Chapter
၇
ၽြႃးပဵၼ်ၸဝ်ႈပၼ်ၵတိသႅတ်ႈၸႃႇတေႃႇတႃႇဝိတ်ႉ
၁ မိူဝ်ႈဢၼ်ၶုၼ်ႁေႃၶမ်းလႆႈယူႇၼိမ်ၼိမ်လီလီၵႃႈတီႈႁၢင်ႈႁေႃလႄႈထႃႇဝရႃႉၽြႃးပၼ်မၼ်းၵတ်းယဵၼ်ၶျၢမ်းသႃႇႁႂ်ႈမၼ်းၵၢင်းလွတ်ႈသရေၢၼ်ႇသူႇဢၼ်မီးလဵပ်ႈႁွပ်ႈမၼ်းၵူႈတီႈၵူႈလႅၼ်ၼၼ်ႉၸိုင်ၶုၼ်ႁေႃၶမ်းၼၼ်ႉလၢတ်ႈတီႈပရေႃးၽိတ်ႈၼႃႇသၼ်ႇလႄႈဝႃႈ၊တူၺ်းလူး။
၂ ၵဝ်လႆႈယူႇၵႃႈၼႂ်းႁေႃမႆႉဢႃႇရိတ်ႉဢေႃႈ။တိူၵ်ႈပတိၺိၼ်ႇထႃႇဝရႃႉၽြႃးၸမ်းလႆႈယူႇၵႃႈၼႂ်းၽႃႈၵင်ႈၵူၺ်းဢေႃႈ၊ဝႃႈၼင်ႇၼႆလႄႈၼႃႇသၼ်ႇၵေႃႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-
၃ ၵႂႃႇလႄႈႁဵတ်းၸွမ်းၵႃႈၼင်ႇဢၼ်မီးၼႂ်းႁူဝ်ၸႂ်ၸဝ်ႈႁဝ်းၼၼ်ႉသေၵမ်းတီႈၶႃႈ။ထႃႇဝရႃႉၽြႃးမီးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၄ ၼႂ်းၶိုၼ်းၼၼ်ႉၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈၼႃႇသၼ်ႇလႄႈဝႃႈ၊-ၵႂႃႇလႄႈမွၵ်ႇလၢတ်ႈတီႈၶႃႈၵဝ်တႃႇဝိတ်ႉၼၼ်ႉလႄႈဝႃႈ၊-
၅ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-မႂ်းတၵ်းလႆႈႁဵတ်းႁိူၼ်းပုၼ်ႈဢၼ်ၵဝ်တၵ်းယူႇသဝ်းႁိုဝ်။
၆ ၸႃႉၸဵမ်မိူဝ်ႈဝၼ်းဢၼ်ၵဝ်ၼုၵ်ႈဢဝ်ၵူၼ်းမဵဝ်းဢိသရေႇလတင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉလႄႈၵဝ်ဢမ်ႇယူႇသဝ်းၵႃႈၼႂ်းႁိူၼ်းလႄႈယူႇၵႃႈၼႂ်းသုမ်ႉထဵင်မူဝ်းၵႃႇလႄႈလႄႇလဵပ်ႈၵူႈတီႈၵူႈလႅၼ်ႈမႃးယဝ်ႉ။
