Chapter
၁၆
တႃႇဝိတ်ႉလႄႈၸိၽ
၁ မိူဝ်ႈဢၼ်တႃႇဝိတ်ႉပူၼ်ႉၸိၵ်းလွႆၵႂႃႇဢိတ်းၼိုင်ႈၼၼ်ႉၸိုင်ၸိၽ၊ဢၼ်ပဵၼ်ၽူႈပႂ်ႉၶွင်ၶူဝ်းမေႇၽိပေႃႇသိတ်ႉ၊ၼၼ်ႉဢဝ်ၶဝ်ႈမုၼ်းသွင်ပၢၵ်ႇႁူၺ်ႇ၊ပူၵ်ႉမၢၵ်ႇၸပိတ်ႉဢၼ်ႁႅင်ႈပၢၵ်ႇၼိုင်ႈ၊ၶႅပ်းမၢၵ်ႇလိူဝ်ႇသၢင်းၽေႃးပၢၵ်ႇၼိုင်ႈ၊တဝ်ႈၼမ်ႉၸပိတ်ႉႁူၺ်ႇၼိုင်ႈ၊တၢင်ႇၵႃႈၼိူဝ်မႃႉလီႈသွင်တူဝ်လႄႈမႃးႁႂ်ႈလႆႈႁပ်ႉႁူဝ်တၢင်းမၼ်းဢေႃႈ။
၂ ၶုၼ်ႁေႃၶမ်းၵေႃႈထၢမ်တီႈၸိၽလႄႈဝႃႈ၊-မႂ်းဢဝ်ၸိူဝ်းၼႆႉမႃးႁဵတ်းသင်၊ဝႃႈၼင်ႇၼႆၸိုင်၊ၸိၽလဝ်ႈလၢတ်ႈလႄႈဝႃႈ၊-မႃႉလီႈၸိူဝ်းၼႆႉပဵၼ်ပုၼ်ႈၵူၼ်းႁၢင်ႈၵူၼ်းႁေႃၸဝ်ႈတၵ်းၶီႇ၊ၶဝ်ႈမုၼ်းဢိၵ်ႇတင်းမၢၵ်ႇမႆႉၸိူဝ်းၼႆႉပဵၼ်ပုၼ်ႈဢၼ်ၵူၼ်းဢွၼ်ႇတင်းလၢႆတၵ်းၵိၼ်၊ၼမ်ႉၸပိတ်ႉၵေႃႈပဵၼ်ပုၼ်ႈဢၼ်ၶဝ်ၸိူဝ်းဢၼ်ႁိူဝ်ႉဢူၼ်ႈၵႃႈတီႈထိူၼ်ႇၼၼ်ႉတၵ်းၵိၼ်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၃ ၶုၼ်ႁေႃၶမ်းၵေႃႈထၢမ်လႄႈဝႃႈ၊-လုၵ်ႈၸၢႆးၸဝ်ႈမႂ်းမီးၵႃႈတီႈလႂ်၊ဝႃႈၼင်ႇၼႆလႄႈၸိၽလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-မၼ်းၵိုတ်းသဝ်းယူႇၵႃႈၼႂ်းဝဵင်းယေႇရုသလႅမ်ႇၶႃႈဢေႃႈ။လွင်ႈမၼ်းၸမ်းမၼ်းထၢင်ႇဝႃႈဝၼ်းမိူဝ်ႈၼႆႉမဵဝ်းဢိသရေႇလတၵ်းၶိုၼ်းပၼ်သိုင်ႇၸိုင်ႈဝၢၼ်ႈမိူင်းပူႇပေႃႈမၼ်းၵႃႈတီႈမၼ်းယဝ်ႉ၊ဝႃႈၼင်ႇၼႆၶႃႈဢေႃႈ။
