Chapter
၁၈
ၽႄမႅင်ႇလႅၼ်လိၼ်ဢၼ်ၵိုတ်းၵျၢၼ်ႇ
၁ ပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ၼၼ်ႉၸူႉၵၼ်တုမ်ၵၼ် ၵႃႈတီႈဝဵင်းသိလေႃႇလႄႈဢွၼ်ၵၼ်ပူၵ်းတင်ႈသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၵႃႈတီႈၼၼ်ႉဢေႃႈ။မိူင်းၼၼ်ႉလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇ ၵႃႈတီႈၽၢႆႇၼႃႈၶဝ် ဢေႃႈ။
၂ မိူဝ်ႈၼၼ်ႉယင်းၵိုတ်းၵူၼ်းမဵဝ်းဢိသရေႇလၸဵတ်းမဵဝ်း ဢၼ်ဢမ်ႇပႆႇလႆႈၶၢမ်ႇတၢင်းဢၼ်ၽႄမႅင်ႇ ပၼ်ဢမူၺ်ႇလိၼ်လႄႈ
၃ ယေႃးသုလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊- သူႁဵတ်းထိူင်းႁဵတ်းၼၢၼ်း လွင်ႈဢၼ်ၶဝ်လႄႇသိမ်းဢဝ် လိၼ်ဢၼ် ထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်သူ ပၼ်ၼၼ်ႉလႄႈတၵ်းယူႇၶိင်ႇၵႃႇလႁိုင်ၵႃႈႁိုဝ်။ဢွၼ်ၵၼ် လိူၵ်ႈၵဵပ်းဢဝ်ၵႃႈၼႂ်းသူယေႈမဵဝ်းသၢမ်ၵေႃႉတႃႉ။
၄ ၵဝ်တၵ်းပွႆႇၸႂ်ႉၶဝ်လုၵ်ႉလႄႈ ၵႂႃႇၵႃႈၼႂ်းဝၢၼ်ႈၼႂ်းမိူင်းလႄႈတႅမ်ႈမၢႆ ဢဝ်ၸွမ်းၵႃႈၼင်ႇဢၼ်ၶဝ်ထိူၵ်ႈၶၢမ်ႇဢဝ်ဢမူၺ်ႇၼၼ်ႉသေယဝ်ႉ တၵ်းလႆႈၶိုၼ်းမႃးၵႃႈတီႈၵဝ် ဢေႃႈ။
၅ ၶဝ်တၵ်းလႆႈတတ်းမိူင်းႁဵတ်းၸဵတ်းပွတ်းသေဢေႃႈ။မဵဝ်းယုတတၵ်းလႆႈယူႇၵႃႈၼႂ်းတီႈယူႇမၼ်းၽၢႆႇတၢင်းၸၢၼ်းဢေႃႈ။မဵဝ်းယုဝ်းသႅပ်ႉတၵ်းလႆႈယူႇၵႃႈၼႂ်းတီႈယူႇမၼ်းၽၢႆႇတၢင်းႁွင်ႇဢေႃႈ။
