Chapter
၂
တႃႇဝိတ်ႉလႆႈၽိၵ်ႉသိၵ်ႈပဵၼ်ၶုၼ်ႁေႃၶမ်းယုတ
၁ လိုၼ်းၼၼ်ႉတႃႇဝိတ်ႉလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊-ၶႃႈၸဝ်ႈတၵ်းလႆႈၶိုၼ်းၶိုၼ်ႈၸူးၵႃႈတီႈဝဵင်းယုတသဝေဵင်းဝဵင်းတီႈၶႃႈႁိုဝ်၊ဝႃႈၼင်ႇၼႆလႄႈထႃႇဝရႃႉၽြႃးမီးဢမိင်ႉလႄႈဝႃႈ၊-ၶိုၼ်းၶိုၼ်ႈၵႂႃႇတႃႉ၊ဝႃႈၼင်ႇၼႆဢေႃႈ။တႃႇဝိတ်ႉသမ်ႉလဝ်ႈလၢတ်ႈလႄႈဝႃႈ၊-ၶႃႈၸဝ်ႈတၵ်းလႆႈၶိုၼ်းၶိုၼ်ႈၵႂႃႇၸူးၵႃႈတီႈဝဵင်းဢၼ်လႂ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈမီးဢမိင်ႉလႄႈဝႃႈ၊-ၶိုၼ်းၶိုၼ်ႈၵႂႃႇၸူးၵႃႈတီႈဝဵင်းႁေႇပုၼ်ႇတႃႉ၊ဝႃႈၼင်ႇၼႆလႄႈ၊
၂ တႃႇဝိတ်ႉၵေႃႈပႃးဢဝ်မေးမၼ်းသွင်ၵေႃႉဢၼ်ဝႃႈဢၽိၼွင်ႇၵူၼ်းယိင်းဝဵင်းယေႇၸရလေ၊တင်းဢၽိၵေႇလ၊ၵူၼ်းယိင်းဝဵင်းၵရမေႇလ၊ဢၼ်လႆႈပဵၼ်မေးၼႃႇပလၼၼ်ႉလႄႈၶိုၼ်ႈၵႂႃႇဢေႃႈ။
၃ တႃႇဝိတ်ႉႁွင်ႉပႃးဢဝ်ၵူၼ်းမၼ်းတင်းလၢႆဢိၵ်ႇတင်းၵူၼ်းႁိူၼ်းၵူၼ်းယေးၶဝ်ၼၼ်ႉလႄႈယူႇသဝ်းၵႃႈတီႈဝဵင်းႁေႇပုၼ်ႇၸိူဝ်းၼၼ်ႉဢေႃႈ။
၄ လၢႆးသမ်ႉၵူၼ်းမဵဝ်းယုတတင်းလၢႆဢွၼ်ၵၼ်မႃးလႄႈပၼ်ၽိၵ်ႈသိၵ်ႈတီႈတႃႇဝိတ်ႉႁႂ်ႈမၼ်းလႆႈပဵၼ်ၶုၼ်ႁေႃၶမ်းၵူၼ်းမဵဝ်းယုတဢေႃႈ။
