Chapter
၆
ၶိုၼ်းဢဝ်တိူၵ်ႈပတိၺိၼ်ႇၸဝ်ႈမႃးဝဵင်းယေႇရုသလႅမ်ႇ
၁ လၢႆးသမ်ႉတႃႇဝိတ်ႉႁႂ်ႈၵူၼ်းမဵဝ်းဢိသရေႇလဢၼ်လိူၵ်ႈၵဵပ်းဢဝ်သၢမ်မိုၼ်ႇၼၼ်ႉၸူႉၵၼ်တုမ်ၵၼ်သေယဝ်ႉဢွၼ်ၵၼ်ၵႂႃႇၵႃႈတီႈဝဵင်းပႃႇလႃႇ၊မိူင်းယုတ၊
၂ ႁႂ်ႈလႆႈဢဝ်ၵူၼ်းတိူၵ်ႈပတိၺိၼ်ႇၽြႃးပဵၼ်ၸဝ်ႈဢၼ်လႆႈၶၢမ်ႇတၢင်းဢၼ်ဢဝ်ၼႃႇမႃႉၸိုဝ်သဵင်ၸဝ်ႈၼႃႇမႃႉၸိုဝ်သဵင်ထႃႇဝရႃႉၽြႃးၸဝ်ႈဢၼ်ၸၢမ်ႇၸႃးယူႇၵႃႈၼႂ်းၵႄႈဝူင်ႈၵၢင်ၶေႇရုၽိမ်ႇဢၼ်မီးၵႃႈၼိူဝ်တိူၵ်ႈပတိၺိၼ်ႇၼၼ်ႉမႃးဢေႃႈ။
၃ ၶဝ်ဢွၼ်ၵၼ်ဢဝ်တိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉတၢင်ႇၵႃႈၼိူဝ်လေဢၼ်မႂ်ႇလႄႈဢဝ်ဢွၵ်ႇသေၵႃႈၼႂ်းႁိူၼ်းဢၽိၼတပ်ႉဢၼ်မီးၵႃႈၼိူဝ်လွႆၼၼ်ႉဢေႃႈ။ဢေႃႇၸတင်းဢႃႇႁိဢုဝ်ႇဢၼ်ပဵၼ်လုၵ်ႈၸၢႆးဢၽိၼတပ်ႉၼၼ်ႉလႆႈႁေႃႈလေဢၼ်မႂ်ႇၼၼ်ႉဢေႃႈ။
၄ ဢႁိဢုဝ်ႇပႆႈၵႂႃႇၽၢႆႇၼႃႈတိူၵ်ႈပတိၺိၼ်ႇၸဝ်ႈၼၼ်ႉဢေႃႈ။
၅ တႃႇဝိတ်ႉဢိၵ်ႇတင်းၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ယိပ်းၵမ်ဢဝ်တိင်ႇ၊တရေႃး၊ၵွင်ၶဵတ်ႇ၊ၼႄးၶရႃႇ၊သႅင်ႇ၊တင်းလၢႆသေလႄႈဢဝ်ႁႅင်းၶတ်းၸႂ်ပဝ်ႇႁႆႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၆ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈတလၢင်းယဵပ်ႇၶဝ်ႈၼႃႇၶုၼ်ႇၼၼ်ႉၸိုင်ၵွပ်ႈပိူဝ်ႈဝူဝ်းၶီႇလိုတ်းၶီႇလႅင်ႉလႄႈဢေႃႇၸယဵတ်ႇမိုဝ်းမၼ်းၸူးၵႃႈတီႈတိူၵ်ႈပတိၺိၼ်ႇၽြႃးပဵၼ်ၸဝ်ႈသေယဝ်ႉယိပ်းၵမ်ဝႆႉဢေႃႈ။
၇ မိူဝ်ႈၼၼ်ႉတၢင်းၸႂ်မႆႈၶႆႈၸႃႉထႃႇဝရႃႉၽြႃးဢွၵ်ႇၵႃႈၼိူဝ်ဢေႃႇၸၼၼ်ႉလႄႈၽြႃးပဵၼ်ၸဝ်ႈပၼ်တၢမ်ႇၵႃႈတီႈမၼ်းၵွပ်ႈပိူဝ်ႈဢပျႅတ်ႈမၼ်းၼၼ်ႉသေယဝ်ႉမၼ်းတၢႆၵႃႈတီႈႁိမ်းတိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉဢေႃႈ။
