Chapter
၈
ၶုၼ်လူင်ဢႃႇဢိတူၵ်းသုမ်း
၁ ထႃႇဝရႃႉၽြႃးသမ်ႉမီးဢမိင်ႉတီႈယေႃးသုလႄႈဝႃႈ၊-ယႃႇပေၵူဝ်ပေႁေ။ယႃႇပေၸႂ်လူႉ။ႁွင်ႉဢဝ်ၵူၼ်းသိုၵ်းဢၼ်ပႃးလူၺ်ႈၵၼ်တင်းမႂ်း ၵႃႈမီးတင်းသဵင်ႈတင်းလူင်သေလႄႈ ဢွၼ်ၵၼ်လုၵ်ႉလႄႈၶိုၼ်ႈၵႂႃႇၵႃႈတီႈဝဵင်းဢႃႇဢိတႃႉ။တူၺ်းလူ။ၵဝ်တၵ်းဢဝ်ၶုၼ်လူင်ဢႃႇဢိဢိၵ်ႇတင်း ၵူၼ်းမၼ်းတင်းလၢႆဝဵင်းမၼ်း လိၼ် မၼ်းဢၢပ်ႈပၼ်ၵႃႈတီႈၼႂ်းမိုဝ်းမႂ်းဢေႃႈ။
၂ မႂ်းတၵ်းလႆႈႁဵတ်းတီႈ ဝဵင်းယေႇရိၶုဝ်း တင်းၶုၼ်လူင်မၼ်းၼၼ်ႉဢေႃႈ။သူတၵ်းလႆႈသိမ်းဢဝ်ဢုၵ်ႉၸႃႇဢၼ်ႁိမ်လႆႈဢိၵ်ႇတင်းတရိၵ်ႉသၢၼ်ႇတင်းလၢႆၼၼ်ႉ ပုၼ်ႈသဢေႃႈ။မႂ်းဝႆႉတပ်ႉသိုၵ်းသုမ်ႉထဵင်တီႈၽၢႆႇလင်ဝဵင်းၼၼ်ႉတႃႉ၊ ဝႃႈ ၼင်ႇၼႆသေယဝ်ႉ ယေႃးသု ဢိၵ်ႇတင်းၵူၼ်းသိုၵ်းတင်းသဵင်းတင်းလူင်ဢွၼ်ၵၼ်လုၵ်ႉႁႂ်ႈလႆႈၶိုၼ်ႈၸူးဝဵင်းဢႃႇဢိၼၼ်ႉဢေႃႈ။
၃ ယေႃးသုၼၼ်ႉလိူၵ်ႈၵဵပ်းဢဝ်ၵူၼ်းသိုၵ်းဢၼ်ႁႅင်းယႂ်ႇၼႃႇသၢမ်မိုၼ်ႇသေလႄႈ ပွႆႇၸႂ်ႉၵႂႃၶိင်ႇၵၢင်ၶိုၼ်းလႄႈသင်ႇလၢတ်ႈတီႈၶဝ်လႄႈ ဝႃႈ၊-တူၺ်းလူ။
၄ သူႁဵတ်းတပ်ႉသိုၵ်းမူၵ်းယူႇၵႃႈတီႈၽၢႆႇလင်ဝဵင်းႁႂ်ႈလႆႈတိုၵ်းဝဵင်းၼၼ်ႉတႃႉ။ယႃႇပေၵႂႃႇႁႂ်ႈယၢၼ်ၵၼ်တင်းဝဵင်းၼႃႇလူင်လၢင်။
