Chapter
၄
၁ မိူဝ်ႈဢၼ် ၵူၼ်းတင်းသဵင်ႈတင်းလူင် ၶၢမ်ႈၼမ်ႉႁွင်ႊယေႃးတၢၼ်ႇ သဵင်ႈသဵင်ႈမူတ်းမူတ်းယဝ်ႉၼၼ်ႉၸိုင်ထႃႇဝရႃႉၽြႃးမီးဢမိင်ႉတီႈယေႃးသုလႄႈဝႃႈ၊-
၂ လိူၵ်ႈၵဵပ်းဢဝ်ၵူၼ်းသိပ်းသွင်ၵေႃႉၵႃႈၼႂ်းၵူၼ်းတင်းလၢႆယေႈမဵဝ်းယေႈၵေႃႉလႄႈ သင်ႇလၢတ်ႈတီႈၶဝ်လႄႈဝႃႈ၊-
၃ သူဢဝ်မၢၵ်ႇႁိၼ်သိပ်းသွင်လုၵ်ႈ ၵႃႈၼႂ်းၵၢင်ၼမ်ႉႁွင်ႊယေႃးတၢၼ်ႇ တီႈဢၼ်တိၼ်ယိတ်ႉပရေႃးႁိၵ်ႉၸိူဝ်းၼၼ်ႉယဵပ်ႇသႂ်ႇမၼ်ႈမၼ်ႈၶိူင်ႇၶိူင်ႇၼၼ်ႉလႄႈ ဢဝ်ၵႂႃႇလူၺ်ႈၵၼ်တင်းသူ၊ ဢဝ်ဝႆႉၵႃႈတီႈဢၼ်သူတၵ်းၶျႃး ပၢင်ႊမိူဝ်ႈၶမ်ႈၼႆႉၼၼ်ႉတႃႉ၊ဝႃႈၼင်ႇၼႆဢေႃႈ။
၄ ယေႃးသုႁွင်ႉဢဝ်ၵူၼ်းသိပ်းသွင်ၵေႃႉ ဢၼ်မၼ်းမၵ်းၶၢၼ်းဝႆႉထႃႈၼႂ်းၵူၼ်းမဵဝ်းဢိသရေႇလတင်းလၢႆယေႈမဵဝ်းယေႈၵေႃႉၼၼ်ႉသေလႄႈ သင်ႇလၢတ်ႈတီႈၶဝ်ၼၼ်ႉ လႄႈဝႃႈ၊-
၅ ၶၢမ်ႈၵႂႃႇၵႃႈတီႈၽၢႆႇၼႃႈတိူၵ်ႈတႃႇထႃႇဝရႃႉၽြႃးၽြႃးပဵၼ်ၸဝ်ႈသူ ၵႃႈၼႂ်းၵၢင်ၼမ်ႉႁွင်ႊယေႃးတၢၼ်ႇလႄႈ ဢဝ်မၢၵ်ႇႁိၼ်ယေႈၵေႃႉယေႈလုၵ်ႈမႅၵ်ႇသႂ်ႇၵႃႈၼိူဝ်ႁူဝ်မႃႇသူၵႂႃႇၸွမ်းၵႃႈၼင်ႇဢၼ်ၼပ်ႉဢၢၼ်ႇမဵဝ်းၵူၼ်းၵႃႈၼႂ်းၵူၼ်းမဵဝ်းဢိသရေႇလ ၼၼ်ႉ တႃႉ။
၆ ပေႃးႁဵတ်းၸိူဝ်ႉၼင်ႇၼၼ်ၸိုင်တၵ်းလႆႈပဵၼ်သၢၵ်ႈသေႇဝႆႉၵႃႈၼႂ်းသူ ပုၼ်ႈလွင်ႈၼင်ႇႁိုဝ်မိူဝ်ႈဢၼ်လုၵ်ႈလၢင်းသူတွင်ႈထၢမ် ၼႂ်းၶိင်ႇၵႃႇလႃႉၵမ်းလိုၼ်းပုၼ်ႉလႄႈဝႃႈ၊-မၢၵ်ႇႁိၼ်ၸိူဝ်းၼႆႉၸမ်း၊ၶႂ်ႈဝႃႈၸိူဝ်ႉၼင်ႇႁိုဝ်၊ ဝႃႈၼင်ႇၼႆၼၼ်ႉၸိုင်သူတၵ်းလႆႈၶိုၼ်းလၢတ်ႈၼႄလွင်ႈၼမ်ႉၼႂ်းၼမ်ႉႁွင်ႊယေႃးတၢၼ်ႇၼၼ်ႉ ၶၢတ်ႇၵႂႃႇၵႃႈတီႈၽၢႆႇၼႃႈတိူၵ်ႈတႃႇပတိၺိၼ်ႇထႃႇဝရႃႉၽြႃးဢေႃႈ။
