Chapter
၂၄
၁ ၼႂ်းၸူဝ်ႈပၢၼ်မၼ်းၼၼ်ႉေၼႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇၶီႇသိုၵ်းမႃးလႄႈယေႃးယၵိမ်ႇၼၼ်ႉၶၢမ်ႇႁဵတ်းၶႃႈတီႈမၼ်းသၢမ်ပီႊသေယဝ်ႉသမ်ႉၶိုၼ်းလုၵ်ႉၽိုၼ်ႉဢေႃႈ။
၂ ထႃႇဝရႃႉၽြႃးပွႆႇၸႂ်ႉၵူၼ်းတပ်ႉၶႃႇလတေႇ၊ၵူၼ်းတပ်ႉသုရိ၊ၵူၼ်းတပ်ႉမေႃႇၽ၊ၵူၼ်းတပ်ႉဢမ်ႇမုၼ်ႇဢၼ်ပဵၼ်မုၵ်ႉပဵၼ်ၸိူဝ်းႁင်းၽႂ်ႁင်းမၼ်းၸိူဝ်းၼၼ်ႉၶီႇသိုၵ်းၸူးတီႈမၼ်းလႄႈႁႂ်ႈၶဝ်မႃးယႃႉၽဵဝ်ႈပႅတ်ႈမိူင်းယုတၸွမ်းၵႃႈၼင်ႇၵႂၢမ်းထႃႇဝရႃႉၽြႃးဢၼ်မၼ်းၸဝ်ႈဢဝ်ၶႃႈမၼ်းၸဝ်ႈပရေႃးၽႅတ်ႈတင်းလၢႆလႄႈမီးဢမိင်ႉဝႆႉၼၼ်ႉဢေႃႈ။
၃ ၸွမ်းလူၺ်ႈဢမိင်ႉထႃႇဝရႃႉၽြႃးၼၼ်ႉဢမူႉၼႆႉတူၵ်းႁွတ်ႈၵႃႈၼိူဝ်မဵဝ်းယုတဢမၢၼ်ႇၶၼ်ပဵၼ်ႁႂ်ႈလႆႈပႄႇၶဝ်ပႅတ်ႈသေၵႃႈတီႈသိုဝ်ႈၼႃႈတႂ်ႈတႃမၼ်းၸဝ်ႈၵွပ်ႈပိူဝ်ႈဢပျႅတ်ႈမၼႃႇသေႇဢၼ်မၼ်းႁဵတ်းၵႃႈမီးၼၼ်ႉဢိၵ်ႇတင်းၵွပ်ႈပိူဝ်ႈလိူ်တ်ႈၶဝ်ၸိူဝ်းဢၼ်ဢမ်ႇမီးဢပျႅတ်ႈဢၼ်မၼ်းဢဝ်ထွၵ်ႇပႅတ်ႈၼၼ်ႉဢေႃႈ။
၄ လွင်ႈမၼ်းၸမ်းမၼ်းၼၼ်ႉႁဵတ်းႁႂ်ႈဝဵင်းယေႇရူႉသလႅမ်ႇတဵမ်ဝႆႉတင်းလိူတ်ႈၶဝ်ဢၼ်ဢမ်ႇမီးဢပျႅတ်ႈၼၼ်ႉလႄႈထႃႇဝရႃႉၽြႃးဢမ်ႇမီးဢလူဝ်ႇၶႂ်ႈပွႆႇလွတ်ႈဢပျႅတ်ႈၼၼ်ႉလႃးလႃး။
၅ လွင်ႈတၢင်းယေႃးယၵိမ်ႇဢၼ်ယင်းၵိုတ်းယင်းၵျၢၼ်ႇဢိၵ်ႇတင်းလွင်ႈတၢင်းၵႃႈဢၼ်မၼ်းႁဵတ်းၸိူဝ်းၼၼ်ႉတႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။
၆ ယေႃးသၵိမ်ႇၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈယေႇၶေႃးၼိလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
၇ ၵွပ်ႈပိူဝ်ႈဢၼ်ၶုၼ်ႁေႃၶမ်းပႃႇပုလုၼ်ႇသိမ်းဢဝ်လိၼ်ၵႃႈဢၼ်ၶုၼ်ႁေႃၶမ်းဢေႇၵႅပ်ႉတုပိူင်ႇၸႃႉၸဵမ်ၵႃႈတီႈၼမ်ႉႁွင်ႈဢေႇၵႅပ်ႉတုတေႃႇထိုင်ႁွတ်ႈၼမ်ႉႁွင်ႊလူင်ဢုၽရတ်ႉၼၼ်ႉလႄႈလိုၼ်းၼၼ်ႉၶုၼ်ႁေႃၶမ်းဢေႇၵႅပ်ႉတုဢမ်ႇလႆႈၶီႇလႆႈဢွၵ်ႇသေၵႃႈၼႂ်းမိူင်းမၼ််းၼၼ်ႉလႃးလႃး။
