Chapter
၂၄
ပတိၺိၼ်ႇၸဝ်ႈၶိုၼ်းတႄႇမႂ်ႇတီႈဝဵင်းသေႇၶိမ်ႇ
၁ ယေႃးသု ႁႂ်ႈမဵဝ်းဢိသရေႇလ ၵူႈမဵဝ်းၸူႉၵၼ်တုမ်ၵၼ်ၵႃႈတီႈဝဵင်းသေႇၶိမ်ႇလႄႈ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းမဵဝ်းဢိသရေႇလ ၵူၼ်းဢၼ်ပဵၼ်ငဝ်ႈပဵၼ်ႁူဝ်ၶဝ်၊ ၵူၼ်းဢၼ်ၸီႇယၢင်ႇတြႃးၶဝ်တင်းဢရႃႇသိၶဝ်တင်းလၢႆသေယဝ်ႉ၊ ၶဝ်ၵေႃႈဢွၼ်ၵၼ်သုတ်ႉၸပ်း သုတ်ႉၸူးၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
၂ မိူဝ်ႈၼၼ်ႉယေႃးသု လၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈၸမ်း၊-ပူႇမွၼ်ႇသူဢၼ်ဝႃႈတေႇရဢၼ်ပဵၼ်ပေႃႈဢႃႇပႁမ်ႇ တင်းၼႃႇၶေႃႇၸိူဝ်းၼၼ်ႉယူႇၵႃႈတီႈၽၢႆႇပုၼ်ႉၼမ်ႉႁွင်ႊလူင်ၶိင်ႇၵႃႇလႃႉမိူဝ်ႈဢွၼ်ၼႆႉၼၼ်ႉသေလႄႈ ႁဵတ်းဝူတ်ႈတီႈၽြႃးတၢင်ႇသူႇ တၢင်ႇပႃးဢေႃႈ။
၃ ပေႃႈသူဢႃႇပႁမ်ႇၼၼ်ႉၸမ်းၵဝ်ႁွင်ႉဢဝ်သေၵႃႈတီႈၽၢႆႇပုၼ်ႉၼမ်ႉႁွင်ႊလူင်လႄႈ ဢဝ်သူင်ႇႁွတ်ႈၵႃႈၼႂ်းမိူင်းၶႃႇၼၼိ ၵူႈတီႈၵူႈလႅၼ်သေယဝ်ႉႁႂ်ႈမဵဝ်းၸိူဝ်ႉၶိူဝ်းမၼ်း ယႂ်ႇၽႄၼမ်ၵိုၼ်းမႃးယူႇ သေလႄႈပၼ်ဢိၸၵ်ႉတီႈမၼ်းဢေႃႈ။
၄ တီႈဢိၸၵ်ႉၵေႃႈၵဝ်ပၼ်ယႃႇၵုပ်ႉတင်းဢေးသေႃးလႄႈ တီႈဢေးသေႃးၵေႃႈၵဝ်ပၼ်ပိူင်ႇလွႆၸိရဢေႃႈ။ယႃႇၵုပ်ႉဢိၵ်ႇတင်းလုၵ်ႈမၼ်းလၢင်းမၼ်း ဢွၼ်ၵၼ်ၵႂႃႇၵႃႈတီႈမိူင်းဢေႇ ၵႅပ်ႉတုဢေႃႈ။
၅ ၵဝ်ပွႆႇၸႂ်ႉမုဝ်းသေႇတင်းဢႃႇရုၼ်ႇသေလႄႈ သင်ႇသွၼ်သုင်းမႃႉမိူင်းဢေႇၵႅပ်ႉတုၸွမ်းၵႃႈၼင်ႇဢၼ်ၵဝ်ႁဵတ်းၵႃႈၼႂ်းမၼ်းၼၼ်ႉဢေႃႈ။လိုၼ်းသေၼၼ်ႉၵဝ်ၸင်ႇၼုၵ်ႈဢဝ်သူဢွၵ်ႉမႃးဢေႃႈ။ၼင်ႇၼၼ်လႄႈ ၵဝ်ၼုၵ်ႈဢဝ်ပေႃႈသူတင်းလၢႆဢွၵ်ႇသေၵႃႈၼႂ်း မိူင်းဢေႇၵႅပ်ႉတုမႃးလႄႈ
