Chapter
၅
ႁဵတ်းတၢင်းဢၼ်ထိူဝ်ပၢႆၼင်တီႈၵိလၵႃႇလ
၁ မိူဝ်ႈဢၼ် ၶုၼ်လူင်ဢႃႇမေႃးရိ ဢၼ်ယူႇၽၢႆႇဝၼ်းတူၵ်း ၼမ်ႉႁွင်ႊယေႃးတၢၼ်ႇ တင်းသဵင်းတင်းလူင်ဢိၵ်ႇတင်းၶုၼ်လူင်ၶႃႇၼၼိ ဢၼ်ယူႇၵႃႈႁိမ်းပၢင်ႇလၢႆႇတင်းသဵင်ႈတင်းလူင်ၼၼ်ႉ လႆႈႁူႉငိၼ်းလွင်ႈဢၼ်ထႃႇဝရႃႉၽြႃး ႁႂ်ႈၼမ်ႉၼႂ်းၼမ်ႉႁွင်ႊယေႃးတၢၼ်ႇယူတ်းႁႅင်ႈၵႂႃႇ ၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆ တေႃႇထိုင်ႁွတ်ႈထၢၼ်ႈပေႃးႁႂ်ႈႁဝ်းလႆႈၶၢမ်ႈမႃးၼၼ်ႉၸိုင် ႁူဝ်ၸႂ်ၶဝ်ၸိုမ်းယၢႆႈၵႂႃႇလႄႈတၢင်းဢၼ်ၵတ်ႉၶၼ်ႁတ်းႁၢၼ်ၶဝ် ဢမ်ႇၵိုတ်းဢမ်ႇၵျၢၼ်ႇသင် ၵႃႈတီႈၶဝ်လႃးလႃးၵွပ်ႈပိူဝ်ႈၵူၼ်းမဵဝ်းဢိသရေႇလတင်းလၢႆၼၼ်ႉဢေႃႈ။
၂ မိူဝ်ႈၼၼ်ႉထႃႇဝရႃႉၽြႃးမီးဢမိင်ႉတီႈ ယေႃးသု လႄႈဝႃႈ၊- မႂ်းဢဝ်မၢၵ်ႇႁိၼ်ႁဵတ်းမိတ်ႈၽၢႆသေလႄႈပၼ်မၢင်ႇၵလႃႇတၢင်းဢၼ်ထိူဝ်ႁိမ်း တီႈၵူၼ်းမဵဝ်းဢိသရေႇလ တင်းလၢႆထႅင်ႈပွၵ်ႈၼိုင်ႈတႃႉ၊ဝႃႈၼင်ႇၼႆ ဢေႃႈ။
၃ ယေႃးသုၵေႃႈဢဝ်မၢၵ်ႇႁိၼ်ႁဵတ်းမိတ်ႈၽၢႆလႄႈ ပၼ်မၢင်ႇၵလႃႇတင်းဢၼ်ထိူဝ်ႁိမ်းပၢႆၼင်ႇတီႈၵူၼ်းမဵဝ်းဢိသရေႇလတင်းလၢႆ ၵႃႈတီႈလွႆၵပိႁႃႇလႃႇ လုတ်ႉ(လွႆပၢႆၼင်)ၼၼ်ႉဢေႃႈ။
၄ လွင်ႈဢၼ်ယေႃးသုလႆႈပၼ်မၢင်ႇၵလႃႇ တၢင်းဢၼ်ထိူဝ်ႁိမ်းၸိူဝ်ႉၼင်ႇၼၼ်ၼၼ်ႉၸမ်း ၵႃႈပဵၼ်ၵူၼ်းၸၢႆးဢၼ်ပဵၼ်ၵူၼ်းသိုၵ်း ဢၼ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၸိူဝ်းၼၼ်ႉ လႆႈတၢႆၵႂႃႇၵႃႈၼႂ်းထိူၼ်ႇၸွမ်းတႃႈၸွမ်းတၢင်းဝၢႆးသေဢၼ် ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃး ၼၼ်ႉဢေႃႈ။
၅ ၶဝ်ၸိူဝ်းဢၼ်ဢွၵ်ႇသေၵႃႈၼႂ်းမိူင်းမႃးၼၼ်ႉတင်းသဵင်းတင်းလူင် လႆႈၶၢမ်ႇဢဝ်မၢင်ႇၵလႃႇထိူဝ်ႁိမ်းဝႆႉယဝ်ႉ။ၶဝ်ၸိူဝ်းဢၼ်ၵိူတ်ႇလဵင်ႉၵႃႈၼႂ်းထိူၼ်ႇၸွမ်းတႃႈၸွမ်းတၢင်းၸိူဝ်းၼၼ်ႉၸမ်း ဢမ်ႇပႆႇလႆႈ ၶၢမ်ႇမၢင်ႇၵလႃႇတင်းဢၼ်ထိူဝ်ႁိမ်း။
