Chapter
၁၈
ဢပသလုမ်ႇတၢႆ
၁ တႃႇဝိတ်ႉၼပ်ႉဢၢၼ်ႇၵူၼ်းဢၼ်ပႃးတီႈမၼ်းၸိူဝ်းၼၼ်ႉလႄႈၶၢၼ်းဝႆႉၶဝ်ၸိူဝ်းဢၼ်ဢုပ်ႉၼိူဝ်ၵူၼ်းယေႈႁဵင်၊ၶဝ်ၸိူဝ်းဢၼ်ဢုပ်ႉၼိူဝ်ၵူၼ်းယေႈပၢၵ်ႇဢေႃႈ။
၂ တႃႇဝိတ်ႉႁႂ်ႈၵူၼ်းတင်းလၢႆၶီႇသိုၵ်းၵႂႃႇလႄႈဢဝ်ၸုမ်းၼိုင်ႈဢၢပ်ႈပၼ်ၵႃႈၼႂ်းမိုဝ်းယႂႃႇၽ၊ၸုမ်းၼိုင်ႈၵႃႈၼႂ်းမိုဝ်းဢၽိသေႇ၊ၼွင်ႉၸၢႆးယႂႃႇၽ၊လုၵ်ႈၸၢႆးၸေႇရုယႃႇ၊ၸုမ်းၼိုင်ႈၵႃႈၼႂ်းမိုဝ်းဢိတ်ႉတေႇ၊ၵူၼ်းၵိတ်ႉတိ၊ၼၼ်ႉလႄႈၶုၼ်ႁေႃၶမ်းမီးဢမိင်ႉတီႈၵူၼ်းတင်းလၢႆလႄႈဝႃႈ၊-တူဝ်ၵဝ်တၵ်းၶီႇသိုၵ်းၵႂႃႇလူၺ်ႈၵၼ်တင်းသူဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။
၃ ၵူၼ်းတင်းလၢႆၵေႃႈဢွၼ်ၵၼ်လဝ်ႈလၢတ်ႈလႄႈဝႃႈ၊-တူဝ်ၸဝ်ႈႁဝ်းယႃႇပေၵႂႃႇသေၵမ်းၶႃႈ။ပိၵ်ႉသမ်ႉႁဝ်းၶႃႈၸိူဝ်းၼႆႉလႆႈဢွၵ်ႇပၢႆသေၵေႃႈၶဝ်ဢမ်ႇမၢတ်ႈပဵၼ်ဢမူႉသင်ၶႃႈ။ပိၵ်ႉသမ်ႉႁဝ်းၶႃႈၸိူဝ်းၼႆႉတၢႆၶိုင်ႈၼိုင်ႈသေၵေႃႈၶဝ်ဢမ်ႇမၢတ်ႈပဵၼ်ဢမူႉသင်ၶႃႈ။ၸဝ်ႈႁဝ်းၸမ်းမျၢတ်ႈၼႃႇသေႁဝ်းၶႃႈမိုၼ်ႇၼိုင်ႈတီႈၶႃႈဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈပေႃးၸဝ်ႈႁဝ်းယူႇၵႃႈၼႂ်းဝဵင်းလႄႈၸွႆႈထႅမ်မႃႉၸႃႉႁဝ်းၶႃႈၸိူဝ်းၼႆႉၸိုင်ယိင်ႈၶႅၼ်းတၵ်းလီတီႈၶႃႈဢေႃႈ၊ဝႃႈၼင်ႇၼႆဢေႃႈ။
၄ ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊-ၵဝ်တၵ်းႁဵတ်းၸွမ်းၵႃႈၼင်ႇဢၼ်သူထၢင်ႇပဵၼ်ဢၼ်လီၼၼ်ႉဢေႃႈ၊ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းၸုၵ်းယူႇၵႃႈတီႈႁိမ်းႁူးၽၵ်းတူလႄႈၵူၼ်းတင်းသဵင်ႈတင်းလူင်ႁဵတ်းတပ်ႉယေႈပၢၵ်ႇ၊တပ်ႉယေႈႁဵင်သေလႄႈၶီႇသိုၵ်းၵႂႃႇဢေႃႈ။
၅ ၶုၼ်ႁေႃၶမ်းၵေႃႈသင်ႇလၢတ်ႈဝႆႉတီႈယႂႃႇၽ၊ဢၽိသေႇ၊ဢိတ်ႉတေႇ၊ၸိူဝ်းၼၼ်ႉလႄႈဝႃႈ၊-ထွၵ်ႈလူၺ်ႈၼႃႈၵဝ်သေလႄႈႁဵတ်းတီႈၵူၼ်းဢွၼ်ႇဢပသလုမ်ႇၼၼ်ႉဢူၼ်ႈဢူၼ်ႈဢွၼ်ႇဢွၼ်ႇတႃႉ၊ဝႃႈၼင်ႇၼႆဢေႃႈ။ၵူၼ်းတင်းသဵင်ႈတင်းလူင်လႆႈငိၼ်းမိူဝ်ႈဢၼ်ၶုၼ်ႁေႃၶမ်းသင်ႇလၢတ်ႈလွင်ႈဢပသလုမ်ႇတီႈပူဝ်ႇပႃႇၵႃႈမီးၸိူဝ်းၼၼ်ႉၸိူဝ်ႉၼင်ႇၼၼ်ယူႇဢေႃႈ။
၆ ၼင်ႇၼၼ်လႄႈၵူၼ်းတင်းလၢႆဢွၼ်ၵၼ်ဢွၵ်ႇၸူးၵႃႈတီႈပၢင်ႇပဵင်းႁႂ်ႈလႆႈတိုၵ်းၵၼ်တင်းၵူၼ်းမဵဝ်းဢိသရေႇလၸိူဝ်းၼၼ်ႉလႄႈၶဵင်ႇသိုၵ်းၵၼ်ၵႃႈၼႂ်းပႃႇမႆႉပႃႇတွၵ်ႇထိူၼ်ႇဢေႇၽရိမ်ႇၼၼ်ႉဢေႃႈ။
၇ ၵူၼ်းမဵဝ်းဢိသရေႇလၸိူဝ်းၼၼ်ႉတူၵ်းသုမ်းၵႃႈတီႈၽၢႆႇၼႃႈၶႃႈၵူၼ်းတႃႇဝိတ်ႉၸိူဝ်းၼၼ်ႉလႄႈၼႂ်းဝၼ်းၼၼ်ႉမီးတၢင်းဢၼ်ၽၼ်းဢဝ်တၢႆဢၼ်ယႂ်ႇၼႃႇလူင်လၢင်ၵႃႈတီႈၼၼ်ႉလႄႈၵူၼ်းတၢႆသွင်မိုၼ်ႇဢေႃႈ။
၈ တၢင်းဢၼ်တိုၵ်းၵၼ်ၼၼ်ႉၸွတ်ႇၸႅတ်ႇၵႃႈၼိူဝ်လိၼ်ၵူႈတီႈၵူႈလႅၼ်လႄႈၼႂ်းဝၼ်းၼၼ်ႉၶဝ်ၸိူဝ်းဢၼ်တၢႆၵွပ်ႈလူၺ်ႈပႃႇမႆႉပႃႇတွၵ်ႇၼၼ်ႉယိင်ႈၶႅၼ်းၼမ်ၼႃႇသေၶဝ်ၸိူဝ်းဢၼ်တၢႆလူၺ်ႈလၢပ်ႇလူၺ်ႈလႅဝ်းၼၼ်ႉဢေႃႈ။
