Chapter
၇
ဢပျႅတ်ႈဢႃႇၶၢၼ်ႇ
၁ ၵူၺ်းၵႃႈၵွပ်ႈပိူဝ်ႈ ဢႃႇၶၢၼ်ႇ ဢၼ်ပဵၼ်လုၵ်ႈၸၢႆးၵႃႇမိ၊လုၵ်ႈၸၢႆးၸႃႇပတိ၊လုၵ်ႈၸၢႆးၸေႇရ ၵူၼ်းမဵဝ်းယုတၼၼ်ႉ ၶဝ်သိမ်းဢဝ်လွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉလႄႈ ၵူၼ်းမဵဝ်းဢိသရေႇလထုၵ်ႇဢပျႅတ်ႈဢၼ်ၽိတ်းပိူင်ႈၼႂ်းလွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉဢေႃႈ။တၢင်းၸႂ်မႆးၶႂ်ႈၸႃႉထႃႇဝရႃႉၽြႃး ဢွၵ်ႇၸူးတီႈၵူၼ်းမဵဝ်းဢိသရေႇလတင်းလၢႆ ဢေႃႈ။
၂ ယေႃးသုၵေႃႈပွႆႇၸႂ်ႉၵူၼ်းဢွၵ်ႇသေၵႃႈတီႈဝဵင်းယေႇရိၶုဝ်း ၵႂႃႇၵႃႈတီႈဝဵင်းဢႃႇဢိဢၼ်မီးၵႃႈႁိမ်းဝဵင်းပေႇသဝိၼ်ႇၵႃႈတီႈၽၢႆႇဝၼ်းဢွၵ်ႇပေႇသလ ၼၼ်ႉလႄႈသင်ႇလၢတ်ႈတီႈၶဝ်လႄႈဝႃႈ၊-ၶိုၼ်ႈၵႂႃႇလႄႈလူတူၺ်းမိူင်းၼၼ်ႉတႃႉ၊ ဝႃႈၼင်ႇၼႆလႄႈ ၵူၼ်းၸိူဝ်း ၼၼ်ႉၵေႃႈဢွၼ်ၵၼ်ၵႂႃႇလႄႈ လူတူၺ်းဝဵင်းဢႃႇဢိသေယဝ်ႉ ၶိုၼ်းမႃးတီႈယေႃးသုလႄႈ လဝ်ႈလၢတ်ႈဝႃႈ၊-ယႃႇပေႁႂ်ႈၵူၼ်းတင်းသဵင်ႈၶိုၼ်ႈၵႂႃႇသေၵမ်းၶႃႈ။
၃ ႁႂ်ႈၵူၼ်းသေသွင်ႁဵင်သၢမ်ႁဵင်ၼိုင်ႈၶိုၼ်ႈၵႂႃႇလႄႈ တိုၵ်းတေႃးယႃႉပႅတ်ႈဝဵင်းဢႃႇဢိၼၼ်ႉသေၵမ်းၶႃႈ။ယႃႇပေႁႂ်ႈၵူၼ်းၵႃႈမီးတင်းသဵင်ႈတင်းလူင် ယၢပ်ႇၸႂ်ၽိုတ်ႇၸႂ်လူၺ်ႈ လွင်ႈဢၼ်ၶိုၼ်ႈၵႂႃႇၵႃႈတီႈဝဵင်းၼၼ်ႉသေၵမ်းၶႃႈ။ၶဝ်ၼၼ်ႉမီးၵေႇၼႃႇၶႃႈဢေႃႈ၊ဝႃႈၼင်ႇၼႆဢေႃႈ။
၄ ၵူၼ်းမွၵ်ႈသၢမ်ႁဵင်ဢွၼ်ၵၼ်ၶိုၼ်ႈၵႂႃႇဢေႃႈ။ၵူၺ်းၵႃႈၶဝ်လႆႈဢွၵ်ႇပႆၶိုၼ်းသေၵႃႈတီႈၽၢႆႇၼႃႈၵူၼ်းဝဵင်းဢႃႇဢိၸိူဝ်းၼၼ်ႉဢေႃႈ။
