Chapter
၆
၁ မိူဝ်ႈၼၼ်ႉ ဝဵင်းယေႇရိၶုဝ်း ဢိုတ်းႁပ်းဝႆႉၼႃႇလူင်လၢင်ၵွပ်ႈပိူဝ်ႈၵူၼ်းမဵဝ်းဢိသရေႇလ တင်းလၢႆၸိူဝ်းၼၼ်ႉလႄႈ ၵူၼ်းဢၼ်ၶဝ်ႈဢၼ်ဢွၵ်ႇဢမ်ႇမီးသေၵေႃႉသေ ၵူၼ်း။
၂ ထႃႇဝရႃႉၽြႃးလၢတ်ႈတီႈယေႃးသုလႄႈဝႃႈ၊-တူၺ်းလူ။ၵဝ်ဢဝ်ဝဵင်းယေႇရိၶုဝ်းဢိၵ်ႇတင်းၶုၼ်ႁေႃၶမ်းမၼ်းတင်းၵူၼ်းသိုၵ်း ဢၼ်ႁႅင်းယႂ်ႇၼႃႇၸိူဝ်း ၼၼ်ႉဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉ။
၃ ပိူဝ်ႈၼႆလႄႈသူတၵ်းလႆႈလဵပ်ႈႁွပ်ႈဝဵင်းၼၼ်ႉလႄႈ ၵူၼ်းသိုၵ်းတင်းသဵင်ႈတင်းလူင်တၵ်းလႆႈႁဵတ်း တၢင်းဢၼ်လဵပ်ႈႁွပ်ႈဝဵင်းၼၼ်ႉပွၵ်ႈၼိုင်ႈဢေႃႈ။မႂ်းတၵ်းလႆႈႁဵတ်းၸိူဝ်ႉၼင်ႇ ၼၼ်ႉႁူၵ်းဝၼ်းဢေႃႈ။
၄ ယိတ်ႉပရေႃးႁိၵ်ႉၸဵတ်းၵေႃႉတၵ်းလႆႈဢဝ်ၼႄးၶရႃႇယုၽိလိၸဵတ်းဢၼ်လႄႈ ဢွၼ်ႁူဝ်တိူၵ်ႈတႃႇၸဝ်ႈၵႂႃႇဢေႃႈ။ၵႃႈတီႈဝၼ်းသတ်ႉတမၼၼ်ႉ သူတၵ်းလႆႈလဵပ်းႁွပ်ႈဝဵင်းၼၼ်ႉထူၼ်ႈထိုင်ႁွတ်ႈၸဵတ်းပွၵ်ႈလႄႈ ယိတ်ႉပရေႃးႁိၵ်ႉၸိူဝ်းၼၼ်ႉတၵ်းလႆႈ ပဝ်ႇၼႄးၶရႃႇၸိူဝ်းၼၼ်ႉဢေႃႈ။
၅ မိူဝ်ႈဢၼ်ၶဝ်ပဝ်ႇၼႄးၶရႃႇယုၽိလိပဝ်ႇသဵင်ဢၼ်ယၢဝ်းၼႃႇလူင်လၢင်လႄႈ သူငိၼ်းသဵင်ၼႄးၶရႃႇၼၼ်ႉၸိုင် ၵူၼ်းတင်းသဵင်ႈတင်းလူင် တၵ်းလႆႈဢွၼ်ၵၼ်ႁဵတ်းတင်းသဵင်ဢၼ်ယႂ်ႇၼႃႇလူင်လၢင်ႁွင်ႉသဵၼ်လႄႈ လမ်းဝဵင်းၼၼ်ႉတၵ်းလူမ်ႉပင်းၵႂႃႇ တင်းသဵင်ႈတင်းမူတ်းဢေႃႈ။မိူဝ်ႈၼၼ်ႉ ၵူၼ်းတင်းလၢႆတၵ်းလႆႈၶိုၼ်ႈၸူးသိုဝ်ႈၽႂ်သိုဝ်ႈမၼ်းၵူႈၵေႃႉၵူႈၵူၼ်းဢေႃႈ၊ဝႃႈၼင်ႇၼႆဢေႃႈ။