၆ ၵူၼ်းမဵဝ်းဢိသရေႇလ တင်းလၢႆ လႆႈလႄႇၵႂႃႇလႄႇမႃးယူႇၵႃႈၼႂ်းထိူၼ်သီႇသိပ်းပီႊတဵမ်တဵမ် တေႃႇထိုင်ႁွတ်ႈၵူၼ်းၸၢႆးဢၼ်ပဵၼ်ၵူၼ်းသိုၵ်း ဢၼ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတု မႃးတင်းသဵင်ႈတင်းလူင်ပေႃးတၢႆသဵင်မူတ်းၵွပ်ႈပိူဝ်ႈၶဝ်ဢမ်ႇထွမ်ႇဢမ်ႇဢဝ်ၵႂၢမ်း ထႃႇဝရႃႉၽြႃးၼၼ်ႉဢေႃႈ။ထႃႇဝရႃႉၽြႃးတိူင်ႇဝႃႈဝႆႉလွင်ႈဢၼ်ၶဝ်တၵ်းဢမ်ႇလႆႈႁၼ်မိူင်းဢၼ်ထႃႇဝရႃႉၽြႃး တိူင်ႇဝႃႈဝႆႉတီႈပူႇမွၼ်ႇႁဝ်း ဢၼ်တၵ်းပၼ်တီႈႁဝ်းၼၼ်ႉဢၼ်ပဵၼ်မိူင်း ဢၼ်ၼမ်ႉၼူမ်းတင်းၼမ်ႉၽိုင်ႈ ၸၢင်ႊလႆႈယူႇ ၼၼ်ႉဢေႃႈ။
၇ တီႈလုၵ်ႈလၢင်းၶဝ်ဢၼ်မၼ်းၸဝ်ႈႁႂ်ႈပဵၼ်တၢင်တူဝ်ၶဝ်ၸိူဝ်းၼၼ်ႉၸမ်း ယေႃးသုပၼ်မၢင်ႇၵလႃႇတင်းဢၼ်ထိူဝ်ႁိမ်းၶဝ် ၵွပ်ႈပိူဝ်ႈဢၼ်ၶဝ်ဢမ်ႇပႆႇလႆႈၶၢမ်ႇမၢင်ႇၵလႃႇတၢင်းဢၼ်ထိူဝ်ႁိမ်း၊ ပိူဝ်ႈဢၼ်ပိူၼ်ႈဢမ်ႇပၼ်မၢင်ႇၵလႃႇတီႈၶဝ်ၸွမ်းတႃႈၸွမ်း တၢင်းၼၼ်ႉဢေႃႈ။
၈ ၵူၼ်းတင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်ၶၢမ်ႇမၢင်ႇၵလႃႇတင်းဢၼ်ထိူဝ်ႁိမ်းသေယဝ်ႉ ယူႇၵႃႈၼႂ်းတီႈယူႇၶဝ်ၵႃႈၼႂ်းတပ်ႉတေႃႇထိုင် ႁွတ်ႈတၢင်းၸဵပ်းၶဝ်ႁၢႆၼၼ်ႉဢေႃႈ။
၉ ထႃႇဝရႃႉၽြႃးၵေႃႈလၢတ်ႈတီႈယေႃးသုလႄႈဝႃႈ၊-ဝၼ်းမိူဝ်ႈၼႆႉၵဝ်ပႄႇပႅတ်ႈ လွင်ႈတၢင်းဢၼ်လီသေႉသွမ်းဢၼ်ၸၢပ်ႈသႅင်ႇၵၼ်တင်းမိူင်းဢေႇၵႅပ်ႉတု ၼၼ်ႉသေၵႃႈတီႈသူယဝ်ႉ၊ဝႃႈၼင်ႇၼႆဢေႃႈ။ပိူဝ်ႈၼႆလႄႈၵႃႈတီႈၼၼ်ႉလႆႈၶၢမ်ႇတင်းဢၼ်ႁွင်ႉႁိၵ်ႈၸိုဝ်ၵိလၵႃႇလတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၁၀ ၵူၼ်းမဵဝ်းဢိသရေႇလတင်းလၢႆ ၶျႃးတပ်ႉယူႇၵႃႈတီႈၵိလၵႃႇလၼၼ်ႉလႄႈ ၶၢမ်ႇပွႆးပႃသၶႃႇၵႃႈၼႂ်းပၢင်ႇပဵင်းယေႇရိၶုဝ်းၼၼ်ႉ ၼႂ်းလိူၼ်ၼၼ်ႉလႆႈသိပ်းသီႇဝၼ်း ၶိင်ႇႁူဝ်ၶမ်ႈဢေႃႈ။
