Chapter
၉
ယေႇႁုၶုၼ်ႁေႃၶမ်းဢိသရေႇလ
၁ မိူဝ်ႈၼၼ်ႉပရေႃးၽႅတ်ႈဢေးလိသေးႁွင်ႉဢဝ်ၵူၼ်းမဵဝ်းပရေႃးၽႅတ်ႈၵေႃႉၼိုင်ႈလႄႈသင်ႇလၢတ်ႈလႄႈဝႃႈ၊-ႁတ်ႉဢႅဝ်မႂ်းလႄႈဢဝ်တဝ်ႈၼမ်ႉမၼ်းၼႆႉၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉပုၼ်ႉတႃႉ။
၂ မိူဝ်ႈဢၼ်မႂ်းႁွတ်ႈထိုင်ၵႃႈတီႈၼၼ်ႉၸိုင်ႁႃဢဝ်ယေႇႁုဢၼ်ပဵၼ်လုၵ်ႈၸၢႆးယုဝ်ႇသၽတ်ႉဢၼ်ပဵၼ်လုၵ်ႈၸၢႆးၼိမ်ႇသိၼၼ်ႉလႄႈႁွင်ႉဢဝ်မၼ်းဢွၵ်ႇသေၵႃႈၼႂ်းပီႈၼႂ်းၼွင်ႉမၼ်းၸိူဝ်းၼၼ်ႉသေယဝ်ႉဢဝ်မၼ်းၶဝ်ႈၵႂႃႇၵႃႈၼႂ်းလုၵ်းတၢင်းၼႂ်းသေလႄႈဢဝ်တဝ်ႈၼမ်ႉမၼ်းၼႆႉထွၵ်ႇၼမ်ႉမၼ်းသႂ်ႇၵႃႈၼိူဝ်ႁူဝ်မၼ်းသေလႄႈလၢတ်ႈဝႃႈ၊-
၃ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵဝ်ပၼ်ၽိၵ်ႈသိၵ်ႈတီႈမႂ်းႁႂ်ႈမႂ်းပဵၼ်ၶုၼ်ႁေႃၶမ်းဢိသရေႇလဢေႃႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆသေယဝ်ႉ၊မႂ်းၽုၺ်ႇပိုတ်ႇၽၵ်းတူလႄႈယင်းဢမ်ႇၵိုတ်းဢမ်ႇသဝ်းလႄႈၶုၼ်လႅၼ်ႈဢွၵ်ႇပၢႆတႃႉ၊ဝႃႈၼင်ႇၼႆဢေႃႈ။
၄ ၼင်ႇၼၼ်လႄႈၵူၼ်းဢွၼ်ႇၵူၼ်းမဵဝ်းပရေႃးၽႅတ်ႈၼၼ်ႉၵေႃႈၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉလႄႈႁွတ်ႈထိုင်သေယဝ်ႉထူပ်းႁၼ်ၶုၼ်ႁူဝ်သိုၵ်းတင်းလၢႆၼင်ႈၸွမ်းၵၼ်ယူႇလႄႈမၼ်းလၢတ်ႈတီႈၶဝ်လႄႈဝႃႈ၊-ၶုၼ်ႁူဝ်သိုၵ်းၶဝ်ဢိူၺ်း။
၅ မီးတီႈတၵ်းလၢတ်ႈတီႈသူၸဝ်ႈဢေႃႈ၊ဝႃႈၼင်ႇၼႆလႄႈယေႇႁုထၢမ်လႄႈဝႃႈ၊-ၼႂ်းႁဝ်းၵႃႈမီးၼႆႉမီးတီႈတၵ်းလၢတ်ႈတီႈၽူႈလႂ်မိူဝ်ႈဢၼ်ဝႃႈၼင်ႇၼႆၸိုင်မၼ်းၶိုၼ်းလၢတ်ႈလႄႈဝႃႈ၊-ၶုၼ်ႁူဝ်သိုၵ်းဢိူၺ်း။မီးတီႈလၢတ်ႈတီႈၸဝ်ႈႁဝ်းဢေႃႈ။ဝႃႈၼင်ႇၼႆဢေႃႈ။
