Chapter
၁၈
ႁေႇၸၵိၶုၼ်ႁေႃၶမ်းယုတ
၁ ၼႂ်းပီႊဢၼ်ႁေႃးသေႇလုၵ်ႈၸၢႆးဢေးလႃႇၶုၼ်ႁေႃၶမ်းဢိသရေႇလၸၢမ်ႇႁၢင်ႈၸၢမ်ႇႁေႃသၢမ်ပီႊၼၼ်ႉႁေႇၸၵိလုၵ်ႈၸၢႆးဢႃႇၶတ်ႉၶုၼ်ႁေႃၶမ်းယုတၸႃႉၼင်ႈႁၢင်ႈၼင်ႈႁေႃဢေႃႈ။
၂ မိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသၢဝ်းပၢႆၵဝ်ႈပီႊဢေႃႈ။ၸိုဝ်သဵင်မေႈၸဝ်ႈၸမ်းပဵၼ်ဢႃႇၽိလုၵ်ႈယိင်းၸႃႇၶရိဢေႃႈ။
၃ မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ်ၸဝ်ႈပေႃႈမၼ်းတႃႇဝိတ်ႉႁဵတ်းၼၼ်ႉဢေႃႈ။
၄ မၼ်းပႄႇၽဵဝ်ႈထႃႇၼႃႉတီႈသုင်လႂ်ၵိူၼ်ႇယႃႉသဝ်တီႈၵူဝ်းၵႂၢႆႇလႂ်၊ပွမ်ႈလူမ်ႉၽၼ်းလူမ်ႉပႅတ်ႈသဝ်ဢႃႇသရလႂ်ၸိူဝ်းၼၼ်ႉဢေႃႈ။ငူးတွင်းလိူင်ဢၼ်မုဝ်းသေႇႁဵတ်းဝႆႉၼၼ်ႉၵေႃႈမၼ်းတႅပ်းႁဵတ်းပွတ်းႁဵတ်းတွၼ်ႈပႅတ်ႈဢေႃႈ။လွင်ႈမၼ်းၸမ်းၵူၼ်းမဵဝ်းဢိသရေႇလတင်းလၢႆၸၢင်ႊဢဝ်ၼၢမ်ႇသႃႇတုတ်ႇၽႆးၵႃႈတီႈၽၢႆႇၼႃႈဢၼ်ၼၼ်ႉတေႃႇထိုင်ႁွတ်ႈၶိင်ႇၵႃႇလႃႉၸူဝ်ႈပၢၼ်ၼၼ်ႉဢေႃႈ။
၅ မၼ်းႁွင်ႉႁိၵ်ႈၸိုဝ်ႈဢၼ်ၼၼ်ႉဝႃႈၼႁုၵ်ႉတၼ်ႇဢေႃႈ။မၼ်းသွၼ်ႈပိုင်ႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလထၼ်ႈပေႃးၵေႃႉဢၼ်မိူၼ်ၵၼ်တင်းမၼ်းၵႃႈၼႂ်းၶုၼ်ႁေႃၶမ်းယုတၵႃႈဢၼ်ပဵၼ်ၵမ်းလိုၼ်းမၼ်းၵႃႈၼႂ်းၶဝ်ၸိူဝ်းဢၼ်ပူၼ်ႉၵႂႃႇဢွၼ်တၢင်းမၼ်းၸိူဝ်းၼၼ်ႉဢမ်ႇမီးသေၵေႃႉ။
