Chapter
၁၁
ၶုၼ်ႁေႃၶမ်းမိူင်းၽၢႆႇႁွင်ႇတူၵ်းသုမ်း
၁ မိူဝ်ႈဢၼ်ယႃႇၽႅၼ်ႇ၊ ၶုၼ်လူင်ႁႃႇၸေႃႇငိၼ်းလွင်ႈမၼ်းတၢင်းမၼ်းၼၼ်ႉၸိုင် မၼ်းသင်ႇၵႂၢမ်းၵႂႃႇၵႃႈတီႈယေႃႇပပ်ႉ၊ ၶုၼ်လူၼ်မႃႇတုၼ်ႇ၊ ၶုၼ်လူင်သိမုၼ်ႇ၊ ၶုၼ်လူင်ဢႃႇၶသၢပ်ႉ၊
၂ ဢိၵ်ႇတင်း ၵႃႈတီႈၶုၼ်လူင်တင်းလၢႆ ဢၼ်မီးၵႃႈတီႈပွတ်းတၢင်းႁွင်ႇ ၵႃႈၼိူဝ်ႁၢၼ်ႉလွႆ ၵႃႈၼႂ်းပၢင်ႇပဵင်းဢႃႇရၽႃႇ ၵႃႈတီႈၽၢႆႇတၢင်းၸၢၼ်းဝဵင်းၵိၼ်ႇၼီႇသရိတ်ႉ၊ ၵႃႈတႂ်ႈတီႈပၢင်ႇပဵင်း၊ ၵႃႈၼိူဝ်တီႈဢၼ်သုင်မိူင်းတေႃႇရ ၽၢႆႇဝၼ်းတူၵ်းၸိူဝ်းၼၼ်ႉဢိၵ်ႇတင်း ၵႃႈတီႈၵူၼ်း ၶႃႇၼၼိ ဢၼ်ယူႇတီႈဝၼ်းတူၵ်းဝၼ်းဢွၵ်ႇ၊
၃ ၵူၼ်းဢႃႇမေႃးရိ၊ၵူၼ်းႁိတ်ႉတိ၊ၵူၼ်းၽေႇရၸိ၊ ၵူၼ်းယေႇပုသိ ဢၼ်ယူႇၵႃႈၼိူဝ်ႁၢၼ်ႉလွႆ၊ ၵူၼ်းႁိဝိဢၼ်ယူႇၵႃႈတီႈတိၼ်လွႆႁေႃႇရႃႉမုၼ်ႇမိူင်းမိၸပႃႇ ၸိူဝ်းၼၼ်ႉလႄႈၶဝ်ဢွၼ် ၵၼ်ပႃးဢဝ်ပူဝ်ႇပႃႇၶဝ်
၄ ၵူၼ်းၼမ်ၼႃႇလူင်လၢင်ဢၼ်ၼပ်ႉဢၢၼ်ႇ ပဵၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႉတြႃႇၼၼ်ႉဢိၵ်ႇတင်း မႃႉ လႂ် လေႃႉရထႃးလႂ်ၼမ်ၼႃႇလူင်လၢင်ဢွၵ်ႇမႃးဢေႃႈ။
၅ ၶုၼ်လူင်ၵႃႈမီးၸိူဝ်းၼၼ်ႉၸူႉၵၼ်တုမ်ၵၼ်သေလႄႈ ၶီႇမႃးလႄႈၶျႃးတပ်ႉယူႇမုၵ်ႉလဵဝ်ၵၼ်ၵႃႈတီႈႁိမ်းၼွင်မေႇရူမ်ႇ ႁႂ်ႈလႆတိုၵ်းတေႃးမဵဝ်းဢိသရေႇလဢေႃႈ။
၆ ထႃႇဝရႃႉၽြႃးမီႈဢမိင်ႉတီႈယေႃးသုလႄႈဝႃႈ၊- ယႃႇပေၵူဝ်ပေႁႄၵွပ်ႈပိူဝ်ႈၶဝ်။ၵဝ်တၵ်းဢဝ်ၶဝ်ၵႃႈမီးၸိူဝ်းၼၼ်ႉဢၢပ်ႈပၼ်တီႈတၢင်းတၢႆၵႃႈတီႈ ၽၢႆႇၼႃႈၵူၼ်းမဵဝ်းဢိသရေႇလ ဝၼ်းမိူဝ်ႈၽုၵ်ႈၵႃႈတီႈၶိင်ႇၼႆႉၼၼ်ႉဢေႃႈ။မႂ်းတၵ်းလႆႈတႅပ်းဢဵၼ်တိၼ်မႃႉၶဝ်ၸိူဝ်းၼၼ်ႉၶၢတ်ႇလႄႈ ဢဝ်ၽႆးတုတ်ႇလေႃႉရထႃးၶဝ်ၸိူဝ်းၼၼ်ႉပႅတ်ႈဢေႃႈ၊ဝႃႈၼင်ႇၼႆဢေႃႈ။