၇ မိူဝ်ႈဢၼ်ၵဝ်လႄႇလဵပ်ႈလူၺ်ႈၵၼ်တင်းၵူၼ်းမဵဝ်းဢိသရေႇလၵူႈတီႈၵူႈလႅၼ်ၼၼ်ႉၸိုင်ၸွင်ႇၵဝ်ယၢမ်ႈထၢမ်တီႈၵူၼ်းလူင်ဢၼ်ၸီႇယၢင်ႇတြႃးဢၼ်ၵဝ်ၸႂ်ႉသွႆႁႂ်ႈလႆႈလဵင်ႉလႆႈထိင်းၵူၼ်းၵဝ်မဵဝ်းဢိသရေႇလၸိူဝ်းၼၼ်ႉၼၼ်ႉသေၵေႃႉသေၵူၼ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူဢမ်ႇႁဵတ်းႁိူၼ်းမႆႉဢႃႇရိတ်ႉပုၼ်ႈၵဝ်၊ဝႃႈၼင်ႇၼႆႁိုဝ်။
၈ မိူဝ်ႈလဵဝ်ၼႆႉမႂ်းလၢတ်ႈတီႈၶႃႈၵဝ်တႃႇဝိတ်ႉလႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵဝ်ၼုၵ်ႈဢဝ်မႂ်းဢွၵ်ႇသေၵႃႈၼႂ်းၶွၵ်ႈသူဝ်းတီႈဢၼ်လဵင်ႉထိင်းသူဝ်းၼၼ်ႉမႃးလႄႈၶၢၼ်းမႂ်းဝႆႉၼႂ်းဢရႃႇၶုၼ်ဢၼ်ဢုပ်ႉပိူင်ႇၵူၼ်းၵဝ်ၵူၼ်းမဵဝ်းဢိသရေႇလတင်းလၢႆၼႆႉယဝ်ႉ။
၉ ၵဝ်ၸွမ်းလူၺ်ႈၵၼ်တင်းမႂ်းၵႂႃႇၵႃႈတီႈဢၼ်မႂ်းၵႂႃႇၼၼ်ႉလႄႈပႄႇၽဵဝ်ႈပႅတ်ႈရၢၼ်ႇသူႇမႂ်းၵႃႈမီးၸိူဝ်းၼၼ်ႉၵႃႈတီႈၽၢႆႇၼႃႈမႂ်းသေယဝ်ႉ၊ပၼ်ၼႃႇမႃႉၸိုဝ်သဵင်တီႈမႂ်းမိူၼ်ၸိူဝ်ႉၼင်ႇၼႃႇမႃႉၸိုဝ်သဵင်ၵူၼ်းယႂ်ႇၵူၼ်းလူင်ၼႂ်းၵူၼ်းလိၼ်မိူင်းတင်းလၢႆၼၼ်ႉယဝ်ႉ။
၁၀ ၼွၵ်ႈသေၼၼ်ႉၵဝ်တၵ်းၸီႇယၢင်ႇၶၢၼ်းဝႆႉတီႈဢၼ်ၵူၼ်းမဵဝ်းဢိသရေႇလတင်းလၢႆတၵ်းလႆႈယူႇၼၼ်ႉလႄႈႁႂ်ႈၶဝ်မၼ်ႈၶိူင်ႇသေယဝ်ႉၵမ်းလိုၼ်းဢမ်ႇလႆႈၶၢႆႉလႆႈပုတ်ႈလႄႈယူႇၵႃႈၼႂ်းတီႈယူႇၶဝ်ၼၼ်ႉဢေႃႈ။
၁၁ ၵမ်းလိုၼ်းၶဝ်ၸိူဝ်းဢၼ်ဢမ်ႇတြႃးၼၼ်ႉတၵ်းဢမ်ႇလႆႈၼိၵ်ႈၸၢၵ်ႈငႅၼ်းသေးၶဝ်မိူၼ်ၸိူဝ်ႉၼင်ႇဢၼ်မိူဝ်ႈဢွၼ်တၢင်းၼၼ်ႉဢိၵ်ႇတင်းၶိင်ႇမိူဝ်ႈဢၼ်ၵဝ်ၶၢၼ်းၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉၵႃႈၼႂ်းၵူၼ်းၵဝ်မဵဝ်းဢိသရေႇလတင်းလၢႆၼၼ်ႉ။မႂ်းၵေႃႈတၵ်းႁႂ်ႈၵတ်းယဵၼ်ၶျၢမ်းသႃႇၵၢင်းလွတ်ႈသေၵႃႈၼႂ်းမိုဝ်းရၢၼ်ႇသူႇမႂ်းတင်းသဵင်ႈတင်းလူင်ဢေႃႈ။
