ၵႂႃႇလၢတ်ႈၼႄတီႈၽူဝ်မၼ်းလႄႈဝႃႈ၊-ၵူၼ်းၽြႃးပဵၼ်ၸဝ်ႈၵေႃႉၼိုင်ႈဢၼ်မီးၼႃႈဢၼ်လီဢၢမ်းၼႃႇ မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈၼၼ်ႉ ပေႃႇမႃးၵႃႈတီႈၵဝ်ၶႃႈၶႃႈဢေႃႈ။ၵဝ်ၶႃႈၵေႃႈဢမ်ႇထၢမ်ႇလွင်ႈဢၼ်မၼ်းလုၵ်ႉၵႃႈတီႈ လႂ်မႃးၼၼ်ႉၶႃႈ။မၼ်းၵေႃႈဢမ်ႇလၢတ်ႈၸိုဝ် လၢတ်ႈသဵင်ႈမၼ်းတီႈၵဝ်ၶႃႈ။
၇ ၵူၺ်းၵႃႈမၼ်းလၢတ်ႈတီႈၵဝ်ၶႃႈလႄႈဝႃႈ၊-တူၺ်းလူး။မႂ်းၼႆႉတၵ်းပႃးပတိၵ်ႉသၼ်ႇထေႇလႄႈၵိူတ်ႇလဵင်ႉလုၵ်ႈၸၢႆးမႃးဢေႃႈ။မႂ်းယႃႇပေၵိၼ်ၼမ်ႉၸပိတ်ႉ။ယႃႇပေၵိၼ်လဝ်ႈ။ယႃႇပေၵိၼ်တၢင်းၵိၼ်ဢၼ်ဢမ်ႇမူတ်းၸၢင်ႇၼၼ်ႉ။လွင်ႈမၼ်းၸမ်းလုၵ်ႈၸၢႆးၼၼ်ႉ တၵ်းလႆႈပဵၼ်ၵူၼ်းၼႃႇၸရိၽြႃးပဵၼ်ၸဝ်ႈ ဢဝ်ၸႃႉၸဵမ်ၼႂ်းတွင်ႉမေႈမၼ်းတေႃႇထိုင်ႁွတ်ႈ ဝၼ်းဢၼ်မၼ်းတၢႆၼၼ်ႉဢေႃႈ၊ဝႃႈၼင်ႇၼႆၶႃႈယဝ်ႉ၊ဝႃႈၼင်ႇၼႆဢေႃႈ။
၈ မိူဝ်ႈၼၼ်ႉ မႃႇၼေႃႇလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊- ၸဝ်ႈၽြႃးတီႈၶႃႈ။ၶႅၼ်းတေႃႈႁႂ်ႈၵူၼ်းၽြႃးပဵၼ်ၸဝ်ႈ ဢၼ်ၸဝ်ႈႁဝ်းပွႆႇၸႂ်ႉမႃးၼၼ်ႉ သမ်ႉမႃးတီႈၶႃႈၸဝ်ႈႁဝ်းထႅင်ႈလႄႈ သင်ႇသွၼ်ပၼ်လွင်ႈဢၼ်ၶႃႈၸဝ်ႈႁဝ်းၸိူဝ်းၼႆႉ တၵ်ႈလႆႈႁဵတ်းၸိူဝ်ႉၼင်ႇႁိုဝ်တီႈလုၵ်ႈၸၢႆးဢၼ်တၵ်းၵိူတ်ႇလဵင်ႉမႃးၼၼ်ႉ သေ ၵမ်းၶႃႈ၊ဝႃႈၼင်ႇၼႆဢေႃႈ။
၉ ၽြႃးပဵၼ်ၸဝ်ႈထွမ်ႇဢဝ်ၵႂၢမ်း မႃႇၼေႃႇ သေလႄႈ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ သမ်ႉၶိုၼ်းမႃးၵႃႈတီႈမေႈယိင်းၼၼ်ႉထႅင်ႈၼႂ်းမိူဝ်ႈဢၼ်မၼ်းၼင်ႈယူႇ ၵႃႈၼႂ်းတူင်ႈၼႃးၼၼ်ႉဢေႃႈ။မိူဝ်ႈၼၼ်ႉၽူဝ်မၼ်းမႃႇၼေႃႇၼၼ်ႉဢမ်ႇမီး လူၺ်ႈၵၼ်တင်းမၼ်း။
