Chapter
၁၀
ဝၼ်းဢမ်ႇၶၢႆႉဢမ်ႇပႆႈ
၁ မိူဝ်ႈဢၼ်ဢတေႃးၼိၸေႇတိၵ်ႉ ၶုၼ်လူင်ယေႇရုသလႅမ်ႇငိၼ်းလွင်ႈဢၼ် ယေႃးသုတိုၵ်းဢဝ်ဝဵင်းဢႃႇဢိလႄႈယႃႉၽဵဝ်ႈပႅတ်ႈမူတ်းမူတ်းသဵင်ႈသဵင်ႈ ဝဵင်းဢႃႇဢိတင်းၶုၼ်လူင်မၼ်း မိူၼ်ၸိူဝ်ႉၼင်ႇဢၼ်ႁဵတ်းတီႈဝဵင်းယေႇရိၶုဝ်းတင်းၶုၼ်လူင်မၼ်း ဢိၵ်ႇတင်းလွင်ႈဢၼ်ၵူၼ်းဝဵင်းၵိပွင်ႇၸိူဝ်းၼၼ်ႉ ႁဵတ်းမိၵ်ႉသႁႃႇယႃႉတၢင်း ဢၼ်ထုၵ်ႇၵၼ်တင်းၵူၼ်းမဵဝ်းဢိသရေႇလ တင်းလၢႆလႄႈ
၂ ယူႇလူၺ်ႈၵၼ်တင်းၶဝ်ၼၼ်ႉၸိုင်ၶဝ်ၵူဝ်ႁႄၼႃႇလူင်လၢင်ၵွပ်ႈပိူဝ်ႈဢၼ်ဝဵင်းၵိပွင်ႇၼၼ်ႉ ပဵၼ်ဝဵင်းဢၼ်ယႂ်ႇၼႃႇ မိူၼ်ၸိူဝ်ႉၼင်ႇဝဵင်းၸဝ်ႈဢၼ်ယႂ်ႇၼႃႇသေဝဵင်းဢႃႇဢိလႄႈ ၵူၼ်းၸၢႆးဝဵင်းၼၼ်ႉၵႃႈမီးတင်းသဵင်ႈ ပဵၼ်ၵူၼ်းဢၼ်ႁႅင်းယႂ်ႇၼႃႇၼၼ်ႉဢေႃႈ။
၃ မိူဝ်ႈၼၼ်ႉဢတေႃးၼိၸေႇတိၵ်ႉၶုၼ်လူင်ယေႇရုသလႅမ်ႇ ပွႆႇၸႂ်ႉၸူးၵႃႈတီႈႁေႃးႁမ်ႇၶုၼ်လူင်ႁေႇပုၼ်ႇ၊ပိရမ်ႇ၊ၶုၼ်လူင်ယႃမူတ်ႉ၊ယႃႇၽျူႉ၊ၶုၼ်လူင်လႃႇၶိသ၊တေႇပိ၇၊ၶုၼ် လူင်ဢေႇၵလုၼ်ႇၸိူဝ်းၼၼ်ႉလႄႈဝႃႈ၊-
၄ ဢွၼ်ၵၼ်မႃးတီႈၵဝ်လႄႈ ၸွႆႈထႅမ်ၵဝ်ႁႂ်ႈလႆႈတိုၵ်းတေႃးယႃႉပႅတ်ႈဝဵင်းၵိပွင်ႇသေၵမ်း။လွင်ႈမၼ်းၸမ်းဝဵင်းၼၼ်ႉႁဵတ်းမိၵ်ႉသႁႃႇယႃႉတၢင်းဢၼ်ထုၵ်ၵၼ်တင်း ယေႃးသုတင်းၵူၼ်းမဵဝ်းဢိသရေႇလတင်းလၢႆၼၼ်ႉယဝ်ႉ၊ ဝႃႈၼင်ႇၼႆ လႄႈ
၅ ၶုၼ်လူင်ဢႃႇမေႃးရိႁႃႈပႃးဢၼ်ဝႃႈၶုၼ်လူင်ယေႇရုသလႅမ်ႇ၊ ၶုၼ်လူင်ႁေႇပုၼ်ႇ၊ ၶုၼ်လူင်ယႃႇမုတ်ႉ၊ၶုၼ်လူင်လႃႇၶိသ၊ ၶုၼ်လူင်ဢေႇၵလုၼ်ႇ၊ၸိူဝ်းၼၼ်ႉၸူႉၵၼ်တုမ်ၵၼ်လႄႈပႃးဢဝ်တင်းပူဝ်ႇပႃႇၵူၼ်းသိုၵ်းၶဝ်ၵႃႈမီးၶီႇသိုၵ်းမႃးလႄႈ ၶျႃးတပ်ႉၵႃႈတီႈၽၢႆႇၼႃႈဝဵင်းၵိပွင်ႇသေလႄႈတိုၵ်းတေႃးဢေႃႈ။
၆ ၵူၼ်းဝဵင်းၵိပွင်ႇၸိူဝ်းၼၼ်ႉၵႂႃႇၸူးၵႃႈတီႈ ယေႃးသုၵႃႈတီႈတပ်ႉၵႃႈၼႂ်းၵိလၵႃႇလသေလႄႈ လဝ်ႈလၢတ်ႈလႄႈဝႃႈ၊- ယႃႇပေႁႂ်ႈမိုဝ်းၸဝ်ႈႁဝ်းႁဵတ်းထိူင်းႁဵတ်းၼၢၼ်းတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။မႃးၶၼ်ၶၼ်ၽႂ်းၽႂ်းသေလႄႈ ၸွႆႈထႅမ်ၵႄႇသႄႇဢဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။ၶုၼ်လူင်ဢႃႇမေႃးရိဢၼ်ယူႇၵႃႈၼိူဝ်လွႆၸိူဝ်းၼၼ်ႉၸူႉၵၼ်တုမ်ၵၼ် ႁႂ်ႈလႆႈတိုၵ်းတေႃးၶႃႈၸဝ်ႈႁဝ်းၶဝ်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။
၇ ယေႃးသုဢိၵ်ႇတင်းၶဝ်ၸိူဝ်းဢၼ်ၸၢင်ႊမေႃဢမူႉသိုၵ်းတင်းၵူၼ်းသိုၵ်း ဢၼ်ႁႅင်းယႂ်ႇၼႃႇတင်းသဵင်ႈတင်းလူင်ၸိူဝ်းၼၼ်ႉၵေႃႈ ဢွၼ်ၵၼ်လုၵ်ႉသေၵႃႈတီႈဝဵင်းၵိလၵႃႇလၶိုၼ်ႈၵႂႃႇဢေႃႈ။
၈ ထႃႇဝရႃႉၽြႃးမီးဢမိင်ႉတီႈယေႃးသုလႄႈဝႃႈ၊-ယႃႇပေၵူဝ်ပေႁႄၶဝ်။ၵဝ်တၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။ၽူႈ လႂ်သေၵေႃႉသေၵူၼ်းတၵ်းဢမ်ႇၸုၵ်းၶၢမ်ႇယူႇၵႃႈတီႈၽၢႆႇၼႃႈမႂ်းလႆႈ၊ ဝႃႈၼင်ႇၼႆဢေႃႈ။
၉ ယေႃးသု ၵိုင်ႉၵၢင်ႉႁူပ်ႉထူပ်းတိုၵ်းတေႃးၶဝ်ၵမ်းလဵဝ်ၵွပ်ႈပိူဝ်ႈဢၼ်မၼ်းလုၵ်ႉသေၵႃႈတီႈၵိလၵႃႇလ ၶီႇၵႂႃႇတင်းၶိုၼ်းၼၼ်ႉသေယဝ်ႉ ထႃႇဝရႃႉၽြႃးႁႂ်ႈၶဝ်တူၵ်းသုမ်း ၵႃႈတီႈၽၢႆႇၼႃႈၵူၼ်းမဵဝ်းဢိသရေႇလ တင်းလၢႆလႄႈ
၁၀ ႁဵတ်းတင်းဢၼ်ဢဝ်တၢႆဢၼ်ယႂ်ႇၼႃႇဢဝ်ၶဝ်တၢႆၵႃႈတီႈႁိမ်းဝဵင်းၵိပွင်ႇသေလႄႈ လိုပ်ႈၸွမ်းလမ်းၸွမ်းၶဝ်ၵႃႈၼႂ်းသဵၼ်ႈတၢင်းဢၼ်ၶိုၼ်ႈၸူးၵႃႈတီႈဝဵင်း ပေႇသေႃႇရူၼ်ႇၼၼ်ႉလႄႈ တိုၵ်းတေႃးယႃႉပႅတ်ႈတေႃႇထိုင်ႁွတ်ႈဝဵင်းဢႃႇၸေႇၵႃႇဢိၵ်ႇတင်း ၵႃႈတီႈဝဵင်း မႅၵ်ႉၵတႃႇပုၼ်ႉဢေႃႈ။
