Chapter
၄
ဢိသပေႃႇသိတ်ႉတၢႆ
၁ မိူဝ်ႈဢၼ်လုၵ်ႈၸၢႆးသေႃးလုငိၼ်းလွင်ႈဢၼ်ဢႃႇပၼႃႇတၢႆၵႃႈတီႈဝဵင်းႁေႇပုၼ်ႇၼၼ်ႉၸိုင်တၢင်းႁတ်းႁၢၼ်မၼ်းဢူၼ်ႈၵႂႃႇယွမ်းၵႂႃႇလႄႈၵူၼ်းမဵဝ်းဢိသရေႇလတင်းသဵင်ႈတင်းလူင်ၵေႃႈဢွၼ်ၵၼ်မီးတၢင်းဢၼ်မႆႈၸႂ်ၶီၸႂ်ဢေႃႈ။
၂ လုၵ်ႈၸၢႆးသေႃးလုၼၼ်ႉမီးၵူၼ်းသွင်ၵေႃႉဢၼ်လႆႈပဵၼ်ႁူဝ်သိုၵ်းလႄႈၵေႃႉၼိုင်ႈၸိုဝ်ပႃႇၼႃႇ၊ၵေႃႉၼိုင်ႈသမ်ႉၸိုဝ်ရေႇၶတ်ႉဢေႃႈ။ၶဝ်ၼၼ်ႉပဵၼ်လုၵ်ႈၸၢႆးရိမ်ႇမုၼ်ႇ၊ၵူၼ်းၸိူဝ်ႉၶိူဝ်းပေႇရေႃႇသိ၊မဵဝ်းပိၼ်ႇယႃႇမိၼ်ႇဢေႃႈ။
၃ ပိၵ်ႉသမ်ႉဝဵင်းပေႇရုတ်ႉၼၼ်ႉၶဝ်ႈပႃးၼႂ်းလိၼ်ပိၼ်ယႃႇမိၼ်ႇသေၵေႃႈ၊ၵူၼ်းပေႇရေႃႇသိတင်းလၢႆဢွၼ်ၵၼ်ဢွၵ်ႇပၢႆၸူးၵႃႈတီႈဝဵင်းၵိတ်ႉတိမ်ႇလႄႈသွၼ်ႈပိုင်ႈယူႇၵႃႈတီႈၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၄ ယေႃးၼသၼ်ႇ၊လုၵ်ႈၸၢႆးသေႃးလုၼၼ်ႉမီးလုၵ်ႈၸၢႆးဢၼ်တိၼ်ၵႅင်ႉၵေႃႉၼိုင်ႈဢေႃႈ။လွင်ႈမၼ်းၸမ်းမိူဝ်ႈဢၼ်သတၢင်းသဵင်ၶၢဝ်ႇလွင်ႈသေႃးလုဢိၵ်ႇတင်းယေႃးၼသၼ်ႇၼၼ်ႉလုၵ်ႉသေၵႃႈတီႈဝဵင်းယေႇၸရေႇလႁွတ်ႈမႃးၼၼ်ႉၸိုင်ဢသၢၵ်ႈမၼ်းမီးႁႃႈၶူပ်ႇၵူၺ်းလႄႈၵေႃႉဢၼ်လူဢၼ်ထိင်းမၼ်းၼၼ်ႉဢုမ်ႈႁွပ်ႇဢဝ်မၼ်းသေလႄႈဢွၵ်ႇပၢႆႇသေယဝ်ႉ၊ၼႂ်းမိူဝ်ႈဢၼ်ယင်းတိုၵ်ႉႁိပ်ႈၼႅတ်ႈပၢႆၵႂႃႇၶၼ်ၶၼ်ၽႂ်းၽႂ်းယူႇၼၼ်ႉမၼ်းလုတ်ႉတူၵ်းမိုဝ်းလႄႈတိၼ်ၵႅင်ႉၵႂႃႇဢေႃႈ။ၸိုဝ်ႈသဵင်လုၵ်ႈဢွၼ်ႇၼၼ်ႉၸမ်းပဵၼ်မေႇၽိပေႃႇသိတ်ႉဢေႃႈ။
