Chapter
၃
ၶၢမ်ႈၼမ်ႉႁွင်ႊယေႃးတၢၼ်ႇ
၁ ယေႃးသု လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ မၼ်းဢိၵ်ႇတင်းၵူၼ်းမဵဝ်းဢိသရေႇလ တင်းသဵင်ႈတင်းလူင်ဢွၼ်ၵၼ်ၶၢႆႉသေၵႃႈတီႈဝဵင်းသိတ်ႉတိမ်ႇ ၵႂႃႇလႄႈႁွတ်ႈထိုင်ၵႃႈတီႈၼမ်ႉႁွင်ႊယေႃးတၢၼ်ႇ ၼၼ်ႉသေယဝ်ႉၶျႃးပၢင်ႊယူႇၵႃႈတီႈၼၼ်ႉ ၸူဝ်ႈဢၼ်ၶဝ်ဢမ်ႇပႆႇလႆႈၶၢမ်ႈၼမ်ႉႁွင်ႊၵႂႃႇၼၼ်ႉဢေႃႈ။
၂ မိူဝ်ႈဢၼ်ပူၼ်ႉသၢမ်ဝၼ်းယဝ်ႉၼၼ်ႉၸိုင် ၶုၼ်ပူဝ်ႇတင်းလၢႆဢွၼ်ၵၼ်လႄႇၵႂႃႈၼႂ်းတပ်ႉ တင်းသဵင်ႈတင်းမူတ်းသေယဝ်ႉသင်ႇလၢတ်ႈတီႈၵူၼ်းတင်းလၢႆလႄႈဝႃႈ၊-
၃ မိူဝ်ႈဢၼ်သူႁၼ် တိူၵ်ႈပတိၺိၼ်ႇထႃႇဝရႃႉၽြႃးၽြႃးပဵၼ်ၸဝ်ႈသူဢိၵ်ႇတင်း ယိတ်ႉပရေႃးႁိၵ်ႉၵူၼ်းမဵဝ်းလေႇဝိ ဢၼ်ႁၢပ်ႇတိူၵ်ႈတႃႇၸဝ်ႈၸိူဝ်းၼၼ်ႉၸိုင် သူတၵ်း လႆႈဢွၼ်ၵၼ်ၶၢႆႉတီႈယူႇသူသေလႄႈၸွမ်းဢေႃႈ။
၄ ဝူင်ႈၵၢင်တိူၵ်ႈတႃႇၸဝ်ႈတင်းသူၼၼ်ႉ တၵ်းလႆႈမီးသွင်ႁဵင်သွၵ်ႇၸမ်ၸမ် ၸွမ်းလူၺ်ႈတၢင်းဢၼ်ၶပ်းဢၼ်တႅၵ်ႈမၼ်းဢေႃႈ။သူယႃႇပသေုတ်ႉၸပ်းသုတ်ႉၸူးတီႈမၼ်းႁႂ်ႈသူလႆႈႁူႉ သဵၼ်ႈတၢင်းဢၼ်သူတၵ်းလႆႈၵႂႃႇၼၼ်ႉ။လွင်ႈမၼ်းၸမ်းသူဢမ်ႇပႆႇယၢမ်ႈတွၼ်ႉလႆႈၸွမ်းသဵၼ်ႈတၢင်းၼႆႉသေၽဝ်ႇသပွေၵ်ႈ၊ ဝႃႈၼင်ႇၼႆဢေႃႈ။
၅ ယေႃးသုသင်ႇလၢတ်ႈတီႈၵူၼ်းတင်းလၢႆလႄႈဝႃႈ၊-တူဝ်သူႁႂ်ႈတူဝ်သူမူတ်းၸၢင်ႇတႃႉ။လွင်ႈမၼ်းၸမ်းဝၼ်းမိူဝ်ႈၽုၵ်ႈ ထႃႇဝရႃႉၽြႃးတၵ်းႁဵတ်းလွင်ႈတၢင်းဢၼ်လီဢၢမ်းတင်းလၢႆၵႃႈၼႂ်းသူဢေႃႈ၊ ဝႃႈၼင်ႇၼႆဢေႃႈ။
၆ လၢႆးသမ်ႉ ယေႃးသု ႁွင်ႉဢဝ်ယိတ်ႉပရေႃးႁိၵ်ႉတင်းလၢႆသေလႄႈလၢတ်ႈဝႃႈ၊- သူဢွၼ်ၵၼ်ႁၢပ်ႇတိူၵ်ႈတႃႇပတိၺိၼ်ႇၸဝ်ႈသေလႄႈ ဢွၼ်ႁူဝ်ၵူၼ်းတင်းလၢႆၶၢမ်ႈၵႂႃႇတႃႉ၊ဝႃႈၼင်ႇၼႆလႄႈ ၶဝ်ၼၼ်ႉဢွၼ်ၵၼ်ႁၢပ်ႇတိူၵ်ႈတႃႇပတိၺိၼ်ႇၸဝ်ႈလႄႈ ဢွၼ်ႁူဝ်ၵူၼ်း တင်းလၢႆၵႂႃႇဢေႃႈ။