၆ မိူဝ်ႈၼၼ်ႉမၼ်းလုၵ်ႉလႄႈၶဝ်ႈၵႃႈၼႂ်းႁိူၼ်းသေယဝ်ႉမၼ်းဢဝ်ၼမ်ႉမၼ်းထွၵ်ႇသႂ်ႇၵႃႈၼိူဝ်ႁူဝ်မၼ်းၼၼ်ႉသေလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉမီးဢမိင်ႉလႄႈဝႃႈၸမ်း၊-ၵဝ်ပၼ်ၽိၵ်ႈသိၵ်ႈတီႈမႂ်းႁႂ်ႈမႂ်းပဵၼ်ၶုၼ်ႁေႃၶမ်းၵႃႈၼိူဝ်ၵူၼ်းထႃႇဝရႃႉၽြႃးဢၼ်ဝႃႈၵူၼ်းမဵဝ်းဢိသရေႇလၼၼ်ႉဢေႃႈ။
၇ မႂ်းတၵ်းလႆႈယႃႉမဵဝ်းၸိူဝ်ႉၶိူဝ်းဢႃႇႁပ်ႉၸဝ်ႈမႂ်းၼၼ်ႉပႅတ်ႈႁႂ်ႈၵဝ်လႆႈပၼ်တၢမ်ႇတီႈယေႇၸပေႇလၸွမ်းၼင်ႇဢပျႅတ်ႈဢၼ်ထွၵ်ႇလိူတ်ႈၶႃႈၵဝ်ပရေႃးၽိတ်ႈတင်းလၢႆဢပျႅတ်ႈဢၼ်ထွၵ်ႇလိူတ်ႈၶႃႈထႃႇဝရႃႉၽြႃးတင်းသဵင်ႈတင်းလူင်ၼၼ်ႉဢေႃႈ။
၈ မဵဝ်းၸိူဝ်ႉၶိူဝ်းဢႃႇႁပ်ႉတင်းသဵင်ႈတင်းလူင်တၵ်းလႆႈႁွတ်ႈထိုင်တၢင်းလူႉတၢင်းလႅဝ်လႄႈပဵၼ်ၵေႃႉဢၼ်ၶၢမ်ႇတၢင်းဢၼ်ၶျုၵ်ႈဝႆႉသေဢမ်ႇဝႃႈ၊ပဵၼ်ၵေႃႉဢၼ်ၵိုတ်းဢၼ်ၵျၢၼ်ႇလႄႈလွတ်ႈၵႃႈၼႂ်းမိူင်းဢိသရေႇလသေဢမ်ႇဝႃႈ၊ၵဝ်တၵ်းပႄႇတႅပ်းၵူၼ်းမဵဝ်းဢႃႇႁပ်ႉၵူႈၵေႃႉၵူႈၵူၼ်းပႅတ်ႈဢေႃႈ။
၉ ၵဝ်တၵ်းႁႂ်ႈမဵဝ်းၸိူဝ်ႉၶိူဝ်းဢႃႇႁပ်ႉပဵၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်းယေႇရူဝ်းပုမ်ႇလုၵ်ႈၸၢႆးၼေႇပတ်ႉဢိၵ်ႇတင်းပဵၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်းပႃႇသႃႇလုၵ်ႈၸၢႆးဢႁိယၼၼ်ႉဢေႃႈ။
၁၀ မႃတင်းလၢႆတၵ်းဢွၼ်ၵၼ်ၵိၼ်ယေႇၸပေႇလၵႃႈၼႂ်းၵႂၢၵ်ႈလိၼ်ယေႇၸရေႇလၼၼ်ႉလႄႈတၵ်းဢမ်ႇမီးၵေႃႉဢၼ်ဢဝ်မၼ်းသၢင်းၵျူဝ်ႇ၊ဝႃႈၼင်ႇၼႆဝႆႉယဝ်ႉဝႃႈၼင်ႇၼႆသေယဝ်ႉၽုၺ်ႇၽၵ်းတူလႄႈၶုၼ်ႇလႅၼ်ႈပၢႆဢေႃႈ။
