Chapter
၁၅
ဢပသလုမ်ႇၵျၢမ်ႇပွင်ႈလွင်ႈဢမ်ႇလီ
၁ လိုၼ်းၼၼ်ႉဢပသလုမ်ႇပွင်ႁႅၼ်းလေႃႉရထႃးဢိၵ်ႇတင်းမႃႉတင်းၵူၼ်းႁႃႈသိပ်းဢၼ်တၵ်းလႆႈၶုၼ်ႇလႅၼ်ႈပႃႈၼႃႈမၼ်းၼၼ်ႉဢေႃႈ။
၂ ဢပသလုမ်ႇၼၼ်ႉလုၵ်ႉၸဝ်ႉၸဝ်ႉသေလႄႈၸုၵ်းယူႇၵႃႈတီႈသဵၼ်ႈတၢင်းဢၼ်တၵ်းၵႂႃႇၸူးၵႃႈတီႈဝဵင်းၼၼ်ႉဢေႃႈ။မိူဝ်ႈဢၼ်သေၵေႃႉၵေႃႉမီးဢမူႉလႄႈမႃးႁႂ်ႈလႆႈတိူင်ႇတီႈၶုၼ်ႁေႃၶမ်းႁႂ်ႈလႆႈၶၢမ်ႇတၢင်းဢၼ်ၸီႇယၢင်ႇတႅပ်းတတ်းၼၼ်ႉၸိုင်၊ဢပသလုမ်ႇထၢမ်လႄႈဝႃႈ၊-မႂ်းပဵၼ်ၵူၼ်းဝဵင်းလႂ်၊ဝႃႈၼင်ႇၼႆလႄႈမိူဝ်ဢၼ်ၵေႃႉၼၼ်ႉၶိုၼ်းလတ်ႈဝႃႈ၊-ၶႃႈၸဝ်ႈပဵၼ်ၵူၼ်းၸိူဝ်ႉၶိူဝ်းဢိသရေႇလၸိူဝ်းၼၼ်ႉၸိူဝ်းၼႆႉတီႈၶႃႈဢေႃႈ၊ဝႃႈၼင်ႇၼႆၼၼ်ႉၸိုင်ဢပသလုမ်ႇၸၢင်ႊလၢတ်ႈလႄႈဝႃႈ၊-
၃ တူၺ်းလူး။ဢမူႉမႂ်းၼႆႉၸိုဝ်ႈၸႂ်ႈလီငၢမ်းဢေႃႈ။ၵူၺ်းၵႃႈဢမ်ႇမီးၵေႃႉဢၼ်တၢင်တူဝ်ၶုၼ်ႁေႃၶမ်းဢၼ်တထွမေ်ႇငိၼ်းလွင်ႈဢမူႉၼႆႉ။မၢင်ၽဝ်ႇမၢင်ပွၵ်ႈဢပသလုမ်ႇၸၢင်ႊလၢတ်ႈလႄႈဝႃႈ၊-
၄ ပေႃးၵဝ်လႆႈပဵၼ်ၵေႃႉဢၼ်ၶၢၼ်းဝႆႉႁႂ်ႈလႆႈၸီႇယၢင်ႇတြႃးၵႃႈတီႈမိူင်းၼႆႉၸိုင်ၶဝ်ၸိူဝ်းဢၼ်မီးဢမူႉၼၼ်ႉၵူႈၵေႃႉတၵ်းမႃးၸူးၵႃႈတီႈၵဝ်လႄႈၵဝ်တၵ်းၸီႇယၢင်ႇၸွမ်းၼင်ႇတြႃးပုၼ်ႈၶဝ်ဢေႃႈ၊ဝႃႈၼင်ႇၼႆဢေႃႈ။
၅ မိူဝ်ႈဢၼ်သေၵေႃႉသေၵူၼ်းသုတ်ႉၸပ်းသုတ်ႉၸူးႁႂ်ႈလႆႈႁဵတ်းရူဝ်ႇသေႇၵူဝ်ယမ်တီႈမၼ်းၼၼ်ႉၸိုင်မၼ်းယဵတ်ႇမိုဝ်းမၼ်းယိပ်းၵမ်ဢဝ်ၵေႃႉၼၼ်ႉသေယဝ်ႉၸုပ်ႇၼူမ်ဢေႃႈ။
၆ ဢပသလုမ်ႇႁဵတ်းၸိူဝ်ႉၼင်ႇၼၼ်တီႈၵူၼ်းမဵဝ်းဢိသရေႇလၵႃႈဢၼ်မႃးတီႈၶုၼ်ႁေႃၶမ်းႁႂ်ႈလႆႈၶၢမ်ႇတၢင်းဢၼ်ၸီႇယၢင်ႇတႅပ်းတတ်းၼၼ်ႉလႄႈမၼ်းလႆးႁူဝ်ၸႂ်ၵူၼ်းမဵဝ်းဢိသရေႇလတင်းလၢႆဢေႃႈ။