၅ ၵူၼ်းဝဵင်းဢႃႇဢိၸိူဝ်းၼၼ်ႉ တိုၵ်းတေႃးဢဝ်တၢႆပႅတ်ႈၵူၼ်းသၢမ်သိပ်းႁူၵ်းၵေႃႉဢေႃႈ။ၶဝ်ၼၼ်ႉလိုပ်ႈၸွမ်းလမ်းၸွမ်းၶဝ်ၸႃႉၸဵမ်ၽၵ်းတူဝဵင်း တေႃႇထိုင်ႁွတ်ႈၵႃႈတီႈသေႇပရိမ်ႇလႄႈ တိုၵ်းတေႃးယႃႉပႅတ်ႈၶဝ်ႈၼႂ်းတီႈဢၼ်လူင်းလွႆၼၼ်ႉလႄႈ ႁူဝ်ၸႂ်ၵူၼ်းၸိူဝ်းၼၼ်ႉ ၸိုမ်းယၢႆႈလႄႈပဵၼ်ၸိူဝ်ႉၼင်ႇၼမ်ႉၵႂႃႇဢေႃႈ။
၆ မိူဝ်ႈၼၼ်ႉယေႃးသု သိၵ်ႇၶူဝ်းၼုင်ႈမၼ်းပႅတ်ႈသေလႄႈဢိၵ်ႇလူၺ်ႈၵၼ်တင်း ၵူၼ်းဢၼ်ပဵၼ်ၵေႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉ ဢွၼ်ၵၼ်ဢဝ်မုၼ်ႈလိၼ်တၢင်ႇသႂ်ႇၵႃႈၼိူဝ်ႁူဝ်ၶဝ်သေလႄႈ မူပ်ႇတဵတ်ႇယူႇၵႃႈၼိူဝ်လိၼ် ၵႃႈတီႈၽၢႆႇၼႃႈတိူၵ်ႈတႃႇထႃႇဝရႃႉၽြႃးတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။
၇ ယေႃးသုလဝ်ႈလၢတ်ႈလႄႈဝႃႈ၊-ဢလူဝ်ႉ၊ဢူဝ်းၸဝ်ႈၽြႃးတီႈၶႃႈ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းဢဝ်ၵူၼ်းတင်းလၢႆၸိူဝ်းၼႆႉ ၶၢမ်ႈၼမ်ႉႁွင်ႊယေႃးတၢၼ်ႇမႃးႁႂ်ႈလႆႈဢဝ်ၶႃႈၸဝ်ႈႁဝ်းၶဝ်ၸိူဝ်းၼႆႉ ဢၢပ်ႇပၼ်ၵႃႈၼႂ်းမိုဝ်းၵူၼ်းဢႃႇမေႃးရိၸိူဝ်းၼႆႉလႄႈ ႁႂ်ႈလႆႈၶၢမ်ႇတၢင်းဢၼ်ယႃႉပႅတ်ႈၶႃႈႁိုဝ်း။သင်ဝႃႈၶႃႈၸဝ်ႈႁဝ်းၶဝ်ၸိူဝ်းၼႆႉလႆႈမီးၸႂ်ဢၼ်တဵမ်လီၼိမ်လီသေလႄႈ ယူႇၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇၼၼ်ႉၸိုင် ယိင်ႈၶႅၼ်း တၵ်းလီတီႈၶႃႈဢေႃႈ။
၈ ဢူဝ်းၸဝ်ႈၽြႃးတီႈၶႃႈ၊လိုၼ်းသေၵူၼ်းမဵဝ်းဢိသရေႇလ တင်းလၢႆဝၢႆႇလင်ပၼ်တီႈရၢၼ်ႇသူႇယဝ်ႉၼၼ်ႉ ၶႃႈၸဝ်ႈတၵ်းလႆႈလၢတ်ႈၸိူဝ်ႉၼင်ႇႁိုဝ်တီႈၶႃႈ။