၁၁ မိူဝ်ႈၼၼ်ႉယေႇႁုဢွၵ်ႇၸူးၵႃႈတီႈဢၼ်ၶႃႈၵူၼ်းၸဝ်ႈမၼ်းတင်းလၢႆမီးၼၼ်ႉလႄႈၵေႃႉၼိုင်ႈထၢမ်လႄႈဝႃႈ၊-လီယူႇၵူႈၸိူဝ်ႉၵူႈပိူင်ႁိုဝ်။ၵူၼ်းယွင်ႇၼၼ်ႉမႃးတီႈၸဝ်ႈႁဝ်းၵွပ်ႈပိူဝ်ႈလွင်ႈၵႃႈသင်ဝႃႈၼင်ႇၼႆလႄႈမၼ်းၶိုၼ်းလၢတ်ႈလႄႈဝႃႈ၊-သူႁူႉလွင်ႈၵေႃႉၼၼ်ႉဢိၵ်ႇတင်းၵႂၢမ်းဢၼ်မၼ်းလၢတ်ႈၼၼ်ႉယူႇဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊-
၁၂ ဢမ်ႇႁူႉၵူၺ်း၊လၢတ်ႈသေၵမ်း၊ဝႃႈၼင်ႇၼႆလႄႈမၼ်းၵေႃႈလၢတ်ႈလႄႈဝႃႈ၊-ထႃႇရႃႉၽြႃးမီးဢမိင်ႉလႄႈဝႃႈၸမ်းၵဝ်ပၼ်ၽိၵ်ႈသိၵ်ႈတီႈမႂ်း၊ႁႂ်ႈမႂ်းပဵၼ်ၶုၼ်ႁေႃၶမ်းဢိသရေႇလဢေႃႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
၁၃ မိူဝ်ႈဢၼ်ဝႃႈၼင်ႇၼႆၸိုင်ၶဝ်ၸိူဝ်းၼၼ်ႉႁိပ်ႈၼႅတ်ႈဢွၼ်ၵၼ်ဢဝ်သိူဝ်ႈယၢဝ်းၶဝ်ႁင်းၽႂ်ႁင်းမၼ်းလႄႈသိူဝ်ႇပၼ်တႂ်ႈမၼ်းၵႃႈၼိူဝ်တီႈယဵပ်ႇၼၼ်ႉသေလႄႈပဝ်ႇတိုင်ႈၼႄးၶရႃႇလႄႈႁွင်ႉပၢဝ်ႇႁွင်ႉလၢတ်ႈလႄႈဝႃႈ၊-ယေႇႁုပိၼ်ႇၶုၼ်ႁေႃၶမ်းယဝ်ႉ၊ဝႃႈၼင်ႇၼႆဢေႃႈ။
ယေႇႁုဢဝ်ယုဝ်ႇႁမ်ႇတင်းဢႃႇၶၸိတၢႆ
၁၄ ၼင်ႇၼၼ်လႄႈယေႇႁုလုၵ်ႈၸၢႆးယုဝ်ႇသၽတ်ႉလုၵ်ႈၸၢႆးၼိမ်ႇသိၼၼ်ႉလွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းယုဝ်ႇရမ်ႇဢေႃႈ။မိူဝ်ႈၼၼ်ႉယုဝ်ႇရမ်ႇဢိၵ်ႇတင်းၵူၼ်းမဵဝ်းဢိသရေႇလတင်းသဵင်ႈတင်းလူင်လႆႈပႂ်ႉဝဵင်းရႃႇမုတ်ႉမိူင်းၵိလတ်ႉယူႇၵွပ်ႈပိူဝ်ႈႁႃႇၸေႇလၶုၼ်ႁေႃၶမ်းသုရိၼၼ်ႉဢေႃႈ။
