Chapter
၁၇
၁ လၢႆးသမ်ႉဢႁိသေႃႇၽေႇလလဝ်ႈလၢတ်ႈတီႈဢပသလုမ်ႇလႄႈဝႃႈ၊-ႁႂ်ႈၶႃႈၸဝ်ႈလႆႈလိူၵ်ႈၵဵပ်းဢဝ်ၵူၼ်းမိုၼ်ႇပၢႆသွင်ႁဵင်သေၵမ်းၶႃႈ။ၼႂ်းၶိုၼ်းၼႆႉၵမ်းလဵဝ်ၶႃႈၸဝ်ႈတၵ်းလုၵ်ႉလႄႈလိုပ်ႈၸွမ်းလမ်းၸွမ်းတႃႇဝိတ်ႉၶႃႈဢေႃႈ။
၂ ၶႃႈၸဝ်ႈတၵ်းဢဝ်တၢင်းဢၼ်လီၵူဝ်လီႁေလႄႈတိုၵ်းတေႃးမၼ်းၼႂ်းမိူဝ်ႈဢၼ်မၼ်းႁိူဝ်ႉဢူၼ်ႈယူႇႁႅင်းမိုဝ်းမၼ်းၵေႇယူႇၼၼ်ႉၶႃႈဢေႃႈ။ၶဝ်ၸိူဝ်းဢၼ်ပႃးၵႃႈတီႈမၼ်းၵႃႈမီးၼၼ်ႉတၵ်းၽူင်ႉပၢႆယၢႆႈၼီႇလႄႈၶႃႈၸဝ်ႈတၵ်းဢဝ်ၶုၼ်ႁေႃၶမ်းၵူၺ်းလူမ်ႉတၢႆတီႈၶႃႈဢေႃႈ။
၃ ၶႃႈၸဝ်ႈတၵ်းဢဝ်ၵူၼ်းတင်းသဵင်ႈတင်းလူင်ၶိုၼ်းမႃးတီႈၸဝ်ႈႁဝ်းတီႈၶႃႈဢေႃႈ။တၢင်းတၢႆၵေႃႉဢၼ်ၸဝ်ႈႁဝ်းႁႃၼၼ်ႉၵေႃႉၼိုင်ႈၵူၺ်းၼၼ်ႉပဵၼ်ၸိူဝ်ႉၼင်ႇဢၼ်ၵူၼ်းတင်းသဵင်ႈတင်းလူင်ဢွၼ်ၵၼ်ၶိုၼ်းမႃးၼၼ်ႉတီႈၶႃႈဢေႃႈ။ၼင်ႇၼၼ်လႄႈၵူၼ်းတင်းသဵင်ႈတင်းလူင်တၵ်းဢမ်ႇလႆႈတိူဝ်ႉမၢတ်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၄ ၵႂၢမ်းၼၼ်ႉထုၵ်ႇၸႂ်ၵျိူၵ်ႈၸႂ်ဢပသလုမ်ႇဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်းဢိသရေႇလတင်းသဵင်ႈတင်းလူင်ၼၼ်ႉဢေႃႈ။
၅ မိူဝ်ႈၼၼ်ႉဢပသလုမ်ႇလၢတ်ႈလႄႈဝႃႈ၊-ႁွင်ႉဢဝ်ႁုသေႇ၊ၵူၼ်းဢႃႇၶိ၊ၼၼ်ႉမႃးတႃႉ။ဢွၼ်ၵၼ်ထွမ်ႇငိၼ်းၵႂၢမ်းမၼ်းလူးၵွၼ်ႇတႃႉႁဝ်း၊ဝႃႈၼင်ႇၼႆလႄႈ၊ႁုသေႇၵေႃႈႁွတ်ႈမႃးၵႃႈတီႈဢပသလုမ်ႇသေယဝ်ႉဢပသလုမ်ႇလၢတ်ႈတီႈမၼ်းလႄႈဝႃႈ၊-
၆ ဢႁိသေႃႇၽေႇလပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇၼၼ်ယဝ်ႉ။