၁၁ လိူဝ်သေၼၼ်ႉဢမ်ႇၵႃးထႃႇဝရႃႉၽြႃးမွၵ်ႇလၢတ်ႈတီႈမႂ်းလူၺ်ႈလွင်ႈဢၼ်ထႃႇဝရႃႉၽြႃးတၵ်းႁႂ်ႈပီႈၼွင်ႉၸိူဝ်ႉၶိူဝ်းမႂ်းတႄႇယူႇၼၼ်ႉဢေႃႈ။မိူဝ်ႈဢၼ်မိုဝ်ႉဝၼ်းဢသၢၵ်ႈမႂ်းတၵ်းတႅမ်လႄႈမႂ်းတၵ်းၼွၼ်းလပ်းလူၺ်ႈၵၼ်တင်းပူႇမွၼ်ႇမႂ်းၸိူဝ်းၼၼ်ႉၸိုင်ၵဝ်တၵ်းယုၵ်ႉယွင်ႈၸိူဝ်ႉၶိူဝ်းမႂ်းလိုၼ်းမႂ်းဢၼ်သိုပ်ႇဢွၵ်ႇၵႃႈတီႈမႂ်းၼၼ်ႉလႄႈႁႂ်ႈသိုင်ႇၸိုင်ႈဝၢၼ်ႈမိူင်းမၼ်းတႄႇယူႇဢေႃႈ။
၁၃ မၼ်းၼၼ်ႉတၵ်းလႆႈႁဵတ်းႁိူၼ်းပုၼ်ႈၼႃႇမႃႉၸိုဝ်သဵင်ၵဝ်လႄႈၵဝ်တၵ်းႁႂ်ႈရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းမၼ်းၼၼ်ႉတႄႇယူႇတႃႇသေႇဢေႃႈ။
၁၄ ၵဝ်တၵ်းပဵၼ်ပေႃႈမၼ်းလႄႈမၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ။ပေႃးမၼ်းႁဵတ်းတူႉၸရိူၵ်ႈၸိုင်ၵဝ်တၵ်းဢဝ်တင်းၶွၼ်ႉဝၢႆဢၼ်ၵူၼ်းၸၢင်ႊသုင်းၼၼ်ႉသင်ႇသွၼ်သုင်းမႃႉမၼ်းလႄႈၵဝ်တၵ်းပေႃႉယႅၼ်ႉမၼ်းမိူၼ်ၸိူဝ်ႉၼင်ႇၵူၼ်းပေႃႉယႅၼ်ႉၼၼ်ႉဢေႃႈ။
၁၅ ၵူၺ်းၵႃႈၵရူႉၼႃႇၵဝ်တၵ်းဢမ်ႇၽၢတ်ႇယၢၼ်သေၵႃႈတီႈမၼ်းမိူၼ်ၸိူဝ်ႉၼင်ႇဢၼ်ၵဝ်ၼုၵ်ႈဢဝ်သေၵႃႈတီႈသေႃးလုဢၼ်ၵဝ်ပႅတ်ႈဝႆႉၵႃႈတီႈၽၢႆႇၼႃႈမႂ်းၼၼ်ႉ။
၁၆ မဵဝ်းၸိူဝ်ႉၶိူဝ်းမႂ်းဢိၵ်ႇတင်းသိုင်ႇၸိုင်ႈဝၢၼ်ႈမိူင်းမႂ်းၼၼ်ႉတၵ်းတႄႇယူႇတႃႇသေႇမၼ်ႈၶိူင်ႇၵႃႈတီႈၽၢႆႇၼႃႈမႂ်းဢေႃႈ။ရႃႇၸႃႉပလၢင်ႇမႂ်းၵေႃႈတၵ်းတႄႇယူႇတႃႇသေႇမၼ်ႈၶိူင်ႇဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၇ ၼင်ႇၼၼ်လႄႈၼႃႇသၼ်ႇဢဝ်ၵႂၢမ်းပျႃႇတိၵ်ႈၸဝ်ႈၵႃႈမီးၼၼ်ႉဢိၵ်ႇတင်းရူႇပႃႇရူင်ႇတင်းသဵင်ႈတင်းမူတ်းၼၼ်ႉၶိုၼ်းမွၵ်ႇလၢတ်ႈပၼ်တီႈတႃႇဝိတ်ႉဢေႃႈ။
