Chapter
၁၄
သၢမ်ႇသုၼ်ႇတႄႇၼႃႈႁိူၼ်း
၁ ၽဝ်ႇၼိုင်ႈ သၢမ်ႇသုၼ်ႇလူင်းၵႂႃႇၵႃႈတီႈဝဵင်းတိမၼလႄႈႁၼ်မေႈယိင်းၵေႃႉဢၼ်ပဵၼ်မဵဝ်းၽိလိတ်ႉတိ ၵႃႈတီႈဝဵင်းတိမၼ ၼၼ်ႉသေယဝ်ႉ ၶိုၼ်းမႃးၸူးၵႃႈတီႈပေႃႈမေႈမၼ်းလႄႈလၢတ်ႈဝႃႈ၊-
၂ ၵဝ်ၶႃႈႁၼ်မေႈယိင်းၵေႃႉၼိုင်ႈဢၼ်ပဵၼ်မဵဝ်းၽိလိတ်ႉတိ ၵႃႈတီႈဝဵင်းတိမ ၼၼၼ်ႉယဝ်ႉ။
၃ ယွၼ်းဢဝ်ႁႂ်ႈပဵၼ်မေးၵဝ်ၶႃႈသေၵမ်းမိူဝ်ႈဢၼ်ဝႃႈၼင်ႇၼႆၸိုင် ပေႃႈမေႈမၼ်းၵေႃႈတွင်ႉထၢမ်လႄႈဝႃႈ၊-လွင်ႈၼင်ႇႁိုဝ်မႂ်းတၵ်းလႆႈၵႂႃႇဢဝ်မေးၵႃႈၼႂ်းၵူၼ်းမဵဝ်းၽိလိတ်ႉတိ ဢၼ်ဢမ်ႇတွၼ်ႉၶၢမ်ႇတၢင်းဢၼ်ထိူဝ်ႁႅမ်ၸိူဝ်းၼၼ်ႉၸိုင် ၵႃႈၼႂ်းလုၵ်ႈယိင်းပီႈမႂ်းၼွင်ႉမႂ်းဢိၵ်ႇတင်း ၵႃႈၼႂ်းလုၵ်ႈယိင်းမဵဝ်းၸိူဝ်ႉၶိူဝ်းႁဝ်းၼႆႉ ဢမ်ႇမီးမေႈယိင်းသေၵေႃႉယဝ်ႉႁိုဝ်၊ ဝႃႈၼင်ႇၼႆသေၵေႃႈ သၢမ်ႇသုၼ်ႇ လၢတ်ႈတီႈပေႃႈမၼ်းလႄႈဝႃႈ၊-ယွၼ်းဢဝ်မၼ်းပၼ်ၵဝ်ၶႃႈသေၵမ်း။မၼ်းထုၵ်ႇၸႂ်ၵျိူၵ်ႈၸႂ်ၵဝ်ၶႃႈၼႃႇလူင်လၢင်ဢေႃႈ၊ ဝႃႈၼင်ႇၼႆ ဢေႃႈ။
၄ ပေႃႈမေႈမၼ်းဢမ်ႇႁူႉလွင်ႈဢၼ်ဝႃႈပဵၼ်ဢလူဝ်ႇထႃႇဝရႃႉၽြႃး ၼင်ႇႁိုဝ်တေလႆႈႁဵတ်ဢမူႉတေႃႇၵူၼ်းမဵဝ်းၽိလိတ်ႉတိတင်းလၢႆၼၼ်ႉ။မိူဝ်ႈၶိင်ႇၼၼ်ႉၵူၼ်းၽိလိတ်ႉတိ ၶဝ်လႆႈဢုပ်ႉပိူင်ႇၵႃႈၼိူဝ်မဵဝ်းဢိသရေႇလၶဝ်ယူႇဢေႃႈ။