၉ ဢပသလုမ်ႇႁူပ်ႉထူပ်းၶႃႈၵူၼ်းတႃႇဝိတ်ႉဢေႃႈ။ဢပသလုမ်ႇၼၼ်ႉၶီႇမႃႉလီႈသေလႄႈမႃႉလီႈၼၼ်ႉၶဝ်ႈၵႂႃႇၵႃႈတႂ်ႈၵိင်ႇၶႃႊမႆႉၼိမ်ဢၼ်ၼႃတၼ်ၼႃႇၼၼ်ႉလႄႈၵွၵ်းႁူဝ်မၼ်းၶၢင်ႉၶမ်ယူႇၵႃႈတီႈၶႃႊမႆႉၼိမ်ၼၼ်ႉဢေႃႈ။ၵွၵ်းႁူဝ်မၼ်းႁွႆႈၶႅၼ်ယူႇလႄႈမႃႉလီႈၵေႃႈၵႂႃႇယူႇတိၵ်းတိၵ်းဢေႃႈ။
၁၀ ၵူၼ်းၵေႃႉၼိုင်ႈႁၼ်လႄႈမွၵ်ႇလၢတ်ႈတီႈယႂႃႇၽလႄႈဝႃႈ၊-ၵဝ်ၶႃႈလႆႈႁၼ်ဢပသလုမ်ႇႁွႆႈၶႅၼ်ယူႇၵႃႈတီႈတူၼ်ႈမႆႉၼိမ်ၼၼ်ႉမႃးၶႃႈဢေႃႈ၊ဝႃႈၼင်ႇၼႆလႄႈ
၁၁ ယႂႃႇၽလၢတ်ႈတီႈၵေႃႉဢၼ်မွၵ်ႇလၢတ်ႈတီႈမၼ်းၼၼ်ႉလႄႈဝႃႈ၊-ပေႃးမႂ်းႁၼ်မႃးယဝ်ႉတႄႉၸိုင်ႁဵတ်းသင်လႄႈမႂ်းဢမ်ႇတႅင်းမၼ်းတူၵ်းၵႃႈၼိူဝ်လိၼ်တၢႆ။သင်မႂ်းႁဵတ်းၸိူဝ်ႉၼင်ႇၼၼ်ၸိုင်ၵဝ်တၵ်းလႆႈပၼ်ငိုၼ်းသိပ်းၵျၢပ်ႈဢိၵ်ႇတင်းသၢႆႁတ်ႉဢႅဝ်တီႈမႂ်းယဝ်ႉဢိူဝ်ႈ၊မိူဝ်ႈဢၼ်ဝႃႈၼင်ႇၼႆၸိုင်၊
၁၁ ၵေႃႉၼၼ်ႉလၢတ်ႈတီႈယႂႃႇၽလႄႈဝႃႈ၊-ပိၵ်ႉသမ်ႉၵဝ်ၶႃႈတၵ်းလႆႈငိုၼ်းႁဵင်ၵျၢပ်ႈၵႃႈၼႂ်းမိုဝ်းၵဝ်ၶႃႈသေၵေႃႈၵဝ်ၶႃႈတၵ်းဢမ်ႇယဵတ်ႇမိုဝ်းၵဝ်ၶႃႈသေလႄႈႁဵတ်းတီႈလုၵ်ႈၸၢႆးၶုၼ်ႁေႃၶမ်းၼၼ်ႉၶႃႈ။လွင်ႈမၼ်းၸမ်းၵႃႈၼင်ႇဢၼ်ႁဝ်းၶႃႈလႆႈငိၼ်းၼၼ်ႉၶုၼ်ႁေႃၶမ်းသင်ႇလၢတ်ႈဝႆႉတီႈၸဝ်ႈႁဝ်းဢိၵ်ႇတင်းဢၽိသေႇတင်းဢိတ်ႉတေႇၼၼ်ႉဝႃႈ၊-ထွၵ်ႈလူၺ်ႈၼႃႈၵဝ်သေလႄႈယႃႇပတေိူဝ်ႉထုၵ်ႇဢပသလုမ်ႇၵူၼ်းဢွၼ်ၼၼ်ႉ၊ဝႃႈၼင်ႇၼႆဝႆႉၶႃႈယဝ်ႉ။