၅ ၽွမ်ႉၵၼ်မႄးႁႅၼ်းဝႆႉထႃႈတႃႉ။ၵဝ်ဢိၵ်ႇတင်းၵူၼ်းဢၼ်ပႃးတီႈၵဝ်တင်းသဵင်ႈတင်းလူင်ၼၼ်ႉ တၵ်းသုတ်ႉၸပ်းသုတ်ႉၸူးၵႃႈတီႈႁိမ်းဝဵင်းၼၼ်ႉဢေႃႈ။မိူဝ်ႈဢၼ်ၶဝ်မႃးႁႂ်ႈလႆႈတိုၵ်းတေႃးႁဝ်း မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉၸိုင် ႁဝ်းတၵ်းဢွၵ်ႇပၢႆႈၶိုၼ်းသေၵႃႈတီႈၽၢႆႇၼႃႈၶဝ် တေႃႇထိုင်ႁွတ်ႈထၢၼ်ႈပေႃး ႁဝ်းတၵ်းႁႂ်ႈၶဝ်ၽၢတ်ႇယၢၼ်ၵၼ်တင်းဝဵင်း ၵွပ်ႈပိူဝ်ႈဢၼ်ၶဝ်တၵ်းလိုပ်ႈၸွမ်းႁဝ်းၼၼ်ႉဢေႃႈ။
၆ လွင်ႈမၼ်းၸမ်းၶဝ်တၵ်းဝႃႈ၊- ၶဝ်ဢွၵ်ႇပၢႆႈသေၵႃႈတီႈၽၢႆႇၼႃႈႁဝ်း မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉယဝ်ႉ၊ဝႃႈၼင်ႇၼႆဢေႃႈ။ၼင်ႇၼၼ်လႄႈ ႁဝ်းတၵ်းဢွၵ်ႇပၢႆႈသေၵႃႈတီႈၽၢႆႇၼႃႈၶဝ်ၼၼ်ႉ ဢေႃႈ။
၇ မိူဝ်ႈၼၼ်ႉသူတၵ်းလႆႈလုၵ်ႉသေၵႃႈတီႈတပ်ႉသိုၵ်းမူၵ်းၼၼ်ႉလႄႈတိုၵ်းဢဝ်ဝဵင်းၼၼ်ႉဢေႃႈ။လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူ တၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းသူဢေႃႈ။
၈ မိူဝ်ႈဢၼ်တိုၵ်းဢဝ်ဝဵင်းလႄႈ လႆႈယဝ်ႉၼၼ်ႉသူတၵ်းလႆႈဢဝ်ၽႆးတုတ်ႇပႅတ်ႈဝဵင်းၼၼ်ႉဢေႃႈ။သူတၵ်းလႆႈႁဵတ်းၸွမ်း ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။ၼေႈ။ၵဝ်သင်ႇလၢတ်ႈသူဝႆႉယဝ်ႉ၊ဝႃႈၼင်ႇၼႆဢေႃႈ။
၉ ၼင်ႇၼၼ်လႄႈ ယေႃးသု ၸႂ်ႉၶဝ်ၵႂႃႇလႄႈၶဝ်ႈၵေႃႈဢွၼ်ၵၼ်ၵႂႃႇႁႂ်ႈလႆႈႁဵတ်းသိုၵ်းမူၵ်းလႄႈယူႇၵႃႈၼႂ်းဝူင်ႈၵၢင်ဝဵင်းပေႇသလ တင်းဝဵင်း ဢႃႇဢိ ၵႃႈတီႈၽၢႆႇဝၼ်းတူၵ်းဝဵင်းဢႃႇဢိၼၼ်ႉဢေႃႈ။ယေႃးသုၸမ်းယူႇ ၵႃႈၼႂ်းၵူၼ်းတင်းလၢႆယူႇႁႂ်ႈပူၼ်ႉၶိုၼ်းသေဢေႃႈ။