၇ ထႃႇဝရႃႉၽြႃးၵေႃႈမီးဢမိင်ႉတီႈယေႃးသုလႄႈဝႃႈ၊- ဝၼ်းမိူဝ်ႈၼႆႉၵဝ်တၵ်းၸႃႉႁဵတ်းတၢင်းဢၼ်ယုၵ်ႉယွင်ႈမႂ်း သိုဝ်ႈၼႃႈတႂ်ႈတႃၵူၼ်းမဵဝ်းဢိသရေႇလ တင်းသဵင်ႈတင်းလူင် ႁႂ်ႈၶဝ်လႆႈႁူႉလွင်ႈဢၼ်ဝႃႈ ၵဝ်တၵ်းမီးယူႇလူၺ်ႈၵၼ်တင်းမႂ်းမိူၼ်ၸိူဝ်ႉၼင်ႇဢၼ် ၵဝ်လႆႈမီးယူႇလူၺ်ႈၵၼ်တင်းမုဝ်းသေႇ ၼၼ်ႉဢေႃႈ။
၈ မႂ်းသင်ႇလၢတ်ႈတီႈယိတ်ႉပရေႃးႁိၵ်ႉဢၼ်ႁၢပ်ႇ တိူၵ်ႈတႃႇပတိၺိၼ်ႇၸဝ်ႈ ၸိူဝ်းၼၼ်ႉလႄႈဝႃႈ၊- မိူင်းဢၼ်သူႁွတ်ႈထိုင်ၵႃႈတီႈၽၢင်ႇၼမ်ႉႁွင်ႊယေႃးတၢၼ်ႇၼၼ်ႉၸိုင် သူတၵ်းလႆႈၸုၵ်းယူႇၵႃႈၼႂ်းၼမ်ႉႁွင်ႊယေႃးတၢၼ်ႇဢေႃႈ၊ဝႃႈၼင်ႇၼႆဝႆႉတႃႉ၊ ဝႃႈၼင်ႇၼႆဢေႃႈ။
၉ ယေႃးသုလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-သူဢွၼ်ၵၼ်ထွမ်ႇငိၼ်းၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူတႃႉ၊ဝႃႈၼင်ႇၼႆဢေႃႈ။
၁၀ ယေႃးသုသမ်ႉလၢတ်ႈထႅင်ႈလႄႈဝႃႈ၊- သူတၵ်းလႆႈႁူႉလွင်ႈဢၼ် ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉမီးယူႇၵႃႈၼႂ်းသူလႄႈမၼ်းၸဝ်ႈတၵ်းႁေႃႈၵူၼ်းၶႃႇၼၼိ ၵူၼ်းႁိတ်ႉတိၵူၼ်းႁိဝိၵူၼ်းၽေႇရၸိၵူၼ်းၵိရၵႃႇသိ၊ၵူၼ်းဢႃႇမေႃးရိ၊ၵူၼ်းယေႇပုသိ ၸိူဝ်းၼၼ်ႉဢွၵ်ႇပႅတ်ႈသေ ၵႃႈတီႈၽၢႆႇၼႃႈသူ ဢမၢၼ်ႇ ၶၢၼ်ပဵၼ်ၼၼ်ႉၸိူဝ်ႉၼင်ႇႁိုဝ်ဝႃႈၼႆၸမ်း၊-
၁၁ တူၺ်းလူ။တိူၵ်ႈတႃႇပတိၺိၼ်ႇထႃႇဝရႃႉၽြႃး ဢၼ်ဢုပ်ႉပိူင်ႇၵႃႈၼိူဝ်လိၼ်မိူင်းတင်းသဵင်ႈတင်းမူတ်းၼၼ်ႉ တၵ်းဢွၼ်ႁူဝ်သူၶၢမ်ႈၵႂႃႇၵႃႈၼႂ်းၼမ်ႉႁွင်ႊယေႃးတၢၼ်ႇ ဢေႃႈ။
၁၂ ပိူဝ်ႈၼႆလႄႈ ဢွၼ်ၵၼ်လိူၵ်ႈၵဵပ်းဢဝ်ၵူၼ်းသိပ်းသွင်ၵေႃႉၵႃႈၼႂ်းမဵဝ်းဢိသရေႇလ ၵူႈမဵဝ်းယေႈမဵဝ်းယေႈၵေႃႉ တႃႉ။
