Chapter
၂၅
ဝဵင်းယေႇရုသလႅမ်ႇတူၵ်းသုမ်း
၁ ၼႂ်းပီႊဢၼ်မၼ်းၸၢမ်ႇႁၢင်ႈၸၢမ်ႇႁေႃၵဝ်ႈပီႊလိူၼ်တသမသိပ်းဝၼ်းၼၼ်ႉၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇၼၼ်ႉပႃးဢဝ်တင်းႁူဝ်သိုၵ်းမၼ်းတင်းသဵင်ႈတင်းလူင်သေလႄႈၶီႇသိုၵ်းမႃးၵႃႈတီႈဝဵင်းယေႇရုသလႅမ်ႇလႄႈၶျႃးတပ်ႉယူႇၽၢႆႇၼိုင်ႈတင်းဝဵင်းသေယဝ်ႉ
၂ တႄႇႁဵတ်းလၢင်းၸီႈၵႃႈတီႈႁိမ်းႁွမ်းဝဵင်းသေလႄႈလွမ်ႉဝဵင်းဝႆႉတေႃႇထိုင်ႁွတ်ႈၸေႇတၵိၸၢမ်ႇႁၢင်ႈၸၢမ်ႇႁေႃလႆႈသိပ်းဢဵတ်းပီႊၼၼ်ႉဢေႃႈ။
၃ ၼႂ်းလိူၼ်ၸတုၵ်ႉထၵဝ်ႈဝၼ်းၼၼ်ႉ၊ၵႃႈၼႂ်းဝဵင်းၼၼ်ႉတၢင်းၵိၼ်တၢင်းၶူပ်းၵႃႈပႅင်းၼႃႇလူင်လၢင်ထၼ်ႈပေႃးဢမ်ႇမီးတၢင်းၵိၼ်တၢင်းၶူပ်းပုၼ်ႈၵူၼ်းဝဵင်းတင်းလၢႆဢေႃႈ။
၄ မိူဝ်ႈၼၼ်ႉၶဝ်ယႃႉလမ်းဝဵင်းသေယဝ်ႉႁူဝ်ႁၢၼ်ၵူၼ်းသိုၵ်းတင်းၵူၼ်းဝဵင်းတင်းသဵင်ႈတင်းလူင်ဢွၼ်ၵၼ်ဢွၵ်ႇပၢႆႇၶိင်ႇၵၢင်ၶိုၼ်းၸွမ်းသဵၼ်ႈတၢင်းၽၵ်းတူၵႄႈလမ်းဝဵင်းသွင်ထၢပ်ႈၵႃႈတီႈႁိမ်းသူၼ်ဢူးယဵၼ်ႇၶုၼ်ႁေႃၶမ်းဢေႃႈ။ၵူၼ်းၶႃႇလတေႇတင်းလၢႆၵေႃႈလွမ်ႉဝဵင်းဝႆႉယူႇဢေႃႈ။ၶုၼ်ႁေႃၶမ်းပၢႆႈၸွမ်းသဵၼ်ႈတၢင်းဢၼ်ၵႂႃႇၸူးၵႃႈတီႈပၢင်ႇပဵင်းဢႃႇရၽႃႇဢေႃႈ။
၅ တပ်ႉၵူၼ်းၶႃႇလတေႇၸိူဝ်းၼၼ်ႉလိုပ်ႈၸွမ်းၶုၼ်ႁေႃၶမ်းလႄႈၶိုတ်းမၼ်းၵႃႈၼႂ်းပၢင်ႇပဵင်းယေႇရိၶုဝ်းဢေႃႈ။ႁူဝ်ႁၢၼ်ၵူၼ်းသိုၵ်းမၼ်းတင်းသဵင်ႈတင်းလူင်ၸိူဝ်းၼၼ်ႉၽူင်ႉပၢႆႈၽၢတ်ႇၽႄၵၼ်တင်းမၼ်းၵႂႃႇဢေႃႈ။
၆ ၶဝ်ဢွၼ်ၵၼ်တီႉဢဝ်ၶုၼ်ႁေႃၶမ်းလႄႈဢဝ်ၵႂႃႇၸူးၵႃႈတီႈၶုၼ်ႁေႃၶမ်းပႃႇပုလုၼ်ႇၵႃႈတီႈဝဵင်းရိပလသေလႄႈဢွၼ်ၵၼ်ၸႅတ်ႈထၢမ်ၸီႇယၢင်ႇဢမူႉမၼ်းဢေႃႈ။
