Chapter
၁၃
ဢပသလုမ်ႇတင်းတႃႇမႃႇ
၁ ဢပသလုမ်ႇ၊လုၵ်ႈၸၢႆးတႃႇဝိတ်ႉ၊ၼၼ်ႉမီးၼွင်ႉယိင်းဢၼ်ႁၢင်ႈလီၵေႃႉၼိုင်ႈဢၼ်လႆႈၸိုဝ်တႃႇမႃႇၼၼ်ႉဢေႃႈ။ဢႃႇမၼုၼ်ႇ၊လုၵ်ႈၸၢႆးတႃႇဝိတ်ႉ၊ငိၼ်းႁၵ်ႉငိၼ်းပႅင်းမၼ်းၼၼ်ႉဢေႃႈ။
၂ ဢႃႇမၼုၼ်ႇၼၼ်ႉယၢပ်ႇၸႂ်ယုင်ႈၸႂ်ၼႃႇထၢၼ်ႈပေႃးၸပ်းတၢင်းၶႆႈတၢင်းပဵၼ်ၵွပ်ႈပိူဝ်ႈၼွင်ႉယိင်းမၼ်းတႃႇမႃႇၼၼ်ႉဢေႃႈ။လွင်ႈမၼ်းၸမ်းတႃႇမႃႇၼၼ်ႉပဵၼ်သၢဝ်ၵၢၼ်ႇၺႃႇလႄႈဢႃႇမၼုၼ်ႇဢမ်ႇၸၢင်ႊၵျၢမ်ႇပွင်ၵႃႈၼိူဝ်မၼ်းသေၸိူဝ်ႉသေပိူင်။
၃ ဢႃႇမၼုၼ်ႇၼၼ်ႉမီးၵေႃႉသေႈၵေႃႉၼိုင်ႈဢၼ်လႆႈၸိုဝ်ယေႃးၼတပ်ႉဢၼ်ပဵၼ်လုၵ်ႈၸၢႆးသိမႃႇ၊ပီႈၸၢႆးတႃႇဝိတ်ႉ၊ၼၼ်ႉဢေႃႈ။ယေႃးၼတပ်ႉၼၼ်ႉပဵၼ်ၵေႃႉဢၼ်လၵ်းလႅမ်ၼႃႇလူင်လၢင်ဢေႃႈ။
၄ မၼ်းထၢမ်ဢႃႇမၼုၼ်ႇလႄႈဝႃႈ၊-ၸဝ်ႈႁဝ်းၼႆႉပဵၼ်လုၵ်ႈၸၢႆးၶုၼ်ႁေႃၶမ်းလူင်သေလႄႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈယွမ်ႁဵဝ်ႇၵႂႃႇယေႈဝၼ်းယေႈဢိတ်းယူႇ။ဢမ်ႇမွၵ်ႇလၢတ်ႈၼႄတီႈၶႃႈၸဝ်ႈလႆႈၶႃႈႁိုဝ်၊ဝႃႈၼင်ႇၼႆဢေႃႈ။ဢႃႇမၼုၼ်ႇၶိုၼ်းလၢတ်ႈလႄႈဝႃႈ၊-ၵဝ်မီးၸႂ်ဢၼ်ၸပ်းၸွႆးတႃႇမႃႇဢၼ်ပဵၼ်ၼွင်ႉယိင်းဢပသလူမ်ႇဢၼ်ပဵၼ်ၼွင်ႉၸၢႆးၵဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၅ ယေႃးၼတပ်ႉၵေႃႈလၢတ်ႈတီႈမၼ်းလႄႈဝႃႈ၊-ၼွၼ်းယဵတ်ႇယူႇဢိူၼ်လိူၼ်ၵႃႈၼိူဝ်ၵူႇတီႈၼွၼ်းမႂ်းၼၼ်ႉတႃႉ။မႂ်းႁဵတ်းၸိူဝ်ႉၼင်ႇႁၢင်ႊမီးတၢင်းၶႆႈတၢင်းပဵၼ်ၼၼ်ႉတႃႉ။မိူဝ်ႈဢၼ်ပေႃႈမႂ်းမႃးလူမႃးတူၺ်းမႂ်းၼၼ်ႉမႂ်းတၵ်းလႆႈယွၼ်းဝႃႈ၊-ႁႂ်ႈၼွင်ႉယိင်းၶႃႈတႃႇမႃႇၼၼ်ႉမႃးႁဵတ်းလဵင်ႉႁဵတ်းလူတီႈၶႃႈၸဝ်ႈသေၵမ်းၶႃႈ။ႁႂ်ႈမၼ်းမႃးတူမ်ႈမႃးႁုင်ၵႃႈတီႈၽၢႆႇၼႃႈၶႃႈၸဝ်ႈၼႆႉလႄႈႁႂ်ႈၶႃႈၸဝ်ႈလႆႈႁၼ်တၢင်းၵိၼ်တၢင်းၶူပ်းဢၼ်မၼ်းႁုင်ၼၼ်ႉလႄႈၵိၼ်ၵႃႈတီႈမိုဝ်းမၼ်းသေၵမ်းၶႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၆ ဢႃႇမၼုၼ်ႇၵေႃႈၼွၼ်းယဵတ်ႇယူႇဢိူၼ်လိူၼ်ႁဵတ်းမိူၼ်ၸိူဝ်ႉၼင်ႇႁၢင်ႊမီးတၢင်းၶႆႈတၢင်းပဵၼ်ၼၼ်ႉဢေႃႈ။မိူဝ်ႈဢၼ်ပေႃႈၶုၼ်ႁေႃၶမ်းမႃးလူမႃးတူၺ်းမၼ်းၼၼ်ႉဢႃႇမၼုၼ်ႇလဝ်ႈယွၼ်းဢၶႂၢင်ႉတီႈၶုၼ်ႁေႃၶမ်းႁႂ်ႈတႃႇမႃႇၼွင်ႉယိင်းမၼ်းမႃးႁဵတ်းၶဝ်ႈမုၼ်းသွင်ၶႅပ်းၵႃႈတီႈၽၢႆႇၼႃႈမၼ်းႁႂ်ႈမၼ်းလႆႈၵိၼ်ၵႃႈတီႈမိုဝ်းမၼ်းၼၼ်ႉဢေႃႈ။
၇ တႃႇဝိတ်ႉၵေႃႈသင်ႇလၢတ်ႈၵႂႃႇၵႃႈတီႈတႃႇမႃႇလႄႈဝႃႈ၊-မႂ်းၵႂႃႇၵႃႈတီႈႁိူၼ်းပီႈၸၢႆးမႂ်းဢႃႇမၼုၼ်ႇၼၼ်ႉသေလႄႈႁုင်တၢင်းၵိၼ်တၢင်းၶူပ်းပၼ်တီႈမၼ်းသေၵမ်း၊ဝႃႈၼင်ႇၼႆလႄႈ၊တႃႇမႃႇၵေႃႈၵႂႃႇၸူးတီႈႁိူၼ်းပီႈၸၢႆးမၼ်းဢႃႇမၼုၼ်ႇဢၼ်ၼွၼ်းယဵတ်ႇယူႇဢိူၼ်လိူၼ်ၵႃႈၼိူဝ်ၵူႇၼၼ်ႉဢေႃႈ။
၈ တႃႇမႃႇဢဝ်ၽွင်ၶဝ်ႈမုၼ်းလႄႈၼူတ်ႈသေယဝ်ႉ၊ႁဵတ်းၶဝ်ႈမုၼ်းၶႅပ်းၵႃႈတီႈၽၢႆႇၼႃႈပီႈၸၢႆးမၼ်းလႄႈမူၵ်းဢေႃႈ။
