Chapter
၁၉
၁ ၼင်ႇၼၼ်လႄႈပိူၼ်ႈမွၵ်ႇလၢတ်ႈတီႈယႂႃႇၽလွင်ႈဢၼ်ၶုၼ်ႁေႃၶမ်းႁႆႈႁွင်ႉပွင်ႉၶၢင်းၵွပ်ႈပိူဝ်ႈဢပသလုမ်ႇၼၼ်ႉဢေႃႈ။
၂ ၼႂ်းဝၼ်းၼၼ်ႉပွႆးဢၼ်ပေႉၼႅင်ႇၼၼ်ႉပဵၼ်လွင်ႈဢၼ်လီငိၼ်းၽၢၼ်ၵႂႃႇသေဢေႃႈ။
၃ ၼႂ်းဝၼ်းၼၼ်ႉၵူၼ်းတင်းလၢႆငိၼ်းလွင်ႈဢၼ်ၶုၼ်ႁေႃၶမ်းမီးတၢင်းဢၼ်ၶီၸႂ်ၶူမ်ၸႂ်ၵွပ်ႈပိူဝ်ႈလုၵ်ႈၸၢႆးၸဝ်ႈၼၼ်ႉလႄႈၵူၼ်းတင်းလၢႆဢွၼ်ၵၼ်တဵတ်ႇတဵတ်ႇလွမ်ပၢႆၶဝ်ႈၵႃႈၼႂ်းဝဵင်းမိူၼ်ၸိူဝ်ႉၼင်ႇဢၼ်ၵူၼ်းဢၼ်ဢူၵ်းဢၢႆဢွၵ်ႇပၢႆၵႃႈတီႈဢၼ်သုမ်းသိုၵ်းၼၼ်ႉဢေႃႈ။
၄ ၶုၼ်ႁေႃၶမ်းၵေႃႈႁူမ်ႇသုမ်ႇၼႃႈသေလႄႈႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႆႈလႄႈဝႃႈ၊-လုၵ်ႈၸၢႆးၵဝ်ဢပသလုမ်ႇဢိူၺ်း။ဢပသလုမ်ႇဢိူၺ်း။လုၵ်ႈၸၢႆးၵဝ်ဢိူၺ်း။လုၵ်ႈၸၢႆးၵဝ်ဢိူၺ်း။ဝႃႈၼင်ႇၼႆယူႇဢေႃႈ။
၅ ယႂႃႇၽၶဝ်ႈၼႂ်းႁိူၼ်းၸူးၵႃႈတီႈၶုၼ်ႁေႃၶမ်းလႄႈလဝ်ႈလၢတ်ႈလႄႈဝႃႈ၊-ဝၼ်းမိူဝ်ႈၼႆႉၸဝ်ႈႁဝ်းယႃႉသရေႇၼႃႈတႃၶႃႈၸဝ်ႈႁဝ်းၶဝ်တင်းသဵင်ႈတင်းလူင်ဢၼ်ၵႄႇသႄႇၶျွတ်ႈဢဝ်ၸႃႉၸဵမ်ဢသၢၵ်ႈၸဝ်ႈႁဝ်းလႄႈလုၵ်ႈၸၢႆးၸဝ်ႈ၊လုၵ်ႈယိင်းၸဝ်ႈ၊ၼၢင်းႁေႃၶမ်း၊ၸိူင်ႉၼၢင်းတင်းလၢႆၼၼ်ႉတီႈၶႃႈယဝ်ႉ။
၆ ၸဝ်ႈႁဝ်းႁၵ်ႉၶဝ်ၸိူဝ်းဢၼ်ၸင်းၸဝ်ႈႁဝ်းၼၼ်ႉလႄႈၸင်းၶဝ်ၸိူဝ်းဢၼ်ႁၵ်ႉၸဝ်ႈႁဝ်းၼၼ်ႉယဝ်ႉ။ဝၼ်းမိူဝ်ႈၼႆႉၸဝ်ႈႁဝ်းၼႄပျႃးလွင်ႈဢၼ်ၸဝ်ႈႁဝ်းဢမ်ႇမၢတ်ႈမူးမၢတ်ႈၽွင်းမိူင်းတင်းလၢႆတီႈၶႃႈယဝ်ႉ။ဝၼ်းမိူဝ်ႈၼႆႉၶႃႈၸဝ်ႈႁဝ်းၶဝ်လႆႈႁူႉႁၼ်ဝႃႈပေႃးဢပသလုမ်ႇဢသၢၵ်ႈလိပ်းလႄႈၶႃႈၸဝ်ႈႁဝ်းၶဝ်ၸိူဝ်းၼႆႉတၢႆၸိုင်၊တၵ်းထုၵ်ႇၸႂ်မႅၼ်ႈၸႂ်ၸဝ်ႈႁဝ်းၼၼ်ႉတီႈၶႃႈယဝ်ႉ။
၇ မိူဝ်ႈလဵဝ်ၼႆႉလုၵ်ႉသေၵမ်းၶႃႈ။ဢွၵ်ႇလႄႈလၢတ်ႈၵႂၢမ်းဢၼ်ထုၵ်ႇၸႂ်မႅၼ်ႈၸႂ်တီႈၶႃႈၸဝ်ႈႁဝ်းၶဝ်တင်းလၢႆၼၼ်ႉသေၵမ်းတီႈၶႃႈ။ၶႃႈၸဝ်ႈႁဝ်းတၵ်းဢဝ်ထႃႇဝရႃႉၽြႃးတိူင်ႇဝႃႈၵိၼ်ႇဝႃႈလႄႈဝႃႈပေႃးၸဝ်ႈႁဝ်းဢမ်ႇဢွၵ်ႇၵႂႃႇလႄႈလၢတ်ႈၵႂၢမ်းၸိုင်ၶိုၼ်းၼႆႉၵေႃႉတၵ်းဢမ်ႇယူႇတီႈၸဝ်ႈႁဝ်းၼၼ်ႉတေဢမ်ႇမီးသေၵေႃႉသေၵူၼ်းတီႈၶႃႈယဝ်ႉ။ပိူဝ်ႈၼႆလႄႈဢမူႉၼၼ်ႉယိင်ႈၶႅၼ်းတၵ်းႁၢႆႉၼႃႇသေဢမူႉၵႃႈဢၼ်ပဵၼ်မႃးတီႈၸဝ်ႈႁဝ်းၸႃႉၸဵမ်မိူဝ်ႈဢၼ်ၸဝ်ႈႁဝ်းယင်းလဵၵ်ႉယင်းၼုမ်ႇတေႃႇထိုင်ႁွတ်ႈမိူဝ်ႈလဵဝ်ၼႆႉၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။
၈ ၶုၼ်ႁေႃၶမ်းၵေႃႈလုၵ်ႉလႄႈၼင်ႈၵႃႈတီႈႁူးၽၵ်းတူဝဵင်းဢေႃႈ။မိူဝ်ႈၼၼ်ႉၶဝ်ဢွၼ်ၵၼ်မွၵ်ႇလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊-ၶုၼ်ႁေႃၶမ်းၼင်ႈယူႇၵႃႈတီႈႁူးၽၵ်းတူဢေႃႈ၊ဝႃႈၼင်ႇၼႆလႄႈၵူၼ်းတင်းသဵင်ႈတင်းလူင်ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈၶုၼ်ႁေႃၶမ်းဢေႃႈ။ၵူၼ်းမဵဝ်းဢိသရေႇလတင်းလၢႆၸမ်းယင်းပေႃးပၢႆၵႂႃႇၸူးၵႃႈတီႈဢၼ်ၶဝ်ယူႇၼၼ်ႉႁင်းၽႂ်ႁင်းမၼ်းယဝ်ႉဢေႃႈ။
တႃႇဝိတ်ႉၶိုၼ်းမိူဝ်းဝဵင်းယေႇရုသလႅမ်ႇ
၉ မိူဝ်ႈၼၼ်ႉၵူၼ်းတင်းသဵင်ႈတင်းလူင်ၵႃႈၼႂ်းၸိူဝ်ႉၶိူဝ်းဢိသရေႇလၸိူဝ်းၼၼ်ႉၼင်ႇၵၼ်ၵၼ်တွပ်ႇထဵင်ၵၼ်လႄႈဝႃႈ၊-ၶုၼ်ႁေႃၶမ်းႁဝ်းၼၼ်ႉၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိုဝ်းရၢၼ်ႇသူႇႁဝ်းလႄႈၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းၵူၼ်းၽိလိတ်ႉတိၸိူဝ်းၼၼ်ႉဢမ်ႇၸႂ်ႈႁိုဝ်။မိူဝ်ႈလဵဝ်ၼႆႉမၼ်းၸဝ်ႈလႆႈဢွၵ်ႇပၢႆသေၵႃႈၼႂ်းမိူင်းၵႂႃႇၵွပ်ႈပိူဝ်ႈဢပသလုမ်ႇၼၼ်ႉဢေႃႈ။
၁၀ ဢပသလုမ်ႇဢၼ်ႁဝ်းပၼ်ၽိၵ်ႈသိၵ်ႈလႄႈယုၵ်ႉယွင်ႈဝႆႉၵႃႈၼိူဝ်ႁဝ်းၼၼ်ႉတၢႆၵႃႈတီႈပၢင်သိုၵ်းယဝ်ႉဢမ်ႇၸႂ်ႈႁိုဝ်။မိူဝ်ႈလဵဝ်ၼႆႉၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူယူႇတဵတ်ႇတဵတ်ႇယင်းဢမ်ႇလၢတ်ႈလွင်ႈဢၼ်တၵ်းလႆႈဢဝ်ၶုၼ်ႁေႃၶမ်းႁဝ်းၶိုၼ်းမႃးၼၼ်ႉ၊ဝႃႈၼင်ႇၼႆဢေႃႈ။
