Chapter
၆
ၵိတိဢုၼ်ႇ
၁ လၢႆးသမ်ႉၵူၼ်းမဵဝ်းဢိသရေႇလ တင်းလၢႆႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးထႅင်ႈလႄႈ ထႃႇဝရႃႉၽြႃး သမ်ႉဢဝ်ၶဝ် ဢၢပ်ႈပၼ်ၵႃႈၼႂ်းမိုဝ်းမိ တျၢၼ်ႇ ၸဵတ်းပီႊတဵမ်တဵမ်ဢေႃႈ။
၂ မဵဝ်းမိတျၢၼ်ႇၼၼ်ႉႁဵတ်းပႄႉႁဵတ်းၼႅင်ႇမဵဝ်းဢိသရေႇလလႄႈ ၵူၼ်းမဵဝ်းဢိသရေႇလတင်းလၢႆ လႆႈၶုတ်ႉလုၵ်းၶုတ်ႉႁူးၵႃႈတီႈၵႄႈလွႆဢိၵ်ႇတင်း ႁူးထမ်ႈႁူးလွႆတီႈဢၼ်မၼ်ႈၶိူင်ႇပုၼ်ႈဢၼ်ၶဝ်တေလႆႈပၢႆႈသွၼ် ၵွပ်ႈပိူဝ်ႈမဵဝ်းမိတျၢၼ်ႇ ၼၼ်ႉဢေႃႈ။
၃ မိူဝ်ႈဢၼ်မဵဝ်းဢိသရေႇလဝၢၼ်ႇၸိူဝ်ႉဝၢၼ်ႇၽၼ်းယဝ်ႉ ၼၼ်ႉၵူၼ်းမိူင်းမိတျၢၼ်ႇဢိၵ်ႇတင်းၵူၼ်းမိူင်း ဢႃႇမလိၵ်ႉ တင်းၵူၼ်းမိူင်းဝၼ်းဢွၵ်ႇၶဝ် တင်းလၢႆဢွၼ်ၵၼ်ၶီႇသိုၵ်းမႃးလႄႈ
၄ ၶျႃးတပ်ႉၶဝ်သေယဝ်ႉပႄႇၽဵဝ်ႈပႅတ်ႈမၢၵ်ႇလိၼ်ႁူင်းလိၼ် တေႃႇထိုင်ႁွတ်ႈဝဵင်းၵႃႇၸ လႄႈဢမ်ႇဝႆႉၵိုတ်းဝႆႉၵျၢၼ်ႇသူဝ်းဝူဝ်း မႃႉလီႈသေတူဝ်။
၅ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်း၊ ၶဝ်ၼၼ်ႉ ပႃးတင်းတရိ်ႉသၢၼ်ႇၶဝ်တင်းသုမ်ႉထဵင်ၶဝ်သေလႄႈ မႃးၼမ်ၼႃႇလူင်လၢင်မိူၼ်ၸိူဝ်ႉၼင်ႇမႅင်းၵႅင်းၼၼ်ႉဢေႃႈ။ၶဝ်ဢိၵ်ႇတင်းၵလႃႈဢုၵ်ႉၶဝ်ၸိူဝ်းၼၼ်ႉၼမ်ၼႃႇထၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈလႄႈဢွၼ်ၵၼ်မႃး ႁႂ်ႈလႆႈယႃႉဝၢၼ်ႈယႃႉမိူင်းၶဝ်ပႅတ်ႈဢေႃႈ။
၆ ၵူၼ်းမဵဝ်းဢိသရေႇလ တင်းလၢႆတူၵ်းတႅမ်ႇတူၵ်းယေႃႈၼႃႇလူင်လၢင်ၵွပ်ႈပိူဝ်ႈၵူၼ်းမဵဝ်းမိတျၢၼ်ႇ ၸိူဝ်းၼၼ်ႉလႄႈ ၵူၼ်းမဵဝ်းဢိသရေႇလ တင်းလၢႆဢွၼ်ၵၼ်ႁွင်ႉသဵၼ်တီႈထႃႇဝႃႉရၽြႃးဢေႃႈ။
