Chapter
၁
ၽြႃးပဵၼ်ၸဝ်ႈပၼ်ဢမိင်ႉတီႈယေႃးသု
၁ လိုၼ်းသေမုဝ်းသေႇ ၶႃႈထႃႇဝရႃႉၽြႃးႁွတ်ႈဢၼိၵ်ႉၸႃႉယဝ်ႉၼၼ်ႉ ထႃႇဝရႃႉၽြႃးမီးဢမိင်ႉတီႈယေႃးသုလုၵ်ႈၸၢႆးၼုၼ်ႇ ဢၼ်ပဵၼ်ၵူၼ်းႁူမ်ႈၵူၼ်းပွင်းမုဝ်း သေႇၼၼ်ႉလႄႈဝႃႈ၊-
၂ ၶႃႈၵဝ်မုဝ်းသေႇႁွတ်ႈဢၼိၵ်ႉၸႃႉယဝ်ႉ။ပိူဝ်ႈၼႆလႄႈမႂ်းဢိၵ်ႇတင်းၵူၼ်းတင်းသဵင်ႈတင်းလူင်ၸိူဝ်းၼႆႉတေႃႇလဵဝ်ဢွၼ်ၵၼ်လုၵ်ႉလႄႈ ၶၢမ်ႈၼမ်ႉႁွင်ႊယေႃႇတၢၼ်ႇ ၵႂႃႇၵႃႈတီႈမိူင်းဢၼ်ၵဝ်တၵ်းပၼ် တီႈၵူၼ်းမဵဝ်းဢိသရေႇလတင်းလၢႆၼၼ်ႉတႃႉ။
၃ လိၼ်ၵႃႈဢၼ်ၽႃႇတိၼ်သူလႆႈယဵပ်ႇၼၼ်ႉ ၵဝ်တၵ်းပၼ်တီႈသူ ၸွမ်းၵႃႈၼင်ႇဢၼ်ၵဝ်ဝႆႉၵတိတီႈ မုဝ်းသေႇ ၼၼ်ႉဢေႃႈ။
၄ ဢဝ်ၵႃႈတီႈထိူၼ်ႇလူင်ဢိၵ်ႇတင်းလွႆလေႇပၼုၼ်ႇၼၼ်ႉတေႃႇထိုင်ႁွတ်ႈၼမ်ႉႁွင်ႊလူင်ဢုၽရတ်ႉ ၵႃႈပဵၼ်မိူင်းႁိတ်ႉတိတင်းသဵင်ႈတင်းမူတ်းတေႃႇထိုင်ႁွတ်ႈ ပၢင်ႇလၢႆႇလူင်ၽၢႆႇၵၢင်ဝၼ်းတူၵ်း ၼၼ်ႉတၵ်းလႆႈပဵၼ်ၼမ်ႉသူလိၼ်သူဢေႃႈ။
၅ ၼႂ်းၸူဝ်ႈဢသၢၵ်ႈမႂ်းၼႆႉ ၽူႈ လႂ်ဢမ်ႇၸုၵ်းဢမ်ႇၶၢမ်ႇယူႇလႆႈၵႃႈတီႈၽၢႆႇၼႃႈမႂ်းသေၵေႃႉသေၵူၼ်း။ၵဝ်တၵ်းမီးယူႇလူၺ်ႈၵၼ်တင်းမႂ်း မိူၼ်ၸိူဝ်ႉၼင်ႇဢၼ်ၵဝ်မီးလူၺ်ႈၵၼ်တင်းမုဝ်းသေႇၼၼ်ႉဢေႃႈ။ၵဝ်တၵ်းဢမ်ႇၸုၼ်ႉ ပႅတ်ႈမႂ်း။
၆ ၵဝ်တၵ်းဢမ်ႇပႅတ်ႈမႂ်းဝႆႉ။ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။မႂ်းတၵ်းလႆႈႁဵတ်းႁႂ်ႈၵူၼ်းတင်းလၢႆလႆႈၶၢမ်ႇဢမူၺ်ႇ မိူင်းဢၼ်ၵဝ်တိူင်ႇဝႃႈဝႆႉတီႈ ပူႇမွၼ်ၶဝ်ဢၼ်ၵဝ်တၵ်းပၼ်တီႈၶဝ်ၼၼ်ႉဢေႃႈ။
၇ ဢဝ်ႁႅင်းလႄႈ မီးတၢင်းဢၼ်ႁတ်းႁၢၼ်ၼႃႇလူင်လၢင်ပႂ်ႉၸွမ်းႁႂ်ႈလႆႈၵမ်ၵျၢင်ႉၸွမ်း ၵႃႈၼင်ႇတြႃးဢၼ်ၶႃႈၵဝ်မုဝ်းသေႇသင်ႇလၢတ်ႈဝႆႉၼၼ်ႉတႃႉ။လွင်ႈၼင်ႇႁိုဝ်မႂ်းတၵ်းပေႉၼႅင်ႇတီႈၵႃႈဢၼ်မႂ်းၵႂႃႇမႂ်းပႆၼၼ်ႉၸိုင် ယႃႇ ပေဝေႈပိူင်ႈတြႃးၵႂႃႇၽၢႆႇၶႂႃႇၽၢႆႇသၢႆႉ။