၁၀ ၶိင်ႇၵၢင်ၼႂ်ၸဝ်ႉၸဝ်ႉ ယေႃးသု လုၵ်ႉလႄႈၼပ်ႉဢၢၼ်ႇၵူၼ်းတင်းလၢႆသေယဝ်ႉ ဢွၼ်ၵၼ်ၶီႇၶိုၼ်ႈၵႂႃႇၸူးၵႃႈတီႈၵူၼ်းဝဵင်းဢႃႇဢိတင်းလၢႆ ဢိၵ်ႇလူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်းဢိသရေႇလ ၸိူဝ်းၼၼ်ႉ ဢေႃႈ။
၁၁ ၵူၼ်းသိုၵ်းဢၼ်ပႃးလူၺ်ႈၵၼ်တင်းမၼ်းၵႃႈမီးတင်းသဵင်ႈတင်းလူင်ၼၼ်ႉ ဢွၼ်ၵၼ်ၶိုၼ်ႈလႄႈသုတ်ႉၸပ်းသုတ်ႉၸူးသေယဝ်ႉ ႁွတ်ႈထိုင်ၵႃႈတီႈၽၢႆႇၼႃႈဝဵင်းသေလႄႈ ၶျႃးတပ်ႉယူႇၵႃႈတီႈၽၢႆႇတၢင်းႁွင်ႇဝဵင်းဢႃႇဢိၼၼ်ႉဢေႃႈ။ၼႂ်းဝူင်ႈၵၢင်ၶဝ်တင်းဝဵင်းဢႃႇ ဢိၼၼ်ႉမီးၶူင်ႈႁူၺ်ႈဢၼ်ၼိုင်ႈဢေႃႈ။
၁၂ မၼ်းသမ်ႉဢဝ်ၵူၼ်းႁႃႈႁဵင်သေလႄႈႁဵတ်းသိုၵ်းမူၵ်း ၵႃႈၼႂ်းၵႄႈဝူင်ႈၵၢင်ဝဵင်းပေႇသလတင်းဝဵင်းဢႃႇဢိ ၽၢႆႇဝၼ်းတူၵ်း ဝဵင်းဢႃႇဢိၼၼ်ႉဢေႃႈ။
၁၃ ၼင်ႇၼၼ်လႄႈမိူဝ်ႈဢၼ်ၶဝ်ၶျႃးတီႈယူႇပၼ် တီႈၵူၼ်းတင်းလၢႆဢၼ်ဝႃႈပူဝ်ႇပႃႇဢၼ်မီးၽၢႆႇတင်းႁွင်ႇဝဵင်းဢိၵ်ႇတင်း ၵူၼ်းသိုၵ်းမူၵ်း ဢၼ်မီးၽၢႆႇတၢင်းတူၵ်းဝဵင်းၸိူဝ်းၼၼ်ႉ ယဝ်ႉၼၼ်ႉၸိုင်ၼႂ်းၶိုၼ်းၼၼ်ႉၵမ်းလဵဝ်ယေႃးသု ၵႂႃႇၸူးၵႃႈၼႂ်းၶူင်ႁူၺ်ႈဢေႃႈ။
၁၄ မိူဝ်ႈဢၼ်ၶုၼ်လူင်ဢႃႇဢိ ႁၼ်လွင်ႈတၢင်းၼၼ်ႉၸိုင်ၶဝ်ဢွၼ်ၵၼ်ႁိပ်ႈၼႅတ်ႈလႄႈ လုၵ်ႉၸဝ်ႉၸဝ်ႉသေလႄႈၵူၼ်းၸၢႆးဝဵင်းၼၼ်ႉၸိူဝ်းၼၼ်ႉ ဢၼ်ဝႃႈ ၶုၼ်လူင်ဢိၵ်ႇတင်း ၵူၼ်းမၼ်းတင်းသဵင်ႈတင်းလူင်ၼၼ်ႉၶီႇၵႂႃႇၸူးၵႃႈတီႈဢၼ်ၶဝ်ၶိၼ်းၵၼ်ဝႆႉ ၵႃႈတီႈၽၢႆႇၼႃႈပၢင်ႇပဵင်းဢႃႇရၽ ၼၼ်ႉႁႂ်ႈလႆႈတိုၵ်းၵၼ်တင်းၵူၼ်းမဵဝ်းဢိသရေႇလၸိူဝ်းၼၼ်ႉဢေႃႈ။ၵူၺ်းၵႃႈမၼ်းဢမ်ႇႁူႉလွင်ႈဢၼ်တပ်ႉသိုၵ်းမူၵ်း မီးၵႃႈတီႈၽၢႆႇလင်ဝဵင်း ၼၼ်ႉ။
၁၅ ယေႃးသုဢိၵ်ႇတင်းၵူၼ်းမဵဝ်းဢိသရေႇလတင်းသဵင်းတင်းလူင်ၼၼ်ႉ ႁဵတ်းၸိူဝ်ႉၼင်ႇႁၢင်ႊသုမ်းသေလႄႈဢွၼ်ၵၼ်ဢွၵ်ႇပၢႆႈၸွမ်းသဵၼ်ႈတၢင်းထိူၼ်ႇ ဢေႃႈ။
၁၆ ၵူၼ်းၸၢႆး ၵႃႈဢၼ်မီးၵႃႈၼႂ်းဝဵင်းၼၼ်ႉလႆႈၶၢမ်ႇတင်းဢၼ်ႁွင်ႉဢဝ် ႁႂ်ႈလႆႈလိုပ်ႈၸွမ်းလမ်းၸွမ်းၶဝ်ၼၼ်ႉလႄႈၶဝ်ဢွၼ်ၵၼ်လိုပ်ႈၸွမ်းလမ်းၸွမ်းယေႃးသုလႄႈ မီးတၢင်းဢၼ်ၽၢတ်ႇယၢၼ်ၵၼ်တင်းဝဵင်းၵႂႃႇဢေႃႈ။
၁၇ ၵူၼ်းၸၢႆးၼႂ်းဝဵင်းဢႃႇဢိတင်းဝဵင်းပေႇသလ ဢၼ်ယင်းဢမ်ႇလိုပ်ႈၸွမ်းလမ်းၸွမ်းၵူၼ်းမဵဝ်းဢိသရေႇလ ၸိူဝ်းၼၼ်ႉလႄႈယူႇၼၼ်ႉဢမ်ႇမီးသေၵေႃႉသေၵူၼ်း။ၶဝ်ပွႆႇဝဵင်းပဝ်ႇဝဵင်းၵူင်ဝႆႉယူႇသေလႄႈ ဢွၼ်ၵၼ်လိုပ်ႈၸွမ်းလမ်းၸွမ်းၵူၼ်းမဵဝ်းဢိသ ရေႇလၸိူဝ်းၼၼ်ႉဢေႃႈ။
၁၈ ထႃႇဝရႃႉၽြႃးၵေႃႈမီးဢမိင်ႉတီႈယေႃးသုလႄႈဝႃႈ၊- ဢဝ်ႁွၵ်ႇဢၼ်မႂ်းယိပ်းၵမ်ၼၼ်ႉယိူင်းငႃသႂ်ႇၵႃႈတီႈဝဵင်းဢႃႇဢိတႃႉ။ၵဝ်တၵ်းဢဝ်ဝဵင်းၼၼ်ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ၊ ဝႃႈၼင်ႇၼႆလႄႈ ယေႃးသုၵေႃႈဢဝ်ႁွၵ်ႇဢၼ်မၼ်းယိပ်း ၵမ်ၼၼ်ႉယိူင်းငႃသႂ်ႇၵႃႈတီႈဝဵင်းၼၼ်ႉဢေႃႈ။