၇ ထုၵ်ႇလီထွမ်ႇဢဝ်ၵႂၢမ်းမၼ်းႁိုဝ်၊ဢမ်ႇၼၼ်ၵေႃႈမႂ်းတၵ်းလၢတ်ႈၸိူဝ်ႉၼင်ႇႁိုဝ်၊ဝႃႈၼင်ႇၼႆသေယဝ်ႉ၊ႁုသေႇၵေႃႈလဝ်ႈလၢတ်ႈတီႈဢပသလုမ်ႇလႄႈဝႃႈ၊-တၢင်းၵျၢမ်ႇတၢင်းပွင်ဢၼ်ဢႁိသေႃႇၽေႇလပၼ်မိူဝ်ႈလဵဝ်ၼႆႉၼၼ်ႉဢမ်ႇထုၵ်ႇဢမ်ႇလီတီႈၶႃႈ။
၈ ၸဝ်ႈႁဝ်းႁူႉလွင်ႈဢၼ်တႃႇဝိတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉပဵၼ်ၵူၼ်းဢၼ်ႁႅင်းယႂ်ႇၼႃႇဢိၵ်ႇတင်းၶဝ်မီးၸႂ်ဢၼ်ႁၢဝ်ႉၵျၢမ်းၼႃႇမိူၼ်ၸိူဝ်ႉၼင်ႇမီမေႈၵႃႈၼႂ်းထိူၼ်ႇဢၼ်လႆႈၶၢမ်ႇတၢင်းဢၼ်ပိူၼ်ႁိမ်ဢဝ်လုၵ်ႈဢွၼ်ႇမၼ်းၵႂႃႇယဝ်ႉၼၼ်ႉတီႈၶႃႈဢေႃႈ။ၸဝ်ႈပေႃႈၸဝ်ႈႁဝ်းၼၼ်ႉၵေႃႈပဵၼ်ႁူဝ်ႁၢၼ်ၵူၼ်းသိုၵ်းလႄႈမၼ်းဢမ်ႇၼွၼ်းလူၺ်ႈၵၼ်တင်းၵူၼ်းတင်းလၢႆ။
၉ တူၺ်းလူး။မိူဝ်ႈလဵဝ်ၼႆႉမၼ်းတၵ်းတဵတ်ႇမႅပ်းယူႇၵႃႈၼႂ်းၶုမ်လိၼ်ႁူးလိၼ်သတေီႈတီႈ၊ဢမ်ႇၼၼ်ၵေႃႈၵႃႈတီႈတၢင်ႇတီႈတၢင်ႇလႅၼ်တီႈၶႃႈဢေႃႈ။ပေႃးၶဝ်လႆႈငိၼ်းၵူၼ်းၵမ်ႈၽွင်ႈလူမ်ႉတၢႆယဝ်ႉၸိုင်၊ၶဝ်တၵ်းဝႃႈ၊-ၶဝ်ၸိူဝ်းဢၼ်ၸွမ်းလင်ဢပသလုမ်ႇၼၼ်ႉတူၵ်းသုမ်းယဝ်ႉ၊ဝႃႈၼင်ႇၼႆလႄႈႁူဝ်ၸႂ်ၵူၼ်းႁတ်းႁၢၼ်မိူၼ်သၢင်ႇသီႈၼၼ်ႉတၵ်းၸိုမ်းႁၢႆၵႂႃႇတီႈၶႃႈဢေႃႈ။
၁၀ ၵူၼ်းမဵဝ်းဢိသရေႇလတင်းသဵင်ႈတင်းလူင်ႁူႉလွင်ႈဢၼ်ၸဝ်ႈပေႃႈၸဝ်ႈႁဝ်းၼၼ်ႉပဵၼ်ၵေႃႉဢၼ်ႁႅင်းယႂ်ႇဢိၵ်ႇတင်းလွင်ႈဢၼ်ၶဝ်ၸိူဝ်းဢၼ်ပႃးၸွမ်းတီႈမၼ်းၸဝ်ႈၼၼ်ႉပဵၼ်ၵေႃႉဢၼ်မီးတၢင်းဢၼ်ၵတ်ႉၶၼ်ႁတ်းႁၢၼ်ၼၼ်ႉယူႇတီႈၶႃႈဢေႃႈ။
