Chapter
၁၇
ရူၵ်ႉထူႉမိၶႃႇ
၁ မိူဝ်ႈၼၼ်ႉမီးၵူၼ်းဢေႇၽရိမ်ႇ ၵေႃႉၼိုင်ႈမီးၸိုဝ်ဝႃႈမိၶႃႇဢေႃႈ။
၂ မၼ်းလၢတ်ႈတီႈမေႈမၼ်းလႄႈဝႃႈ၊-ငိုၼ်းႁဵင်ပၢႆပၢၵ်ႇၵျၢပ်ႈ ဢၼ်ႁၢႆၵႂႃႇသေၵႃႈတီႈမေႈႁဝ်းဢၼ်မေႈႁဝ်းၵိၼ်ႇလႃႇၵိၼ်ႇဝႃႈၼၼ်ႉ ပဵၼ်ၵဝ်ၶႃႈဢဝ်မႃးလႄႈမီးဝႆႉတီႈၵဝ်ၶႃႈၶႃႈဢေႃႈ။ၵဝ်ၶႃႈဢဝ်မႅၼ်ႈၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင် မေႈမၼ်းလၢတ်ႈလႄႈဝႃႈ၊-ႁႂ်ႈလုၵ်ႈၸၢႆးၵဝ်လႆႈၶၢမ်ႇတၢင်းလီတီႈထႃႇဝရႃႉၽြႃးသေၵမ်းလူၺ်ႈ၊ ဝႃႈၼင်ႇၼႆဢေႃႈ။
၃ မိူဝ်ႈၼၼ်ႉ မၼ်းဢဝ်ငိုၼ်းႁဵင်ပၢႆပၢၵ်ႇၵျၢပ်ႈၼၼ်ႉၶိုၼ်းပၼ်တီႈမေႈမၼ်းလႄႈ မေႈမၼ်းလၢတ်ႈလႄႈဝႃႈ၊-ၵဝ်တၵ်းဢဝ်ငိုၼ်းၼႆႉ ႁႂ်ႈလႆႈမူတ်းၸၢင်ႇတီႈထႃႇဝရႃႉၽြႃး ပုၼ်ႈလုၵ်ႈၸၢႆးၵဝ်ႁႂ်ႈလႆႈဢဝ်ႁဵတ်းရုၵ်ႉထူႉဢၼ်တွင်ႈႁဵတ်းၶႅၵ်းႁဵတ်းဢိၵ်ႇတင်း ရုၵ်ႉထူႉဢၼ်သွၼ်း ႁဵတ်းလေႃႇႁဵတ်းၼၼ်ႉယဝ်ႉ။
၄ လိုၼ်းၼၼ်ႉၵဝ်တၵ်းၶိုၼ်းပၼ်တီႈမႂ်းဢေႃႈ၊ဝႃႈၼင်ႇၼႆဢေႃႈ။မၼ်းၵေႃႈဢဝ်ငိုၼ်းၼၼ်ႉပၼ်တီႈမေႈမၼ်းဢေႃႈ။မေႈမၼ်းၵေႃႈ ဢဝ်သွင်ပၢၵ်ႇၵျၢပ်ႈဢၢပ်ႈပၼ်တီႈၸၢင်ႊၶမ်းသေယဝ်ႉ မၼ်းႁဵတ်းရုၵ်ႉထူႉဢၼ်တွင်ႈႁဵတ်းၶႅၵ်းႁဵတ်း တင်းရုၵ်ႉထူႉဢၼ်သွၼ်းႁဵတ်း လေႃႇႁဵတ်းၼၼ်ႉသေယဝ်ႉ ဝႆႉယူႇၵႃႈတီႈႁိူၼ်းမိၶႃႇၼၼ်ႉဢေႃႈ။
၅ ၵေႃႉဢၼ်ဝႃႈမိၶႃႇ ၼၼ်ႉမၼ်းမီးၵျွင်းၽြႃးလႄႈမၼ်းႁဵတ်းသိူဝ်ႈသုပ်းၸဝ်ႈဢိၵ်ႇတင်း ရုၵ်ႉထူႉတေႇရၽိမ်ႇသေယဝ်ႉဢဝ်လုၵ်ႈၸၢႆးမၼ်းၵေႃႉၼိုင်ႈ ၶၢၼ်းဝႆႉၵႃႈၼႂ်းဢရႃႇယိတ်ႉ ပရေႃးႁိၵ်ႈဢေႃႈ။
၆ မိူဝ်ႈၶိင်ႇၼၼ်ႉၵူၼ်းဢိသရေႇလၶဝ်ဢမ်ႇပႆႇမီးၶုၼ်ႁေႃၶမ်း။ၵူၼ်းၵူႈၵေႃႉၵူႈၵူၼ်းႁဵတ်းလွင်ႈတၢင်းၵႃဢၼ်ထုၵ်ႇတႃတူဝ်ၸဝ်ႈၵဝ်ႇ ႁင်းၽႂ်ႇႁင်းမၼ်းၼၼ်ႉဢေႃႈ။