၈ တႃႇဝိတ်ႉမီးၸႂ်ဢၼ်ႁဵဝ်ႇၸွပ်ႈၵွပ်ႈပိူဝ်ႈဢၼ်ထႃႇဝရႃႉၽြႃးပၼ်တၢမ်ႇတီႈဢေႃႇၸၼၼ်ႉလႄႈၵႃႈတီႈၼၼ်ႉလႆႈႁွင်ႉႁိၵ်ႈၸိုဝ်ဝႃႈၽေးရိတ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၉ ၼႂ်းဝၼ်းၼၼ်ႉတႃႇဝိတ်ႉၵူဝ်ႁႄထႃႇဝရႃႉၽြႃးလႄႈလၢတ်ႈဝႃႈ၊-တိူၵ်ႈပတိၺိၼ်ႇထႃႇဝရႃႉၽြႃးတၵ်းႁွတ်ႈထိုင်မႃးၵႃႈတီႈၵဝ်ၸိူဝ်ႉၼင်ႇႁိုဝ်၊ဝႃႈၼင်ႇၼႆသေယဝ်ႉ
၁၀ မၼ်းယင်းဢမ်ႇဢဝ်တိူၵ်ႈပတိၺိၼ်ႇထႃႇဝရႃႉၽြႃးမီးယူႇၵႃႈတီႈမၼ်းၵႃႈၼႂ်းဝဵင်းတႃႇဝိတ်ႉၼၼ်ႉလႄႈမၼ်းဢဝ်ငိၵ်းၵႂႃႇၸူးၵႃႈတီႈႁိူၼ်းဢုဝ်ႇပိတ်ႉဢေႇတုင်ႇဢၼ်ပဵၼ်ၵူၼ်းၵိတ်ႉတိၼၼ်ႉဢေႃႈ။
၁၁ တိူၵ်ႈပတိၺိၼ်ႇၽြႃးၼၼ်ႉမီးယူႇၵႃႈတီႈႁိူၼ်းဢုဝ်ႇပိတ်ႉဢေႇတုင်ႇၵူၼ်းၵိတ်ႉတိၼၼ်ႉသၢမ်လိူၼ်တဵမ်တဵမ်ဢေႃႈ။ထႃႇဝရႃႉၽြႃးၵေႃႈပၼ်တၢင်းလီတီႈဢုဝ်ႇပိတ်ႉဢေႇတုင်ႇဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ဢေႃႈ။
၁၁ မိူဝ်ႈဢၼ်ပိူၼ်ႈလၢတ်ႈတီႈတႃႇဝိတ်ႉလႄႈဝႃႈ၊-ထႃႇဝရႃႉၽြႃးပၼ်တၢင်းလီတီႈဢုဝ်ႇပိတ်ႉဢေႇတုင်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ၵွပ်ႈပိူဝ်ႈတိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉဢေႃႈ၊ဝႃႈၼင်ႇၼႆၸိုင်
၁၃ တႃႇဝိတ်ႉမီးတၢင်းဢၼ်ၸူမ်းသိူဝ်းၼႃႇလူင်လၢင်သေလႄႈၵႂႃႇဢဝ်တိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉမႃးၵႃႈတီႈဝဵင်းတႃႇဝိတ်ႉဢေႃႈ။
၁၄ မိူဝ်ႈဢၼ်ၶဝ်ၸိူဝ်းဢၼ်ႁပ်ႉတိူၵ်ႈပတိၺိၼ်ႇထႃႇဝရႃႉၽြႃးၼၼ်ႉပႆႈၵႂႃႇႁူၵ်းယၢင်ႈတိၼ်ယဝ်ႉၸိုင်မၼ်းဢဝ်ဝူဝ်းဢိၵ်ႇတင်းတူဝ်ႈဢွၼ်ႇဢၼ်ပီးလီမၼ်းလီၼၼ်ႉပုၵ်ႉၸေႃႇယိၸ်ႉဢေႃႈ။