၇ မိူဝ်ႈဢၼ်ပူၼ်ႉသသေီႇပီႊယဝ်ႉၼၼ်ႉဢပသလုမ်ႇလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈလႆႈၵႂႃႇၵႃႈတီႈဝဵင်းႁေႇပုၼ်ႇလႄႈၽေႇဝတ်ႈၵတိသႅတ်ႉၸႃႇဢၼ်ၶႃႈၸဝ်ႈလႆႈဝႆႉၵႃႈတီႈၼၼ်ႉသေၵမ်းတီႈၶႃႈ။
၈ လွင်ႈမၼ်းၸမ်းၶႃႈၸဝ်ႈႁဝ်းလႆႈႁဵတ်းၵတိသႅတ်ႉၸႃႇဝႆႉမိူဝ်ႈဢၼ်ၶႃႈၸဝ်ႈယင်းမီးယူႇၵႃႈတီႈဝဵင်းၵေႇသုရမိူင်းသုရိၼၼ်ႉလႄႈဝႃႈ၊-ပေႃးထႃႇဝရႃႉၽြႃးဢဝ်ၵဝ်ၶႃႈၶိုၼ်းမႃးၵႃႈတီႈဝဵင်းယေႇရုသလႅမ်ႇၸိုင်၊ၵဝ်ၶႃႈတၵ်းႁဵတ်းဝတ်ႈထႃႇဝရႃႉၽြႃးၵႃႈတီႈဝဵင်းႁေႇပုၼ်ႇၶႃႈဢေႃႈ၊ဝႃႈၼင်ႇၼႆလႄႈၶုၼ်ႁေႃၶမ်းမီးဢမိင်ႉလႄႈဝႃႈ၊-ၵႂႃႇၼိမ်ၼိမ်လီလီတႃႉ၊ဝႃႈၼင်ႇၼႆဢေႃႈ။
၉ မိူဝ်ႈၼၼ်ႉမၼ်းလုၵ်ႉလႄႈၵႂႃႇၵႃႈတီႈဝဵင်းႁေႇပုၼ်ႇဢေႃႈ။
၁၀ ၵူၺ်းၵႃႈဢပသလုမ်ႇပွႆႇၸႂ်ႉၶဵဝ်လွတ်ႈၽႆးၼႂ်းတင်းလၢႆၵႂႃႇၸွတ်ႇၸႅတ်ႇၵႃႈၼႂ်းမဵဝ်းဢိသရေႇလၵႃႈမီးၵူႈတီႈၵူႈလႅၼ်သေယဝ်ႉသင်ႇလၢတ်ႈလႄႈဝႃႈ၊-မိူဝ်ႈဢၼ်သူငိၼ်းသဵင်ဢၼ်ပဝ်ႇတိုင်ႈၼႄးၶရႃႇၼၼ်ႉၸိုင်သူဢွၼ်ၵၼ်လၢတ်ႈဝႃႈ၊-ဢပသလုမ်ႇပဵၼ်ၶုၼ်ႁေႃၶမ်းဝဵင်းႁေႇပုၼ်ႇဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၁ ၵူၼ်းသွင်ပၢၵ်ႇဢၼ်ဢပသလုမ်ႇႁွင်ႉပၢင်းမႃးၼၼ်ႉၵေႃႈဢွၼ်ၵၼ်ဢွၵ်ႇသေၵႃႈၼႂ်းဝဵင်းယေႇရုသလႅမ်ႇလႄႈၵႂႃႇလူၺ်ႈၵၼ်တင်းမၼ်းဢေႃႈ။ၶဝ်ဢမ်ႇႁူႉလွင်ႈတၢင်းၵျၢမ်ႇတၢင်းပွင်မၼ်းလႃးလႃးလႄႈၸွမ်းၵႂႃႇဢေႃႈ။
