Chapter
၂
ရႃႇၶပ်ႉတင်းၵေႃႉဢၼ်လွမ်တူၺ်းမိူင်း
၁ မိူဝ်ႈၼၼ်ႉယေႃးသု လုၵ်ႈၸၢႆးၼုၼ်ႇၼၼ်ႉ တဵတ်ႇတဵတ်ႇ ပွႆႇၸႂ်ႉၶဵဝ်လွတ်ႈၽႆးၼႂ်းသွင်ၵေႃႉဢွၵ်ႇသေၵႃႈတီႈဝဵင်းသိတ်ႉတိမ်ႇၵႂႃႇလႄႈ သင်ႇလၢတ်ႈဝႃႈ၊ၵႂႃႇလႄႈလူႈတူၺ်းမိူင်းဢိၵ်ႇတင်း ဝဵင်းယေႇရိၶူဝ်းၼၼ်ႉတႃႉ၊ဝႃႈၼင်ႇၼႆသေယဝ်ႉ သွင်ၶႃႈၼၼ်ႉၵႂႃႇလႄႈ ၶဝ်ႈၵႃႈၼႂ်းႁိူၼ်းမေႈမွၵ်ႇယႃႈဢၼ်လႆႈၸိုဝ်ရႃႇၶပ်ႉ ၼၼ်ႉသေ ယဝ်ႉယူႇၵႃႈတီႈၼၼ်ႉဢေႃႈ။
၂ ပိူၼ်ႈလဝ်ႈလၢတ်ႈတီႈၶုၼ်ႁေႃၶမ်းယေႇရိၶူဝ်းလႄႈဝႃႈ၊-ၵူၼ်းမဵဝ်းဢိသရေႇလၵမ်ႈၽွင်ႈၶဝ်မႃးၵႃႈၼႂ်းဝဵင်းၼႆႉၶမ်ႈၼႆႉႁႂ်ႈလႆႈလွမ်တူၺ်းမိူင်းၼႆႉၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းယေႇရိၶူဝ်း ပူင်ႈဢမိင်ႉၵႂႃႇၵႃႈတီႈရႃႇၶပ်ႉလႄႈဝႃႈ၊-
၃ ဢဝ်ၶဝ်ၸိူဝ်းဢၼ်ႁွတ်ႈမႃးၵႃႈတီႈမႂ်းဢၼ်ၶဝ်ႈယူႇၵႃႈၼႂ်းႁိူၼ်းမႂ်းၼၼ်ႉဢၢပ်ႈပၼ်တႃႉ။ၶဝ်ႁွတ်ႈမႃးႁႂ်ႈလႆႈလွမ်တူၺ်းမိူင်းၼႆႉတင်းမိူင်းယဝ်ႉ၊ ဝႃႈၼင်ႇ ၼႆဢေႃႈ။
၄ မေႈယိင်းၼၼ်ႉဢဝ်သွင်ၶႃသိူင်ႇဝႆႉသေယဝ်ႉၶိုၼ်းလၢတ်ႈလႄႈဝႃႈ၊-ၸႂ်တေႉ။ၵူၼ်းႁွတ်ႈမႃးၵႃႈတီႈၵဝ်ၶႃႈၶႃႈဢေႃႈ။ၵူၺ်းၵႃႈၵဝ်ၶႃႈဢမ်ႇႁူႉလွင်ႈဢၼ်ၶဝ်လုၵ်ႉၵႃႈတီႈ လႂ်မႃးၶႃႈ။မိူဝ်ႈၵၢင်ၶမ်ႈၶိင်ႇဢၼ်ဢိုတ်း ၽတ်းတူၼၼ်ႉသွင်ၶႃဢွၵ်ႇၵႂႃႇၶႃႈယဝ်ႉ။
၅ ၵဝ်ၶႃႈဢမ်ႇႁူႉသွင်ၶႃဢွၵ်ႇၵႂႃႇၵႃႈတီႈ လႂ်ၶႃႈ။လိုပ်ႈၸွမ်းလမ်းၸွမ်းၶၼ်ၶၼ်ၽႂ်းၽႂ်းၶႃႈတႃႉ။တၵ်းၶိုတ်းယူႇၶႃးဢေႃႈဝႃႈၼင်ႇၼႆဢေႃႈ။