၅ ရေၶတ်ႉတင်းပႃႇၼႃႇ၊ဢၼ်ပဵၼ်လုၵ်ႈၸၢႆးရိမ်ႇမုၼ်ႇ၊ၵူၼ်းမဵဝ်းပေႇရေႃႇသိၼၼ်ႉသွင်ၶႃၵႂႃႇႁွတ်ႈထိုင်ၵႃႈတီႈႁေႃဢိသပေႃႇသိတ်ႉၶိင်ႇဢၼ်မၼ်းၼွၼ်းဝၼ်းယူႇၼၼ်ႉဢေႃႈ။
၆ သွင်ၶႃၼၼ်ႉႁဵတ်းၼင်ႇႁၢင်ႈတၵ်းဢဝ်ၶဝ်ႈၵျုင်ႇဢွၵ်ႇၼၼ်ႉလႄႈၶဝ်ႈၵႂႃႇၵႃႈၼႂ်းၵၢင်ႁိူၼ်းသေယဝ်ႉဢၼ်မိတ်ႉတႅင်းသႂ်ႇပုမ်ႈဢိသပေႃႇသိတ်ႉသေယဝ်ႉဢွၵ်ႇပၢႆလွတ်ႈၵႂႃႇဢေႃႈ။
၇ မိူဝ်ႈဢၼ်သွင်ၶႃၶဝ်ႈၵႂႃႇၵႃႈၼႂ်းႁေႃၼၼ်ႉမၼ်းယင်းတိုၵ်ႉၼွၼ်းယူႇၵႃႈတီႈၼိူဝ်ၵူႇတီႈၼွၼ်းမၼ်းၵႃႈၼႂ်းလုၵ်းၼွၼ်းမၼ်းၼၼ်ႉၸိုင်၊သွင်ၶႃၼၼ်ႉတႅင်းသႂ်ႇမၼ်းလႄႈဢဝ်မၼ်းတၢႆသေယဝ်ႉ၊တႅပ်းဢဝ်ၵွၵ်းႁူဝ်မၼ်းသေလႄႈၸွမ်းသဵၼ်ႈတၢင်းပၢင်ႇပဵင်းဢႃႇရၽႃႇၵႂႃႇတင်းၶိုၼ်းဢေႃႈ။
၈ သွင်ၶႃၼၼ်ႉဢဝ်ၵွၵ်းႁူဝ်ဢိသပေႃႇသိတ်ႉမႃးၸူးၵႃႈတီႈတႃႇဝိတ်ႉၵႃႈတီႈဝဵင်းႁေႇပုၼ်ႇလႄႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-တူၺ်းၵွၵ်းႁူဝ်ဢိသပေႃႇသိတ်ႉ၊လုၵ်ႈၸၢႆးသေႃးလု၊ဢၼ်ပဵၼ်ရၢၼ်ႇသူႇၸဝ်ႈႁဝ်းလႄႈႁႃဢဝ်ဢသၢၵ်ႈၸဝ်ႈႁဝ်းတၢႆၼၼ်ႉသေၵမ်းၶႃႈ။ဝၼ်းမိူဝ်ႈၼႆႉထႃႇဝရႃႉၽြႃးတွပ်ႇတႅၼ်းပၼ်ဢပျႅတ်ႈဢၼ်ၸဝ်ႈၶုၼ်ႁေႃၶမ်းလႆႈၶၢမ်ႇၼၼ်ႉၵႃႈတီႈသေႃးလုဢိၵ်ႇတင်းမဵဝ်းၸိူဝ်ႉၶိူဝ်းမၼ်းၼၼ်ႉၶႃႈယဝ်ႉ။