၅ မိူဝ်ႈၼၼ်ႉပိူၼ်ႈလဝ်ႈလၢတ်ႈတီႈတႃႇဝိတ်ႉလႄႈဝႃႈ၊-ၵူၼ်းဝဵင်းယႃႇၽိတ်ႉမိူင်းၵိလတ်ႉၸိူဝ်းၼၼ်ႉဢွၼ်ၵၼ်သၢင်းၵျူဝ်ႇသေႃးလုယဝ်ႉ၊ဝႃႈၼင်ႇၼႆလႄႈတႃႇဝိတ်ႉပွႆႇၸႂ်ႉၽူႈတၢင်ႈတူဝ်ၵႂႃႇၸူးၵႃႈတီႈၵူၼ်းဝဵင်းယႃႇၽိတ်ႉ၊မိူင်းၵိလတ်ႉၸိူဝ်းၼၼ်ႉလႄႈလၢတ်ႈဝႃႈ၊-ၵွပ်ႈပိူဝ်ႈဢၼ်သူႁဵတ်းၵျေးၸူးၵရူႉၼႃႇတီႈၸဝ်ႈသူသေႃးလုၼၼ်ႉလႄႈဢဝ်တူဝ်တၢႆမၼ်းၸဝ်ႈသၢင်းၵျူဝ်ႇၼၼ်ႉလႄႈႁႂ်ႈသူလႆႈၶၢမ်ႇတၢင်းလီမၢင်ႇၵလႃႇဢၼ်ထႃႇဝရႃႉၽြႃးပၼ်ၼၼ်ႉသေၵမ်းလူၺ်ႈ။
၆ ႁႂ်ႈထႃႇဝရႃႉၽြႃးႁဵတ်းၵျေးၸူးၵရူႉၼႃႇဢိၵ်ႇတင်းၵျေးၸူးသႅတ်ႈၸႃႇတီႈသူသေၵမ်းလူၺ်ႈ။ၵဝ်ၵေႃႈတၵ်းတွပ်ႇတႅၼ်းပၼ်ၵျေးၸူးတီႈသူၵွပ်ႈပိူဝ်ႈဢၼ်သူႁဵတ်းလွင်ႈတၢင်းၼႆႉၼၼ်ႉဢေႃႈ။
၇ မိူဝ်ႈလဵဝ်ၼႆႉၸိုင်ဢွၼ်ၵၼ်မီးဢဵၼ်ႁႅင်းလႄႈႁတ်းႁၢၼ်တႃႉ။လွင်ႈမၼ်းၸမ်းၸဝ်ႈသူသေႃးလုတၢႆယဝ်ႉ။ၵူၼ်းမဵဝ်းယုတတင်းလၢႆဢွၼ်ၵၼ်ပၼ်ၽိၵ်ႈသိၵ်ႈတီႈၵဝ်ႁႂ်ႈၵဝ်လႆႈပဵၼ်ၶုၼ်ႁေႃၶမ်းၶဝ်ယဝ်ႉ၊ဝႃႈၼင်ႇၼႆဢေႃႈ။
ၵူၼ်းႁိူၼ်းတႃႇဝိတ်ႉတင်းၵူၼ်းႁိူၼ်းသေႃးလုပဵၼ်သိုၵ်းတေႃႇၵၼ်
၈ ၵူၺ်းၵႃႈဢႃႇပၼ၊ဢၼ်ပဵၼ်လုၵ်ႈၸၢႆးၼေႇရ၊ဢၼ်ပဵၼ်ၶုၼ်ပူဝ်ႇၶျုၵ်ႈသေႃးလုၼၼ်ႉမၼ်းဢဝ်ဢိသပေႃႇသိတ်ႉ၊ဢၼ်ပဵၼ်လုၵ်ႈၸၢႆးသေႃးလု၊ၵႂႃႇၵႃတီႈဝဵင်းမႁႃႇၼိမ်ႇသေယဝ်ႉ
၉ ယုၵ်ႉယွင်ႈမၼ်းဝႆႉၵႃႈၼႂ်းဢရႃႇၶုၼ်ဢၼ်ဢုပ်ႉပိူင်ႇၵႃႈၼိူဝ်ၵိလတ်ႉ၊ဢႃႇသ၊ယေႇၸရေႇလဢေႇၽရိမ်ႇ၊ပိၼ်ႇယႃႇမိၼ်ႇတင်းဢိသရေႇလတင်းသဵင်ႈတင်းမူတ်းၼၼ်ႉဢေႃႈ။
၁၀ ဢိသပေႃႇသိတ်ႉလုၵ်ႈၸၢႆးသေႃးလုၼၼ်ႉမိူဝ်ႈဢၼ်ၸႃႉဢုပ်ႉပိူင်မိူင်းဢိသရေႇလၼၼ်ႉၸိုင်ဢသၢၵ်ႈမၼ်းလႆႈသီႇသိပ်းပီႊလႄႈမၼ်းၸၢမ်ႇၸႃးသွင်ပီႊဢေႃႈ။ၸၢဝ်းၶိူဝ်းယုတၸမ်းၸွမ်းလင်တႃႇဝိတ်ႉဢေႃႈ။