၁၁ ၼႂ်းမိူဝ်ႈဢၼ်ၶဝ်ဢွၵ်ႇပၢႆႈသေၵႃႈတီႈၽၢႆႇၼႃႈၵူၼ်းမဵဝ်းဢိသရေႇလ တင်းလၢႆလႄႈယင်းတိုၵ်ႉ မီးယူႇၵႃႈၼႂ်းသဵၼ်ႈတၢင်းဢၼ်လူင်းၸူးဝဵင်းပေႇသေႃႇရုၼ်ႇၼၼ်ႉထႃႇဝရႃႉၽြႃးဢဝ်မၢၵ်ႇႁဵပ်းဢၼ်ယႂ်ႇၼႃ ၶျႃးတူၵ်းသေၵႃႈၼိူဝ်ၵၢင်ႁၢဝ်လူင်းမႃးတိူဝ်ႉသႂ်ႇၵႃႈၼိူဝ်ၶဝ် တေႃႇထိုင်ႁွတ်ႈဝဵင်းဢႃႇၸေႇၵႃႇလႄႈၶဝ်ၼၼ်ႉတၢႆဢေႃႈ။ၶဝ်ၸိူဝ်းဢၼ်တၢႆလူၺ်ႈမၢၵ်ႇႁဵပ်းၸိူဝ်းၼၼ်ႉ ယိင်ႈၶႅၼ်းၼမ်ၼႃႇသေၶဝ်ၸိူဝ်းဢၼ်ၵူၼ်းမဵဝ်းဢိသရေႇလတင်းလၢႆ ဢဝ်လၢပ်ႇလႅဝ်းၼ်းတၢႆၼၼ်ႉဢေႃႈ။
၁၂ ၼႂ်းဝၼ်းဢၼ်ထႃႇဝရႃႉၽြႃး ဢဝ်ၵူၼ်းဢႃႇမေႃးရိ
ၸိူဝ်းၼၼ်ႉ ဢၢပ်ႈပၼ်တီႈၵူၼ်းမဵဝ်းဢိသရေႇလတင်းလၢႆၼၼ်ႉ ယေႃးသုသူးတွင်းတီႈထႃႇဝရႃႉၽြႃးသေယဝ်ႉလၢတ်ႈဢွၵ်ႇသူပ်း သိုဝ်ႈၼႃႈတႂ်ႈတႃၵူၼ်းမဵဝ်းဢိ သရေႇလတင်းလၢႆလႄႈဝႃႈ၊-
၁၃ ၵၢင်ဝၼ်းဢူၺ်း၊မႂ်းယူႇၼိမ်ၼိမ်ၵႃႈၼိူဝ်ဝဵင်းၵိပွင်ႇတႃႉ။လိူၼ်ဢူၺ်း၊မႂ်းယူႇၼိမ်ၼိမ်ၵႃႈၼိူဝ်ၶူင်ႈႁူၺ်ႈ ဢႃႇယလုၼ်ႇ တႃႉ၊ ဝႃႈၼင်ႇၼႆလႄႈ ၵၢင်ဝၼ်းယူႇၼိမ်ၼိမ်လႄႈလိူၼ်ၵေႃႈၵိုတ်းသဝ်းယူႇတေႃႇထိုင်ႁွတ်ႈၵူၼ်းမဵဝ်းၶဝ်လႆႈပၼ်တၢမ်ႇဢပျႅတ်ႈတီႈရၢၼ်ႇသူႇၶဝ်ၸိူဝ်းၼၼ်ႉ ထၢၼ်ႈပေႃးယဝ်ႉတူဝ်ႈၼၼ်ႉဢေႃႈ။ဢၼ်တႅမ်ႈဝႆႉမီးယူႇၵႃႈၼႂ်းလိၵ်ႈယႃႇသႃႇၼၼ်ႉၸမ်း၊-ၵၢင်ဝၼ်းၵိုတ်းသဝ်းယူႇၵႃႈၼႂ်းၵၢငႃ်ႉၵၢင်ႁၢဝ်လႄႈဢမ်ႇႁဵတ်းႁိပ်ႈႁဵတ်းၼႅတ်ႈႁႂ်ႈလႆႈတူၵ်းလႄႈ ယူႇသဝေၼ်းၼိုင်ႈၸမ်ၸမ်ဢေႃႈ၊ဝႃႈၼင်ႇၼႆယူႇဢေႃႈ။
၁၄ ဝၼ်းဢၼ်ထႃႇဝရႃႉၽြႃးထွမ်ႇဢဝ်ၵႂၢမ်းၵူၼ်းလႄႈႁဵတ်းၼၼ်ႉ ၵႃႈပူၼ်ႉမႃးဢမ်ႇတွၼ်ႉပဵၼ်ၸိူဝ်ႉၼင်ၼၼ်သပွေၵ်ႈသဝေၼ်း။ထႃႇဝရႃႉၽြႃးယူႇၽၢႆႇမဵဝ်းဢိသရေႇလသေလႄႈတိုၵ်းသိုၵ်းဢေႃႈ။
၁၅ လိုၼ်းၼၼ်ႉ ယေႃးသုဢိၵ်ႇတင်းၵူၼ်းမဵဝ်းဢိသရေႇလတင်းလၢႆ ၶိုၼ်းမိူဝ်းၸူးၵႃႈတီႈတပ်ႉၵိလၵႃႇလသေဢေႃႈ။