၁၃ ပေႃးၵဝ်ၶႃႈပႅတ်ႉလႅၼ်လႄႈၵွပ်ႈပိူဝ်ႈဢၼ်လွင်ႈတၢင်းဢၼ်တၵ်းသိူင်ႇဝႆႉမႅပ်းဝႆႉဢမ်ႇႁႂ်ႈၶုၼ်ႁေႃၶမ်းႁူႉၼၼ်ႉဢမ်ႇမီးသေၸိူဝ်ႉလႄႈႁဵတ်းႁႂ်ႈဢသၢၵ်ႈၵဝ်ၶႃႈလႆႈၵူဝ်ႁႄယူႇၸိုင်ၸဝ်ႈႁဝ်းၵေႃႈတၵ်းယူႇၽၢႆႇၼိုင်ႈတင်းၵဝ်ၶႃႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ယႂႃႇၽလၢတ်ႈလႄႈဝႃႈ၊-
၁၄ ၵဝ်ဢမ်ႇၸၢင်ႊပႂ်ႉတေႃႇမႂ်းႁဵတ်း၊ဝႃႈၼင်ႇၼႆသေယဝ်ႉ၊မၼ်းယိပ်းၵမ်ဢဝ်ႁွၵ်ႇဢၼ်ပွတ်းသၢမ်မၢၵ်ႈသေလႄႈဢဝ်တႅင်းသႂ်ႇႁူဝ်ၸႂ်ဢပသလုမ်ႇယၢမ်းမိူဝ်ႈဢၼ်မၼ်းယင်းဢသၢၵ်ႈလိပ်းယူႇၵႃႈၼႂ်းၵႄႈတူၼ်ႈမႆႉၼိမ်ၼၼ်ႉဢေႃႈ။
၁၅ ၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈယႂႃႇၽသိပ်းၵေႃႉၸိူဝ်းၼၼ်ႉၵေႃႈဢွၼ်ၵၼ်ဝႅင်းႁွပ်ႈသေလႄႈႁဵတ်းတီႈဢပသလုမ်ႇတေႃႇမၼ်းပေႃးတၢႆဢေႃႈ။
၁၆ ယႂႃႇၽၵေႃႈပဝ်ႇတိုင်ႈၼႄးၶရႃႇလႄႈၵူၼ်းတင်းလၢႆဢွၼ်ၵၼ်လုၵ်ႉသေၵႃႈတီႈဢၼ်လိုပ်ႈၸွမ်းလမ်းၸွမ်းၵူၼ်းမဵဝ်းဢိသရေႇလၸိူဝ်းၼၼ်ႉၶိုၼ်းမႃးဢေႃႈ။လွင်ႈမၼ်းၸမ်းယႂႃႇၽႁႂ်ႈၶဝ်ၵိုတ်းဢေႃႈ။
၁၇ ၶဝ်ဢွၼ်ၵၼ်ဢဝ်တူဝ်တၢႆဢပသလုမ်ႇၼၼ်ႉၶျႃးတူၵ်းၵႃႈၼႂ်းၶုမ်လိၼ်ႁူးလိၼ်ဢၼ်လိုၵ်ႉၵႃႈၼႂ်းပႃႇမႆႉပႃႇတွၵ်ႇၼၼ်ႉႉသေယဝ်ႉဢဝ်မၢၵ်ႇႁိၼ်ၵွင်သႂ်ႇဝႆႉၵႃႈၼိူဝ်မၼ်းပဵၼ်ၵွင်လူင်ဝႆႉဢေႃႈ။ၵူၼ်းမဵဝ်းဢိသရေႇလတင်းသဵင်ႈတင်းလူင်ၵေႃႈဢွၼ်ၵၼ်ပၢႆၵႂႃႇၸူးႁိူၼ်းတီႈယူႇၶဝ်ႁင်းၽႂ်ႁင်းမၼ်းဢေႃႈ။