၁၀ မေႈယိင်းၼၼ်ႉႁိပ်ႈၼႅတ်ႈလႄႈၶုၼ်ႇလႅၼ်ႈၵႂႃႇၸူးၵႃႈတီႈၽူဝ်မၼ်း ၶၼ်ၶၼ်ၽႂ်းၽႂ်းသေလႄႈမွၵ်ႇလၢတ်ႈလႄႈဝႃႈ၊-တူၺ်းလူး။ၵေႃႉဢၼ်မႃးမိူဝ်ႈဝၼ်းၼၼ်ႉ မိူဝ်ႈလဵဝ်ၼႆႉ ပေႃႇမႃးတီႈၵဝ်ၶႃႈ ၶႃႈယဝ်ႉ၊ဝႃႈၼင်ႇၼႆသေယဝ်ႉ၊
၁၁ မႃႇၼေႃႇ ၵေႃႈလုၵ်ႉသေလႄႈ ၸွမ်းလူၺ်ႈၵၼ်တင်းမေးမၼ်းၵႂႃႇၵႃႈတီႈၵေႃႉၼၼ်ႉလႄႈတွင်ႉထၢမ်လႄႈဝႃႈ၊-ၸဝ်ႈၸႂ်ႈၵေႃႉဢၼ်လၢတ်ႈတီႈမေႈယိင်းၼႆႉၼၼ်ႉႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈလၢတ်ႈလႄႈဝႃႈ၊-ၸႂ်ႈယဝ်ႉ။ဝႃႈၼင်ႇၼႆဢေႃႈ။
၁၂ မႃႇၼေႃႇၵေႃႈလဝ်ႈထၢမ်ႇလႄႈဝႃႈ၊-ႁႂ်ႈၵႂၢမ်းၸဝ်ႈႁဝ်းၼၼ်ႉတဵမ်ထူၼ်ႈသေၵမ်းလူၺ်ႈလုၵ်ႈၸၢႆးၼၼ်ႉတၵ်းပဵၼ်ၵေႃႉၸိူဝ်ႉၼင်ႇႁိုဝ်ၶႃႈ။တၵ်းလႆႈႁဵတ်းၸိူဝ်ႉၼင်ႇႁိုဝ်တီႈမၼ်းၶႃႈ၊မိူဝ်ႈဢၼ်ဝႃႈ ၼင်ႇၼႆၸိုင်တမၢၼ်ႇၵၢင်ႁၢဝ်ထႃႇဝရႃႉၽြႃးၵေႃႈလၢတ်ႈတီႈမႃႇၼေႃႇလႄႈဝႃႈ၊-
၁၃ ၵႃႈဢၼ်ၵဝ်မွၵ်ႇလၢတ်ႈဝႆႉၼၼ်ႉ မေႈယိင်းၼႆႉတၵ်းလႆႈဝေႈပိူင်ႈဢေႃႈ။
၁၄ မၼ်းတၵ်းဢမ်ႇလႆႈၵိၼ် ၵႃႈဢၼ်ပဵၼ်တီႈတူၼ်ႈၶိူဝ်းမၢၵ်ႇၸပိတ်ႉသေၸိူဝ်ႉသေပိူင်။မၼ်းတၵ်းဢမ်ႇလႆႈၵိၼ်ၸႃႉၸဵမ်ၼမ်ႉၸပိတ်ႉလႄႈလဝ်ႈ။မၼ်းတၵ်းဢမ်ႇလႆႈၵိၼ်တၢင်းၵိၼ်ဢၼ်ဢမ်ႇမူတ်းၸၢင်ႇၼၼ်ႉ။ၵႃႈၼင်ႇဢၼ်ၵဝ်သင်ႇလၢတ်ႈဝႆႉၼၼ်ႉ မၼ်းတၵ်းလႆႈပႂ်ႉလႆႈၵမ်ဢေႃႈ၊ဝႃႈၼင်ႇၼႆဢေႃႈ။
၁၅ မႃႇၼေႃႇ ၵေႃႈလဝ်ႈလၢတ်ႈတီႈ တမၢၼ်ႇၵၢင်ႁၢဝ်ထႃႇဝရႃႉၽြႃးလႄႈဝႃႈ၊-ႁႂ်ႈလႆႈႁၢမ်ႈတပ်ႉၸဝ်ႈႁဝ်းဝႆႉၵႃႈတီႈၼႆႉတေႃႇထိုင်ႁွတ်ႈ ပေႃးလႆႈမႄးႁဵၼ်းပႄႉဢွၼ်ႇတူဝ်ၼိုင်မႃးပုၼ်ႈၸဝ်ႈႁဝ်းၼၼ်ႉသေၵမ်းၶႃႈ၊ဝႃႈ ၼင်ႇၼႆဢေႃႈ။