၇ ၶဝ်ဢဝ်လုၵ်ႈၸၢႆးၸေႇတၵိတင်းလၢႆတၢႆသိုဝ်ႈၼႃႈတႂ်ႈတႃမၼ်းလႄႈၶွၵ်းမၢၵ်ႇတႃၸေႇတၵိပႅတ်ႈသေယဝ်ႉဢဝ်ၸိူၵ်ႈတွင်းလိူင်မတ်ႉၽုၵ်ႇမၼ်းသေလႄႈဢဝ်မၼ်းၵႂႃႇၵႃႈတီႈဝဵင်းပႃႇပုလုၼ်ႇဢေႃႈ။
၈ ၼႂ်းပီႊဢၼ်ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ၸၢမ်ႇႁၢင်ႈၸၢမ်ႇႁေႃသိပ်းၵဝ်ႈပီႊၼႂ်းလိူၼ်ပိၼ်ႇၸမၸဵတ်းဝၼ်းၼၼ်ႉၼေႇပုၸႃႇရတၼ်ႇဢၼ်ပဵၼ်ၸွမ်ႈသိုၵ်းလူင်ၶုၼ်ႁေႃၶမ်းပႃႇပုလုၼ်ႇၼၼ်ႉမႃးၵႃႈတီႈဝဵင်းယေႇရုသလႅမ်ႇသေလႄႈ
၉ ဢဝ်ၽႆးတုတ်ႇႁိူၼ်းထႃႇဝရႃႉၽြႃးဢိၵ်ႇတင်းႁေႃၸဝ်ႈပႅတ်ႈလႄႈႁိူၼ်းဝဵင်းယေႇရုသလႅမ်ႇၵႃႈမီးဢၼ်ဝႃႈႁိူၼ်းယႂ်ႇႁိူၼ်းလူင်တင်းသဵင်ႈတင်းလူင်ၵေႃႈဢဝ်ၽႆးတုတ်ႇပႅတ်ႈဢေႃႈ။
၁၀ တပ်ႉၵူၼ်းသိုၵ်းၶႃႇလတေႇဢၼ်ပႃးၸွမ်ႈသိုၵ်းမႃးၸိူဝ်းၼၼ်ႉဢွၼ်ၵၼ်ၵိူၼ်ႇယႃႉလမ်းဝဵင်းယေႇရုသလႅမ်ႇၵႃႈမီးပႅတ်ႈဢေႃႈ။
၁၁ မိူဝ်ႈၼၼ်ႉၸွမ်ႈသိုၵ်းၼေႇပုၸႃႇရတၼ်ႇၼၼ်ႉသိမ်းဢဝ်ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇယူႇၵႃႈၼႂ်းဝဵင်းလႂ်ၶဝ်ၸိူဝ်းဢၼ်ၵႂႃႇၶဝ်ႈလႄႈယူႇၽၢႆႇၶုၼ်ႁေႃၶမ်းပႃႇပုလုၼ်ႇလႂ်တင်းမုၵ်ႉၵူၼ်းၸိူဝ်းၵူၼ်းၵႃႈဢၼ်ယင်းၵိုတ်းယင်းၵျၢၼ်ႇလႂ်ၸိူဝ်းၼၼ်ႉၵႂႃႇဢေႃႈ။
၁၂ ၼႂ်းဝႃႈၼၼ်သေၵေေႃႈၸွမ်ႈသိုၵ်းၼၼ်ႉဝႆႉၵိုတ်းၵူၼ်းယၢၵ်ႈၵူၼ်းၽၢၼ်ၵမ်ႈၽွင်ႈႁႂ်ႈပဵၼ်ၵေႃႉဢၼ်လုမ်းလႃးသူၼ်ဢူးယဵၼ်ႇၸပိတ်ႉၵေႃႉဢၼ်ႁဵတ်းႁႆႊႁဵတ်းၼႃးဢေႃႈ။
၁၃ ၶုၼ်ၶႃႇလတေႇၸိူဝ်းၼၼ်ႉဢွၼ်ၵၼ်ဢဝ်သဝ်တွင်းလိူင်ဢၼ်မီးၵႃႈၼႂ်းႁိူၼ်းထႃႇဝရႃႉၽြႃးလႂ်ၶူင်ႇလႂ်ၼမ်ႉၼွင်တွင်းလိူင်လႂ်ဢၼ်မီးၵႃႈၼႂ်းႁိူၼ်းထႃႇဝရႃႉၽြႃးၸိူဝ်းၼၼ်ႉႁၵ်းႁိၵ်းပႅတ်ႈလႄႈဢဝ်တွင်းလိူင်ၼၼ်ႉၵႂႃႇၵႃႈတီႈဝဵင်းပႃႇပုလုၼ်ႇဢေႃႈ။