၁၉ ၵူၼ်းသိုၵ်းမူၵ်ၸိူဝ်းၼၼ်ႉ လုၵ်ႉသေတီႈယူႇၶဝ်ၼၼ်ႉၵမ်းလဵဝ်လႅၼ်ႈ ၵႂႃႇၼႂ်းမိူင်းဢၼ်မၼ်းယိုၼ်ႈမိုဝ်းမၼ်းၼၼ်ႉလႄႈ ၶဝ်ႁွတ်ႈၶဝ်ႈထိုင်မႅၼ်ႈၵႃႈၼႂ်းဝဵင်းသေယဝ်ႉသိမ်းဢဝ်ဝဵင်းၼၼ်ႉလႄႈ ႁိပ်ႈၼႅတ်ႈဢဝ်ၽႆးတုတ်ႇပႅတ်ႈဢေႃႈ။
၂၀ မိူဝ်ႈဢၼ်ၵူၼ်းဝဵင်းဢႃႇဢိၸိူဝ်းၼၼ်ႉတူၺ်းၶိုၼ်းလႄႈ ႁၼ်ၵွၼ်းၽႆးဢၼ်မႆႈဝဵင်းၼၼ်ႉၶိုၼ်ႈၵႃႈၼိူဝ်ၾႃႉၵၢင်ႁၢဝ်ယူႇၼၼ်ႉၸိုင် ၶဝ်ဢမ်ႇၸၢင်ႊႁဵတ်းၸိူဝ်ႉၼင်ႇႁိုဝ်ႁႂ်ႈလႆႈပၢႆႈၵႂႃႇၸူးၵႃႈတီႈသေတီႈသေတၢင်းၼၼ်ႉ။ၶဝ်ၸိူဝ်းဢၼ်ဢွၵ်ႇပၢႆႈၵႂႃႇၸူးၵႃႈတီႈထိူၼ်ႇၼၼ်ႉၵေႃႈ ဢွၼ်ၵၼ်ဝၢႆႇၶိုၼ်းလႄႈတိုၵ်းတေႃးၶဝ်ၸိူဝ်းဢၼ် လိုပ်ႈၸွမ်းလမ်းၸွမ်းၶဝ်ၼၼ်ႉဢေႃႈ။
၂၁ ယေႃးသုဢိၵ်ႇတင်းၵူၼ်းမဵဝ်းဢိသရေႇလ တင်းသဵင်ႈတင်းလူင်ၸိူဝ်းၼၼ်ႉ ႁၼ်လွင်ႈဢၼ်ၵူၼ်းတပ်ႉသိုၵ်းမူၵ်းၸိူဝ်းၼၼ်ႉ လႆႈဝဵင်းလႄႈၵွၼ်းၽႆးဢွၵ်ႇယူႇၵႃႈတီႈဝဵင်းၼၼ်ႉသေယဝ်ႉ သမ်ႉဢွၼ်ၵၼ်ဝၢႆႇၶိုၼ်းလႄႈတိုၵ်းတေႃးဢဝ်တၢႆၵူၼ်းဢႃႇဢိ ၸိူဝ်းၼၼ်ႉဢေႃႈ။
၂၂ ၵူၼ်းၽၢႆႇၶဝ် သမ်ႉဢွၵ်ႇသေၵႃႈၼႂ်းဝဵင်းမႃးတိုၵ်းတေႃးၶဝ်ၼၼ်ႉလႄႈ ၶဝ်ၼၼ်ႉမီးၵႃႈၼႂ်းၵႄႈဝူင်ႈၵၢင်ၵူၼ်းမဵဝ်းဢိသရေႇလတင်းလၢႆၸိူဝ်ႉၼင်ႇၼၼ် ၵမ်ႈၽွင်ႈၽၢႆႇၼိုင်ႈ ၵမ်ႈၽွင်ႈၽၢႆႇၼိုင်ႈလႄႈၶဝ်တိုၵ်းတေႃးယႃႉပႅတ်ႈၶဝ်ထၢၼ်ႈပေႃး ၶဝ်ဢမ်ႇပၼ်ႁႂ်ႈၶဝ်လွတ်ႈ ဢမ်ႇပၼ်ၶဝ်ၵိုတ်းသေၵေႃႉသေၵူၼ်းဢေႃႈ။
၂၃ ၶဝ်တီႉလႆႈတူဝ်လိပ်းၶုၼ်လူင်ဢႃႇဢိ လႄႈဢွၼ်ၵၼ်ဢဝ်မႃး ၸူးၵႃႈတီႈယေႃးသုဢေႃႈ။
