Chapter
၉
ၵူၼ်းမိဝ်းၵိပွင်ႇၽႅတ်ႉလႅၼ်
၁ မိူဝ်ႈဢၼ်ၶုၼ်လူင်တင်းလၢႆ ဢၼ်ယူႇၽၢႆႇဝၼ်းတူၵ်းၼမ်ႉႁွင်ႊယေႃးတၢၼ်ႇ ၵႃႈၼိူဝ်ႁၼ်လွႆ ၵႃႈတႂ်ႈပၢင်ႇပဵင်း ၵႃႈတီႈႁိမ်းၽၢင်ႇမႁႃႇပၢင်ႇလၢႆႇ တင်းသဵင်ႈတင်းမူတ်း တေႃႇထိုင်ႁွတ်ႈလွႆလေႇပၼုၼ်ႇဢၼ်ဝႃႈၶုၼ်လူင်မဵဝ်းႁိတ်ႉတိ၊ဢႃႇမေႃးရိ၊ၶႃႇၼၼိ၊ ၽေႇရၸိ၊ႁိဝိယေႇပုသိၸိူဝ်းၼၼ်ႉငိၼ်းလွင်ႈမၼ်းတၢင်းမၼ်း ၼၼ်ႉၸိုင်
၂ ၶဝ်ၽွမ်ႉၵၼ်ၸူႉၵၼ်တုမ်ၵၼ်ႁႂ်ႈလႆႈတိုၵ်းတေႃး ယေႃးသုဢိၵ်ႇတင်းၵူၼ်းမဵဝ်းဢိသရေႇလတင်း လၢႆဢေႃႈ။
၃ ၵူၼ်းဝဵင်းၵိပွင်ႇတင်းလၢႆၵေႃႈငိၼ်းလွင်ႈတၢင်းဢၼ်ယေႃးသုႁဵတ်းတီႈဝဵင်းယေႇရိၶုဝ်း ဢိၵ်ႇတင်းဝဵင်းဢႃႇဢိ ၼၼ်ႉသေယဝ်ႉ ၶဝ်ႁဵတ်းပရီ့ယေႇ လႄႈ
၄ ႁဵတ်းၸိူဝ်ႉၼင်ႇႁၢင်ႊပဵၼ်သၢၼ်ႇတမၢၼ်ႇၼၼ်ႉလႄႈ ၶဝ်ဢဝ်ထူင်ဢၼ်ၵဝ်ႇမွင်တၢင်ႇသႂ်ႇၵႃႈၼိူဝ်မႃႉလီႈၶဝ် ဢဝ်တဝ်ႈၼင်ၼမ်ႉၸပိတ်ႉ ဢၼ်ၵဝ်ႇဢၼ် ယွၵ်းၶၢတ်ႇၸွၵ်းႁူပ်ႈၼၼ်ႉသေယဝ်ႉ
၅ တိုဝ်းသွၵ်းတိၼ်ဢၼ်ၵဝ်ႇမွင်ၵူပ်းမႄးၼၼ်ႉလႄႈ ၼုင်ႈမႆႊၶူဝ်းၼုင်ႈတၢင်းမႆႊဢၼ်ၵဝ်ႇမွင်ၼၼ်ႉဢေႃႈ။တၢင်းၵိၼ်တၢင်းၶူပ်းၶဝ်ၵႃႈမီးၼၼ်ႉၵေႃႈ ပဵၼ်ဢၼ်ႁႅင်ႈဢၼ်သႃးဝႆႉ ဢေႃႈ။