၇ မိူဝ်ႈဢၼ်တိူၵ်ႈတႃႇၸဝ်ႈၶၢမ်ႈၼမ်ႉႁွင်ႊယေႃးတၢၼ်ႇၼၼ်ႉ ၼမ်ႉၼႂ်းၼမ်ႉႁွင်ႈယေႃးတၢၼ်ႇၶၢတ်ႇၵႂႃႇဢေႃႈ။ၼင်ႇၼၼ်လႄႈမၢၵ်ႇႁိၼ်ၸိူဝ်းၼႆႉတၵ်းပဵၼ်ပုၼ်ႈဢၼ်ၵူၼ်းမဵဝ်းဢိသရေႇလ တင်းလၢႆတၵ်းလႆႈၶုပ်းၸႂ်လႆႈၶႂ်းၸႂ်ထူပ်းယူႇ တႃႇသေႇဢမ်ႇထၢတ်ႇၼၼ်ႉဢေႃႈ၊ဝႃႈၼင်ႇၼႆတႃႉ၊ ဝႃႈၼႆသေယဝ်ႉ ၵူၼ်းမဵဝ်းဢိသရေႇလ တင်းလၢႆၵေႃႈႁဵတ်းၸွမ်းၵႃႈၼင်ႇဢၼ်ယေႃးသုသင်ႇလၢတ်ႈဝႆႉၼၼ်ႉဢေႃႈ။
၈ ၶဝ်ဢဝ်မၢၵ်ႇႁိၼ်သိပ်းသွင်လုၵ်ႈၵႃႈၼႂ်းၵၢင်ၼမ်ႉႁွင်ႊယေႃးတၢၼ်ႇ မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉတီႈယေႃးသုၼၼ်ႉ ၸွမ်းၵႃႈၼင်ႇဢၼ်ၼပ်ႉဢၢၼ်ႇ မဵဝ်းၵႃႈၼႂ်းၵူၼ်းမဵဝ်းဢိသရေႇလ တင်းလၢႆၼၼ်ႉ မႅၵ်ႇပႃးၵႂႃႇလူၺ်ႈၵၼ်တင်းၶဝ်ၵႂႃႇၸူးၵႃႈတီႈဢၼ်ၶဝ်တၵ်းၶျႃးပၢင်ၼၼ်ႉလႄႈ ဝႆႉၵႃႈတီႈၼၼ်ႉ ဢေႃႈ။
၉ လၢႆးသမ်ႉယေႃးသုဢဝ်မၢၵ်ႇႁိၼ်သိပ်းသွင်လုၵ်ႈပၵ်းဝႆႉၵႃႈၼႂ်းၵၢင်ၼမ်ႉႁွင်ႊယေႃးတၢၼ်ႇ ၵႃႈတီႈဢၼ်တိၼ်ယိတ်ႉပရေႃးႁိၵ်ႉ ဢၼ်ႁၢပ်ႇတိူၵ်ႈတႃႇပတိၺိၼ်ႇၸဝ်ႈယဵပ်ႇသႂ်ႇၼၼ်ႉ မီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၁၀ ယိတ်ႉပရေႃးႁိၵ်ႉ ဢၼ်ႁၢပ်ႇတိူၵ်ႈတႃႇၸဝ်ႈၼၼ်ႉၵေႃႈၸုၵ်းယူႇၵႃႈၼႂ်းၵၢင်ၼမ်ႉႁွင်ႊယေႃးတၢၼ်ႇ တေႃႇထိုင်ႁွတ်ႈထၢၼ်ႈပေႃးၵႃႈဢၼ်ထႃႇဝရႃႉၽြႃး မီးဢမိင်ႉတီႈယေႃးသုၼၼ်ႉ ယဝ်ႉတူဝ်ႈလီငၢမ်းတင်းသဵင်ႈတင်းမူတ်း ၸွမ်းၵႃႈၼင်ႇဢၼ်မုဝ်းသေႇသင်ႇလၢတ်ႈဝႆႉတီႈယေႃးသုၼၼ်ႉဢေႃႈ။ၵူၼ်းတင်းလၢႆၵေႃႈႁိပ်ႈၼႅတ်ႈသေလႄႈၶၢမ်ႈဢေႃႈ။
၁၁ ၵူၼ်းတင်းသဵင်ႈတင်းလူင်ၶၢမ်ႈၵႂႃႇမူတ်းသဵင်ႈယဝ်ႉလႄႈ တိူၵ်ႈတႃႇထႃႇဝရႃႉၽြႃးဢိၵ်ႇတင်းယိတ်ႉပရေႃးႁိၵ်ႉၸိူဝ်းၼၼ်ႉၵေႃႈ ၶၢမ်ႈၵႂႃႇသိုဝ်ႈၼႃႈတႂ်ႈတႃၵူၼ်း တင်းလၢႆဢေႃႈ။