၁၅ ၼႂ်းမိူဝ်ႈဢၼ်တႃႇဝိတ်ႉဢိၵ်ႇတင်းၵူၼ်းမဵဝ်းဢိသရေႇလတင်းလၢႆဢွၼ်ၵၼ်ႁုၼ်ႉႁိူဝ်ႇယူႇ၊ပဝ်ႇၼႄးၶရႃႇယူႇသေလႄႈဢဝ်တိူၵ်ႈပတိၺိၼ်ႇထႃႇဝရႃႉၽြႃးမႃးယူႇၼၼ်ႉၸိုင်တႃႇဝိတ်ႉၼုင်ႈမႆႊသိူဝ်ႈသုပ်းသေယဝ်ႉဢဝ်ႁႅင်းဢွၵ်ႇၶတ်းၸႂ်ၵႃႈဝႅၼ်ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၁၆ မိူဝ်ႈဢၼ်တႃႇဝိတ်ႉၵႃႈဝ်ၼ်လႄႈဢဝ်တိူၵ်ႈပတိၺိၼ်ႇထႃႇဝရႃႉၽြႃးၶဝ်ႈမႃးၵႃႈၼႂ်းဝဵင်းတႃႇဝိတ်ႉယူႇၼၼ်ႉၸိုင်၊မိၶႃႇလ၊ဢၼ်ပဵၼ်လုၵ်ႈယိင်းသေႃးလုၼၼ်ႉ၊ယူႇၵႃႈတီႈႁူးလၢင်းတဵၼ်လွမ်တူၺ်းလႄႈႁၼ်ၶုၼ်လူင်တႃႇဝိတ်ႉၵႃႈယူႇဝႅၼ်ယူႇၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉၸိုင်မၼ်းႁဵတ်းဢမ်ႇၼပ်ႉဢမ်ႇၶၢၼ်းတီႈၶုၼ်ႁေႃၶမ်းၵႃႈၼႂ်းႁူဝ်မၼ်းဢေႃႈ။
၁၇ ၶဝ်ဢွၼ်ၵၼ်ဢဝ်တိူၵ်ႈပတိၺိၼ်ႇထႃႇဝရႃႉၽြႃးသႂၢင်းၶဝ်ႈၵႃႈၼႂ်းသုမ်ႉထဵင်ၸဝ်ႈဢၼ်တႃႇဝိတ်ႉပူၵ်းတင်ႈဝႆႉၼၼ်ႉသေယဝ်ႉတႃႇဝိတ်ႉဢဝ်ယိၸ်ႉဢၼ်တုတ်ႇၽႆးဢိၵ်ႇတင်းယိတ်ႉမိၵ်ႈသႁႃႇယႃႉတင်းလၢႆၼၼ်ႉပုၵ်ႉၸေႃႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၁၈ မိူဝ်ဢၼ်တႃႇဝိတ်ႉႁႂ်ႈဢမူႉတၢင်းဢၼ်ပုၵ်ႉၸေႃႇယိၸ်ႉဢၼ်တုတ်ႇၽႆး၊ယိၸ်ႉမိၵ်ႈသႁႃႇယႃႉယဝ်ႉတူဝ်ႈယဝ်ႉၼၼ်ႉၸိုင်မၼ်းဢဝ်ၼႃႇမႃႉၸိုဝ်သဵင်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးသေလႄႈပၼ်တၢင်းလီတီႈပရိၵ်ႈသၢတ်ႈတင်းလၢႆဢေႃႈ။