၁၈ ယၢမ်းမိူဝ်ႈဢၼ်ဢပသလုမ်ႇယင်းတိုၵ်ႉဢသၢၵ်ႈလိပ်းယူႇၼၼ်ႉမၼ်းပၵ်းသဝ်လၵ်းပုၼ်ႈမၼ်းၵႃႈၼႂ်းၶူင်ႈႁူၺ်ႈၶုၼ်ႁေႃၶမ်းလႄႈဝႃႈ၊-ၵဝ်ၼႆႉဢမ်ႇမီးလုၵ်ႈၸၢႆးပုၼ်ႈဢၼ်တၵ်းသိုပ်ႇဢဝ်ၸိုဝ်သဵင်ၼႃႇမႃႉၵဝ်၊ဝႃႈၼင်ႇၼႆဢေႃႈ။မၼ်းႁွင်ႉႁိၵ်ႈသဝ်ႈၼၼ်ႉၸွမ်းလူၺ်ႈၼႃႇမႃႉၸိုဝ်ႈသဵင်မၼ်းလႄႈသဝ်ၼၼ်ႉလႆႈၶၢမ်ႇတၢင်းဢၼ်ႁွင်ႉႁိၵ်ႈၸိုဝ်ႈသဝ်ဢပသလုမ်ႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
တႃႇဝိတ်ႉႁႆႈႁွင်ႉပွင်ႉၶင်း
၁၉ မိူဝ်ႈၼၼ်ႉဢႁိမတ်ႉ၊လုၵ်ႈၸၢႆးၸႃႇတုၵ်ႉၼၼ်ႉယွၼ်းဢၶႂၢင်ႉလႄႈဝႃႈ၊-ႁႂ်ႈၵဝ်ၶႃႈလႆႈၶုၼ်ႇလႅၼ်ႈၵႂႃႇလႄႈလဝ်ႈလၢတ်ႈတီႈၶုၼ်ႁေႃၶမ်းလွင်ႈဢၼ်ထႃႇဝရႃႉၽြႃးၸီႇယၢင်ႇတီႈရၢၼ်ႇသူႇတင်းလၢႆၸွမ်းလူၺ်ႈဢပျႅတ်ႈၶဝ်ၼၼ်ႉသေၵမ်းၶႃႈ၊ဝႃႈၼင်ႇၼႆသေယဝ်ႉ၊ယႂႃႇၽလၢတ်ႈတီႈမၼ်းလႄႈဝႃႈ၊-
၂၀ ဝၼ်းမိူဝ်ႈၼႆႉမႂ်းဢမ်ႇလႆႈလဝ်ႈလႆႈလၢတ်ႈသတၢင်းသဵင်ၶၢဝ်ႇၼၼ်ႉ။တၵ်းလႆႈလဝ်ႈလႆႈလၢတ်ႈတၢင်ႇမိူဝ်ႉတၢင်ႇဝၼ်းဢေႃႈ။ဝၼ်းမိူဝ်ႈၼႆႉၸမ်းၵွပ်ႈပိူဝ်ႈဢၼ်လုၵ်ႈၸၢႆးၶုၼ်ႁေႃၶမ်းတၢႆယဝ်ႉၼၼ်ႉလႄႈမၼ်းတေဢမ်ႇလႆႈလၢတ်ႈ၊ဝႃႈၼင်ႇၼႆသေယဝ်ႉ၊ယႂႃႇၽလၢတ်ႈတီႈၵူႉသိလႄႈဝႃႈ၊-
၂၁ မႂ်းၵႂႃႇလႄႈလဝ်ႈလၢတ်ႈတီႈၶုၼ်ႁေႃၶမ်းၸွမ်းၵႃႈၼင်ႇဢၼ်မႂ်းလႆႈႁၼ်ၼၼ်ႉတႃႉ၊ဝႃႈၼင်ႇၼႆလႄႈၵုသိၵူမ်ႈႁူဝ်တီႈယႂႃႇၽသေယဝ်ႉၶုၼ်ႇလႅၼ်ႈၵႂႃႇဢေႃႈ။