၁၆ တမၢၼ်ႇၵၢင်ႁၢဝ်ထႃႇဝရႃႉၽြႃးၵေႃႈၶိုၼ်းလၢတ်ႈတီႈမႃႇၼေႃႇလႄႈဝႃႈ၊-ပိၵ်ႉသမ်ႉမႂ်းႁၢမ်ႈတပ်ႉၵဝ်ဝႆႉသေၵေႃႈၵဝ်တၵ်းဢမ်ႇၵိၼ်တၢင်းၵိၼ်မႂ်း။ပေႃးမႂ်းမီးဢလူဝ်ႇၶႂ်ႈပုၵ်ႉၸေႃႇ ယိၸ်ႉဢၼ်တုတ်ႇၽႆးၸိုင် မႂ်းတၵ်းလႆႈပုၵ်ႉၸေႃႇတီႈထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။လွင်ႈဢၼ်မၼ်းၼၼ်ႉၵေႃႉၼၼ်ႉပဵၼ်တမၢၼ်ႇၵၢင်ႁၢဝ်ထႃႇဝရႃႉၽြႃး ဢၼ်ဝႃႈၼၼ်ႉ မႃႇၼေႃႇဢမ်ႇပႆႇႁူႉ။
၁၇ မႃႇၼေႃႇၵေႃႈတွင်ႉထၢမ်တီႈတမၢၼ်ႇၵၢင်ႁၢဝ်ထႃႇဝရႃႉၽြႃး ၼၼ်ႉလႄႈဝႃႈ၊-လွင်ႈၼင်ႇႁိုဝ် ႁဝ်းၶႃႈတၵ်းလႆႈယွင်ႈယေႃးၸဝ်ႈႁဝ်းၼႂ်းမိူဝ်ႈဢၼ် ၵႂၢမ်းၸဝ်ႈႁဝ်းတဵမ်ထူၼ်ႈၼၼ်ႉၸိုင်
၁၈ ၸိုဝ်သဵင်ၸဝ်ႈႁဝ်း ႁွင်ႉႁိၵ်ႈၸိုဝ်သဵင်ၸိူဝ်ႉၼင်ႇႁိုဝ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင် တမၢၼ်ႇၵၢင်ႁၢဝ်ထႃႇဝရႃႉၽြႃးလၢတ်ႈလႄႈဝႃႈ၊- ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈထၢမ်ၸိုဝ်သဵင်ၵဝ်။ပဵၼ်ဢၼ်လိုၵ်ႉလမ်ႇၼႃႇဢေႃႈ၊ ဝႃႈၼင်ႇၼႆဢေႃႈ။
၁၉ မႃႇၼေႃႇၵေႃႈဢဝ်ပႄႉဢွၼ်ဢိၵ်ႇတင်းၶိူင်ႈပုၵ်ႉၸေႃႇၽေႃးၸဵၼ်ႇၼၼ်ႉလႄႈ ပုၵ်ႉၸေႃႇထႃႇဝရႃႉၽြႃးၵႃႈၼိူဝ်မၢၵ်ႇႁိၼ်ဢေႃႈ။ၽြႃးပဵၼ်ၸဝ်ႈ ႁဵတ်းလွင်ႈတၢင်းဢၼ် လီဢၢမ်းၼႃႇၼၼ်ႉသိုဝ်ႈၼႃႈတႂ်ႈတႃမႃႇၼေႃႇၶဝ်ၽူဝ်မေး ၼၼ်ႉၸမ်း