၁၁ ၶုၼ်လူင်တႃႇဝိတ်ႉပွႆႇၸႂ်ႉၵူၼ်းၵႂႃႇၸူးၵႃႈတီႈယိတ်ႉပရေႃးႁိၵ်ႈၸႃႇတုၵ်ႉတင်းဢႃႇပျႃႇထႃႇၼၼ်ႉလႄႈဝႃႈ၊-သွင်ၶိူဝ်လၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်းယုတၸိူဝ်းၼၼ်ႉလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူတၵ်းလႆႈပဵၼ်ၵေႃႉဢၼ်တူၵ်းလိုၼ်းသုတ်းပိူၼ်ႈၼႂ်းလွင်ႈဢၼ်တၵ်းလႆႈဢဝ်ၶုၼ်ႁေႃၶမ်းသူင်ႇၶိုၼ်းတီႈႁေႃၸဝ်ႈၼၼ်ႉ။ၵႂၢမ်းဢၼ်ၵူၼ်းမဵဝ်းဢိသရေႇလတင်းသဵင်ႈတင်းလူင်လၢတ်ႈၼၼ်ႉႁွတ်ႈထိုင်ၵႃႈတီႈၶုၼ်ႁေႃၶမ်းၸူးၵႃႈတီႈႁေႃယႃႇယီႇမၼ်းၸဝ်ႈၼၼ်ႉယဝ်ႉ။
၁၁ သူပဵၼ်ပီႈပဵၼ်ၼွင်ႉၵဝ်၊လုပ်ႇၵဝ်၊ၼိူဝ်ႉၵဝ်လႄႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူတၵ်းလႆႈတူၵ်းလိုၼ်းသုတ်းပိူၼ်ႈၼႂ်းလွင်ႈဢၼ်တၵ်းလႆႈဢဝ်ၸဝ်ႈၶုၼ်ႁေႃၶမ်းၶိုၼ်းသူင်ႇၼၼ်ႉ၊ဝႃႈၼင်ႇၼႆတႃႉ။
၁၃ သွင်ၶိူဝ်သမ်ႉဢွၼ်ၵၼ်လၢတ်ႈတီႈဢႃႇမသလႄႈဝႃႈ၊-မႂ်းပဵၼ်လုပ်ႇၵဝ်ၼိူဝ်ႉၵဝ်ဢမ်ႇၸႂ်ႈႁိုဝ်။တႄႇၸႃႉမိူဝ်ႈၼႆႉၵႂႃႇပေႃးမႂ်းဢမ်ႇႁဵတ်းႁူဝ်သိုၵ်းတၢင်တူဝ်ယႂႃႇၽၸိုင်၊ႁႂ်ႈၽြႃးပဵၼ်ၸဝ်ႈႁဵတ်းၼိူဝ်ၵဝ်လိူဝ်တွၼ်းၼႃႇၼႃႇသေၵမ်းလူၺ်ႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၄ ၼင်ႇၼၼ်လႄႈမၼ်းလႆႈႁူဝ်ၸႂ်ၵူၼ်းမဵဝ်းယုတတင်းသဵင်ႈတင်းလူင်မိူၼ်ၼင်ႇလႆႈႁူဝ်ၸႂ်လုၵ်ႉလဵဝ်ၼၼ်ႉထၢၼ်ႈပေႃးၶဝ်ဢွၼ်ၵၼ်ၶိုၼ်းပၢင်းဢဝ်ၶုၼ်ႁေႃၶမ်းလႄႈလဝ်ႈလၢတ်ႈဝႃႈ၊-တူဝ်ၸဝ်ႈႁဝ်းဢိၵ်ႇတင်းၶႃႈၸဝ်ႈႁဝ်းတင်းလၢႆၼၼ်ႉၶိုၼ်းမႃးသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၁၅ မိူဝ်ႈၼၼ်ႉၶုၼ်ႁေႃၶမ်းၶိုၼ်းမႃးလႄႈႁွတ်ႈထိုင်ၵႃႈတီႈၼမ်ႉႁွင်ႈယေႃႇတၼ်ႇဢေႃႈ။ၵူၼ်းမဵဝ်းယုတတင်းလၢႆဢွၼ်ၵၼ်ၵႂႃႇၵႃႈတီႈဝဵင်းၵိလၵႃႇလႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းလႄႈဢဝ်ၶုၼ်ႁေႃၶမ်းၶၢမ်ႈၼမ်ႉႁွင်ႈယေႃႇတၼ်ႇဢေႃႈ။
၁၆ သိမိ၊လုၵ်ႈၸၢႆးၵေႇရ၊ၵူၼ်းဝဵင်းပႃႇႁုရိမ်ႇမဵဝ်းပိၼ်ႇယႃႇမိၼ်ႇၼၼ်ႉႁိပ်ႈၼႅတ်ႈၸွမ်းလူၺ်ႈၵၼ်တင်းၵူၼ်းမဵဝ်းယုတတင်းလၢႆလူင်းမႃးႁႂ်ႈလႆႈႁပ်ႉႁူဝ်တၢင်းၶုၼ်လူင်တႃႇဝိတ်ႉဢေႃႈ။