၁၁ မိူဝ်ႈဢၼ်မၼ်းႁဵတ်းတၢင်းဢၼ်ပုၵ်ႉၸေႃႇယိၸ်ႉၼၼ်ႉၵေႃႈမၼ်းပွႆႇၸႂ်ႉၵႂႃႇႁွင်ႉဢႁိသေႃႇၽေႇလ၊ၵူၼ်းဝဵင်းၵိလေႃႇ၊ဢမၢတ်ႈဢၼ်တိူင်ႇပၢင်ႇႁူမ်ႈတႃႇဝိတ်ႉ၊ၼၼ်ႉမႃးၵႃႈတီႈမၼ်းဢေႃႈ။ဢမူႉလွင်ႈတၢင်းဢၼ်လုၵ်ႉၽိုၼ်ႉၼၼ်ႉႁႅင်းယႂ်ႇမႃးၵွပ်ႈပိူဝ်ႈၶဝ်ၸိူဝ်းဢၼ်ၸွမ်းလင်ဢပသလုမ်ႇၼၼ်ႉၼမ်မႃးတိၵ်းတိၵ်းၼၼ်ႉဢေႃႈ။
တႃႇဝိတ်ႉလႆႈပၢႆဢွၵ်ႇ
၁၃ ၵေႃႉဢၼ်မွၵ်ႇလၢတ်ႈသတၢင်းသဵင်ၶဝ်ၵေႃႉၼိုင်ႈမႃးၵႃႈတီႈတႃႇဝိတ်ႉလႄႈလဝ်ႈလၢတ်ႈလႄႈဝႃႈ၊-ႁူဝ်ၸႂ်ၵူၼ်းမဵဝ်းဢိသရေႇလတင်းလၢႆပႃးၸွမ်းဢပသလုမ်ႇၵႂႃႇယဝ်ႉ၊ဝႃႈၼင်ႇၼႆဢေႃႈ။
၁၄ တႃႇဝိတ်ႉၵေႃႈမီးဢမိင်ႉတီႈၶႃႈၵူၼ်းမၼ်းၵႃႈဢၼ်မီးတီႈမၼ်းၵႃႈၼႂ်းဝဵင်းယေႇရုသလႅမ်ႇၸိူဝ်းၼၼ်ႉလႄႈဝႃႈ၊-ႁဝ်းဢွၼ်ၵၼ်ပၢႆတႃႉႁဝ်း။ပေႃးဢမ်ႇၼၼ်ႁဝ်းတၵ်းဢမ်ႇလွတ်ႈသေၵႃႈၼႂ်းမိုဝ်းဢပသလုမ်ႇၼၼ်ႉၵူၺ်း။ဢွၼ်ၵၼ်ၸဵဝ်းဢွၵ်ႇၵႂႃႇတႃႉႁဝ်း။ၵူဝ်မၼ်းတၵ်းၶိုတ်းႁဝ်းၵမ်းလဵဝ်သေလႄႈႁဵတ်းၽေးသႂ်ႇတီႈႁဝ်းလႄႈတိုၵ်းတေႃးယႃႉပႅတ်ႈဝဵင်းလူၺ်ႈၶူမ်းလၢပ်ႇၶူမ်းလႅဝ်းဢေႃႈ၊ဝႃႈၼင်ႇၼႆဢေႃႈ။
၁၅ ၶႃႈၵူၼ်းၶုၼ်ႁေႃၶမ်းၸိူဝ်းၼၼ်ႉၵေႃႈဢွၼ်ၵၼ်လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၶႃႈၸဝ်ႈႁဝ်းၶဝ်ႈတၵ်းဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ၸဝ်ႈၶုၼ်လူင်ႁဝ်းၸီႇယၢင်ႇၼၼ်ႉတီႈၶႃႈဢေႃႈ၊ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းပႃးဢဝ်ၵူၼ်းႁၢင်ႈၵူၼ်းႁေႃၵႃႈမီးလႄႈဢွၵ်ႇပၢႆၵႂႃႇဢေႃႈ။
၁၆ ၵူၺ်းၵႃႈၶုၼ်ႁေႃၶမ်းဝႆႉၵိုတ်းၸိုင်ၼၢင်းသိပ်းၼိုင်ႈႁႂ်ႈလႆႈပႂ်ႉႁၢင်ႈပႂ်ႉႁေႃၸဝ်ႈယူႇဢေႃႈ။
၁၇ ၼင်ႇၼၼ်လႄႈၶုၼ်ႁေႃၶမ်းဢိၵ်ႇတင်းၵူၼ်းၵႃႈဢၼ်ပႃးတီႈမၼ်းၸိူဝ်းၼၼ်ႉဢွၵ်ႇၵႂႃႇလႄႈၶျႃးပၢင်ၵႃႈတီႈဢၼ်ဢမ်ႇပေႃးၵႆပေႃးယၢၼ်ၼၼ်ႉဢေႃႈ။