ယေႇၶေႃးၼိၶုၼ်ႁေႃၶမ်းယုတ
၈ ယေႇၶေႃးၼိၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသိပ်းပႅတ်ႇပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသၢမ်လိူၼ်ဢေႃႈ။ၸိုဝ်သဵင်မေႈၸဝ်ႈၸမ်းပဵၼ်ၼႁုတ်ႉတလုၵ်ႈယိင်းဢေးလၼႃႇသၼ်ႇၵူၼ်းဝဵင်းယေႇရုသလႅမ်ႇၼၼ်ႉဢေႃႈ။
၉ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ်ၸဝ်ႈပေႃႈမၼ်းႁဵတ်းၵႃႈမီးၼၼ်ႉဢေႃႈ။
၁၀ မိူဝ်ႈၼၼ်ႉၶႃႈၵူၼ်းၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇတင်းလၢႆဢွၼ်ၵၼ်ၶီႇသိုၵ်းၶိုၼ်ႈၸူးဝဵင်းယေႇရုသလႅမ်ႇလႄႈလွမ်ႉဝဵင်းၼၼ်ႉဝႆႉဢေႃႈ။
၁၁ ၼႂ်းမိူဝ်ႈဢၼ်ၶႃႈၵူၼ်းၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇၸိူဝ်းၼၼ်ႉယင်းတိုၵ်ႉလွမ်ႉဝဵင်းဝႆႉယူႇၼၼ်ႉၸိုင်ၶုၼ်ႁေႃၶမ်းယုတဢိၵ်ႇတင်းမေႈၸဝ်ႈ၊
၁၂ ၶႃႈၸဝ်ႈၵူၼ်းၸဝ်ႈလႂ်၊မူးမၢတ်ႈၽွင်းမိူင်းၸဝ်ႈလႂ်၊ၶဝ်ၸိူဝ်းဢၼ်မီးဢရႃႇလႂ်ၸိူဝ်းၼၼ်ႉဢွၼ်ၵၼ်ဢွၵ်ႇၸူးၵႃႈတီႈၶုၼ်ႁေႃၶမ်းပႃႇပုလုၼ်ႇလႄႈလွမ်းၶုၼ်ႁေႃၶမ်းပႃႇပုလုၼ်ႇဢေႃႈ။ၼႂ်းမိူဝ်ႈဢၼ်ၶုၼ်ႁေႃၶမ်းပႃႇပုလုၼ်ႇႁဵတ်းၶုၼ်ၸဵတ်းပီႊၼၼ်ႉမၼ်းႁႂ်ႈယေႇၶေႃးၼိၶမ်ထွင်ႇဢေႃႈ။
၁၃ မၼ်းသိမ်းဢဝ်ၽၼ်ႇတႃႇႁိူၼ်းထႃႇဝရႃႉၽြႃး၊ၽၼ်ႇတႃႇႁေႃၸဝ်ႈၵႃႈမီးၸိူဝ်းၼၼ်ႉၵႂႃႇလႄႈတႅပ်းယႃႉၶိူင်ႈၶမ်းဢၼ်သေႃးလမုၼ်ႇၶုၼ်ႁေႃၶမ်းဢိသရေႇလႁဵတ်းပုၼ်ႈပိၵ်ႉမၢၼ်ႇထႃႇဝရႃႉၽြႃးၵႃႈမီးၼၼ်ႉၶၢတ်ႇပဵၼ်ပွတ်းပဵၼ်တွၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။