၁၁ ၶူပ်ႇပီႊဢၼ်တႃႇဝိတ်ႉလႆႈယူႇၵႃႈတီႈဝဵင်းႁပေုၼ်ႇၵူၼ်းမဵဝ်းယုတၸိူဝ်းၼၼ်ႉၸမ်းပဵၼ်ၸဵတ်းပီႊပၢႆႁူၵ်းလိူၼ်ဢေႃႈ။
၁၁ လၢႆးသမ်ႉဢႃႇပၼႃႇလုၵ်းၸၢႆးၼေႇရၼၼ်ႉပႃးဢဝ်တင်းၵူၼ်းဢိသပေႃႇသိတ်ႉ၊လုၵ်ႈၸၢႆးသေႃးလု၊ၸိူဝ်းၼၼ်ႉသေလႄႈလုၵ်ႉသေၵႃႈတီႈဝဵင်းမႁႃႇၼိမ်ႇၵႂႃႇၵႃႈတီႈဝဵင်းၵိပွင်ႇဢေႃႈ။
၁၃ ယႂႃႇၽ၊လုၵ်ႈၸၢႆးၸေႇရုယႃႇ၊ဢိၵ်ႇတင်းၵူၼ်းတႃႇဝိတ်ႉတင်းလၢႆဢွၵ်ႇၵႂႃႇႁူပ်ႉထူပ်းၵၼ်တင်းၶဝ်ၵႃႈတီႈႁိမ်းၼမ်ႉၼွင်ၵိပွင်ႇဢေႃႈ။ၸုမ်းၼိုင်ႈၼင်ႈၵႃႈတီႈႁိမ်းၼမ်ႉၼွင်ၽၢႆႇၼိုင်ႈလႄႈၸုမ်းၼိုင်ႈသမ်ႉၼင်ႈၵႃႈတီႈႁိမ်းၼမ်ႉၼွင်ၽၢႆႇၼိုင်ႈၼၼ်ႉဢေႃႈ။
၁၄ ဢႃႇပၼႃႇၼၼ်ႉလၢတ်ႈတီႈယႂႃႇၽလႄႈဝႃႈ၊-ႁႂ်ႈၵူၼ်းဢွၼ်ႇၵမ်ႈၽွင်ႈလုၵ်ႉလႄႈၶႄႉၶဵင်ၵၼ်ၵႃႈတီႈၽၢႆႇၼႃႈႁဝ်းသေၵမ်း၊ဝႃႈၼင်ႇၼႆလႄႈယႂႃႇၽၵေႃႈဝႃႈ၊-လီယဝ်ႉ။ႁႂ်ႈၵူၼ်းဢွၼ်ႇလႂ်လုၵ်ႉလႄႈၶႄႉၶဵင်ၵၼ်တႃႉ၊ဝႃႈၼင်ႇၼႆဢေႃႈ။
၁၅ မိူဝ်ႈၼၼ်ႉၶဝ်ႁွင်ႉဢဝ်ၵူၼ်းသိပ်းသွင်ၵေႃႉပုၼ်ႈၵူၼ်းမဵဝ်းပိၼ်ႇယႃႇမိၼ်ႇတင်းဢိသပေႃႇသိတ်ႉလုၵ်ႈၸၢႆးသေႃးလု၊တင်းၶႃႈတႃႇဝိတ်ႉသိပ်းသွင်ၵေႃႉသေယဝ်ႉၶဝ်ၶၢမ်ႈၸူးၵၼ်ဢေႃႈ။