၁၈ ၶႃႈၵူၼ်းၸဝ်ႈၵႃႈမီးၼၼ်ႉၵေႃႈဢွၼ်ၵၼ်လွမ်ႉႁွပ်ႈယူႇသေလႄႈၸွမ်းၵႂႃႇဢေႃႈ။ၵႃႈပဵၼ်ၵူၼ်းၶေႇရသိလႂ်ၵူၼ်းပေႇသိလႂ်၊ၵူၼ်းၵိတ်ႉတိႁူၵ်းပၢၵ်ႇဢၼ်လုၵ်ႉသေၵႃႈတီႈဝဵင်းၵႃႇသၸွမ်းမႃးၸိူဝ်းၼၼ်ႉၵႂႃႇၽၢႆႇၼႃႈၶုၼ်ႁေႃၶမ်းဢေႃႈ။
၁၉ မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈဢိတ်ႉတေႇ၊ၵူၼ်းၵိတ်ႉတိ၊ၼၼ်ႉလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းၸွမ်းလူၺ်ႈၵၼ်တင်းႁဝ်းမႃး။ၶိုၼ်းမိူဝ်းလႄႈယူႇၵႃႈတီႈၶုၼ်ႁေႃၶမ်းဢပသလုမ်ႇတႃႉ။မႂ်းပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇပႆႇတူၵ်းတီႈတူၵ်းလႅၼ်ၼၼ်ႉဢေႃႈ။
၂၀ ၵွပ်ႈပိူဝ်ႈဢၼ်မႂ်းၸင်ႇႁွတ်ႈမႃးမိူဝ်ႈဝႃးၵူၺ်းလႄႈမိူဝ်ႈၼႆႉၵဝ်တၵ်းလႆႈႁႂ်ႈမႂ်းလႄႇၵႂႃႇလႄႇမႃးၸွမ်းလူၺ်ႈၵၼ်တင်းႁဝ်းၼႂ်းမိူဝ်ႈဢၼ်တူဝ်ၵဝ်ယင်းဢမ်ႇႁူႉၵဝ်တၵ်းလႆႈၵႂႃႇၵႃႈတီႈလႂ်ၼၼ်ႉႁိုဝ်။မႂ်းႁွင်ႉဢဝ်ပီႈၼွင်ႉၸိူဝ်ႉၶိူဝ်းမၼ်းသေလႄႈမိူဝ်းၵႂႃႇတႃႉ။ႁႂ်ႈၵရူႉၼႃႇဢိၵ်ႇတင်းသႅတ်ႉၸႃႇမီးတီႈမႂ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၂၁ ဢိတ်ႉတေႇၵေႃႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ၊ၵႃႈၼင်ႇဢၼ်ဢသၢၵ်ႈၸဝ်ႈႁဝ်းၶႃႈၸဝ်ႈၶုၼ်လူင်ဢသၢၵ်ႈလိပ်းယူႇၼၼ်ႉ၊ဢသၢၵ်ႈၸဝ်ႈၶုၼ်လူင်သုမ်းသေဢမ်ႇဝႃႈ၊ၵတ်းယဵၼ်ၶျၢမ်းသႃႇသေဢမ်ႇဝႃႈ၊ၶႃႈၸဝ်ႈႁဝ်းတၵ်းယူႇၵႃႈတီႈဢၼ်ၸဝ်ႈႁဝ်းယူႇၼၼ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်တႃႇဝိတ်ႉမီးဢမိင်ႉတီႈဢိတ်ႉတေႇလႄႈဝႃႈ၊-