၇ မီးၵူၼ်းဢွၼ်ႇၵေႃႉၼိုင်ႈ ဢၼ်ပဵၼ်ၵူၼ်းဝဵင်းပႅတ်ႉလိႁႅမ်ႇၼႂ်းဢိူင်ႇယုတ ဢၼ်ပဵၼ်ၵူၼ်းမဵဝ်းလေႇဝိ ဢၼ်ယူႇၵႃႈၼႂ်းမဵဝ်းၸိူဝ်ႉၶိူဝ်းယုတ ၼၼ်ႉမၼ်းသွၼ်ႈပိုင်ႈ ယူႇၵႃႈၼႂ်းဝဵင်းၼၼ်ႉဢေႃႈ။
၈ မၼ်းလုၵ်ႉသေၵႃႈတီႈဝဵင်းပႅတ်ႉလိႁႅမ်ႇဢိူင်ႇယုတ ၼၼ်ႉဢွၵ်ႇၵႂႃႇ ၼင်ႇႁိုဝ်တေလႆႈသွၼ်ႈပိုင်ႈယူႇတၢင်ႇတီႈတၢင်ႇလႅၼ်ႈ တီႈဢၼ်မၼ်းတထေူပ်းႁၼ်ၼၼ်ႉလႄႈ မၼ်းႁွတ်ႈထိုင်ၵႃႈတီႈႁိူၼ်းမိၶႃႇ လွႆ ဢေႇၽရိမ်ႇၼႂ်းမိူဝ်ႈဢၼ်မၼ်း ယင်းတိုၵ်ႉၵႂႃႇတႃပႆတၢင်းယူႇၼၼ်ႉဢေႃႈ။
၉ မိၶႃႇၼၼ်ႉၵေႃႈထၢမ်ႇတီႈမၼ်းလႄႈဝႃႈ၊-မႂ်းလုၵ်ႉသေၵႃႈတီႈ လႂ်မႃး၊မိူဝ်ႈဢၼ်ဝႃႈၼင်ႇၼႆၸိုင် မၼ်းၵေႃႈၶိုၼ်းလၢတ်ႈလႄႈဝႃႈ၊-ၵဝ်ပဵၼ်ၵူၼ်းမဵဝ်းလေႇဝိၵူၼ်းဝဵင်းပႅတ်ႉလိႁႅမ်ႇၼႂ်းဢိူင်ႇယုတဢေႃႈ။ၵဝ်လႄႇသွၵ်ႈႁႃတီႈဢၼ်ၵဝ်တၵ်းလႆႈသွၼ်ႈပိုင်ႈၼၼ်ႉဢေႃႈ၊ မိူဝ်ႈ ဢၼ်ဝႃႈၼင်ႇၼႆၸိုင်၊ မိၶႃႇလၢတ်ႈတီႈမၼ်းလႄႈဝႃႈ၊-
၁၀ ယူႇလူၺ်ႈၵၼ်တင်းၵဝ်သေၵမ်း။ႁဵတ်းပေႃႈၵဝ်ၶႃႈ၊ႁဵတ်းယိတ်ႉပရေႃးႁိၵ်ႈၵဝ်ၶႃႈသေၵမ်း။ၵဝ်ၶႃႈတၵ်းပၼ်ငိုၼ်းယေႈပီႊသိပ်းၵျၢပ်ႈဢိၵ်ႇတင်း ၶူဝ်းၼုင်ႈၶူဝ်းမႆႊ၊တၢင်းၵိၼ်တၢင်းၶူပ်းၶႃႈဢေႃႈ၊ ဝႃႈၼင်ႇၼႆလႄႈ ၵူၼ်းမဵဝ်းလေႇဝိၼၼ်ႉၵေႃႈယူႇတီႈၼၼ်ႉဢေႃႈ။
၁၁ ၵူၼ်းမဵဝ်းလေႇဝိ ၼၼ်ႉၵေႃႈတမ်းၸႂ်ယူႇလူၺ်ႈၵၼ်တင်းၵေႃႉၼၼ်ႉလႄႈမၢတ်ႈၵူၼ်းလွၼ်ႇၼၼ်ႉ မိူၼ်ၸိူဝ်ႉၼင်ႇလုၵ်ႈၸၢႆးမၼ်းၵေႃႉၼိုင်ႈ ၼႂ်းလုၵ်ႈၸၢႆးမၼ်းတင်းလၢႆၼၼ်ႉဢေႃႈ။
၁၂ မိၶႃႇၼၼ်ႉၵေႃႈဢဝ်ၵူၼ်းမဵဝ်းလေႇဝိၼၼ်ႉၶၢၼ်းဝႆႉ ၼႂ်းဢရႃႇယိတ်ႉပရေႃးႁိၵ်ႈ သေယဝ်ႉၵူၼ်းဢွၼ်ႇၼၼ်ႉ ႁဵတ်းယိတ်ႉပရေႃးႁိၵ်ႈမၼ်းလႄႈ ယူႇၵႃႈတီႈႁိူၼ်းမိၶႃႇၼၼ်ႉဢေႃႈ။
၁၃ မိၶႃႇၼၼ်ႉၵေႃႈလၢတ်ႈဝႃႈ၊-မိူဝ်ႈလဵဝ်ၼႆႉၵဝ်ႁူႉလွင်ႈဢၼ်ထႃႇဝရႃႉၽြႃးတၵ်းႁဵတ်းၵျေးၸူးတီႈၵဝ် ၵွပ်ႈပိူဝ်ႈဢၼ်ၵူၼ်းမဵဝ်းလေႇဝိ ပဵၼ်ယိတ်ႉပရေႃးႁိၵ်ႈၵဝ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။