Chapter
၂၁
ၵူၼ်းၵိပွင်ႇၶဝ်လႆႈၶၢမ်ႇတၢင်းဢၼ်တွပ်ႇသူၺ်ႈ
၁ လိုၼ်းၼၼ်ႉၼႂ်းၸူဝ်ႈပၢၼ်တႃႇဝိတ်ႉၼၼ်ႉပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းပီႊၼိုင်ႈယဝ်ႉပီႊၼိုင်ႈသၢမ်ပီႊတဵမ်တဵမ်လႄႈတႃႇဝိတ်ႉလဝ်ႈထၢမ်တီႈထႃႇဝရႃႉၽြႃးလႄႈထႃႇဝရႃႉၽြႃးမီးဢမိင်ႉလႄႈဝႃႈ၊-ဢမူႉၼႆႉပဵၼ်ၵွပ်ႈပိူဝ်ႈသေႃးလုဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းဢၼ်ၸၢင်ႊထွၵ်ႇလိူတ်ႈၵူၼ်းၼၼ်ႉလႄႈဢဝ်ၵူၼ်းၵိပွင်ႇတင်းလၢႆတၢႆၼၼ်ႉယဝ်ႉ၊ဝႃႈၼင်ႇၼႆလႄႈၶုၼ်ႁေႃၶမ်းႁွင်ႉဢဝ်ၵူၼ်းၵိပွင်ႇတင်းလၢႆမႃးလႄႈလၢတ်ႈၵႂၢမ်းတေႃႇၵၼ်တင်းၶဝ်ဢေႃႈ။
၂ ၵူၼ်းၵိပွင်ႇၸိူဝ်းၼၼ်ႉၸမ်းဢမ်ႇၶဝ်ႈပႃးၼႂ်းမဵဝ်းဢိသရေႇလ။ပဵၼ်မဵဝ်းဢႃႇမေႃးရိဢၼ်ၵိုတ်းၵျၢၼ်ႇယူႇၼၼ်ႉဢေႃႈ။ပိၵ်ႉသမ်ႉမဵဝ်းဢိသရေႇလတင်းလၢႆဝႆႉသႅတ်ႈၸႃႇၵတိတီႈၶဝ်ယဝ်ႉသေၵေႃႈသေႃးလုပႂ်ႉဢၵျူဝ်းမဵဝ်းဢိသရေႇလဢိၵ်ႇတင်းမဵဝ်းယုတသေလႄႈဢဝ်ႁႅင်းၶတ်းၸႂ်ႁႂ်ႈလႆႈဢဝ်ၶဝ်တၢႆပႅတ်ႈယူႇဢေႃႈ။
၃ မိူဝ်ႈၼၼ်ႉၶုၼ်လူင်တႃႇဝိတ်ႉလၢတ်ႈတီႈၵူၼ်းၵိပွင်ႇၸိူဝ်းၼၼ်ႉလႄႈဝႃႈ၊-ၵဝ်တၵ်းလႆႈႁဵတ်းၵႃႈသင်ပုၼ်ႈသူ။ၵဝ်တၵ်းလႆႈဢဝ်ၵႃႈသင်သေလႄႈၽႄႇဢပျႅတ်ႈႁႂ်ႈသူတၵ်းလႆႈပၼ်တၢင်းလီတီႈဢမူၺ်ႇထႃႇဝရႃႉၽြႃးၼၼ်ႉ၊ဝႃႈၼင်ႇၼႆလႄႈၵူၼ်းၵိပွင်ႇၸိူဝ်းၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁဝ်းၶဝ်ဢမ်ႇယွၼ်းဢဝ်ငိုၼ်းဢဝ်ၶမ်းတီႈသေႃးလုတင်းပီႈၼွင်ႉၸိူဝ်ႉၶိူဝ်းမၼ်းၶႃႈ။