၉ ၵူၼ်းၶႃႇၼၼိဢိၵ်ႇတင်းၵူၼ်းဝၢၼ်ႈၵူၼ်းမိူင်းၼႆႉ တင်းသဵင်ႈတင်းလူင် တၵ်းငိၼ်း လွင်ႈမၼ်းတၢင်းမၼ်းလႄႈ ဢွၼ်ၵၼ်လွမ်ႉႁွပ်ႈၶႃႈၸဝ်ႈႁဝ်းၶဝ်ၸိူဝ်းၼႆႉသေလႄႈ ပႄႇၽဵဝ်ႈၼႃႇမႃႉၸိုဝ်သဵင်ၶႃႈၸဝ်ႈႁဝ်းၶဝ်ၸိူဝ်းၼႆႉသေ ၵႃႈၼႂ်းလိၼ်မိူင်းၼႆႉတီႈၶႃႈဢေႃႈ။ပုၼ်ႈၼႃႇမႃႉၸိုဝ်သဵင်ၸဝ်ႈႁဝ်းဢၼ်ယႂ်ႇမျၢတ်ႈၼႃႇၼၼ်ႉၸိုင် ၸဝ်ႈႁဝ်းတၵ်းႁဵတ်းၸိူဝ်ႉၼင်ႇႁိုဝ်တီႈၶႃႈ၊ဝႃႈၼင်ႇၼႆဢေႃႈ။
၁၀ ထႃႇဝရႃႉၽြႃးၵေႃႈ မီးဢမိင်ႉတီႈယေႃးသုလႄႈဝႃႈ၊-လုၵ်ႉတႃႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမူပ်ႇတဵတ်ႇယူႇၸိူဝ်ႉ ၼင်ႇၼႆ။မဵဝ်းဢိသရေႇလၼႆႉၽိတ်းပိူင်ႈယဝ်ႉ။
၁၁ ၶဝ်ပူၼ်ႉလိူဝ်ပတိၺိၼ်ႇတြႃးၵဝ် ဢၼ်ၵဝ်သင်ႇလၢတ်ႈဝႆႉတီႈၶဝ်ၼၼ်ႉယဝ်ႉ။ၶဝ်ဢဝ်ၵႃႈၼႂ်းလွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉသိမ်းဝႆႉဢမၢၼ်ႇၶၼ်ပဵၼ်ယဝ်ႉ။ၶဝ်လၵ်ႉဢဝ်လွမ်ဢဝ်လႄႈႁဵတ်းပရီ့ယေႇသေလႄႈ ဢဝ်ဝႆႉ ၵႃႈၼႂ်းဢုၵ်ႉၸႃႇၶူဝ်းလဵင်းၶဝ်ယဝ်ႉ။
၁၂ ပိူဝ်ႈၼႆလႄႈၵူၼ်းမဵဝ်းဢိသရေႇလ တင်းလၢႆဢမ်ႇၸုၵ်းဢမ်ႇၶၢမ်ႇယူႇၵႃႈတီႈၽၢႆႇၼႃႈရၢၼ်ႇသူႇလႆႈလႄႈ လႆႈဝၢႆႇလင်ပၼ်တီႈရၢၼ်ႇသူၶဝ် ၵွပ်ႈပိူဝ်ႈဢၼ်ၶဝ်ပဵၼ်ၵေႃႉဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉဢေႃႈ။ပေႃးသူဢမ်ႇပႄႇၽဵဝ်ႈပႅတ်ႈ ၵေႃႉဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉသေၵႃႈၼႂ်း သူၸိုင်ၵဝ်ဢမ်ႇယူႇလူၺ်ႈၵၼ်တင်းသူလႃးလႃး။
၁၃ လုၵ်ႉလႄႈႁႂ်ႈၵူၼ်းတင်းလၢႆမူတ်းၸၢင်ႇတႃႉ။သင်ႇလၢတ်ႈလႄႈဝႃႈ၊ တူဝ်သူႁႂ်ႈတူဝ်သူမူတ်းၸၢင်ႇပုၼ်ႈဝၼ်းမိူဝ်ႈၽုၵ်ႈတႃႉ၊ဝႃႈၼင်ႇၼႆတႃႉ။ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉၸမ်း၊-မဵဝ်းဢိသရေလဢူၺ်း။လွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉမီးၵႃႈၼႂ်းသူသေၸိူဝ်ႉသေပိူင်ဢေႃႈ။ၸူဝ်ႈဢၼ်သူဢမ်ႇပႆႇပႄႇၽဵဝ်ႈပႅတ်ႈ လွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉသေၵႃႈၼႂ်းသူၼၼ်ႉၸိုင်သူဢမ်ႇၸုၵ်းဢမ်ႇ ၶၢမ်ႇယူႇၵႃႈတီႈၽၢႆႇၼႃႈရၢၼ်ႇသူႇသူလႆႈ။
၁၄ ၶိင်ႇၵၢင်ၼႂ်မိူဝ်ႈၽုၵ်ႈၼၼ်ႉ သူတၵ်းလႆႈၸွမ်းလူၺ်ႈၸၢဝ်းၶိူဝ်းသေလႄႈသုတ်ႉမႃးဢေႃႈ။ၸၢဝ်းၶိူဝ်းဢၼ်ထႃႇဝရႃႉၽြႃးမၢတ်ႈမၢႆၼၼ်ႉ တၵ်းလႆႈၸွမ်းလူၺ်ႈၶိူဝ်းပီႈၶိူဝ်းၼွင်ႉသေလႄႈသုတ်ႉမႃးဢေႃႈ။ၶိူဝ်းပီႈၶိူဝ်းၼွင်ႉဢၼ်ထႃႇဝရႃႉၽြႃးမၢတ်ႈမၢႆၼၼ်ႉ တၵ်းလႆႈၸွမ်းလူၺ်ႈဢၼ်ပဵၼ်ႁိူၼ်းပဵၼ်ယေးသေလႄႈသုတ်ႉမႃးဢေႃႈ။ဢၼ်ပဵၼ်ႁိူၼ်းပဵၼ်ယေး ဢၼ်ထႃႇဝရႃႉၽြႃးမၢတ်ႈမၢႆၼၼ်ႉ တၵ်းလႆႈသုတ်ႉမႃးၵေႃႉၼိုင်ႈယဝ်ႉၵေႃႉၼိုင်ႈ ဢေႃႈ။
၁၅ တၵ်းလႆႈဢဝ်ၵေႃႉဢၼ်လႆႈၶၢမ်ႇတၢင်းဢၼ်တီႉၺွပ်း ပႃးတင်းလွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉ တုတ်ႇၽႆးပႅတ်ႈပႃးၸွမ်းၵႃႈဢၼ်မီးတီႈမၼ်းၼၼ်ႉဢေႃႈ။လွင်ႈမၼ်းၸမ်းမၼ်းပူၼ်ႉလိူဝ်ပတိၺိၼ်ႇတြႃးထႃႇဝရႃႉၽြႃးလႄႈႁဵတ်းလွင်ႈတၢင်းဢၼ်ႁၢႆႉမိူၵ်ႈၵႃႈၼႂ်းမဵဝ်းဢိသရေႇလၼၼ်ႉယဝ်ႉ၊ ဝႃႈၼင်ႇၼႆဢေႃႈ။
၁၆ ၼင်ႇၼၼ်လႄႈ ယေႃးသု လုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေယဝ်ႉဢဝ်ၵူၼ်းမဵဝ်းဢိသရေႇလ တင်းလၢႆမႃးၸွမ်းလူၺ်ႈၶိူဝ်းၶဝ်ၼၼ်ႉလႄႈ မၼ်းမၢတ်ႈမၢႆမဵဝ်း ယုတ ဢေႃႈ။