၅ မိူဝ်ႈၼၼ်ႉ သၢမ်ႇသုၼ်ႇဢိၵ်ႇတင်းပေႃႈမေႈမၼ်းၸိူဝ်းၼၼ်ႉလူင်းၸူးၵႃႈတီႈဝဵင်းတိမၼ လႄႈႁွတ်ႈထိုင်ၵႃႈတီႈသူၼ်ဢူးယဵၼ်ႇမၢၵ်ႇၸပိတ်ႉတိမၼ ၸိူဝ်းၼၼ်ႉဢေႃႈ။သၢင်ႇသီႈတူဝ်ၼုမ်ႇတူဝ်ၼိုင်ႈထူပ်းႁၼ်မၼ်းလႄႈႁွင်ႉႁဝ်ႇၶၢင်းၸူးမၼ်းဢေႃႈ။
၆ မိူဝ်ႈၼၼ်ႉဝိၺိၺ်ႇ ထႃႇဝရႃႉၽြႃးႁွတ်ႈထိုင်မႃးၵႃႈၼိူဝ်မၼ်းလႄႈ မၼ်းလႆႈႁႅင်းတၼ်းၶူဝ်းသေယဝ်ႉ ပိၵ်ႉသမ်ႉဢမ်ႇပႃးသေၸိူဝ်ႉသေပိူင် ၵႃႈတီႈမိုဝ်းမၼ်းသေၵေႃႈ မၼ်းတိုတ်ႉသိၵ်ႇသၢင်ႇသီႈၼၼ်ႉၶၢတ်ႇပဵၼ်တွတ်း မိူၼ်ၸိူဝ်ႉၼင်ႇဢၼ်တိုတ်ႉသိၵ်ႇပႄႉဢွၼ်ႇၶၢတ်ႇၼၼ်ႉဢေႃႈ။ၵူၺ်းၵႃႈလွင်ႈတၢင်းၼၼ်ႉ မၼ်းဢမ်ႇမွၵ်ႇလၢတ်ႈတီႈပေႃႈမေႈမၼ်း။
၇ မၼ်းလူင်းၸူးလႄႈ တၵ်ႉလၢတ်ႈၵၼ်တင်းမေႈယိင်းၼၼ်ႉသေယဝ်ႉ မေႈယိင်းၼၼ်ႉၵေႃႈပဵၼ်ဢၼ်ထုၵ်ႇၸႂ်ၵျိူၵ်ႉၸႂ်သၢမ်ႇသုၼ်ႇဢေႃႈ။
၈ ႁိုင်တၢၼ်ႇတၢၼ်ႇယဝ်ႉလႄႈ ၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇႁႂ်ႈလႆႈသိမ်းဢဝ်မေႈယိင်းၼၼ်ႉၸိုင် မၼ်းဝေႈပိူင်ႈဢွၵ်ႇသသေဵၼ်ႈတၢင်းဢၼ်မၼ်းၵႂႃႇၼၼ်ႉ ႁႂ်ႈလႆႈၵႂႃႇလူၵႂႃႇတူၺ်း တူဝ်သၢင်ႇသီႈဢၼ်မၼ်းဢဝ်တၢႆၼၼ်ႉဢေႃႈ။မၼ်းလႆႈႁၼ်ၽိုင်ႈဢိၵ်ႇတင်းၼမ်ႉၽိုင်ႈ ၵႃႈၼႂ်းတူဝ်တၢႆသၢင်ႇသီႈၼၼ်ႉဢေႃႈ။
၉ မၼ်းဢဝ်မိုဝ်းမၼ်းၸူၵ်းၵမ်ဢဝ်ႁူင်းၽိုင်ႈၼမ်ႉၽိုင်လႄႈ ၵိၼ်ၸွမ်းတၢင်းၵႂႃႇဢေႃႈ။မၼ်းႁွတ်ႈထိုင်ၵႃႈတီႈပေႃႈမေႈမၼ်းသေယဝ်ႉဢဝ်ပၼ်တီႈၶဝ်လႄႈ ၶဝ်ၵေႃႈၵိၼ်ဢေႃႈ။ၵူၺ်းၵႃႈ မၼ်းဢမ်ႇမွၵ်ႇလၢတ်ႈတီႈၶဝ် လွင်ႈဢၼ်မၼ်းၸူၵ်းၵမ်ဢဝ်ႁူင်းၽိုင်ႈၼမ်ႉၽိုင်ႈၼၼ်ႉ ၵႃႈၼႂ်း တူဝ်တၢႆသၢင်ႇသီႈၼၼ်ႉ။
