Chapter
၂၃
ယေႃးသုၽၢတ်ႇယၢၼ်ၵၼ်တင်းၵူၼ်းဢွၼ်ႁူဝ်တင်းလၢႆ
၁ မိူဝ်ႈဢၼ်ထႃႇဝရႃႉၽြႃးပၼ်ဢၶႂၢင်ႉၵူၼ်းမဵဝ်း ဢိသရေႇလတင်းလၢႆ လႆႈလွတ်ႈသေၵႃႈၼႂ်းမိူင်းရၢၼ်ႇသူႇဢၼ်ယူႇလဵပ်ႈႁွပ်ႈႁိမ်းႁွမ်းၶဝ်ၸိူဝ်းၼၼ်ႉ တင်းသဵင်ႈတင်းလူင်လႄႈ ယူႇၼိမ်ႇလီယဵၼ်လီယူႇၶိင်ႇမိူဝ်ႈဝၼ်း ၼမ်ၼႃႇၼၼ်ႉၸိုင်၊
၂ ယေႃးသုထဝ်ႈလႄႈဢသၢၵ်ႈၵႄႇထူၼ်ႈသေယဝ်ႉမၼ်းႁွင်ႉဢဝ်မဵဝ်းဢိသရေႇလ တင်းသဵင်ႈတင်းလူင်ဢိၵ်ႇတင်း ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ် ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ၶဝ် ၵူၼ်းဢၼ်ၸီႇယၢင်ႇတြႃးၶဝ် တင်းဢရႃႇသိၶဝ်တင်းလၢႆသေလႄႈလၢတ်ႈတီႈၶဝ်လႄႈဝႃႈ၊-ၵဝ်ၼႆႉထဝ်ႈလႄႈဢသၢၵ်ႈ ၵႄႇထူၼ်ႈယဝ်ႉ၊
၃ သူလႆႈႁူႉလႆႈႁၼ်ၵႃႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူ ႁဵတ်းတီႈၵူၼ်းမဵဝ်းတင်းသဵင်ႈတင်းလူင်ၸိူဝ်းၼႆႉၵွပ်ႈပိူဝ်ႈသူႇၼၼ်ႉယဝ်ႉ။ထႃႇဝရႃႉၽြႃးၽြႃးပဵၼ်ၸဝ်ႈသူ ပဵၼ်ၸဝ်ႈဢၼ်တိုၵ်းသိုၵ်း ပုၼ်ႈသူယဝ်ႉ။
၄ တူၺ်းလူ။ၵဝ်တူၵ်းၸႃႇၵွၵ်ႈလႄႈၽႄၵူၼ်းမဵဝ်းဢၼ်ယင်းၵိုတ်းယင်းၵျၢၼ်ႇၸိူဝ်းၼႆႉ ပၼ်ပုၼ်ႈဢၼ်တၵ်းပဵၼ်ဢမူၺ်ႇမဵဝ်းသူတင်းလၢႆ ဢဝ်ၵႃႈ တီႈၸႃႉၸဵမ်ၼမ်ႉႁွင်ႊယေႃးတၢၼ်ႇၼၼ်ႉလႄႈ
၅ ပႃးတင်းၵူၼ်းမဵဝ်း ၵႃႈဢၼ်ၵဝ်ပႄႉမူတ်းသဵင်ႈယဝ်ႉၸိူဝ်းၼၼ်ႉ ၵႂႃႇတေႃႇထိုင်ႁွတ်ႈပၢင်ႇလၢႆႇလူင်ၵႃႈတီႈၽၢႆႇဢၼ်ၵၢင်ဝၼ်းတူၵ်းၼၼ်ႉယဝ်ႉ။ထႃႇဝရႃႉၽြႃးၽြႃး ပဵၼ်ၸဝ်ႈသူ
၆ တၵ်းႁေႃႈၶဝ်ဢွၵ်ႇသေၵႃႈတီႈၽၢႆႇၼႃႈသူလႄႈ ပႄႇၽဵဝ်ႈၶဝ်ပႅတ်ႈထၢၼ်ႈပေႃးသူဢမ်ႇလႆႈႁၼ်ၶဝ်သေယဝ်ႉ၊ သူႇတၵ်းလႆႈပိူင်ႇဢဝ်လိၼ်ၶဝ်မႅၼ်ႈၵႃႈၼင်ႇဢၼ် ထႃႇဝရႃႉၽြႃးၽြႃးပဵၼ်ၸဝ်ႈသူ လၢတ်ႈဝႆႉၼၼ်ႉဢေႃႈ။