၁၅ ၵူၺ်းၵႃႈတူဝ်ၶုၼ်လူင်ယုဝ်ႇရမ်ႇၼၼ်ႉၶိုၼ်းမိူဝ်းၵႂႃႇၵႃႈတီႈဝဵင်းယေႇၸရေႇလႁႂ်ႈတၢင်းၸဵပ်းဢၼ်ၵူၼ်းသုရိၸိူဝ်းၼၼ်ႉတိူဝ်ႉထုၵ်ႇသႂ်ႇမၼ်းၼႂ်းမိူဝ်ႈဢၼ်မၼ်းတိုၵ်းတေႃးႁႃႇၸေႇလၶုၼ်ႁေႃၶမ်းသုရိၼၼ်ႉႁႂ်ႈလႆႈႁၢႆၶႅၼ်းဢေႃႈ။ယေႇႁုၵေႃႈလၢတ်ႈလႄႈဝႃႈ၊-ပေႃးသူပဵၼ်ၸႂ်ၵဝ်ၸိုင်ယႃႇပေႁႂ်ႈသေၵေႃႉသေၵူၼ်းလႆႈလွတ်ႈဢွၵ်ႇသေၵႃႈၼႂ်းဝဵင်းၼႆႉၵႂႃႇႁႂ်ႈလႆႈမွၵ်ႇလၢတ်ႈသတၢင်းသဵင်ၶၢဝ်ႇၵႃႈၼႂ်းဝဵင်းယေႇၸရေႇလပုၼ်ႉ၊ဝႃႈၼင်ႇၼႆဢေႃႈ။
၁၆ ၼင်ႇၼၼ်လႄႈယေႇႁုၼၼ်ႉၶီႇလေႃႉရထႃးၵႂႃႇၵႃႈတီႈဝဵင်းယေႇၸရေႇလလႄႈၵွပ်ႈပိူဝ်ႈဢၼ်ယုဝ်ႇရမ်ႇမီးယူႇၵႃႈၼႂ်းဝဵင်းၼၼ်ႉဢေႃႈ။မိူဝ်ႈၼၼ်ႉဢႃႇၶၸိၶုၼ်ႁေႃၶမ်းယုတၵေႃႈလူင်းႁွတ်ႈထိုင်ႁႂ်ႈလႆႈလူတူၺ်းယုဝ်ႇရမ်ႇယဝ်ႉ။
၁၇ ၵူၼ်းပႂ်ႉၵေႃႉၼိုင်ႈၸုၵ်းယူႇၵႃႈၼိူဝ်လင်မႃႉလီႈၵႃႈတီႈဝဵင်းယေႇၸရေႇလလႄႈမုင်ႈႁၼ်မူႇၽုင်မုၵ်ႉၸိူဝ်းဢၼ်ၸွမ်းယေႇႁုၼၼ်ႉသေယဝ်ႉ၊လၢတ်ႈဝႃႈ၊-ၵဝ်ႁၼ်မုၵ်ႉၵူၼ်းၸိူဝ်းၵူၼ်းဢေႃႈ၊ဝႃႈၼင်ႇၼႆလႄႈယုဝ်ႇရမ်ႇမီးဢမိင်ႉလႄႈဝႃႈ၊-ဢဝ်ၵူၼ်းသိုၵ်းၶီႇမႃႉၵေႃႉၼိုင်ႈပွႆႇၸႂ်ႉၵႂႃႇႁႂ်ႈလႆႈႁပ်ႉႁူဝ်တၢင်းၶဝ်ၼၼ်ႉသေလႄႈႁႂ်ႈမၼ်းထၢမ်လႄႈဝႃႈ၊-မီးတၢင်းၼိမ်ယူႇႁိုဝ်၊ဝႃႈၼင်ႇၼႆၼၼ်ႉတႃႉ၊ဝႃႈၼင်ႇၼႆလႄႈ
၁၈ ၵူၼ်းသိုၵ်းၶီႇမႃႉၵေႃႉၼိုင်ႈၵႂႃႇႁပ်ႉႁူဝ်တၢင်းမၼ်းသေလႄႈဝႃႈ၊-ၶုၼ်ႁေႃၶမ်းတွင်ႉထၢမ်လႄႈဝႃႈၸမ်း၊-မီးတၢင်းၼိမ်ယူႇႁိုဝ်၊ဝႃႈၼင်ႇၼႆဢေႃႈ၊ဝႃႈၼင်ႇၼႆလႄႈယေႇႁုလၢတ်ႈလႄႈဝႃႈ၊-မႂ်းၸၢပ်ႈသႅင်ႇၵၼ်တင်းတၢင်းၼိမ်ၸိူဝ်ႉၼင်ႇႁိုဝ်။ဝၢႆႇၶိုၼ်းလႄႈၸွမ်းပႃႈလင်ၵဝ်တႃႉ၊ဝႃႈၼင်ႇၼႆဢေႃႈ။ၵူၼ်းပႂ်ႉၼၼ်ႉၵေႃႈလၢတ်ႈတီႈၶုၼ်လူင်လႄႈဝႃႈ၊-ၵေႃႉဢၼ်ၸဝ်ႈပွႆႇၸႂ်ႉၵႂႃႇၼၼ်ႉႁွတ်ႈထိုင်ၵႂႃႇၵႃႈတီႈၼၼ်ႉယဝ်ႉ။ၵူၺ်းၵႃႈမၼ်းဢမ်ႇၶိုၼ်းမႃးယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ၶုၼ်လူင်သမ်ႉပွႆႇၸႂ်ႉၵူၼ်းသိုၵ်းၶီႇမႃႉတၢင်ႇၵေႃႉႁႂ်ႈၵႂႃႇႁွတ်ႈထိုင်တီႈၶဝ်ၼၼ်ႉလႄႈဝႃႈ၊-
၁၉ ၶုၼ်ႁေႃၶမ်းတွင်ႉထၢမ်လႄႈဝႃႈၸမ်း၊-မီးတၢင်းၼိမ်ယူႇႁိုဝ်၊ဝႃႈၼင်ႇၼႆသေယဝ်ႉယေႇႁုၶိုၼ်းလၢတ်ႈလႄႈဝႃႈ၊-မႂ်းၸၢပ်ႈသႅင်ႇၵၼ်တင်းတၢင်းၼိမ်ၸိူဝ်ႉၼင်ႇႁိုဝ်။ဝၢႆႇၶိုၼ်းလႄႈၸွမ်းပႃႈလင်ၵဝ်တႃႉ၊ဝႃႈၼင်ႇၼႆဢေႃႈ။
၂၀ ၵူၼ်းပႂ်ႉၵေႃႈလဝ်ႈလၢတ်ႈတီႈၶုၼ်လူင်လႄႈဝႃႈ၊-ၵေႃႉၼၼ်ႉႁွတ်ႈထိုင်ၵႂႃႇၵႃႈတီႈၶဝ်ၼၼ်ႉယဝ်ႉလႄႈဢမ်ႇၶိုၼ်းမႃးၶႃႈယဝ်ႉ။တၢင်းဢၼ်ႁေႃႈၼၼ်ႉမိူၼ်ၸိူဝ်ႉၼင်ႇတင်းဢၼ်ယေႇႁုလုၵ်ႈၸၢႆးၼိမ်ႇသိႁေႃႈၵျၢမ်းၼႃႇမိူၼ်ၵူၼ်းယွင်ႇၼၼ်ႉၶႃႈဢေႃႈ၊ဝႃႈၼင်ႇၼႆလႄႈ
၂၁ ယုဝ်ႇရမ်ႇၵေႃႈမီးဢမိင်ႉလႄႈဝႃႈ၊-ႁႅၼ်းလေႃႉရထႃးမႃႉတႃႉ၊ဝႃႈၼင်ႇၼႆလႄႈၶဝ်ဢွၼ်ၵၼ်ႁႅၼ်းလေႃႉရထႃးမႃႉၸဝ်ႈဢေႃႈ။ယုဝ်ႇရမ်ႇၶုၼ်ႁေႃၶမ်းဢိသရေႇလတင်းဢႃႇၶၸိၶုၼ်ႁေႃၶမ်းယုတၼၼ်ႉၶီႇလေႃႉရထႃးယေႈၵေႃႉယေႈလမ်းသေလႄႈဢွၵ်ႇၵႂႃႇႁႂ်ႈလႆႈႁပ်ႉႁူဝ်တၢင်းယေႇႁုလႄႈႁူပ်ႉထူပ်းၵၼ်တင်းမၼ်းၵႃႈၼႂ်းၵႂၢၵ်ႈလိၼ်ၼႃႇပုတ်ႉၵူၼ်းဝဵင်းယေႇၸရေႇလၼၼ်ႉဢေႃႈ။
၂၂ ယုဝ်ႇရမ်ႇႁၼ်ယေႇႁုသေယဝ်ႉထၢမ်လႄႈဝႃႈ၊-ယေႇႁုဢိူၺ်း။မီးတၢင်းၼိမ်ယူႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၶိုၼ်းလၢတ်ႈလႄႈဝႃႈ၊-