၁၀ ပေႃႈမၼ်းၵေႃႈသမ်ႉၶိုၼ်းလူင်းၸူးၵႃႈတီႈမေႈယိင်းၼၼ်ႉထႅင်ႈဢေႃႈ။သၢမ်ႇသုၼ်ႇ ႁဵတ်းပွႆးၸွမ်းၵႃႈၼင်ႇဢၼ်ထုင်းၸၢမ်ႇ ၽူႈမၢဝ်ႇမီးၼၼ်ႉဢေႃႈ။
၁၁ မိူဝ်ႈဢၼ်ၶဝ်ႁၼ်သၢမ်ႇသုၼ်ႇၼၼ်ႉၸိုင် ၶဝ်ႁွင်ႉဢဝ်ၵေႃႉသႄႈသၢမ်ႇသိပ်းၵေႃႉမႃးႁႂ်ႈ လႆႈၶၢမ်ႇပွႆးလူၺ်ႈၵၼ်တင်းမၼ်းဢေႃႈ။
၁၂ သၢမ်ႇသုၼ်ႇၵေႃႈလၢတ်ႈတီႈၶဝ်ၼၼ်ႉလႄႈဝႃႈ၊-ၵဝ်တၵ်းလၢတ်ႈၵႂၢမ်းသိူင်ႇၵႂၢမ်းဢမ်ႈတီႈသူဢေႃႈ။ၼႂ်းၸဵတ်းဝၼ်းပေႃးသူၽုၺ်ႇဢွၵ်ႇလၢတ်ႈၼႄ ၵေႇလိတ်ႉလႆႈၸိုင်ၵဝ်တၵ်းပၼ်သိူဝ်ႈယၢဝ်းသၢမ်ႇသိပ်းၽိုၼ် ဢိၵ်ႇတင်းသိူဝ်ႈဢၼ်တၵ်းပုတ်ႈတၵ်းလၢႆႊ သၢမ်သိပ်းၽိုၼ်တီႈသူ ဢေႃႈ။
၁၃ ပေႃးသူဢမ်ႇၽုၺ်ႇဢွၵ်ႇလၢတ်ႈၼႄၵေႇလိတ်ႉလႆႈၸိုင် သူတၵ်းလႆႈပၼ်သိူဝ်ႈယၢဝ်းသၢမ်သိပ်းၽိုၼ်ဢိၵ်ႇတင်းသိူဝ်ႈဢၼ်တၵ်းပုတ်ႈတၵ်းလၢႆႊ သၢမ်သိပ်းၽိုၼ်တီႈၵဝ်ဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ဢွၼ်ၵၼ်ၶိုၼ်းလၢတ်ႈတီႈမၼ်းလႄႈဝႃႈ၊-မွၵ်လၢတ်ႈၵႂၢမ်းသိူင်ႇၵႂၢမ်းဢမ်ႈမႂ်းႁႂ်ႈႁဝ်းငိၼ်းသေၵမ်း၊ ဝႃႈၼင်ႇၼႆဢေႃႈ။