၁၇ မၼ်းသမ်ႉဢဝ်မဵဝ်းယုတၼၼ်ႉမႃးလႄႈမၢတ်ႈမၢႆၶိူဝ်းပီႈၶိူဝ်းၼွင်ႉၸေႇရိဢေႃႈ။မၼ်းသမ်ႉဢဝ်ၶိူဝ်းပီႈၶိူဝ်းၼွင်ႉၸေႇရိ ၼၼ်ႉမႃးၸွမ်းလူၺ်ႈဢၼ်ပဵၼ်ႁိူၼ်းပဵၼ်ယေးၵေႃႉၼိုင်ႈယဝ်ႉၵေႃႉၼိုင်ႈလႄႈ မၼ်းမၢတ်ႈမၢႆ ဢၼ်ပဵၼ်ႁိူၼ်းပဵၼ်ယေးၸႃႇပတိဢေႃႈ။
၁၈ မၼ်းသမ်ႉဢဝ်ဢၼ်ပဵၼ်ႁိူၼ်းပဵၼ်ယေးၼၼ်ႉၵေႃႉၼိုင်ႈယဝ်ႉ ၵေႃႉၼိုင်ႈမႃးလႄႈမၼ်းမၢတ်ႈမၢႆ ဢႃႇၶၢၼ်ႇ ဢၼ်ပဵၼ်လုၵ်ႈၸၢႆးၵႃႇမိ၊ဢၼ်ပဵၼ်လုၵ်ႈၸၢႆးၸႃႇပတိ၊ ဢၼ်ပဵၼ်လုၵ်ႈၸၢႆးၸေႇရမဵဝ်းယုတၼၼ်ႉဢေႃး။
၁၉ ယေႃးသုၵေႃႈလၢတ်ႈတီႈဢႃၶၢၼ်ႇလႄႈဝႃႈ၊-လုၵ်ႈၸၢႆးၵဝ်ဢူၺ်း။ယွင်ႈယေႃးမုၼ်ၽုင်းထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလလႄႈၽုၺ်ႇဢွၵ်ႇၼပျေႃးတွင်းပၢၼ်ႇဢပျႅတ်ႈမႂ်း တီႈမၼ်းၸဝ်ႈတႃႉ။မွၵ်ႇလၢတ်ႈလွင်ႈတၢင်းဢၼ်မႂ်းႁဵတ်းမႅၼ်ႈၼၼ်ႉ တီႈၵဝ်တႃႉ။ယႃႇပေသိူင်ႇဝႆႉဢမ်ဝႆႉတီႈၵဝ်၊ဝႃႈၼင်ႇၼႆသေ ယဝ်ႉဢႃႇၶၢၼ်ႇ ၼၼ်ႉၶိုၼ်းလၢတ်ႈလဝ်ႈတီႈယေႃးသုလႄႈဝႃႈ၊-
၂၀ ၸႂ်ႈၶႃႈယဝ်ႉ။ၵဝ်ၶႃႈၽိတ်းပိူင်ႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၶႃႈယဝ်ႉ။လွင်ႈတၢင်းဢၼ်ၵဝ်ၶႃႈႁဵတ်းမႅၼ်ႈၼၼ်ႉၸမ်း၊မိူဝ်ႈဢၼ်ၵဝ်ၶႃႈႁၼ် သိုဝ်ႈယဝ်းပႃႇပူႉလုၼ်ႇ ဢၼ်လီဢၼ်မျၢတ်ႈ ငိုၼ်းသွင်ပၢၵ်ႇၵျၢပ်ႈသၶေႇလ တုမ်ၶမ်းဢၼ်ၼမ်ႉၼၵ်းမၼ်းမီးႁႃသိပ်းၵျၢပ်ႈသၶေႇလၼၼ်ႉ ၵႃႈၼႂ်းဢုၵ်ႉၸႃႇၶူဝ်းလဵင်း ဢၼ်ႁိမ်ဢဝ်ၸိူဝ်းၼၼ်ႉၸိုင်ၵဝ်ၶႃႈၸႂ်ၸပ်းၸႂ်ၸွႆးလႄႈသိမ်းဢဝ်မႅၼ်ႈၶႃႈယဝ်ႉ။
၂၁ ဢုၵ်ႉၸႃႇၸိူဝ်းၼၼ်ႉ သိူင်ႇဝႆႉမီးယူႇၵႃႈၼႂ်းလိၼ်ၵႃႈၼႂ်းသုမ်ႉထဵင်ၵဝ်ၶႃႈသေလႄႈ ငိုၼ်းၼၼ်ႉမီးၵႃႈတီႈတႂ်ႈသုတ်းပိူၼ်ႈၶႃႈဢေႃႈ၊ဝႃႈၼင်ႇၼႆဢေႃႈ။