၁၄ မၼ်းၼၼ်ႉသိမ်းဢဝ်ၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်၊မူးမၢတ်ႈၽွင်းမိူင်းတင်းသဵင်ႈတင်းလူင်ၵူၼ်းသိုၵ်းဢၼ်ႁႅင်းယႂ်ႇၼႃႇတင်းသဵင်ႈတင်းလူင်ၵူၼ်းမေႃတိၼ်မေႃမိုဝ်းဢိၵ်ႇတင်းၸၢင်ႈလဵၵ်းတင်းသဵင်ႈတင်းလူင်မိုၼ်ႇၼိုင်ႈဢေႃႈ။ၼွၵ်ႈသေၵူၼ်းဢၼ်ယုတ်ႈဢၼ်တႅမ်ႇၸိူဝ်းၼၼ်ႉဢမ်ႇလႆႈၵိုတ်းလႆႈၵျၢၼ်ႇသေၵေႃႉသေၵူၼ်း။
၁၅ မၼ်းသိမ်းဢဝ်ယေႇၶေႃးၼိၵႂႃႇၵႃႈတီႈဝဵင်းပႃႇပုလုၼ်ႇသေလႄႈမေႈၸဝ်ႈဢိၵ်ႇတင်းၼၢင်းႁေႃၶမ်းတင်းလၢႆၶဝ်ၸိူဝ်းဢၼ်မီးဢရႃႇတင်းလၢႆၵူၼ်းမိူင်းဢၼ်ႁႅင်းယႂ်ႇၼႃႇတင်းလၢႆၸိူဝ်းၼၼ်ႉၵေႃႈမၼ်းသိမ်းဢဝ်ဢွၵ်ႇသေၵႃႈၼႂ်းဝဵင်းယေႇရုသလႅမ်ႇၵႂႃႇၵႃႈတီႈဝဵင်းပႃႇပုလုၼ်ႇဢေႃႈ။
၁၆ ၶုၼ်ႁေႃၶမ်းပႃႇပုလုၼ်ႇသိမ်းဢဝ်ၶဝ်ၸိူဝ်းဢၼ်ႁႅင်းယႂ်ႇၼႃႇဢၼ်တိုၵ်းသိုၵ်းလႆႈၸဵတ်းႁဵင်ၵူၼ်းမေႃတိၼ်မေႃမိုဝ်းလႂ်ဢိၵ်ႇတင်းၸၢင်ႈလဵၵ်းလႂ်ႁဵင်ၼိုင်ႈဢဝ်ၵႂႃႇၵႃႈတီႈဝဵင်းပႃႇပုလုၼ်ႇဢေႃႈ။
၁၇ ၶုၼ်ႁေႃၶမ်းပႃႇပုလုၼ်ႇၼၼ်ႉဢဝ်မတ်ႉသၼိဢၼ်ပဵၼ်ပေႃႈၼႃႉယေႇၶေႃးၼိၼၼ်ႉႁႂ်ႈလႆႈၼင်ႈႁၢင်ႈၼင်ႈႁေႃတၢင်တူဝ်မၼ်းဝႆႉလႄႈတၢင်ႇပၼ်ၸိုဝ်မ်ႂႇဝႃႈၸေႇတၵိဢေႃႈ။
ၸေႇတၵိၶုၼ်ႁေႃၶမ်းယုတ
၁၈ ၸေႇတၵိၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းဢဵတ်းပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသိပ်းဢဵတ်းပီႊဢေႃႈ။
၁၉ ၸိုဝ်ႈသဵင်မေႈၸဝ်ႈၸမ်းပဵၼ်ႁႃႇမုတဢၼ်ပဵၼ်လုၵ်ႈယိင်းယေႇရမိၵူၼ်းဝဵင်းလိပၼၼၼ်ႉဢေႃႈ။မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ်ယေႃႇယၵိမ်ႇႁဵတ်းၵႃႈမီးၼၼ်ႉဢေႃႈ။
၂၀ ၵွပ်ႈပိူဝ်ႈတၢင်းၸႂ်မႆႈၶႆႈၸႃႉထႃႇဝရႃႉၽြႃးၼၼ်ႉလႄႈဢမူႉၼၼ်ႉပဵၼ်ၵႃႈၼႂ်းဝဵင်းယေႇရုသလႅမ်ႇတင်းမိူင်းယုတယူႇတေႃႇထိုင်ႁွတ်ႈထၼ်ႈပေႃးမၼ်းၸဝ်ႈႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈမၼ်းၸဝ်ႈၼၼ်ႉလႄႈၸေႇတၵိၼၼ်ႉလုၵ်ႉၽိုၼ်ႉၶုၼ်ႁေႃၶမ်းပႃႇပုလုၼ်ႇဢေႃႈ။