၆ ၶဝ်ႁွတ်ႈထိုင်ၵႃႈတီႈပၢင်ႇလၢႆႇသေယဝ်ႉ ၵူၼ်းဢေႇၵႅပ်ႉတု တင်းလၢႆၼၼ်ႉပႃးဢဝ်လေႃႉရထႃးဢိၵ်ႇတင်းၵူၼ်းသိုၵ်းၶီႇမႃႉလိုပ်ႈၸွမ်းလမ်းၸွမ်းပေႃႈသူၸိူဝ်းၼၼ်ႉ တေႃႇထိုင်ႁွတ်ႈပၢင်ႇလၢႆႇဢေႇတုမ်ႇဢေႃႈ။
၇ မိူဝ်ႈဢၼ်ၶဝ်ႁွင်ႉသဵၼ်တီႈထႃႇဝရႃႉၽြႃးၼၼ်ႉ ၵဝ်ဢဝ်ဢၼ်လပ်းသိင်ႇဝႆႉၵႃႈတီႈဝူင်ႈၵၢင်သူတင်းၵူၼ်းဢေႇၵႅပ်ႉတု ၸိူဝ်းၼၼ်ႉသေလႄႈႁႂ်ႈၼမ်ႉပၢင်ႇလၢႆႇႁွတ်ႈထိုင်ၵႃႈၼိူဝ်ၶဝ်လႄႈ ထုမ်ႈႁူမ်ႇၶဝ်ပႅတ်ႈဢေႃႈ။မၢၵ်ႇတႃသူလႆႈႁၼ်လွင်ႈတၢင်းဢၼ်ၵဝ်ႁဵတ်းၵႃႈၼႂ်းမိူင်းဢေႇၵႅပ်ႉတုၼၼ်ႉမႃးယဝ်ႉ။ၵႃႈၼႂ်းထိူၼ်ႇၵေႃႈ သူလႆႈယူႇမိူဝ်ႉဝၼ်းၼမ်ၼႃႇလူင်လၢင် ဢေႃႈ။
၈ လိုၼ်းၼၼ်ႉၵဝ်ဢဝ်သူသူင်ႇႁွတ်ႈၵႃႈတီႈမိူင်းၵူၼ်းဢႃႇမေႃးရိ ဢၼ်ယူႇၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇၼၼ်ႉလႄႈ မိူဝ်ႈဢၼ်ၶဝ်တိုၵ်းၵၼ်တင်းသူၼၼ်ႉ ၵဝ်ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းသူလႄႈသူလႆႈသိမ်းဢဝ်လိၼ်ၶဝ်ဢေႃႈ။ၵဝ်ပႄႇၽဵဝ်ႈၶဝ်ပႅတ်ႈသေၵႃႈတီႈၽၢႆႇၼႃႈသူဢေႃႈ။
၉ မိူဝ်ႈဢၼ် ပႃႇလၵ်ႉလုၵ်ႈၸၢႆးၸိၽေႃႇ ၶုၼ်ႁေႃၶမ်းမေႃႇၽ ၼၼ်ႉ မႄးႁႅၼ်းႁႂ်ႈလႆႈတိုၵ်းတေႃးမဵဝ်းဢိသရေႇလ ၼၼ်ႉၸိုင်ႈမၼ်းပွႆႇၸႂ်ႉႁွင်ႉဢဝ်ပႃႇလမ်ႇ လုၵ်ႈၸၢႆးပေႃႇရ မႃးႁႂ်ႈ လႆႈၵိၼ်ႇဝႃႈသူဢေႃႈ။