၇ ၼင်ႇၼၼ်လႄႈ မိူဝ်ႈဢၼ်ၵူၼ်းမဵဝ်းဢိသရေႇလတင်းလၢႆ ႁွင်ႉသဵၼ်တီႈထႃႇဝရႃႉၽြႃး ၵွပ်ႈပိူဝ်ႈၵူၼ်းမဵဝ်းမိတျၢၼ်ႇ တင်းလၢႆၼၼ်ႉၸိုင် ထႃႇဝရႃႉၽြႃးပွႆႇၸႂ်ႉပရေႃးၽိတ်ႈၵေႃႉၼိုင်ႈ မႃးၵႃႈတီႈၵူၼ်းမဵဝ်းဢိသရေႇလတင်းလၢႆလႄႈမၼ်းလၢတ်ႈတီႈၶဝ်လႄႈဝႃႈ၊-
၈ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ မီးဢမိင်ႉလႄႈဝႃႈၸမ်း၊-ၵဝ်ၼုၵ်ႉဢဝ်သူ ဢွၵ်ႇသေၵႃႈၼႂ်းမိူင်းဢေႇၵႅပ်ႉတု မႃးလႄႈ ဢဝ်သူဢွၵ်ႇသေၵႃႈတီႈ ဢၼ်သူလႆႈၶၢမ်ႇႁဵၼ်းၶႃႈၼၼ်ႉယဝ်ႉ။
၉ ၵဝ်ၵႄႇသႄႇၼုၵ်ႉဢဝ်သူ ဢွၵ်ႇသေၵႃႈၼႂ်းမိုဝ်းၵူၼ်းဢေႇၵႅပ်ႉတုတင်းလၢႆ ဢိၵ်ႇတင်းၵႃႈၼႂ်းမိုဝ်းၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးသူတင်းသဵင်ႈတင်းလူင်ၼၼ်ႉလႄႈ ႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈသူလႄႈ ဢဝ်မိူင်းၶဝ် ဢၢပ်ႈပၼ်တီႈသူယဝ်ႉ။
၁၀ ၵဝ်ပိင်းၺၢပ်ႈဝႆႉတီႈသူလႄႈဝႃႈၵဝ်ပဵၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။ယႃႇပေၵူဝ်ပေႁေၽြႃးၵူၼ်း ဢႃႇမေႃးရိ ၵႃႈၼႂ်းမိူင်းၶဝ်ဢၼ်သူယူႇၼၼ်ႉ၊ ဝႃႈၼင်ၼႆသေၵေႃႈ သူဢမ်ႇထွမ်ႇဢမ်ႇဢဝ်ၵႂၢမ်းၵဝ်၊ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။
၁၁ လၢႆးသမ်ႉတမၢၼ်ႇၵၢင်ႁၢဝ်ထႃႇဝရႃႉၽြႃး မႃးလႄႈၼင်ႇယူႇ ၵႃႈတီႈတႂ်ႈတူၼ်ႈ မႆႉၼိမ် ၵႃႈတီႈဝၢၼ်ႈဢေႃႇၽရ ဢၼ်ယေႃႇသ ၵူၼ်းမဵဝ်း ဢပျေႇၸႃႇပိူင်ႇၼၼ်ႉဢေႃႈ။ၵိတိဢုၼ်ႇ လုၵ်ႈၸၢႆးယေႃႇသၼၼ်ႉ ပေႃႉၶဝ်ႈၵျူင်ႇမၼ်းယူႇ ၵႃႈၼႂ်းၶုမ်ႇၶိူင်ႈယဵပ်ႇမၢၵ်ႇၸပိတ်ႉ ႁႂ်ႈလႆႈသိူင်ႇမႅပ်းသေၵႃႈတီႈၵူၼ်းမဵဝ်း မိ တျၢၼ်ႇ တင်းလၢႆဢေႃႈ။