၁၁ ပိူဝ်ႈဢၼ်ပဵၼ်ၼင်ႇၼႆလႄႈၶႃႈၸဝ်ႈတၵ်းပၼ်တၢင်းၵျၢမ်ႇတၢင်းပွင်တီႈၶႃႈဢေႃႈ။ႁႂ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢဝ်ၵႃႈတီႈဝဵင်းတၼ်ႇတေႃႇထိုင်ႁွတ်ႈဝဵင်းပေႇရသေႇၽ၊ဢၼ်ၼပ်ႉဢၢၼ်ႇမိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႉတြႃႇၸိူဝ်းၼၼ်ႉၸူႉၵၼ်တုမ်ၵၼ်ၵႃႈတီႈၸဝ်ႈႁဝ်းလႄႈတူဝ်ၸဝ်ႈႁဝ်းဢွၼ်ႁူဝ်ၶီႇသိုၵ်းၵႂႃႇသေၵမ်းၶႃႈ။
၁၁ လိုၼ်းၼၼ်ႉႁဝ်းၶႃႈတၵ်းတိုၵ်းတေႃးမၼ်းၵႃႈတီႈဢၼ်ထူပ်းႁၼ်မၼ်းၼၼ်ႉလႄႈႁူမ်ႇသုမ်ႇမၼ်းဝႆႉမိူၼ်ၸိူဝ်ႉၼင်ႇၼမ်ႉၼၢႆးတူၵ်းသႂ်ႇၵႃႈၼိူဝ်လိၼ်ၼၼ်ႉသေလႄႈတၵ်းဢမ်ႇႁႂ်ႈတူဝ်မၼ်းဢိၵ်ႇတင်းၶဝ်ၸိူဝ်းဢၼ်ပႃးတီႈမၼ်းၼၼ်ႉလႆႈၵိုတ်းလႆႈၵျၢၼ်ႇဝႆႉသေၵေႃႉသေၵူၼ်းၶႃႈ။
၁၃ ၼွၵ်ႈသေၼၼ်ႉပေႃးမၼ်းပၢႆၶဝ်ႈၵႃႈၼႂ်းဝဵင်းသဝေဵင်းဝဵင်းၸိုင်၊ၵူၼ်းမဵဝ်းဢိသရေႇလတင်းသဵင်ႈတင်းလူင်တၵ်းလႆႈဢွၼ်ၵၼ်ဢဝ်ၸိူၵ်ႈလႄႈၶဝ်ႈၵႃႈၼႂ်းဝဵင်းၼၼ်ႉသေယဝ်ႉႁဝ်းၶႃႈတၵ်းဢွၼ်ၵၼ်တိုတ်ႉၸၼ်ဢဝ်ဝဵင်းၼၼ်ႉတူၵ်းပႅတ်ႈၵႃႈၼႂ်းၼမ်ႉႁွင်ႊတေႃႇထိုင်ႁွတ်ႈထၢၼ်ႈပေႃးမၢၵ်ႇႁိၼ်ႁေဢမ်ႇလႆႈၵိုတ်းလႆႈၵျၢၼ်ႇဝႆႉသလေုၵ်ႈၵႃႈတီႈၼၼ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆလႄႈ
၁၄ ဢပသလုမ်ႇဢိၵ်ႇတင်းၵူၼ်းၵူၼ်းမဵဝ်းဢိသရေႇလၵႃႈမီးၸိူဝ်းၼၼ်ႉဢွၼ်ၵၼ်လၢတ်ႈလႄႈဝႃႈ၊-တၢင်းၵျၢမ်ႇတၢင်းပွင်ဢၼ်ႁုသေႇ၊ၵူၼ်းဢႃႇၶိ၊ပၼ်ၼႆႉယိင်ႈၶႅၼ်းလီၼႃႇသတေၢင်းၵျၢမ်ႇတၢင်းပွင်ဢၼ်ဢႁိသေႃႇၽေႇလပၼ်ၼၼ်ႉဢေႃႈ၊ဝႃႈၼင်ႇၼႆဢေႃႈ။လွင်ႈမၼ်းၸမ်းထႃႇဝရႃႉၽြႃးၸီႇယၢင်ႇႁႂ်ႈလႆႈယႃႉတၢင်းၵျၢမ်ႇတၢင်းပွင်ဢၼ်လီဢၼ်ဢႁိသေႃႇၽေႇလပၼ်ၼၼ်ႉလႄႈႁဵတ်းႁႂ်ႈၽေးလႆႈႁွတ်ႈထိုင်ၵႃႈၼိူဝ်ဢပသလုမ်ႇဢေႃႈ။