၁၆ ၶဝ်ၼၼ်ႉၵေႃႉတေႃႇၵေႃႉၼင်ႇၵၼ်ၵၼ်ယိပ်းၵမ်ၵွၵ်းႁူဝ်ၵၼ်သေလႄႈဢဝ်မိတ်ႈတႅင်းသႂ်ႇပဵမ်ႉၵၼ်လႄႈလူမ်ႉတၢႆတီႈလဵဝ်ၵၼ်ဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈတီႈၼၼ်ႉလႆႈမီးၸိုဝ်ႈႁေႇလၵႁိတ်ႉၸူႉရိမ်ႇဝႃႈၼႆဢေႃႈ။
၁၇ ၼႂ်းဝၼ်းၼၼ်ႉတၢင်းဢၼ််တိုၵ်းၵၼ်ႁႅင်းယႂ်ႇၼႃႇလူင်လၢင်လႄႈဢႃႇပၼႃႇတင်းၵူၼ်းမဵဝ်းဢိသရေႇလၸိူဝ်းၼၼ်ႉတူၵ်းသုမ်းၵႃႈတီႈၽၢႆႇၼႃႈၵူၼ်းတႃႇဝိတ်ႉတင်းလၢႆဢေႃႈ။
၁၈ လုၵ်ႈၸၢႆးၸေႇရုယႃႇသၢမ်ၵေႃႉဢၼ်ပဵၼ်ယႂႃႇၽ၊ဢၽိသေႇ၊ဢႃႇသႁေႇလ၊ၸိူဝ်းၼၼ်ႉၵေႃႈမီးၵႃႈတီႈၼၼ်ႉဢေႃႈ။ဢႃႇသႁေႇလၼၼ်ႉတိၼ်ၶၼ်တိၼ်ၽႂ်းမိူၼ်ၼင်ႇတိုင်ဢၼ်ယၢမ်ႈယူႇၵႃႈတီႈထိူၼ်ႇၼၼ်ႉဢေႃႈ။
၁၉ ဢႃႇသႁေႇလလိုပ်ႈၸွမ်းလမ်းၸွမ်းဢႃႇပၼႃႇၵႂႃႇဢေႃႈ။မၼ်းဢမ်ႇဝေႈၵႂႃႇၽၢႆႇသၢႆႉၽၢႆႇၶႂႃႇလႄႈလိုပ်ႈၸွမ်းၵႂႃႇသိုဝ်ႈသိုဝ်ႈဢေႃႈ။
၂၀ ဢႃႇပၼႃႇဝၢႆႇတူၺ်းၶိုၼ်းတၢင်းလင်လႄႈထၢမ်ႇဝႃႈ၊-ဢႃႇသႁေႇလဢိူၺ်း။ပဵၼ်မႂ်းႁိုဝ်၊ဝႃႈၼင်ႇၼႆလႄႈမၼ်းၶိုၼ်းလၢတ်ႈလႄႈဝႃႈ၊-
၂၁ ပဵၼ်ၵၼ်ယဝ်ႉ၊ဝႃႈၼင်ႇၼႆၸိုင်ဢႃႇပၼႃႇၵေႃႈလၢတ်ႈလႄႈဝႃႈ၊-ငိၵ်းၵႂႃႇၵႃႈတီႈၽၢႆႇၶႂႃ၊ဢမ်ႇၼၼ်ၵႃႈတီႈၽၢႆႇတၢင်းသေလႄႈတီႉၵမ်ဢဝ်ၵူၼ်းဢွၼ်သေၵေႃႉလႄႈႁိမ်ဢဝ်လၢၵ်ႈၼၢၵ်ႈမၼ်းတႃႉ၊ဝႃႈၼင်ႇၼႆသေၵေႃႈဢႃႇသႁေႇလၼၼ်ႉယင်းဢမ်ႇငိၵ်းၵႂႃႇသတေၢင်းလႄႈလိုပ်ႈၸွမ်းလင်မၼ်းယူႇဢေႃႈ။