၁၁ ၶဝ်ၶၢမ်ႇပွႆးပႃသၶႃႇသေယဝ်ႉ၊ဝၼ်းမိူဝ်ႈၽုၵ်ႈၼၼ်ႉၶဝ်လႆႈၵိၼ်ၶဝ်ႈမုၼ်း ဢၼ်ဢမ်ႇပႃးၸိူဝ်ႉပႅင်ႈတင်း ၶဝ်ႈတႅၵ်ႇဢၼ်ဢဝ်ၶဝ်ႈမိူင်းႁဵတ်းၼၼ်ႉၼႂ်းဝၼ်းၼၼ်ႉၵမ်းလဵဝ်ဢေႃႈ။
၁၂ ဝၢႆးသေ ၶဝ်ၵိၼ်ၶဝ်ႈမိူင်းၶႃႇၼၢၼ်ႇၼၼ်ႉယဝ်ႉ ဝၼ်းမိူဝ်ႈၽုၵ်ႈမၢၼ်ႇၼႃႉထၢတ်ႇၵႂႃႇသေဢေႃႈ။ၵမ်းလိုၼ်းၵူၼ်းမဵဝ်းဢိသရေႇလတင်းလၢႆၼၼ်ႉ ဢမ်ႇလႆႈမၢၼ်ႇၼႃႉထႅင်ႈယဝ်ႉ။ၼႂ်းပီႊၼၼ်ႉၶဝ်လႆႈၵိၼ်မၢၵ်ႇၵိၼ်ႁူင်းဢၼ်ပဵၼ်ၵႃႈတီႈမိူင်းၶႃႇၼၢၼ်ႇၼၼ်ႉဢေႃႈ။
ဝဵင်းယေႇရိၶုဝ်းတူၵ်းသုမ်း
၁၃ ယေႃးသု ၼၼ်ႉၼႂ်းမိူဝ်ႈဢၼ်ယင်းတိုၵ်ႉမီးယူႇၵႃႈတီႈႁိမ်းဝဵင်းယေႇရိၶုဝ်း ယူႇၼၼ်ႉၸိုင် မၼ်းမုင်ႈတူၺ်းလႄႈ လႆႈႁၼ်ၵူၼ်းၵေႃႉၼိုင်ႈထွတ်ႇလၢပ်ႇယိပ်းၵမ်ယူႇသေလႄႈၸုၵ်းယူႇၵႃႈတီႈၽၢႆႇၼႃႈမၼ်းဢေႃႈ။ယေႃးသု ၵႂႃႇၸူးၵႃႈတီႈမၼ်းသေယဝ်ႉထၢမ်ဝႃႈ၊-မႂ်းပဵၼ်ၵေႃႉဢၼ်ယူႇၽၢႆႇႁဝ်းႁိုဝ်၊ ပဵၼ်ၵေႃႉဢၼ်ယူႇၽၢႆႇရၢၼ်ႇသူႇႁဝ်းႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ မၼ်း ၵေႃႈလၢတ်ႈလႄႈဝႃႈ၊-
၁၄ ဢမ်ႇၸႂ်ႈၸိူဝ်ႉၼင်ႇၼၼ်။ပဵၼ်ၶုၼ်ပူဝ်ႇ ဢၼ်ဢုပ်ႉပိူင်ႇပူဝ်ႇပႃႇထႃႇဝႃႉရၽြႃးလႄႈၵဝ်မႃးတေႃႈလဵဝ်ၼႆႉဢေႃႈ၊ဝႃႈၼင်ႇၼႆဢေႃႈ။ယေႃးသု ၵေႃႈမူပ်ႇတဵတ်ႇၵႃႈၼိူဝ်လိၼ်လႄႈၵူဝ်းၵွႆႇယူႇသေလႄႈလဝ်ႈထၢမ်ဝႃႈ၊-ၸဝ်ႈႁဝ်းတၵ်းမီးဢမိင်ႉတီႈၶႃႈၸဝ်းႁဝ်းၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇ ၼႆၸိုင်၊
၁၅ ၶုၼ်ပူဝ်ႇဢၼ်ဢုပ်ႉပိူင်ႇပူဝ်ႇပႃႇထႃႇဝရႃႉၽြႃးၼၼ်ႉလၢတ်ႈတီႈယေႃးသုလႄႈဝႃႈ၊-ထွတ်ႇၶႅပ်းတိၼ်မႂ်းသေၵႃႈတီႈတိၼ်မႂ်းတႃႉ။တီႈဢၼ်မႂ်းယဵပ်ႇၼႆႉၸမ်းပဵၼ်ဢၼ်မူတ်းၸၢင်ႇဢေႃႈ၊ ဝႃႈၼင်ႇၼႆလႄႈယေႃးသုၵေႃႈႁဵတ်းၸွမ်းဢေႃႈ။