ၶူၼ်လူင်ႁႃႈပႃးတၢႆ
၁၆ ၶုၼ်လူင်ႁႃႈပႃးၼၼ်ႉဢွၵ်ႇပၢႆႈလႄႈ တဵတ်ႇမႅပ်းယူႇၵႃႈၼႂ်းႁူးထမ်ႈမိၵ်ႉၵတႃႇဢေႃႈ။
၁၇ ပိူၼ်ႈလဝ်ႈလၢတ်ႈတီႈယေႃးသုလႄႈဝႃႈ၊-လႆႈထူပ်းႁၼ်ၶုၼ်လူင်ႁႃႈပႃးၼၼ်ႉ တဵတ်ႇမႅပ်းယူႇၵႃႈၼႂ်းႁူးထမ်ႈမိၵ်ႉၵတႃႇၼၼ်ႉ တီႈၶႃႈယဝ်ႉ၊ဝႃႈၼင်ႇၼႆလႄႈ
၁၈ ယေႃးသုသင်ႇလၢတ်ႈလႄႈဝႃႈ၊-ဢဝ်မၢၵ်ႇႁိၼ်ဢၼ်ယႂ်ႇဢၼ်လူင် ၵိင်ႈသႂ်ႇဝႆႉၵႃႈတီႈပၢၵ်ႇထမ်ႈၼၼ်ႉလႄႈ ဝႆႉၵူၼ်းၵႃႈတီႈႁိမ်းမၼ်း ႁႂ်ႈလႆႈပႂ်ႉယူႇတႃႉ။
၁၉ သူၸမ်း၊ယႃႇပေၵိုတ်းယူႇသဝ်းယူႇ။ဢွၼ်ၵၼ်လိုပ်းၸွမ်းလမ်းၸွမ်းရၢၼ်ႇသူႇလႄႈ တိုၵ်းတေႃးယႃႉပႅတ်ႈၵႃႈဢၼ်တူၵ်းလိုၼ်းလင်သုတ်း ပိူၼ်ႈၸိူဝ်းၼၼ်ႉတႃႉ။ယႃႇပေႁႂ်ႈၶဝ်လႆႈၶဝ်ႈၵႃႈၼႂ်းဝဵင်းၶဝ်။ထႃႇဝရႃႉၽြႃးၽြႃးပဵၼ်ၸဝ်ႈသူ ဢဝ်ၶဝ်ဢၢပ်ႈပၼ် ၵႃႈၼႂ်းမိုဝ်းသူယဝ်ႉ၊ဝႃႈၼင်ႇၼႆဢေႃႈ။
၂၀ မိူဝ်ႈဢၼ်ယေႃးသုဢိၵ်ႇတင်း ၵူၼ်းမဵဝ်းဢိသရေႇလတင်းလၢႆႁဵတ်းတၢင်းဢၼ်ဢဝ်တၢႆ ဢၼ်ယႂ်ႇၼႃႇလူင်လၢင်ယဝ်ႉတူဝ်ႈယဝ်ႉ တေႃႇထိုင်ႁွတ်ႈထၢၼ်ႈပေႃးပႄႇၽဵဝ်ႈပႅတ်ႈၼၼ်ႉလႄႈ ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၼၼ်ႉ လႆႈၶဝ်ႈယူႇၼႂ်းဝဵင်းဢၼ်မၼ်ႈၶိူင်ႇယဝ်ႉ ၼၼ်ႉၸိုင် ၵူၼ်းတင်းသဵင်ႈတင်းလူင်ဢွၼ်ၵၼ်ၶိုၼ်းမႃးၸူးၵႃႈတီႈတပ်ႉတီႈယေႃးသု ၵႃႈတီႈ မိၵ်ႉၵတႃႇၼၼ်ႉၼိမ်ၼိမ်လီလီဢေႃႈ။
၂၁ ၽူႈ လႂ်သေၵေႃႉသေၵူၼ်းဢမ်ႇလႆႈမႅပ်ႈလိၼ်ႉတေႃႇၵူၼ်းမဵဝ်းဢိသရေႇလ သေ ၵေႃႉသေၵူၼ်း။
၂၂ မိူဝ်ႈၼၼ်ႉယေႃးသုသင်ႇလၢတ်ႈလႄႈဝႃႈ၊-ၽုၺ်ႇပၢၵ်ႇထမ်ႈၼၼ်ႉသေလႄႈ ဢဝ်ၶုၼ်လူင်ႁႃႈပႃးၼၼ်ႉ ဢွၵ်ႇသေၵႃႈၼႂ်းထမ်ႈမႃးၵႃႈတီႈၵဝ်ၼႆႉ တႃႉ၊ဝႃႈၼင်ႇၼႆလႄႈ