၆ ၵူၺ်းၵႃႈမၼ်းဢဝ်သွင်ၶႃၶိုၼ်ႈၵႃႈၼိူဝ်မုင်းႁိူၼ်းသေယဝ်ႉ ဢဝ်သိူင်ႇဝႆႉၵႃႈၼႂ်းၵၢၼ်ႈတူၼ်ႈပၢၼ် ဢၼ်မၼ်းၽေႇသိူဝ်ႇဝႆႉၵႃႈၼိူဝ်မုင်းႁိူၼ်းၼၼ်ႉ ဢေႃႈ။
၇ ၵူၼ်းၸိူဝ်းၼၼ်ႉဢွၼ်ၵၼ်လိုပ်းၸွမ်းလမ်းၸွမ်းၵႃႈၼႂ်းသဵၼ်ႈတၢင်း ဢၼ်ၵႂႃႇၸူးၵႃႈတီႈၼမ်ႉႁွင်ႊယေႃးတၢၼ်ႇၼၼ်ႉ တေႃႇထိုင်ႁွတ်ႈတိူဝ်ႉတႃႈတီႈဢၼ်ၶၢမ်ႈၼမ်ႉႁွင်ႊၼၼ်ႉဢေႃႈ။မိူဝ်ႈဢၼ်ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၼၼ်ႉ ႁွတ်ႈၵႃႈတီႈၼွၵ်ႈဝဵင်းယဝ်ႉၼၼ်ႉၶဝ်ဢိုတ်းၽၵ်းတူဝဵင်းဝႆႉသေဢေႃႈ။
၈ ၸူဝ်ႈဢၼ်သွင်ၶႃဢမ်ႇပႆႇၼွၼ်းၼၼ်ႉ မၼ်းၶိုၼ်ႈၵႂႃႇၵႃႈၼိူဝ်မုင်းႁိူၼ်း တီႈဢၼ်သွင်ၶႃမီးၼၼ်ႉသေ ယဝ်ႉလၢတ်ႈဝႃႈ၊-ၵဝ်ၶႃႈႁူႉလွင်ႈဢၼ်ထႃႇဝရႃႉၽြႃးဢဝ်မိူင်းၼႆႉဢၢပ်ႈပၼ်တီႈသူၸဝ်ႈဢေႃႈ။
၉ တၢင်းဢၼ်ၵူဝ်ႁေသူၸဝ်ႈ ဢၼ်ယႂ်ႇၼႃႇလူင်လၢင်ၼၼ်ႉတူၵ်းႁွတ်ႈၵႃႈၼိူဝ်ႁဝ်းၶႃႈလႄႈ ႁူဝ်ၸႂ်ၵူၼ်းဝၢၼ်ႈၵူၼ်းမိူင်း တင်းသဵင်ႈ ၸိုမ်းယၢႆႈၵႂႃႇၵွပ်ႈပိူဝ်ႈသူၶႃႈဢေႃႈ။
၁၀ ႁဝ်းၶႃႈလႆႈငိၼ်းလွင်ႈဢၼ် ထႃႇဝရႃႉၽြႃးႁႂ်ႈၼမ်ႉပၢင်ႇလၢႆႇဢေႇတုမ်ႇ ယုတ်ႈႁႅင်ႈၵႂႃႇၵႃႈတီႈၽၢႆႇၼႃႈသူၸဝ်ႈၼႂ်းမိူဝ်ႈဢၼ် သူၸဝ်ႈဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢိၵ်ႇတင်း လွင်ႈဢၼ်သူၸဝ်ႈႁဵတ်းတီႈၶုၼ်ႁေႃၶမ်းဢႃႇမေႃးရိသွင်ပႃး ဢၼ်ယူႇၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇဢၼ်ဝႃႈ သီႇႁူၼ်ႇတင်းဢေႃႇၶ ဢၼ်သူၸဝ်ႈယႃႉပႅတ်ႈမူတ်းမူတ်းၼၼ်ႉၶႃႈယဝ်ႉ။