၂၀ ၼႂ်းမိူဝ်ႈဢၼ်ပိဝ်ၽႆးၵႃႈၼိူဝ်ယိတ်ႉပလၢင်ႇ ယင်းတိုၵ်းလုၵ်ႉၶိုၼ်ႈၸူးၵၢင်ႁၢဝ်ယူႇၼၼ်ႉ တမၢၼ်ႇၵၢင်ႁၢဝ်ထႃႇဝရႃႉၽြႃး မဵၼ်ၶိုၼ်ႈၵႂႃႇၸွမ်းၵႃႈၼိူဝ်ပိဝ်ၽႆးၼၼ်ႉဢေႃႈ။မႃႇၼေႃႇသွင်ၶႃၽူဝ်မေးၼၼ်ႉတူၺ်းႁၼ်သေယဝ်ႉၵူမ်ႈမူပ်ႇတဵတ်းယူႇၼိူဝ်လိၼ်ဢေႃႈ။
၂၁ တမၢၼ်ႇၵၢင်ႁၢဝ်ထႃႇဝႃႉရၽြႃးၼၼ်ႉ ဢမ်ႇသမ်ႉၶိုၼ်းပေႃႇမႃးတီႈမႃႇၼေႃႇသွင်ၶႃၽူဝ်မေးထႅင်ႈယဝ်ႉ။မိူဝ်ႈၼၼ်ႉ မႃႇၼေႃႇ ႁူႉလွင်ႈဢၼ်ဝႃႈပဵၼ်တမၢၼ်ႇၵၢင် ႁၢဝ်ထႃႇဝရႃႉၽြႃးတႄႉၼၼ်ႉဢေႃႈ။
၂၂ မႃႇၼေႃႇၵေႃႈလၢတ်ႈတီႈမေးမၼ်းလႄႈဝႃႈ၊-ႁဝ်းတၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ။လွင်ႈမၼ်းၸမ်းႁဝ်းႁၼ်ၽြႃးပဵၼ်ၸဝ်ႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင် မေးမၼ်း ၶိုၼ်းလၢတ်ႈလႄႈဝႃႈ၊-
၂၃ ပေႃးထႃႇဝရႃႉၽြႃးမီးဢလူဝ်ၶႂ်ႈဢဝ်ႁဝ်းတၢႆၸိုင် မၼ်းၸဝ်ႈဢမ်ႇၶၢမ်ႇဢဝ်ယိၸ်ႉဢၼ်တုတ်ႇၽႆးဢိၵ်ႇတင်း ၶိူင်ႈပုၵ်ႉၸေႃႇၽေႃးၸိၼ်ႇၵႃႈၼႂ်းမိုဝ်းႁဝ်း။လွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉၵေႃႈမၼ်းၸဝ်ႈဢမ်ႇၼႄဢမ်ႇပျႃႉ။ၵႂၢမ်းၸိူဝ်ႉၼင်ႇမိူဝ်ႈလဵဝ်ၼႆႉၼၼ်ႉၵေႃႈမၼ်းၸဝ်ႈတေဢမ်ႇမီးဢမိင်ႉၵူၺ်း၊ ဝႃႈ ၼင်ႇၼႆဢေႃႈ။
၂၄ မေႈယိင်းၼၼ်ႉၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁိၵ်ႈၸိုဝ်မၼ်း သၢမ်ႇသုၼ်ႇ ဢေႃႈ။လုၵ်ႈဢွၼ်ႇၼၼ်ႉယႂ်ႇမႃးလႄႈ ထႃႇဝရႃႉၽြႃးပၼ်တၢင်းလီ တီႈမၼ်းဢေႃႈ။
၂၅ ဝိၺိၺ်ႇထႃႇဝရႃႉၽြႃးၼၼ်ႉတႄႇၸႃႉတိုၵ်းယူင်းၸူဝ်းဢဝ်မၼ်းၵႃႈတီႈတပ်ႉမဵဝ်း တၼ်ႇၼႂ်းဝူင်ႈၵၢင်ဝဵင်းၸေႃႇရတင်းဝဵင်း ဢေႇသတေႃႇလၼၼ်ႉဢေႃႈ။