၂၃ ၶဝ်ႁဵတ်းၸိူဝ်ႉၼင်ႇၼၼ်လႄႈဢဝ်ၶုၼ်လူင်ႁႃႈပႃးဢၼ်ဝႃႈၶုၼ်လူင်ယေႇရုသလႅမ်ႇ ၶုၼ်လူင်ႁေႇပုၼ်ႇ ၶုၼ်လူင်ယႃႇမုတ်ႉ ၶုၼ်လူင်လႃႇၶိသႃႉ ၶုၼ်လူင်ဢေႇၵလုၼ်ႇ ၸိူဝ်းၼၼ်ႉဢွၵ်ႇ သေၵႃႈၼႂ်းထမ်ႈမႃးဢေႃႈ။
၂၄ မိူဝ်ႈဢၼ်ၶဝ်ဢဝ်ၶုၼ်လူင်ၸိူဝ်းၼၼ်ႉ ဢွၵ်ႇမႃးၸူးၵႃႈတီႈ ယေႃးသုယဝ်ႉၼၼ်ႉၸိုင် ယေႃးသု ႁွင်ႉဢဝ်ၵူၼ်းမဵဝ်းဢိသရေႇလတင်းသဵင်ႈတင်းလူင်မႃးသေလႄႈ လၢတ်ႈတီႈၶုၼ်ပူဝ်ႇဢၼ်ၶီႇသိုၵ်း လူၺ်ႈၵၼ်တင်းမၼ်းၸိူဝ်းၼၼ်ႉလႄႈဝႃႈ၊- ဢွၼ်ၵၼ်သုတ်ႉၸပ်းသုတ်ႉၸူးသေလႄႈဢဝ်တိၼ်သူတၢင်ႇသႂ်ႇ ၵႃႈၼိူဝ်ၵွင်ႈၶေႃးၶုၼ်လူင်ၸိူဝ်းၼႆႉတႃႉ၊ဝႃႈၼင်ႇၼႆလႄႈ ၶဝ်ဢွၼ်ၵၼ်သုတ်ႉၸပ်းသုတ်ႉၸူးသေလႄႈ ဢဝ်တိၼ်ၶဝ်တၢင်ႇသႂ်ႇၵႃႈၼိူဝ်ၵွင်ႈၶေႃး ၶဝ်ၼၼ်ႉဢေႃႈ။
၂၅ ယေႃးသုသမ်ႉလၢတ်ႈတီႈၶဝ်လႄႈဝႃႈ၊-ယႃႇပေၵူဝ်ပေႁႄ။ယႃႇပေၸႂ်လူႉ။ဢဝ်ႁႅင်းလႄႈမီးၸႂ်ဢၼ်ႁတ်းႁၢၼ်တႃႉ။လွင်ႈမၼ်းၸမ်းထႃႇဝရႃႉၽြႃးတၵ်းႁဵတ်းၸိူဝ်ႉၼင်ႇၼႆ တီႈရၢၼ်ႇသူႇသူ ၵႃႈဢၼ်သူလႆႈတိုၵ်းတေႃးၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊လိုၼ်းၼၼ်ႉယေႃးသုပေႃႉတႅင်းၶဝ်လႄႈ ဢဝ်ၶဝ်တၢႆသေယဝ်ႉ ဢဝ်ႁွႆႈဝႆႉၵႃႈတီႈတူၼ်ႈမႆႉႁႃႈတူၼ်ႈဢေႃႈ။
၂၆ ႁွႆႈဝႆႉၵႃႈတီႈတူၼ်ႈမႆႉၸိူဝ်းၼၼ်ႉ တေႃႇထိုင်ႁွတ်ႈၶိင်ႇႁူဝ်ၶမ်ႈလႄႈ မိူဝ်ႈဢၼ်ၵၢင်ဝၼ်းတူၵ်းၼၼ်ႉၸိုင်ယေႃးသုမီးဢမိင်ႉ ႁႂ်ႈဢွၼ်ၵၼ်ဢဝ်ၶဝ်ၶျႃးတူၵ်းသေၵႃႈတီႈတူၼ်ႈမႆႉသေယဝ်ႉ
၂၇ ဢဝ်ၶဝ်ပႅတ်ႈသႂ်ႇဝႆႉၵႃႈၼႂ်းထမ်ႈတီႈဢၼ်ၶဝ်တဵတ်ႇမႅပ်းယူႇၼၼ်ႉသေလႄႈ ဢဝ်မၢၵ်ႇႁိၼ်ဢၼ်ယႂ်ႇဢၼ်လူင် ၵွင်သႂ်ႇဝႆႉၵႃႈတီႈပၢၵ်ႇထမ်ႈၼၼ်ႉလႄႈမီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၈ ၼႂ်းဝၼ်းၼၼ်ႉ ယေႃးသုတိုၵ်းဢဝ်ဝဵင်းမိၵ်ႉၵတႃႇလႄႈတိုၵ်းတေႃးယႃႉပႅတ်ႈဝဵင်းၼၼ်ႉ ဢိၵ်ႇတင်းၶုၼ်လူင်မၼ်းလူၺ်ႈၶူမ်းလၢပ်ႇၶူမ်းလႅင်းသေလႄႈ ယင်းဢမ်ႇႁႂ်ႈလႆႈၵိုတ်းၵျၢၼ်သေၵေႃႉသေၵူၼ်းလႄႈ ယႃႉၽဵဝ်ႈပႅတ်ႈၶဝ်ဢိၵ်ႇပႃး ၵႃႈဢၼ်မီးၵႃႈၼႂ်းဝဵင်းၸိူဝ်းၼၼ်ႉသဵင်ႈသဵင်ႈမူတ်းမူတ်းဢေႃႈ။မၼ်းႁဵတ်းတီႈၶုၼ်လူင်မိၵ်ႉၵတႃႇ မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈၶုၼ်လူင်ယေႇရိၶုဝ်းၼၼ်ႉဢေႃႈ။
ပႄႉၼႅင်ႇဝဵင်းၽၢႆႇၸၢၼ်း
၂၉ လိုၼ်းၼၼ်ႉ ယေႃးသုဢိၵ်ႇတင်းၵူၼ်းမဵဝ်းဢိသရေႇလတင်းသဵင်ႈတင်းလူင် ၶီႇဢွၵ်ႇသေၵႃႈတီႈၼႂ်းဝဵင်းမိၵ်ႉၵတႃႇၵႂႃႇၸူးၵႃႈတီႈဝဵင်းလိပၼလႄႈ တိုၵ်းတေႃး ဝဵင်းလိပၼဢေႃႈ။
၃၀ ထႃႇဝရႃႉၽြႃးဢဝ်ဝဵင်းၼၼ်ႉဢိၵ်ႇတင်းၶုၼ်လူင်မၼ်း ဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်းဢိသရေႇလတင်းလၢႆလႄႈ မၼ်းတိုၵ်းတေႃးယႃႉပႅတ်ႈဝဵင်းၼၼ်ႉဢိၵ်ႇတင်း ၵူၼ်းၵႃႈဢၼ်မီးၵႃႈၼႂ်းမၼ်းၼၼ်ႉ လူၺ်ႈၶူမ်းလၢပ်ႇၶူမ်းလႅဝ်းလႄႈ ဢမ်ႇႁႂ်ႈလႆႈၵိုတ်းၵျၢၼ်ႇဝႆႉသေၵေႃႉသေၵူၼ်း။မၼ်းႁဵတ်းတီႈၶုၼ်လူင် မိူၼ်ၸိူဝ်ႉၼင်ႇမၼ်းႁဵတ်းတီႈၶုၼ်ဝဵင်းယေႇရိၶုဝ်းၼၼ်ႉဢေႃႈ။
၃၁ ယေႃးသုဢိၵ်တင်းၵူၼ်းမဵဝ်းဢိသရေႇလတင်းသဵင်ႈတင်းလူင် သမ်ႉၶီႇဢွၵ်သေၵႃႈတီႈဝဵင်းလိပၼလႄႈၵႂႃႇၸူးၵႃႈတီႈဝဵင်းလႃႇၶိသလႄႈ ၶျႃးတပ်ႉသေယဝ်ႉတိုၵ်းတေႃးဝဵင်းၼၼ်ႉဢေႃႈ။ထႃႇဝရႃႉၽြႃႉဢဝ်ဝဵင်းလႃႇၶိသဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်းဢိသရေႇလ တင်း လၢႆသေယဝ်ႉ
၃၂ ၼႂ်းဝၼ်းတုတိယၼၼ်ႉ မၼ်းလႆႈဝဵင်းၼၼ်ႉလႄႈ တိုၵ်းတေႃးယႃႉပႅတ်ႈဝဵင်းၼၼ်ႉဢိၵ်ႇတင်းၵူၼ်းၵႃႈဢၼ်မီးၵႃႈၼႂ်းဝဵင်းၼၼ်ႉ လူၺ်ႈၶူမ်းလၢပ်ႇၶူမ်းလႅဝ်း မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈဝဵင်းလိပၼၼၼ်ႉဢေႃႈ။