၉ မၼ်းဢဝ်သႂ်ႇဝၢၼ်ႇၽႄလႄႈတမ်းၵႃႈတီႈၽၢႆႇၼႃႈဢႃႇမၼုၼ်ႇသေၵေႃႈမၼ်းဢမ်ႇႁပ်ႉတုင်းဢဝ်လႄႈၵိၼ်။မၼ်းႁႂ်ႈၵူၼ်းဢၼ်မီးဢွၼ်ၵၼ်ဢွၵ်ႇၵႂႃႇလႄႈၶဝ်ၵေႃႈဢွၵ်ႇၵႂႃႇသေဢေႃႈ။
၁၀ လိုၼ်းၼၼ်ႉဢႃႇမၼုၼ်ႇလၢတ်ႈတီႈတႃႇမႃႇလႄႈဝႃႈ၊-ဢဝ်တၢင်းၵိၼ်ၼၼ်ႉမႃးၵႃႈၼႂ်းလုၵ်းၵဝ်ႁႂ်ႈၵဝ်လႆႈၵိၼ်ၵႃႈတီႈမိုဝ်းမႂ်းသေၵမ်း၊ဝႃႈၼင်ႇၼႆလႄႈတႃႇမႃႇၵေႃႈဢဝ်ၶဝ်ႈမုၼ်းၶႅပ်းဢၼ်မၼ်းႁဵတ်းၸိူဝ်းၼၼ်ႉသေယဝ်ႉၶဝ်ႈၵႂႂႃႇၵႃႈၼႂ်းလုၵ်းတီႈဢၼ်ပီႈၸၢႆးမၼ်းဢႃႇမၼုၼ်ႇမီးၼၼ်ႉဢေႃႈ။
၁၁ မိူဝ်ႈဢၼ်မၼ်းဢဝ်ၵႂႃႇၸူးၵႃႈတီႈႁိမ်းမၼ်းပုၼ်ႈဢၼ်မၼ်းၼၼ်ႉတၵ်းၵိၼ်ၼၼ်ႉၸိုင်ဢႃႇမၼုၼ်ႇၼၼ်ႉတိုတ်ႉၸၼ်ဢဝ်မၼ်းသေလႄႈလၢတ်ႈဝႃႈ၊-ၼွင်ႉယိင်းၵဝ်ဢိူၺ်း။မႃးလႄႈၼွၼ်းလူၺ်ႈၵၼ်တင်းၵဝ်သေၵမ်း၊ဝႃႈၼင်ႇၼႆဢေႃႈ။မၼ်းၵေႃႈလၢတ်ႈလႄႈဝႃႈ၊-ပီႈၸၢႆးၵဝ်ၶႃႈဢိူၺ်း။
၁၁ ယႃႇပေႁဵတ်းသေၵမ်းၶႃႈ။ယႃႇႁဵတ်းႁႂ်ႈၵဝ်ၶႃႈတူၵ်းတီႈတႅမ်ႇသေၵမ်းၶႃႈ။ဢမ်ႇထုၵ်ႇလီႁဵတ်းၸိူဝ်ႉၼင်ႇၼႆၵႃႈၼႂ်းမဵဝ်းဢိသရေႇလႁဝ်းၶႃႈ။ယႃႇပေႁဵတ်းဢမူႉဢၼ်ႁၢႆႉဢၼ်မိူၵ်ႈၼႆႉသေၵမ်းၶႃႈ။
၁၃ ပေႃးႁဵတ်းၸိုင်ၵဝ်ၶႃႈတၵ်းဢဝ်တၢင်းဢၼ်လီဢူၵ်းလီဢၢႆၵဝ်ၶႃႈပႅတ်ႈၵႃႈတီႈလႂ်။ၸဝ်ႈၵေႃႈတၵ်းပဵၼ်ၸိူဝ်ႉၼင်ႇၵေႃႉဢၼ်မိူၵ်ႈဢၼ်ယုတ်ႈၼၼ်ႉၵႃႈၼႂ်းမဵဝ်းဢိသရေႇလၶႃႈဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈလဝ်ႈလၢတ်ႈတီႈၶုၼ်ႁေႃၶမ်းသေၵမ်းၶႃႈ။ပေႃးလဝ်ႈလၢတ်ႈၸိုင်မၼ်းၸဝ်ႈယင်းဢမ်ႇပၼ်ဢဝ်ၵၼ်လႄႈဢမ်ႇယူႇၵူၺ်း၊ဝႃႈၼင်ႇၼႆသေၵေႃႈ၊မၼ်းဢမ်ႇထွမ်ႇ။