၂၄ ၵူၼ်းမဵဝ်းဢိသရေႇလၸိူဝ်းၼၼ်ႉ ဢဝ်ၵူၼ်းဝဵင်းဢႃႇဢိတင်းသဵင်ႈတင်းလူင်တၢႆၵႃႈတီႈပၢင်ႇပဵင်းဢၼ်ဝႃႈထိူၼ်ႇတီႈဢၼ်ၶဝ်လိုပ်ႈၸွမ်းလမ်းၸွမ်းၼၼ်ႉယဝ်ႉတူဝ်ႈယဝ်ႉလႄႈ ၶဝ်ၵႃႈမီးၼၼ်ႉ လူမ်ႉတၢႆလူၺ်ႈၶူမ်းလၢပ်ႇၶူမ်းလႅဝ်းထၢၼ်ႈပေႃး ႁွတ်ႈထိုင်တၢင်းဢၼ်လူႉလႅဝ်ပႅတ်ႈၼၼ်ႉသေယဝ်ႉ ၵူၼ်းမဵဝ်းဢိသရေႇလတင်းသဵင်ႈတင်းလူင်သမ်ႉၶိုၼ်းမႃးၵႃႈတီႈဝဵင်းဢႃႇဢိလႄႈ ယႃႉပႅတ်ႈၽဵဝ်ႈပႅတ်ႈ ၶဝ်လူၺ်ႈၶူမ်းလၢပ်ႇၶူမ်းလႅဝ်းဢေႃႈ။
၂၅ ၶဝ်ၸိူဝ်းဢၼ်လူမ်ႉတၢႆၼႂ်းဝၼ်းၼၼ်ႉ ၸဵမ်ယိင်းၸဵမ်ၸၢႆးဢၼ်ဝႃႈၵူၼ်းၼႂ်းဝဵင်းဢႃႇဢိ ၵႃႈမီးတင်းသဵင်ႈတင်းလူင်မီး သမေိုၼ်ႇပၢႆသွင်ႁဵင်ၼိုင်ႈဢေႃႈ။
၂၆ ယေႃးသုဢမ်ႇယူၵ်ႉဢမ်ႇသိမ်းဢဝ်မိုဝ်းမၼ်း ဢၼ်ဢဝ်ႁွၵ်ႇယိင်းငႃယူႇၼၼ်ႉ တေႃႇထိုင်ႁွတ်ႈထၢၼ်ႈပေႃး မၼ်းယႃႉပႅတ်ႈၵူၼ်းဝဵင်းဢႃႇဢိ ၵႃႈမီးတင်းသဵင်ႈတင်းမူတ်းၼၼ်ႉ ဢေႃႈ။
၂၇ ၵူၺ်းၵႃႈတရိၵ်ႉသၢၼ်ႇဢိၵ်ႇတင်းဢုၵ်ႉၸႃႇဝဵင်းၼၼ်ႉဢၼ်ႁိမ်လႆႈၼၼ်ႉၵူၺ်း ၵူၼ်းမဵဝ်းဢိသရေႇလတင်းလၢႆသိမ်းဢဝ်ႁႂ်ႈပဵၼ်ဢုၵ်ႉၸႃႇဢၼ်ႁိမ်ဢဝ်ပုၼ်ႈတူဝ်ၸဝ်ႈၵဝ်ႇ ၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈယေႃးသုၼၼ်ႉဢေႃႈ။
၂၈ ယေႃးသ ၵေႃႈဢဝ်ၽႆးတုတ်ႇဝဵင်းဢႃႇဢိလႄႈႁႂ်ႈပဵၼ်ပူမ်လိၼ်ၵွင်လိၼ်ယူႇတႃႇသေဢၼ်ဝႃႈ တီႈဢၼ်ယႃႉၽဵဝ်ႈပႅတ်ႈ တေႃႇထိုင်ႁွတ်ႈ ဝၼ်းမိူဝ်ႈၼႆႉၼၼ်ႉ ဢေႃႈ။
၂၉ မၼ်းဢဝ်ၶုၼ်လူင်ဢႃႇဢိႁွႆႈဝႆႉၵႃႈတီႈတူၼ်ႈမႆႉတေႃႇထိုင်ႁွတ်ႈၶိင်ႇႁူဝ်ၶမ်ႈလႄႈ မိူဝ်ႈဢၼ်ဝၼ်းၶမ်ၼၼ်ႉၸိုင် ယေႃးသု မီးဢမိင်ႉလႄႈ ၶဝ်ဢဝ်တူဝ်တၢႆမၼ်းၶျႃးတူၵ်းသေၵႃႈတီႈတူၼ်ႈမႆႉသေယဝ်ႉ ဢဝ်ပႅတ်ႈဝႆႉၵႃႈတီႈႁူးၽၵ်းတူဝဵင်းၼၼ်ႉသေလႄႈ ဢဝ်မၢၵ်ႇႁိၼ်ၵွင်သႂ်ႇၵႃႈၼိူဝ်မၼ်း ၵွင်ယႂ်ႇၼႃႇလူင်လၢင် မီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
ပတိၺိၼ်ႇၸဝ်ႈၼိူဝ်လွႆဢေႇပလ
၃၀ မိူဝ်ႈၼၼ်ႉ ယေႃးသုတေႁဵတ်းယိတ်ႉပလၢင်ႇပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈ ၵူၼ်းမဵဝ်းဢိသရေႇလတင်းလၢႆၵႃႈၼိူဝ်လွႆဢေႇပလ ၸွမ်းၵႃႈၼင်ႇဢၼ်မုဝ်းသေႇ၊ ၶႃႈထႃႇဝရႃႉၽြႃးသင်ႇလၢတ်ႈဝႆႉတီႈၵူၼ်း
၃၁ မဵဝ်းဢိသရေႇလ တင်းလၢႆလႄႈမႅၼ်ႈၵႃႈၼင်ႇဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းပိင်းၺၢပ်ႈတိမုဝ်းသေႇ ဢၼ်ဝႃႈယိတ်ႉပလၢင်ႇဢၼ်ဢဝ်မၢၵ်ႇႁိၼ်ဢၼ်ဢမ်ႇထၢၵ်ႇဢမ်ႇမေးၸိူဝ်းၼၼ်ႉႁဵတ်း၊ ႁႂ်ႈၵူၼ်းယင်းဢမ်ႇဢဝ်ၶိူင်ႈလဵၵ်းယုၵ်ႉသႂ်ႇၵႃႈၼိူဝ်မၼ်း၊ ဝႃႈၼင်ႇၼႆလႄႈဢွၼ်ၵၼ်သၢၵ်ႈၵၢပ်ႈယိၸ်ႉ ဢၼ်တုတ်ႇၽႆးပုၼ်ႈထႃႇဝရႃႉၽြႃးလႄႈ ပုၵ်ႉၸေႃႇယိၸ်ႉမိၵ်ႉသႁႃႇယႃႉၵႃႈၼိူဝ်ၼၼ်ႉဢေႃႈ။
၃၂ မၼ်းၵူးတႅမ်ႈပိင်းၺၢပ်ႈတြႃးမုဝ်းသေႇ ဢၼ်မုဝ်းသေႇတႅမ်ႈဝႆႉၼၼ်ႉသႂ်ႇၵႃႈၼိူဝ်မၢၵ်ႇႁိၼ်ၸိူဝ်းၼၼ်ႉ ၵႃႈတီႈသိုဝ်ႈၼႃႈတႂ်ႈတႃ ၵူၼ်းမဵဝ်းဢိသရေႇလ တင်းလၢႆ ဢေႃႈ။