၂၂ မိူဝ်ႈၼၼ်ႉ ယေႃးသုပွႆႇၸႂ်ႉၵူၼ်းၸႂ်ႉၵူၼ်းသွႆၵႂႃႇလႄႈၶဝ်ၼၼ်ႉလႅၼ်ႊၶဝ်ၵႃႈၼႂ်းသုမ်ႉထဵင်သေယဝ်ႉ ထူပ်းႁၼ်ဢုၵ်ႉၸႃႇၼၼ်ႉသိူင်ႇဝႆႉ မီးယူႇၵႃႈၼႂ်းသုမ်ႉထဵင်လႄႈ ငိုၼ်းမီးယူႇၵႃႈတီႈတႂ်ႈသုတ်းပိူၼ်ႈၼၼ်ႉဢေႃႈ။
၂၃ ၶဝ်ဢဝ်ဢွၵ်ႇသေၵႃႈၼႂ်းသုမ်ႉထဵင် ၵႂႃႇၸူးၵႃႈတီႈယေႃးသုဢိၵ်ႇတင်းၵူၼ်းမဵဝ်းဢိသရေႇလ တင်းသဵင်ႈတင်းလူင်ၼၼ်ႉသေလႄႈ ဢဝ်ဝႆႉၵႃႈတီႈၽၢႆႇၼႃႈထႃႇဝရႃႉၽြႃး ဢေႃႈ။
၂၄ ယေႃးသုဢိၵ်ႇတင်းၵူၼ်းမဵဝ်းဢိသရေႇလတင်းသဵင်းတင်းလူင်ၼၼ်ႉ ဢွၼ်ၵၼ်ဢဝ်ဢႃႇၶၢၼ်ႇလုၵ်ႈၸၢႆးၸေႇရႃႉဢိၵ်ႇတင်း ငိုၼ်း၊သိူဝ်ႈယၢဝ်း၊တုမ်ၶမ်း၊လုၵ်ႈၸၢႆးမၼ်း၊ လုၵ်ႈယိင်းမၼ်း၊ဝူဝ်းမၼ်း၊မႃႉလီႈမၼ်း၊သူဝ်းမၼ်း၊သုမ်ႉထဵင်မၼ်း၊ ၵႃႈဢၼ်မီးတီႈမၼ်းၼၼ်ႉၵႂႃႇၵႃႈတီႈၶူင်ႈႁူၺ်ႈဢႃႇၶေႃႇသေယဝ်ႉ ယေႃးသု လၢတ်ႈတီႈမၼ်းလႄႈဝႃႈ၊-
၂၅ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းယႃႉယုၵ်ႉႁဝ်းၼင်ႇၼႆ။ဝၼ်းမိူဝ်ႈၼႆႉထႃႇဝရႃႉၽြႃးတၵ်းယႃႉယုၵ်ႉမႂ်းဢေႃႈ၊ ဝႃႈၼင်ႇၼႆသေလႄႈၵူၼ်းမဵဝ်းဢိသရေႇလတင်းသဵင်ႈတင်းလူင် ဢွၼ်ၵၼ်ဢဝ်မၢၵ်ႇႁိၼ်ထိမ်ႈမၼ်းဢေႃႈ။သမ်ႉဢွၼ်ၵၼ်ဢဝ်မၢၵ်ႇႁိၼ်ထိမ်ႈၶဝ်ၼၼ်ႉလႄႈ ဢဝ်တုတ်ႇၽႆးပႅတ်ႈဢေႃႈ။
၂၆ ဢွၼ်ၵၼ်ဢဝ်မၢၵ်ႇႁိၼ်ၼမ်ၼႃ ၵွင်ဝႆႉၼိူဝ်မၼ်းလႄႈမီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။တၢင်းၸႂ်မႆႈၶႂ်ႈၸႃႉမၼ်းၸဝ်ႈၵေႃႈထၢတ်ႇယဵၼ်သေဢေႃႈ။ၸွမ်းလူၺ်ႈလွင်ႈၼၼ်ႉလႄႈၶူင်ႈႁူၺ်ႈၼၼ်ႉ လႆႈၶၢမ်ႇတင်းဢၼ်ႁွင်ႉႁိၵ်ႈၸိုဝ် ၶူင်ႈႁူၺ်ႈဢႃႇၶေႃႇ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။