၆ ယေႃးသု၊လုၵ်ႈၸၢႆးၼုၼ်ႇ၊ ႁွင်ႉဢဝ်ယိတ်ႉပရေႃးႁိၵ်ႉတင်းလၢႆသေလႄႈသင်ႇလၢတ်ႈလႄႈဝႃႈ၊- သူဢွၼ်ၵၼ်ႁၢပ်ႇတိူၵ်ႈတႃႇပတိၺိၼ်ႇၸဝ်ႈၵႂႃႇလႄႈ ႁႂ်ႈယိတ်ႉပရေႃးႁိၵ်ႉၸဵတ်းၵေႃႉ ဢဝ်ၼႄးၶရႃႇယုၽိလိၸဵတ်းဢၼ် ဢွၼ်ႁူဝ်တိူၵ်ႈတႃႇထႃႇဝရႃႉၽြႃးၵႂႃႇတႃႉ၊ဝႃႈ ၼင်ႇၼႆဢေႃႈ။
၇ တီႈၵူၼ်းတင်းလၢႆၵေႃႈၶဝ်လၢတ်ႈလႄႈဝႃႈ၊-သူဢွၼ်ၵၼ်ၵႂႃႇလႄႇလဵပ်ႈႁွပ်ႈဝဵင်းတႃႉ။ႁႂ်ႈၵူၼ်းဢၼ်ယိပ်းၵမ်လၢၵ်ႈၼၢၵ်ႈၸိူဝ်းၼၼ်ႉ ဢွၼ်ႁူဝ်တိူၵ်ႈတႃႇထႃႇဝရႃႉၽြႃးၵႂႃႇတႃႉ၊ဝႃႈၼင်ႇၼႆ ဢေႃႈ။
၈ ယေႃးသုသင်ႇလၢတ်ႈတီႈၵူၼ်းတင်းလၢႆၼၼ်ႉသေယဝ်ႉ ယိတ်ႉပရေႃးႁိၵ်ႉဢၼ်ဢဝ်ၼႄးၶရႃႇယုၽိလိၸဵတ်းဢၼ် ၵႂႃႇၵႃႈတီႈၽၢႆႇၼႃႈထႃႇဝရႃႉၽြႃးၸဵတ်းၵေႃႉၼၼ်ႉပဝ်ႇၼႄးၶရႃႇသေလႄႈ ၵႂႃႇဢေႃႈ။တိူၵ်ႈတႃႇပတိၺိၼ်ႇထႃႇဝရႃႉၽြႃးၼၼ်ႉၵေႃႈ ၸွမ်းလင်ၶဝ်ၼၼ်ႉၵႂႃႇဢေႃႈ။
၉ ၵူၼ်းဢၼ်ယိပ်းၵမ်လၢၵ်ႈၼၢၵ်ႈၸိူဝ်းၼၼ်ႉဢွၼ်ႁူဝ်ယိတ်ႉပရေႃးႁိၵ်ႉ ဢၼ်ပဝ်ႇၼႄးၶရႃႇၸိူဝ်းၼၼ်ႉၵႂႃႇလႄႈ ၼႂ်းမိူဝ်ႈဢၼ်ယိတ်ႉပရေႃးႁိၵ်ႉၸိူဝ်းၼၼ်ႉပဝ်ႇၼႄးၶရႃႇယူႇသေလႄႈ ၵႂႃႇယူႇၼၼ်ႉၸိုင် တပ်ႉလိုၼ်းလင်ၼၼ်ႉဢွၼ်ၵၼ်ၸွမ်း ၵႃႈတီႈၽၢႆႇလင်တိူၵ်ႈတႃႇၸဝ်ႈၼၼ်ႉဢေႃႈ။
၁၀ ယေႃးသုၵေႃႈသင်ႇလၢတ်ႈတီႈၵူၼ်းတင်းလၢႆလႄႈဝႃႈ၊- ၼႂ်းၸူဝ်ႈဢၼ်ဢမ်ႇပႆႇႁွတ်ႈထိုင်ဝၼ်းဢၼ်ၵဝ်သင်ႇလၢတ်ႈဝႆႉ ႁႂ်ႈလႆႈႁွင်ႉသႅၼ်ႇၼၼ်ႉသူဢမ်ႇလႆႈႁွင်ႉသႅၼ်ႇလႃးလႃး။ဢမ်ႇလႆႈႁဵတ်းသဵင်သေၸိူဝ်ႉသေပိူင်လႃးလႃး။ဢမ်ႇလႆႈလၢတ်ႈၵႂၢမ်းသေၶေႃႈသေၵမ်း။ပေႃးႁွတ်ႈထိုင်ဝၼ်းၼၼ်ႉယဝ်ႉၸင်ႇ တၵ်းလႆႈႁွင်ႉသႅၼ်ႇ ဢေႃႈ၊ဝႃႈၼင်ႇၼႆဢေႃႈ။