တၢင်းသူးတွင်းတႃႇဝိတ်ႉ
၁၈ မိူဝ်ႈၼၼ်ႉၶုၼ်လူင်တႃႇဝိတ်ႉၶဝ်ႈၵႂႃႇၵႃႈၼႂ်းလႄႈၼင်ႈယူႇၵႃႈတီႈၽၢႆႇၼႃႈထႃႇဝရႃႉၽြႃးသေလႄႈသူးတွင်းလႄႈဝႃႈ၊-ၸဝ်ႈထႃႇဝရႃႉၽြႃးတီႈၶႃႈ။ၶႃႈၸဝ်ႈၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈၸဝ်ႈႁဝ်းတၵ်းယုၵ်ႉယွင်ႈၶႃႈၸဝ်ႈၼႃႇလူင်လၢင်ထၢၼ်ႇၼႆႉတီႈၶႃႈ။မဵဝ်းၸိူဝ်ႉၶိူဝ်းၶႃႈၸဝ်ႈၼႆႉပဵၼ်မဵဝ်းၸိူဝ်ႉၶိူဝ်းၸိူဝ်ႉၼင်ႇႁိုဝ်တီႈၶႃႈ။
၁၉ လိူဝ်သေၼၼ်ႉဢမ်ႇၵႃးၸဝ်ႈထႃႇဝရႃႉၽြႃးတီႈၶႃႈ။ၵျေးၸူးၸဝ်ႈၼၼ်ႉပဵၼ်ၵျေးၸူးဢၼ်လဵၵ်ႉဢၼ်ၵေႇဢမ်ႇၸႂ်ႈတီႈၶႃႈ။ၸဝ်ႈႁဝ်းၶႃႈယင်းႁေႃးမွၵ်ႇလၢတ်ႈဝႆႉလူၺ်ႈလွင်ႈမိူဝ်းၼႃႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၼႆႉတီႈၶႃႈလူင်ပေႇ။ၸဝ်ႈထႃႇဝရႃႉၽြႃးတီႈၶႃႈ။ၸဝ်ႈႁဝ်းယၢမ်ႈႁဵတ်းၵႃႈတီႈၵူၼ်းၸိူဝ်ႉၼင်ႇၼႆတီႈၶႃႈႁိုဝ်။
၂၀ ထႃႇဝရႃႉၽြႃးတီႈၶႃႈ၊တႃႇဝိတ်ႉတၵ်းလႆႈလဝ်ႈလၢတ်ႈၸိူဝ်ႉၼင်ႇႁိုဝ်ထႅင်ႈတီႈၶႃႈ။ၸဝ်ႈထႃႇဝရႃႉၽြႃးတီႈၶႃႈ။ၸဝ်ႈႁဝ်းႁူႉၶႃႈၸဝ်ႈႁဝ်းယူႇတီႈၶႃႈဢေႃႈ။
၂၁ ၵွပ်ႈပိူဝ်ႈဢၼ်ၸဝ်ႈႁဝ်းထွၵ်ႈလူၺ်ႈၼုၵ်ႈၵပၢတ်ႈၸဝ်ႈႁဝ်းသေလႄႈၸွမ်းၵႃႈၼင်ႇဢၼ်ဢလူဝ်ႇႁူဝ်ၸႂ်ၸဝ်ႈႁဝ်းမီးၼၼ်ႉၸဝ်ႈႁဝ်းႁဵတ်းလွင်ႈတၢင်းၵူႈၸိူဝ်ႉၵူႈပိူင်ဢၼ်ယႂ်ႇၼႃႇလူင်လၢင်ၸိူဝ်းၼႆႉႁႂ်ႈၶႃႈၸဝ်ႈလႆႈႁူႉလွင်ႈမၼ်းတီႈၶႃႈယဝ်ႉ။