၂၃ ၼႂ်းၶိင်ႇၵႃႇလမိူဝ်ႈဢၼ်ဢမူႉမေႇထုင်ႇဢႃႉထမ်ႇမႃႉဢၼ်မမေ်းႂယေႇၸပေႇလႁဵတ်းဢိၵ်ႇတင်းဢမူႉဢၼ်မၼ်းၸေႃႉမၼ်းႁဵတ်းတင်းလၢႆမီးၼမ်ၼႃႇထၢၼ်ႇၼႆႉၼၼ်ႉတၵ်းမီးတၢင်းၼိမ်လႆႈၸိူဝ်ႉၼင်ႇႁိုဝ်၊ဝႃႈၼင်ႇၼႆလႄႈယုဝ်ႇရမ်ႇၼၼ်ႉဝၢႆၶိုၼ်းလင်လႅၼ်ပၢႆသေလႄႈႁွင်ႉဢႃႇၶၸိလႄႈဝႃႈ၊-ဢႃႇၶၸိဢိူၺ်း။ပဵၼ်ဢမူႉဢၼ်လုၵ်ႉၽိုၼ်ႉၵၼ်လူင်ပေႇ၊ဝႃႈၼင်ႇၼႆဢေႃႈ။
၂၄ ယေႇႁုၵေႃႈၵႃႈဢၼ်မီးဢဵၼ်မီးႁႅင်းၼၼ်ႉမၼ်းဝူတ်ႈၵၢင်ႇမၼ်းသေလႄႈယိုဝ်းၸပ်းသႂ်ႇႁူဝ်မႃႇယုဝ်ႇရမ်ႇဢေႃႈ။ပိုၼ်မၼ်းၵေႃႈသဵပ်ႇတႅင်းပွင်ႇပိဝ်ၵႂႃႇၵႃႈတီႈႁူဝ်ၸႂ်မၼ်းၼၼ်ႉလႄႈမၼ်းၼၼ်ႉယေႃႉယေႉတူၵ်းၵႃႈၼႂ်းလေႃႉရထႃးဢေႃႈ။
၂၅ ယေႇႁုၵေႃႈလၢတ်ႈတီႈပိတၵၵေႃႉဢၼ်ထိင်းလေႃႉလေႃႉရထႃးမၼ်းၼၼ်ႉလႄႈဝႃႈ၊-တိုတ်ႉဢဝ်မၼ်းလႄႈၶျႃးတူၵ်းပႅတ်ႈၵႃႈၼႂ်းၵႂၢၵ်ႈလိၼ်ၼႃႇပုတ်ႉၵူၼ်းဝဵင်းယေႇၸရေႇလၼႆႉတႃႉ။မႂ်းတွင်းလွင်ႈဢၼ်ထႃႇဝရႃႉၽြႃးဝႆႉပျႃႇတိၵ်ႈလူၺ်ႈလွင်ႈမၼ်းၼႆႉၼႂ်းမိူဝ်ႈဢၼ်ၵဝ်တင်းမႂ်းၶီႇမႃႉလႄႈၸွမ်းလင်ပေႃႈမၼ်းဢႃႇႁပ်ႉၼၼ်ႉဝႆႉယူႇဢမ်ႇၸႂ်ႈႁိုဝ်။
၂၆ ထႃႇဝရႃႉၽြႃးမီးဢမိင်ႉဝႆႉလႄႈဝႃႈ၊-ၵဝ်တူၺ်းႁၼ်လိူတ်ႈၼႃႇပုတ်ႉတင်းလိူတ်ႈလုၵ်ႈၸၢႆးမၼ်းတင်းလၢႆဝၼ်းမိူဝ်ႈဝႃးၼၼ်ႉဢမၢၼ်ႇၶၢၼ်ပဵၼ်ယဝ်ႉ၊ဝႃႈၼင်ႇၼႆဢေႃႈ။ထႃႇဝရႃႉၽြႃးသမ်ႉမီးဢမိင်ႉဝႆႉလႄႈဝႃႈ၊-ၵဝ်တၵ်းပၼ်တၢမ်ႇၸွမ်းလူၺ်ႈဢပျႅတ်ႈမႂ်းၵႃႈတီႈၵႂၢၵ်ႈလိၼ်ၼႆႉဢေႃႈ၊ဝႃႈၼင်ႇၼႆဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈဢဝ်တူဝ်တၢႆမၼ်းၶျႃးတူၵ်းပႅတ်ႈၵႃႈၼႂ်းၵႂၢၵ်ႈလိၼ်ၼႆႉၸွမ်းၵႃႈၼင်ႇဢၼ်ထႃႇဝရႃႉႉၽြႃးမီးဢမိင်ႉဝႆႉၼၼ်ႉတႃႉ၊ဝႃႈၼင်ႇၼႆဢေႃႈ။