၁၁ ၼင်ႇၼၼ်လႄႈမၼ်းႁႂ်ႈတိူၵ်ႈတႃႇထႃႇဝရႃႉၽြႃးၼၼ်ႉ လဵပ်ႈႁွပ်ႈဝဵင်းလႄႈၵႂႃႇၸွမ်းၵႃႈတီႈႁိမ်းမၼ်းပွၵ်ႈၼိုင်ႈသေယဝ်ႉ ၶဝ်ၶိုၼ်းၶဝ်ႈၵႃႈၼႂ်းတပ်ႉလႄႈ ႁႂ်ႈပူၼ်ႉၶိုၼ်းၵႃႈၼႂ်းတပ်ႉၼၼ်ႉသေဢေႃႈ။
၁၂ ယေႃးသု လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈယိတ်ႉပရေႃးႁိၵ်ႉၸိူဝ်းၼၼ်ႉဢွၼ်ၵၼ်ႁၢပ်ႇဢဝ်တိူၵ်ႈတႃႇထႃႇဝရႃႉၽြႃးဢေႃႈ။
၁၃ ယိတ်ႉပရေႃးႁိၵ်ႉၸဵတ်းၵေႃႉဢၼ်ဢဝ်ၼႄးၶရႃႇယုၽိလိၸဵတ်းဢၼ် ၵႂႃႇၵႃႈတီႈၽၢႆႇၼႃႈတိူၵ်ႈတႃႇထႃႇဝရႃႉၽြႃးၸိူဝ်းၼၼ်ႉၵေႃႈ ၵႂႃႇယူႇတိၵ်းတိၵ်းသေလႄႈ ပဝ်ႇၼႄးၶရႃႇၸိူဝ်းၼၼ်ႉဢေႃႈ။ၵူၼ်းဢၼ်ယိပ်းၵမ်လၢၵ်ႈၼၢၵ်းၸိူဝ်းၼၼ်ႉၵေႃႈဢွၼ်ႁူဝ်ၶဝ်ၼၼ်ႉၵႂႃႇလႄႈၼႂ်းမိူဝ်ႈဢၼ် ယိတ်ႉပရေႃးႁိၵ်ႉၸိူဝ်းၼၼ်ႉယင်းတိုၵ်ႉပဝ်ႇၼႄးၶရႃႇလႄႈ ၵႂႃႇယူႇၼၼ်ႉၸိုင် တပ်ႇလိုၼ်းလင်ၼၼ်ႉဢွၼ်ၵၼ်ၸွမ်းၵႃႈတီႈၽၢႆႇလင်တိူၵ်ႈတႃႇထႃႇဝရႃႉၽြႃးဢေႃႈ။
၁၄ ဝၼ်းတုတိယၼၼ်ႉၵေႃႈ ၶဝ်လဵပ်ႈႁွပ်ႈဝဵင်းပွၵ်ႈၼိုင်ႈလႄႈသမ်ႉၶိုၼ်းမႃးၵႃႈၼႂ်းတပ်ႉသေဢေႃႈ။ၶဝ်ႁဵတ်းၸိူဝ်ႉၼင်ႇၼၼ်ႁူၵ်းဝၼ်းဢေႃႈ။