၁၅ မိူဝ်ႈၼၼ်ႉႁုသေႇသင်ႇလၢတ်ႈတီႈယိတ်ႉပရေႃးႁိၵ်ႉၸႃႇတုၵ်ႉတင်းဢပျႃႇထႃႇလႄႈဝႃႈ၊-ဢႁိသေႃႇၽေႇလပၼ်တၢင်းၵျၢမ်ႇတၢင်းပွင်ဢၼ်ၸိူဝ်ႉၼင်ႇၼႆၸိူဝ်ႉၼင်ႇၼၼ်တီႈဢပသလုမ်ႇဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉယဝ်ႉ။
၁၆ ၵဝ်ၶႃႈၵေႃႈပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇၼၼ်ၸိူဝ်ႉၼင်ႇၼႆယဝ်ႉ။ပိူဝ်ႈဢၼ်ပဵၼ်ၼင်ႇၼႆလႄႈၶႅၺ်းတေႃႈပွႆႇၸႂ်ႉၵူၼ်းၵႂႃႇၶၼ်ၶၼ်ၽႂ်းၽႂ်းလႄႈလဝ်ႈလၢတ်ႈတီႈတႃႇဝိတ်ႉ၊ၶိုၼ်းၼႆႉယႃႇပေႁႂ်ႈမၼ်းယူႇၵႃႈတီႈတိုဝ်ႉတႃႈၵႃႈၼႂ်းထိူၼ်ႇၼၼ်ႉသေၵမ်းၶႃႈ။ႁႂ်ႈမၼ်းၶၢမ်ႈၵႂႃႇၶၼ်ၶၼ်ၽႂ်းၽႂ်းသေၵမ်းၶႃႈ။ၵူဝ်ၶုၼ်ႁေႃၶမ်းဢိၵ်ႇတင်းၵူၼ်းဢၼ်ပႃးတီႈမၼ်းၸိူဝ်းၼၼ်ႉတၵ်းႁွတ်ႈထိုင်တၢင်းဢၼ်လူႉသုမ်းတီႈၶႃႈဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၇ ယေႃးၼသၼ်ႇတင်းဢႁိမတ်ႉယူႇၵႃႈတီႈဢိၼ်ႇရေႃႇၵေႇလဢေႃႈ။မေႈယိင်းဢွၼ်ႇၵေႃႉၼိုင်ႈၵႂႃႇလၢတ်ႈပၼ်တီႈသွင်ၶႃႁႂ်ႈသွင်ၶႃႈၵႂႃႇလၢတ်ႈပၼ်တီႈၶုၼ်လူင်တႃႇဝိတ်ႉၼၼ်ႉဢေႃႈ။လွင်ႈမၼ်းၸမ်းၵူဝ်ပိူၼ်ႁၼ်လႄႈသွင်ၶႃဢမ်ႇၶဝ်ႈၵႃႈၼႂ်းဝဵင်း။
၁၈ ၵူၺ်းၵႃႈၵူၼ်းဢွၼ်ႇၵေႃႉၼိုင်ႈႁၼ်သွင်ၶႃလႄႈလဝ်ႈလၢတ်ႈတီႈဢပသလုမ်ႇဢေႃႈ။သွင်ၶႃၵေႃႈဢွၵ်ႇၵႂႃႇၶၼ်ၶၼ်ၽႂ်းၽႂ်းလႄႈၶဝ်ႈၵႃႈၼႂ်းႁိူၼ်းၵူၼ်းၵေႃႉၼိုင်ႈဢၼ်မီးၵႃႈတီႈဝဵင်းပႃႇႁုရိမ်ႇၼၼ်ႉသေယဝ်ႉလူင်းၵႂႃႇယူႇၵႃႈၼႂ်းၼမ်ႉမေႃႇၼၼ်ႉဢေႃႈ။
၁၉ မေးၸဝ်ႈႁိူၼ်းၼၼ်ႉဢဝ်ဢၼ်ႁူမ်ႇၼမ်ႉမေႃႇၼၼ်ႉႁူမ်ႇပၢၵ်ႇၼမ်ႉမေႃႇဝႆႉသေယဝ်ႉ၊ဢဝ်မဵတ်ႉၶဝ်ႈတၢၵ်ႇဝႆႉၵႃႈၼိူဝ်ၼၼ်ႉဢေႃႈ။ၽႂ်ဢမ်ႇႁူႉလွင်ႈၼၼ်ႉလႃးလႃး။