၁၂ ၵူၼ်းမဵဝ်းရုပိၼ်ႇ၊ၵူၼ်းမဵဝ်းၵတ်ႉ၊ၵူၼ်းမဵဝ်းမၼႃႇသေႇၶိုင်ႈၼိုင်ႈၸိူဝ်းၼၼ်ႉ ယိပ်းၵမ်လၢၵ်ႈၼၢၵ်ႈသေလႄႈ ဢွၼ်ႁူဝ်ၵူၼ်းမဵဝ်းဢိသရေႇလတင်းလၢႆ ၶၢမ်ႈၵႂႃႇၸွမ်းၵႃႈၼင်ႇဢၼ် မုဝ်းသေႇ သင်ႇ လၢတ်ႈဝႆႉၼၼ်ႉဢေႃႈ။
၁၃ ၵူၼ်းသီႇမိုၼ်ႇၸမ်ၸမ်ဢၼ်မေးႁႅၼ်းဝႆႉႁႂ်ႈလႆႈတိုၵ်းသိုၵ်းၸိူဝ်းၼၼ်ႉၵေႃႈ ၶၢမ်ႈၵႂႃႇၸူးၵႃႈတီႈပၢင်ႇပဵင်းယေႇရိၶုဝ်း သိုဝ်ႈၼႃႈတႂ်ႈတႃထႃႇ ဝရႃႉၽြႃးႁႂ်ႈလႆႈတိုၵ်းသိုၵ်းဢေႃႈ။
၁၄ ၼႂ်းဝၼ်းၼၼ်ႉထႃႇဝရႃႉၽြႃးယုၵ်ႉယွင်ႈယေႃးသု သိုဝ်ႈၼႃႈတႂ်ႈတႃၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈ ၶဝ်ၼၼ်ႉဢွၼ်ၵၼ်ရူဝ်ႇသေႇၵူဝ်ယမ်မၼ်းၸူဝ်ႈဢၼ်မၼ်းယင်းဢသၢၵ်ႈလိပ်းယူႇၼၼ်ႉ မိူၼ်ၸိူဝ်ႉၼင်ႇၶဝ်ရူဝ်ႇသေႇၵူဝ်ယမ်မုဝ်းသေႇၼၼ်ႉဢေႃႈ။
၁၅ ထႃႇဝရႃႉၽြႃးသမ်ႉမီးဢမိင်ႉတီႈယေႃးသုလႄႈဝႃႈ၊-
၁၆ သင်ႇလၢတ်ႈႁႂ်ႈယိတ်ႉပရေႃးႁိၵ်ႉ ဢၼ်ႁၢပ်ႇတိူၵ်ႈတႃႇၶိူင်ႈဢၼ်ၶၢမ်ႇသၢၵ်ႈသေႇၸိူဝ်းၼၼ်ႉ ဢွၵ်ႇသေၵႃႈၼႂ်းၼမ်ႉႁွင်ႊယေႃးတၢၼ်ႇလႄႈၶိုၼ်ႈမႃးတႃႉ၊ဝႃႈၼင်ႇၼႆလႄႈ
၁၇ ယေႃးသုၵေႃႈသင်ႇလၢတ်ႈတီႈယိတ်ႉပရေႃးႁိၵ်ႉၸိူဝ်းၼၼ်ႉလႄႈဝႃႈ၊-ဢွၵ်ႇသေၵႃႈၼႂ်းၼမ်ႉႁွင်ႊယေႃးတၢၼ်ႇၶိုၼ်ႈမႃးတႃႉ၊ဝႃႈၼင်ႇၼႆဢေႃႈ။
၁၈ မိူဝ်ႈဢၼ်ယိတ်ႉပရေႃးႁိၵ်ႉ ဢၼ်ႁၢပ်ႇတိူၵ်ႈတႃႇပတိၺိၼ်ႇထႃႇဝရႃႉၽြႃးၸိူဝ်းၼၼ်ႉ ဢွၵ်ႇသေၵႃႈၼႂ်းၵၢင်ၼမ်ႉ ႁွင်ႊယေႃးတၢၼ်ႇၶိုၼ်ႈမႃးလႄႈ ၽႃႇတိၼ်ၶဝ်ယဵပ်ႇၵႃႈၼိူဝ်ၵုင်းၼၼ်ႉၸိုင် ၼမ်ႉၼႂ်းၼမ်ႉႁွင်ႊယေႃးတၢၼ်ႇၼၼ်ႉၶိုၼ်းၶိုၼ်ႈမႃးလႄႈ ထူမ်ႈၽၢင်ႇမၼ်းၵႂႃႇတင်းသဵင်ႈတင်းမူတ်းမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။