၁၄ ပိူဝ်ႈဢၼ်ႁႅင်းမၼ်းၼၼ်ႉယိင်ႈၶႅၼ်းယႂ်ႇၼႃႇသေႁႅင်းမေႈယိင်းၼၼ်ႉလႄႈတဵၵ်းၵၼ်ႉမၼ်းဢေႃႈ။
လိုၼ်းၼၼ်ႉဢႃႇမၼုၼ်ႇၼၼ်ႉသမ်ႉမီးၸႂ်ဢၼ်ငိၼ်းၸင်းမၼ်းၼႃႇလူင်လၢင်ဢေႃႈ။
၁၅ တၢင်းဢၼ်ငိၼ်းၸင်းၼၼ်ႉယိင်ႈၶႅၼ်းယႂ်ႇၼႃႇသတေၢင်းဢၼ်ငိၼ်းႁၵ်ႉဢၼ်မၼ်းႁၵ်ႉမိူဝ်ႈဢွၼ်တၢင်းၼၼ်ႉဢေႃႈ။
၁၆ ဢႃႇမၼုၼ်ႇလၢတ်ႈတီႈမၼ်းလႄႈဝႃႈ၊-မႂ်းလုၵ်ႉလႄႈၵႂႃႇတႃႉ၊ဝႃႈၼင်ႇၼႆဢေႃႈ။မၼ်းၵေႃႈလၢတ်ႈလႄႈဝႃႈ၊-ဢမ်ႇၸႂ်ႈၶႃႈၵူၺ်း။ဢပျႅတ်ႈဢၼ်ႁေႃႈၵဝ်ၶႃႈဢွၵ်ႇပႅတ်ႈၵႂႃႇမိူဝ်ႈလဵဝ်ၼႆႉၼၼ်ႉယိင်ႈၶႅၼ်းယႂ်ႇၼႃႇသေဢပျႅတ်ႈဢၼ်လႆႈႁဵတ်းမႃးတီႈၵဝ်ၶႃႈၼၼ်ႉၶႃႈဢေႃႈ၊ဝႃႈၼင်ႇၼႆသေၵေႃႈမၼ်းဢမ်ႇထွမ်ႇဢမ်ႇဢဝ်။
၁၇ မိူဝ်ႈၼၼ်ႉမၼ်းၼၼ်ႉႁွင်ႉဢဝ်ၶႃႈၸႂ်ႉၶႃႈသွႆၵေႃႉၼိုင်ႈလႄႈပၼ်ဢမိင်ႉဝႃႈ၊-ႁေႃႈမေႈယိင်းၼႆႉဢွၵ်ႇၵႂႃႇသေလႄႈသွတ်ႇသေႊၽၵ်းတူဝႆႉတႃႉ၊ဝႃႈၼင်ႇၼႆဢေႃႈ။
၁၈ မၼ်းၼုင်ႈၶူဝ်းၼုင်ႈသိူဝ်ႈဢၼ်ယူင်ႉလီယၢဝ်းလီၸွမ်းၵႃႈၼင်ႇဢၼ်လုၵ်ႈယိင်းၶုၼ်ႁေႃၶမ်းဢၼ်ပဵၼ်သၢဝ်ၵၢၼ်ႇၺႃႇၸင်ႇၼုင်ႈၼၼ်ႉယူႇဢေႃႈ။ၶႃႈၸႂ်ႉၶႃႈသွႆၼၼ်ႉၵေႃႈႁေႃႈမၼ်းဢွၵ်ႇလႄႈသွတ်ႇသေႊၽၵ်းတူဝႆႉသေဢေႃႈ။
၁၉ တႃႇမႃႇၵေႃႈဢဝ်တဝ်ႊတၢင်ႇသႂ်ႇၵႃႈၼိူဝ်ႁူဝ်မၼ်းသေလႄႈသိၵ်ႇသိူဝ်ႈဢၼ်ယူင်ႉလီယၢဝ်းလီမၼ်းၼၼ်ႉသေယဝ်ႉဢဝ်မိုဝ်းမၼ်းတၢင်ႇႁူဝ်မၼ်းယူႇ၊ႁႆႈႁွင်ႉၸွမ်းတၢင်းယူႇသေလႄႈၶိုၼ်းမိူဝ်းၵႂႃႇဢေႃႈ။