၁၄ မၼ်းၵေႃႈလၢတ်ႈတီႈၶဝ်လႄႈဝႃႈ၊-ၵႃႈၼႂ်းၵေႃႉဢၼ်ၸၢင်ႈၵိၼ်ၸၢင်ႈၶူပ်းၼၼ်ႉ မီးတၢင်းၵိၼ်တၢင်းၶူပ်းဢေႃ။ၵႃႈၼႂ်းၵေႃႉဢၼ်ၵတ်ႉၶႅၼ်ႇႁႅင်းယႂ်ႇၼၼ်ႉမီးဢၼ်ဝၢၼ်ဢၼ်ၸဵမ်းဢေႃႈ၊ဝႃႈၼင်ႇၼႆဢေႃႈ။ဢၼၢၵ်ႈဢထိၵ်ႉပႄႇၵႂၢမ်းသိူင်ႇၵႂၢမ်းဢမ်ႈၼၼ်ႉၸိုင် ၶဝ်ႁႃဢဝ်သၢမ်ႇဝၼ်းတဵမ်တဵမ်ၵေႃႈဢမ်ႇထူပ်း ဢမ်ႇလႆႈ။
၁၅ ႁွတ်ႈထိုင်ဝၼ်းၸတုၵ်ႉထသေယဝ်ႉၶဝ်ၼၼ်ႉလၢတ်ႈတီႈမေးသၢမ်ႇသုၼ်ႇလႄႈဝႃႈ၊-မႂ်းတၵ်းလႆႈၶျေႃးၽူဝ်မႂ်း ႁႂ်ႈမၼ်းၽုၺ်ႇဢွၵ်ႇလၢတ်ႈၼႄဢၼၢၵ်ႈဢထိၵ်ႉပႄႇၵႂၢမ်းသိူင်ႇၵႂၢမ်းဢမ်ၼၼ်ႉဢေႃႈ။ပေႃးဢမ်ႇၼၼ် ႁဝ်းတၵ်းဢဝ်ၽႆးတုတ်ႇမႂ်းဢိၵ်ႇတင်းပီႈၼွင်ႉၸိူဝ်ႉၶိူဝ်းမႂ်းဢေႃႈ။မႂ်းႁွင်ႉပၢင်းႁဝ်းမႃးႁႂ်ႈလႆႈသိမ်းဢဝ် ဢုၵ်ႉၸႃႇႁဝ်းႁိုဝ်၊ဝႃႈၼင်ႇၼႆဢေႃႈ။
၁၆ မေးသၢမ်ႇသုၼ်ႇၵေႃႈ ႁႆႈႁွင်ႉၵႃႈတီႈၽၢႆႇၼႃႈမၼ်းသေလႄႈလၢတ်ႈဝႃႈ၊- ၸဝ်ႈၸင်းၵဝ်ၶႃႈဢေႃႈ။ၸဝ်ႈဢမ်ႇႁၵ်ႉၵဝ်ၶႃႈ။ၸဝ်ႈလၢတ်ႈၵႂၢမ်းသိူင်ႇၵႂၢမ်းဢမ်ႈတီႈပီႈၼွင်ႉၸိူဝ်ႉၶိူဝ်းၵဝ်ၶႃႈလႄႈ ၸဝ်ႈယင်းဢမ်ႇၽုၺ်ႇဢွၵ်ႇလၢတ်ႈၼႄဢထိၵ်ႉပႄႇမၼ်းတီႈၵဝ်ၶႃႈလူင်ပေ၊ ဝႃႈၼင်ႇၼႆဢေႃႈ။မၼ်းၵေႃႈလၢတ်ႈတီႈမၼ်းၼၼ်ႉလႄႈဝႃႈ၊-တေႃႈၵႃႈတီႈပေႃႈမေႈၵဝ်ၼၼ်ႉ ၵဝ်ယင်းဢမ်ႇလၢတ်ႈၼႄ။ၵဝ်တၵ်းလႆႈလၢတ်ႈၼႄတီႈမႂ်းႁိုဝ်၊ဝႃႈၼင်ႇၼႆဢေႃႈ။
၁၇ မၼ်းႁႆႈႁွင်ႉၵႃႈတီႈၽၢႆႇၼႃႈမၼ်းၸဵတ်းဝၼ်းၼႂ်းမိူဝ်ႈဢၼ်ၶၢမ်ႇပွႆးယူႇၼၼ်ႉဢေႃႈ။ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ မၼ်းၽုၺ်ႇဢွၵ်ႇလၢတ်ႈၼႄတီႈမၼ်းၼၼ်ႉ ၵွပ်းပိူဝ်ႈဢၼ်မၼ်းတုၵ်ႉတဝ်ႈၼႃႇလူင်လၢင်ၼၼ်ႉဢေႃႈ။မၼ်းၵေႃႈဢဝ်ဢၼၢၵ်ႈၵႂၢမ်းသိူင်ႇၵႂၢမ်းဢမ်ႈၼၼ်ႉ သမ်ႉၶိုၼ်းမွၵ်ႇလၢတ်ႈတီႈပီႈၼွင်ႉ ၸိူဝ်ႉၶိူဝ်းမၼ်းၼၼ်ႉဢေႃႈ။