၂၂ လၢႆးသမ်ႉဢႁိမတ်ႉ၊လုၵ်ႈၸၢႆးၸႃႇတုၵ်ႉ၊သမ်ႉယွၼ်းဢၶႂၢင်ႉတီႈယႂႃႇၽထႅင်ႈလႄႈဝႃႈ၊-ႁႂ်ႈၵဝ်ၶႃႈလႆႈၶုၼ်ႇလႅၼ်ႈၸွမ်းလင်ၵုသိသေၵမ်းၶႃႈ၊ဝႃႈၼင်ႇၼႆလႄႈယႂႃႇၽထၢမ်လႄႈဝႃႈ၊-လုၵ်ႈၸၢႆးၵဝ်ဢိူၺ်း။ႁဵတ်းသင်လႄႈမႂ်းၶႂ်ႈၵႂႃႇ။
၂၃ ၸွင်ႇမႂ်းမီးသတၢင်းဢၼ်တၵ်းလႆႈသူးၼၼ်ႉႁိုဝ်၊ဝႃႈၼင်ႇၼႆသေၵေႃႈ၊မၼ်းသမ်ႉယွၼ်းဢၶႂၢင်ႉထႅင်ႈလႄႈဝႃႈ၊-ႁႂ်ႈလႆႈၶုၼ်ႇလႅၼ်ႈၵႂႃႇသေၵမ်းၶႃႈ၊ဝႃႈၼင်ႇၼႆဢေႃႈ။မိူဝ်ႈၼၼ်ႉဢႁိမတ်ႉၼၼ်ႉၶုၼ်ႇလႅၼ်ႈၸွမ်းသဵၼ်ႈတၢင်းပၢင်ႇပဵင်းလႄႈပူၼ်ႉၵုသိၵႂႃႇသေဢေႃႈ။
၂၄ တႃႇဝိတ်ႉၼင်ႈယူႇၵႃႈတီႈၵႄႈဝူင်ႈၵၢင်ႈလမ်းဝဵင်းသွင်ထၢပ်ႈၼၼ်ႉဢေႃႈ။ၵူၼ်းပႂ်ႉၵၢင်ၵေႃႉၼိုင်ႈၶိုၼ်ႈၵႃႈၼိူဝ်မုင်းၽၵ်းတူလမ်းဝဵင်းသေယဝ်ႉမုင်ႈတူၺ်းလႄႈႁၼ်ၵူၼ်းၵေႃႉလဵဝ်ၵူၺ်းၶုၼ်ႇလႅၼ်ႈမႃးယူႇဢေႃႈ။
၂၅ ၵူၼ်းပႂ်ႉၵၢင်ၼၼ်ႉသႅၼ်ႇႁွင်ႉလဝ်ႈလၢတ်ႈတီႈၶုၼ်ႁေႃၶမ်းလႄႈၶုၼ်ႁေႃၶမ်းၵေႃႈလၢတ်ႈဝႃႈ၊-ပေႃးပဵၼ်ၵေႃႉလဵဝ်ၵူၺ်းၸိုင်မၼ်းတၵ်းပႃးသတၢင်းသဵင်ၶၢဝ်ႇဢၼ်လီၸူမ်းၼၼ်ႉဢေႃႈ၊ဝႃႈၼင်ႇၼႆဢေႃႈ။ၵေႃႉၼၼ်ႉၵေႃႈၶုၼ်ႇလႅၼ်ႈၸမ်မႃးတိၵ်းတိၵ်းဢေႃႈ။
၂၆ ၵူၼ်းပႂ်ႉၵၢင်ၼၼ်ႉသမ်ႉႁၼ်တၢင်ႇၵေႃႉၶုၼ်ႇလႅၼ်ႈမႃးလႄႈၵူၼ်းလၢတ်ႈလႄႈဝႃႈ၊-တူၺ်းတီႈၶႃႈလူး။ၵူၼ်းတၢင်ႇၵေႃႉၶုၼ်ႇလႅၼ်ႈမႃးထႅင်ႈႁင်းၵူၺ်းမၼ်းတီႈၶႃႈဢေႃႈ၊ဝႃႈၼင်ႇၼႆလႄႈၶုၼ်ႁေႃၶမ်းၵေႃႈဝႃႈ၊-ၵေႃႉၼၼ်ႉၵေႃႈတၵ်းပႃးသတၢင်းသဵင်ၶၢဝ်ႇဢၼ်လီဢေႃႈ၊ဝႃႈၼင်ႇၼႆဢေႃႈ။