၂၀ ပီႈၸၢႆးဢွၵ်ႇမၼ်းဢပသလုမ်ႇၵေႃႈလၢတ်ႈတီႈမၼ်းလႄႈဝႃႈ၊-ပီႈၸၢႆးၵဝ်ဢႃႇမၼုၼ်ႇၼၼ်ႉလႆႈမီးလူၺ်ႈၵၼ်တင်းမႂ်းယဝ်ႉႁိုဝ်။ၼွင်ႉယိင်းၵဝ်ဢိူၺ်း။ယူႇတဵတ်ႇတဵတ်ႇယဵၼ်ယဵၼ်တႃႉ။မၼ်းပဵၼ်ပီႈၸၢႆးမႂ်းဢေႃႈ။ယႃႇပဝေႆႉၸႂ်လူၺ်ႈလွင်ႈဢမူႉၼႆႉ၊ဝႃႈၼင်ႇၼႆဢေႃႈ။တႃႇမႃႇၵေႃႈယူႇတဵတ်ႇတဵတ်ႇယဵၼ်ယဵၼ်ယူႇၵႃႈတီႈႁိူၼ်းပီႈၸၢႆးမၼ်းဢပသလုမ်ႇၼၼ်ႉဢေႃႈ။
၂၁ မိူဝ်ႈဢၼ်ၶုၼ်လူင်တႃႇဝိတ်ႉႁူႉငိၼ်းလွင်ႈတၢင်းၵႃႈမီးၼၼ်ႉၸိုင်မၼ်းၸႂ်မႆႈၶႆႈၸႃႉၼႃႇလူင်လၢင်ဢေႃႈ။
၂၂ ဢပသလုမ်ႇဢမ်ႇလၢတ်ႈၵႂၢမ်းဢၼ်လီဢၼ်ၸႃႉတီႈပီႈဢၢႆႈမၼ်းဢႃႇမၼုၼ်ႇၼၼ်ႉ။ၼႂ်းဝႃႈၼၼ်သေၵေႃႈဢပသလုမ်ႇမီးၸႂ်ဢၼ်ၸင်းဢႃႇမၼုၼ်ႇၵွပ်ႈပိူဝ်ႈဢၼ်မၼ်းႁဵတ်းႁႂ်ႈၼွင်ႉယိင်းမၼ်းတႃႇမႃႇလႆႈတူၵ်းတီႈတႅမ်ႇၼၼ်ႉဢေႃႈ။
ဢပသလုမ်ႇဢဝ်ဢႃႇမၼုၼ်ႇတၢႆ
၂၃ လိုၼ်းၼၼ်ႉမိူဝ်ႈဢၼ်လႆႈသွင်ပီႊတဵမ်တဵမ်ယဝ်ႉၸိုင်ဢပသလုမ်ႇႁဵတ်းပွႆးၵႅတ်းႁႆးၶူၼ်သူဝ်းၵႃႈတီႈဝၢၼ်ႈပႃႇလႁႃႇၸေႃႇၵႃႈတီႈႁိမ်းဝဵင်းဢေးၽရိမ်ႇၼၼ်ႉလႄႈဢပသလုမ်ႇၽိတ်ႉပၢင်းဢဝ်လုၵ်ႈၸၢႆးၶုၼ်ႁေႃၶမ်းတင်းသဵင်ႈတင်းလူင်ဢေႃႈ။