၇ ယေႃးသုၵေႃႈၶီႇဢဝ်ၵူၼ်းသိုၵ်းမၼ်းတင်းလၢႆၵႂႃႇလႄႈ ၵိုင်ႉၵၢင်ႉႁူပ်ႉထူပ်းၶဝ်ၵႃႈတီႈႁိမ်းၼွင်မေႇရူမ်ႇသေယဝ်ႉ၊ တိုၵ်းတေႃးဢေႃႈ။
၈ ထႃႇဝရႃႉၽြႃး ဢဝ်ၶဝ်ၼၼ်ႉဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်းဢိသရေႇလတင်းလၢႆလႄႈ ၶဝ်တိုၵ်းတေႃးယႃႉပႅတ်ႈၶဝ်ၼၼ်ႉသေယဝ်ႉလိုပ်ႈၸွမ်းလမ်းၸွမ်းတေႃႇထိုင်ႁွတ်ႈဝဵင်းလူင်ၸိတုၼ်ႇ၊ ဝဵင်းမိသရၽေႃးသမိမ်ႇ ပၢင်ႇႁူၺ်ႈမိၸ ၽၢႆႇဝၼ်းဢွၵ်ႇၼၼ်ႉလႄႈတိုၵ်းတေႃးယႃႉပႅတ်ႈထၢၼ်ႈပေႃး ဢမ်ႇၵိုတ်းဢမ်ႇ ၵျၢၼ်ႇသေၵေႃႉသေၵူၼ်းဢေႃႈ။
၉ ယေႃးသုႁဵတ်းတီႈၶဝ်ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမၼ်းၼၼ်ႉလႄႈတႅပ်းဢဵၼ်တိၼ်မႃႉၶဝ်ၸိူဝ်းၼၼ်ႉၶၢတ်ႇပႅတ်ႈလႄႈ ဢဝ်ၽႆးတုတ်ႇလေႃႉရထႃးၶဝ်ၸိူဝ်းၼၼ်ႉဢေႃႈ။
၁၀ မိူဝ်ႈၼၼ်ႉ ယေႃးသုဝၢႆႇၶိုၼ်းလႄႈတိုၵ်းဢဝ်ဝဵင်းႁႃႇၸေႃႇသေယဝ်ႉ ဢဝ်တင်းလၢပ်ႇၽၼ်းၶုၼ်လူင်မၼ်းပႅတ်ႈဢေႃႈ။မိူဝ်းဢွၼ်တၢင်းၼၼ်ႉဝဵင်းႁႃႇၸေႃႇပဵၼ်ငဝ်ႈပဵၼ်ႁူဝ်မိူင်းၸိူဝ်းၼၼ်ႉဢေႃႈ။
၁၁ ၶဝ်ဢဝ်ၵူၼ်း ၵႃႈဢၼ်မီးၵႃႈၼႂ်းဝဵင်းၼၼ်ႉတၢႆလူၺ်ႈၶူမ်းလၢပ်ႇၶူမ်းလႅဝ်းလႄႈ ယႃႉပႅတ်ၶဝ်ၸိူဝ်းၼၼ်ႉမူတ်းမူတ်းသဵင်ႈသဵင်ႈဢေႃႈ။ၶဝ်ဢမ်ႇဝႆႉႁႂ်ႈၵေႃႉဢၼ်ထူၺ်ႈၸႂ်ဢွၵ်ႇထူၺ်ႈၸႂ်ၶဝ်ႈၼၼ်ႉ လႆႈၵိုတ်းၵျၢၼ်ႇယူႇသေ ၵေႃႉသေၵူၼ်း။
၁၂ မၼ်းဢဝ်ၽႆးတုတ်ႇဝဵင်းႁႃႇၸေႃႇၼၼ်ႉပႅတ်ႈဢေႃႈ။ယေႃးသုတိုၵ်းဢဝ်ၵႃႈပဵၼ်ဝဵင်းၶုၼ်လူင်ၸိူဝ်းၼၼ်ႉဢိၵ်ႇတင်း ၶုၼ်လူင်ဝဵင်းၸိူဝ်းၼၼ်ႉလႄႈတိုၵ်းတေႃးယႃႉပႅတ်ႈၶဝ် လူၺ်ႈၶူမ်းလၢပ်ႇၶူမ်းလႅဝ်းလႄႈယႃႉၽဵဝ်ႈၶဝ်ပႅတ်ႈ မူတ်းမူတ်းသဵင်ႈသဵင်ႈၸွမ်းၵႃႈၼင်ႇဢၼ်မုဝ်းသေႇ၊ ၶႃႈထႃႇဝရႃႉၽြႃး၊သင်လၢတ်ႈ ဝႆႉၼၼ်ႉဢေႃႈ။