၁၁ မိူဝ်ႈဢၼ်ႁဝ်းၶႃႈငိၼ်း လွင်ႈမၼ်းတၢင်းမၼ်းၼၼ်ႉၸိုင် ႁူဝ်ၸႂ်ႁဝ်းၶႃႈၸိုမ်းယၢႆႈၵႂႃႇလႄႈတင်းဢၼ်ႁတ်းႁၢၼ် ဢမ်ႇၵိုတ်းၵျၼ်ႇၵႃႈတီႈသေၵေႃႉသေၵူၼ်းလႃးလႃးၵွပ်ႈပိူဝ်ႈသူၸဝ်ႈၶႃႈယဝ်ႉ။လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉပဵၼ်ၽြႃးၵႃႈၼႂ်းၽုင်ႇၵၢင်ႁၢဝ်ၵႃႈၼိူဝ်ဢိၵ်ႇတင်း ၵႃႈတီႈလိၼ်မိူင်းၵႃႈတႂ်ႈၶႃႈဢေႃႈ။
၁၂ ပိူဝ်ႈၼႆလႄႈ သူသွင်ၸဝ်ႈ ဢဝ်ထႃႇဝရႃႉၽြႃးတိူင်ႇပုၼ်ႈၵဝ်ၶႃႈ ၵွပ်ႈပိူဝ်ႈဢၼ်ၵဝ်ၶႃႈႁဵတ်းၵျေးၸူးတီႈသူသွင်ၸဝ်ႈလႄႈ သွင်ၸဝ်ႈၵေႃႈတၵ်းႁဵတ်းၵျေးၸူးတီႈပီႈၼွင်ႉၸိူဝ်ႉၶိူဝ်းပေႃႈၵဝ်ၶႃႈတင်းလၢႆၼၼ်ႉ သေၵမ်းၶႃႈ။ဢဝ်လၢၵ်ႈၶၼႃႇသၢၵ်ႈသေဢၼ်ၸိုဝ်ႈဢၼ်ၸႂ်ႈပၼ်ဝႆႉတီႈၵဝ်ၶႃႈ လွင်ႈဢၼ်ဝႃႈ
၁၃ သူၸဝ်ႈတၵ်းဢမ်ႇ ဢဝ်ပေႃႈၵဝ်ၶႃႈမေႈၵဝ်ၶႃႈ ပီႈၸၢႆးၼွင်ႉၸၢႆးၵဝ်ၶႃႈပီႈၼၢင်းၼွင်ႉယိင်းၵဝ်ၶႃႈဢိၵ်ႇတင်း ၵူၼ်းဢၼ်ၸၢပ်ႈသႅင်ႇၵၼ်တင်းၶဝ်ၸိူဝ်းၼၼ်ႉတၢႆလႄႈတၵ်းပၼ်ၵတ်းယဵၼ်ၶျၢမ်းသႃႇတီႈႁဝ်းၶႃႈၼၼ်ႉ သေၵမ်းၶႃႈ၊ဝႃႈၼင်ႇၼႆလႄႈ သွင်ၶႃၼၼ်ႉၵေႃႈႁပ်ႉတုင်းဢဝ်လႄႈ ဝႃႈ၊-
၁၄ ႁႂ်ႈဢသၢၵ်ႈႁႃးၼႆႉပဵၼ်ပုၼ်ႈဢသၢၵ်ႈမႂ်းတႃႉ။ပေႃးမႂ်း ဢမ်ႇၽုၺ်ႇဢွၵ်ႇၼႄပျႃးဢမူႉႁႃးၸိုင် မိူဝ်ႈဢၼ်ထႃႇဝရႃႉၽြႃးဢဝ်မိူင်းၼႆႉ ပၼ်တီႈႁဝ်းၼၼ်ႉႁဝ်းတၵ်းႁဵတ်းၵျေးၸူးတီႈမႂ်းလႄႈပႂ်ႉသႅတ်ႈၸႃႇယူႇဢေႃႈ၊ဝႃႈၼင်ႇၼႆဢေႃႈ။