၂၂ လၢႆးသမ်ႉဢႃႇပၼႃႇလၢတ်ႈတီႈဢႃႇသႁေႇလလႄႈဝႃႈ၊-ငိၵ်းၵႂႃႇသတေၢင်းဢၼ်ၸွမ်းလင်ၵဝ်ၼႆႉတႃႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵဝ်တၵ်းလႆႈတႅင်းမႂ်းပွင်ႇၵူပ်းလိၼ်ၵႂႃႇ။ၵဝ်တၵ်းလႆႈတူၺ်းၼႃႈပီႈၸၢႆးမႂ်းယႂႃႇၽၼၼ်ႉၸိူဝ်ႉၼင်ႇႁိုဝ်၊ဝႃႈၼႆသေၵေႃႈ၊မၼ်းဢမ်ႇထွမ်ႇလႄႈလိုပ်ႈၸွမ်းယူႇဢေႃႈ။
၂၃ ဢႃႇပၼႃႇဢဝ်သူၼ်ႈႁွၵ်ႇမၼ်းတႅင်းသႂ်ႇပုမ်ဢႃႇသႁေႇလထၢၼ်ႈပေႃးႁွၵ်ႇမၼ်းၼၼ်ႉပွင်ႇပဵဝ်ၵႂႃႇၵႃႈတီႈတၢင်းသၼ်လင်မၼ်းသေယဝ်ႉမၼ်းလူမ်ႉတၢႆၵႃႈတီႈၼၼ်ႉၵမ်းလဵဝ်ဢေႃႈ။ၵူၼ်းၵႃႈဢၼ်ႁွတ်ႈထိုင်ၵႃႈတီႈဢၼ်ဢႃႇသႁေႇလလူမ်ႉတၢႆၼၼ်ႉၶဝ်ဢွၼ်ၵၼ်ၵိုတ်းသဝ်းၵႃႈတီႈၼၼ်ႉဢေႃႈ။
၂၄ ၵူၺ်းၵႃႈယႂႃႇၽဢိၵ်ႇတင်းဢၽိသေႇလိုပ်ႈၸွမ်းလမ်းၸွမ်းဢႃႇပၼႃႇၵႂႃႇလႄႈမိူဝ်ႈဢၼ်ၶဝ်ႁွတ်ႈထိုင်ၵႃႈတီႈလွႆဢမ်ႇမႃႇဢၼ်မီးၵႃႈတီႈၽၢႆႇၼႃႈဝဵင်းၵိဢႃႇႁိမ်ႇသဵၼ်ႈတၢင်းဢၼ်ၵႂႃႇၸူးၵႃႈတီႈထိူၼ်ႇၵိပွင်ႇၼၼ်ႉၸိုင်ဝၼ်းတူၵ်းယဝ်ႉဢေႃႈ။
၂၅ ၵူၼ်းမဵဝ်းပိၼ်ႇယႃႇမိၼ်ႇၸိူဝ်းၼၼ်ႉၸူႉၵၼ်တုမ်ၵၼ်ၽၢႆႇလင်ဢႃႇပၼႃႇလႄႈႁဵတ်းတပ်ႉလဵဝ်ၵူၺ်းသေလႄႈၵိုတ်းသဝ်းယူႇၵႃႈၼိူဝ်ပၢႆလွႆဢေႃႈ။
၂၆ မိူဝ်ႈၼၼ်ႉဢႃႇပၼႃႇႁွင်ႉသႅၼ်ႇၸူးတီႈယႂႃႇၽလႄႈဝႃႈ၊-လၢပ်ႇလႅဝ်းတၵ်းလႆႈၶူပ်းၵိၼ်ယူႇတႃႇသေႇႁိုဝ်။တီႈသုတ်းမၼ်းတၵ်းပဵၼ်တၢင်းဢၼ်ၶူမ်ၶၼ်းဢမ်ႇၸႂ်ႈႁိုဝ်။မႂ်းယင်းဢမ်ႇႁႂ်ႈၵူၼ်းမႂ်းတင်းလၢႆဢမ်ႇလိုပ်ႉဢမ်ႇလမ်းၸွမ်းပီႈၼွင်ႉမႂ်းလႄႈတၵ်းယူႇႁိုင်ၵႃႈႁိုဝ်၊ဝႃႈၼင်ႇၼႆသေယဝ်ႉ၊ယႂႃႇၽလၢတ်ႈလႄႈဝႃႈ၊-