၃၃ ၵူၼ်းမဵဝ်းဢိသရေႇလတင်းသဵင်ႈတင်းလူင်ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်၊ ၶုၼ်ပူဝ်ႇၶဝ်၊ ၵူၼ်းဢၼ်ၸီႇယၢင်ႇတြႃးၶဝ်ဢၼ်ဝႃႈ ၵူၼ်းမဵဝ်းၶဝ်ၸႅတ်ႈၸႅတ်ႈဢိၵ်ႇတင်း ၵူၼ်းတၢင်ႇဝၢၼ်ႈတၢင်ႇမိူင်းၸိူဝ်းၼၼ်ႉ ဢွၼ်ၵၼ်ၸုၵ်းယူႇၵႃႈတီႈသွင်ၽၢႆႇတိူၵ်ႈတႃႇၸဝ်ႈ ၵႃႈတီႈၽၢႆႇၼႃႈယိၸ်ႉပရေႃးႁိၵ်ႉၵူၼ်းမဵဝ်းလေႇဝိ ဢၼ်ႁၢပ်ႇတိူၵ်ႈတႃႇပတိၺိၼ်ႇထႃႇဝရႃႉၽြႃးၸိူဝ်းၼၼ်ႉၵႃႈတီႈၽၢႆႇၼႃႈလွႆၵေႇလၸိမ်ႇ ၵူၼ်းၶိုင်ႈၼိုင်ႈၵႃႈတီႈၽၢႆႇၼႃႈလွႆဢေႇပလ ၵူၼ်းၶိုင်ႈၼိုင်ႈၸွမ်းၵႃႈၼင်ႇဢၼ်မုဝ်းသေႇ၊ၶႃႈထႃႇဝရႃႉၽြႃး၊ သင်ႇလၢတ်ႈဝႆႉ လွင်ႈဢၼ်ၶဝ်တၵ်းလႆႈပၼ်တၢင်းလီတီႈၵူၼ်းမဵဝ်းဢိသရေႇလ တင်းလၢႆမိူဝ်ႈဢွၼ်တၢင်းၼၼ်ႉသေယဝ်ႉ
၃၄ မၼ်းၽတ်းႁေႃးၵႂၢမ်းတြႃး ၵႃႈမီးဢၼ်ဝႃႈတၢင်းလီမၢင်ႇၵလႃႇဢိၵ်ႇတင်းတၢင်းဢၼ်ၵိၼ်ႇဢၼ်ဝႃႈဢႃႉမၢင်ႇၵလႃႇ ၸွမ်းၵႃႈဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းပိင်းၺၢပ်ႈတိၼၼ်ႉဢေႃႈ။
၃၅ ၼႂ်းၵႂၢမ်းဢၼ် မုဝ်းသေႇ သင်ႇလၢတ်ႈဝႆႉၼၼ်ႉၵႂၢမ်းဢၼ် ယေႃးသု ဢမ်ႇၽတ်းဢမ်ႇႁေႃးၵႃႈတီႈၽၢႆႇၼႃႈပရိၵ်ႈသၢတ်ႈၵူၼ်းမဵဝ်းဢိသရေႇလ တင်းသဵင်ႈတင်းလူင်ဢိၵ်ႇတင်း ၵူၼ်းယိင်း၊လုၵ်ႈဢွၼ်ႇ၊ၵူၼ်းတင်းဝၢၼ်ႈတင်းမိူင်းဢၼ်မီးယူႇၵႃႈတီႈၶဝ်ၸိူဝ်းၼၼ်ႉဢမ်ႇမီးသေၶေႃႈသေၵမ်း။