၁၀ ၵူၺ်းၵႃႈၵွပ်ႈပိူဝ်ႈဢၼ်ၵဝ်ဢမ်ႇထွမ်ႇဢမ်ႇဢဝ်ၵႂၢမ်းပႃႇလမ်ႇ ၼၼ်ႉလႄႈမၼ်းၼၼ်ႉပၼ်တၢင်းလီတီႈသူယူႇၶိူဝ်းၶိူဝ်းယႂ်းယႂ်းလႄႈ ၵဝ်ၵႄႇသႄႇၼုၵ်ႈဢဝ်သူသေ ၵႃႈၼႂ်းမိူင်းမၼ်းၼၼ်ႉဢေႃႈ။
၁၁ လိုၼ်းၼၼ်ႉသူၶၢမ်ႈၼမ်ႉႁွင်ႊယေႃးတၢၼ်ႇ လႄႈႁွတ်ႈထိုင်ၵႃႈတီႈမိူင်းယေႇရိၶုဝ်း သေယဝ်ႉ၊ ၵူၼ်းယေႇရိၶုဝ်း၊ၵူၼ်းၶႃႇၼၼိ၊ၵူၼ်းႁိတ်ႉတိ၊ ၵူၼ်းၵိရႃႉၵႃႇသိ၊ၵူၼ်းႁိဝိ၊ ၵူၼ်းယေႇပုသိၸိူဝ်းၼၼ်ႉ ဢွၼ်ၵၼ်တိုၵ်းတေႃးသူလႄႈၵဝ်ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းသူဢေႃႈ။
၁၂ ၵဝ်ပွႆႇၸႂ်ႉတေႃႇ လႂ်တႅၼ် လႂ် ၵႂႃႇဢွၼ်တၢင်းသူလႄႈႁေႃႈၶုၼ်လူင်ဢႃႇမေႃးရိ သွင်ပႃးဢွၵ်ႇပႅတ်ႈသေၵႃႈတီႈၽၢႆႇၼႃႈသူဢေႃႈ။သူဢဝ်လၢပ်ႇဢဝ်ၵၢင်ႇသူလႄႈ ႁဵတ်းပဵၼ်ဢမ်ႇၸႂ်ႈ။
၁၃ ၵဝ်ပၼ်လိၼ်တီႈသူဢၼ်သူဢမ်ႇႁဵတ်းဢိၵ်ႇတင်း ဝဵင်းတီႈသူဢၼ်သူဢမ်ႇတႄႇၼၼ်ႉဢေႃႈ။သူလႆႈၵိၼ်သူၼ်ဢူးယိၼ်ႇမၢၵ်ႇၸပိတ်ႉဢိၵ်ႇတင်း သူၼ်ဢူးယိၼ်ႇသၢၼ်ႇလုၼ်ႇ ဢၼ်သူဢမ်ႇၽုၵ်ႇဢမ်ႇသွမ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၄ တေႃႈလဵဝ်ၼႆႉ ဢွၼ်ၵၼ်ရူဝ်ႇသေႇၵူဝ်ယမ်ထႃႇဝရႃႉၽြႃးလႄႈ မီးတၢင်းဢၼ်ၸႂ်ၽိူၵ်ႇၸႂ်ၶၢဝ်တၢင်းဢၼ်ပႂ်ႉသႅတ်ႉၸႃႇသေလႄႈ ႁဵတ်းဝၢတ်ႈတီႈမၼ်းၸဝ်ႈတႃႉ။ပႄႇပႅတ်ႈၽြႃး ဢၼ်ပူႇပေႃႈသူႁဵတ်းဝၢတ်ႈၵႃႈတီႈၽၢႆႇပုၼ်ႉၼမ်ႉႁွင်ႊလူင်ဢိၵ်ႇတင်း ၵႃႈတီႈမိူင်းဢေႇၵႅပ်ႉတုၸိူဝ်းၼၼ်ႉသေလႄႈ ႁဵတ်းဝၢတ်ႈတီႈထႃႇဝရႃႉၽြႃး ၵူၺ်းတႃႉ။