၉ မိူဝ်ႈဢၼ်ဝႃႈၼင်ႇၼႆၸိုင်တႃႇဝိတ်ႉၶိုၼ်းလၢတ်ႈတီႈရေႇၶတ်ႉတင်းၼွင်ႉၸၢႆးမၼ်းပႃႇၼႃႇ၊လုၵ်ႈၸၢႆးရိမ်ႇမုၼ်ႇ၊ၵူၼ်းပေႇရေႃႇသိ၊ၼၼ်ႉလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢၼ်ထုတ်ႈဢဝ်ဢသၢၵ်ႈၵဝ်လွတ်ႈသေၵႃႈတီႈၽေးဢူးပၢတ်ႈၵႃႈမီးၼၼ်ႉဢသၢၵ်ႈလိပ်းယူႇၼၼ်ႉ
၁၀ မိူဝ်ႈၵမ်းဢွၼ်တၢင်းမိူဝ်ႈဢၼ်ၵူၼ်းၵေႃႉၼိုင်ႈမၼ်းထၢင်ႇဝႃႈမၼ်းဢဝ်သတၢင်းသဵင်ၶၢဝ်ႇဢၼ်လီၸူမ်းလီသိူဝ်းၼၼ်ႉလႄႈမႃးမွၵ်ႇလၢတ်ႈတီႈၵဝ်လွင်ႈဢၼ်ဝႃႈမၼ်းဢဝ်သေႃးလုတၢႆယဝ်ႉၼၼ်ႉၵဝ်တိုတ်ႉၸၼ်ဢဝ်ၵေႃႉၼၼ်ႉတၢႆပႅတ်ႈၵႃႈတီႈဝဵင်းၸိၵလတ်ႉလႄႈပၼ်သူးၸိူဝ်ႉၼင်ႇၼၼ်ပုၼ်ႈၵႂၢမ်းသတၢင်းမၼ်းၼၼ်ႉဢေႃႈ။
၁၁ မိူဝ်ႈဢၼ်ၵူၼ်းႁၢႆႉၵူၼ်းၵူၼ်းမိူၵ်ႈဢဝ်ၵေႃႉဢၼ်သိုဝ်ႈတေႃႇတၢႆၵႃႈၼိူဝ်ၵူႇတီႈၼွၼ်းမၼ်းၵႃႈၼႂ်းႁိူၼ်းမၼ်းၼၼ်ႉၸိုင်ၵဝ်ယိင်ႈၶႅၼ်းထုၵ်ႇလီယွၼ်းဢဝ်လိူတ်ႈမၼ်းမိူဝ်ႈလဵဝ်ၼႆႉၵမ်းလဵဝ်လႄႈပႄႇပႅတ်ႈသေၵႃႈၼိူဝ်လိၼ်မိူင်းဢမ်ႇၸႂ်ႈႁိုဝ်၊ဝႃႈၼင်ႇၼႆသေယဝ်ႉ၊
၁၁ တႃႇဝိတ်ႉမီးဢမိင်ႉတီႈၵူၼ်းဢွၼ်ႇမၼ်းၸိူဝ်းၼၼ်ႉႁႂ်ႈၶဝ်ဢွၼ်ၵၼ်ဢဝ်သွင်ၵေႃႉၼၼ်ႉတၢႆလႄႈတႅပ်းတိၼ်တႅပ်းမိုဝ်းသွင်ၶႃသေယဝ်ႉဢဝ်ႁွႆႈဝႆႉၵႃႈတီႈႁိမ်းၼမ်ႉၼွင်ႁေႇပုၼ်ႇဢေႃႈ။ၵွၵ်းႁူဝ်ဢိသပေႃႇၼၼ်ႉၸမ်းၶဝ်ဢွၼ်ၵၼ်ဢဝ်လႄႈသၢင်းၵျူဝ်းၵႃႈၼႂ်းပႃႇႁဵဝ်ႈဢႃႇပၼႃႇၵႃႈတီႈဝဵင်းႁေႇပုၼ်ႇၼၼ်ႉသေဢေႃႈ။