၁၂ တမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမၼ်းလႄႈ လၢတ်ႈတီႈမၼ်းလႄႈဝႃႈ၊-ၵူၼ်းသိုၵ်းဢၼ်ႁႅင်းယႂ်ႇၼႃႇၼႆႉဢူၺ်း။ထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းဢေႃႈ၊ ဝႃႈၼင်ႇၼႆသေယဝ်ႉ ၵိတိဢုၼ်ႇၼၼ်ႉၶိုၼ်းလၢတ်ႈလႄႈဝႃႈ၊-ၸဝ်ႈၵဝ်ၶႃႈဢူၺ်း။ပေႃးထႃႇဝရႃႉၽြႃးမီးယူႇလူၺ်ႈၵၼ်တင်းႁဝ်းၶႃႈဢမၢၼ်ႇၶၢၼ်ပဵၼ်ၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဢမူႉလူင်ၼႆႉႁွတ်ႈထိုင်ၵႃႈၼိူဝ်ႁဝ်း ၶႃႈၼင်ႇႁိုဝ်ၶႃႈ။
၁၃ လွင်ႈတၢင်းဢၼ်လီဢၢမ်းဢၼ်မၼ်းၸဝ်ႈႁဵတ်းၸိူဝ်ႉၼင်ႇဢၼ် ပူႇပေႃႈႁဝ်းၶႃႈလၢတ်ႈတီႈႁဝ်းၶႃႈဝႃႈ ထႃႇဝရႃႉၽြႃးၼုၵ်ႈဢဝ်ႁဝ်းၶႃႈဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃး၊ဝႃႈၼင်ႇၼႆၼၼ်ႉ၊လွင်ႈတၢင်းလီဢၢမ်းၵႃႈမီး တင်းသဵင်ႈတင်းလူင်ၼၼ်ႉမီးၵႃႈ လႂ်ၶႃႈ။တေႃႈလဵဝ်ၼႆႉထႃႇဝရႃႉၽြႃးၸုၼ်ႉပႅတ်ႈႁဝ်းၶႃႈလႄႈ ဢဝ်ႁဝ်းၶႃႈဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်းမိတျၢၼ်ႇတင်းလၢႆယဝ်ႉလူင်ပေႇ၊ဝႃႈၼင်ႇၼႆ ဢေႃႈ။
၁၄ ထႃႇဝရႃႉၽြႃးယႅၵ်ႉတူၺ်းမၼ်းလႄႈ မီးဢမိင်ႉဝႃႈ၊-ဢိင်ႈပိုင်ႈတၼ်းၶူဝ်းဢၼ်မႂ်းလႆႈတေႃႈလဵဝ်ၼႆႉသေလႄႈၵႂႃႇတႃႉ။မႂ်းတၵ်းလႆႈၵႄႇသႄႇၼုၵ်ႉဢဝ်ၵူၼ်းမဵဝ်းဢိသရေႇလ ဢွၵ်ႇသေၵႃႈၼႂ်းမိုဝ်းၵူၼ်းမဵဝ်း မိတျၢၼ်ႇ တင်းလၢႆၼၼ်ႉဢေႃႈ။ၵဝ်ပွႆႇၸႂ်ႉမႂ်းယဝ်ႉဢမ်ႇ ၸႂ်ႈႁိုဝ်၊ဝႃႈၼင်ၼႆဢေႃႈ။
၁၅ မၼ်းၶိုၼ်းလဝ်လၢတ်ႈလႄႈဝႃႈ၊-ၸဝ်ႈၵဝ်ၶႃႈဢူၺ်း။ၵဝ်ၶႃႈၼႆႉတၵ်းႁဵတ်းၸိူဝ်ႉၼင်ႇႁိုဝ်ၵႄႇသႄႇ ၼုၵ်ႈဢဝ်ၵူၼ်းမဵဝ်းဢိသရေႇလတင်းလၢႆၶႃႈ။ၼႂ်းမဵဝ်းမၼႃႇသေႇၼႆႉပီႈၼွင်ႉၸိူဝ်ႉၶိူဝ်းၵဝ်ၶႃႈပဵၼ်ဢၼ်ယၢၵ်ႈဢၼ်ၽၢၼ်သေပိူၼ်ႈၶႃႈဢေႃႈ။ၵဝ်ၶႃႈၼႆၵေႃႈပဵၼ်ဢၼ်ယုတ်ႈဢၼ်ယွမ်းသေပိူၼ်ႈၵႃႈၼႂ်းပီႈၼွင်ႉၸိူဝ်ႉၶိူဝ်းၵဝ်ၶႃႈၶႃႈဢေႃႈ၊ ဝႃႈၼင် ၼႆဢေႃႈ။