၁၅ ဢမ်ႇၼၼ်ၵေႃႈပေႃးသူထၢင်ႇဝႃႈဢမ်ႇလီႁဵတ်းဝၢတ်ႈတီႈထႃႇဝရႃႉၽြႃးဝႃႈၼင်ႇၼႆၸိုင် ဝၼ်းမိူဝ်ႈၼႆႉ လိူၵ်ႈၵဵပ်းဢဝ် လွင်ႈဢၼ်သူတၵ်းလႆႈႁဵတ်းဝၢတ်ႈတီႈၽြႃးဢၼ် လႂ်၊ တီႈၽြႃးဢၼ်ပူႇပေႃႈသူႁဵတ်းဝၢတ်ႈၵႃႈတီႈၽၢႆႇပုၼ်ႉ ၼမ်ႉႁွင်ႊလူင်ၸိူဝ်းၼၼ်ႉႁိုဝ်။ဢမ်ႇၼၼ်တီႈၽြႃးၵူၼ်းမိူင်းဢႃႇမေႃးရိ တီႈဢၼ်သူယူႇၼႆႉၼၼ်ႉႁိုဝ်၊ၼၼ်ႉတႃႉ။ၵဝ်ဢိၵ်ႇတင်းၵူၼ်းႁိူၼ်းၵူၼ်းယေးၵဝ်ၸမ်း တၵ်းႁဵတ်းဝၢတ်ႈတီႈထႃႇဝရႃႉၽြႃးၵူၺ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင် ၵူၼ်းတင်းလၢႆၵေႃႈၶိုၼ်းလၢတ်ႈလႄႈဝႃႈ၊-
၁၆ ႁႂ်ႈလွင်ႈတၢင်းဢၼ်ၸုၼ်ႉပႅတ်ႈထႃႇဝရႃႉၽြႃးလႄႈ ႁႂ်ႈလႆႈႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးၼၼ်ႉ ၵႆၵၼ် တင်းႁဝ်းၶႃႈသေၵမ်းလူၺ်ႈ။
၁၇ လွင်ႈမၼ်းၸမ်း ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈ ၼုၵ်ႈဢဝ်ႁဝ်းၶႃႈဢိၵ်ႇတင်း ပေႃႈႁဝ်းၶႃႈၸိူဝ်းၼၼ်ႉဢွၵ်ႇသေၵႃႈၼႂ်းမိူင်းဢေႇၵႅပ်ႉတု တီႈဢၼ်ၶၢမ်ႇႁဵတ်းၶႃႈၼၼ်ႉလႄႈၼႄပျႃးၼမိၵ်ႉလၢၵ်ႈၶၼႃႇ ဢၼ်ယႂ်ႇၼႃႇတင်းလၢႆၵႃႈတီႈသိုဝ်ႈၼႃႈတႂ်ႈတႃႁဝ်းၶႃႈလႄႈ ၸွမ်းပႂ်ႉႁဝ်းၶႃႈၵႃႈၼႂ်းသဵၼ်ႈတၢင်း ၵႃႈဢၼ်ႁဝ်းၶႃႈၵႂႃႇႁဝ်းၶႃႈပႆဢိၵ်ႇတင်း ၵႃႈၼႂ်းၵူၼ်းမဵဝ်း ၵႃႈဢၼ်ႁဝ်းၶႃႈၽႃႇလတ်ႉၵႃႈၼႂ်းၶဝ်ၼၼ်ႉမႃးယဝ်ႉၶႃႈယဝ်ႉ။