၄ ၶႃႈၸဝ်ႈႁဝ်းၶဝ်ဢမ်ႇၸၢပ်ႈသႅင်ႇလူၺ်ႈလွင်ႈဢၼ်ဢဝ်ၵူၼ်းမဵဝ်းဢိသရေႇလတၢႆသေၵေႃႉသေၵူၼ်းၼၼ်ႉတီႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းမီးဢမိင်ႉလႄႈဝႃႈ၊-ၵႃႈၼင်ႇဢၼ်သူယွၼ်းဢဝ်ၼၼ်ႉၵဝ်တၵ်းႁဵတ်းၸွမ်းဢေႃႈ၊ဝႃႈၼင်ႇၼႆဢေႃႈ။
၅ ၶဝ်ၵေႃႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၶႅၼ်းတေႃႈဢဝ်လုၵ်ႈၸၢႆးၵေႃႉဢၼ်ၼိၵ်ႈၸၢၵ်ႈငႅၼ်းသေးၶႃႈၸဝ်ႈႁဝ်းၶဝ်လႄႈၶတ်းၸႂ်ၵျၢမ်ႇပွင်ႁႂ်ႈလႆႈပႄႇၽဵဝ်ႈႁဝ်းၶႃႈပႅတ်ႈ၊ႁႂ်ႈၶႃႈၸဝ်ႈႁဝ်းၶဝ်ဢမ်ႇလႆႈယူႇၵႃႈၼႂ်းၼမ်ႉၼႂ်းလိၼ်ဢိသရေႇလၼႆႉၼၼ်ႉၸဵတ်းၵေႃႉ၊ဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။
၆ ၶႃႈၸဝ်ႈႁဝ်းၶဝ်တၵ်းဢဝ်ၶဝ်ၼၼ်ႉႁွႆႈဝႆႉပုၼ်ႈထႃႇဝရႃႉၽြႃးၵႃႈတီႈဝဵင်းၵိပႃႇတီႈယူႇသေႃးလုဢၼ်ထႃႇဝရႃႉၽြႃးလိူၵ်ႈၵဵပ်းဢဝ်ၼၼ်ႉတီႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းမီးဢမိင်ႉလႄႈဝႃႈ၊-ၵဝ်တၵ်းဢဝ်ၶဝ်ဢၢပ်ႈပၼ်ဢေႃႈ၊ဝႃႈၼင်ႇၼႆဢေႃႈ။
၇ ၼႂ်းဝႃႈၼၼ်သေၵေႃႈၶုၼ်ႁေႃၶမ်းဢမ်ႇဢဝ်မေႇၽိပေႃႇသိတ်ႉလုၵ်ႈၸၢႆးယေႃးၼသၼ်ႇဢၼ်ပဵၼ်လုၵ်ႈၸၢႆးသေႃးလုၼၼ်ႉဢၢပ်ႈပၼ်တီႈၶဝ်ၵွပ်ႈပိူဝ်ႈဢၼ်ၵတိသႅတ်ႉၸႃႇဢၼ်လႆႈဝႆႉတီႈထႃႇဝရႃႉၽြႃးၵႃႈတီႈဝူင်ႈၵၢင်တႃႇဝိတ်ႉတင်းယေႃးၼသၼ်ႇလုၵ်ႈၸၢႆးသေႃးလုၼၼ်ႉဢေႃႈ။