၆ မၼ်းဢိင်ပိုင်ႈထႃႇဝရႃႉၽြႃးလႄႈယင်းဢမ်ႇၽၢတ်ႇဢမ်ႇယၢၼ်မၼ်းၸဝ်ႈလႄႈၸွမ်းလင်မၼ်းၸဝ်ႈယူႇသေလႄႈပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၸိူဝ်းၼၼ်ႉဢေႃႈ။
၇ ထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းလႄႈမၼ်းႁဵတ်းလႆႈပဵၼ်လႆႈၵႃႈဢၼ်မၼ်းဢွၵ်ႇၵႂႃႇဢွၵ်ႇပႆၼၼ်ႉဢေႃႈ။မၼ်းလုၵ်ႉၽိုၼ်ႉၶုၼ်ႁေႃၶမ်းဢႃႇသုရိသေလႄႈဢမ်ႇၶၢမ်ႇႁဵတ်းၶႃႈတီႈၶုၼ်ၼၼ်ႉ။
၈ ပဵၼ်ၵႃႈတီႈသုမ်ႉထဵင်ဢၼ်မုင်ႈတူၺ်းလႄႈပႂ်ႉၵၢင်ၼၼ်ႉသေဢမ်ႇဝႃႈ၊ပဵၼ်ၵႃႈတီႈဝဵင်းဢၼ်မၼ်ႈၶိူင်ႇၼၼ်ႉသေဢမ်ႇဝႃႈ၊မၼ်းတိုၵ်းတေႃးယႃႉပႅတ်ႈၵူၼ်းၽိလိတ်ႉတိတင်းလၢႆတေႃႇထိုင်ႁွတ်ႈဝဵင်းၵႃႇၸဢိၵ်ႇတင်းလႅၼ်လိၼ်မၼ်းၼၼ်ႉဢေႃႈ။
၉ ၼႂ်းပီႊဢၼ်ၶုၼ်လူင်ႁေႇၸၵိၸၢမ်ႇႁၢင်ႈၸၢမ်ႇႁေႃသီႇပီႊၼၼ်ႉ၊ႁေႃးသေႇလုၵ်ႈၸၢႆးဢေးလႃႇၶုၼ်ႁေႃၶမ်းဢိသရေႇလၸၢမ်ႇႁၢင်ႈၸၢမ်ႇႁေႃၸဵတ်းပီႊၼၼ်ႉသႃႇလမၼေႇၸႃႇၶုၼ်ႁေႃၶမ်းဢႃႇသုရိၼၼ်ႉၶီႇသိုၵ်းၶိုၼ်ႈၸူးဝဵင်းသမႃႇရိလႄႈလွမ်ႉဝႆႉဢေႃႈ။
၁၀ မိူဝ်ႈဢၼ်လႆႈသၢဝ်းပီႊယဝ်ႉၼႂ်းပီႊဢၼ်ႁေႇၸၵိၸၢမ်ႇႁၢင်ႈၸၢမ်ႇႁေႃႁူၵ်းပီႊႁေႃးသေႇၶုၼ်ႁေႃၶမ်းဢိသရေႇလၸၢမ်ႇႁၢင်ႈၸၢမ်ႇႁေႃၵဝ်ႈပီႊၼၼ်ႉၶဝ်သိမ်းလႆႈဝဵင်းသမႃႇရိဢေႃႈ။
၁၁ ၶုၼ်ႁေႃၶမ်းဢႃႇသုရိၼၼ်ႉသိမ်းဢဝ်ၵူၼ်းမဵဝ်းဢိသရေႇလတင်းလၢႆၵႂႃႇၵႃႈတီႈမိူင်းဢႃႇသုရိလႄႈဢဝ်ၶဝ်ဝႆႉၵႃႈတီႈဝဵင်းႁႃႇလ၊ဝဵင်းႁႃႇပေႃႇၵႃႈႁိမ်းၼမ်ႉႁွင်ႊၵေႃႇၸမ်ႇဢိၵ်ႇတင်းၵႃႈတီႈဝၢၼ်ႈဝဵင်းဢိူင်ႇမေႇတိၸိူဝ်းၼၼ်ႉဢေႃႈ။