၂၂ ၶီႇၵႂႃႇတႃႉ၊ဝႃႈၼင်ႇၼႆလႄႈဢိတ်ႉတေႇၵူၼ်းၵိတ်ႉတိ၊ၼၼ်ႉၵေႃႈပႃးဢဝ်ၵူၼ်းလူင်ၵူၼ်းဢွၼ်ႇၵႃႈဢၼ်မီးတီႈမၼ်းၼၼ်ႉသေယဝ်ႉၸွမ်းၵႂႃႇဢေႃႈ။
၂၃ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ဢွၼ်ၵၼ်ႁဵတ်းသဵင်ဢၼ်ယႂ်ႇၼႃႇႁႆႈႁွင်ႉၼႃႇလူင်ႇလၢင်ဢေႃႈ။ၵူၼ်းၵႃႈမီးၼၼ်ႉဢွၼ်ၵၼ်ၵႂႃႇလႄႈတူဝ်ၶုၼ်ႁေႃၶမ်းၵေႃႈၶၢမ်ႈၼမ်ႉႁွင်ႊၵေႇတြုၼ်ႇသေယဝ်ႉ၊ၵူၼ်းၵႃႈမီးၼၼ်ႉဢွၼ်ၵၼ်ၶၢမ်ႈၸူးသဵၼ်ႈတၢင်းထိူၼ်ႇဢေႃႈ။
၂၄ ၸႃႇတုၵ်ႉဢိၵ်ႇတင်းၵူၼ်းလေႇဝိၵႃႈမီးၸိူဝ်းၼၼ်ႉႁၢမ်ဢဝ်တိူၵ်ႈပတိၺိၼ်ႇၽြႃးပဵၼ်ၸဝ်ႈႁွတ်ႈမႃးလႄႈၶျႃးတိူၵ်ႈပတိၺိၼ်ႇၽြႃးပဵၼ်ၸဝ်ႈၼၼ်ႉဝႆႉဢေႃႈ။ဢႃႇပျႃႇတႃႇႁဵတ်းတၢၵ်းဢၼ်ပုၵ်ႉၸေႃႇယိၸ်ႉတေႃႇထိုင်ႁွတ်ႈၵူၼ်းတင်းလၢႆဢွၵ်ႇသေၵႃႈၼႂ်းဝဵင်းၵႂႃႇတင်းသဵင်ႈတင်းမူတ်းၼၼ်ႉဢေႃႈ။
၂၅ ၶုၼ်ႁေႃၶမ်းမီးဢမိင်ႉတီႈၸႃႇတုၵ်ႉလႄႈဝႃႈ၊-ဢဝ်တိူၵ်ႈပတိၺိၼ်ႇၽြႃးပဵၼ်ၸဝ်ႈၶိုၼ်းမိူဝ်းသူင်ႇဝႆႉၵႃႈၼႂ်းဝဵင်းတႃႉ။ပေႃးၵဝ်ထူပ်းၵျေးၸူးသိုဝ်ႈၼႃႈတႂ်ႈတႃထႃႇဝရႃႉၽြႃးၸိုင်မၼ်းၸဝ်ႈတၵ်းဢဝ်ၵဝ်ၶိုၼ်းမႃးလႄႈၼႄပျႃးတိူၵ်ႈပတိၺိၼ်ႇၸဝ်ႈဢိၵ်ႇတင်းတီႈဢၼ်မၼ်းၸဝ်ႈၵိင်းဝပ်ႈယူႇၼၼ်ႉဢေႃႈ။
၂၆ ဢမ်ႇၼၼ်ၵေႃႈပေႃးၸဝ်ႈမီးဢမိင်ႉဝႃႈၵဝ်ဢမ်ႇမီးဢလူဝ်ႇတီႈမႂ်းယဝ်ႉဝႃႈၼင်ႇၼႆၸိုင်၊ၵဝ်မီးယူႇႁႂ်ႈလႆႈပဵၼ်ၸွမ်းၵႃႈၼင်ႇဢၼ်မၼ်းၸဝ်ႈမီးဢလူဝ်ႇၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။