၁၆ ထႃႇဝႃႉရၽြႃးသမ်ႉမီးဢမိင်ႉလႄႈဝႃႈ၊-ၵဝ်တၵ်းမီးယူႇလူၺ်ႈၵၼ်တင်းမႂ်းဢမၢၼ်ႇၶၼ်ပဵၼ်လႄႈ မႂ်းတၵ်းလႆႈတိုၵ်းတေႃးယႃႉပႅတ်ႈၵူၼ်းမဵဝ်း မိတျၢၼ်ႇ တင်းလၢႆမိူၼ်ၸိူဝ်ႉၼင်ႇတိုၵ်းတေႃးယႃႉပႅတ်ႈၵူၼ်းၵေႃႉလဵဝ်ၵူၺ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
၁၇ မၼ်းၵေႃႈတွင်းပၢၼ်ႇတီႈမၼ်းၸဝ်ႈလႄႈဝႃႈ၊-တေႃႈလဵဝ်ၼႆႉေ ပႃးၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၸိုင် ၶႅၼ်းတေႃႈ ၼႄပျႃးၼိမိၵ်ႈလၢၵ်ႈၶၼႃႇလွင်ႈဢၼ်ဝႃႈ ပဵၼ်ၸဝ်ႈႁဝ်းဢၼ်လၢတ်ႈၵႂၢမ်း တေႃႇၵၼ်တင်းၵဝ်ၶႃႈၼၼ်ႉသေၵမ်းၶႃႈ။
၁၈ ၶႅၼ်းတေႃႈယႃႇပေၵႂႃႇသေၵႃႈတီႈၼႆႉ တေႃႇထိုင်ႁွတ်ႈ ၵဝ်ၶႃႈၶိုၼ်းမႃးတီႈၸဝ်ႈႁဝ်းသေလႄႈ ဢဝ်ၶိူင်ႈပုၵ်ႉၸေႃႇၽေႃးၸဵၼ်ႇ မႃးတၢင်ႇတမ်းၵႃႈတီႈၽၢႆႇၼႃႈၸဝ်ႈႁဝ်းၼၼ်ႉသေၵမ်းၶႃႈ၊ဝႃႈၼင်ႇၼႆဢေႃႈ။မၼ်းၸဝ်ႈသမ်ႉမီးဢမိင်ႉလႄႈဝႃႈ၊-ၵဝ်တၵ်းယူႇတေႃႇထိုင်ႁွတ်ႈမႂ်းၶိုၼ်းမႃးၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၉ ၵိတိဢုၼ်ႇ ၼၼ်ႉၶဝ်ႈၵႃႈၼႂ်းလႄႈမႄးႁဵတ်းမႄးႁႅၼ်း ပႄႉဢွၼ်တူဝ်ၼိုင်ႈ ဢိၵ်ႇတင်း ၶဝ်ႈမုၼ်းၶႅပ်းဢၼ်ဢမ်ႇပႃးၸိူဝ်ႉပႅင်ႈဢၼ်ဢဝ်ၽွင်ၶဝ်မုၼ်းဢေႇၽႃႇၼိုင်ႈၼၼ်ႉဢေႃႈ။မၼ်းဢဝ်ၼိူဝ်ႉပေႉၼၼ်ႉသႂ်ႇၵႃႈၼႂ်းပဵတ်ႈလႄႈဢဝ်ၼမ်ႉတူမ်ႈၼိူဝ်ႉပေႉၼၼ်ႉထွၵ်ႇသႂ်ႇၵႃႈတီႈၼႂ်းမေႃႈသေယဝ်ႉ၊ ဢဝ်မႃးၵႃႈတီႈမၼ်းၸဝ်ႈ ၵႃႈတႂ်ႈတူၼ်ႈမႆႉၼိမ်ၼၼ်ႉလႄႈသၢၵ်ႈၵၢပ်ႈ ဢေႃႈ။
၂၀ တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉၵေႃႈမီးဢမိင်ႉတီႈမၼ်းလႄႈဝႃႈ၊-ဢဝ်ၼိူဝ်ႉၼၼ်ႉ ဢိၵ်ႇတင်းၶဝ်ႈမုၼ်းၶႅပ်းဢၼ်ဢမ်ႇပႃးၸိူဝ်ႉပႅင်ႈၸိူဝ်းၼၼ်ႉတၢင်ႇဝႆႉၵႃႈၼိူဝ်မၢၵ်ႇႁိၼ်ၼႆႉတႃႉ။ဢဝ်ၼမ်ႉတူမ်ႈၼိူဝ်ႉၼၼ်ႉထွၵ်ႇႁူတ်းသႂ်ႇတႃႉ၊ ဝႃႈၼင်ႇၼႆလႄႈမၼ်းႁဵတ်းၸွမ်းၸိူဝ်ႉၼင်ႇၼၼ်ဢေႃႈ။