၂၄ ဢပသလုမ်ႇၶဝ်ႈၸူးၵႃႈတီႈၶုၼ်ႁေႃၶမ်းလႄႈလဝ်ႈလၢတ်ႈလႄႈဝႃႈ၊-တူၺ်းတီႈၶႃႈလူး။ၶႃႈၸဝ်ႈႁဝ်းႁဵတ်းပွႆးၵႅတ်းႁႆးၶူၼ်သူဝ်းတီႈၶႃႈဢေႃႈ။ၸဝ်ႈႁဝ်းဢိၵ်ႇတင်းၶႃႈၸဝ်ႈႁဝ်းတင်းလၢႆဢွၼ်ၵၼ်မႃးသေၵမ်းၶႃႈ၊ဝႃႈၼင်ႇၼႆသေၵေႃႈၶုၼ်ႁေႃၶမ်းလၢတ်ႈတီႈဢပသလုမ်ႇလႄႈဝႃႈ၊-ဢမ်ႇထုၵ်ႇလီၵႂႃႇၵူၺ်း၊လုၵ်ႈၸၢႆးၵဝ်ဢိူၺ်း။
၂၅ ပေႃးႁဝ်းတင်းသဵင်ႈတင်းလူင်ၵႂႃႇၸိုင်တၵ်းပဵၼ်ဢၼ်ၼၵ်းၼႃၶၢၼ်ၸႂ်တီႈမႂ်းဢေႃႈ၊ဝႃႈၼင်ႇၼႆဢေႃႈ။မၼ်းၸူဝ်းဢဝ်မၼ်းၸဝ်ႈသေၵေႃႈ၊တူဝ်မၼ်းၸဝ်ႈယင်းဢမ်ႇၵႂႃႇလႄႈမၼ်းၵူၺ်းပၼ်တၢင်းလီသေဢေႃႈ။
၂၆ ဢပသလုမ်ႇၵေႃႈလဝ်ႈလၢတ်ႈထႅင်ႈလႄႈဝႃႈ၊-ပေႃးၸဝ်ႈႁဝ်းဢမ်ႇၸွမ်းဢမ်ႇၵႂႃႇတီႈၶႃႈၸိုင်ပၼ်ဢၶႂၢင်ႉႁႂ်ႈပီႈၸၢႆးၶႃႈၸဝ်ႈဢႃႇမၼုၼ်ႇၼၼ်ႉလႆႈၸွမ်းၶႃႈၸဝ်ႈၵႂႃႇသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ၶုၼ်ႁေႃၶမ်းလၢတ်ႈတီႈမၼ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈတၵ်းလႆႈႁႂ်ႈမၼ်းၸွမ်းလူၺ်ႈၵၼ်တင်းမႂ်းၵႂႃႇ၊ဝႃႈၼင်ႇၼႆသေၵေႃႈ
၂၇ ဢပသလုမ်ႇၼၼ်ႉတုၵ်းတဝ်ႇၼႃႇလူင်လၢင်လႄႈၶုၼ်ႁေႃၶမ်းပၼ်ဢၶႂၢင်ႉဢၼ်ၸႃႉၸဵမ်ဢႃႇမၼုၼ်ႇလႄႈလုၵ်ႈၸၢႆးၸဝ်ႈၵႃႈမီးၸိူဝ်းၼၼ်ႉၸွမ်းၵႂႃႇဢေႃႈ။
၂၈ ဢပသလုမ်ႇၵေႃႈသင်ႇလၢတ်ႈတီႈၵူၼ်းမၼ်းတင်းလၢႆလႄႈဝႃႈ၊-သူဢွၼ်ၵၼ်ပႂ်ႉထႃႈၶိင်ႇမိူဝ်ႈဢၼ်ဢႃႇမၼုၼ်ႇၵိၼ်ၼမ်ႉၸပိတ်ႉပူၼ်ႉလိူဝ်လႄႈမဝ်းၼၼ်ႉတႃႉ။မိူဝ်ႈဢၼ်ၵဝ်ဝႃႈ၊-ဢွၼ်ၵၼ်တႅင်းဢႃႇမၼုၼ်ႇတၢႆတႃႉ၊ဝႃႈၼင်ႇၼႆၼၼ်ႉၸိုင်သူဢဝ်မၼ်းတၢႆတႃႉ။ယႃႇပေၵူဝ်။ၵဝ်ပၼ်ဢမိင်ႉဢမ်ႇၸႂ်ႈႁိုဝ်။ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ၊ဝႃႈၼင်ႇၼႆလႄႈ၊ၶႃႈၵူၼ်းဢပသလုမ်ႇၸိူဝ်းၼၼ်ႉၵေႃႈဢွၼ်ၵၼ်ႁဵတ်းတီႈဢႃႇမၼုၼ်ႇၸွမ်းၵႃႈၼင်ႇဢၼ်ဢပသလုမ်ႇသင်ႇလၢတ်ႈဝႆႉၼၼ်ႉဢေႃႈ။
၂၉ မိူဝ်ႈၼၼ်ႉလုၵ်ႈၸၢႆးၸဝ်ႈၶုၼ်ႁေႃၶမ်းၵႃႈမီးၸိူဝ်းၼၼ်ႉဢွၼ်ၵၼ်လုၵ်ႉလႄႈၶီႇမႃႉလီႈၶဝ်သေလႄႈဢွၵ်ႇပၢႆဢေႃႈ။
၃၀ မိူဝ်ႈဢၼ်ၶဝ်ယင်းတိုၵ်ႉၸွမ်းတၢင်းမႃးယူႇၼၼ်ႉၸိုင်သတၢင်းသဵင်ၶၢဝ်ႇႁွတ်ႈထိုင်ၵႃႈတီႈတႃႇဝိတ်ႉလႄႈဝႃႈ၊-ဢပသလုမ်ႇဢဝ်လုၵ်ႈၸၢႆးၶုၼ်ႁေႃၶမ်းတၢႆတင်းသဵင်ႈတင်းလူင်ယဝ်ႉ။ဢမ်ႇၵိုတ်းဢမ်ႇၵျၢၼ်ႇသေၵေႃႉယဝ်ႉ၊ဝႃႈၼင်ႇၼႆၸိုင်ၶုၼ်ႁေႃၶမ်းလုၵ်ႉလႄႈသိၵ်ႇၶူဝ်းၼုင်ႈမၼ်းသေယဝ်ႉၼွၼ်းယဵတ်ႇယူႇၵႃႈၼိူဝ်လိၼ်ဢေႃႈ။ၶႃႈၵူၼ်းၸဝ်ႈၵႃႈမီးၸိူဝ်းၼၼ်ႉၵေႃႈသိၵ်ႇၶူဝ်းၼုင်ႈၶဝ်သေလႄႈဢွၼ်ၵၼ်ၸုၵ်းယူႇၵႃႈတီႈႁိမ်းမၼ်းဢေႃႈ။
၃၂ ယေႃးၼတပ်ႉ၊လုၵ်ႈၸၢႆးသိမႃႇ၊ပီႈၸၢႆးတႃႇဝိတ်ႉ၊ၼၼ်ႉလဝ်ႈလၢတ်ႈလႄႈဝႃႈ၊-ယႃႇပေယုမ်ႇလွင်ႈဢၼ်လုၵ်ႈၸၢႆးၸဝ်ႈႁဝ်းတၢႆယဝ်ႉတင်းသဵင်ႈၼၼ်ႉ။ဢႃႇမၼုၼ်ႇၵေႃႉလဵဝ်ၵူၺ်းတၢႆၶႃႈဢေႃႈ။ၸႃႉၸဵမ်ဝၼ်းဢၼ်မၼ်းတဵၵ်းၵၼ်ႉတႃႇမႃႇ၊ၼွင်ႉယိင်းမၼ်းၼၼ်ႉဢပသလုမ်ႇၸင်ႇၵျၢမ်ႇပွင်ၸိူဝ်ႉၼင်ႇၼႆယဝ်ႉ။
