Chapter
၁၁
ဢႃႇထၼိတင်းယေႃႇသ
၁ ဢႃႇထလိဢၼ်ပဵၼ်ၸဝ်ႈမေႈဢႃႇၶလိၼၼ်ႉမိူဝ်ႈဢၼ်ႁူႉႁၼ်လွင်ႈလုၵ်ႈၸၢႆးမၼ်းတၢႆၼၼ်ႉသေယဝ်ႉၼၼ်ႉၸိုင်မၼ်းယႃႉၽဵဝ်ႈပႅတ်ႈမဵဝ်းၸိူဝ်ႉၶိူဝ်းၶုၼ်ၵႃႈမီးၼၼ်ႉဢေႃႈ။
၂ ၵူၺ်းၵႃႈယေႃႇသေႇၽလုၵ်ႈယိင်းၶုၼ်လူင်ယုဝ်ႇရမ်ႇၼွင်ႉယိင်းဢႃႇၶၸိၼၼ်ႉမၼ်းလၵ်ႉဢဝ်ယေႃႇသဢွၵ်ႇသေၵႃႈၼႂ်းလုၵ်ႈၸၢႆးၸဝ်ႈၶုၼ်ႁေႃၶမ်းဢၼ်တၵ်းလႆႈၶၢမ်ႇဢဝ်တၢႆၸိူဝ်းၼၼ်ႉသေလႄႈသႂ်ႇဝႆႉၵႃႈၼႂ်းလုၵ်းတီႈၼွၼ်းတၢင်းၼႂ်းဢေႃႈ။
၃ ၼင်ႇၼၼ်လႄႈၶဝ်ဢဝ်မၼ်းၼၼ်ႉသိူင်ႇဝႆႉသေၵႃႈတီႈဢႃႇထလိထၼ်ႈပေႃးဢသၢၵ်ႈမၼ်းလႆႈလွတ်ႈဢေႃႈ။လိုၼ်းၼၼ်ႉမၼ်းလႆႈၶၢမ်ႇတၢင်းဢၼ်တဵတ်ႇမႅပ်းယူႇၵႃႈၼႂ်းႁိူၼ်းထႃႇဝရႃႉၽြႃးလူၺ်ႈၵၼ်တင်းပႃႈမၼ်းၼၼ်ႉႁူၵ်းပီႊတဵမ်တဵမ်လႄႈဢႃႇထလိၼၼ်ႉဢုပ်ႉပိူင်ႇၸၢမ်ႇၸႃးမိူင်းယူႇဢေႃႈ။
၄ မိူဝ်ႈဢၼ်ထူၼ်ႈထိုင်ၸဵတ်းပီႊၼၼ်ႉယေႃႇယတပွႆႇၸႂ်ႉၵႂႃႇႁွင်ႉဢဝ်ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇတပ်ႉမူးလႂ်ၵူၼ်းသိုၵ်းဢၼ်ပႂ်ႉႁၢင်ႈပႂ်ႉႁေႃလႂ်ၸိူဝ်းၼၼ်ႉမႃးလႄႈဢဝ်သႂၢင်းၶဝ်ႈၵႃႈၼႂ်းႁိူၼ်းထႃႇဝရႃႉၽြႃးသေလႄႈႁဵတ်းပတိၺိၼ်ႇလူၺ်ႈၵၼ်တင်းၶဝ်တိုၵ်းသႅတ်ႉၸႃႇတီႈၶဝ်ၵႃႈၼႂ်းႁိူၼ်းထႃႇဝရႃႉၽြႃးသေယဝ်ႉဢဝ်လုၵ်ႈၸၢႆးၶုၼ်ႁေႃၶမ်းၼႄပျႃးတီႈၶဝ်ဢေႃႈ။
၅ မၼ်းသင်ႇလၢတ်ႈတီႈၶဝ်လႄႈဝႃႈ၊-လွင်ႈတၢင်းဢၼ်သူတၵ်းလႆႈႁဵတ်းၸမ်းၼႂ်းဝၼ်းၵမ်သိၼ်ၼၼ်ႉသူသၢမ်ပုၼ်ႊပုၼ်ႊၼိုင်ႈတၵ်းလႆႈပႂ်ႉၽၵ်းတူႁေႃၸဝ်ႈဢေႃႈ။
၆ သၢမ်ပုၼ်ႊပုၼ်ႈၼိုင်ႈတၵ်းလႆႈပႂ်ႉၽၵ်းတူသုရဢေႃႈ။သၢမ်ပုၼ်ႊပုၼ်ႊၼိုင်ႈတၵ်းလႆႈပႂ်ႉၽၵ်းတူၵႃႈတီႈၽၢႆႇလင်ၵၢင်တီႈပႂ်ႉၼၼ်ႉဢေႃႈ။ၼင်ႇၼၼ်လႄႈသူတၵ်းလႆႈပႂ်ႉႁိူၼ်းၸဝ်ႈယူႇႁႂ်ႈပဵၼ်ဢၼ်ႁႄႉဢၼ်ၵင်ႈဢေႃႈ။
၇ ၼႂ်းသူသၢမ်ပုၼ်ႊၼၼ်ႉသွင်ပုၼ်ႈဢၼ်ဢမ်ႇလႆႈပႂ်ႉၼႂ်းဝၼ်းၵမ်သိၼ်ၼၼ်ႉတၵ်းလႆႈပႂ်ႉလဵပ်ႈႁွပ်ႈၶုၼ်ႁေႃၶမ်းသူယူႇၵႃႈတီႈႁိူၼ်းထႃႇဝရႃႉၽြႃးဢေႃႈ။
၈ သူတၵ်းလႆႈယိပ်းၵမ်လၢၵ်ႈၼၢၵ်ႈသူၵူႈၵေႃႉၵူႈၵူၼ်းသေလႄႈဢွၼ်ၵၼ်လွမ်ႉလဵပ်ႈႁွပ်ႈၶုၼ်ႁေႃၶမ်းသူယူႇဢေႃႈ။ၶဝ်ၸိူဝ်းဢၼ်ပူၼ်ႉထႅဝ်ၵူၼ်းသိုၵ်းလႄႈၶဝ်ႈမႃးၼၼ်ႉသူတၵ်းလႆႈဢဝ်တၢႆဢေႃႈ။ယၢမ်းမိူဝ်ႈဢၼ်ၶုၼ်ႁေႃၶမ်းၶဝ်ႈဢွၵ်ႇၼၼ်ႉၸိုင်သူတၵ်းလႆႈၸွမ်းလူၺ်ၵၼ်တင်းမၼ်းၸဝ်ႈဢေႃႈ၊ဝႃႈၼင်ႇၼႆဢေႃႈ။
၉ ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇၸိူဝ်းၼၼ်ႉႁဵတ်းၸွမ်းၵႃႈၼင်ႇဢၼ်ယိတ်ႉပရေႃးႁိၵ်ႉယေႃယတသင်ႇလၢတ်ႈဝႆႉၼၼ်ႉလႄႈႁွင်ႉဢဝ်ၶဝ်ၸိူဝ်းဢၼ်တၵ်းလႆႈၶဝ်ႈၼႂ်းဝၼ်းၵမ်သိၼ်ဢိၵ်ႇတင်းၶဝ်ၸိူဝ်းဢၼ်တၵ်းလႆႈဢွၵ်ႇၼႂ်းဝၼ်းၵမ်သိၼ်ႁင်းၽႂ်ႁင်းမၼ်းၼၼ်ႉမႃးလႄႈ
၁၀ ႁွတ်ႈထိုင်ၵႃႈတီႈယိတ်ႉပရေႃးႁိၵ်ႈယေႃႇယတသေယဝ်ႉယိတ်ႉပရေႃးႁိၵ်ႈၼၼ်ႉဢဝ်ႁွၵ်ႇတင်းၶိူင်ႈႁႄႉလၢၵ်ႈၼၢၵ်ႈၶုၼ်လူင်တႃႇဝိတ်ႉဢၼ်မီးၵႃႈၼႂ်းႁိူၼ်းထႃႇဝရႃႉၽြႃးၸိူဝ်းၼၼ်ႉဢွၵ်ႇလႄႈဢၢပ်ႈပၼ်တီႈၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇၸိူဝ်းၼၼ်ႉဢေႃႈ။