၁၇ ၵူၼ်းမဵဝ်းပိၼ်ႇယႃႇမိၼ်ႇႁဵင်ၼိုင်ႈဢိၵ်ႇတင်းၸိၽ၊ၶႃႈပီႈၼွင်ႉၸိူဝ်ႉၶိူဝ်းသေႃးလု၊တင်းလုၵ်ႈၸၢႆးမၼ်းသိပ်းႁႃႈၵေႃႉ၊ၶႃႈမၼ်းသၢဝ်းၼိုင်ႈၸိူဝ်းၼၼ်ႉဢွၼ်ၵၼ်ၸွမ်းမႃးလူၺ်ႈၵၼ်တင်းမၼ်းၼၼ်ႉလႄႈၶၢမ်ႈၼမ်ႉႁွင်ႊယေႃႇတၼ်ႇသိုဝ်ႈၼႃႈတႂ်ႈတႃၶုၼ်ႁေႃၶမ်းဢေႃႈ။
၁၈ ၶဝ်ၶၢမ်ႈၼမ်ႉၶေးၵႂႃႇႁႂ်ႈလႆႈႁပ်ႉဢဝ်ၵူၼ်းႁၢင်ႈၵူၼ်းႁေႃၸဝ်ႈတင်းလၢႆၶၢမ်ႈမႃးလႄႈႁႂ်ႈလႆႈႁဵတ်းၸွမ်းၵႃႈၼင်ႇဢၼ်ၸဝ်ႈမီးဢလူဝ်ႇၼၼ်ႉဢေႃႈ။သိမိ၊လုၵ်ႈၸၢႆးၵေႇရ၊ၼၼ်ႉၶုပ်ႉမူပ်ႇၵႃတီႈၽၢႆႇၼႃႈၶုၼ်ႁေႃၶမ်းမိူဝ်ႈဢၼ်မၼ်းၸဝ်ႈၸမ်တၵ်းၶၢမ်ႈၼမ်ႉႁွင်ႊယေႃႇတၼ်ႇၼၼ်ႉလႄႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-
၁၉ ၸဝ်ႈႁဝ်းၶႃႈၶႅၼ်းတေႃႈယႃႇပပေၼ်ဢပျႅတ်ႈတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။ၶႅၼ်းတေႃႈယႃႇပမေၢတ်ႈမၢႆတွင်းဝႆႉဢမူႉဢၼ်ၶႃႈၸဝ်ႈႁဝ်းၶဝ်ႁဵတ်းပူၼ်ႉႁဵတ်းလိူဝ်ၼႃႇလူင်လၢင်ၼႂ်းဝၼ်းဢၼ်ၸဝ်ႈၶုၼ်လူင်ဢွၵ်ႇသေၵႃႈတီႈဝဵင်းယေႇရုသလႅမ်ႇၵႂႃႇၼၼ်ႉသေၵမ်းတီႈၶႃႈ။
၂၀ ၶႃႈၸဝ်ႈၼႆႉႁူႉလွင်ႈဢၼ်ၶႃႈၸဝ်ႈႁဝ်းၽိတ်းပိူင်ႈမႅၼ်ႈၼၼ်ႉယူႇတီႈၶႃႈဢေႃႈ။ပိူဝ်ႈၼႆလႄႈဝၼ်းမိူဝ်ႈၼႆႉၶႃႈၸဝ်ႈႁဝ်းၼႆႉၸင်ႇလူင်းမႃးဢွၼ်တၢင်းသုတ်းပိူၼ်ႈၼႂ်းမဵဝ်းယုဝ်းသႅပ်ႉတင်းသဵင်းတင်းလူင်ႁႂ်ႈလႆႈႁပ်ႉႁူဝ်တၢင်းၸဝ်ႈႁဝ်းၸဝ်ႈၶုၼ်လူင်တီႈၶႃႈယဝ်ႉ၊ဝႃႈၼင်ႇၼႆဢေႃႈ။
၂၁ ဢၽိသေႇ၊လုၵ်ႈၸၢႆးၸေႇရုယႃႇ၊ၼၼ်ႉၵေႃႈလဝ်ႈထၢမ်လႄႈဝႃႈ၊-သိမိၼႆႉတၵ်းလႆႈၶၢမ်ႇတၢႆၵွပ်ႈပိူဝ်ႈဢၼ်မၼ်းၵိၼ်ႇလႃႇၸဝ်ႈဢၼ်လႆႈၶၢမ်ႇၽိၵ်ႈသိၵ်ႈဢၼ်ထႃႇဝရႃႉၽြႃးပၼ်ၼၼ်ႉဢမ်ႇၸႂ်ႈတီႈၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊တႃႇဝိတ်ႉမီးဢမိင်ႉလႄႈဝႃႈ၊-