၁၃ ၵူၺ်းၵႃႈၼွၵ်ႈသေဝဵင်းႁႃႇၸေႃႇၼၼ်ႉဝဵင်းဢၼ်တေႇယူႇ ၵႃႈၼိူဝ်လွႆၼိူဝ်ၵုင်းၸိူဝ်းၼၼ်ႉၸိုင်ၵူၼ်းမဵဝ်းဢိသရေႇလ တင်းလၢႆဢမ်ႇတုတ်ႇၽႆးပႅတ်ႈ။ယေႃးသုတုတ်ႇၽႆးပႅတ်ႈဝဵင်းၼၼ်ႉဝဵင်းလဵဝ်ၵူၺ်း ဢေႃႈ။
၁၄ ၵူၺ်းၵွမ်ႉဢုၵ်ႉၸႃႇၵႃႈဢၼ်ႁိမ်လႆႈဢိၵ်ႇတင်းတရိၵ်ႉသၢၼ်ႇ ၵႃႈတီႈဝဵင်းၸိူဝ်းၼၼ်ႉၵူၺ်းၵူၼ်းမဵဝ်းဢိသရေႇလ တင်းလၢႆဢွၼ်ၵၼ်သိမ်းဢဝ်ပုၼ်ႈၶဝ်ဢေႃႈ။ၶဝ်တိုၵ်းတေႃးယႃႉပႅတ်ႈၵူၼ်းၸိူဝ်းၼၼ်ႉတင်းသဵင်ႈတင်းလူင်လူၺ်ႈၶူမ်းလၢပ်ႇၶူမ်းလႅဝ်းဢေႃႈ။
ၶဝ်ဢမ်ႇႁႂ်ႈ ၵေႃႉဢၼ်ထူၺ်ႈၸႂ်ဢွၵ်ႇထူၺ်ႈၸႂ်ၶဝ်ႈၼၼ်ႉလႆႈၵိုတ်းၵျၢၼ်ႇဝႆႉသေၵေႃႉသေၵူၼ်း။
၁၅ ၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈမုဝ်းသေႇ ၶႃႈမၼ်းၸဝ်ႈၼၼ်ႉမုဝ်းသေႇသင်ႇလၢတ်ႈဝႆႉတီႈယေႃးသုဢေႃႈ။ယေႃးသုၵေႃႈႁဵတ်းၸွမ်းၸိူဝ်ႉၼင်ႇၼၼ်ဢေႃႈ။မၼ်းဢမ်ႇႁႂ်ႈၵိုတ်းဝႆႉၵျၢၼ်ႇဝႆႉလွင်ႈတၢင်းၵႃႈဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈမုဝ်းသေႇ ၼၼ်ႉသေၸိူဝ်ႉသေဢၼ်။
၁၆ ၼင်ႇၼၼ်လႄႈယေႃးသုသိမ်းဢဝ်မိူင်းၼၼ်ႉတင်းမိူင်းဢၼ်ဝႃႈ ၵႃႈၼိူဝ်ႁၢၼ်ႉလွႆၵႃႈတီႈပွတ်းတၢင်းၸၢၼ်းၵႃႈမီး မိူင်းၵေႃႇသိၼ်ႇတင်းၵႃႈတႂ်ႈတီႈပၢင်ႇပဵင်းဢႃႇရၽႃႇ ၵႃႈၼိူဝ်ႁၢၼ်ႉလွႆ ဢိသရေႇလ
၁၇ ဢိၵ်ႇတင်း ၵႃႈတႂ်ႈတီႈပၢင်ႇပဵင်းမၼ်းဢၼ်ဝႃႈ ၸႃႉၸဵဝ်လွႆႁႃႇလိၵ်ႉဢၼ်မီးၼႂ်းသဵၼ်ႈတၢင်းၸိရ တေႃႇထိုင်ႁွတ်ႈဝဵင်ႈပလၵတ်ႉဢၼ်မီးၼႂ်းပၢင်ႇႁူၺ်ႈလေႇပၼုၼ်ႇ ၵႃႈတီႈတိၼ်လွႆႁေႇရမုၼ်ႇၼၼ်ႉလႄႈ ပႄႉၼႅင်ႇၶုၼ်လူင် တင်းသဵင်ႈတင်းလူင်ၸိူဝ်းၼၼ်ႉသေယဝ်ႉၽၼ်းဢဝ်ၶဝ်တၢႆပႅတ်ႈဢေႃႈ။