၁၉ မၼ်းတူၵ်းမႅင်ႇပၼ်တီႈၵူၼ်းတင်းသဵင်ႈတင်းလူင်ဢၼ်ၶဝ်ႈပႃးၼႂ်းပရိၵ်ႈသၢတ်ႈမဵဝ်းဢိသရေႇလၸႃႉၸဵမ်ၵူၼ်းၸၢႆးၵူၼ်းယိင်းၸိူဝ်းၼၼ်ႉယေႈၵေႃႉၶဝ်ႈမုၼ်းယေႈၶႅပ်း၊ၼိူဝ်ႉယေႈၵွၼ်ႈ၊ၶႅပ်းမၢၵ်ႇၸပိတ်ႉယေႈၶႅပ်းသေယဝ်ႉၵူၼ်းတင်းသဵင်ႈတင်းလူင်ၵေႃႈဢဝ်လႄႈဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈတီႈယူႇၶဝ်သေဢေႃႈ။
၂၀ မိူဝ်ႈဢၼ်တႃႇဝိတ်ႉၶိုၼ်းမိူဝ်းၵႂႃႇၵႃႈတီးႁိူၼ်းမၼ်းႁႂ်ႈလႆႈပၼ်တၢင်းလီတီႈၵူၼ်းၼႂ်းႁၢင်ႈၼႂ်းႁေႃမၼ်းၸိူဝ်းၼၼ်ႉၸိုင်မိၶႃႇလ၊လုၵ်ႈယိင်းသေႃးလုၼၼ်ႉဢွၵ်ႇမႃးႁပ်ႉႁူဝ်တၢင်းမၼ်းသေလႄႈလၢတ်ႈဝႃႈ၊-ၶုၼ်ႁေႃၶမ်းဢိသရေႇလလူင်ထွတ်ႇၶူဝ်းၼုင်ႈမၼ်းၸဝ်ႈဝၼ်းမိူဝ်ႈၼႆႉသေၵႃႈတီႈၽၢႆႇၼႃႈၶႃႈၵူၼ်းယိင်းၶႃႈၵူၼ်းၸၢႆးမၼ်းၸဝ်ႈမိူၼ်ၸိူဝ်ႉၼင်ႇၵေႃႉဢၼ်မဝ်ႈမၢင်ၼၼ်ႉလႄႈယင်းဢမ်ႇမီးတၢင်းဢူၵ်းတၢင်းဢၢႆၼၼ်ႉလူင်ႇပေႇ၊ဝႃႈၼင်ႇၼႆဢေႃႈ။
၂၁ တႃႇဝိတ်ႉၵေႃႈလၢတ်ႈတီႈမိၶႃႇလလႄႈဝႃႈ၊-ၵဝ်ႁဵတ်းၵႃႈတီႈၽၢႆႇၼႃႈထႃႇဝရႃႉၽြႃးဢၼ်လိူၵ်ႈၵဵပ်းဢဝ်ၵဝ်လိူဝ်တွၼ်းၼႃႇသေပေႃႈမႂ်းတင်းပီႈၼွင်ႉၸိူဝ်ႉၶိူဝ်းမၼ်းၵႃႈမီးၼၼ်ႉလႄႈၶၢၼ်းၵဝ်ဝႆႉၵႃႈၼႂ်းဢရႃႇၶုၼ်ဢၼ်ဢုပ်ႉပိူင်ႇၵႃႈၼိူဝ်ၵူၼ်းထႃႇဝရႃႉၽြႃးမဵဝ်းဢိသရေႇလတင်းလၢႆၼၼ်ႉယဝ်ႉဢမ်ႇၸႂ်ႈႁိုဝ်။ပိူဝ်ႈၼႆလႄႈၵဝ်တၵ်းၵႃႈဝႅၼ်ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၂၂ ၼႆႉၵူၺ်းဢမ်ႇၵႃး၊ၵဝ်ယင်းတေဢမ်ႇဢဝ်သရေႇလိူဝ်တွၼ်းၼႃႇသေၼႆႉ။ယိင်ႈၶႅၼ်းတၵ်းၶျႃးတူဝ်းၸဝ်ႈၵဝ်ႇတူၵ်းတီႈတႅမ်ႇသိုဝ်ႈၼႃႈတႂ်ႈတႃတူဝ်ၸဝ်ႈၵဝ်ႇဢေႃႈ။ၼႂ်းဝႃႈၼၼ်သေၵေႃႈၵႃႈတီႈၶႃႈၵူၼ်းယိင်းဢၼ်မႂ်းလၢတ်ႈၸိူဝ်းၼၼ်ႉၸမ်း၊ၵဝ်တၵ်းမီးသရေႇၼႃႈတႃယူႇဢေႃႈ၊ဝႃႈၼင်ႇၼႆဢေႃႈ။
၂၃ မိၶႃႇလ၊လုၵ်ႈယိင်းသေႃးလုၼၼ်ႉယင်းဢမ်ႇမီးလုၵ်ႈမီးလၢင်းတေႃႇထိုင်ႁွတ်ႈပေႃးတၢႆဢေႃႈ။