၂၁ မိူဝ်ႈၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃး ဢဝ်ပၢႆၶွၼ်ႉတဝ်ႉဢၼ်မိုဝ်းမၼ်းယိပ်းၵမ်ယူႇၼၼ်ႉ ယိုၼ်းတိူဝ်ႉသႂ်ႇၼိူဝ်ႉဢိၵ်ႇတင်းၶဝ်ႈမုၼ်းၶႅပ်း ဢၼ်ဢမ်ႇပႃးၸိူဝ်ႉပႅင်ႈၸိူဝ်းၼၼ်ႉသေလႄႈ ၽႆးလုၵ်ႉဢွၵ်ႇမႃးၵႃႈၼႂ်းမၢၵ်ႇႁိၼ်ၼၼ်ႉသေလႄႈ မႆႈၼိူဝ်ႉဢိၵ်ႇတင်းၶဝ်ႈမုၼ်းၶႅပ်းဢၼ်ဢမ်ႇပႃးၸိူဝ်ႉပႅင်ႈၸိူဝ်းၼၼ်ႉဢေႃႈ။တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉၵေႃႈလပ်းႁၢႆၵႂႃႇသေ ဢေႃႈ။
၂၂ မိူဝ်ႈဢၼ် ၵိတိဢုၼ်ႇ ႁၼ်လွင်ႈဢၼ်ပဵၼ်တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉၸိုင် ၵိတိဢုၼ်ႇလဝ်ႈလၢတ်ႈလႄႈဝႃႈ၊- ဢူဝ်းၸဝ်ႈထႃႇဝရႃႉၽြႃးတီႈၶႃႈ။ၵဝ်ၶႃႈၼႆႉလႆႈတေႃႇၼႃႈၵၼ်တင်းတမၢၼ်ႇၵၢင်ႁၢဝ်ထႃႇဝရႃႉၽြႃးသေလႄႈ ႁၼ်ယဝ်ႉတီႈၶႃႈလူင် ပေႇ။
၂၃ မိူဝ်ႈဢၼ်ဝႃႈၼင်ႇၼႆၸိုင်ထႃႇဝရႃႉၽြႃးမီးဢမိင်ႉလႄႈဝႃႈ၊-ႁႂ်ႈမႂ်းၵတ်းယဵၼ်ၶျၢမ်းသႃႇတႃႉ။ယႃႇပေမႆႈ ၸႂ်။မႂ်းဢမ်ႇလႆႈတၢႆၵူၺ်း၊ဝႃႈၼင်ႇၼႆဢေႃႈ။
၂၄ မိူဝ်ႈၼၼ်ႉၵိတိဢုၼ်ႇ ၼၼ်ႉတႄႇႁဵတ်းယိတ်ႉပလၢင်ပုၼ်ႈထႃႇဝရႃႉၽြႃးၵႃႈတီႈၼၼ်ႉလႄႈ ႁွင်ႉႁိၵ်ႈၸိုဝ် ယေႇႁေႃးဝႃႇသႃႇလုမ်ႇ ဢေႃႈ။မီးယူႇၵႃႈတီႈဝၢၼ်ႈဢေႃႇၽရတီႈဢၼ်ၵူၼ်းဢပျေႇၸႃႇ ယူႇၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၅ ၼႂ်းၶိုၼ်းၼၼ်ႉၵမ်းလဵဝ် ထႃႇဝရႃႉၽြႃးမီးဢမိင်ႉတီႈမၼ်းလႄႈဝႃႈ၊-မႂ်းဢဝ်ဝူဝ်းပေႃႈၼုမ်ႇဢွၼ်ႇမႂ်းဢိၵ်ႇတင်းဝူဝ်းပေႃႈတုတိယ ဢၼ်ဢသၢၵ်ႈလႆႈၸဵတ်းပီႊၼၼ်ႉသေယဝ်ႉ၊ ၵိူၼ်ႇယႃႉပႅတ်ႈ ယိတ်ႉပလၢင်ႇၽြႃးပႃႇလ ဢၼ်ပေႃႈမႂ်းတေႇႁဵတ်းၼၼ်ႉသေလႄႈၽၼ်းလူမ်ႉတူၼ်ႈဢႃႇသႃႇရ ဢၼ်မီးၵႃႈတီႈႁိမ်းမၼ်းၼၼ်ႉ ပႅတ်ႈတႃႉ။