၈ ၶုၼ်ႁေႃၶမ်းဢဝ်ဢႃႇမေႃႇၼိတင်းမေႇၽိပေႃႇသိတ်ႉ၊ဢၼ်ပဵၼ်လုၵ်ႈၸၢႆးရိၸပ၊လုၵ်ႈယိင်းဢေႇဢႃႇ၊ဢၼ်မၼ်းၵိူတ်ႇလဵင်ႉမႃးတီႈသေႃးလု၊တင်းလုၵ်ႈၸၢႆးႁႃႈၵေႃႉဢၼ်ၵိူတ်ႇမႃးတီႈမေႇရပ်ႉ၊ဢၼ်ပဵၼ်လုၵ်ႈယိင်းသေႃးလု၊မေးဢတြေႇလ၊ဢၼ်ပဵၼ်လုၵ်ႈၸၢႆးပႃႇၸဢၼ်ပဵၼ်ၵူၼ်းမဵဝ်းမေႇႁေႃႇလသိၼၼ်ႉဢၢပ်ႈပၼ်ၵႃႈၼႂ်းမိုဝ်းၵူၼ်းၵိပွင်ႇၸိူဝ်းၼၼ်ႉဢေႃႈ။
၉ ၶဝ်ၸိူဝ်းၼၼ်ႉဢွၼ်ၵၼ်ဢဝ်ၶဝ်ၵႂႃႇႁွႆႈဝႆႉၵႃႈၼိူဝ်လွႆၵႃႈတီႈၽၢႆႇၼႃႈထႃႇဝရႃႉၽြႃးလႄႈၶဝ်ၸဵတ်းၵေႃႉၼၼ်ႉသုမ်းဢသၢၵ်ႈၸွမ်းၵၼ်ဢေႃႈ။ၶဝ်လႆႈၶၢမ်ႇတၢင်းဢၼ်ဢဝ်တၢႆၼႂ်းၶိင်ႇမိူဝ်ႈဢၼ်ပၢတ်ႇၶဝ်ႈၼႂ်းဝၼ်းဢၼ်ပဵၼ်တူၼ်ႈပဵၼ်ငဝ်ႈမိူဝ်ႈဢၼ်ၸႃႉပၢတ်ႇၶဝ်ႈမူႉယေႃးၼၼ်ႉဢေႃႈ။
၁၀ ရိၸပ၊လုၵ်ႈယိင်းဢေႇဢႃႇ၊ၼၼ်ႉၸႃႉၸဵမ်ၶိင်ႇမိူဝ်ႈဢၼ်ၸႃႉပၢတ်ႇၶဝ်ႈတေႃႇထိုင်ႁွတ်ႈၽူၼ်တူၵ်းမၼ်းဢဝ်ၼင်ပေႃသိူဝ်ႇၵႃႈၼိူဝ်မၢၵ်ႇႁိၼ်ပုၼ်ႈဢၼ်မၼ်းတၵ်းၼွၼ်းၼၼ်ႉသေယဝ်ႉ၊မၼ်းပႂ်ႉလူပႂ်ႉတူၺ်းႁူင်းၶဝ်ႈဢမ်ႇႁႂ်ႈၼူၵ်ႉလႆႈၸပ်းၶိင်ႇၵၢင်ဝၼ်းဢမ်ႇႁႂ်ႈတူဝ်ႁၢႆႉလႆႈၶူပ်းၵိၼ်ၶဝ်ႈၼၼ်ႉၶိင်ႇၵၢင်ၶိုၼ်းဢေႃႈ။
၁၁ မိူဝ်ႈဢၼ်ပိူၼ်ႈလဝ်ႈလၢတ်ႈလွင်ႈဢၼ်ရိၸပ၊လုၵ်ႈယိင်းဢေႇဢႃႇ၊ဢၼ်ပဵၼ်မေးၼွႆႉသေႃးလု၊ႁိတ်းၼၼ်ႉတီႈတႃႇဝိတ်ႉၼၼ်ႉၸိုင်၊တႃႇဝိတ်ႉၵႂႃႇဢဝ်လုပ်ႇသေႃးလုတင်းလုပ်ႇယေႃးၼသၼ်ႇ
၁၁ ၵႃႈၼႂ်းမိုဝ်းၵူၼ်းဝဵင်းယႃႇပိတ်ႉမိူင်းၵိလတ်ႉ၊ဢၼ်ၵူၼ်းၽိလိတ်ႉတိၶဝ်ဢဝ်ႁွႆႈဝႆႉၼႂ်းမိူဝ်ႈဢၼ်ၵူၼ်းၽိလိတ်ႉတိၶဝ်ဢဝ်သေႃးလုတၢႆၵႃႈၼိူဝ်လွႆၵိလပေႃႇ၊ၼၼ်ႉမႃးဢေႃႈ။