၁၅ ၵွပ်ႈပိူဝ်ႈဢၼ်ႁိူၼ်းမၼ်းမီးၵႃႈၼိူဝ်လမ်းဝဵင်းၼၼ်ႉလႄႈ မၼ်းဢဝ်ၸိူၵ်ႈယွၼ်ႇသွင်ၶႃတူၵ်းသေၵႃႈၼိူဝ်ႁူးလၢင်းတဵၼ်ႈသေယဝ်ႉ သင်ႇ လၢတ်ႈလႄႈဝႃႈ၊-
၁၆ လွင်ႈၼင်ႇႁိုဝ်ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းသွင်ၸဝ်ႈၼၼ်ႉ တၵ်းဢမ်ႇလႆႈႁၼ်သွင်ၸဝ်ႈၸိုင် ပၢႆၵႂႃႇၵႃႈၼိူဝ်လွႆသေလႄႈတဵတ်ႇယူႇသသေၢမ်ဝၼ်းၼိုင်ႈ တေႃႇထိုင်ႁွတ်ႈၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၼၼ်ႉ ၶိုၼ်းမႃးယဝ်ႉၼၼ်ႉသေၵမ်း။လိုၼ်းၼၼ်ႉၸင်ႇၶိုၼ်းၵႂႃႇသေႇၵမ်း၊ ဝႃႈၼင်ႇ ၼႆဢေႃႈ။
၁၇ သွင်ၶႃႈလၢတ်ႈတီႈမၼ်းလႄႈဝႃႈ၊-မိူဝ်ႈဢၼ်ႁဝ်းႁွတ်ႈထိုင်ၵႃႈၼႂ်းမိူင်းၼႆႉၼၼ်ႉၸိုင် မႂ်းတၵ်းလႆႈဢဝ်ၸိူၵ်ႈဢၼ်လႅင်ႊသဵၼ်ႈၼႆႉမတ်ႉဝႆႉၵႃႈတီႈ ႁူး လၢင်းတဵၼ်ႈ
၁၈ ဢၼ်မႂ်းဢဝ်ႁႃးယွၼ်ႇတူၵ်းၼၼ်ႉလႄႈႁွင်ႉဢဝ်ပေႃႈမႂ်းမေႈမႂ်းပီႈၸၢႆးၼွင်ႉၸၢႆးမႂ်း ဢိၵ်ႇတင်းၵူၼ်းႁိူၼ်းၵူၼ်းယေးပေႃႈမႂ်းၵႃႈမီးၼၼ်ႉဝႆႉၵႃႈၼႂ်းႁိူၼ်းမႂ်းဢေႃႈ။
၁၉ ၵူၺ်းၵႃႈၵေႃႉဢၼ်ဢွၵ်ႇသေၵႃႈၼႂ်းၽၵ်းတူႁိူၼ်းမႂ်းလႄႈၵႂႃႇၵႃႈတီႈၵၢင်တၢင်းၼၼ်ႉၸမ်း ႁႂ်ႈလိူတ်ႈမၼ်းတူၵ်းႁွတ်ႈၵႃႈၼိူဝ်ႁူဝ်မၼ်းတႃႉ။ဢမ်ႇၸႂ်ႈၵွပ်ႈႁႃး။ပေႃးမိုဝ်းႁွတ်ႈထိုင်ၵႃႈၼိူဝ်ၵူၼ်းသေၵေႃႉသေၵူၼ်း