၁၂ လွင်ႈမၼ်းၸမ်းၶဝ်ဢမ်ႇထွမ်ႇဢမ်ႇဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈၶဝ်လႄႈဢွၼ်ၵၼ်ပူၼ်ႉလိူဝ်ပတိၺိၼ်ႇၵႃႈဢၼ်မုဝ်းသေႇၶႃႈထႃႇဝရႃႉၽြႃးသင်ႇလၢတ်ႈဝႆႉၸိူဝ်းၼၼ်ႉဢေႃႈ။
၁၃ ၶဝ်ဢမ်ႇထွမ်ဢမ်ႇဢဝ်ဢမ်ႇပႂ်ႉၸွမ်း။ၼႂ်းပီႊဢၼ်ၶုၼ်လူင်ႁေႇၵိၸၢမ်ႇႁၢင်ႈၸၢမ်ႇႁေႃသိပ်းပီႊၼၼ်ႉသၼႃႇၶရိပ်ႉၶုၼ်ႁေႃၶမ်းဢႃႇသုရိၶီႇသိုၵ်းၶိုၼ်ႈၸူးဝဵင်းဢၼ်မၼ်ႈၶိူင်ႇၵႃႈမီးၵႃႈၼႂ်းမိူင်းယုတၼၼ်ႉလႄႈတိုၵ်းဢဝ်လႆႈဢေႃႈ။
၁၄ ႁေႇၸၵိၶုၼ်ႁေႃၶမ်းယုတပွႆႇၸႂ်ႉၸူးတီႈၶုၼ်ႁေႃၶမ်းဢႃႇသုရိၵႃႈတီႈဝဵင်းလႃႇၶိသလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈၽိတ်းပိူင်ႈတီႈၶႃႈယဝ်ႉ။ၶႅၼ်းတေႃႈၶိုၼ်းမိူဝ်းဢွၵ်ႇၵႂႃႇသေၵႃႈတီႈၶႃႈၸဝ်ႈသေၵမ်းတီႈၶႃႈ။ၶႃႈၸဝ်ႈတၵ်းၵိုတ်းႁၢပ်ၵႃႈဢၼ်ၸဝ်ႈႁဝ်းတၢင်ႇပၼ်ၵႃႈၼိူဝ်ၶႃႈၸဝ်ႈတီႈၶႃႈဢေႃႈ၊ဝႃႈၼင်ႇၼႆသေယဝ်ႉၶုၼ်ႁေႃၶမ်းဢႃႇသုရိၼၼ်ႉယွၼ်းဢဝ်ငိုၼ်းသၢမ်ပၢၵ်ႇတလၢၼ်ႇတၢၼ်ႇဢိၵ်ႇတင်းၶမ်းသိပ်းတလၢၼ်ႇတၢၼ်ႇတီႈႁေႇၸၵိၶုၼ်ႁေႃၶမ်းယုတၼၼ်ႉဢေႃႈ။
၁၅ ႁေႇၸၵိဢဝ်ငိုၼ်းၵႃႈဢၼ်ထူပ်းႁၼ်ၵႃႈၼႂ်းႁိူၼ်းထႃႇဝရႃႉၽြႃးဢိၵ်ႇတင်းၵႃႈၼႂ်းတိူၵ်ႈၽၼ်ႇတႃႇၸဝ်ႈၼၼ်ႉလႄႈပၼ်ဢေႃႈ။
၁၆ မိူဝ်ႈၼၼ်ႉႁေႇၸၵိလွၵ်ႈဢဝ်ၶမ်းၵႃႈတီႈၽၵ်းတူပိၵ်ႉမၢၼ်ႇထႃႇဝရႃႉၽြႃးဢိၵ်ႇတင်းၵႃႈတီႈသဝ်ၽၵ်းတူဢၼ်မၼ်းဢုမ်ႇႁေႃႇဝႆႉၸိူဝ်းၼၼ်ႉလႄႈပၼ်တီႈၶုၼ်ႁေႃၶမ်းဢႃႇသုရိဢေႃႈ။