၂၇ ၵူၼ်းပႂ်ႉၵၢင်ၼၼ်ႉသမ်ႉလဝ်ႈလၢတ်ႈလႄႈဝႃႈ၊-ၶႃႈၸဝ်ႈထၢင်ႇၵေႃႉဢၼ်ၶုၼ်ႇလႅၼ်ႈမႃးဢွၼ်တၢင်းၼၼ်ႉမိူၼ်ဢႁိမတ်ႉ၊လုၵ်ႈၸၢႆးၸႃႇတုၵ်ႉ၊ၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းၵေႃႈလၢတ်ႈဝႃႈ၊-မၼ်းၼၼ်ႉပဵၼ်ၵူၼ်းလီလႄႈတၵ်းပႃးသတၢင်းဢၼ်လီဢေႃႈ၊ဝႃႈၼင်ႇၼႆဢေႃႈ။
၂၈ မိူဝ်ႈၼၼ်ႉဢႁိမတ်ႉႁွင်ႉသႅၼ်ႇလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၵႃႈမီးတင်းသဵင်ႈလႆႈၵတ်းယဵၼ်ၶျၢမ်းသႃႇတီႈၶႃႈယဝ်ႉ၊ဝႃႈၼင်ႇၼႆသေလႄႈၶုပ်ႉမူပ်ႇၵႃႈၼိူဝ်လိၼ်ၵႃႈတီႈၽၢႆႇၼႃႈၶုၼ်ႁေႃၶမ်းလႄႈလဝ်ႈလၢတ်ႈလႄႈဝႃႈ၊-ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈႁဝ်းၼၼ်ႉမီးမၢင်ႇၵလႃႇသေၵမ်းလူၺ်ႈ။မၼ်းၸဝ်ႈဢဝ်ၶဝ်ၸိူဝ်းဢၼ်ယုၵ်ႉၶႅၼ်ယုၵ်ႉမိုဝ်းယူႇၽၢႆႇၼိုင်ႈၵၼ်တင်းၸဝ်ႈၶုၼ်လူင်ၼၼ်ႉဢၢပ်ႈပၼ်တီႈၶႃႈယဝ်ႉ၊ဝႃႈၼင်ႇၼႆဢေႃႈ။
၂၉ ၶုၼ်ႁေႃၶမ်းၵေႃႈထၢမ်ႇလႄႈဝႃႈ၊-ဢပသလုမ်ႇလုၵ်ႈၸၢႆးဢွၼ်ႇၼၼ်ႉၵတ်းယဵၼ်ၶျၢမ်းသႃႇႁိုဝ်၊ဝႃႈၼင်ႇၼႆလႄႈဢႁိမတ်ႉလဝ်ႈလၢတ်ႈလႄႈဝႃႈ၊-မိူဝ်ႈဢၼ်ယႂႃႇၽတၵ်းပွႆႇၸႂ်ႉၶႃႈၸဝ်ႈႁဝ်းၶဝ်မႃးၼၼ်ႉၶႃႈၸဝ်ႈႁၼ်တၢင်းဢၼ်ဢူၼ်ဢဵၼ်မေႃးမႄးယႂ်ႇၼႃႇလႄႈၶႃႈၸဝ်ႈဢမ်ႇႁူႉသေႇၶျႃႇလီငၢမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းၵေႃႈဝႃႈ၊-ၶၢႆႉယူႇၵႃႈတီႈႁိမ်းၼႆႉတႃႉ၊ဝႃႈၼင်ႇၼႆလႄႈမၼ်းၵေႃႈၶၢႆႉလႄႈယူႇဢေႃႈ။