၁၄ ၸႃႉၸဵမ်မေႃႈလႂ်၊ၸေႃႉၽႅပ်ႉလႂ်၊ၵိမ်းၵိပ်ၽႆးလႂ်၊ၸေႃႉလႂ်၊ၶိူင်ႈတွင်းလိူင်ပုၼ်ႈဢၼ်တၵ်းပွင်ဢမူႉၸဝ်ႈၵႃႈမီးၼၼ်ႉၵေႃႈၶဝ်ဢွၼ်ၵၼ်ဢဝ်ၵႂႃႇဢေႃႈ။
၁၅ လၢင်ႇပၢၼ်းလႂ်ဝၢၼ်ႇလႂ်ဢၼ်ဝႃႈၶိူင်ႈၶမ်း၊ၶိူင်ႈငိုၼ်းၸိူဝ်းၼၼ်ႉၸိုင်ပဵၼ်ၶမ်းသေဢမ်ႇဝႃႈ၊ပဵၼ်ငိုၼ်းသေဢမ်ႇဝႃႈ၊ၸွမ်ႈသိုၵ်းၼၼ်ႉဢဝ်ၵႂႃႇဢေႃႈ။
၁၆ တွင်းလိူင်ဢၼ်ပႃးၵႃႈတီႈသဝ်သွင်လႅမ်ႈၼမ်ႉၼွင်ဢၼ်ၼိုင်ႈ၊ၶူင်ႇတင်းလၢႆဢၼ်သေႃးလမုၼ်ႇႁဵတ်းပုၼ်ႈႁိူၼ်းထႃႇဝရႃႉၽြႃးၼၼ်ႉၸိူဝ်းၼၼ်ႉၵေႃႈဢဝ်ၵႂႃႇဢေႃႈ။ၶၼ်ၸင်ႊၶိူင်ႈတွင်းလိူင်ၵႃႈမီးၸိူဝ်းၼၼ်ႉဢမ်ႇႁူႉမီးၼမ်ၼႃႇဢေႃႈ။
၁၇ တၢင်းသုင်သဝ်ၼၼ်ႉၸမ်းမီးသိပ်းပႅတ်ႇသွၵ်ႇလႄႈၵႃႈၼိူဝ်မၼ်းမီးႁူၵ်းသဝ်တွင်းလိူင်ဢေႃႈ။တၢင်းဢၼ်သုင်ႁူဝ်သဝ်ႈၼၼ်ႉၸမ်းမီးသၢမ်သွၵ်ႇလႄႈၵႃႈတီႈလဵပ်ႈႁွပ်ႈႁူဝ်သဝ်ၼၼ်ႉတဵမ်ဝႆႉတင်းတႃၶႄဢိၵ်ႇတင်းမၢၵ်ႇၸင်ႊတင်းလၢႆဢၼ်ပဵၼ်တွင်းလိူင်ၵူၺ်းၵူၺ်းၼၼ်ႉသေလႄႈသဝ်တၢင်ႇလႅမ်ႈၼၼ်ႉၵေႃႈပဵၼ်မိူၼ်ၸိူဝ်ႉၼင်ႇၼၼ်ႈလႄႈတဵမ်ဝႆႉတင်းတႃၶႄဢေႃႈ။
၁၈ ၸွမ်ႈသိုၵ်းၼၼ်ႉတီႉဢဝ်ယိတ်ႉႉပရေႃးႁိၵ်ႈလူင်ၸရႃႇယယိတ်ႉပရေႃးႁိၵ်ႈဢွၼ်ႇၸေႇၽၼိဢိၵ်ႇတင်းၽူႈပႂ်ႉၽၵ်းတူၸဝ်ႈသၢမ်ၵေႃႉၸိူဝ်းၼၼ်ႉဢေႃႈ။
၁၉ မၼ်းၼၼ်ႉႁွင်ႉဢဝ်ႁူဝ်သိုၵ်းဢၼ်ဢုပ်ႉၵႃႈၼိူဝ်ၵူၼ်းသိုၵ်းတင်းလၢႆၼၼ်ႉၵေႃႉၼိုင်ႈမူးမၢတ်ႈၽွင်းမိူင်းဢၼ်ယၢမ်ႈလႆႈႁၼ်ၼႃႈၶုၼ်ႁေႃၶမ်းဢၼ်ၶဝ်ထူပ်းႁၼ်ၵႃႈၼႂ်းဝဵင်းၼၼ်ႉႁႃႈၵေႃႉ၊ၸရေးလူင်ဢၼ်ဝႃႈႁူဝ်သိုၵ်း