၇ ပိူဝ်ႈၼႆလႄႈဢွၼ်ၵၼ်မီးၸႂ်ဢၼ်ႁတ်းႁၢၼ်ၼႃႇလူင်လၢင် ႁႂ်ႈလႆႈပႂ်ႉၸွမ်းၵမ်ၵျၢင်ႉၵႃႈဢၼ်တႅမ်ႈသႂ်ႇဝႆႉ ၼႂ်းၵျၢမ်းလိၵ်ႈပိင်းၺၢပ်ႈတိမုဝ်းသေႇ ၼၼ်ႉပုၼ်ႈလွင်ႈၼင်ႇႁိုဝ်သူတၵ်းဢမ်ႇဝေႈပိူင်ႈသေၵႃႈတီႈသဵၼ်ႈတၢင်းၼၼ်ႉၵႂႃႇ ၵႃႈတီႈၽၢႆႇသၢႆႉ
၈ ၽၢႆႇၶႂႃ သူတၵ်းဢမ်ႇႁဵတ်းၵေႃႉႁဵတ်းသေႈလူၺ်ႈၵၼ်တင်း ၵူၼ်းမဵဝ်းၸိူဝ်းဢၼ်ယင်းၵိုတ်းယင်းၵျၢၼ်ႇယူႇၵႃႈၼႂ်းသူၼႆႉၼၼ်ႉ ယႃႇပေဢွၵ်ႇသူပ်းဝႃႈၸိုဝ်သဵင်ႈၽြႃးၶဝ်ၼၼ်ႉ၊ ယႃႇပေႁဵတ်းတၢင်းဢၼ်ၵိၼ်ႇဢၼ်ဝႃႈ၊ယႃႇပေႁဵတ်းဝူတ်ႈၵူမ်ႈႁူဝ်ၵွမ်းႁူဝ်တီႈၶဝ်။ႁွႆႈၸပ်းယူႇ ၵႃႈတီႈထႃႇဝရႃႉၽြႃးၽြႃးပဵၼ်ၸဝ်ႈသူမိူၼ်ၸိူဝ်ႉၼင်ႇဢၼ်ၵမ်ၵျၢင်ႉမႃးၼၼ်ႉ တေႃႇထိုင်ႁွတ်ႈ ဝၼ်းမိူဝ်ႈၼႆႉတႃႉ။
၉ လွင်ႈမၼ်းၸမ်း ထႃႇဝရႃႉၽြႃးႁေႃႈၵူၼ်းမဵဝ်း ဢၼ်ယႂ်ႇၼႃႇႁႅင်းၼႃႇၸိူဝ်းၼၼ်ႉ ဢွၵ်ႇပႅတ်ႈသေၵႃႈတီႈၽၢႆႇၼႃႈသူယဝ်ႉ။တေႃႇထိုင်ႁွတ်ႈဝၼ်းမိူဝ်ႈၼႆႉလႄႈ ၽူႈ လႂ်ဢမ်ႇၸုၵ်းၶၢမ်ႇၵႃႈတီႈၽၢႆႇၼႃႈသူလႆႈလႃးလႃး။
၁၀ သူၵေႃႉၼိုင်ႈတၵ်းႁဵတ်းႁႂ်ႈပိူၼ်ႈႁဵင်ၵေႃႉဢွၵ်ႇပၢႆႈဢေႃႈ။လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူ ပဵၼ်ၸဝ်ႈဢၼ်တိုၵ်းသိုၵ်းပုၼ်ႈသူမႅၼ်ႈၸွမ်းၵႃႈၼင်ႇဢၼ် မၼ်းၸဝ်ႈမီးဢမိင်ႉဝႆႉတီႈသူၼၼ်ႉဢေႃႈ။
၁၁ ပိူဝ်ႈၼႆလႄႈဢွၼ်ၵၼ်ႁဵတ်းသတိတီႈတူဝ်သူ ႁႂ်ႈသူလႆႈႁၵ်ႉထႃႇဝရႃႉၽြႃးၽြႃးပဵၼ်ၸဝ်ႈသူ ယူႇတႃႉ။
၁၂ ပေႃးဢမ်ႇၼၼ်ပေႃးသူသုတ်ႈယွမ်းၵႂႃႇသေလႄႈ ႁွႆႈၸပ်းယူႇၵႃႈတီႈၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇဝႆႉ ၵႃႈၼႂ်းၵူၼ်းမဵဝ်းၸိူဝ်းၼၼ်ႉလႄႈသွင်ႇမၢင်ႇၵလႃႇဢဝ်ၵၼ်တင်းၶဝ်၊ ၶဝ်ႈဢွၵ်ႇၵႃႈၼႂ်းၶဝ်၊