၁၅ ဝၼ်းသတ်ႉတမၼၼ်ႉၶဝ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉၸဵမ်မိူဝ်ႈမိူင်းၸႃႉလႅင်းလႄႈ ဝႅင်းႁွပ်ႈဝဵင်းၼၼ်ႉမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉ ၸဵတ်းပွၵ်ႈဢေႃႈ။ၼႂ်းဝၼ်းၼၼ်ႉၵူၺ်းၶဝ်လဵပ်ႈႁွပ်ႈဝဵင်းၼၼ်ႉတေႃႇထိုင်ႁွတ်ႈၸဵတ်းပွၵ်ႈဢေႃႈ။
၁၆ ၼႂ်းပွၵ်ႈသတ်ႉတမၼၼ်ႉမိူဝ်ႈဢၼ်ယိတ်ႉပရေႃးႁိၵ်ႉၸိူဝ်းၼၼ်ႉ ပဝ်ႇၼႄးၶရႃႇၸိူဝ်းၼၼ်ႉၸိုင် ယေႃးသုသင်ႇလၢတ်ႈတီႈၵူၼ်းတင်းလၢႆလႄႈဝႃႈ၊-ဢွၼ်ၵၼ်ႁွင်ႉသႅၼ်ႇတႃႉ။ထႃႇဝရႃႉၽြႃး ပၼ်ဝဵင်းၼၼ်ႉတီႈသူယဝ်ႉ။
၁၇ ဝဵင်းဢိၵ်ႇတင်းၵႃႈဢၼ်မီးၼႂ်းမၼ်း တၵ်းလႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈလႄႈဢဝ်ဢၢပ်ႈပၼ်တီႈထႃႇဝႃႉရၽြႃးဢေႃႈ။မေႈမွၵ်ႇယႃႈယႃႇၶပ်ႉ ဢိၵ်ႇတင်းၵႃႈဢၼ်မီးယူႇလူၺ်ႈၵၼ်တင်းမၼ်းၵႃႈၼႂ်းႁိူၼ်းမၼ်းၼၼ်ႉၵူၺ်း တၵ်းလႆႈၵတ်းယဵၼ်ၶျၢမ်းသႃႇ ၵွပ်ႈပိူဝ်ႈမၼ်းဢဝ်တမၢၼ်ႇၵူၼ်းၸႂ်ႉ ဢၼ်ႁဝ်းပွႆႇၸႂ်ႉၸိူဝ်းၼၼ်ႉသိူင်ႇမႅပ်းဝႆႉၼၼ်ႉ ဢေႃႈ။
၁၈ သူဢွၼ်ၵၼ်ႁဵတ်းတင်းသတိသေလႄႈဝေႈပႅတ်ႈလွင်ႈတၢင်းဢၼ်ၵိၼ်ႇဝႃႈၸိူဝ်းၼၼ်ႉတႃႉ။ပေႃးဝေႈပႅတ်ႈၸိုင် သူတၵ်းဢမ်ႇဢဝ် တၢင်းဢၼ်ၵိၼ်ႇဢၼ်ဝႃႈၼၼ်ႉလႄႈ ႁဵတ်းႁႂ်ႈပဵၼ်တၢင်းဢၼ်ႁႂ်ႈသူလႆႈလူႉသုမ်း။ပေႃးဢမ်ႇၼၼ်သူတၵ်းႁဵတ်းႁႂ်ႈတပ်ႉဢိသရေႇလလႆႈၶၢမ်ႇတင်းဢၼ်ၵိၼ်ႇဢၼ်ဝႃႈၼၼ်ႉလႄႈလူႉသုမ်းဢေႃႈ။
၁၉ ငိုၼ်းၶမ်းၶိူင်ႈတွင်းလိူင်ၶိူင်ႈလဵၵ်းၵႃႈမီးၼၼ်ႉ ပဵၼ်ဢၼ်မူတ်းၸၢင်ႇပုၼ်ႈထႃႇဝရႃႉၽြႃးလႄႈတၵ်းလႆႈဢွၼ်ၵၼ်ဢဝ်သႂၢင်းသႂ်ႇဝႆႉၵႃႈၼႂ်းၽၼ်ႇတႃႇၸဝ်ႈဢေႃႈ၊ဝႃႈၼင်ႇၼႆဢေႃႈ။
၂၀ ၼင်ႇၼၼ်လႄႈ ၵူၼ်းတင်းလၢႆဢွၼ်ၵၼ်ႁွင်ႉသႅၼ်ႇလႄႈယိတ်ႉပရေႃးႁိၵ်ႉၸိူဝ်းၼၼ်ႉၵေႃႈ ပဝ်ႇၼႄးၶရႃႇၸိူဝ်းၼၼ်ႉဢေႃႈ။မိူဝ်ႈဢၼ်ၵူၼ်းတင်းလၢႆငိၼ်းသဵင်ၼႄးၶရႃႇၼၼ်ႉၸိုင် ၵူၼ်းတင်းလၢႆႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈ လမ်းဝဵင်းၼၼ်ႉလူမ်ႉပင်းၵႂႃႇတင်းသဵင်ႈတင်းမူတ်း တေႃႇထိုင်ႁွတ်ႈထၼ်ႈပေႃးၵူၼ်းတင်းလၢႆလႆႈၶိုၼ်ႈၸူးၵႃႈၼႂ်းဝဵင်းၼၼ်ႉ ၵႃႈတီႈသိုဝ်ႈၽႂ်သိုဝ်ႈမၼ်းၵူႈၵေႃႉၵူႈၵူၼ်းလႄႈ သိမ်းဢဝ်ဝဵင်း ၼၼ်ႉဢေႃႈ။
၂၁ ၶဝ်ဢဝ်ၵႃႈဢၼ်မီးၵႃႈၼႂ်းဝဵင်းၼၼ်ႉဢၼ်ဝႃႈၵူၼ်းယိင်းၵူၼ်းၸၢႆးလဵၵ်ႉလဵၵ်ႉယႂ်ႇယႂ်ႇ၊ သူဝ်း၊ဝူဝ်း၊မႃႉလီႈၸိူဝ်းၼၼ်ႉသေလႄႈ ယႃႉပႅတ်ႈၶူမ်းလၢပ်ႇ ၶူမ်းလႅဝ်းတင်းသဵင်ႈတင်းမူတ်းဢေႃႈ။
၂၂ ယေႃးသုသင်ႇလၢတ်ႈတီႈသွင်ၶႃဢၼ်ၵႂႃႇလွမ်တူၺ်းမိူင်းၼၼ်ႉလႄႈဝႃႈ၊-ၵႃႈၼင်ႇဢၼ်သွင်ၶိူဝ်လႆႈၵိၼ်ႇဝႃႈဝႆႉၼၼ်ႉသွင်ၶိူဝ်ၵႂႃႇ ၵႃႈၼႂ်းႁိူၼ်းမေႈမွၵ်ႇယႃႈၼၼ်ႉသေလႄႈဢဝ်မေႈယိင်းၼၼ်ႉဢိၵ်ႇတင်း ၵႃႈဢၼ်မီးတီႈမၼ်းၼၼ်ႉဢွၵ်ႇမႃးတႃႉ၊ ဝႃႈၼင်ႇၼႆလႄႈ ၵူၼ်းဢွၼ်ႇဢၼ်ပဵၼ်ၶဵဝ်လွတ်ႈၽႆးၼႂ်းၸိူဝ်းၼၼ်ႉ ၶဝ်ၵႂႃႇလႄႈဢဝ် ရႃႇၶပ်ႉ ဢိၵ်ႇတင်းပေႃႈမေႈမၼ်းပီႈၸၢႆးၼွင်ႉၸၢႆးမၼ်းၵႃႈဢၼ်မီးတီႈမၼ်းၸိူဝ်းၼၼ်ႉဢွၵ်ႇမႃး ဢေႃႈ။