၃၀ လၢႆးသမ်ႉၵုသိႁွတ်ႈမႃးလႄႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၶႃႈၸဝ်ႈၶုၼ်လူင်တီႈၶႃႈ။ပႃးသတၢင်းသဵင်ၶၢဝ်ႇမႃးတီႈၶႃႈဢေႃႈ။
၃၁ ၽြႃးပဵၼ်ၸဝ်ႈၸီႇယၢင်ႇတီႈၶဝ်ၸိူဝ်းဢၼ်လုၵ်ႉယူႇၽၢႆႇၼိုင်ႈတင်းၸဝ်ႈႁဝ်းၼၼ်ႉၸွမ်းလူၺ်ႈဢပျႅတ်ႈၶဝ်ၼၼ်ႉဝၼ်းမိူဝ်ႈၼႆႉတီႈၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ႁေႃၶမ်းၵေႃႈထၢမ်တီႈၵုသိလႄႈဝႃႈ၊-
၃၂ ဢပသလုမ်ႇလုၵ်ႈၸၢႆးဢွၼ်ႇၼၼ်ႉလႆႈၵတ်းယဵၼ်ၶျၢမ်းသႃႇႁိုဝ်၊ဝႃႈၼင်ႇၼႆလႄႈၵုသိၵေႃႈၶိုၼ်းလဝ်ႈလၢတ်ႈလႄႈဝႃႈ၊-ႁႂ်ႈရၢၼ်ႇသူႇၸဝ်ႈၶုၼ်လူင်ႁဝ်းတင်းလၢႆတင်းၶဝ်ၸိူဝ်းဢၼ်လုၵ်ႉယူႇၽၢႆႇၼိုင်ႈတင်းၸဝ်ႈႁဝ်းလႄႈႁႂ်ႈလႆႈၼိၵ်ႈၸၢၵ်ႈငႅၼ်းသေးၸဝ်ႈႁဝ်းတင်းသဵင်ႈတင်းလူင်ၼၼ်ႉပဵၼ်ၸိူဝ်ႉၼင်ႇၵေႃႉဢွၼ်ၼၼ်ႉသေၵမ်းလူၺ်ႈတီႈၶႃႈ၊ဝႃႈၼင်ႇၼႆဢေႃႈ။
၃၃ ၶုၼ်ႁေႃၶမ်းမီးၸႂ်ဢၼ်သုၵ်ႉဢၼ်ယုင်ႈၼႃႇလူင်လၢင်သေလႄႈၶိုၼ်ႈၵႂႃႇၸူးၵႃႈတီႈသုမ်ႉထႅင်ဢၼ်မီးၵႃႈၼိူဝ်ၽၵ်းတူလမ်းဝဵင်းလႄႈႁႆႈႁွင်ႉဢေႃႈ။ၼႂ်းမိူဝ်ႈဢၼ်မၼ်းယင်းတိုၵ်ႉၶိုၼ်ႈၵႂႃႇယူႇၼၼ်ႉၸိုင်၊မၼ်းဝႃႈ၊-လုၵ်ႈၸၢႆးၵဝ်ဢပသလုမ်ႇဢိူၺ်း။လုၵ်ႈၸၢႆးၵဝ်ဢိူၺ်း။လုၵ်ႈၸၢႆးၵဝ်ဢပသလုမ်ႇဢိူၺ်း။ပေႃးၵဝ်လႆႈတၢႆတၢင်တူဝ်မႂ်းယိင်ၶႅၼ်းတၵ်းလီယဝ်ႉ။ဢပသလုမ်ႇ၊လုၵ်ႈၸၢႆးၵဝ်ဢိူၺ်း။ဝႃႈၼင်ႇၼႆဢေႃႈ။