၁၉ လိူၼ်ႈပထမ ဝၼ်းတတ်ႉတမ ၼၼ်ႉၵူၼ်းတင်းလၢႆဢွၼ်ၵၼ်ဢွၵ်ႇသေၵႃႈၼႂ်း ၼမ်ႉႁွင်ႊယေႃးတၢၼ်ႇလႄႈ ၶျႃးတပ်ႉယူႇၵႃႈတီႈၵိလၵႃႇလၵႃႈတီႈလႅၼ်လိၼ်ၽၢႆႇဝၼ်းဢွၵ်ႇဝဵင်းယေႇရိၶုဝ်းၼၼ်ႉဢေႃႈ။
၂၀ မၢၵ်ႇႁိၼ်သိပ်းသွင်လုၵ်ႈ ဢၼ်ၶဝ်ဢဝ်ဢွၵ်ႇသေၵႃႈၼႂ်းၼမ်ႉႁွင်ႊယေႃးတၢၼ်ႇ မႃးၸိူဝ်းၼၼ်ႉၵေႃႈယေႃးသုဢဝ်ပၵ်းဝႆႉၵႃႈတီႈၵိလၵႃႇလဢေႃႈ။
၂၁ တီႈၵူၼ်းမဵဝ်းဢိသရေႇလတင်းလၢႆၵေႃႈ မၼ်းၸဝ်ႈလၢတ်ႈလႄႈဝႃႈ၊-မိူဝ်ႈဢၼ်လုၵ်ႈလၢင်းသူတွင်ႈထၢမ်တီႈပေႃႈၶဝ်ၼႂ်းၶိင်ႇၵႃႇလႃႉၵမ်းလိုၼ်းၼၼ်ႉလႄႈဝႃႈ၊-မၢၵ်ႇႁိၼ်ၸိူဝ်းၼႆႉၶႂ်ႈဝႃႈပွင်ႇၸိူဝ်ႉၼင်ႇႁိုဝ်၊ ဝႃႈၼင်ႇၼႆၼၼ်ႉၸိုင် သူတၵ်းလႆႈႁႂ်ႈလုၵ်ႈလၢင်းသူႁူႉဝႃႈ၊-
၂၂ ၵူၼ်းမဵဝ်းဢိသရေႇလတင်းလၢႆ လႆႈပႆၵႂႃႇၵႃႈၼိူဝ်လိၼ်ဢၼ်ယူတ်းဢၼ်ႁႅင်ႈသေလႄႈ ၶၢမ်ႈၼမ်ႉႁွင်ႊယေႃးတၢၼ်ႇၼႆႉမႃး ဢေႃႈ၊ဝႃႈၼင်ႇၼႆဢေႃႈ။
၂၃ ထႃႇဝရႃႉၽြႃးၽြႃးပဵၼ်ၸဝ်ႈသူႁႂ်ႈၼမ်ႉၼႂ်းၼမ်ႉႁွင်ႊယေႃးတၢၼ်ႇ ယူတ်းႁႅင်ႈၵႂႃႇၵႃႈတီႈၽၢႆႇၼႃႈသူ တေႃႇထိုင်ႁွတ်ႈသူလႆႈၶၢမ်ႈမႃးမိူၼ်ၸိူဝ်ႉၼင်ႇဢၼ် ထႃႇဝရႃႉၽြႃးၽြႃးပဵၼ်ၸဝ်ႈသူႁဵတ်းတီႈပၢင်ႇလၢႆႇဢေႇတုမ်ႇ ဢၼ်မၼ်းၸဝ်ႈႁႂ်ႈယူတ်းႁႅင်ႈၵႂႃႇၵႃႈတီႈၽၢႆႇၼႃႈႁဝ်း တေႃႇထိုင်ႁွတ်ႈ ထၼ်ႈပေႃး
၂၄ ႁဝ်းလႆႈၶၢမ်ႈမႃးၼၼ်ႉ ႁႂ်ႈၵူၼ်းၵႃႈၼိူဝ်လိၼ်မိူင်းတင်းသဵင်ႈတင်းလူင်လႆႈႁူႉလွင်ႈဢၼ် မိုဝ်းထႃႇဝရႃႉၽြႃးမီးႁႅင်းတၼ်းၶူဝ်းဢၼ်ယႂ်ႇၼႃႇ ဢိၵ်ႇတင်းႁႂ်ႈၶဝ်လႆႈ ရူဝ်ႇသေႇၵူဝ်ယမ်ထႃႇဝရႃႉၽြႃးၽြႃးပဵၼ်ၸဝ်ႈသူယူႇတႃႇသေႇဢေႃႈ၊ ဝႃႈၼင်ၼႆဢေႃႈ။