၂၇ ၶုၼ်ႁေႃၶမ်းၵေႃႈသမ်ႉမီးဢမိင်ႉတီႈယိတ်ႉပရေႃးႁိၵ်ႈၸႃႇတုၵ်ႉလႄႈဝႃႈ၊-မႂ်းၼႆႉပဵၼ်ၵေႃႉဢၼ်ႁူပွင်ႇတႃလႅင်းဢမ်ႇၸႂ်ႈႁိုဝ်။ႁွင်ႉဢဝ်လုၵ်ႈၸၢႆးမႂ်းဢႁိမတ်ႉတင်းယေႃးၼသၼ်ႇလုၵ်ႈၸၢႆးဢႃႇပျႃႇထႃႇ၊ၸိူဝ်းၼၼ်ႉသေလႄႈၶိုၼ်းမိူဝ်းၵႂႃႇၵႃႈတီႈဝဵင်းၼိမ်ၼိမ်လီလီတႃႉ။
၂၈ မႂ်းတင်းဢႃႇပျႃႇတႃႇႁွင်ႉဢဝ်လုၵ်ႈၸၢႆးမႂ်းသွင်ၵေႃႉလႄႈၵႂႃႇတႃႉ။ၵဝ်တၵ်းၵိုတ်းသဝ်းပႂ်ႉထႃႈယူႇၵႃႈတီႈတိုဝ်ႉတႃႈၼမ်ႉၵႃႈၼႂ်းထိူၼ်ႇၼၼ်ႉတေႃႇထိုင်ႁွတ်ႈၵဝ်လႆႈငိၼ်းၵႂၢမ်းသူၼၼ်ႉဢေႃႈ၊ဝႃႈၼင်ႇၼႆလႄႈ
၂၉ ၸႃႇတုၵ်ႉတင်းဢႃႇပျႃႇထႃႇၵေႃႈဢွၼ်ၵၼ်ဢဝ်တိူၵ်ႈပတိၺိၼ်ႇၽြႃးပဵၼ်ၸဝ်ႈၶိုၼ်းမိူဝ်းသူင်ႇၵႃႈတီႈဝဵင်းယေႇရုသလႅမ်ႇလႄႈယူႇၵႃႈတီႈၼၼ်ႉဢေႃႈ။
၃၀ တႃႇဝိတ်ႉၵေႃႈယင်းဢမ်ႇတိုဝ်းၶႅပ်းတိၼ်ႁူမ်ႇသုမ်ႇႁူဝ်မၼ်းသေလႄႈႁႆႈႁွင်ႉၸွမ်းတၢင်းလႄႈသိုပ်ႇလႄႈၶိုၼ်ႈလွႆသၼ်ႇလုၼ်ႇၵႂႃႇယူႇဢေႃႈ။ၵူၼ်းဢၼ်ၸွမ်းလင်မၼ်းၵႂႃႇၸိူဝ်းၼၼ်ႉၵေႃႈဢွၼ်ၵၼ်ႁူမ်ႇသုမ်ႇႁူဝ်ၶဝ်ယူႇႁႆႈႁွင်ႉၸွမ်းတၢင်းယူႇသေလႄႈၶိုၼ်ႈဢေႃႈ။
၃၁ မိူဝ်ႈဢၼ်ၵေႃႉၼိုင်ႈလဝ်ႈလၢတ်ႈတီႈတႃႇဝိတ်ႉလႄႈဝႃႈ၊-ဢႁိသေႃႇၽေႇလၵေႃႈပႃးၼႂ်းမုၵ်ႉၸိူဝ်းဢၼ်ၽွမ်ႉႁူမ်ႈလူၺ်ႈၵၼ်တင်းဢပသလုမ်ႇလႄႈလုၵ်ႉၽိုၼ်ႉၼၼ်ႉၶႃႈဢေႃႈ၊ဝႃႈၼင်ႇၼႆၼၼ်ႉၸိုင်တႃႇဝိတ်ႉသူးတွင်းလႄႈဝႃႈ၊-ထႃႇဝရႃႉၽြႃးတီႈၶႃႈ။ၶႅၼ်းတေႃႈႁႂ်ႈတၢင်းၵျၢမ်ႇတၢင်းပွင်ဢၼ်ဢႁိသေႃႇၽေႇလႁဵတ်းၼၼ်ႉပဵၼ်တၢင်းၵျၢမ်ႇတၢင်းပွင်ဢၼ်မိူၵ်ႈၼႃႇသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၃၂ မိူဝ်ႈဢၼ်တႃႇဝိတ်ႉႁွတ်ႈထိုင်ၵႃႈၼိူဝ်ပၢႆၸိၵ်းလွႆတီႈဢၼ်ယၢမ်ႈၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉၸိုင်၊ႁုသေႇ၊ၵူၼ်းဢႃႇၶိ၊ၼၼ်ႉသိၵ်ႇသိူဝ်ႈယၢဝ်းမၼ်းသေလႄႈဢဝ်မုၼ်ႈလိၼ်တၢင်ႇသႂ်ႇၵႃႈၼိူဝ်ႁူဝ်မၼ်းသေယဝ်ႉဢွၵ်ႇမႃးႁႂ်ႈလႆႈႁပ်ႉႁူဝ်တၢင်းဢေႃႈ။