၄ ၶုၼ်ႁေႃၶမ်းၵေႃႈမီးဢမိင်ႉတီႈၸိၽလႄႈဝႃႈ၊-ႁႂ်ႈဢုၵ်ႉၸႃႇၵႃႈဢၼ်ၸၢပ်ႈသႅင်ႇၵၼ်တင်းမေႇၽိပေႃႇသိတ်ႉၼၼ်ႉပဵၼ်ဢုၵ်ႉၸႃႇမႂ်းသေ၊ဝႃႈၼင်ႇၼႆဢေႃႈ။ၸိၽၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၶႃႈၸဝ်ႈၵူမ်ႈၵႂမ်းႁူဝ်တီႈၶႃႈဢေႃႈ။ၸဝ်ႈၶုၼ်လူင်တီႈၶႃႈ၊ႁႂ်ႈၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းသေၵမ်းလူၺ်ႈတီႈၶႃႈ၊ဝႃႈၼင်ႇၼႆဢေႃႈ။
သိမိၵိၼ်ႇဝႃႈတႃႇဝိတ်ႉ
၅ မိူဝ်ႈဢၼ်ၶုၼ်လူင်တႃႇဝိတ်ႉႁွတ်ႈထိုင်ၵႃႈတီႈဝဵင်းပႃႇႁုရိမ်ႇၼၼ်ႉၸိုင်ၵေႃႉဢၼ်လႆႈၸိုဝ်သိမိ၊လုၵ်ႈၸၢႆးၵေႇ၇ ၊ဢၼ်ပဵၼ်ပီႈၼွင်ႉၸိူဝ်ႉၶိူဝ်းသေႃးလုၼၼ်ႉဢွၵ်ႇမႃးဢေႃႈ။မၼ်းဢွၵ်ႇမႃးလႄႈၵိၼ်ႇလႃႇၸွမ်းတၢင်းၵႂႃႇယူႇဢေႃႈ။
၆ မၼ်းဢဝ်မၢၵ်ႇႁိၼ်ထႅမ်ႈၶုၼ်လူင်တႃႇဝိတ်ႉဢိၵ်ႇတင်းၶႃႈၵူၼ်းၶုၼ်လူင်တႃႇဝိတ်ႉၸိူဝ်းၼၼ်ႉဢေႃႈ။ၵူၼ်းတင်းသဵင်ႈတင်းလူင်တင်းမူးမၢတ်ႈၽွင်းမိူင်းတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်မီးယူႇၽၢႆႇၶႂႃၸဝ်ႈ၊ၽၢႆႇသၢႆႉၸဝ်ႈဢေႃႈ။
၇ သိမိၼၼ်ႉၵိၼ်ႇလႃႇလႄႈဝႃႈ၊-ၵႂႃႇႁေႈ။ၵႂႃႇႁေႈ။ၵူၼ်းဢႃႉထမ်ႇမႃႉဢၼ်ၸၢင်ႊထွၵ်ႇလိူတ်ႈၵူၼ်းၼႆႉဢိူၺ်း။
၈ ထႃႇဝရႃႉၽြႃးၶိုၼ်းတွပ်ႇတႅၼ်းပၼ်တီႈမႂ်းပုၼ်ႈလိူတ်ႈပီႈၼွင်ႉၸိူဝ်ႉၶိူဝ်းသေႃးလုဢၼ်မႂ်းဢဝ်တူၵ်းလိၼ်လႄႈႁဵတ်းၶုၼ်ဢုပ်ႉပိူင်ႇၸၢမ်ႇၸႃးမိူင်းမၼ်းၼၼ်ႉယဝ်ႉ။ထႃႇဝရႃႉၽြႃးဢဝ်သိုင်ႇၸိုင်ႈဝၢၼ်ႈမိူင်းမႂ်းဢၢပ်ႈပၼ်ၵႃႈၼႂ်းမိုဝ်းလုၵ်ႈၸၢႆးမႂ်းဢပသလုမ်ႇယဝ်ႉ။တူၺ်းလူး၊ၵွပ်ႈပိူဝ်ႈဢၼ်မႂ်းပဵၼ်ၵေႃႉဢၼ်ၸၢင်ႈထွၵ်ႇလိူတ်ႈၵူၼ်းလႄႈမႂ်းတူၵ်းႁွတ်ႈၵႃႈၼႂ်းတၢင်းလူႉတၢင်းလႅဝ်ယဝ်ႉ၊ဝႃႈၼင်ႇၼႆဢေႃႈ။