၆ ၶဝ်ဢွၼ်ၵၼ်ၵႂႃႇၸူးၵႃႈတီႈယေႃးသုၵႃႈတီႈတပ်ႉၵိလၵႃႇလၼၼ်ႉသေလႄႈ လဝ်ႈလၢတ်ႈတီႈမၼ်းဢိၵ်ႇတင်းၵူၼ်းမဵဝ်းဢိသရေႇလ တင်းလၢႆလႄႈဝႃႈ၊-ႁဝ်းၶႃႈ လုၵ်ႉသေၵႃႈတီႈမိူင်းဢၼ်ၵႆပုၼ်ႉႁွတ်ႈမႃးၶႃႈယဝ်ႉ။ႁဵတ်းမိၵ်ႉသႁႃႇယႃႉ တၢင်းဢၼ်ထုၵ်ႇၵၼ်တင်းႁဝ်းၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။
၇ ၵူၼ်းမဵဝ်းဢိသရေႇလတင်းလၢႆၵေႃႈ လၢတ်ႈတီႈၵူၼ်းႁိဝိၸိူဝ်းၼၼ်ႉလႄဝႃႈ၊-ႁဝ်းဢမ်ႇလႆႈႁူႉလွင်ႈဢၼ်သူယူႇၵႃႈႁိမ်းႁဝ်းႁိုဝ်ဢမ်ႇယူႇႁိုဝ်ၼၼ်ႉ။ႁဝ်းတၵ်းႁဵတ်းမိၵ်ႉသႁႃႇယႃႉ တၢင်းဢၼ်ထုၵ်ႇၵၼ်တင်းသူလႆႈၸိူဝ်ႉၼင်ႇႁိုဝ်၊ ဝႃႈၼင်ႇၼႆသေယဝ်ႉ ၶဝ်ဢွၼ်ၵၼ်လဝ်ႈလၢတ်ႈတီႈယေႃးသုလႄႈဝႃႈ၊-
၈ ႁဝ်းၶႃႈပဵၼ်ၶႃႈၸဝ်ႈႁဝ်းၶႃႈဢေႃႈ၊ဝႃႈၼင်ႇၼႆဢေႃႈ။ယေႃးသုၵေႃႈထၢမ်တီႈၶဝ်လႄႈဝႃႈ၊-သူပဵၼ်ၽူႈ လႂ်။သူလုၵ်ႉသေၵႃႈတီႈ လႂ်မႃး၊ ဝႃႈၼင်ႇၼႆဢေႃႈ။
၉ ၶဝ်ၶိုၼ်းလဝ်ႈလၢတ်ႈတီႈမၼ်းလႄႈဝႃႈ၊-ၶႃႈၸဝ်ႈႁဝ်းၶဝ်လုၵ်ႉသေၵႃႈတီႈမိူင်းဢၼ်ၵႆၼႃႇပုၼ်ႉမႃး ၵွပ်ႈပိူဝ်ႈၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၼၼ်ႉတီႈၶႃႈယဝ်ႉ။ၶႃႈၸဝ်ႈႁဝ်းၶဝ်လႆႈငိၼ်းသတၢင်းသဵင်ၶၢဝ်ႇမၼ်းၸဝ်ႈ ဢိၵ်ႇတင်း
၁၀ ၵႃႈဢၼ်မၼ်းၸဝ်ႈႁဵတ်းၵႃႈၼႂ်းမိူင်းဢေႇၵႅပ်ႉတု တင်းၵႃႈဢၼ်မၼ်းၸဝ်ႈႁဵတ်း တီႈၶုၼ်လူင်ဢႃႇမေႃးရိသွင်ပႃး ဢၼ်မီးၽၢႆႇဝၼ်းဢွၵ်ႇၼမ်ႉႁွင်ႊယေႃးတၢၼ်ႇဢၼ်ဝႃႈသိႁုၼ်ႇ၊ ၶုၼ်ႁေႃၶမ်းႁေႇသၽုၼ်ႇ တင်းဢေႃႇၶ ၶုၼ်ႁေႃၶမ်းပႃႇသၢၼ်ႇဢၼ်ယူႇၵႃႈၼႂ်းဝဵင်း ဢႃႇသျႃႉတရုၵ်ႉၼၼ်ႉတီႈၶႃႈဢေႃႈ။