၃၃ တႃႇဝိတ်ႉၵေႃႈလၢတ်ႈတီႈမၼ်းလႄႈဝႃႈ၊-ပေႃးမႂ်းၸွမ်းလူၺ်ႈၵၼ်တင်းၵဝ်ၸိုင်၊မႂ်းတၵ်းပဵၼ်တၢင်းဢၼ်ၼၵ်းၼႃယၢပ်ႇၸႂ်တီႈၵဝ်ႈဢေႃႈ။
၃၄ ပေႃးမႂ်းၶိုၼ်းမိူဝ်းၵႂႃႇၵႃႈတီႈဝဵင်းသေလႄႈလဝ်ႈလၢတ်ႈတီႈဢပသလုမ်ႇလႄႈဝႃႈ၊-ၸဝ်ႈၶုၼ်လူင်တီႈၶႃႈ။တေႃႈလဵဝ်ၼႆႉၶႃႈၸဝ်ႈတၵ်းၶၢမ်ႇႁဵတ်းၶႃႈတီႈၸဝ်ႈႁဝ်းမိူၼ်ၸိူဝ်ႉၼင်ႇဢၼ်ယၢမ်ႈၶၢမ်ႇႁဵတ်းၶႃႈတီႈပေႃႈၸဝ်ႈႁဝ်းမိူဝ်ႈဢွၼ်ၼၼ်ႉၶႃႈဢေႃႈ၊ဝႃႈၼင်ႇၼႆၸိုင်တၵ်းပဵၼ်တၢင်းဢၼ်မႂ်းယူႇၽၢႆႇၵဝ်သေလႄႈယႃႉတၢင်းၵျၢမ်ႇတၢင်းပွင်ဢႁိသေႃႇၽေႇလၼၼ်ႉဢေႃႈ။
၃၅ ၵႃႈတီႈၼၼ်ႉမီးယိတ်ႉပရေႃးႁိၵ်ႈၸႃႇတုၵ်ႉတင်းဢႃႇပျႃႇထႃႇလူၺ်ႈၵၼ်တင်းမႂ်းယူႇဢမ်ႇၸႂ်ႈႁိုဝ်။ပိူဝ်ႈဢၼ်ပဵၼ်ၼင်ႇၼႆလႄႈမႂ်းတၵ်းလႆႈဢဝ်ၵႃႈဢၼ်မႂ်းလႆႈငိၼ်းၼႂ်းႁေႃၸဝ်ႈၼၼ်ႉၶိုၼ်းလၢတ်ႈတီႈၸႃႇတုၵ်ႉဢိၵ်ႇတင်းဢႃႇပျႃႇထႃႇယိတ်ႉပရေႃးႁိၵ်ႈၸိူဝ်းၼၼ်ႉဢေႃႈ။
၃၆ တူၺ်းလူး။တီႈၶဝ်ၼၼ်ႉမီးလုၵ်ႈလၢင်းၶဝ်သွင်ၵေႃႉဢၼ်ဝႃႈဢႁိမတ်ႉလုၵ်ႈၸၢႆးၸႃႇတုၵ်ႉဢိၵ်ႇတင်းယေႃးၼသၼ်ႇလုၵ်ႈၸၢႆးဢႃႇပျႃႇထႃႇၸိူဝ်းၼၼ်ႉယူႇဢေႃႈ။တၵ်းလႆႈဢဝ်ၵႃႈဢၼ်မႂ်းငိၼ်းလႆႈၼၼ်ႉပၼ်ၵႃႈၼႂ်းမိုဝ်းသွင်ၶႃၼၼ်ႉမႃးတီႈၵဝ်ဢေႃႈ၊ဝႃႈၼင်ႇၼႆသေယဝ်ႉ၊
၃၇ ၵေႃႉသေႈတႃႇဝိတ်ႉ၊ႁုသေႇ၊ၼၼ်ႉၶိုၼ်းႁွတ်ႈထိုင်ၵႂႃႇၵႃႈတီႈဝဵင်းမိူဝ်ႈဢၼ်ဢပသလုမ်ႇၶဝ်ႈၵႃႈၼႂ်းဝဵင်းယေႇရုသလႅမ်ႇၼၼ်ႉဢေႃႈ။