၁၃ မိူဝ်ႈဢၼ်ၽႃႇတိၼ်ယိတ်ႉပရေႃးႁိၵ်ႉဢၼ်ႁၢပ်ႇတိူၵ်ႈတႃႇထႃႇဝရႃႉၽြႃးၸဝ်ႈ ဢၼ်ဢုပ်ႉပိူင်ႇၵႃႈၼိူဝ်လိၼ်မိူင်းတင်းသဵင်ႈတင်းမူတ်းၼၼ်ႉယဵပ်ႇသႂ်ႇၵႃႈၼႂ်းၼမ်ႉႁွင်ႊယေႃးတၢၼ်ႇ ၼၼ်ႉၵမ်းလဵဝ်ၼၼ်ႉၸိုင်ၼမ်ႉၼႂ်းၼမ်ႉႁွင်ႊယေႃးတၢႇၼ် ဢၼ်ဝႃႈၼမ်ႉဢၼ်လုၵ်ႉသေၵႃႈတီႈၽၢႆႇၼိူဝ်လႆလူင်းမႃးၼၼ်ႉတၵ်းၶၢတ်ႇလႄႈ မီးတၢင်းဢၼ်သုတ်းၵွင်ယူဢေႃႈ၊ ဝႃႈၼင်ႇၼႆဢေႃႈ။
၁၄ ၵူၼ်းတင်းလၢႆ ဢွၼ်ၵၼ်ၶၢႆႉသေၵႃႈတီႈသုမ်ႉထဵင်ၶဝ်ႁႂ်ႈလႆႈၶၢမ်ႈၼမ်ႉႁွင်ႊယေႃးတၢၼ်ႇၼၼ်ႉလႄႈ ယိတ်ႉပရေႃးႁိၵ်ႉဢၼ်ႁၢပ်ႇ တိူၵ်ႈတႃႇပတိၺိၼ်ႇၸဝ်ႈၼၼ်ႉဢွၼ်ႁူဝ်ၵူၼ်းတင်းလၢႆၵႂႃႇသေယဝ်ႉမိူဝ်ႈဢၼ်ၶဝ် ၸိူဝ်းဢၼ်ႁၢပ်ႇတိူၵ်ႈတႃႇပတိၺိၼ်ႇၸဝ်ႈၸိူဝ်းၼၼ်ႉႁွတ်ႈထိုင်ၵႃႈတီႈ
၁၅ ၼမ်ႉႁွင်ႊယေႃးတၢၼ်ႇလႄႈတိၼ်ယိတ်ႉပရေႃးႁိၵ်ႉ ဢၼ်ႁၢပ်ႇတိူၵ်ႈတႃႇပတိၺိၼ်ႇၸဝ်ႈၼၼ်ႉၸုမ်ႇသႂ်ႇၵႃႈၼႂ်းၼမ်ႉၼၼ်ႉၸိုင် ပိၵ်ႉသမ်ႉၼမ်ႉႁွင်ႊယေႃးတၢၼ်ႇ လူၼ်ႉၽၢင်ႇလူၼ်ႉႁိမ်းတင်းသဵင်ႈတင်းမူတ်းၼႂ်းၶိင်ႇဢၼ်ပၢတ်ႇၶဝ်ႈၼၼ်ႉယူႇ သေၵေႃႈ
၁၆ ၼမ်ႉဢၼ်လုၵ်ႉသေၵႃႈတီႈၽၢႆႇၼိူဝ်လႆလူင်းမႃးၼၼ်ႉ ၵိုတ်းသဝ်းယူႇလႄႈ သုတ်ႉၶိုၼ်ႈၵွင်ၶိုၼ်ႈယူႇၵႃႈတီႈဢၼ်ၵႆၵႃႈတီႈႁိမ်းဝဵင်းဢႃႇထမ်ႇ ဢၼ်မီးၵႃႈတီႈႁိမ်းဝဵင်းၸႃႇရတၢၼ်ႇၼၼ်ႉဢေႃႈ။ၼမ်ႉဢၼ်လႆၵႂႃႇၸူးၵႃႈတီႈပၢင်ႇလၢႆႇပၢင်ႇပဵင်းဢႃႇရၽႃႇ ဢၼ်ဝႃႈပၢင်ႇလၢႆႇၼမ်ႉၵိူဝ်ၼၼ်ႉၵေႃႈ ၶၢတ်ႇၶေႃးၵႂႃႇသဵင်ႈမူတ်းလႄႈ ၵူၼ်းတင်းလၢႆဢွၼ်ၵၼ်ၶၢမ်ႈၵႂႃႇသိုဝ်ဝဵင်းယေႇရိၶုဝ်းဢေႃႈ။
၁၇ ယိတ်ႉပရေႃးႁိၵ်ႉဢၼ်ႁၢပ်ႇတိူၵ်ႈတႃႇပတိၺိၼ်ႇထႃႇဝရႃႉၽြႃးၸိူဝ်းၼၼ်ႉ ယဵပ်ႇသႂ်ႇၵႃႈၼိူဝ်လိၼ် ၵႃႈၼႂ်းၵၢင် ၼမ်ႉႁွင်ႊယေႃးတၢၼ်ႇၼၼ်ႉ မၼ်ႈမၼ်ႈၶိူင်ႇၶိူင်ႇယူႇသေလႄႈ ၵူၼ်းမဵဝ်းဢိသရေႇလတင်းသဵင်းတင်းလူင် လႆႈပႆတၢင်းၵႂႃႇၵႃႈၼိူဝ်လိၼ် ၶၢမ်ႈၵႂႃႇတေႃႇထိုင်ႁွတ်ႈၵူၼ်းတင်းသဵင်ႈတင်းလူင်ထၢၼ်ႈပေႃး လႆႈၶၢမ်ႈ ၼမ်ႉႁွင်ႊယေႃးတၢၼ်ႇၵႂႃႇတင်းသဵင်ႈတင်းမူတ်းဢေႃႈ။