၈ လွင်ႈၼင်ႇႁိုဝ်မႂ်းတၵ်းလႆႈ ပႂ်ႉၸွမ်းႁႂ်ႈလႆႈၵမ်ၵျၢင်ႉၵႃႈဢၼ်တႅမ်ႈဝႆႉၵႃႈၼႂ်းၵျၢမ်းပိင်းၺၢပ်ႈတိၼႆႉၸိုင် ၵျၢမ်းလိၵ်ႈၼႆႉ ဢမ်ႇလႆႈၽၢတ်ႇသေယၢၼ်သေသူပ်းမႂ်း။မႂ်းတၵ်းလႆႈၶႂ်ႈၸႂ်ဝူၼ်ႉၸႂ်လူၺ်ႈမၼ်းယူႇ ၵူႈဝၼ်းၵူႈၶိုၼ်းဢမ်ႇထၢတ်ႇဢေႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင် တၢင်းၵျၢမ်ႇတၢင်းပွင်မႂ်း တၵ်းပဵၼ်လႄႈတၵ်းပေႉၼႅင်ႇဢေႃႈ။
၉ ၵဝ်သင်ႇလၢတ်ႈတီႈမႂ်းဝႆႉယဝ်ႉဢမ်ႇၸႂ်ႈႁိုဝ်။ဢဝ်ႁႅင်ႈလႄႈမီးတၢင်းဢၼ်ႁတ်းႁၢၼ်တႃႉ။ယႃႇပေၵူဝ်ပေႁႄ။ယႃႇပေၸႂ်လူႉ။ထႃႇဝရႃႉၽြႃးၽြႃးပဵၼ်ၸဝ်ႈမႂ်း မီးယူႇလူၺ်ႈၵၼ်တင်းမႂ်း ၵႃႈတီႈၵႃႈဢၼ်မႂ်းၵႂႃႇမႂ်းပႆၸိူဝ်းၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။
၁၀ မိူဝ်ႈၼၼ်ႉ ယေႃးသုႁွင်ႉဢဝ်ၶဝ်ၸိူဝ်းဢၼ်ပဵၼ်ၶုၼ်ပူဝ်ႇတင်းလၢႆၸိူဝ်းၼၼ်ႉသေလႄႈ သင်ႇလၢတ်ႈဝႃႈ၊-ဢွၼ်ၵၼ်လႄႇၵႂႃႇၼႂ်းတပ်ႉတင်းသဵင်ႈတင်းမူတ်းလႄႈသင်ႇလၢတ်ႈဝႆႉတီႈၵူၼ်းတင်းလၢႆလႄႈဝႃႈ၊-
၁၁ ဢွၼ်ၵၼ်မေးႁႅၼ်း တၢင်းၵိၼ်တၢင်းၶူပ်းဝႆႉၵွပ်ႈပိူဝ်ႈဢၼ် သူတၵ်းလႆႈၶၢမ်ႈ ၼမ်ႉႁွင်ႊယေႃးတၢၼ်ႇၼႂ်းသၢမ်ဝၼ်း ႁႂ်ႈလႆႈၶဝ်ႈၸၢမ်ႇၸႃးမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူ တၵ်းပၼ်သူပိူင်ႇၼၼ်ႉတႃႉ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၂ ယေႃးသု ႁွင်ႉဢဝ်ၵူၼ်းမဵဝ်းရူႇပိၼ်ႇ၊ ၵူၼ်းမဵဝ်းၵတ်ႉ၊ၵူၼ်းမဵဝ်းမၼႃႇသေႇ ၶိုင်ႈၼိုင်ႈၸိူဝ်းၼၼ်ႉသေလႄႈလၢတ်ႈဝႃႈ၊-သူဢွၼ်ၵၼ်ၶုၵ်းၸႂ်လႆႈၶႂ်ႈၸႂ်ထူပ်းၵႂၢမ်းဢၼ်မုဝ်းသေႇ ၶႃႈထႃႇဝရႃႉၽြႃးသင်ႇလၢတ်ႈဝႆႉတီႈသူဝႃႈ၊-
၁၃ ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်ၵတ်းယဵၼ်ၶျၢမ်းသႃႇတီႈသူလႄႈ ၶျႃးတီႈယူႇပၼ်သူ ၵႃႈတီႈမိူင်းၼႆႉဢေႃႈ။