ဝဵင်းယေႇရုသလႅမ်ႇလႆႈၶၢမ်ႇလွၵ်ႇငိုတ်ႈ
၁၇ လိုၼ်းၼၼ်ႉၶုၼ်ႁေႃၶမ်းဢႃႇသုရိပွႆႇၸႂ်ႉၸွမ်ႈသိုၵ်းႁူဝ်သိုၵ်း၊ၵႅမ်ႈသိုၵ်း၊ဢိၵ်ႇလူၺ်ႈၵၼ်တင်းၵူၼ်းသိုၵ်းၼမ်ၼႃႇလုၵ်ႉသေၵႃႈတီႈဝဵင်းလႃႇၶိသမႃးၸူးတီႈၶုၼ်လူင်ႁေႇၸၵိၵႃႈတီႈဝဵင်းယေႇရုသလႅမ်ႇလႄႈၶဝ်ၼၼ်ႉဢွၼ်ၵၼ်ၶိုၼ်ႈၸူးလႄႈႁွတ်ႈထိုင်ၵႃႈတီႈဝဵင်းယေႇရုသလႅမ်ႇဢေႃႈ။ႁွတ်ႈထိုင်သေယဝ်ႉမႃးၸုၵ်းယူႇၵႃႈတီႈပၢၵ်ႇၼမ်ႉၼွင်ၵႃႈတီႈသဵၼ်ႈတၢင်းၵႂၢၵ်ႉလိၼ်ၵူၼ်းသၵ်ႉၶူဝ်းၼၼ်ႉဢေႃႈ။
၁၈ မိူဝ်ႈဢၼ်ၶဝ်ႁွင်ႉၶုၼ်ႁေႃၶမ်းၼၼ်ၸိုင်၊ဢေးလျႃႇၵိမ်ႇဢၼ်ပဵၼ်လုၵ်ႈၸၢႆးႁိလၵၵေႃႉၼၼ်ႉဢုပ်ႉၵႃႈၼိူဝ်ႁေႃၶမ်းဢိၵ်ႇတင်းၸရေးလူင်သေႇပၼ၊ဢတႂၢင်းဝုၼ်ႇယေႃႇဢႃႇဢၼ်ပဵၼ်လုၵ်ႈၸၢႆးဢႃႇသပ်ႉၸိူဝ်းၼၼ်ႉဢွၵ်ႇမႃးထူပ်းၶဝ်ဢေႃႈ။
၁၉ ၸွမ်ႈသိုၵ်းလၢတ်ႈတီႈၶဝ်လႄႈဝႃႈ၊-သူၶိုၼ်းလဝ်ႈလၢတ်ႈတီႈႁေႇၸၵိလႄႈဝႃႈၸဝ်ႈမႁႃၶုၼ်လူင်ၶုၼ်ႁေႃၶမ်းဢႃႇသုရိမီးဢမိင်ႉလႄႈဝႃႈၸမ်း၊-တီႈဢိင်ပိုင်ႈဢၼ်မႂ်းဢိင်ပိုင်ႈယူႇၼၼ်ႉပဵၼ်ၸိူဝ်ႉၼင်ႇႁိုဝ်။
၂၀ မႂ်းလၢတ်ႈဝႃႈ၊-ၵဝ်ၼႆႉတဵမ်ဝႆႉတင်းၺၢၼ်ႇတၢင်းၵတ်ႉတၢင်းၶၼ်တၼ်းၶူဝ်းတၢင်းၵတ်ႉတၢင်းၶၼ်ႁႂ်ႈလႆႈတိုၵ်းသိုၵ်းဢေႃႈ၊ဝႃႈၼင်ႇၼႆသေၵေႃႈၵႂၢမ်းၼၼ်ႉပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်လူင်ပေႇ။မိူဝ်ႈလဵဝ်ၼႆႉမႂ်းဢိင်ပိုင်ႈၽူႈလႂ်သေလႄႈလုၵ်ႉၽိုၼ်ႉတေႃႇၵဝ်။
၂၁ တူၺ်းလူ။မႂ်းဢိင်ပိူင်ၶွၼ်ႉတဝ်ႉလႅမ်ႈမႆႉဢေႃႈဢၼ်ႁၵ်းဢၼ်ဝႃႈမိူင်းဢေႇၵႅပ်ႉတုၼၼ်ႉလူင်ပေႇ။မႆႉဢေႃႈၼၼ်ႉတၵ်းတမ်ႊတႅင်းမိုဝ်းၵေႃႉဢၼ်ယိပ်းၵမ်ၼၼ်ႉလႄႈတိူဝ်ႉမၢတ်ႇၵေႃႉဢၼ်ဢိင်မၼ်းၼၼ်ႉဢေႃႈ။ၶုၼ်လူင်ဢေႇၵႅပ်ႉတုၶုၼ်ႁေႃၶမ်းၽႃႇရေႃးၼၼ်ႉတၵ်းႁဵတ်းတီႈၶဝ်ၸိူဝ်းဢၼ်ဢိင်ပိူင်မၼ်းၼၼ်ႉၸိူဝ်ႉၼင်ႇၼၼ်ဢေႃႈ။
၂၂ ပေႃးသူၶိုၼ်းလၢတ်ႈတီႈၵဝ်လႄႈဝႃႈ၊-ႁဝ်းဢိင်ပိုင်ႈထႃႇဝရႃႉၽြႃးၽြႃးပဵၼ်ႈၸဝ်ႈႁဝ်းဢေႃႈ၊ဝႃႈၼင်ႇၼႆၸိုင်မၼ်းၸဝ်ႈၼၼ်ႉပဵၼ်ၽြႃးဢၼ်ႁေႇၸၵိပႄႇၽဵဝ်ႈထႃႇၼႃႉတီႈသုင်မၼ်းၸဝ်ႈဢိၵ်ႇတင်းယိတ်ႉပလၢင်ႇမၼ်းၸဝ်ႈတင်းလၢႆပႅတ်ႈသေလႄႈသင်ႇလၢတ်ႈတီႈၵူၼ်းမိူင်းယုတတင်းၵူၼ်းဝဵင်းယေႇရုသလႅမ်ႇၸိူဝ်းၼၼ်ႉဝႃႈ၊-သူတၵ်းလႆႈၵူဝ်းၵႂၢႆႇၵႃႈတီႈၽၢႆႇၼႃႈယိတ်ႉပလၢင်ႇဢၼ်ၼႆႉၵႃႈၼႂ်းဝဵင်းယေႇရုသလႅမ်ႇၼႆႉၵူၺ်းဢေႃႈ၊ဝႃႈၼင်ႇၼႆၼၼ်ႉဢမ်ႇၸႂ်ႈႁိုဝ်။
၂၃ ပိူဝ်ႈၼႆလႄႈမိူဝ်ႈလဵဝ်ၼႆႉပၼ်ၶဝ်ၸိူဝ်းဢၼ်တၵ်းႁပ်ႉတုင်းဢဝ်ၼၼ်ႉတီႈၸဝ်ႈၵဝ်ၶုၼ်ႁေႃၶမ်းဢႃႇသုရိၼၼ်ႉတႃႉ။ပေႃးၵူၼ်းသိုၵ်းၶီႇမႃႉမီးတီႈမႂ်းထၢၼ်ႈပေႃးၵုမ်ႇလုမ်ႇၸိုင်ၵဝ်တၵ်းပၼ်မႃႉသွင်ႁဵင်ဢေႃႈ။
၂၄ မႂ်းတၵ်းႁဵတ်းၸိူဝ်ႉၼင်ႇႁိုဝ်သေလႄႈႁႂ်ႈၼႃႈႁူဝ်သိုၵ်းဢၼ်လဵၵ်ႉသပေိူၼ်ႈၵႃႈၼႂ်းၶႃႈၵူၼ်းၸဝ်ႈၵဝ်ႇၼၼ်ႉဝၢႆႇၶိုၼ်းလႄႈတၵ်းသွၼ်ႈပိုင်ႈမိူင်းဢေႇၵႅပ်ႉတု၊လေႃႉရထႃးလႂ်၊ၵူၼ်းသိုၵ်းၶီႇမႃႉလႂ်ၸိူဝ်းၼၼ်ႉၸိူဝ်ႉၼင်ႇႁိုဝ်။