၁၈ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၸူဝ်ႈ ဢၼ်ၵၢင်ဝၼ်းဢမ်ႇပႆႇတၼ်းတူၵ်းၼၼ်ႉၵူၼ်းဝဵင်းၸိူဝ်းၼၼ်ႉဢွၼ်ၵၼ်မႃးလႄႈ လၢတ်ႈတီႈမၼ်းလႄႈဝႃႈ၊-ဢၼ် လႂ်ဝၢၼ်ၸဵမ်းလိူဝ်တွၼ်းသေၼမ်ႉၽိုင်ႈ။ဢၼ် လႂ်ၵတ်ႉၶႅၼ်ႇႁႅင်းယႂ်ႇၼႃႇသေသၢင်ႇသီႈ၊ဝႃႈၼင်ႇၼႆဢေႃႈ။မၼ်းၵေႃႈလၢတ်ႈတီႈၶဝ်လႄႈဝႃႈ၊-ပေႃးသူဢမ်ႇဢဝ်ဝူဝ်းမေႈၼုမ်ႇၵဝ်ထႆၸိုင်သူႁႃဢဝ်ဢၼၢၵ်ႈၵႂၢမ်းသိူင်ႇၵႂၢမ်းဢမ်ႈၵဝ်လႄႈ ဢမ်ႇထူပ်းဢမ်ႇႁၼ်လႆႈ၊ဝႃႈၼင်ႇၼႆဢေႃႈ။
၁၉ ဝိၺိၺ်ႇထႃႇဝရႃႉၽြႃးႁွတ်ႈထိုင်မႃးၵႃႈၼိူဝ် သၢမ်ႇသုၼ်ႇ ၼႂ်းႁႅင်းတၼ်းၶူဝ်းလႄႈမၼ်းလူင်းၸူးၵႃႈတီႈဝဵင်းဢႃႇသၵေႇလုၼ်ႇ သေယဝ်ႉတိုၵ်းတေႃးယႃႉပႅတ်ႈၵူၼ်း ဝဵင်းၼၼ်ႉတၢႆသၢမ်သိပ်းလႄႈ ႁိမ်ဢဝ်ဢုၵ်ႉၸႃႇၶူဝ်းလဵင်းၶဝ်သေယဝ်ႉ ပၼ်ၶူဝ်းၼုင်ႈၶူဝ်းမႂ်ႇတီႈၶဝ်ၸိူဝ်းဢၼ်ၽုၺ်ႇဢွၵ်ႇလၢတ်ႈၼႄ ဢၼၢၵ်ႈၵႂၢမ်းသိူင်ႇၵႂၢမ်းဢမ်ႈၸိူဝ်းၼၼ်ႉဢေႃႈ။တၢင်းၸႂ်မႆႈၶႂ်းၸႃႉမၼ်းဢွၵ်ႇလႄႈ မၼ်းၶိုၼ်းမိူဝ်းၵႂႃႇၸူးၵႃႈတီႈႁိူၼ်းပေႃႈ မၼ်းၼၼ်ႉသေဢေႃႈ။
၂၀ မေးသၢမ်ႇသုၼ်ႇၼၼ်ႉၵေႃႈၶဝ်ဢဝ်ပၼ်တီႈၵေႃႉသႄႈမၼ်း ဢၼ်မၼ်းဢဝ်ႁဵတ်းၵေႃႉႁဵတ်းသႄႈၸိူဝ်းၼၼ်ႉသေဢေႃႈ။