၂၆ တႄႇႁဵတ်းယိတ်ႉပလၢင်ႇပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈမႂ်း ၵႃႈၼိူဝ်ပၢႆၸိၵ်းထႃႇၼႃႉတီႈဢၼ်မၼ်ႈၶိူင်ႇ ၸွမ်းၵႃႈၼင်ႇတၢင်းဢၼ်လီမႄးလီႁႅၼ်းၼၼ်ႉသေယဝ်ႉ၊ ဢဝ်ဝူဝ်းပေႃႈတုတိယ ဢိၵ်ႇလူၺ်ႈၵၼ်တင်းမႆႉတူၼ်ႈ ဢႃႇသရ ဢၼ်မႂ်းတၵ်းၽၼ်းလူမ်ႉၼၼ်ႉ ပုၵ်ႉၸေႃႇယိၸ်ႉဢၼ်တုတ်ႇၽႆးတႃႉ၊ ဝႃႈၼင်ႇၼႆဢေႃႈ။
၂၇ ၵိတိဢုၼ်ႇၵေႃႈႁွင်ႉဢဝ်ၶႃႈမၼ်းသိပ်းၵေႃႉလႄႈ ႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။ၵွပ်ႈပိူဝ်ႈဢၼ်ၵူဝ်ႁႄၵူၼ်းႁိူၼ်းၵူၼ်းယေး ပေႃႈမၼ်းဢိၵ်ႇတင်းၵူၼ်းဝဵင်းတင်းလၢႆလႄႈ မၼ်းဢမ်ႇႁတ်းႁဵတ်းၼႂ်းၶိင်ႇၵၢင်ဝၼ်းမၼ်း ႁဵတ်းၼႂ်းၶိင်ႇၵၢင်ၶိုၼ်းဢေႃႈ။
၂၈ မိူဝ်ႈဢၼ်ၵူၼ်းဝဵင်းတင်းလၢႆလုၵ်ႉၶိင်ႇၵၢင်ၼႂ်ၸဝ်ႉၸဝ်ႉ ၼၼ်ႉၸိုင်ၶဝ်ထူပ်းႁၼ်ယိၸ်ႉပလၢင်ႇၽြႃးပႃႇလၵိူၼ်ႇလုယူႇ၊ တူၼ်ႈဢႃႇသရ ဢၼ်မီးၵႃႈႁိမ်းမၼ်းၼၼ်ႉလႆႈၶၢမ်ႇတၢင်းဢၼ်ၽၼ်းလူမ်ႉယူႇ၊ ဢဝ်ဝူဝ်းပေႃႈတုတိယပုၵ်ႉၸေႃႇၵႃႈၼိူဝ်ယိၸ်ႉပလၢင်ႇ ဢၼ်တႄႇႁဵတ်းဝႆႉၼၼ်ႉယူႇၸိုင် ၶဝ်ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်လၢတ်ႈၵၼ်ထၢမ်ၵၼ်လႄႈဝႃႈ၊-ၽူႈလႆႁဵတ်းဢမူႉၼႆႉ၊ဝႃႈၼင်ႇၼႆဢေႃႈ။
၂၉ ၶဝ်ၸႅတ်ႈထၢမ်ၸႅတ်ႈတူၺ်းၵၼ်ၸိူဝ်ႉၼင်ႇၼၼ်သေယဝ်ႉၵမ်ႈၽွင်ႈလၢတ်ႈဝႃႈ၊-ၵိတိဢုၼ်ႇလုၵ်ႈၸၢႆးယေႃႇသ ၼၼ်ႉႁဵတ်းယဝ်ႉ၊ဝႃႈၼင်ႇၼႆဢေႃႈ။