၂၅ ဢၶႂၢင်ႉထႃႇဝရႃႉၽြႃးယင်းဢမ်ႇမီးလႄႈၵဝ်မႃးႁႂ်ႈလႆႈယႃႉတီႈၼႆႉပႅတ်ႈႁိုဝ်။ထႃႇဝရႃႉၽြႃးမီးဢမိင်ႉတီႈၵဝ်လႄႈဝႃႈ၊-ၶီႇသိုၵ်းၶိုၼ်ႈၸူးၵႃႈတီႈမိူင်းၼၼ်ႉသေလႄႈယႃႉပႅတ်ႈတႃႉ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
၂၆ မိူဝ်ႈၼၼ်ႉဢေးလျႃႇၵိမ်ႇလုၵ်ႈၸၢႆးႁိလၵိ၊သေႇပၼ၊ယေႃႇဢႃႇ၊ၸိူဝ်းၼၼ်ႉလၢတ်ႈတီႈရႃႇပသႃႇၶလႄႈဝႃႈ၊-ဢဝ်ၽႃႇသႃႇၵႂၢမ်းဢႃႇရမိသေလႄႈမီးဢမိင်ႉတီႈၶႃႈၸဝ်ႈႁဝ်းၸိူဝ်းၼႆႉသေၵမ်း။ၶႃႈၸဝ်ႈႁဝ်းၸိူဝ်းၼႆႉႁူႉၵႂၢမ်းၼၼ်ႉယူႇၶႃႈဢေႃႈ။ယႃႇပေဢဝ်ၽႃႇသႃႇၵႂၢမ်းယုတမီးဢမိင်ႉတီႈၶႃႈၸဝ်ႈႁဝ်းၸိူဝ်းၼႆႉႁႂ်ႈႁွတ်ႈထိုင်ႁူၶဝ်ၸိူဝ်းဢၼ်မီးယူႇၵႃႈၼိူဝ်လမ်းဝဵင်းၼၼ်ႉသေၵမ်း၊ဝႃႈၼင်ႇၼႆလႄႈရႃႇပသႃႇၶလၢတ်ႈတီႈၶဝ်လႄႈဝႃႈ၊-
၂၇ ၸဝ်ႈၵဝ်ပွႆႇၸႂ်ႉၵဝ်မႃးႁႂ်ႈၵဝ်လႆႈဢဝ်ၵႂၢမ်းၼႆႉလၢတ်ႈတေႃႇၵၼ်တင်းၸဝ်ႈမႂ်းတင်းမႂ်းၵူၺ်းႁိုဝ်။မၼ်းၸဝ်ႈပွႆႇၸႂ်ႉၵဝ်မႃးၵႃႈတီႈၶဝ်ၸိူဝ်းဢၼ်ၼင်ႈယူႇၵႃႈၼိူဝ်လမ်းဝဵင်းႁႂ်ႈၶဝ်လႆႈၵိၼ်ၽၢႆႈလူင်ၶဝ်လႄႈသူတ်ႉၽၢႆႈဢွၼ်ႇၶဝ်လူၺ်ႈၵၼ်တင်းသူၸိူဝ်းၼႆႉဢမ်ႇၸႂ်ႈႁိုဝ်၊ဝႃႈၼင်ႇၼႆသေယဝ်ႉ၊
၂၈ ၸွမ်ႈသိုၵ်းၼၼ်ႉၸုၵ်းသေလႄႈဢဝ်ၽႃႇသႃႇၵႂၢမ်းယုတႁဵတ်းတင်းသဵင်ဢၼ်ယႂ်ႇၼႃႇႁွင်ႉပၢဝ်ႇလႄႈဝႃႈ၊-ဢွၼ်ဢၼ်ထွမ်ႇငိၼ်းဢမိင်ႉၸဝ်ႈမႁႃႇၶုၼ်လူင်ၶုၼ်ႁေႃၶမ်းဢႃႇသုရိသေၵမ်း။