၁၄ မေးသူလုၵ်ႈသူဢိၵ်ႇတင်းတရိၵ်ႈသၢၼ်ႇသူ တၵ်းလႆႈၵိုတ်းသဝ်းယူႇၵႃႈတီႈမိူင်းဢၼ်မုဝ်းသေႇပၼ်ဝႆႉ ၽၢႆႇတင်းဢွၵ်ႇၼမ်ႉႁွင်ႊယေႃးတၢၼ်ႇၼၼ်ႉဢေႃႈ။ၵူၼ်းသိုၵ်းဢၼ်ႁႅင်းယႂ်ႇၵႃႈၼႂ်းသူတင်းသဵင်ႈတင်းလူင်တၵ်းလႆႈယိပ်းၵမ်လၢၵ်ႈၼၢၵ်ႈသေလႄႈဢွၼ်ႁူဝ်ပီႈၼွင်ႉသူၶၢမ်ႈၵႂႃႇလႄႈ မႃႉၸႃႉၶဝ်၁၅
၁၅ တေႃႇထိုင်ႁွတ်ႈထႃႇဝရႃႉၽြႃး ပၼ်ၵတ်းယဵၼ်ၶျၢမ်းသႃႇတီႈပီႈၼွင်ႉသူမိူၼ်ၸိူဝ်ႉၼင်ႇဢၼ်ပၼ်တီႈသူၼၼ်ႉလႄႈ ၶဝ်လႆႈသိမ်းလႆႈဢဝ်မိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်ၼၼ်ႉတႃႉ။လိုၼ်းၼၼ်ႉသူၸင်ႇ တၵ်းလႆႈၶိုၼ်းမႃးၶဝ်ႈၸၢမ်ႇၸႃးမိူင်းဢၼ်သူပိူင်ႇဢၼ်မုဝ်းသေႇ ၶႃႈထႃႇဝရႃႉၽြႃးပၼ်ၵႃႈတီႈသူၽၢႆႇၼမ်ႉႁွင်ႊယေႃးတၢၼ်ႇၽၢႆႇတၢင်းဢၼ်ၵၢင်ဝၼ်းဢွၵ်ႇၼႆႉဢေႃႈ၊ဝႃႈၼင်ႇၼႆဢေႃႈ။
၁၆ ၶဝ်ၵေႃႈ ဢွၼ်ၵၼ်ၶိုၼ်းလၢတ်ႈတီႈယေႃးသုလႄႈဝႃႈ၊-ႁဝ်းၶႃႈတၵ်းႁဵတ်းၸွမ်းၵႃႈဢၼ်ၸဝ်ႈႁဝ်းသင်ႇလၢတ်ႈဝႆႉၼၼ်ႉၶႃႈဢေႃႈ။ႁဝ်းၶႃႈတၵ်းၵႂႃႇၵႃႈတီႈဢၼ်ၸဝ်ႈႁဝ်းပွႆႇၸႂ်ႉၵႂႃႇၼၼ်ႉၶႃႈဢေႃႈ။
၁၇ ႁဝ်းၶႃႈတၵ်းထွမ်ႇဢဝ်ၵႂၢမ်းၸဝ်ႈႁဝ်း မိူၼ်ၸိူဝ်ႉၼင်ႇဢၼ်ႁဝ်းၶႃႈထွမ်ႇဢဝ်ၵႂၢမ်းမုဝ်းသေႇ ၼႂ်းလွင်ႈတၢင်းၵူႈၸိူဝ်ႉၵူႈပိူင်ႈၼၼ်ႉၶႃႈဢေႃႈ။ပိူဝ်ႈၼႆလႄႈႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈႁဝ်း မီးယူႇလူၺ်ႈၵၼ်တင်းၸဝ်ႈႁဝ်း မိူၼ်ၸိူဝ်ႉၼင်ႇဢၼ်မၼ်းၸဝ်ႈမီးယူႇလူၺ်ႈၵၼ် တင်းမုဝ်းသေႇၼၼ်ႉသေၵမ်းလူၺ်ႈ။
၁၈ ၵေႃႉဢၼ်ပူၼ်ႉလိူဝ်ဢမိင်ႉၸဝ်ႈႁဝ်းလႄႈ ဢမ်ႇထွမ်ႇဢမ်ႇဢဝ်ၵႂၢမ်းၵႃႈဢၼ်ၸဝ်ႈႁဝ်းလၢတ်ႈၸိူဝ်းၼၼ်ႉတၵ်းလႆႈၶၢမ်ႇတၢင်း ဢၼ်ဢဝ်တၢႆဢေႃႈ။ၵူၺ်းၵွမ်ႉဢဝ်ႁႅင်းသေၵမ်းၶႃႈ။မီးတၢင်းဢၼ်ႁတ်းႁၢၼ်သေၵမ်းၶႃႈ၊ဝႃႈၼင်ႇၼႆဢေႃႈ။