၃၀ မိူဝ်ႈၼၼ်ႉ ၵူၼ်းဝဵင်းတင်းလၢႆဢွၼ်ၵၼ်လၢတ်ႈတီႈယေႃႇသလႄႈဝႃႈ၊-ဢဝ်လုၵ်ႈၸၢႆးမႂ်းၼၼ်ႉဢွၵ်ႇမႃးႁႂ်ႈမၼ်းလႆႈၶၢမ်ႇတၢႆ ၵွပ်ႈပိူဝ်ႈမၼ်းၵိူၼ်ႇယႃႉယိၸ်ႉပလၢင်ႇၽြႃးပႃႇလပႅတ်ႈလႄႈ ၽၼ်းလူမ်ႉတူၼ်ႈဢႃႇသရ ဢၼ်မီးၵႃႈတီႈႁိမ်းမၼ်းၼၼ်ႉပႅတ်ႈၼၼ်ႉတႃႉ၊ဝႃႈၼင်ႇၼႆသေၵေႃႈ၊ ယေႃႇသ ၶိုၼ်းလၢတ်ႈတီႈၶဝ်ၸိူဝ်းဢၼ်ၸုၵ်း ယူႇႁိမ်းႁွမ်းလဵပ်ႈႁွပ်ႈမၼ်းတင်းသဵင်ႈ တင်းလူင်ၼၼ်ႉလႄႈဝႃႈ၊-
၃၁ သူတၵ်းယူႇၽၢႆႇၽြႃးပႃႇလသေလႄႈလၢတ်ႈဢမူႉႁိုဝ်။သူတၵ်းၵႄႇသႄႇၶျွတ်ႈဢဝ်မၼ်းႁိုဝ်။ႁႂ်ႈၵေႃႉဢၼ်ယူႇၽၢႆႇမၼ်းသေလႄႈ လၢတ်ႈဢမူႉၼၼ်ႉတၢႆၼႂ်းၶိင်ႇၵၢင်ၼႂ်ၼႆႉၵမ်းလဵဝ်သေၵမ်း။ပေႃးမၼ်းၸႂ်ႈၽြႃးၸိုင်ႁႂ်ႈမၼ်းယူႇၽၢႆႇတူဝ်ၸဝ်ႈၵဝ်ႇသေလႄႈ လၢတ်ႈဢမူႉမၼ်းၵွပ်ႈပိူဝ်ႈဢၼ်သေၵေႃႉသေၵူၼ်းၵိူၼ်ႇယႃႉပႅတ်ႈယိၸ်ႉပလၢင်ႇမၼ်း ၼၼ်ႉသေၵမ်း၊ဝႃႈၼင်ႇၼႆဢေႃႈ။
၃၂ ပိူဝ်ႈၼႆလႄႈၼႂ်းဝၼ်းၼၼ်ႉ ၶဝ်ႁွင်ႉႁိၵ်ႈၸိုဝ်ၵိတိဢုၼ်ႇ ဝႃႈ ယေႇရုပ်ႉပႃႇလ ဝႃႈၼႆ ၵွပ်ႈပိူဝ်ႈမၼ်းၵိူၼ်ႇယႃႉပႅတ်ႈယိၸ်ႉပလၢင်ႇပႃႇလၼၼ်ႉလႄႈႁႂ်ႈပႃႇလ ယူႇၽၢႆႇတူဝ်ၸဝ်ႈၵဝ်ႇသေလႄႈႁဵတ်းဢမူႉတေႃႇ ၵၼ်တင်းမၼ်းသေၵမ်း၊ဝႃႈၼင်ႇၼႆၼၼ်ႉဢေႃႈ။
၃၃ မိူဝ်ႈၼၼ်ႉၵူၼ်းမိူင်းမိတျၢၼ်ႇဢိၵ်ႇတင်းဢႃႇမလိၵ်ႉတင်းၵူၼ်းမိူင်းဝၼ်းဢွၵ်ႇ တင်းသဵင်ႈတင်းလူင်ၸိူဝ်းၼၼ်ႉၸူႉၵၼ်တုမ်ၵၼ်သေလႄႈ ၶၢမ်ႈမႃးၶျႃးတပ်ႉၶဝ် ၵႃႈၼႂ်းပၢင်ႇႁူၺ်ႈယေႇသရေႇလဢေႃႈ။
၃၄ ဝိၺိၺ်ႇထႃႇဝရႃႉၽြႃးႁွတ်ႈထိုင်ၵႃႈၼိူဝ်ၵိတိဢုၼ်ႇသေယဝ်ႉ မၼ်းပဝ်ႇၼႄးၶရႃႇၵႂႃႇလႄႈ ၵူၼ်းမဵဝ်းဢပျေႇၸႃႇဢွၼ် ၵၼ်ၸွမ်းလင်မၼ်းဢေႃႈ။
၃၅ မၼ်းပွႆႇၸႂ်ႉတမၢၼ်ႇတင်းလၢႆၵႂႃႇၼႂ်းဢိူင်ႇမၼႃႇသေႇ ၵူႈတီႈၵူႈလႅၼ်လႄႈ ၶဝ်ၼၼ်ႉဢွၼ်ၵၼ်ၸွမ်းလင်မၼ်းဢေႃႈ။မၼ်းသမ်ႉပွႆႇၸႂ်ႉတမၢၼ်ႇတင်းလၢႆၵႂႃႇၵႃႈတီႈဢိူင်ႇဢႃႇသႃႇ၊ ဢိူင်ႇၸေႇပုလုၼ်ႇ၊ ဢိူင်ႇၼပ်ႉထလိလႄႈ ၶဝ်ၼၼ်ႉၵေႃႈ ဢွၼ်ၵၼ်မႃးႁႂ်ႈလႆႈထူပ်းႁၼ်ၶဝ်ဢေႃႈ။