၁၁ ပိူဝ်ႈၼႆလႄႈၵူၼ်းဢၼ်ပဵၼ်ၵႄႇပဵၼ်ႁူဝ်ၶႃႈၸဝ်ႈႁဝ်းၶဝ် ဢိၵ်တင်းၵူၼ်းဝၢၼ်ႈၵူၼ်းမိူင်းၶႃႈၸဝ်ႈႁဝ်းၶဝ် တင်းသဵင်ႈတင်းလူင်ၼၼ်ႉသင်ႇလၢတ်ႈတီႈၶႃႈၸဝ်ႈႁဝ်းၶဝ်လႄႈဝႃႈ၊- ပႃးဢဝ်တၢင်းၵိၼ်တၢင်းၶူပ်း ၵႃႈၼႂ်းမိူင်းသူပုၼ်ႈဢၼ်သူတၵ်းၵႂႃႇတၵ်းပႆတၢင်း သေလႄႈၵႂႃႇႁႂ်ႈလႆႈႁပ်ႉႁူဝ်တၢင်းၶဝ်ၼၼ်ႉလႄႈလဝ်ႈလၢတ်ႈတီႈၶဝ်လႄႈဝႃႈ၊-ႁဝ်းၶႃႈပဵၼ်ၶႃႈသူၸဝ်ႈၶႃႈဢေႃႈ။ႁဵတ်းမိၵ်ႉသႁႃႇယႃႉလူၺ်ႈၵၼ်တင်းႁဝ်းၶႃႈသေၵမ်းၶႃႈ၊ ဝႃႈၼင်ႇၼႆတႃႉ၊ ဝႃႈ ၼင်ႇၼႆတီႈၶႃႈဢေႃႈ။
၁၂ ၶဝ်ႈမုၼ်းၶႃႈၸဝ်ႈႁဝ်းၶဝ်ၼႆႉၸမ်း ၼႂ်းဝၼ်းဢၼ်ၶႃႈၸဝ်ႈႁဝ်းၶဝ်ဢွၵ်ႇမႃးႁႂ်ႈလႆႈႁွတ်ႈထိုင်ၵႃႈတီႈသူၸဝ်ႈၼၼ်ႉ ၶႃႈၸဝ်ႈႁဝ်းၶဝ်ဢဝ်ၵႃႈၼႂ်းႁိူၼ်းၶႃႈၸဝ်ႈႁဝ်းၶဝ် ၼႂ်းမိူဝ်ႈဢၼ်မၼ်းယင်းဢုၼ်ႇယင်းမႆႈယူႇၼၼ်ႉလႄႈ မႃးပုၼ်ႈဢၼ်တၵ်းႁဵတ်းတၢင်းၵိၼ်တၢင်းၶူပ်းတီႈၶႃႈဢေႃႈ။မိူဝ်ႈလဵဝ်ၼႆႉၸမ်း၊တူၺ်းတီႈၶႃႈလူ။မီးတၢင်းဢၼ်ႁႅင်ႈၵႂႃႇသႃးၵႂႃႇ ယဝ်ႉတီႈၶႃႈဢေႃႈ။
၁၃ တဝ်ႈထူင်ၼင်ဢၼ်ၶႃႈၸဝ်ႈႁဝ်းၶဝ်ဢဝ်ၼမ်ႉၸပိတ်ႉသႂ်ႇတဵမ်ဝႆႉၼႆႉ ပဵၼ်ဢၼ်မႂ်ႇတီႈၶႃႈဢေႃႈ။တူၺ်းတီႈၶႃႈလူ။မီးတင်းဢၼ်ယွၵ်းသိၵ်ႇယဝ်ႉတီႈၶႃႈဢေႃႈ။ၶူဝ်းၼုင်ႈတၢင်းမႆႊၸိူဝ်းၼႆႉၶႅပ်းတိၼ်ၸိူဝ်းၼႆႉၵေႃႈ ၵဝ်ႇမွင်ၵႂႃႇၵွပ်ႈပိူဝ်ႈဢၼ်ၶၢဝ်းတၢင်းၵႆၼႃႇလူင်လၢင်ၼၼ်ႉတီႈၶႃႈဢေႃႈ ဝႃႈၼင်ႇၼႆဢေႃႈ။