၆ သူတႅမ်ႈမၢႆဢဝ်မိူင်းႁဵတ်းၸဵတ်းပွတ်းသေယဝ်ႉ တၵ်းလႆႈဢဝ်ပုင်ႇလိၼ်မႃးၸူးတီႈၵဝ်ဢေႃႈ။ၵဝ်တၵ်းႁဵတ်းတၢင်းဢၼ်တူၵ်းၸႃႇၵွၵ်ႈပုၼ်ႈသူ ၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈႁဝ်းၵႃႈတီႈၼႆႉဢေႃႈ။
၇ ၵူၼ်းမဵဝ်းလေႇဝိတင်းလၢႆဢမ်ႇလႆႈမီး ပုၼ်ႊမီးတႃႇၵႃႈၼႂ်းသူဢေႃႈ။ဢရႃႇယိတ်ႉပရေႃးႁိၵ်ႉထႃႇဝရႃႉၽြႃးၼၼ်ႉပဵၼ်ဢမူၺ်ႇၶဝ်ဢေႃႈ။မဵဝ်းၵတ်ႉ၊မဵဝ်းရုပိၼ်ႇ၊မဵဝ်းမၼႃႇသေႇၶိုင်ႈၼိုင်ႈၸိူဝ်းၼၼ်ႉ ၶၢမ်ႇဢဝ်ဢမူၺ်ႇဢၼ်မုဝ်းသေႇၶႃႈထႃႇဝရႃႉၽြႃး ပၼ်တီႈၶဝ်ၵႃႈတီႈၽၢႆႇဝၼ်းဢွၵ်ႇၼမ်ႉႁွင်ႊယေႃးတၢၼ်ႇၼၼ်ႉယဝ်ႉ၊ ဝႃႈၼင်ႇၼႆ ဢေႃႈ။
၈ ၵူၼ်းၸိူဝ်းၼၼ်ႉဢွၼ်ၵၼ်လုၵ်ႉလႄႈၵႂႃႇဢေႃႈ။ယေႃးသုၵေႃႈသင်ႇလၢတ်ႈတီႈၶဝ်ၸိူဝ်းဢၼ်ၵႂႃႇ ႁႂ်ႈလႆႈတႅမ်ႈမၢႆဢဝ်ပုင်ႇမိူင်းၸိူဝ်းၼၼ်ႉလႄႈဝႃႈ၊-သူၵႂႃႇလႄႈ ဢွၼ်ၵၼ်လႄႇ ၵႃႈၼႂ်းဝၢၼ်ႈၼႂ်းမိူင်းသေလႄႈတႅမ်ႈမၢႆဢဝ်သေယဝ်ႉ၊ ၶိုၼ်းမႃးၸူးၵႃႈတီႈၵဝ်တႃႉ။ၵဝ်တၵ်းႁဵတ်းတၢင်းဢၼ်တူၵ်းၸႃႇၵွၵ်ႈပုၼ်ႈသူၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်း ဝဵင်းသိ လေႃႇဢေႃႈ၊ဝႃႈၼင်ႇၼႆသေယဝ်ႉ၊
၉ ၶဝ်ၵႂႃႇလႄႈ ဢွၼ်ၵၼ်လႄႇၵႃႈၼႂ်းဝၢၼ်ႈၼႂ်းမိူင်းသေလႄႈ တႅမ်ႈမၢႆဢဝ်မိူင်းႁဵတ်းၸဵတ်းပွတ်း ၸွမ်းၵႃႈၼင်ႇဢၼ်မီးဝၢၼ်ႈမီးဝဵင်းၼၼ်ႉသႂ်ႇၵႃႈၼႂ်းလိၵ်ႈယဝ်ႉၸင်ႇ ၶိုၼ်းမႃးၸူးၵႃႈတီႈယေႃးသုၵႃႈတီႈတပ်ႉသိလေႃႇၼၼ်ႉဢေႃႈ။