၂၉ ၶုၼ်ႁေႃၶမ်းမီးဢမိင်ႉလႄႈဝႃႈၸမ်း၊-ယႃႇပေႁႂ်ႈႁေႇၸၵိလႆႈပႅတ်ႉလႅၼ်သူ။မၼ်းဢမ်ႇတတ်ႈၼိုင်ႇလႆႈႁႂ်ႈလႆႈၵႄႇသႄႇၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းၵဝ်။ယႃႇပေႁႂ်ႈႁေႇၸၵိႁႂ်ႈသူဢိင်ပိုင်ႈထႃႇဝရႃႉၽြႃးသေလႄႈလၢတ်ႈဝႃႈ၊-
၃၀ ထႃႇဝရႃႉၽြႃးတၵ်းၵႄႇသႄႇၼုၵ်ႈဢဝ်ႁဝ်းဢွၵ်ႇဢမၢၼ်ႇၶၢၼ်ပဵၼ်လႄႈဝဵင်းၼႆႉတၵ်းဢမ်ႇလႆႈႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းဢႃႇသုရိၵူၺ်း၊ဝႃႈၼင်ႇၼႆသေၵမ်း။
၃၁ ယႃႇပေထွမ်ႇဢဝ်ၵႂၢမ်းႁေႇၸၵိသေၵမ်း။ၶုၼ်ႁေႃၶမ်းဢႃႇသုရိမီးဢမိင်ႉလႄႈဝႃႈၸမ်း၊-ႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းၵဝ်သေလႄႈဢွၼ်ၵၼ်ဢွၵ်ႇမႃးၸူးတီႈၵဝ်လႄႈၵူႈၵေႃႉၵူႈၵူၼ်းၵိၼ်မၢၵ်ႇၵႃႈတီႈတူၼ်ႈမၢၵ်ႇၸပိတ်ႉမၼ်းယူႇ၊မၢၵ်ႇလိူဝ်ႇသၢင်းၽေႃးၵႃႈတီႈတူၼ်ႈမၢၵ်ႇလိူဝ်ႇသၢင်းၽေႃးမၼ်းယူႇသေလႄႈသူတ်ႉၵိၼ်ၼမ်ႉၵႃႈတီႈၼမ်ႉၼွင်မၼ်းႁင်းၽႂ်ႁင်းမၼ်းယူႇ၊
၃၂ တေႃႇထိုင်ႁွတ်ႈၵဝ်မႃးလႄႈဢဝ်သူၵႂႃႇသူင်ႇၵႃႈတီႈမိူင်းဢၼ်မိူၼ်ၸိူဝ်ႉၼင်ႇမိူင်းသူဢၼ်ဝႃႈမိူင်းဢၼ်တဵမ်ဝႆႉတင်းၶဝ်ႈပိူၵ်ႈၶဝ်ႈသၢၼ်ၼမ်ႉၸပိတ်ႉ၊မိူင်းဢၼ်တဵမ်ဝႆႉတင်းၶဝ်ႈမုၼ်းတင်းသူၼ်ဢူးယဵၼ်ႇၸပိတ်ႉ၊မိူင်းဢၼ်တဵမ်ဝႆႉတင်းၼမ်ႉမၼ်းသၢၼ်ႇလုၼ်ႇတင်းၼမ်ႉၽိုင်ႈၼၼ်ႉႁႂ်ႈသူဢမ်ႇလႆႈတၢႆလႄႈဢသၢၵ်ႈတၵ်းလိပ်းယူႇၼၼ်ႉတႃႉ။