၁၄ ၶဝ်ၵေႃႈ ယင်းဢမ်ႇလဝ်ႊဢမ်ႇယွၼ်းဢၶႂၢင်ႉတီႈသူပ်းထႃႇဝရႃႉၽြႃးလႄႈဢဝ်တၢင်းၵိၼ်တၢင်းၶူပ်းၶဝ်ၼၼ်ႉၵိၼ်ဢေႃႈ။ယေႃးသု ၵေႃႈႁႂ်ႈၶဝ်ၵၢင်းလွတ်ႈတၢင်းဢမူႉသိုၵ်းသေလႄႈ ႁဵတ်းမိၵ်ႉသႁႃႇယႃႉတၢင်းဢၼ်ထုၵ်ႇၵၼ်တင်းၶဝ်ႁႂ်ႈၶဝ်လႆႈဢသၢၵ်းၵတ်း ယဵၼ်ၶျၢမ်းသႃႇဢေႃႈ။
၁၅ ၶုၼ်ပရိၵ်ႈသၢတ်ႈတင်းလၢႆၵေႃႈ ႁဵတ်းသႅတ်ႈၸႃႇၵိၼ်ႇဝႃႈတီႈၶဝ်ၼၼ်ႉဢေႃႈ။
၁၆ မိူဝ်ႈဢၼ် ႁဵတ်းမိၵ်ႉသႁႃႇယႃႉတၢင်းဢၼ်ထုၵ်ႇၵၼ်တင်းၶဝ်လႄႈ လႆႈသၢမ်ဝၼ်းယဝ်ႉၼၼ်ႉၸိုင်ၶဝ်ငိၼ်းလွင်ႈဢၼ်ဝႃႈၶဝ်ၼၼ်ႉပဵၼ်ၵူၼ်းဢၼ်ၸမ်လႄႈယူႇၵႃႈတီႈႁိမ်းၶဝ်ဢေႃႈ။
၁၇ ၵူၼ်းမဵဝ်းဢိသရေႇလတင်းလၢႆၵႂႃႇတၢင်းပႆတၢင်းလႄႈ ၼႂ်းဝၼ်းဢၼ်ထူၼ်ႈသၢမ်ဝၼ်းၼၼ်ႉႁွတ်ႈထိုင်ၵႃႈတီႈဝဵင်းၶဝ်ၼၼ်ႉဢေႃႈ။ဝဵင်းၶဝ်ၼၼ်ႉၸမ်းပဵၼ်ဝဵင်း ၵိပွင်ႇ၊ ဝဵင်းၶေႇၽိရ၊ ဝဵင်းပေႇ ရုတ်ႉ၊ဝဵင်းၵိရယတ်ႉယႃႇရိမ်ဢေႃႈ။
၁၈ ၵူၼ်းမဵဝ်းဢိသရေႇလတင်းလၢႆ ဢမ်ႇတိုၵ်းတေႃးယႃႉပႅတ်ႈၶဝ်ၼၼ်ႉၵွပ်ႈပိူဝ်ႈဢၼ်ၶုၼ်ပရိၵ်ႈသၢတ်ႈတင်းလၢႆ လႆႈၵိၼ်ႇဝႃႈတီႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ ၼၼ်ႉယဝ်ႉလႄႈ ပရိၵ်ႈသၢတ်ႈတင်းသဵင်ႈတင်းလူင်တၢင်ႇဢပျႅတ်ႈတီႈၶုၼ်ၸိူဝ်းၼၼ်ႉလႄႈ ပွင်ႉၶၢင်းပွင်ႉမိူၼ်ဢေႃႈ။