၉ ဢၽိသေႇ၊လုၵ်ႈၸၢႆးၸေႇရုယႃႇၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈတူဝ်တၢႆမႃၼၼ်ႉတၵ်းလႆႈၵိၼ်ႇလႃႇၸဝ်ႈၶုၼ်လူင်တီႈၶႃႈ။ႁႂ်ႈၶႃႈၸဝ်ႈလႆႈၵႂႃႇလႄႈတႅပ်းဢဝ်ႁူဝ်မၼ်းသေၵမ်းတီႈၶႃႈ၊ဝႃႈၼင်ႇၼႆလႄႈၶုၼ်ႁေႃၶမ်းမီးဢမိင်ႉလႄႈဝႃႈ၊-
၁၀ လုၵ်ႈၸၢႆးၸေႇရုယႃႇၶဝ်ဢိူၺ်း။သူတင်းၵဝ်မီးတၢင်းၵျၢမ်ႇတၢင်းပွင်ႈဢၼ်မိူၼ်ၵၼ်ၸိူဝ်ႉၼင်ႇႁိုဝ်။ႁႂ်ႈမၼ်းၵိၼ်ႇလႃႇလႄႈ။ပေႃးထႃႇဝရႃႉၽြႃးသင်ႇလၢတ်ႈတီႈမၼ်းဝႃႈ၊-ၵိၼ်ႇလႃႇတႃႇဝိတ်ႉတႃႉ၊ဝႃႈၼင်ႇၼႆၸိုင်ၽူႈလႂ်တၵ်းဝႃႈလႆႈ၊-ၵွပ်ႈပိူဝ်ႈၸိူဝ်ႉၼင်ႇလႄႈမႂ်းႁဵတ်းၸိူဝ်ႉၼင်ႇၼႆ၊ဝႃႈၼင်ႇၼႆဢေႃႈ။
၁၁ တႃႇဝိတ်ႉသမ်ႉမီးဢမိင်ႉတီႈဢၽိသေႇဢိၵ်ႇတင်းၶႃႈၵူၼ်းမၼ်းၵႃႈမီးၼၼ်ႉလႄႈဝႃႈ၊-တူၺ်းလူး။လုၵ်ႈၸၢႆးဢွၵ်ႇၵဝ်ဢၼ်ဢွၵ်ႇမႃးၵႃႈၼႂ်းတူဝ်ၵဝ်ၼၼ်ႉယင်းႁႃဢဝ်ဢသၢၵ်ႈၵဝ်တၢႆယူႇဢိူဝ်ႈ။ၵူၼ်းမဵဝ်းပိၼ်ႇယႃႇမိၼ်ႇၼၼ်ႉယိင်ႈၶႅၼ်းတၵ်းႁဵတ်းလိူဝ်တွၼ်းၼႃႇသေၼၼ်ႉဢေႃႈ။ယႃႇမၼ်းတႃႉ။ႁႂ်ႈမၼ်းၵိၼ်ႇလႃႇတႃႉ။ထႃႇဝရႃႉၽြႃးႁႂ်ႈမၼ်းၵိၼ်ႇလႃႇယဝ်ႉ။
၁၁ ၵွပ်ႈပိူဝ်ႈၵဝ်လႆႈၶၢမ်ႇတၢင်းဢၼ်ၵိၼ်ႇလႃႇမိူဝ်ႈၼႆႉၼၼ်ႉထႃႇဝရႃႉၽြႃးၸၢင်ႊၶေးတူၺ်းႁၼ်တုၵ်ႉၶႃႉတၢင်းၽၢၼ်ၵဝ်ၼၼ်ႉလႄႈၶိုၼ်းပၼ်ဢၵျူဝ်းဢၼ်လီတီႈၵဝ်ဢေႃႈ၊ဝႃႈၼင်ႇၼႆဢေႃႈ။
၁၃ ၼင်ႇၼၼ်လႄႈၼႂ်းမိူဝ်ႈဢၼ်တႃႇဝိတ်ႉဢိၵ်ႇတင်းၵူၼ်းမၼ်းၵႃႈမီးၸိူဝ်းၼၼ်ႉယင်းတိုၵ်ႉၸွမ်းတၢင်းၵႂႃႇယူႇၼၼ်ႉၸိုင်၊သိမိတႆႇၸွမ်းၵႃႈတီႈပဵမ်ႉလွႆၽၢႆႇၼိုင်ႈတင်းတႃႇဝိတ်ႉလႄႈၵိၼ်ႇလႃႇၸွမ်းတၢင်းယူႇ၊ဢဝ်မၢၵ်ႇႁိၼ်ထႅမ်ႈယူႇသေလႄႈဢဝ်မုၼ်ႈလိၼ်ပိုၼ်ၸူးယူႇဢေႃႈ။