၂၇ ၵႃႈၼင်ႇဢၼ်ၽြႃးပဵၼ်ၸဝ်ႈဢသၢၵ်ႈလိပ်းယူႇၼၼ်ႉသင်မႂ်းဢမ်ႇလၢတ်ႈၸိူဝ်ႉၼႆဢွၼ်တၢင်းၸိုင်ၵူၼ်းတင်းလၢႆတၵ်းလိုပ်ႈၸွမ်းလမ်းၸွမ်းပီႈၼွင်ႉၶဝ်တေႃႇႁွတ်ႈမိူင်းလႅင်းယဝ်ႉ၊ဝႃႈၼင်ႇၼႆသေယဝ်ႉ၊
၂၈ ယႂႃႇၽပဝ်ႇတိုင်ႈၼႄးၶရႃႇလႄႈၵူၼ်းၵႃႈမီးၸိူဝ်းၼၼ်ႉယင်းဢမ်ႇလိုပ်ႈၸွမ်းလမ်းၸွမ်းၵူၼ်းမဵဝ်းဢိသရေႇလထႅင်ႈယဝ်ႉဢေႃႈ။၊
၂၉ ဢႃႇပၼႃႇဢိၵ်ႇတင်းၵူၼ်းမၼ်းၸိူဝ်းၼၼ်ႉၽႃႇလတ်းၵႂႃႇၵႃႈၼႂ်းပၢင်ႇပဵင်းဢႃႇရၽႃႇတင်းၶိုၼ်းလႄႈၶၢမ်ႈၼမ်ႉႁွင်ႊယေႃႇတၼ်ႇသေယဝ်ႉ၊ၽႃႇလတ်းၵႃႈၼႂ်းမိူင်းပိသရုၼ်ႇထၢၼ်ႈပေႃးသုတ်းလႄႈႁွတ်ႈထိုင်ၵႃႈတီႈဝဵင်းမႁႃႇၼိမ်ႇဢေႃႈ။
၃၀ ယႂႃႇၽၵေႃႈလုၵ်ႉသေၵႃႈတီႈတၢင်းဢၼ်လိုပ်ႈၸွမ်းလမ်းၸွမ်းဢႃႇပၼႃႇၼၼ်ႉၶိုၼ်းမႃးလႄႈမိူဝ်ႈဢၼ်မၼ်းႁႂ်ႈၵူၼ်းမၼ်းတင်းသဵင်ႈတင်းလူင်ၸူႉၵၼ်တုမ်ၵၼ်ၼၼ်ႉၸိုင်လုတ်ႉဝႆႉၶႃႈၵူၼ်းတႃႇဝိတ်ႉသိပ်းၵဝ်ႈၵေႃႉဢိၵ်ႇတင်းဢႃႇသႁေႇလဢေႃႈ။
၃၁ ၵူၼ်းတႃႇဝိတ်ႉၸိူဝ်းၼၼ်ႉဢဝ်တၢႆၵူၼ်းမဵဝ်းပိၼ်ႇယႃႇမိၼ်ႇဢၼ်ယူႇၸွမ်းဢႃႇပၼႃႇၼၼ်ႉသၢမ်ပၢၵ်ႇပၢႆႁူၵ်းသိပ်းၵေႃႉဢေႃႈ။
၃၂ ၶဝ်ဢဝ်တူဝ်တၢႆဢႃႇသႁေႇလၼၼ်ႉၵႂႃႇသၢင်းၵျူဝ်ႇၼႂ်းပႃႇႁဵဝ်ႈပေႃႈမၼ်းဢၼ်မီးၵႃႈတီႈဝဵင်းပႅတ်ႉလိႁႅမ်ႇၼၼ်ႉဢေႃႈ။ယႂႃႇၽဢိၵ်ႇတင်းၵူၼ်းမၼ်းၸိူဝ်းၼၼ်ႉဢွၼ်ၵၼ်ၵႂႃႇတၢင်းၶိုၼ်းလႄႈမိူဝ်ႈမိူင်းၸႃႉလႅင်းၼၼ်ႉၶဝ်ႈႁွတ်ႈထိုင်ၵႃႈတီႈဝဵင်းႁေႇပုၼ်ႇဢေႃႈ။