၂၂ လုၵ်ႈၸၢႆးၸေႇရုယႃႇဢိူၺ်း။တၢင်းၵျၢမ်ႇတၢင်းပွင်မႂ်းတင်းၵဝ်ဢမ်ႇမိူၼ်ၵၼ်။မိူဝ်ႈၼႆႉမႂ်းတၵ်းပဵၼ်ၵေႃႉဢၼ်ၶႄႉၶဵင်ႇၵဝ်ယဝ်ႉ။ၸွင်ႇတၵ်းလႆႈဢဝ်ၵူၼ်းမဵဝ်းဢိသရေႇလသေၵေႃႉသေၵူၼ်းတၢႆဝၼ်းမိူဝ်ႈၼႆႉႁိုဝ်။ၵဝ်ႁူႉလွင်ႈဢၼ်ၵဝ်ပဵၼ်ၶုၼ်ႁေႃၶမ်းဢိသရေႇလဝၼ်းမိူဝ်ႈၼႆႉယူႇဢမ်ႇၸႂ်ႈႁိုဝ်၊ဝႃႈၼင်ႇၼႆလႄႈ၊ၶုၼ်ႁေႃၶမ်းလၢတ်ႈတီႈသိမိလႄႈဝႃႈ၊-
၂၃ မႂ်းဢမ်ႇလႆႈၶၢမ်ႇတၢင်းတၢႆၵူၺ်း၊ဝႃႈၼင်ႇၼႆသေလႄႈၶုၼ်ႁေႃၶမ်းတိူင်ႇဝႃႈၵိၼ်ႇဝႃႈတီႈမၼ်းၼၼ်ႉဢေႃႈ။
မေႇၽိပေႃႇသိတ်ႉ၊လၢၼ်ၸၢႆးသေႃးလု၊ၼၼ်ႉၵေႃႈလူင်းမႃးႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းဢေႃႈ။
၂၄ မၼ်းၼၼ်ႉယင်းဢမ်ႇသုၵ်ႈတိၼ်၊ယင်းဢမ်ႇႁၢင်ႈၶိူင်ႈမႄးၼူတ်ႇမႄးၶူၼ်၊ယင်းဢမ်ႇသၵ်ႉဢမ်ႇသၢႆႇၶူဝ်းၼုင်ႈလႄႈယူႇၸႃႉၸဵမ်ဝၼ်းဢၼ်ၶုၼ်ႁေႃၶမ်းဢွၵ်ႇၵႂႃႇၼၼ်ႉတေႃႇထိုင်ႁွတ်ႈဝၼ်းဢၼ်မၼ်းၸဝ်ႈၶိုၼ်းမႃးၼိမ်ၼိမ်လီလီၼၼ်ႉဢေႃႈ။
၂၅ မိူဝ်ႈဢၼ်ၵူၼ်းဝဵင်းယေႇရုသလႅမ်ႇတင်းလၢႆဢွၼ်ၵၼ်မႃးႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းၼၼ်ႉၸိုင်၊ၶုၼ်ႁေႃၶမ်းထၢမ်တီႈမၼ်းလႄႈဝႃႈ၊-မေႇၽိပေႃႇသိတ်ႉဢိူၺ်း။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢမ်ႇၵႂႃႇၸွမ်းလူၺ်ႈၵၼ်တင်းၵဝ်၊ဝႃႈၼင်ႇၼႆလႄႈမၼ်းၼၼ်ႉၵေႃႈၶိုၼ်းလဝ်ႈလၢတ်ႈလႄႈဝႃႈ၊-
၂၆ ၸဝ်ႈႁဝ်းၶႃႈၸဝ်ႈၶုၼ်လူင်တီႈၶႃႈ။ၶႃႈၸဝ်ႈႁဝ်းၼႆႉပဵၼ်ၶႃႈၸဝ်ႈႁဝ်းတီႈၶႃႈဢေႃႈ။ၶႃႈၸဝ်ႈႁဝ်းၼႆႉပဵၼ်ၵေႃႉဢၼ်တိၼ်ၵႅင်ႉလႄႈၶႃႈၸဝ်ႈႁဝ်းဝႃႈၵဝ်တၵ်းႁၢင်ႈၵွပ်းမႃႉလီႈႁႂ်ႈလႆႈၶီႇၵႂႃႇၸူးၵႃႈတီႈၶုၼ်ႁေႃၶမ်းဢေႃႈ၊ဝႃႈၼင်ႇၼႆယူႇသေၵေႃႈၶႃႈၵဝ်ၶႃႈၸိၽၽႅတ်ႉလႅၼ်ၶႃႈၸဝ်ႈၶႃႈဢေႃႈ။
၂၇ မၼ်းၶႃႉၸိုဝ်ၶၢႆသဵင်ၶႃႈၸဝ်ႈၸွမ်းၸဝ်ႈႁဝ်းၶႃႈဢေႃႈ။ၸဝ်ႈၶုၼ်လူင်ပဵၼ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတီႈၶႃႈဢေႃႈ။ႁဵတ်းၸွမ်းၵႃႈၼင်ႇဢၼ်ထုၵ်ႇတႃၸဝ်ႈႁဝ်းၼၼ်ႉသေၵမ်းတီႈၶႃႈ။