၁၄ ၶုၼ်ႁေႃၶမ်းဢိၵ်ႇတင်းၶဝ်ၸိူဝ်းဢၼ်ၸွမ်းၸဝ်ႈၵႃႈမီးၼၼ်ႉႁိူဝ်ႉဢူၼ်ႈလႄႈႁွတ်ႈထိုင်ၵႃႈတီႈဝဵင်းဢယေႇၽိမ်ႇလႄႈဢွၼ်ၵၼ်လိုဝ်ႈႁိူဝ်ႉလိုဝ်ႈၼူၼ်းယူႇဢေႃႈ။
ႁုသေႇတင်းဢႁိသေႃႇၽေႇလပၼ်ဢၵျၢမ်ႇ
၁၅ ဢပသလုမ်ႇဢိၵ်ႇတင်းၵူၼ်းမဵဝ်းဢိသရေႇလၸိူဝ်းၼၼ်ႉႁွတ်ႈထိုင်ၵႃႈတီႈဝဵင်းယေႇရုသလႅမ်ႇလႄႈဢႁိသေႃႇၽေႇလၵေႃႈပႃးဢေႃႈ။
၁၆ ႁုသေႇၵူၼ်းဢႃႇၶိဢၼ်ပဵၼ်ၵေႃႉသေႈတႃႇဝိတ်ႉၼၼ်ႉၵေႃႈႁွတ်ႈထိုင်ၵႃႈတီႈဢပသလုမ်ႇသေယဝ်ႉ၊ႁုသေႇၼၼ်ႉပၼ်တၢင်းလီတီႈဢပသလုမ်ႇလႄႈဝႃႈ၊-ႁႂ်ႈၶုၼ်ႁေႃၶမ်းဢသၢၵ်ႈယိုၼ်းယၢဝ်းသေၵမ်းလူၺ်ႈ။ႁႂ်ႈၶုၼ်ႁေႃၶမ်းဢသၢၵ်ႈယိုၼ်းယၢဝ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၇ ဢပသလုမ်ႇၵေႃႈထၢမ်တီႈႁုသေႇလႄႈဝႃႈ၊-ဢၼ်ၼႆႉပဵၼ်တၢင်းဢၼ်မႂ်းၼႄတၢင်းႁၵ်ႉမႅတ်ႈတႃႇတီႈၵေႃႉသေႈမႂ်းႁိုဝ်။ၵွပ်ႈသင်လႄႈမႂ်းဢမ်ႇၸွမ်းလူၺ်ႈၵေႃႉသေႈမႂ်းၵႂႃႇ၊ဝႃႈၼင်ႇၼႆလႄႈႁုသေႇၵေႃႈလဝ်ႈလၢတ်ႈတီႈဢပသလုမ်ႇလႄႈဝႃႈ၊-
၁၈ ယႃႇပမေီးဢမိင်ႉၸိူဝ်ႉၼင်ႇၼၼ်ၶႃႈ။ၶႃႈၸဝ်ႈတၵ်းၶၢမ်ႇႁဵတ်းၶႃႈတီႈၵေႃႉဢၼ်ထႃႇဝရႃႉၽြႃးတင်းၵူၼ်းတင်းလၢႆတင်းၵူၼ်းမဵဝ်းဢိသရေႇလတင်းသဵင်ႈတင်းလူင်လိူၵ်ႈၵဵပ်းဢဝ်ၼၼ်ႉၶႃႈဢေႃႈ။တၵ်းယူႇတီႈၵေႃႉၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၁၉ မၼ်းသမ်ႉၶိုၼ်းလဝ်ႈလၢတ်ႈထႅင်ႈလႄႈဝႃႈ၊-ၶႃႈၸဝ်ႈတၵ်းလႆႈၶၢမ်ႇႁဵတ်းၶႃႈတီႈၽူႈလႂ်ၶႃႈ။ၶၢမ်ႇႁဵတ်းၶႃႈတီႈလုၵ်ႈၸၢႆးၸဝ်ႈဢမ်ႇၸႂ်ႈၶႃႈႁိုဝ်။မိူၼ်ၸိူဝ်ႉၼင်ႇၶႃႈၸဝ်ႈလႆႈၶၢမ်ႇႁဵတ်းၶႃႈတီႈၸဝ်ႈပေႃႈၸဝ်ႈႁဝ်းၼၼ်ႉတီႈၸဝ်ႈႁဝ်းၵေႃႈၶႃႈၸဝ်ႈတၵ်းၶၢမ်ႇႁဵတ်းၶႃႈတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၀ ဢပသလုမ်ႇလၢတ်ႈတီႈဢႁိသေႃႇၽေႇလလႄႈဝႃႈ၊-ပၼ်တၢင်းၵျၢမ်ႇတၢင်းပွင်သေၵမ်း။တၵ်းလႆႈႁဵတ်းၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။
၂၁ ဢႁိသေႃႇၽေႇလၵေႃႈလဝ်ႈလၢတ်ႈတီႈဢပသလုမ်ႇလႄႈဝႃႈ၊-ၶဝ်ႈၸူးလႄႈၼွၼ်းလူၺ်ႈၵၼ်တင်းၸိူင်ႉၼၢင်းဢၼ်ၸဝ်ႈပေႃႈၸဝ်ႈႁဝ်းဝႆႉၵိုတ်းဝႆႉၵျၢၼ်ႇႁႂ်ႈလႆႈပႂ်ႉႁေႃၸဝ်ႈၸိူဝ်းၼၼ်ႉတႃႉ။ၵူၼ်းမဵဝ်းဢိသရေႇလတင်းသဵင်ႈတင်းလူင်တၵ်းငိၼ်းလွင်ႈဢၼ်ဝႃႈၸဝ်ႈႁဝ်းႁဵတ်းတၢင်းဢၼ်တူႇဢၼ်ၼဝ်ၵႃႈတီႈၶူးလင်ႈပေႃႈၸဝ်ႈႁဝ်းၼၼ်ႉယဝ်ႉဝႃႈၼႆလႄႈႁဵင်းမိုဝ်းၶဝ်ၸိူဝ်းဢၼ်ယူႇၽၢႆႇၸဝ်ႈႁဝ်းၼၼ်ႉတၵ်းယႂ်ႇမႃးၶႃႈဢေႃႈ၊ဝႃႈၼင်ႇၼႆလႄႈ
၂၂ ၶဝ်ဢွၼ်ၵၼ်မုင်းမူဝ်းၵႃႇႁဵတ်းသုမ်ႉထဵင်ပုၼ်ႈဢပသလုမ်ႇၵႃႈၼိူဝ်မုင်းႁၢင်ႈႁေႃၶမ်းၼၼ်ႉလႄႈဢပသလုမ်ႇၶဝ်ႈၸူးၼွၼ်းလူၺ်ႈၸိူင်ႉၼၢင်းၸဝ်ႈပေႃႈမၼ်းၸိူဝ်းၼၼ်ႉၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆၼၼ်ႉဢေႃႈ။
၂၃ တၢင်းၵျၢမ်ႇတၢင်းပွင်ဢၼ်ဢႁိသေႃႇၽေႇလပၼ်ၼႂ်းၸူဝ်ႈၼႂ်းပၢၼ်ၼၼ်ႉမိူၼ်ၼင်ႇလႆႈတွင်ႉထၢမ်တီႈၽြႃးပဵၼ်ၸဝ်ႈၼၼ်ႉဢေႃႈ။တၢင်းၵျၢမ်ႇတၢင်းပွင်ဢၼ်ဢႁိသေႃႇၽေႇလပၼ်ၸိူဝ်းၼၼ်ႉၵေႃႈတႃႇဝိတ်ႉတင်းဢပသလုမ်ႇထွမ်ႇဢဝ်ဢေႃႈ။