၂၇ မိူဝ်ႈဢၼ်ဢႃႇၶၸိၶုၼ်ႁေႃၶမ်းယုတၼၼ်ႉႁၼ်လွင်ႈတၢင်းၼၼ်ႉၸိုင်မၼ်းပၢႆၸွမ်းသဵၼ်ႈတၢင်းသူၼ်ဢူးယဵၼ်ႇၸဝ်ႈၼၼ်ႉၵႂႃႇဢေႃႈ။ယေႇႁုၵေႃႈလိုပ်ႈၸွမ်းလမ်းၸွမ်းမၼ်းသေလႄႈဝႃႈ၊-တႅင်းသႂ်ႇမၼ်းၵႃႈၼိူဝ်လေႃႉရထႃးတႃႉ၊ဝႃႈၼင်ႇၼႆလႄႈၶဝ်ဢွၼ်ၵၼ်ႁဵတ်းၵႃႈၼႂ်းသဵၼ်ႈတၢင်းဢၼ်ၶိုၼ်ႈၸူးဝဵင်းၵုရဢၼ်မီးၵႃႈႁိမ်းဝဵင်းဢိပလမ်ႇၼၼ်ႉလႄႈတိူဝ်ႉမၢတ်ႇမၼ်းဢေႃႈ။မၼ်းပၢႆၵႂႃႇၸူးၵႃႈတီႈဝဵင်းမေႇၵိတ်ႉတေႃႇလႄႈတၢႆၵႃႈတီႈၼၼ်ႉဢေႃႈ။
၂၈ ၶႃႈမၼ်းၵူၼ်းမၼ်းဢွၼ်ၵၼ်ဢဝ်မၼ်းတၢင်ႇၵႃႈၼိူဝ်လေႃႉရထႃးသေလႄႈဢဝ်ၵႂႃႇၵႃႈတီႈဝဵင်းယေႇရုသလႅမ်ႇလႄႈဢဝ်မၼ်းသၢင်းၵျူဝ်ႇၵႃႈၼႂ်းသၢင်းၶႅင်းမၼ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆၵႃႈၼႂ်းဝဵင်းတႃႇဝိတ်ႉၼၼ်ႉဢေႃႈ။
၂၉ ဢႃႇၶၸိၼင်ႈႁၢင်ႈၼင်ႈႁေႃမိူင်းယုတၼႂ်းပီႊဢၼ်ယုဝ်ႇရမ်ႇလုၵ်ႈၸၢႆးၸဝ်ႈဢႃႇႁပ်ႉၸၢမ်ႇႁၢင်ႈၸၢမ်ႇႁေႃသိပ်းပၢႆဢဵတ်းပီႊၼၼ်ႉဢေႃႈ။
ဢဝ်ယေႇၸပေႇလတၢႆ
၃၀ မိူဝ်ႈဢၼ်ယေႇႁုၼၼ်ႉႁွတ်ႈထိုင်ၵႃႈတီႈဝဵင်းယေႇၸရေႇလၼၼ်ႉၸိုင်ယေႇၸပေႇလငိၼ်းလွင်ႈမၼ်းလႄႈမၼ်းဢဝ်ယႃႈယႃတႃးၶူၼ်တႃမၼ်းသေယဝ်ႉဝီႁူဝ်လပ်ႉၵဝ်ႈမၼ်းသေလႄႈလူတူၺ်းယူႇၵႃႈတီႈႁူးလၢင်းတဵၼ်ဢေႃႈ။
၃၁ မိူဝ်ႈဢၼ်မၼ်းႁၼ်ယေႇႁုၶဝ်ႈႁူးၽၵ်းတူၼၼ်ႉၸိုင်ယေႇၸပေႇလထၢမ်မၼ်းလႄႈဝႃႈ၊-မႂ်းၸိမရိၵေႃႉဢၼ်ဢဝ်ၸဝ်ႈမႂ်းတၢႆၼႆႉဢိူၺ်း။မႂ်းမႃးၼႂ်းတၢင်းၼိမ်ႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊
၃၂ မၼ်းႁႅၼ်တူၺ်းႁူးလၢင်းတဵၼ်လႄႈထၢမ်ဝႃႈ၊-ၽူႈလႂ်ယူႇၽၢႆႇၵဝ်၊ၽူႈလႂ်၊ဝႃႈၼင်ႇၼႆသေယဝ်ႉၵူၼ်းထိင်းမေႈယိင်းသွင်ၵေႃႉသၢမ်ၵေႃႉဢွၼ်ၵၼ်ၵူမ်ႈတူၺ်းၵႃႈတီႈႁူးလၢင်းတဵၼ်ဢေႃႈ။
၃၃ မၼ်းပၼ်ဢမိင်ႉလႄႈဝႃႈ၊-ဢဝ်မၼ်းထႅမ်ႈတူၵ်းပႅတ်ႈသတေႃႉ၊ဝႃႈၼင်ႇၼႆလႄႈၶဝ်ၵေႃႈဢွၼ်ၵၼ်ဢဝ်မၼ်းထႅမ်ႈတူၵ်းလႄႈလိူတ်ႈမၼ်းၼၼ်ႉၵမ်ႈၽွင်ႈၽူင်ႉၸပ်းသႂ်ႇၵႃႈၼိူဝ်ႁူဝ်ႉဝၢင်းဢိၵ်ႇတင်းၵႃႈၼိူဝ်မႃႉတင်းလၢႆၵွပ်ႈပိူဝ်ႈၶဝ်ယဵပ်ႇသႂ်ႇၵႃႈၼိူဝ်တူဝ်မၼ်းၼၼ်ႉဢေႃႈ။
၃၄ မၼ်းၶဝ်ႈၵႃႈၼႂ်းလႄႈၵိၼ်ၶူပ်းသေယဝ်ႉသမ်ႉလၢတ်ႈလႄႈဝႃႈ၊-ဢွၼ်ၵၼ်ၵႂႃႇတူၺ်းမေႈယိင်းဢၼ်ထုၵ်ႇၵိၼ်ႇဝႃႈၼၼ်ႉလႄႈဢဝ်တူဝ်တၢႆမၼ်းသၢင်းၵျူဝ်ႇတႃႉ။
၃၅ မၼ်းပဵၼ်လုၵ်ႈယိင်းၶုၼ်ႁေႃၶမ်းဢေႃႈ၊ဝႃႈၼင်ႇၼႆလႄႈမိူဝ်ႈဢၼ်ၶဝ်ၵႂႃႇႁႂ်ႈလႆႈသၢင်းၵျူဝ်ႇၼၼ်ႉၸိုင်ၶဝ်ထူပ်းႁၼ်လုပ်ႇၵွၵ်းႁူဝ်၊ၽႃႇတိၼ်၊ၽႃႇမိုဝ်းမၼ်းၵူၺ်းလႄႈၶဝ်သမ်ႉၶိုၼ်းမႃးလဝ်ႈလၢတ်ႈတီႈယေႇႁုဢေႃႈ။
၃၆ မၼ်းၵေႃႈလၢတ်ႈလႄႈဝႃႈ၊-ၵႂၢမ်းဢၼ်ထႃႇဝရႃႉၽြႃးဢဝ်ၶႃႈမၼ်းၸဝ်ႈဢေးလိယၵူၼ်းဝဵင်းတိသၽိၼၼ်ႉမီးဢမိင်ႉဝႆႉလႄႈဝႃႈၸမ်း၊-မႃတင်းလၢႆဢွၼ်ၵၼ်ၵိၼ်ၼိူဝ်ႉယေႇၸပေႇလၵႃႈၼႂ်းၵႂၢၵ်ႈလိၼ်ယေႇၸရေႇလဢေႃႈ၊ဝႃႈၼင်ႇၼႆၼၼ်ႉပဵၼ်ဢၼ်ၼႆႉဢေႃႈ။
၃၇ ပိူဝ်ႈၼႆလႄႈလွင်ႈၼင်ႇႁိုဝ်ၽူႈလႂ်တၵ်းဢမ်ႇလႆႈလၢတ်ႈလႄႈဝႃႈ၊-ဢၼ်ၼႆႉၸမ်းပဵၼ်ယေႇၸပေႇလဢေႃႈ၊ဝႃႈၼင်ႇၼႆၼၼ်ႉၸိုင်တူဝ်တၢႆယေႇၸပေႇလၼၼ်ႉတၵ်းလႆႈပဵၼ်ၸိူဝ်ႉၼင်ႇၶီႈဝူဝ်းၵႃႈတီႈၼႃႈလိၼ်ၵႃႈၼွၵ်ႈၵႃႈပၢင်ႇၵႃႈၼႂ်းၵႂၢၵ်ႈလိၼ်ယေႇၸရေႇလၼႆႉဢေႃႈ၊ဝႃႈၼင်ႇၼႆဢေႃႈ။