၂၀ ၶႃႈၵူၼ်းဢပသလုမ်ႇၸိူဝ်းၼၼ်ႉႁွတ်ႈထိုင်ၵႃႈတီႈႁိူၼ်းမေႈယိင်းၼၼ်ႉလႄႈထၢမ်ႇဝႃႈ၊-ဢႁိမတ်ႉတင်းယေႃးၼသၼ်ႇမီးၵႃႈလႂ်၊ဝႃႈၼင်ႇၼႆလႄႈမေႈယိင်းၼၼ်ႉၵေႃႈလၢတ်ႈလႄႈဝႃႈ၊-သွင်ၶႃၶၢမ်ႈၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႊယဝ်ႉ၊ဝႃႈၼင်ႇၼႆဢေႃႈ။ၶဝ်ၵေႃႈသွၵ်ႈႁႃဢမ်ႇထူပ်းဢမ်ႇႁၼ်လႄႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇသေဢေႃႈ။
၂၁ ဝၢႆးသေဢၼ်ၶဝ်ၶိုၼ်းမိူဝ်းၵႂႃႇယဝ်ႉၼၼ်ႉသွင်ၶႃၵေႃႈလုၵ်ႉသေၵႃႈၼႂ်းၼမ်ႉမေႃႇဢွၵ်ႇမႃးလႄႈၵႂႃႇလဝ်ႈလၢတ်ႈတီႈၶုၼ်လူင်တႃႇဝိတ်ႉလႄႈဝႃႈ၊-လုၵ်ႉလႄႈၶၢမ်ႈၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႊၶၼ်ၶၼ်ၽႂ်းၽႂ်းသေၵမ်းၶႃႈ။ဢႁိသေႃႇၽေႇလယူႇၽၢႆႇၼိုင်ႈတင်းၸဝ်ႈႁဝ်းသေလႄႈပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇၼႆၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊
၂၂ တႃႇဝိတ်ႉဢိၵ်ႇတင်းၶဝ်ၸိူဝ်းဢၼ်ပႃးတီႈမၼ်းၵႃႈမီးၼၼ်ႉၵေႃႈဢွၼ်ၵၼ်လုၵ်ႉလႄႈၶၢမ်ႈၼမ်ႉႁွင်ႊယေႃႇတၼ်ႇၵႂႃႇဢေႃႈ။မိူဝ်ႈဢၼ်မိူင်းလႅင်းၼၼ်ႉၸိုင်ၵေႃႉဢၼ်ဢမ်ႇပႆႇၶၢမ်ႈပူၼ်ႉၼမ်ႉႁွင်ႊယေႃႇတၼ်ႇၼၼ်ႉဢမ်ႇမီးသေၵေႃႉသေၵူၼ်း။
၂၃ မိူဝ်ႈဢၼ်ဢႁိသေႃႇၽေႇလႁူႉႁၼ်လွင်ႈဢၼ်ဝႃႈတၢင်းၵျၢမ်ႇတၢင်းပွင်မၼ်းၼၼ်ႉဢမ်ႇပဵၼ်ၼၼ်ႉၸိုင်မၼ်းႁၢင်ႈၵွပ်းမႃႉလီႈမၼ်းသေလႄႈၵႂႃႇၸူးၵႃႈတီႈႁိူၼ်းမၼ်းၵႃႈတီႈဝဵင်းတီႈယူႇမၼ်းၼၼ်ႉသေယဝ်ႉမႄးၽဵဝ်ႈႁူၼ်းမၼ်းယဝ်ႉတူဝ်လီငၢမ်းလႄႈဢဝ်ၸိူၵ်ႈမတ်ႉႁွႆႈၵႅၼ်ႈၶေႃးမၼ်းသေလႄႈဢဝ်တူဝ်ၸဝ်ႈၵဝ်ႇတၢႆသေဢေႃႈ။မၼ်းလႆႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းပႃႇႁဵဝ်ႈပူႇမွၼ်ႇမၼ်းၸိူဝ်းၼၼ်ႉဢေႃႈ။