၃၃ မိူဝ်ႈလဵဝ်ၼႆႉၸဝ်ႈၶုၼ်လူင်ႁဝ်းၶႃႈယႃႇပေဢဝ်သႂ်ႇၸႂ်လႄႈထၢင်ႇထိူမ်လွင်ႈဢၼ်လုၵ်ႈၸၢႆးၸဝ်ႈၶုၼ်လူင်ႁဝ်းတင်းသဵင်ႈတင်းမူတ်းတၢႆယဝ်ႉၼၼ်ႉသေၵမ်းတီႈၶႃႈ။ဢႃႇမၼုၼ်ႇၵေႃႉလဵဝ်ၵူၺ်းတၢႆယဝ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၃၄ ဢပသလုမ်ႇၵေႃႈဢွၵ်ႇပၢႆၵႂႃႇသေဢေႃႈ။မိူဝ်ႈဢၼ်ၵူၼ်းဢွၼ်ဢၼ်ပႂ်ႉၵၢင်ၼၼ်ႉမုင်ႈတူၺ်းၸိုင်လႆႈႁၼ်ၵူၼ်းၼမ်ၼႃႇၸွမ်းသဵၼ်ႈတၢင်းပဵမ်ႉလွႆမႃးၵႃႈတီႈၽၢႆႇတၢင်းလင်ဢေႃႈ။
၃၅ ယေႃးၼတပ်ႉၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-တူၺ်းတီႈၶႃႈလူး။လုၵ်ႈၸၢႆးၶုၼ်လူင်ၸိူဝ်းၼၼ်ႉဢွၼ်ၵၼ်မႃးတီႈၶႃႈယဝ်ႉ။
၃၆ ၵႂၢမ်းဢၼ်ၶႃႈၸဝ်ႈလဝ်ႈလၢတ်ႈၼၼ်ႉၸႂ်ႈတီႈၶႃႈယဝ်ႉ၊ဝႃႈၼင်ႇၼႆလႄႈမိူဝ်ႈဢၼ်မၼ်းလဝ်ႈလၢတ်ႈၸိူဝ်ႉၼင်ႇၼၼ်ယဝ်ႉတူဝ်ႈယဝ်ႉၼၼ်ႉလုၵ်ႈၸၢႆးၶုၼ်ႁေႃၶမ်းၸိူဝ်းၼၼ်ႉဢွၼ်ၵၼ်ႁွတ်ႈမႃးလႄႈၵိဝ်သဵင်သေလႄႈႁႆႈႁွင်ႉဢေႃႈ။ၶုၼ်ႁေႃၶမ်းဢိၵ်ႇတင်းၶႃႈၵူၼ်းၸဝ်ႈၸိူဝ်းၼၼ်ႉၵေႃႈဢွၼ်ၵၼ်ႁႆႈႁွင်ႉၼႃႇလူင်လၢင်ဢေႃႈ။
၃၇ ဢပသလုမ်ႇၼၼ်ႉဢွၵ်ႇပၢႆလႄႈၵႂႃႇၸူးၵႃႈတီႈတႃႇလမေႇ၊လုၵ်ႈၸၢႆးဢမိႁုတ်ႉ၊ၶုၼ်လူင်ၵေႇသုရၼၼ်ႉဢေႃႈ။တႃႇဝိတ်ႉႁႆႈႁွင်ႉပွင်ႉၶင်းၵွပ်ႈပိူဝ်ႈလုၵ်ႈၸၢႆးမၼ်းၼၼ်ႉၵူႈမိုဝ်ႉၵူႈဝၼ်းဢေႃႈ။
၃၈ ၼင်ႇၼၼ်လႄႈဢပသလုမ်ႇဢွၵ်ႇပၢႆၵႂႃႇၸူးၵႃႈတီႈဝဵင်းၵေႇသုရသေလႄႈယူႇၵႃႈတီႈၼၼ်ႉသၢမ်ပီႊဢေႃႈ။ၶုၼ်လူင်တႃႇဝိတ်ႉၵေႃႈၸႂ်ထိုင်ဢပသလုမ်ႇယူႇဢေႃႈ။
၃၉ လွင်ႈမၼ်းၸမ်းမၼ်းပျေႇၸႂ်လူၺ်ႈလွင်ႈဢႃႇမၼုၼ်ႇတၢႆယဝ်ႉၼၼ်ႉဢေႃႈ။