၂၈ ၵႃႈပဵၼ်ပီႈၼွင်ႉၸိူဝ်ႉၶိူဝ်းပေႃႈၶႃႈၸဝ်ႈႁဝ်းၼႆႉပဵၼ်ၵူၼ်းတၢႆၵႃႈတီႈၽၢႆႇၼႃႈၸဝ်ႈၶုၼ်လူင်တီႈၶႃႈဢေႃႈ။ၵူၺ်းၵႃႈၸဝ်ႈႁဝ်းဢဝ်ၶႃႈၸဝ်ႈၼႆႉပၼ်တီႈယူႇႁူမ်ႈလူၺ်ႈၵၼ်တင်းၶဝ်ၸိူဝ်းဢၼ်လႆႈၵိၼ်တီႈၶူင်ႇတီႈၵၼ်ၸဝ်ႈႁဝ်းၸိူဝ်းၼၼ်ႉတီႈၶႃႈယဝ်ႉ။ပိူဝ်ႈဢၼ်ပဵၼ်ၼင်ႇၼႆလႄႈၶႃႈၸဝ်ႈႁဝ်းတၵ်းမီးဢၶႂၢင်ႉဢၼ်လႆႈၶၢင်းၶီၶၢင်းၽၢၼ်တေႃႇၸဝ်ႈၶုၼ်လူင်ထႅင်ႈလူးၵွၼ်ႇၸိူဝ်ႉၼင်ႇႁိုဝ်တီႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်
၂၉ ၶုၼ်ႁေႃၶမ်းမီးဢမိင်ႉလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းလဝ်ႈလၢတ်ႈလူၺ်ႈလွင်ႈဢမူႉမႂ်းတီႈၵဝ်ထႅင်ႈ။ၵဝ်ၸီႇယၢင်ႇလွင်ႈဢၼ်မႂ်းဢိၵ်ႇတင်းၸိၽၼၼ်ႉတၵ်းလႆႈၽႄလိၼ်မႅင်ႇၵၼ်ဢဝ်ၼၼ်ႉယဝ်ႉ၊ဝႃႈၼင်ႇၼႆဢေႃႈ။
၃၀ မေႇၽိပေႃႇသိတ်ႉၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၵွပ်ႈပိူဝ်ႈဢၼ်ၸဝ်ႈႁဝ်းၶႃႈၸဝ်ႈၶုၼ်လူင်သမ်ႉၶိုၼ်းႁွတ်ႈထိုင်ၵႃႈတီႈႁၢင်ႈၸဝ်ႈႁေႃၸဝ်ႈၼိမ်ၼိမ်လီလီၼၼ်ႉလႄႈႁႂ်ႈမၼ်းၼၼ်ႉဢဝ်ၵူႈၸိူဝ်ႉၵူႈပိူင်သေၵမ်းတီႈၶႃႈ၊ဝႃႈၼင်ႇၼႆဢေႃႈ။
၃၁ ပႃႇၸိလေႇ၊ၵူၼ်းမိူင်းၵိလတ်ႉ၊ၼၼ်ႉၵေႃႈလုၵ်ႉသေၵႃႈတီႈဝဵင်းရေႃႇၵေႇလိမ်ႇလူင်းမႃးလႄႈၶၢမ်ႈၼမ်ႉႁွင်ႊယေႃႇတၼ်ႇလူၺ်ႈၵၼ်တင်းၶုၼ်ႁေႃၶမ်းႁႂ်ႈလႆႈၸွမ်းသူင်ႇမၼ်းၸဝ်ႈပူၼ်ႉၼမ်ႉႁွင်ႊယေႃႇတၼ်ႇဢေႃႈ။
၃၂ ပႃႇၸိလေႇၼၼ်ႉပဵၼ်ၵေႃႉဢၼ်ထဝ်ႈၵႄႇၼႃႇလႄႈဢသၢၵ်ႈလႆႈပႅတ်ႇသိပ်းပီႊဢေႃႈ။မၼ်းလႆႈႁဵတ်းလဵင်ႉႁဵတ်းလူတီႈၶုၼ်ႁေႃၶမ်းမိူဝ်ႈဢၼ်ၶုၼ်လူင်ယင်းတိုၵ်ႉၶျႃးတပ်ႉယူႇၵႃႈတီႈဝဵင်းမႁႃႇၼိမ်ႇၼၼ်ႉဢေႃႈ။မၼ်းပဵၼ်ၵေႃႉဢၼ်မၢၵ်ႈမီးၼႃႇလူင်လၢင်ဢေႃႈ။
၃၃ ၶုၼ်ႁေႃၶမ်းၵေႃႈမီးဢမိင်ႉတီႈပႃႇၸိလႄႈဝႃႈ၊-ၶၢမ်ႈၼမ်ႉႁွင်ႊၸွမ်းၵဝ်လႄႈယူႇလူၺ်ႈၵၼ်တင်းၵဝ်ၵႃႈတီႈဝဵင်းယေႇရုသလႅမ်ႇတႃႉ။ၵဝ်တၵ်းလဵင်ႉလူမႂ်းဢေႃႈ၊ဝႃႈၼင်ႇၼႆလႄႈ
၃၄ ပႃႇၸိလေႇလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-လွင်ႈၼင်ႇႁိုဝ်ၶႃႈၸဝ်ႈတၵ်းလႆႈၸွမ်းၸဝ်ႈၶုၼ်လူင်ၶိုၼ်းၵႂႃႇၸူးၵႃႈတီႈဝဵင်းယေႇရုသလႅမ်ႇပုၼ်ႉၼၼ်ႉဢသၢၵ်ႈၶႃႈၸဝ်ႈယင်းၵိုတ်းၵျၢၼ်ႇၵႃႈႁိုဝ်လူးၵွၼ်ႇၶႃႈ။