၁၀ ယေႃးသုၵေႃႈႁဵတ်းတၢင်းဢၼ်တူၵ်းၸႃႇၵွၵ်ႈၵႃႈတီႈၽၢႆႇၼႃႈ ထႃႇဝရႃႉၽြႃးၵႃႈၼႂ်း ဝဵင်းသိလေႃႇလႄႈ ယေႃးသုၽႄလိၼ်ၼၼ်ႉပၼ်တီႈၵူၼ်းမဵဝ်းဢိသရေႇလ တင်းလၢႆ ၸွမ်းလူၺ်ႈမဵဝ်းၽႂ်ႇမဵဝ်းမၼ်းၼၼ်ႉဢေႃႈ။
ပုၼ်ႈပိၼ်ႇယႃႇမိၼ်ႇ
၁၁ ႁဵတ်းတၢင်းဢၼ်တူၵ်းၸႃႇၵွၵ်ႈသေလႄႈ ၵူၼ်းမဵဝ်းပိၼ်ႇယႃႇမိၼ်ႇ တင်းလၢႆလႆႈၶၢမ်ႇဢဝ်ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ၼၼ်ႉၸမ်း၊ၼမ်ႉလိၼ်ၶဝ်ၼၼ်ႉတူၵ်းၵႃႈတီႈၵႄႈဝူင်ႈၵၢင်ၵူၼ်းမဵဝ်းယုတ တင်းၵူၼ်း မဵဝ်းယုဝ်းသႅပ်ႉၸိူဝ်းၼၼ်ႉဢေႃႈ။
၁၂ ၶွပ်ႇၼမ်ႉလႅၼ်လိၼ်ၶဝ်ၽၢႆႇတၢင်းႁွင်ႇၼၼ်ႉ ဢွၵ်ႇသေၵႃႈတီႈၼမ်ႉႁွင်ႊယေႃးတၢၼ်ႇ လႄႈလႅၼ်လိၼ်ၼၼ်ႉ ၶိုၼ်ႈၸူးၵႃႈတီႈၼႃႈတၢင်းႁွင်ႇဝဵင်းယေႇရိၶုဝ်း သေယဝ်ႉၶိုၼ်ႈၸွမ်းၵႃႈၼိူဝ်ႁၢၼ်ႉလွႆၽၢႆႇဝၼ်းတူၵ်းလႄႈတီႈသုတ်းတီႈ တိူၵ်ႈမၼ်းၵႃႈတီႈထိူၼ်ႇပေႇသဝၼ်ႇဢေႃႈ။
၁၃ လႅၼ်လိၼ်ၼၼ်ႉ သမ်ႉလုၵ်ႉသေၵႃႈတီႈၼၼ်ႉတႆႇၸွမ်းၵႂႃႇၸူးဝဵင်းလုၸ ၵႃႈႁိမ်းဝဵင်းလုၸ ဢၼ်ဝႃႈဝဵင်းပေႇတလ ၼၼ်ႉၵႃႈတီႈၼႃႈတၢင်းၸၢၼ်းမၼ်းလႄႈ လႅၼ်လိၼ်ၼၼ်ႉ လူင်းထိုင်ႁွတ်ႈၵႃႈတီႈ ဝဵင်းဢတရုတ်ႉဢတ်ႉတႃႇ ၵႃႈႁိမ်းတိၼ်လွႆဢၼ်မီးၽၢႆႇတၢင်းၸၢၼ်း ဝဵင်းပိတ်ႉႁေႃးရုၼ်ႇၵႃႈတႂ်ႈၼၼ်ႉဢေႃႈ။
၁၄ လႅၼ်လိၼ်ၼၼ်ႉ သမ်ႉဢွၵ်ႇသေၵႃႈတီႈလွႆဢၼ်မီႈၵႃႈၽၢႆႇၼႃႈဝဵင်းပိတ်ႉႁေႃးရုၼ်ႇ ၵႃႈတႂ်ႈၼႃႈတၢင်းၸၢၼ်းၼၼ်ႉသေလႄႈ ငိၵ်းလဵပ်ႈၸွမ်းႁိမ်းၼႃႈတၢင်းဝၼ်းတူၵ်းဝၢႆႇၼႃႈၵႂႃႇၸူးၽၢႆႇတၢင်းၸၢၼ်းသေယဝ်ႉ တီႈသုတ်းတီႈတိူၵ်ႈမၼ်းပဵၼ်ၵႃႈတီႈဝဵင်းၵိရယတ်ႉပႃႇလ ဢၼ်ဝႃႈဝဵင်းၵိရယတ်ႉယႃႇရိမ်ႇ ဢၼ်ၵူၼ်းမဵဝ်းယုတယူႇၼၼ်ႉဢေႃႈ။ဢၼ်ၼႆႉၸမ်း၊ပဵၼ်ၶွပ်ႇၼမ်ႉလႅၼ်လိၼ်ၽၢႆႇဝၼ်းတူၵ်းဢေႃႈ။
၁၅ လႅၼ်လိၼ်ၼႃႈတၢင်းၸၢၼ်းဢၼ်လုၵ်ႉသေၵႃႈတီႈလႅၼ်လိၼ်သုတ်း ဝဵင်းၵိရယတ်ႉယႃႇရိမ်ႇ ၵႂႃႇၼၼ်ႉဢွၵ်ႇသေၵႃႈတီႈၽၢႆႇၼႃႈဝၼ်းတူၵ်းၼၼ်ႉလႄႈသုတ်းတိူၵ်ႈၵႃႈတီႈၼမ်ႉဢွၵ်ႇႁူး ၼေႇ ၽ တေႃႇသေယဝ်ႉ၊
၁၆ လႅၼ်လိၼ်ၼၼ်ႉလူင်းၸူးၵႃႈတီႈတိၼ်လွႆသုတ်း ဢၼ်မီးၵႃႈတီႈၽၢႆႇၼႃႈၶူင်ႈႁူၺ်ႈႁိၼ်ႇၼုမ်ႇ ၵႃႈၼႂ်းပၢင်ႇႁူၺ်ႈရေႇၽိမ်ႇၽၢႆႇၼႃႈတၢင်းႁွင်ႇၼၼ်ႉသေလႄႈ သမ်ႉလူင်းၵႂႃႇၵႃႈၼႂ်းပၢင်ႇႁူၺ်ႈႁိၼ်ႇၼုမ်ႇ ၽၢႆႇတၢင်းၸၢၼ်းဝဵင်းယေႇပုသိသေယဝ်ႉသုတ်းတိူၵ်ႈၵႃႈတီႈဝၢၼ်ႈရေႃႇၵေႇလလႄႈ ၵႃႈတီႈ ၽၢႆႇၼႃႈတၢင်းႁွင်ႇၼၼ်ႉ
၁၇ ဢွၵ်ႇၵႂႃႇၸူးၵႃႈတီႈဝၢၼ်ႈဢိၼ်ႇသေႇမိတ်ႉ တင်း ဝၢၼ်ႈၵေႇလိလုတ်ႉ ဢၼ်မီးသိုဝ်ႈၵုင်း ဢတုမ်ႇမိမ်ႇ ၼၼ်ႉသေယဝ်ႉ၊ လူင်းၸူးၵႃႈ တီႈမၢၵ်ႇႁိၼ်ပေႃႇႁၼ်ႇလုၵ်ႈၸၢႆးရုပိၼ်ႇဢေႃႈ။
၁၈ သမ်ႉတႆႇၸွမ်းၵႃႈတီႈႁိမ်းၽၢင်ႇဢၼ်သိုဝ်ႈပၢင်ႇပဵင်း ဢႃႇရၽႃႇ ၽၢႆႇတၢင်းႁွင်ႇမၼ်းၼၼ်ႉသေလႄႈ လူင်းၸူး ၵႃႈၼႂ်းပၢင်ႇပဵင်း ဢႃႇရၽႃႇ ၼၼ်ႉသေယဝ်ႉ၊
၁၉ လႅၼ်လိၼ်ၼၼ်ႉတႆႇၸွမ်းၵႃႈႁိမ်းဝဵင်းပႅတ်ႉႁေႃးၵလ ၽၢႆႇတၢင်းႁွင်ႇမၼ်းလႄႈ သုတ်းတိူၵ်ႈၵႃႈတီႈၵူတ်ႉၼွင်ၼမ်ႉၵိူဝ်ၽၢႆႇတၢင်းႁွင်ႇမၼ်း ၵႃႈတီႈသူပ်းၼမ်ႉႁွင်ႊယေႃးတၢၼ်ႇၼၼ်ႉဢေႃႈ။ဢၼ်ၼႆႉၸမ်းပဵၼ်ၶွပ်ႇၼမ်ႉလႅၼ် လိၼ်ၼႃႈတၢင်းၸၢၼ်းဢေႃႈ။