၁၃ မၼ်းဢဝ်လုပ်ႇသေႃးလုတင်းလုပ်ႇလုၵ်ႈၸၢႆးမၼ်းယေႃးၼသၼ်ႇၼၼ်ႉသေၵႃႈတီႈၼၼ်ႉမႃးသေယဝ်ႉၸူႉသိမ်းဢဝ်လုပ်ႇၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ဢဝ်တၢႆၸိူဝ်းၼၼ်ႉမႃးဢေႃႈ။
၁၄ ၶဝ်ဢဝ်လုပ်ႇသေႃးလုတင်းလုၵ်ႈၸၢႆးမၼ်းယေႃးၼသၼ်ႇၼၼ်ႉသၢင်းၵျူဝ်ႇၵႃႈတီႈဝၢၼ်ႈၸေႇလမိူင်းပိၼ်ႇယႃႇမိၼ်ႇၵႃႈၼႂ်းပႃႇႁဵဝ်ႈၵိသ၊ဢၼ်ပဵၼ်ပေႃႈသေႃးလုၼၼ်ႉလႄႈဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ၶုၼ်ႁေႃၶမ်းသင်ႇလၢတ်ႈဝႆႉၼၼ်ႉဢေႃႈ။လိုၼ်းသေၼၼ်ႉၽြႃးပဵၼ်ၸဝ်ႈထွမ်ႇဢဝ်ၵႂၢမ်းဢၼ်ၶဝ်သူးတွင်းပုၼ်ႈသိုင်ႇၸိုင်ႈဝၢၼ်ႈမိူင်းၼၼ်ႉဢေႃႈ။
ႁဵတ်းသိုၵ်းတေႃႇၵၼ်တင်းၵူၼ်းၽိလိတ်ႉတိ
၁၅ လိုၼ်းၼၼ်ႉၵူၼ်းၽိလိတ်ႉတိတင်းလၢႆသမ်ႉတိုၵ်းၵၼ်တင်းမဵဝ်းဢိသရေႇလထႅင်ႈလႄႈတႃႇဝိတ်ႉဢိၵ်ႇတင်းၶႃႈမၼ်းၵူၼ်းမၼ်းၸိူဝ်းၼၼ်ႉလူင်းၵႂႃႇႁပ်ႉၶၢမ်ႇတိုၵ်းတေႃးၵူၼ်းၽိလိတ်ႉတိၸိူဝ်းၼၼ်ႉလႄႈတႃႇဝိတ်ႉႁိူဝ်ႉဢူၼ်ႈၼႃႇဢေႃႈ။
၁၆ ဢိသပိပေႇၼုတ်ႉဢၼ်ပဵၼ်မဵဝ်းရေႇၽိမ်ႇၼၼ်ႉၼုင်ႈမႆၶူဝ်းတိုၵ်းသိုၵ်းဢၼ်မႂ်ႇယိပ်းၵမ်ဢဝ်ႁွၵ်ႇတွင်းလိူင်ဢၼ်ၼမ်ႉၼၵ်းမၼ်းမီးသၢမ်ပၢၵ်ႇၵျၢပ်ႈသၶေႇလၼၼ်ႉသေလႄႈၵျၢမ်ႇငႃတၵ်းဢဝ်တႃႇဝိတ်ႉတၢႆဢေႃႈ။