၁၃ ၶဝ်ၵေႃႈၶဝ်ႈဢွၵ်ႇၵႃႈၼႂ်းသူယူႇၸိုင် ဢွၼ်ၵၼ်ႁူႉမၢတ်ႈလွင်ႈဢၼ်ဝၼ်းလိုၼ်းမိူဝ်းၼႃႈ ထႃႇဝရႃႉၽြႃးၽြႃးပဵၼ်ၸဝ်ႈသူ တၵ်းဢမ်ႇႁေႃႈၵူၼ်းမဵဝ်းၸိူဝ်းၼႆႉဢွၵ်ႇပႅတ်ႈသေၵႃႈတီႈၽၢႆႇၼႃႈသူ။ၽြႃးပဵၼ်ၸဝ်ႈတၵ်းပၼ်တီႈသူတူင်ႇႁဵဝ်ႉတူင်ႇၶိုမ်း၊ တမ်ၵၢင်၊ၶွၼ်ႉႁေႃႈၵႃႈတီႈပဵမ်ႉသူ၊ၼၢမ်လႅမ်ႈၵႃႈတီႈမၢၵ်ႇတႃသူယူႇ တေႃႇထိုင်ႈႁွတ်ႈ သူထၢၼ်ႈပေႃးလႆႈလူႉလႆႈႁၢႆသေၵႃႈတီႈမိူင်းဢၼ်လီဢၼ်ငၢမ်းၼၼ်ႉ ဢမၢၼ်ႇၶၢၼ်ပဵၼ်တႃႉ။
၁၄ တေႃႈလဵဝ်ၼႆႉၸမ်း ၵဝ်တၵ်းၵႂႃႇသဵၼ်ႈတၢင်းဢၼ်ၵူၼ်းလိၼ်မိူင်းတင်းသဵင်ႈတင်းလူင် တၵ်းၵႂႃႇၼၼ်ႉယဝ်ႉ။သူႁူႉလွင်ႈဢၼ်တၢင်းလီဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူ မီးဢမိင်ႉဝႆႉပုၼ်ႈသူၼၼ်ႉယင်းဢမ်ႇသုတ်ႈဢမ်ႇယွမ်းသေၸိူဝ်ႉသေပိူင်လႄႈ တဵမ်ထူၼ်ႈ တင်းသဵင်ႈတင်းမူတ်းယဝ်ႉဢေႃႈ။
၁၅ ၸိူဝ်ႉၼင်ႇဢၼ်တၢင်းလီတင်းသဵင်ႈတင်းလူင် ႁွတ်ႈထိုင်ၵႃႈၼိူဝ်သူမႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈသူမီးဢမိင်ႉဝႆႉၼၼ်ႉ မိူၼ်ၼင်ႇၼၼ်ထႃႇဝရႃႉၽြႃး တၵ်းႁႂ်ႈၽေးဢူးပၢတ်ႈ တင်းသဵင်ႈတင်းလူင်ႁွတ်ႈထိုင်ၵႃႈၼိူဝ်သူထၢၼ်ႈပေႃး မၼ်းၸဝ်ႈယႃႉၽဵဝ်ႈသူပႅတ်ႈ ၵႃႈၼႂ်းမိူင်းဢၼ်လီဢၼ်ငၢမ်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူ ပၼ်တီႈသူၸွမ်းၵႃႈၼင်ႇ ဢၼ်မၼ်းၸဝ်ႈပၼ်သတိဝႆႉၼၼ်ႉဢေႃႈ။
၁၆ မိူဝ်ႈဢၼ်သူၽိတ်းပိူင်ႈပတိၺိၼ်ႇတြႃး ဢၼ်ထႃႇဝရႃႉၽြႃးဢၼ်ၽြႃးပဵၼ်ၸဝ်ႈသူ သင်ႇလၢတ်ႈဝႆႉတီႈသူၼၼ်ႉသေလႄႈ ၵႂႃႇႁဵတ်းဝူတ်ႈၵူမ်ႈႁူဝ်ၵွမ်းႁူဝ်တီႈၽြႃးတၢင်ႇသူႇတၢင်ႇပႃးၼၼ်ႉၸိုင် တၢင်းၸႂ်မႆႈၶႂ်ႈၸႃႉထႃႇဝရႃႉၽြႃးတၵ်းဢွၵ်ႇလႄႈ သူတၵ်းလူႉႁၢႆသေၵႃႈတီႈမိူင်းဢၼ်လီဢၼ်ငၢမ်း ဢၼ်မၼ်းၸဝ်ႈပၼ်တီႈသူဝႆႉၼႆႉၶၼ်ၶၼ်ဝႆးဝႆးဢေႃႈ၊ဝႃႈၼင်ႇၼႆဢေႃႈ။