၂၀ ၼမ်ႉႁွင်ႊယေႃးတၢၼ်ႇပဵၼ်ၶွပ်ႇၼမ်ႉလႅၼ်လိၼ်ၼႃႈဝၼ်းဢွၵ်ႇဢေႃႈ။ဢၼ်ၼႆႉၸမ်းၸွမ်းလူၺ်ႈ လႅၼ်လိၼ်လဵပ်ႈႁွပ်ႈၼၼ်ႉလႄႈပဵၼ်ၼမ်ႉပဵၼ်လိၼ်ဢၼ်ၵူၼ်းမဵဝ်း ပိၼ်ႇယႃႇမိၼ်ႇလႆႈၶၢမ်ႇဢဝ်ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ၼၼ်ႉဢေႃႈ။
၂၁ ဝဵင်းၵူၼ်းမဵဝ်းပိၼ်ႇယႃႇမဵၼ်ႇၸွမ်းလူၺ်ႈမဵဝ်း ပီႈမဵဝ်းၼွင်ႉၶဝ်ၼၼ်ႉၸမ်း၊ပႃးဝဵင်းယေႇရိၶုဝ်း၊
၂၂ ဝဵင်းပိတ်ႉ ႁေႃႇၵလ၊ ဝဵင်းဢေႇမိၵ်ႉၵၸိၵ်ႉ၊ ဝဵင်းပေႇသရႃႇပ၊
၂၃ ဝဵင်း ၸေႇမရိမ်ႇ၊ဝဵင်းပေႇသလ၊ ဝဵင်းဢႃႇဝိမ်၊ဝဵင်းပရ၊ဝဵင်းဢေႃႇၽရႃႇ၊
၂၄ ဝဵင်းၶေႇၽႃႇႁႃႇမေႃႇၼႆႇ၊ဝဵင်းဢေႃႇၽၼိ၊ ဝဵင်းၵႃႇၽဢၼ်ဝႃႈဝဵင်းသိပ်းသွင်ဝဵင်းဢိၵ်ႇတင်း
၂၅ ဝၢၼ်ႈမၼ်းတင်းလၢႆၸိူဝ်းၼၼ်ႉ။ဝဵင်းၵိပွင်ႇ၊ဝဵင်းရႃႇမ၊ဝဵင်းပရေုတ်ႉ၊ဝဵင်းမိၸပႃႇ၊ ဝဵင်းၶေႇၽိ၇၊ဝဵင်းမေႃးၸ၊
၂၆ ဝဵင်းရေႇၵိမ်ႇ၊ဝဵင်းဢီႇရပေႇလ၊ဝဵင်းတႃႇရလ၊ ဝဵင်းၸေႇလႃႇ၊ ဝဵင်းဢေႇလပ်ႉ၊ ဝဵင်းယေႇပုသိ ဢၼ်ဝႃႈ ဝဵင်း ယေႇရုသလႅမ်ႇ၊
၂၇ ဝဵင်းၵိပတ်ႉ၊ ဝဵင်းၵိရယတ်ႉဢၼ်ဝႃႈဝဵင်းသိပ်းသီႇဝဵင်း ဢိၵ်ႇတင်း ဝၢၼ်ႈမၼ်းတင်းလၢႆ ၸိူဝ်းၼၼ်ႉဢေႃႈ။
၂၈ ဢၼ်ၼႆႉၸမ်းပဵၼ်ဢမူၺ်ႇၵူၼ်းမဵဝ်းပိၼ်ႇယႃႇမိၼ်ႇ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ၼၼ်ႉဢေႃႈ။