၃၅ ဝၼ်းမိူဝ်ႈၼႆႉဢသၢၵ်ႈၶႃႈၸဝ်ႈလႆႈပႅတ်ႇသိပ်းပီႊၶႃႈယဝ်ႉ။ၶႃႈၸဝ်ႈယင်းတၵ်းႁူႉလွင်ႈဢၼ်လီဢၼ်ဢမ်ႇလီလႆႈယူႇတီႈၶႃႈႁိုဝ်။ၶႃႈၸဝ်ႈႁဝ်းယင်းတၵ်းႁူႉဢရသႃႇတၢင်းၵိၼ်တၢင်းၶူပ်းလႆႈယူႇတီႈၶႃႈႁိုဝ်။ၶႃႈၸဝ်ႈႁဝ်းယင်းတၵ်းငိၼ်းသဵင်ဢၼ်မေႃၵႂၢမ်းၵူၼ်းၸၢႆး၊မေႃၵႂၢမ်းၵူၼ်းယိင်းတင်းလၢႆႁဵတ်းၼၼ်ႉယူႇတီႈၶႃႈႁိုဝ်။ပိူဝ်ႈၼႆလႄႈၵွပ်ႈပိူဝ်ႈၼင်ႇႁိုဝ်လႄႈၶႃႈၸဝ်ႈတၵ်းလႆႈပဵၼ်ဢၼ်ၼၵ်းၼႃတီႈၸဝ်ႈၶုၼ်လူင်ၶႃႈ။
၃၆ ၶႃႈၸဝ်ႈတၵ်းၸွမ်းလူၺ်ႈၵၼ်တင်းၸဝ်ႈၶုၼ်လူင်ၶၢမ်ႈၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႊယေႃႇတၼ်ႇဢိတ်းၼိုင်ႈၵူၺ်းၶႃႈဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈၶုၼ်လူင်တၵ်းၶျႃးပၼ်သူးလၢပ်ႈဢၼ်ယႂ်ႇၼႃႇလူင်လၢင်ထၢၼ်ႇၼႆႉတီႈၶႃႈ။
၃၇ ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းလႆႈၶိုၼ်းမိူဝ်းၵႂႃႇႁႂ်ႈလႆႈတၢႆၵႃႈၼႂ်းဝဵင်းတီႈယူႇၶႃႈၸဝ်ႈၵႃႈတီႈႁိမ်းပႃႇႁဵဝ်ႈပေႃႈမေႈၶႃႈၸဝ်ႈၼၼ်ႉသေၵမ်းတီႈၶႃႈ။ၼႂ်းဝႃႈၼၼ်သေၵေႃႈမီးၶႃႈၸဝ်ႈႁဝ်းၶိမႁမ်ႇၼႆႉတီႈၶႃႈဢေႃႈ။ႁႂ်ႈမၼ်းၸွမ်းလူၺ်ၵၼ်တင်းၸဝ်ႈႁဝ်းၶႃႈၶၢမ်ႈၵႂႃႇသေၵမ်းတီႈၶႃႈ။ၶႅၼ်းတေႃႈႁဵတ်းတီႈမၼ်းၸွမ်းၵႃႈၼင်ႇဢၼ်ႇၸဝ်ႈႁဝ်းထၢင်ႇပဵၼ်ဢၼ်လီၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၃၈ ၶုၼ်ႁေႃၶမ်းၵေႃႈလၢတ်ႈတီႈပႃႇၸိလေႇလႄႈဝႃႈ၊-ၶိမႁမ်ႇတၵ်းလႆႈၸွမ်းလူၺ်ႈၵၼ်တင်းၵဝ်ၶၢမ်ႈၵႂႃႇဢေႃႈ။ၵဝ်တၵ်းႁဵတ်းတီႈမၼ်းၸွမ်းၵႃႈၼင်ႇဢၼ်မႂ်းထၢင်ႇပဵၼ်ဢၼ်လီၼၼ်ႉဢေႃႈ။ၵႃႈဢၼ်မႂ်းယွၼ်းတီႈၵဝ်ၼၼ်ႉၵေႃႈၵဝ်တၵ်းႁဵတ်းပုၼ်ႈမႂ်းဢေႃႈ၊ဝႃႈၼင်ႇၼႆဢေႃႈ။
၃၉ ၵူၼ်းတင်းသဵင်ႈတင်းလူင်ဢွၼ်ၵၼ်ၶၢမ်ႈၼမ်ႉႁွင်ႊယေႃႇတၼ်ႇဢေႃႈ။တူဝ်ၶုၼ်ႁေႃၶမ်းၵေႃႈၶၢမ်ႈၼမ်ႉႁွင်ႊယေႃႇတၼ်ႇသေယဝ်ႉ၊ၼူမ်ပႃႇၸိလေႇသေလႄႈပၼ်တၢင်းလီတီႈမၼ်းဢေႃႈ။မၼ်းၵေႃႈၶိုၼ်းမိူဝ်းၵႂႃႇၵႃႈတီႈဢၼ်မၼ်းယူႇၼၼ်ႉသေဢေႃႈ။