၃၃ မိူဝ်ႈၼၼ်ႉႁေႃႇရမ်ႇ၊ ၶုၼ်လူင်ၵေႇၸႃႇ၊မႃးႁႂ်ႈလႆႈၸွႆႈထႅမ်မႃႉၸႃႉဝဵင်းလႃႇၶိသၼၼ်ႉလႄႈ ယေႃးသု တိုၵ်းတေႃးယႃႉပႅတ်ႈမၼ်းဢိၵ်ႇတင်း ၵူၼ်းမၼ်းတင်းလၢႆတေႃႇထိုင်ႁွတ်ႈထၢၼ်ႈပေႃး ဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းဢေႃႈ။
၃၄ ယေႃးသုဢိၵ်ႇတင်း ၵူၼ်းမဵဝ်းဢိသရေႇလတင်းသဵင်ႈတင်းလူင်ၼၼ်ႉ သမ်ႉၶီႇဢွၵ်ႇသေၵႃႈတီႈဝဵင်းလႃႇၶိသလႄႈၵႂႃႇၸူးၵႃႈတီႈဝဵင်းဢေႇၵလုၼ်ႇလႄႈ ၶျႃးတပ်ႉသေယဝ်ႉတိုၵ်းတေႃးဝဵင်းၼၼ်ႉဢေႃႈ။
၃၅ ၶဝ်လႆႈၼႂ်းဝၼ်းၼၼ်ႉၵမ်းလဵဝ်လႄႈ တိုၵ်းတေႃးယႃႉပႅတ်ႈဝဵင်းၼၼ်ႉလူၺ်ႈၶူမ်းလၢပ်ႇၶူမ်းလႅဝ်းလႄႈယႃႉၽဵဝ်ႈပႅတ်ႈၵူၼ်းဢၼ်မီးၼႂ်းဝဵင်းၼၼ်ႉမူတ်းမူတ်းသဵင်ႈသဵင်ႈမိူၼ်ၸိူဝ်ႉၼင်ႇဢၼ်မၼ်းႁဵတ်းတီႈဝဵင်းလႃႇၶိသၼၼ်ႉဢေႃႈ။
၃၆ ယေႃးသု ဢိၵ်ႇတင်းၵူၼ်းမဵဝ်းဢိသရေႇလတင်းသဵင်ႈတင်းလူင်ၼၼ်ႉ သမ်ႉၶီႇဢွၵ်ႇသေ ဝဵင်းဢေႇၵလုၼ်ႇၼၼ်ႉလႄႈ ၵႂႃႇၸူးၵႃႈတီႈဝဵင်းႁေႇပုၼ်ႇလႄႈတိုၵ်း တေႃးဝဵင်းၼၼ်ႉဢေႃႈ။
၃၇ ၶဝ်လႆႈဝဵင်းၼၼ်ႉလႄႈတိုၵ်းတေႃးယႃႉပႅတ်ႈဝဵင်းၼၼ်ႉ၊ ၶုၼ်လူင်မၼ်း၊ ဝဵင်းၵႃႈဢၼ်ၸၢပ်ႈသႅင်ႇၵၼ်တင်းမၼ်း တင်းၵူၼ်းၵႃႈဢၼ်မီးၵႃႈၼႂ်းမၼ်းလူၺ်ႈၶူမ်းလၢပ်ႇၶူမ်းလႅဝ်းဢေႃႈ။မၼ်းယင်းဢမ်ႇႁႂ်ႈၵိုတ်းၵျၢၼ်ႇဝႆႉ သေၵေႃႉသေၵူၼ်းလႄႈပႄႇၽဵဝ်ႈပႅတ်ႈဝဵင်းၼၼ်ႉဢိၵ်ႇတင်း ၵူၼ်းၵႃႈဢၼ်မီးၵႃႈၼႂ်းမၼ်းၼၼ်ႉမူတ်းမူတ်းသဵင်ႈသဵင်ႈ မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈဝဵင်းဢေႇၵလုၼ်ႇၼၼ်ႉဢေႃႈ။
၃၈ ယေႃးသု ဢိၵ်ႇတင်းၵူၼ်းမဵဝ်းဢိသရေႇလတင်းသဵင်ႈတင်းလူင်ၼၼ်ႉ ဢွၼ်ၵၼ်ၶိုၼ်းမႃးၸူးၵႃႈတီႈဝဵင်းတေႇပိရလႄႈတိုၵ်းတေႃးဝဵင်းၼၼ်ႉဢေႃႈ။