၂၄ တႃႇဝိတ်ႉႁွတ်ႈထိုင်ၵႃႈတီႈဝဵင်းမႁႃႇၼိမ်ႇလႄႈဢပသလုမ်ႇတင်းၵူၼ်းဢိသရေႇလၸိူဝ်းၼၼ်ႉၵေႃႈၶၢမ်ႈၼမ်ႉႁွင်ႊယေႃႇတၼ်ႇၵႂႃႇဢေႃႈ။
၂၅ ဢပသလုမ်ႇၶၢၼ်းဢႃႇမသၼႂ်းဢရႃႇၶုၼ်ပူဝ်ႇၶျုၵ်ႈတၢင်တူဝ်ယႂႃႇၽဢေႃႈ။ဢႃႇမသပဵၼ်လုၵ်ႈၸၢႆးယေႇသႃႇ၊ၵူၼ်းဢိသရေႇလဢၼ်ဢဝ်ၵၼ်တင်းဢၽိၵေႇလ၊ဢၼ်ပဵၼ်လုၵ်ႈယိင်းၼႃႇႁတ်ႉဢၼ်ပဵၼ်ၼွင်ႉယိင်းၸေႇႁုယႃႇ၊ဢၼ်ပဵၼ်မေယႂႃႇၽၼၼ်ႉဢေႃႈ။
၂၆ ၵူၼ်းမဵဝ်းဢိသရေႇလတင်းလၢႆဢိၵ်ႇတင်းဢပသလုမ်ႇၶျႃးတပ်ႉၶဝ်ၵႃႈတီႈမိူင်းၵိလတ်ႉဢေႃႈ။
၂၇ မိူဝ်ႈဢၼ်တႃႇဝိတ်ႉႁွတ်ႈထိုင်ၵႃႈတီႈဝဵင်းမႁႃႇၼိမ်ႇၼၼ်ႉ၊သေႃႇၽိ၊လုၵ်ႈၸၢႆးၼႃႇႁတ်ႉ၊ၵူၼ်းဝဵင်းရပ်ႉပႃႇမိူင်းဢႃႇမုၼ်ႇ၊ဢိၵ်ႇတင်းမႃႇၶိရ ၊လုၵ်ႈၸၢႆးဢမျေႇလ၊ၵူၼ်းဝဵင်းလေႃႇတေႇပႃႇ၊တင်းပႃႇၸိလေႇ၊ၵူၼ်းဝဵင်းရေႃႇၵေႇလိမ်ႇ၊မဵဝ်းၵိလတ်ႉၸိူဝ်းၼၼ်ႉဢွၼ်ၵၼ်ဢဝ်တီႈၼွၼ်းလႂ်၊
၂၈ ၵွၵ်းလႂ်၊မေႃႈလိၼ်လႂ်တင်းၶဝ်ႈသၢၼ်၊ၵျုင်ႇ၊ၶဝ်ႈမူႉယေႃး၊ၽွင်ၶဝ်ႈမုၼ်း၊မဵဝ်းၶဝ်ႈတႅၵ်ႇ၊မဵဝ်းထူဝ်ႇ၊မဵဝ်းထူဝ်ႇထိူၼ်ႇ၊မဵဝ်းထူဝ်ႇတႅၵ်ႇ၊ၼမ်ႉၽိုင်ႈ၊ထေႃးပၢတ်ႈ၊သူဝ်း၊
၂၉ ၼမ်ႉၼူမ်းၵၢမ်ႈ၊ပုၼ်ႈဢၼ်တႃႇဝိတ်ႉဢိၵ်ႇတင်းၶဝ်ၸိူဝ်းဢၼ်ပႃးၸွမ်းမၼ်းၸိူဝ်းၼၼ်ႉတၵ်းၵိၼ်ၼၼ်ႉလႄႈမႃးဢေႃႈ။လွင်ႈမၼ်းၸမ်းၶဝ်ၼၼ်ႉဝႃႈၵူၼ်းတင်းလၢႆလႆႈဢိုပ်းတၢင်းၵိၼ်ယူႇ၊ႁိူဝ်ႉဢူၼ်ႈယူႇ၊ယၢၵ်ႇၼမ်ႉယူႇၵႃႈၼႂ်းထိူၼ်ႇမႃးယဝ်ႉလူင်ပေႇ၊ဝႃႈၼင်ႇၼႆဢေႃႈ။