၂၃ ပီႈၼွင်ႉၸိူဝ်ႉၶိူဝ်းမၼ်းၵႃႈမီးၸိူဝ်းၼၼ်ႉၵေႃႈၶဝ်ဢဝ်ဢွၵ်ႇမႃးလႄႈ ဝႆႉၵႃႈတီႈၼွၵ်ႈတပ်ႉဢိသရေႇလသေယဝ်ႉဢဝ်ၽႆးတုတ်ႇဝဵင်းဢိၵ်ႇတင်း ၵႃႈဢၼ်မီးၵႃႈၼႂ်းဝဵင်းၼၼ်ႉပႅတ်ႈဢေႃႈ။
၂၄ ၵူၺ်းၵႃႈငိုၼ်းၶမ်းၶိူင်ႈတွင်းလိူင်ၶိူင်ႈလဵၵ်းၸိူဝ်းၼၼ်ႉၸိုင် ၶဝ်ဢဝ်သႂၢင်းသႂ်ႇဝႆႉၵႃႈၼႂ်းၽၼ်ႇတႃႇထႃႇဝရႃႉၽြႃးဢေႃး။
၂၅ ယေႃးသု ပၼ်ဢသၢၵ်ႈမေႈမွၵ်ႇယႃႈရႃႇၶပ်ႉဢိၵ်ႇတင်းၵူၼ်းႁိူၼ်းၵူၼ်းယေးမၼ်း ပေႃႈမၼ်းတင်းၵႃႈဢၼ်မီးတီႈမၼ်းၸိူဝ်းၼၼ်ႉ ၵတ်းယဵၼ်ၶျၢမ်းသႃႇဢေႃႈ။
မၼ်းၼၼ်ႉ လႆႈယူႇၵႃႈၼႂ်းၵူၼ်းမဵဝ်းဢိသရေႇလတင်းလၢႆတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။လွင်ႈမၼ်းၸမ်း ပဵၼ်ၵွပ်ႈပိူဝ်ႈဢၼ်မၼ်းဢဝ်တမၢၼ်ႇၵူၼ်းၸႂ်ႉဢၼ်ယေႃးသုပွႆႇၸႂ်ႉၵႂႃႇ ႁႂ်ႈလႆႈလွမ်တူၺ်းဝဵင်းယေႇရိၶုဝ်းၸိူဝ်းၼၼ်ႉသိူင်ႇမႅပ်းဝႆႉၼၼ်ႉဢေႃႈ။
၂၆ မိူဝ်ႈၼၼ်ႉယေႃးသု ႁဵတ်းတၢင်းဢၼ်ၵိၼ်ႇဝႃႈလႄႈလၢတ်ႈတီႈၶဝ်လႄႈဝႃႈ၊-ႁႂ်ႈၵေႃႉဢၼ်လုၵ်ႉလႄႈၶိုၼ်းတႄႇႁဵတ်းဝဵင်းယေႇရိၶုဝ်းၼႆႉၼၼ်ႉ ပဵၼ်ၵေႃႉဢၼ်ထုၵ်ႇၵိၼ်ႇထုၵ်ႇဝႃႈ ၵႃႈတီႈၽၢႆႇၼႃႈထႃႇဝရႃႉၽြႃးသေၵမ်းလူၺ်ႈ။မၼ်းတၵ်းသုမ်းလုၵ်ႈၸၢႆးတူၼ်ႈမၼ်းလႄႈတႄႇႁဵတ်းငဝ်ႈႁၢၵ်ႈလမ်းဝဵင်းဢေႃႈ။တၵ်းသုမ်းလုၵ်ႈၸၢႆးလိုၼ်းမၼ်းလႄႈပူၵ်းတင်ႈၽၵ်းတူဝဵင်း ဢေႃႈ၊ဝႃႈၼင်ႇၼႆဢေႃႈ။
၂၇ ၼင်ႇၼၼ်လႄႈထႃႇဝရႃႉၽြႃးမီးယူႇလူၺ်ႈၵၼ်တင်းယေႃးသုလႄႈ သတၢင်းသဵင်ၶၢဝ်ႇမၼ်းၼၼ်ႉ ႁူင်ႈႁၢင်းၸွတ်ႇတူဝ်ၵႂႃႇတင်းဝၢၼ်ႈတင်းမိူင်းဢေႃႈ။