၃၆ ၵိတိဢုၼ်ႇၵေႃႈ လဝ်ႈယွၼ်းတီႈထႃႇဝရႃႉၽြႃးပဵၼ်ၸဝ်ႈလႄႈဝႃႈ၊-ပေႃးၸဝ်ႈႁဝ်းတၵ်းဢဝ်ၶႃႈၸဝ်ႈသေလႄႈၵႄႇသႄႇၶျွတ်ႈဢဝ်ၵူၼ်းမဵဝ်းဢိသရေႇလ တင်းလၢႆၸွမ်း ၵႃႈၼင်ႇဢၼ် ၸဝ်ႈႁဝ်းမီႈဢမိင်ႉဝႆႉၼၼ်ႉ ဢမၢၼ်ႇၶၢၼ်ပဵၼ်ၸိုင်၊ ၶႃႈၸဝ်ႈတၵ်းဢဝ်ၶူၼ်သူဝ်းတူဝ်ၼိုင်ႈဝႆႉၵႃႈတီႈတလၢင်းယဵပ်ႇၶဝ်ႈတီႈၶႃႈဢေႃႈ။
၃၇ ပေႃးၼမ်ႉၼၢႆးယမ်းၶူၼ်သူဝ်းၵူၺ်းလႄႈ ၼိူဝ်ၼႃႈလိၼ်တင်းသဵင်းတင်းလူင်ႁႅင်ႈႁွင်ယူႇၸိုင် ၶႃႈၸဝ်ႈတၵ်းလႆႈႁူႉလွင်ႈဢၼ်ၸဝ်ႈႁဝ်း တၵ်းဢဝ်ၶႃႈၸဝ်ႈ ၵႄႇသႄႇၶျွတ်ႈဢဝ်မဵဝ်းဢိသရေႇလ မႅၼ်ႈၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။
၃၈ မၼ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ႁုပ်ႈဢဝ်ၶူၼ်သူဝ်းၼၼ်ႉသေယဝ်ႉ၊ မိပ်ႇပၼ်ႈႁႂ်ႈၼမ်ႉၼၢႆးဢွၵ်ႇၵႃႈၼႂ်းၶူၼ်သူဝ်းၼၼ်ႉလႄႈ ၼမ်ႉၼၢႆးၼၼ်ႉလႆႈတဵမ်မေႃႈဢႅင်ႇလုၵ်ႈၼိုင်ႈဢေႃႈ။ၵိတိဢုၼ်ႇသမ်ႉလဝ်ႈယွၼ်းတီႈၽြႃးပဵၼ်ၸဝ်ႈထႅင်ႈလႄႈဝႃႈ၊-ၶႅၼ်းတေႃႈယႃႇပေႁႂ်ႈတၢင်းမႆႉၸႂ်ၶႂ်ႈၸႃႉ ၸဝ်ႈႁဝ်းဢွၵ်ႇတီႈၶႃႈၸဝ်ႈသေၵမ်း တီႈၶႃႈ။
၃၉ ၶႃႈၸဝ်ႈတၵ်းလဝ်ႈယွၼ်းထႅင်ႈၵမ်းၼိုင်ႈၵူၺ်းလူးၵွၼ်ႇတီႈၶႃႈဢေႃႈ။ၶႅၼ်းတေႃႈပၼ်ဢၶႂၢင်ႉဢၼ်လႆႈဢဝ်ၶူၼ်သူဝ်းတူဝ်ၼိုင်ႈၸၢမ်း တူၺ်းမိူဝ်ႈလဵဝ်ၼႆႉထႅင်ႈပွၵ်ႈၼိုင်ႈလူးၵွၼ်ႇသေၵမ်းတီႈၶႃႈ။ႁႂ်ႈၶူၼ်သူဝ်းၵူၺ်းႁႅင်ႈႁွင်ဝႆႉလႄႈ ၼႃႈလိၼ်တင်းသဵင်ႈတင်းမူတ်းယမ်းၼမ်ႉၼၢႆးယူႇသေၵမ်းလူၺ်ႈတီႈၶႃႈ၊ ဝႃႈ ၼင်ႇၼႆဢေႃႈ။
၄၀ ၼႂ်းၶိုၼ်းၼၼ်ႉၵေႃႈၽြႃးပဵၼ်ၸဝ်ႈႁဵတ်းၸိူဝ်ႉၼင်ႇၼၼ်ဢေႃႈ။ၶူၼ်သူဝ်းၼၼ်ႉၵူၺ်းႁႅင်ႈႁွင်ဝႆႉလႄႈ ၼႃႈလိၼ်တင်းသဵင်ႈတင်းမူတ်းယမ်းၼမ်ႉၼၢႆးယူႇဢေႃႈ။