၃၉ မၼ်းလႆႈဝဵင်းၼၼ်ႉဢိၵ်ႇတင်း ၶုၼ်လူင်မၼ်းတင်းဝဵင်းၸၢပ်ႈသႅင်ႇၵၼ်တင်းမၼ်းလႄႈ တိုၵ်းတေႃးယႃႉပႅတ်ႈၶဝ်လူၺ်ႈၶူမ်းလၢပ်ႇၶူမ်းလႅဝ်းလႄႈ ပႄႇၽဵဝ်ႈပႅတ်ႈၵူၼ်းၵႃႈဢၼ်မီးၵႃႈၼႂ်းမၼ်းၼၼ်ႉ မူတ်းမူတ်းသဵင်ႈသဵင်ႈထၢၼ်ႈပေႃး ဢမ်ႇႁႂ်ႈၵိုတ်းၵျၢၼ်ႇဝႆႉသေၵေႃႉသေၵူၼ်းဢေႃႈ။မၼ်းႁဵတ်းတီႈဝဵင်းတေႇပိရဢိၵ်ႇတင်းၶုၼ်လူင်မၼ်း မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈႁေႇပုၼ်ႇတင်းၶုၼ်လူင်မၼ်းဢိၵ်ႇတင်းတီႈ လိပၼ တင်းၶုၼ်လူင်မၼ်းၼၼ်ႉဢေႃႈ။
၄၀ ၼင်ႇၼၼ်လႄႈ ယေႃးသုတိုၵ်းတေႃးယႃႉပႅတ်ႈမိူင်းတၢင်ႇမိူင်းၵႃႈၼိူဝ်ႁၢၼ်ႉလွႆ ၵႃႈတီႈပွတ်ႈတၢင်းၸၢၼ်းၵႃႈတႂ်ႈတီႈဢၼ်ပၢင်ႇဢၼ်ပဵင်း ၵႃႈတီႈပဵမ်ႉလွႆဢိၵ်ႇတင်းၶုၼ်လူင်တင်းသဵင်ႈတင်းလူင်လႄႈ ယင်းဢမ်ႇႁႂ်ႈၵိုတ်းၵျၢၼ်ႇဝႆႉသေၵေႃႉသေၵူၼ်းလႄႈ ပႄႇၽဵဝ်ႈပႅတ်ႈၵႃႈဢၼ်ထူၺ်ႈၸႂ်ဢွၵ်ႇထူၺ်ႈၸႂ်ၶဝ်ႈမူတ်းမူတ်းသဵင်ႈသဵင်ႈ ၸွမ်းၵႃႈၼင်ႇဢၼ် ထႃႇဝရႃႉၽြႃးပဵၼ်ၸဝ်ႈၵူၼ်းမဵဝ်းဢိသရေႇလ တင်းလၢႆသင်ႇလၢတ်ႈဝႆႉ ၼၼ်ႉဢေႃႈ။
၄၁ ယေႃးသုတိုၵ်းတေႃးယႃႉပႅတ်ႈၶဝ်ဢဝ်ၵႃႈတီႈဝဵင်းၵႃႇတေႇသပႃႇၼႃႇ တေႃႇထိုင်ႁွတ်ႈဝဵင်းၵႃႇၸဢိၵ်ႇတင်းမိူင်းၵေႃႇသိၼ်ႇ တင်းသဵင်ႈတင်းမူတ်း တေႃႇထိုင်ႁွတ်ႈဝဵင်းၵိပွင်ႇၼၼ်ႉဢေႃႈ။
၄၂ ၵွပ်ႈပိူဝ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ တိုၵ်းသိုၵ်းယူႇၽၢႆႇၵူၼ်းဢိသရေႇလ ၼၼ်ႉၶဝ်တိုၵ်းဢဝ်ၵႃႈပဵၼ်ၶုၼ်လူင်ၸိူဝ်းၼၼ်ႉဢိၵ်ႇတင်း မိူင်းၶဝ်ၼၼ်ႉၵမ်း လဵဝ်ၵၼ်ဢေႃႈ။
၄၃ လိုၼ်းၼၼ်ႉယေႃးသုဢိၵ်တင်းၵူၼ်းမဵဝ်းဢိသရေႇလ တင်းသဵင်ႈတင်းလူင်ဢွၼ်ၵၼ်ၶိုၼ်းမိူဝ်းၸူးၵႃႈတီႈတပ်ႉၵိလၵႃႇလသေဢေႃႈ။