၁၉ ၶုၼ်ၵႃႈမီးၸိူဝ်းၼၼ်ႉဢွၼ်ၵၼ်ၶိုၼ်းလၢတ်ႈတီႈပရိၵ်ႈသၢတ်ႈတင်းသဵင်ႈတင်းလူင်လႄႈဝႃႈ၊-ၵွပ်ႈပိူဝ်ႈဢၼ်ႁဝ်းႁဵတ်းတၢင်းဢၼ်ၵိၼ်ႇဝႃႈတီႈ ထႃႇဝရႃႉၽြႃးၽြႃးပဵၼ်ၸဝ်ႈသူ မဵဝ်းဢိသရေႇလယဝ်ႉလႄႈႁဝ်းဢမ်ႇလႆႈတိူဝ်ႉလႆႈထုၵ်ႇၶဝ်။
၂၀ ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်တီႈၶဝ်ဝႃႈၼႆၸမ်း ႁဝ်းၵူဝ်တၢမ်ႇဢပျႅတ်ႈတၵ်းႁွတ်ႈထိုင်ၵႃႈၼိူဝ်ႁဝ်း ၵွပ်ႈပိူဝ်ႈဢၼ်ႁဝ်းၵိၼ်ႇဝႃႈတီႈၶဝ်မႅၼ်ႈၼၼ်ႉလႄႈ ႁဝ်းတၵ်းလႆႈႁႂ်ႈဢသၢၵ်ႈၶဝ်ၵတ်းယဵၼ်ၶျၢမ်းသႃႇယူႇဢေႃႈ၊ ဝႃႈၼင်ႇၼႆဢေႃႈ။
၂၁ ၶုၼ်ၸိူဝ်းၼၼ်ႉသမ်ႉလၢတ်ႈထႅင်ႈလႄႈဝႃႈ၊- ႁႂ်ႈဢသၢၵ်ႈၶဝ်လႆႈၵတ်းယဵၼ်ၶျၢမ်းသႃႇတႃႉ၊ ဝႃႈၼင်ႇၼႆဢေႃႈ။ၼင်ႇၼၼ်လႄႈၶဝ်ၼၼ်ႉပဵၼ်ၵေႃႉဢၼ်ၽၼ်းၽိုၼ်း၊ ၵေႃႉဢၼ်တဵၵ်းၼမ်ႉပုၼ်ႈပရိၵ်ႈသၢတ်ႈတင်းသဵင်ႈတင်းလူင်မႅၼ်ႈၵႃႈၼင်ႇဢၼ်ၶုၼ်တင်းလၢႆမီးဢမိင်ႉၼၼ်ႉဢေႃႈ။
၂၂ ယေႃးသုႁွင်ႉဢဝ်ၶဝ်သေလႄႈလၢတ်ႈလႄႈဝႃႈ၊- သူၼႆႉပိၵ်ႉသမ်ႉယူႇႁိမ်းႁဝ်းသေၵေႃႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူလၢတ်ႈဝႃႈသူလုၵ်ႉသေၵႃႈတီႈဢၼ်ၵႆၼႃႇလူင်လၢင်ပုၼ်ႉမႃးဢေႃႈ၊ ဝႃႈၼင်ႇၼႆလႄႈပႅတ်ႉလႅၼ်ႁဝ်း။
၂၃ တေႃႈလဵဝ်ၼႆႉသူပဵၼ်ၵေႃႉဢၼ်ထုၵ်ႇၵိၼ်ႇထုၵ်ႇဝႃႈလႄႈ ၵႃႈၼႂ်းသူႇၼႆႉၵေႃႈဢၼ်လႆႈၶၢမ်ႇႁဵတ်းၶႃႈဢၼ်ၽၼ်းၽိုၼ်း ဢၼ်တဵၵ်းၼမ်ႉပုၼ်ႈႁိူၼ်းၽြႃးပဵၼ်ၸဝ်ႈၵဝ် တၵ်းဢမ်ႇလႆႈထၢတ်ႇဝႃႈၼင်ႇၼႆဢေႃႈ။