၁၈ ယေႃးသု လႆႈတိုၵ်းသိုၵ်းၵၼ်တင်းၶုၼ်လူင်တင်းသဵင်း တင်းလူင်ၸိူဝ်းၼၼ်ႉၶိင်ႇၵႃႇလႃႉႁိုင်ၼႃႇဢေႃႈ။
၁၉ ၼွၵ်ႈသေၵူၼ်းႁိဝိ ဢၼ်ဝႃႈၵူၼ်းဝဵင်းၵိပွင်ႇၸိူဝ်းၼၼ်ႉဝဵင်းဢၼ်ႁဵတ်းမိၵ်ႉသႁႃႇယႃႉ တၢင်းဢၼ်ထုၵ်ႇၵၼ်တင်းၵူၼ်းမဵဝ်းဢိသရေႇလတင်းလၢႆၼၼ်ႉ ဢမ်ႇမီးသေတီႈသေဝဵင်း။ၶဝ်လႆႈတိုၵ်းလႆႈသိမ်းဢဝ်ဝဵင်းၵႃႈမီးတင်း သဵင်ႈတင်းလူင်ၸိူဝ်းၼၼ်ႉဢေႃႈ။
၂၀ လွင်ႈမၼ်းၸမ်း၊ထႃႇဝရႃႉၽြႃးမီးဢလူဝ်ႇၶႂ်ႈႁႂ်ႈႁူဝ်ၸႂ်ၶဝ်ၵႅၼ်ႇၶႅင်တေႃႇထိုင်ႁွတ်ႈထၢၼ်ႈပေႃးႁႂ်ႈၶဝ်ႁေႉႁပ်ႉႁေႉတိုၵ်းၵူၼ်းမဵဝ်းဢိသရေႇလ တင်းလၢႆႁႂ်ႈမၼ်းၸဝ်ႈလႆႈယႃႉၽဵဝ်ႈၶဝ်ပႅတ်ႈမူတ်းမူတ်းသဵင်ႈသဵင်ႈဢိၵ်ႇတင်းႁႂ်ႈၶဝ်ဢမ်ႇလႆႈထူပ်းၵျေးၸူးၸဝ်ႈလႄႈ မၼ်းၸဝ်ႈလႆႈပႄႇၽဵဝ်ႈၶဝ်ပႅတ်ႈ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။
၂၁ ၼႂ်းၶိင်ႇမိူဝ်ႈၼၼ်ႉယေႃးသု ၶီႇၵႂႃႇလႄႈပႄႇၽဵဝ်ႈပႅတ်ႈၵူၼ်းဢႃႇၼၵ တင်းလၢႆသေၵႃႈတီႈၼိူဝ်ႁၢၼ်ႉလွႆၵႃႈတီႈဝဵင်းႁေႇပုၼ်ႇ၊ဝဵင်းတေႇပိ၇၊ဝဵင်းဢႃႇၼပ်ႉ၊ ၵႃႈၼိူဝ်ႁၢၼ်ႉလွႆယုတ ဢိၵ်ႇတင်းၵႃႈၼိူဝ်ႁၢၼ်ႉလွႆဢိသရေႇလၵႃႈမီးၼၼ်ႉလႄႈ ယႃႉၽဵဝ်ႈပႅတ်ႈၶဝ်ဢိၵ်ႇတင်းဝဵင်းၶဝ် သဵင်ႈသဵင်ႈမူတ်းမူတ်းဢေႃႈ။
၂၂ ၼွၵ်ႈသေဢၼ်ၵိုတ်းၵျၢၼ်ႇဝႆႉၵႃႈၼႂ်းဝဵင်းၵႃႇၸ၊ဝဵင်းၵႃႇသ၊ ဝဵင်းဢႃႇၸုတ်ႉၸိူဝ်းၼၼ်ႉ၊ၵူၼ်းဢႃႇၼၵ ဢမ်ႇၵိုတ်းဢမ်ႇၵျၢၼ်ႇဝႆႉ ၵႃႈၼႂ်းမိူင်းဢိသရေႇလသေၵေႃႉသေၵူၼ်း။
၂၃ ၼင်ႇၼၼ်လႄႈ ယေႃးသုသိမ်းဢဝ်မိူင်းၼၼ်ႉတင်းမိူင်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉတီႈမုဝ်းသေႇ ၼၼ်ႉလႄႈ ယေႃးသုမႅင်ႇၽႄပၼ်ဢမူၺ်ႇတီႈၵူၼ်းမဵဝ်းဢိသရေႇလတင်းလၢႆ ၸွမ်းလူၺ်ႈမဵဝ်းၽႂ်ႇမဵဝ်းမၼ်းသေယဝ်ႉသိုၵ်းထၢတ်ႇယဵၼ်ၵႂႃႇတင်းမိူင်းဢေႃႈ။