၁၇ ဢၽိသေႇလုၵ်ႈၸၢႆးၸေႇရုယႃႇၼၼ်ႉမႃးၸွႆႈထႅမ်လႄႈဢဝ်ၵူၼ်းၽိလိတ်ႉတိၼၼ်ႉတၢႆပႅတ်ႈသေဢေႃႈ။မိူဝ်ႈၼၼ်ႉၶႃႈၵူၼ်းတႃႇဝိတ်ႉတင်းလၢႆဢွၼ်ၵၼ်ၵိၼ်ႇဝႃႈလႄႈဝႃႈ၊-ၵွပ်ႈပိူဝ်ႈၵူဝ်သုဝ်းဢွၼ်ႇၵူၼ်းမဵဝ်းဢိသရေႇလတၵ်းလပ်ႉႁၢႆၵႂႃႇၼၼ်ႉလႄႈၵမ်းလိုၼ်းၸဝ်ႈႁဝ်းတၵ်းဢမ်ႇလႆႈၶီႇသိုၵ်းၸွမ်းလူၺ်ႈၵၼ်တင်းႁဝ်းၶႃႈသပွေၵ်ႈ၊ဝႃႈၼင်ႇၼႆဢေႃႈ။
၁၈ လိုၼ်းၼၼ်ႉၽဝ်ႇၼိုင်ႈ၊ပဵၼ်သိုၵ်းၵၼ်တင်းၵူၼ်းၽိလိတ်ႉတိတင်းလၢႆၵႃႈတီႈဝဵင်းၵေႃႇၽၼၼ်ႉလႄႈသိပေႇၶေႇ၊ၵူၼ်းႁုသ၊ၼၼ်ႉဢဝ်သႃႇၽ၊ဢၼ်ပဵၼ်မဵဝ်းရေႇၽိမ်ႇၼၼ်ႉတၢႆဢေႃႈ။
၁၉ လိုၼ်းၼၼ်ႉၽဝ်ႇၼိုင်ႈပဵၼ်သိုၵ်းၵၼ်တင်းၵူၼ်းၽိလိတ်ႉတိတင်းလၢႆၵႃႈတီႈဝဵင်းၵေႃႇၽၼၼ်ႉလႄႈဢေႇလႁႃႇၼၼ်ႇလုၵ်ႈၸၢႆးယႃႇဢိရဢၼ်ပဵၼ်ၵူၼ်းဝဵင်းပႅတ်ႉလိႁႅမ်ႇၼၼ်ႉဢဝ်ၼွင်ႉၸၢႆးၵေႃႇလျၢၵ်ႉၵူၼ်းမဵဝ်းၵိတ်ႉတိဢၼ်ယိပ်းၵမ်ၵၼ်းႁွၵ်ႇဢၼ်ယႂ်ႇတၢၼ်ႇသီႈပၢၼ်ႉႁမ်းႁုၵ်ႇၼၼ်ႉတၢႆဢေႃႈ။
၂၀ လိုၼ်းၼၼ်ႉၽဝ်ႇၼိုင်ႈပဵၼ်သိုၵ်းၵၼ်ၵႃႈတီႈဝဵင်းၵႃႇသလႄႈၵူၼ်းဢၼ်တူဝ်ယႂ်ႇသုင်မိုဝ်းယေႈၶွၼ်မီးၼိဝ်ႉမိုဝ်းႁူၵ်းၼိဝ်ႉတိၼ်ယေႈၶွၼ်မီးၼိဝ်ႉတိၼ်ႁူၵ်းၼိဝ်ႉပွင်းၵၼ်မီးသၢဝ်းသီႇၼိဝ်ႉဢၼ်ပဵၼ်ၸိူဝ်ႉၶိူဝ်းမဵဝ်းရေႇၽိမ်ႇၼၼ်ႉၵေႃႉၼိုင်ႈထၢမ်တႃႉထၢမ်ၶဵင်ႇၵၼ်တင်းၵူၼ်းမဵဝ်းဢိသရေႇလတင်းလၢႆလႄႈ
၂၁ ယေႃးၼသၼ်ႇ၊လုၵ်ႈၸၢႆးသိမႃႇ၊ဢၼ်ပဵၼ်ပီႈၸၢႆးတႃႇဝိတ်ႉၼၼ်ႉဢဝ်ၵေႃႉၼၼ်ႉတၢႆဢေႃႈ။
၂၂ ၶဝ်သီႇၵေႃႉၼၼ်ႉပဵၼ်လုၵ်ႈၸၢႆးၵူၼ်းရေႇၽိမ်ႇဢၼ်ယူႇၵႃႈတီႈဝဵင်းၵႃႇသၼၼ်ႉလႄႈတၢႆလူၺ်ႈမိုဝ်းတႃႇဝိတ်ႉဢိၵ်ႇတင်းၶႃႈမၼ်းၵူၼ်းမၼ်းဢေႃႈ။