၃၃ ယႃႇပေထွမ်ႇဢဝ်ၵႂၢမ်းႁေႇၸၵိမိူဝ်ႈဢၼ်မၼ်းတိုၵ်းယူင်းၸူဝ်းဢဝ်သူလႄႈဝႃႈ၊-ထႃႇဝရႃႉၽြႃးတၵ်းၵႄႇသႄႇၼုၵ်ႈဢဝ်ႁဝ်းဢွၵ်ႇဢေႃႈ၊ဝႃႈၼင်ႇၼႆၼၼ်ႉသေၵမ်း။ၽြႃးၵူႈသိုင်ႇၵူႈမိူင်းသေၸဝ်ႈသေပႃးယၢမ်ႈၵႄႇသႄႇၼုုၵ်ႈဢဝ်မိူင်းတူဝ်ၸဝ်ႈၵဝ်ႇဢွၵ်ႇသေၵႃႈၼႂ်းမိုဝ်းၶုၼ်ႁေႃၶမ်းဢႃႇသုရိယဝ်ႉႁိုဝ်။
၃၄ ၽြႃးမိူင်းႁႃႇမတ်ႉဢိၵ်ႇတင်းမိူင်းဢႃႇပတ်ႉၸိူဝ်းၼၼ်ႉမီးၵႃႈလႂ်။ၽြႃးမိူင်းသေႇၽရဝိမ်ႇ၊မိူ်င်းႁေႇၼ၊မိူင်းဢိဝႃႇၸိူဝ်းၼၼ်ႉမီးၵႃႈလႂ်။ၶဝ်ၼၼ်ႉၵႄႇသႄႇၼုၵ်ႈဢဝ်မိူင်းသမႃႇရိလွတ်ႈသေၵႃႈၼႂ်းမိုဝ်းၵဝ်ယဝ်ႉႁိုဝ်။
၃၅ ၼႂ်းၽြႃးၵူႈသိုင်ႇၵူႈမိူင်းၼၼ်ႉၽြႃးသူႇလႂ်ပႃးလႂ်ယၢမ်ႈတွၼ်ႉၵႄႇသႄႇၼုၵ်ႈဢဝ်မိူင်းတူဝ်ၸဝ်ႈၵဝ်ႇလွတ်ႈသေၵႃႈၼႂ်းမိုဝ်းၵဝ်လႄႈထႃႇဝရႃႉၽြႃးတၵ်းၵႄႇသႄႇၼုၵ်ႈဢဝ်ဝဵင်းယေႇရုသလႅမ်ႇလွတ်ႈသေၵႃႈၼႂ်းမိုဝ်းၵဝ်၊ဝႃႈၼင်ႇၼႆဢေႃႈ။
၃၆ ၵူၺ်းၵႃႈၵူၼ်းတင်းလၢႆၸိူဝ်းၼၼ်ႉဢမ်ႇတၵ်းသဵင်လႄႈဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်း။လွင်ႈမၼ်းၸမ်းၶုၼ်ႁေႃၶမ်းမီးဢမိင်ႉဝႆႉဝႃႈ၊-ယႃႇပေၶိုၼ်းလၢတ်ႈ၊ဝႃႈၼင်ႇၼႆဢေႃႈ။
၃၇ မိူဝ်ႈၼၼ်ႉဢေးလျႃႇၵိမ်ႇလုၵ်ႈၸၢႆးႁိလၵိၵေႃႉဢၼ်ဢုပ်ႉၵႃႈၼိူဝ်ႁေႃၶမ်းဢိၵ်ႇတင်းၸရေးလူင်သေႇပၼ၊ဢတႂၢင်းဝုၼ်ႇယေႃႇဢႃႇလုၵ်ႈၸၢႆးဢႃႇသပ်ႉၸိူဝ်းၼၼ်ႉၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇသေလႄႈၶိုၼ်းမႃးၸူးၵႃႈတီႈႁေႇၸၵိလႄႈဢဝ်ၵႂၢမ်းၸွမ်ႈသိုၵ်းၼၼ်ႉၶိုၼ်းလဝ်ႈလၢတ်ႈဢေႃႈ။