၁၈ ထႃႇဝရႃႉၽြႃးႁေႃႈၵူၼ်း ၵႃႈဢၼ်ယူႇၵႃႈတီႈမိူင်းၼႆႉ ဢၼ်ဝႃႈၵူၼ်းဢႃႇမေႃးရိၸိူဝ်းၼၼ်ႉ ဢွၵ်ႇပႅတ်ႈသေၵႃႈတီႈၽၢႆႇၼႃႈႁဝ်းၶႃႈယဝ်ႉၶႃႈယဝ်ႉ။ပိူဝ်ႈၼႆႉလႄႈႁဝ်းၶႃႈတၵ်းႁဵတ်းဝၢတ်ႈတီႈထႃႇဝရႃႉၽြႃး ၵူၺ်းၶႃႈဢေႃႈ။မၼ်းၸဝ်ႈၼၼ်ႉ ပဵၼ်ၽြႃးပဵၼ်ၸဝ်ႈႁဝ်းၶႃႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၉ ယေႃးသုၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊-သူဢမ်ႇႁဵတ်းဝၢတ်ႈတီႈထႃႇဝရႃႉၽြႃးလႆႈ။မၼ်းၸဝ်ႈၼၼ်ႉပဵၼ်ၽြႃးဢၼ်မူတ်းၸၢင်ႇ ၽြႃးဢၼ်ႁၵ်ႉၶႅၼ်ၼၼ်ႉဢေႃႈ။မၼ်းၸဝ်ႈတၵ်းဢမ်ႇယိူၼ်ႉၶၢမ်ႇဢပျႅတ်ႈဢၼ်သူပူၼ်ႉလိူဝ် ဢပျႅတ်ႈဢၼ်သူၽိတ်းပိူင်ႈၸိူဝ်း ၼၼ်ႉ။
၂၀ ပေႃးသူၸုၼ်ႉပႅတ်ႈထႃႇဝရႃႉၽြႃးလႄႈႁဵတ်းဝၢတ်ႈတီႈၽြႃးတၢင်ႇဝၢၼ်ႈတၢင်ႇမိူင်းၸိုင် မၼ်းၸဝ်ႈတၵ်းဝၢႆႇၼႃႈပႅတ်ႈလႄႈ တၵ်းႁႂ်ႈၽေးတူၵ်းႁွတ်ႈမႃးၵႃႈၼိူဝ်သူ ယႃႉၽဵဝ်ႈသူပႅတ်ႈဝၢႆးသေဢၼ်မၼ်းၸဝ်ႈႁဵတ်းၵျေးၸူးတီႈသူယဝ်ႉၼၼ်ႉဢေႃႈ၊ ဝႃႈၼင်ႇၼႆ ဢေႃႈ။
၂၁ ၵူၼ်းတင်းလၢႆၵေႃႈၶိုၼ်းလၢတ်ႈတီႈယေႃးသုလႄႈဝႃႈ၊-ဢမ်ႇၸႂ်ႈၶႃႈ။ႁဝ်းၶႃႈတၵ်းႁဵတ်းဝၢတ်ႈတီႈထႃႇဝရႃႉၽြႃးၵူၺ်းၶႃႈဢေႃႈ၊ဝႃႈၼင်ႇၼႆဢေႃႈ။
၂၂ ယေႃးသုၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊-တူဝ်သူပဵၼ်သၢၵ်ႈသေႇ ၽၢႆႇၼိုင်ႈတင်းသူလွင်ႈဢၼ်သူလိူၵ်ႈၵဵပ်းဢဝ်ထႃႇဝရႃႉၽြႃးႁႂ်ႈလႆႈႁဵတ်းဝၢတ်ႈတီႈမၼ်းၸဝ်ႈၼၼ်ႉယဝ်ႉ၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉၵေႃႈဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊-ႁဝ်းၶႃႈပဵၼ်ၵေႃႉဢၼ်ၶၢမ်ႇသၢၵ်ႈသေႇၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင် မၼ်းၵေႃႈလၢတ်ႈလႄႈဝႃႈ၊-