၂၂ ပိူဝ်ႈဢၼ်ပဵၼ်ၼင်ႇၼႆလႄႈ၊ၸဝ်ႈထႃႇဝရႃႉၽြႃးတီႈၶႃႈ။ၸဝ်ႈႁဝ်းယႂ်ႇမျၢတ်ႈတီႈၶႃႈဢေႃႈ။ၵႃႈၼင်ႇဢၼ်ၶႃႈၸဝ်ႈႁဝ်းတင်းသဵင်ႈတင်းလူင်လႆႈငိၼ်းၼၼ်ႉဢမ်ႇမီးၽြႃးဢၼ်မိူၼ်ၵၼ်တင်းၸဝ်ႈႁဝ်းတီႈၶႃႈ။ၼွၵ်ႈသေၸဝ်ႈႁဝ်းဢမ်ႇမီးၽြႃးတၢင်ႇသူႇတၢင်ႇပႃးတီႈၶႃႈ။
၂၃ ၵႃႈၼိူဝ်လိၼ်မိူင်းၼႆႉၵူၼ်းမဵဝ်းဢၼ်မိူၼ်ၵူၼ်းၸဝ်ႈႁဝ်းမဵဝ်းဢိသရေႇလဢၼ်ၽြႃးပဵၼ်ၸဝ်ႈၵႂႃႇလႄႈထုတ်ႇၼုၵ်ႈဢဝ်ပုၼ်ႈမၼ်းၸဝ်ႈၼင်ႇႁိုဝ်တၵ်းႁႂ်ႈၼႃႇမႃႉၸိုဝ်ႈသဵင်မၼ်းၸဝ်ႈထၢင်ႇသႃးလႄႈႁဵတ်းလွင်ႈတၢင်းဢၼ်ယႂ်ႇဢၼ်လူင်လၢင်ဢိၵ်ႇတင်းလွင်ႈတၢင်းဢၼ်လီၵူဝ်လီႁႄတင်းလၢႆပုၼ်ႈမိူင်းၸဝ်ႈႁဝ်းၵႃႈတီႈၽၢႆႇၼႃႈၵူၼ်းၸဝ်ႈႁဝ်းဢၼ်ၸဝ်ႈႁဝ်းထုတ်ႈၼုၵ်ႈဢဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုတင်းမိူင်းတင်းလၢႆထုတ်ႇဢွၵ်ႇသေၵႃႈၼႂ်းၽြႃးၶဝ်တင်းလၢႆၼၼ်ႉၸွင်ႇမီးၵူၼ်းမဵဝ်းသေၸိူဝ်ႉသမေဵဝ်းႁိုဝ်။
၂၄ ၸဝ်ႈႁဝ်းႁႂ်ႈၵူၼ်းၸဝ်ႈႁဝ်းမဵဝ်းဢိသရေႇလၼႆႉမၼ်ႈၶိူင်ႇၼႅၼ်ႈလီလႄႈႁႂ်ႈၶဝ်လႆႈပဵၼ်ၵူၼ်းၸဝ်ႈႁဝ်းယူႇတႃႇသေႇလႄႈၸဝ်ႈႁဝ်းထႃႇဝရႃႉၽြႃးၼႆႉပဵၼ်ၽြႃးပဵၼ်ၸဝ်ႈၶဝ်တီႈၶႃႈဢေႃႈ။
၂၅ မိူဝ်ႈလဵဝ်ၼႆႉၸိုင်ထႃႇဝရႃႉၽြႃးတီႈၶႃႈ။ႁႂ်ႈၵႂၢမ်းဢၼ်ၸဝ်ႈႁဝ်းမီးဢမိင်ႉဝႆႉတီႈၶႃႈၸဝ်ႈႁဝ်းဢိၵ်ႇတင်းပီႈၼွင်ႉၸိူဝ်ႉၶိူဝ်းၶႃႈၸဝ်ႈႁဝ်းၸိူဝ်းၼၼ်ႉတႄႇယူႇတႃႇသေႇမၼ်ႈၶိူင်ႇလႄႈႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၼၼ်ႉသေၵမ်းတီႈၶႃႈ။