ဢၼ်မီးယူႇလူၺ်ႈၵၼ်တင်းမႂ်းၵႃႈၼႂ်းႁိူၼ်းၼႆႉၼၼ်ႉၸိုင် ႁႂ်ႈလိူတ်ႈမၼ်းၼၼ်ႉတူၵ်းႁွတ်ႈၵႃႈၼိူဝ်ႁူဝ်ႁႃးတႃႉ။ပေႃးမႂ်းဢမ်ႇႁဵတ်းၸွမ်းၸိူဝ်ႉၼႆၸိုင်ႁႃးတၵ်းၵၢင်းလွတ်ႈတၢင်းဢပျႅတ်ႈ ၼႂ်းၵႂၢမ်းသႅတ်ႈၸႃႇ ဢၼ်မႂ်းႁႂ်ႈႁႃးၵိၼ်ႇဝႃႈၼၼ်ႉဢေႃႈ။
၂၀ ပေႃးမႂ်းၽုၺ်ႇဢွၵ်ႇၼပျေႃႉဢမူႉႁႃးၵေႃႈ ႁႃးတၵ်းၵၢင်းလွတ်ႈတင်းၵႂၢမ်းသႅတ်ႈၸႃႇဢၼ်မႂ်းႁႂ်ႈႁႃးၵိၼ်ႇဝႃႈၼႆႉဢေႃႈ၊ဝႃႈၼင်ႇၼႆလႄႈ မၼ်းၼၼ်ႉၵေႃႈလၢတ်ႈလႄႈဝႃႈ၊-
၂၁ ႁႂ်ႈပဵၼ်ၸွမ်း ၵႃႈၼင်ႇၵႂၢမ်းသွင်ၸဝ်ႈၼၼ်ႉသေၵမ်းတႃႉ၊ဝႃႈၼင်ႇၼႆသေယဝ်ႉ၊ မၼ်းပွႆႇသွင်ၶႃၼၼ်ႉၵႂႃႇလႄႈသွင်ၶႃၵေႃႈၵႂႃႇဢေႃႈ။မၼ်းၵေႃႈဢဝ်ၸိူၵ်ႈဢၼ် လဵင်ႊၼၼ်ႉမတ်ႉဝႆႉၵႃႈၼႂ်းႁူးလၢင်းတဵၼ်ႈဢေႃႈ။
၂၂ သွင်ၶႃၼၼ်ႉၵႂႃႇလႄႈ ႁွတ်ႈထိုင်ၵႃႈၼိူဝ်လွႆသေယဝ်ႉယူႇသၢမ်ဝၼ်းတေႃႇထိုင်ႁွတ်ႈ ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၼၼ်ႉၶိုၼ်းမိူဝ်းယဝ်ႉၼၼ်ႉဢေႃႈ။
၂၃ သွင်ၶႃႈၼၼ်ႉဝၢႆႇၶိုၼ်းလႄႈ လူင်းသေၵႃႈၼိူဝ်လွႆသေယဝ်ႉၶၢမ်ႈၼမ်ႉႁွင်ႊလႄႈ ႁွတ်ႈထိုင်ၵႃႈတီႈ ယေႃးသု၊လုၵ်ႈၸၢႆးၼုၼ်ႇ သေယဝ်ႉဢွၼ်ၵၼ်မွၵ်ႇလၢတ်ႈၵႃႈ ဢၼ်ပဵၼ်တီႈသွင်ၶႃၼၼ်ႉဢေႃႈ။
၂၄ သွင်ၶႃႈလဝ်လၢတ်ႈတီႈယေႃးသုလႄႈဝႃႈ၊-ထႃႇဝရႃႉၽြႃးဢဝ်မိူင်းၼၼ်ႉတင်းသဵင်ႈတင်းမူတ်း ဢၢပ်ႈပၼ်တီႈႁဝ်းၶႃႈဢမၢၼ်ႇၶၢၼ်ပဵၼ်ၶႃႈယဝ်ႉ။ႁူဝ်ၸႂ်ၵူၼ်းဝၢၼ်ႈၵူၼ်းမိူင်းၵႃႈမီးၼၼ်ႉ ၸိုမ်းယၢႆႈၵႂႃႇၵွပ်ႈပိူဝ်ႈႁဝ်းၶႃႈယဝ်ႉၶႃႈဢေႃႈ၊ဝႃႈၼင်ႇၼႆဢေႃႈ။