၂၃ ပေႃးပဵၼ်ၸိူဝ်ႉၼင်ႇၼႆၸိုင် ပႄႇပႅတ်ႈၽြႃးတၢင်ႇဝၢၼ်ႈတၢင်ႇမိူင်း ဢၼ်မီးၵႃႈၼႂ်းသူၸိူဝ်းၼၼ်ႉသေလႄႈဢဝ်ႁူဝ်ၸႂ်သူၵူမ်ႈၵွမ်းၸူးတီႈထႃႇဝရႃႉၽြႃးၽြႃးပဵၼ် ၸဝ်ႈမဵဝ်းဢိသရေႇလတႃႉ၊ဝႃႈၼင်ႇၼႆဢေႃႈ။
၂၄ ၵူၼ်းတင်းလၢႆၵေႃႈ ဢွၼ်ၵၼ်လဝ်ႈလၢတ်ႈတီႈယေႃးသုလႄႈဝႃႈ၊-ႁဝ်းၶႃႈတၵ်းႁဵတ်းဝူတ်ႈတီႈထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈၶႃႈဢေႃႈ။တၵ်းထွမ်ႇဢဝ်ၵႂၢမ်း မၼ်းၸဝ်ႈၶႃႈဢေႃႈ၊ဝႃႈၼင်ႇၼႆသေယဝ်ႉ၊
၂၅ ယေႃးသုႁဵတ်းပတိၺိၼ်ႇၵၼ်တင်း ၵူၼ်းတၢင်းလၢႆၼႂ်းဝၼ်းၼၼ်ႉလႄႈ ဝႆႉထုင်းၾိင်ႈတြႃးဢိၵ်ႇတင်းလွင်ႈတၢင်းဢၼ်ၸီႇယၢင်ႇဝႆႉၼၼ်ႉ ပုၼ်ႈၶဝ်ၵႃႈတီႈဝဵင်းသေႇၶိမ်ႇၼၼ်ႉဢေႃႈ။
၂၆ ၵႂၢမ်းၼၼ်ႉၵေႃႈယေႃးသု တႅမ်ႈသႂ်ႇဝႆႉၵႃႈၼႂ်းထမ်ႇမႃႉၵျၢမ်းလိၵ်ႈၽြႃးပဵၼ်ၸဝ်ႈလႄႈ ဢဝ်မၢၵ်ႇႁိၼ်လူင်ပူၵ်းတင်ႈဝႆႉၵႃႈတီႈတႂ်ႈတူၼ်ႈမႆႉၼိမ် ဢၼ်မီႈၵႃႈႁိမ်းထႃႇၼႃႉတီႈမူတ်းၸၢင်ႇ ထႃႇဝရႃႉၽြႃး ၼၼ်ႉသေယဝ်ႉ၊ ယေႃးသုလၢတ်ႈတီႈၵူၼ်း တင်းသဵင်ႈတင်းလူင်လႄႈဝႃႈ၊-
၂၇ တူၺ်းလူ။မၢၵ်ႇႁိၼ်ၼႆႉတၵ်းပဵၼ်သၢၵ်ႇသေႇယူႇၽၢႆႇၼိုင်ႈတင်းႁဝ်းဢေႃႈ။မၼ်းလႆႈငိၼ်းၵႂၢမ်းဢၼ်ထႃႇဝရႃႉၽြႃး မီးဢမိင်ႉဝႆႉတီႈႁဝ်းၵူႈၸိူဝ်ႉၵူႈပိူင်ၼၼ်ႉယဝ်ႉ။ပိူဝ်ႈၼႆလႄႈမၼ်းတၵ်းလႆႈပဵၼ်သၢၵ်ႈသေႇယူႇၽၢႆႇၼိုင်ႈတင်းသူ ႁႂ်ႈသူၵၢင်းလွတ်ႈတၢင်းဢၼ်ထဵင်ပႅတ်ႈထႃႇဝရႃႉၽြႃးပဵၼ်ၸဝ်ႈၼၼ်ႉဢေႃႈ၊ ဝႃႈၼင်ႇ ၼႆသေယဝ်ႉ၊