၂၄ ၶဝ်ၵေႃႈၶိုၼ်းလဝ်ႈလၢတ်ႈတီႈယေႃးသုလႄႈဝႃႈ၊-ၵွပ်ႈပိူဝ်ဢၼ်ၶႃႈၸဝ်ႈႁဝ်းၸိူဝ်းၼႆႉ လႆႈႁူႉလႆႈငိၼ်းလွင်ႈဢၼ် ထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းသင်ႇလၢတ်ႈဝႆႉတီႈမုဝ်းသေႇၶႃႈမၼ်းၸဝ်ႈၼၼ်ႉ ႁႂ်ႈလႆႈဢဝ်မိူင်းၼႆႉတင်းသဵင်ႈတင်းမူတ်း ပၼ်တီႈသူၸဝ်ႈဢိၵ်ႇတင်း ႁႂ်ႈလႆႈပႄႇၽဵဝ်ႈပႅတ်ႈၵူၼ်းဝၢၼ်ႈၵူၼ်းမိူင်းၼႆႉတင်းသဵင်ႈတင်းလူင်သေ ၵႃႈတီႈၽၢႆႇၼႃႈသူၸဝ်ႈၼၼ်ႉတႄႉတႄႉဝႃႈဝႃႈလႄႈ ၶႃႈၸဝ်ႈႁဝ်းၶဝ်ၵူဝ်ဢသၢၵ်ႈတၵ်းသုမ်း ၵွပ်ႈပိူဝ်ႈသူၸဝ်ႈၼႃႇလူင်လၢင်လႄႈ လႆႈႁဵတ်းဢမူႉၼႆႉတီႈၶႃႈဢေႃႈ။
၂၅ တေႃႈလဵဝ်ၼႆႉတူၺ်းတီႈၶႃႈလူ။ၶႃႈၸဝ်ႈႁဝ်းၶဝ်ၼႆႉမီးယူႇၵႃႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။ၵႃႈၼင်ႇဢၼ်ၸဝ်ႈႁဝ်းထၢင်ႇပဵၼ် ဢၼ်ထုၵ်ႇဢၼ်လီဢၼ်မႅၼ်ႈၸွမ်းတြႃးၸိူဝ်ႉၼင်ႇႁိုဝ်ၼၼ်ႉ ႁဵတ်းတီႈၶႃႈၸဝ်ႈႁဝ်းၶဝ်သေၵမ်း ၶႃႈ၊ဝႃႈၼင်ႇၼႆဢေႃႈ။
၂၆ ၼင်ႇၼၼ်လႄႈမၼ်းႁဵတ်းတီႈၶဝ်လႄႈ ၵႄႇသႄႇၼုၵ်ႈဢဝ်ၶဝ်ၵႃႈၼႂ်းမိုဝ်းၵူၼ်းဢိသရေႇလတင်းလၢႆ ႁႂ်ႈၶဝ်ဢမ်ႇလႆႈဢဝ်ၶဝ်တၢႆလႄႈ ၼႂ်းမိူဝ်ႈဝၼ်းၼၼ်ႉ
၂၇ ယေႃးသုၸီႇယၢင်ႇႁႂ်ႈၶဝ်လႆႈပဵၼ်ၵေႃႉဢၼ်ၽၼ်းၽိုၼ်း ၵေႃႉဢၼ်တဵၵ်းၼမ်ႉပုၼ်ႈပရိၵ်ႈသၢတ်ႈဢိၵ်ႇတင်း ပုၼ်ႈယိၸ်ႉပလၢင်ႇထႃႇဝရႃႉၽြႃးဢၼ်တေႇဝႆႉ ၼႂ်းတီႈဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။