၂၀ ဢၼ်လႆႈမၢတ်ႈလႆႈမၢႆၸရၢင်းၵူၼ်းဝၢၼ်ႈၵူၼ်းမိူင်းဢၼ်ထူပ်းမႅၼ်ႈၵႃႈၼႂ်းဝဵင်းႁူၵ်းသိပ်းၵေႃႉၸိူဝ်းၼၼ်ႉလႄႈၼေႇပုၸႃႇရတၼ်ႇဢၼ်ပဵၼ်ၸွမ်ႈသိုၵ်းၼၼ်ႉဢဝ်ၶဝ်ၵႂႃႇသူင်ႇတီႈၶုၼ်ႁေႃၶမ်းပႃႇပုလုၼ်ႇၵႃႈတီႈဝဵင်းရိပလသေလႄႈၶုၼ်ႁေႃၶမ်းပႃႇပုလုၼ်ႇၼၼ်ႉပၼ်တၢမ်ႇတီႈၶဝ်ၼၼ်ႉလႄႈဢဝ်ၶဝ်တၢႆၵႃႈတီႈဝဵင်းရိပလမိူင်းႁႃႇမတ်ႉၼၼ်ႉဢေႃႈ။
၂၁ ၼင်ႇၼၼ်လႄႈမဵဝ်းယုတၼၼ်ႉလႆႈၶၢမ်ႇတၢင်းဢၼ်သိမ်းဢဝ်ဢွၵ်ႇသေၵႃႈၼႂ်းမိူင်းၶဝ်ၵႂႃႇဢေႃႈ။
၂၂ မၼ်းၶၢၼ်းၵေႇတလိလုၵ်ႈၸၢႆးဢႁိၵမ်ႇဢၼ်ပဵၼ်လုၵ်ႈၸၢႆးသႃႇၽၼ်ႇၼၼ်ႉဝႆႉၵႃႈၼႂ်းဢရႃႇၶုၼ်ဢၼ်လႆႈဢုပ်ႉၵႃႈၼိူဝ်ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇယူႇၵႃတီႈမိူင်းယုတဢၼ်ၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇဝႆႉၵိုတ်းဝႆႉၵျၢၼ်ႇဝႆႉၸိူဝ်းၼၼ်ႉဢေႃႈ။
၂၃ မိူဝ်ႈဢၼ်တပ်ႉတင်းသဵင်ႈတင်းလူင်ဢိၵ်ႇတင်းႁူဝ်ႁၢၼ်ၵူၼ်းသိုၵ်းၶဝ်ၼၼ်ႉလႆႈႁူႉငိၼ်းလွင်ႈဢၼ်ၶုၼ်ႁေႃၶမ်းပႃႇပုလုၼ်ႇၶၢၼ်းၵေႇတလိဝႆႉၵႃႈၼႂ်းဢရႃႇၶုၼ်ၼၼ်ႉၸိုင်ၶဝ်ဢွၼ်ၵၼ်ၵႂႃႇၸူးဢိသမေႇလဢၼ်ပဵၼ်လုၵ်ႈၸၢႆးၼႃႇသၼိယေႃႇႁၼၼ်ႇဢၼ်ပဵၼ်လုၵ်ႈၸၢႆးၵႃႇရႃႇ၊ၸရႃႇယဢၼ်ပဵၼ်လုၵ်ႈၸၢႆးတႃႇၼုမိတ်ႉမဵဝ်းၼေႇတေႃႇၽတ်ႉ၊ယေႇၸၼဢၼ်ပဵၼ်ၵူၼ်းမဵဝ်းမႃႇၶသိဢိၵ်ႇလူၺ်ႈၵၼ်တင်းၵူၼ်းၶဝ်ၼၼ်ႉၵႃႈတီႈဝဵင်းမိၸပႃႇဢေႃႈ။
၂၄ ၵေႇတလိၼၼ်ႉတိူင်ႇဝႃႈၵိၼ်ႇဝႃႈတီႈၶဝ်ဢိၵ်ႇတင်းၵူၼ်းၶဝ်ၸိူဝ်းၼၼ်ႉလႄႈဝႃႈ၊-သူယႃႇပေဢွၼ်ၵၼ်မႆႈၸႂ်ၶီၸႂ်လူၺ်ႈလွင်ႈၶႃႈၵူၼ်းၶုၼ်ၶႃႇလတေႇၸိူဝ်းၼၼ်ႉ။ဢွၼ်ၵၼ်ယူႇၵႃႈတီႈမိူင်းၼႆႉလႄႈၵိုတ်းႁၢပ်ႇဢမူႉၶုၼ်ႁေႃၶမ်းပႃႇပုလုၼ်ႇယူႇတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင်တၵ်းပဵၼ်တၢင်းဢၼ်ၵတ်းယဵၼ်ၶျၢမ်းသႃႇတီႈသူဢေႃႈ၊ဝႃႈၼင်ႇၼႆဢေႃႈ။