၂၈ ယေႃးသုပွႆႇၵူၼ်းတင်းလၢႆၶိုၼ်းမိူဝ်းၵႂႃႇၸူးၵႃႈတီႈဢၼ်ၶဝ်လႆႈၶၢမ်ႇဢမူၺ်ႇၼၼ်ႉ ႁင်းၽႂ်ႇႁင်းမၼ်းသေဢေႃႈ။
ဢသၢၵ်ႈသုတ်းသဵင်ႈတီႈမိူင်းၶႃႇၼၢၼ်ႇ
၂၉ လိုၼ်းၼၼ်ႉၸင်ႇ၊ ယေႃးသု၊လုၵ်ႈၸၢႆးၼုၼ်ႇ၊ၶႃႈထႃႇဝရႃႉၽြႃးၼၼ်ႉ ဢသၢၵ်ႈလႆႈပၢၵ်ႇပၢႆသိပ်းပီႊသေယဝ်ႉ၊ႁွတ်ႈဢၼိၵ်ႉၸႃႉသေဢေႃႈ။
၃၀ ၶဝ်ဢဝ်မၼ်းသႂၢင်းၵျူဝ်ႇၵႃႈတီႈလိၼ်တီႈဢၼ်မၼ်းၶၢမ်ႇ ဢမူၺ်ႇၵႃႈၼႂ်းဝဵင်းတိမၼသေႃႇရ ဢၼ်မီးၵႃႈၼိူဝ်ႁၢၼ်ႉလွႆဢေႇ ၽရိမ်ႇ ၽၢႆႇတၢင်းႁွင်ႇၵုင်းၵႃႇသၼၼ်ႉဢေႃႈ။
၃၁ ၼႂ်းၸူဝ်ႈပၢၼ်ယေႃးသုဢိၵ်ႇတင်း ၸူဝ်ႈပၢၼ်ၵူၼ်းဢၼ်ပဵၼ်ၵႄႇပဵၼ်ႁူဝ် ဢၼ်ဢသၢၵ်ႈလိပ်းယူႇလိုၼ်းယေႃးသုလႄႈ ႁူႉလွင်ႈတၢင်းဢၼ် ထႃႇဝရႃႉၽြႃးႁဵတ်းပုၼ်ႈမဵဝ်းဢိသရေႇလ ၼၼ်ႉၸိူဝ်းၼၼ်ႉၵူၼ်းမဵဝ်းဢိသရေႇလ တင်းလၢႆႁဵတ်းဝၢတ်ႈတီႈထႃႇဝရႃႉၽြႃးဢေႃႈ။
၃၂ လုပ်ႇယုဝ်းသႅပ်ႉ ဢၼ်ၵူၼ်းမဵဝ်းဢိသရေႇလတင်းလၢႆဢဝ်ၵႃႈတီႈမိူင်းဢေႇၵႅပ်ႉတုမႃးၼၼ်ႉ ၶဝ်ဢဝ်သႂၢင်းၵျူဝ်ႇၵႃႈၼႂ်းဢိုင်ႇဝဵင်းသေႇၶိမ်ႇၵႃႈတီႈၵႂၢၵ်ႉလိၼ်ဢၼ်ယႃႇၵုပ်ႉ ဢဝ်တင်းငိုၼ်းပၢၵ်ႇၵျၢပ်ႈသိုဝ်ႉဢဝ်တီႈလုၵ်ႈၸၢႆးႁႃႇမေႃႇ ၵေႃႉဢၼ်ပဵၼ်ပေႃႈသေႇၶိမ်ႇၼၼ်ႉဢေႃႈ။ၵႂၢၵ်ႉလိၼ်ၼၼ်ႉလႆႈပဵၼ်လိၼ်ဢမူၺ်ႇၵူၼ်းမဵဝ်းယုဝ်းသႅပ်ႉၸိူဝ်းၼၼ်ႉဢေႃႈ။
၃၃ ဢေႇလႃႇၸႃႇလုၵ်ႈၸၢႆးဢႃႇရုၼ်ႇ ၼၼ်ႉၵေႃႈႁွတ်ႈဢၼိၵ်ႉၸႃႉသေဢေႃႈ။ၶဝ်ဢဝ်မၼ်းသႂၢင်းၵျူဝ်ႇၵႃႈတီႈၵုင်းၽိၼႁတ်ႉ ဢၼ်ၵူၼ်းတင်းလၢႆပၼ်တီႈလုၵ်ႈၸၢႆးမၼ်းၵႃႈၼိူဝ်ႁၢၼ်ႉလွႆဢေႇၽရိမ်ႇၼၼ်ႉဢေႃႈ။