၄၀ ၼင်ႇၼၼ်လႄႈၶုၼ်ႁေႃၶမ်းၶၢမ်ႈၵႂႃႇၸူးၵႃႈတီႈဝဵင်းၵိလၵႃႇလလႄႈၶိမႁမ်ႇၵေႃႈၸွမ်းၶၢမ်ႈၵႂႃႇဢေႃႈ။ၵူၼ်းမဵဝ်းယုတၵႃႈမီးဢိၵ်ႇတင်းၵူၼ်းမဵဝ်းဢိသရေႇလၶိုင်ႈၼိုင်ႈၸိူဝ်းၼၼ်ႉဢွၼ်ၵၼ်ႁပ်ႉဢဝ်ၶုၼ်ႁေႃၶမ်းမႃးဢေႃႈ။
၄၁ လၢႆးသမ်ႉၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်မႃးၸူးတီႈၶုၼ်ႁေႃၶမ်းလႄႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းမဵဝ်းယုတဢၼ်ပဵၼ်ပီႈၼွင်ႉၶႃႈၸဝ်ႈၸိူဝ်းၼႆႉဢွၼ်ၵၼ်လၵ်ႉဢဝ်ၸဝ်ႈႁဝ်းလႄႈဢဝ်ၸဝ်ႈႁဝ်းတင်းၵူၼ်းႁၢင်ႈၵူၼ်းႁေႃတင်းလၢႆတင်းၵူၼ်းၸဝ်ႈၶုၼ်လူင်တႃႇဝိတ်ႉတင်းသဵင်ႈတင်းလူင်ၶၢမ်ႈၼမ်ႉႁွင်ႊယေႃႇတၼ်ႇၵႂႃႇ၊မိူဝ်ႈဢၼ်ဝႃႈၼင်ႇၼႆၸိုင်၊
၄၂ ၵူၼ်းမဵဝ်းယုတတင်းသဵင်ႈတင်းလူင်ဢွၼ်ၵၼ်ၶိုၼ်းလၢတ်ႈတီႈၵူၼ်း
ဢိသရေႇလတင်းလၢႆလႄႈဝႃႈ၊-ပဵၼ်ၵွပ်ႈပိူဝ်ႈဢၼ်ၶုၼ်ႁေႃၶမ်းပဵၼ်ပီႈၼွင်ႉႁဝ်းၼၼ်ႉဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူၸႂ်မႆႈၶႆႈၸႃႉလူၺ်ႈလွင်ႈဢမူႉၼႆႉ။ႁဝ်းၵိၼ်ၸရိပ်ႈတၢင်းၵိၼ်ၶုၼ်ႁေႃၶမ်းႁိုဝ်။မၼ်းၸဝ်ႈပၼ်သူးပၼ်လၢပ်ႈသေၸိူဝ်ႉသေပိူင်တီႈႁဝ်းႁိုဝ်၊ဝႃႈၼင်ႇၼႆဢေႃႈ။
၄၃ ၵူၼ်းမဵဝ်းဢိသရေႇလတင်းလၢႆၵေႃႈဢွၼ်ၵၼ်ၶိုၼ်းလၢတ်ႈတီႈၵူၼ်းမဵဝ်းယုတၸိူဝ်းၼၼ်ႉလႄႈဝႃႈ၊-ႁဝ်းၸၢပ်ႈသႅင်ႇတီႈၶုၼ်ႁေႃၶမ်းသိပ်းပုၼ်ႊလႄႈႁဝ်းယိင်ႈၶႅၼ်းၸၢပ်ႈသႅင်ႇမဵဝ်းတႃႇဝိတ်ႉလိူဝ်တွၼ်းၼႃသေသူဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူႇယင်းဢမ်ႇတိူင်ႇပၢင်ႇၵၼ်တင်းႁဝ်းဢွၼ်တၢင်းလူၺ်ႈလွင်ႈဢၼ်ဢဝ်ၶုၼ်ႁေႃၶမ်းမႃးၼၼ်ႉလႄႈႁဵတ်းဢမ်ႇၼပ်ႉဢမ်ႇၶၢၼ်းၼင်ႇႁိုဝ်၊ဝႃႈၼင်ႇၼႆဢေႃႈ။ၵႂၢမ်းၵူၼ်းမဵဝ်းယုတၸိူဝ်းၼၼ်ႉယိင်ႈၶႅၼ်းႁၢဝ်ႉၵျၢမ်းလိူဝ်တွၼ်းၼႃႇသေၵႂၢမ်းၵူၼ်းမဵဝ်းဢိသရေႇလၸိူဝ်းၼၼ်ႉဢေႃႈ။