၂၅ ၵူၺ်းၵႃႈၼႂ်းလိူၼ်သတ်ႉတမၼၼ်ႉဢိသမေႇလလုၵ်ႈၸၢႆးၼႃႇသၼ်ႇလုၵ်ႈၸၢႆးဢေးလိသမႃႇဢၼ်ပဵၼ်ၸိူဝ်ႉၶိူဝ်းၶုၼ်ၼၼ်ႉပႃးဢဝ်တင်းၵူၼ်းသိပ်းၼိုင်ႈမႃးလႄႈႁဵတ်းတီႈၵေႇတလိဢိၵ်ႇတင်းၵူၼ်းယုတတင်းၶႃႈၵူၼ်းၶႃႇလတေႇဢၼ်မီးၵႃႈတီႈၵေႇတလိၵႃႈၼႂ်းဝဵင်းမိၸပႃႇၸိူဝ်းၼၼ်ႉထၼ်ႈပေႃးတၢႆဢေႃႈ။
၂၆ မိူဝ်ႈၼၼ်ႉၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်လဵၵ်ႉလဵၵ်ႉယႂ်ႇယႂ်ႇဢိၵ်ႇတင်းႁူဝ်သိုၵ်းတင်းလၢႆဢွၼ်ၵၼ်လုၵ်ႉလႄႈၵႂႃႇၵႃႈတီႈမိူင်းဢေႇၵႅပ်ႉတုၵွပ်ႈပိူဝ်ႈၶဝ်ၵူဝ်ႁႄၵူၼ်းၶႃႇလတေႇၸိူဝ်းၼၼ်ႉဢေႃႈ။
၂၇ ၼႂ်းပီႊဢၼ်ယေႇၶေႃးၼိၶုၼ်ႁေႃၶမ်းယုတလႆႈၶၢမ်ႇတၢင်းဢၼ်ၶျုၵ်ႈဝႆႉသၢမ်သိပ်းပၢႆၸဵတ်းပီႊလိူၼ်တႂႃႇတသမသၢဝ်းပၢႆၸဵတ်းဝၼ်းၼၼ်ႉဢေးဝိမႁေႃႇတၵ်ႉပဵၼ်ၶုၼ်ႁေႃၶမ်းပႃႇပုလုၼ်ႇလႄႈမၼ်းၼုၵ်ႈဢဝ်ယေႇၶေႃးၼိၶုၼ်ႁေႃၶမ်းယုတဢွၵ်ႇသေၵႃႈၼႂ်းထွင်ႇသေယဝ်ႉပၼ်ၵတ်းယဵၼ်ၶျၢမ်းသႃႇၼႂ်းပီႊဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉလႄႈ
၂၈ တၵ်ႉလၢတ်ႈၵၼ်တင်းမၼ်းလီလီငၢမ်းငၢမ်းသေလႄႈယုၵ်ႉယွင်ႈပလၢင်ႇမၼ်းဝႆႉသုင်သပလေၢင်ႇၶုၼ်လူင်တင်းလၢႆဢၼ်မီးလူၺ်ႈၵၼ်တင်းမၼ်းၵႃႈၼႂ်းဝဵင်းပႃႇပုလုၼ်ႇၼၼ်ႉဢေႃႈ။
၂၉ မၼ်းလႆႈပုတ်ႈလႆႈလၢႆႈၶူဝ်းၼုင်ႈဢၼ်မၼ်းၼုင်ႈၵႃႈၼႂ်းထွင်ႇၼၼ်ႉသေလႄႈလႆႈၵိၼ်လႆႈၶူပ်းၵႃႈတီႈၽၢႆႇၼႃႈၶုၼ်ၼၼ်ႉၸူဝ်ႈဢၼ်ဢသၢၵ်ႈမၼ်းယင်းယၢဝ်းယိုၼ်းယူႇၼၼ်ႉဢေႃႈ။
၃၀ ပုၼ်ႈတႃႇဢၼ်မၼ်းတၵ်းၵိၼ်တၵ်းၶူပ်းၼၼ်ႉၸမ်းၶုၼ်ႁေႃၶမ်းဢိတ်းလူပၼ်ၵူႈဝၼ်းတႃႇသေႇၸူဝ်ႈဢၼ်ဢသၢၵ်ႈမၼ်းယၢဝ်းယိုၼ်းယူႇၼၼ်ႉဢေႃႈ။