၂၆ ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းမီးတၢင်းဢၼ်ယုၵ်ႉယွင်ႈယူႇတႃႇသေႇလႄႈဝႃႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈဢၼ်လႆႈဢုပ်ႉပိူင်ႇမဵဝ်းဢိသရေႇလဢေႃႈ၊ဝႃႈၼင်ႇၼႆယူႇသေၵမ်းလူၺ်ႈတီႈၶႃႈ။ႁႂ်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းတႃႇဝိတ်ႉၼႆႉတႄႇယူႇၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ။
၂၇ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ၊ၵွပ်ႈပိူဝ်ႈဢၼ်ၸဝ်ႈႁဝ်းပၼ်ပျႃႇတိၵ်ႈတီႈၶႃႈၸဝ်ႈႁဝ်းၼႆႉလႄႈဝႃႈ၊-ၵဝ်တၵ်းႁႂ်ႈမဵဝ်းၸိူဝ်ႉၶိူဝ်းမႂ်းတႄႇယူႇဢေႃႈ၊ဝႃႈၼင်ႇၼႆၼၼ်ႉလႄႈၶႃႈၸဝ်ႈႁဝ်းၼႆႉမီးၸႂ်ဢၼ်ၶႂ်ႈႁဵတ်းသူးတွင်းပထၼႃႇၼႆႉၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။
၂၈ မိူဝ်ႈလဵဝ်ၼႆႉၵေႃႈၸဝ်ႈထႃႇဝရႃႉၽြႃးတီႈၶႃႈ။ၸဝ်ႈႁဝ်းၸႂ်ႈၽြႃးပဵၼ်ၸဝ်ႈတီႈၶႃႈဢေႃႈ။ၵႂၢမ်းၸဝ်ႈႁဝ်းၵေႃႈၸိုဝ်ႈၸႂ်ႈတီႈၶႃႈဢေႃႈ။ၵျေးၸူးၼႆႉၸိုင်ၸဝ်ႈႁဝ်းဝႆႉၵတိတီႈၶႃႈၸဝ်ႈႁဝ်းၼႆႉတီႈၶႃႈယဝ်ႉ။
၂၉ ပိူဝ်ႈဢၼ်ပဵၼ်ၼင်ႇၼႆလႄႈၶႅၼ်းတေႃႈမီးၸႂ်ဢၼ်ဢူၼ်ႈၼူပ်ႈၵွမ်းၸူးႁႂ်ႈလႆႈပၼ်တၢင်းလီတီႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၼႆႉႁႂ်ႈတႄႇယူႇၵႃႈတီႈၽၢႆႇၼႃႈၸဝ်ႈႁဝ်းတႃႇသေႇမၼ်ႈၶိူင်ႇသေၵမ်းတီႈၶႃႈ။ၸဝ်ႈထႃႇဝရႃႉၽြႃးတီႈၶႃႈ။ၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၼၼ်ႉလႄႈႁႂ်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၼႆႉလႆႈၶၢမ်ႇမၢင်ႇၵလႃႇဢၼ်ၸဝ်ႈႁဝ်းပၼ်တၢင်းလီၼၼ်ႉယူႇတႃႇသေႇမၼ်ႈၶိူင်ႇသေၵမ်းလူၺ်ႈတီႈၶႃႈ၊ဝႃႈၼင်ႇၼႆဢေႃႈ။