၁၁ ၶဝ်ၸိူဝ်းဢၼ်ပႂ်ႉၼၼ်ႉယိပ်းၵမ်လၢၵ်ႈၼၢၵ်ႈႁင်းၽႂ်ႁင်းမၼ်းယူႇသေလႄႈၸုၵ်းယူႇႁိမ်းႁွမ်းယိတ်ႉပလၢင်ႇတင်းႁိူၼ်းၸဝ်ႈၼၼ်ႉဢဝ်ၵႃႈတီႈၸဵင်ႇၽၢႆႇၶႂႃႇႁိူၼ်းၸဝ်ႈတေႃႇထိုင်ႁွတ်ႈၸဵင်ႇၽၢႆႇသၢႆႉႁိူၼ်းၸဝ်ႈလႄႈလွမ်ႉလဵပ်ႈႁွပ်ႈၶုၼ်ႁေႃၶမ်းယူႇဢေႃႈ။
၁၂ ယိတ်ႉပရေႃးႁိၵ်ႈၼၼ်ႉဢဝ်လုၵ်ႈၸၢႆးၶုၼ်ႁေႃၶမ်းဢွၵ်ႇၵႃႈၼွၵ်ႈလႄႈဢဝ်ရႃႇၸႃႉသရၽူႇတိုဝ်းပၼ်သေယဝ်ႉဢဝ်ၵျၢမ်းလိၵ်ႈပိင်းၺၢပ်ႈတိဢၢပ်ႈပၼ်သေလႄႈႁႂ်ႈမၼ်းပဵၼ်ၶုၼ်ႁေႃၶမ်းလႄႈပၼ်ၽိၵ်ႈသိၵ်ႈသေယဝ်ႉဢွၼ်ၵၼ််တူပ်းမိုဝ်းလႄႈႁွင်ႉပၢဝ်ႇလႄႈဝႃႈ၊-ႁႂ်ႈၶုၼ်ႁေႃၶမ်းဢသၢၵ်ႈလိပ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၃ ဢႃႇထလိၼၼ်ႉငိၼ်းသဵင်ဢၼ်ၵူၼ်းသိုၵ်းပႂ်ႉႁၢင်ႈပႂ်ႉႁေႃဢိၵ်ႇတင်းၵူၼ်းတင်းလၢႆႁဵတ်းၼၼ်ႉသေယဝ်ႉၵႂႃႇၸူးၵႃႈတီႈၵူၼ်းတင်းလၢႆၵႃႈၼႂ်းႁိူၼ်းထႃႇဝရႃႉၽြႃးၼၼ်ႉလႄႈ
၁၄ မုင်ႈႁၼ်ၶုၼ်ႁေႃၶမ်းၸုၵ်းယူႇၵႃႈတီႈႁိမ်းသဝ်ၸွမ်းၵႃႈၼင်ႇဢၼ်ထုင်းၸၢမ်ႇမီးၼၼ်ႉလႄႈတပ်ႉမူးတင်းလၢႆဢိၵ်ႇတင်းၶဝ်ၸိူဝ်းဢၼ်ပဝ်ႇတိုင်ႈၼႄးၶရႃႇၼၼ်ႉၸိူဝ်းၼၼ်ႉၸုၵ်းၵႃႈတီႈၶုၼ်ႁေႃၶမ်းယူႇသေလႄႈၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၸူမ်းသိူဝ်းလႄႈပဝ်ႇတိုင်ႈၼႄးၶရႃႇယူႇၼၼ်ႉသေယဝ်ႉဢႃႇထလိၸၵ်ႉသိၵ်ႇၶူဝ်းၼုင်ႈမၼ်းသေလႄႈသႅၼ်ႇႁွင်ႉလႄႈဝႃႈ၊-ပဵၼ်ဢမူႉဢၼ်လုၵ်ႉၽိုၼ်ႉလူင်ပေႇဢမူႉဢၼ်လုၵ်ႉၽိုၼ်ႉလူင်ပေႇ၊ဝႃႈၼင်ႇၼႆဢေႃႈ။
၁၅ ယိတ်ႉပရေႃးႁိၵ်ႈယေႃႇယတၵေႃႈသင်ႇလၢတ်ႈတီႈၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇဢၼ်လႆႈၶၢမ်ႇတၢင်းဢၼ်ၶၢၼ်းဝႆႉၵႃႈၼိူဝ်ပူဝ်ႇပႃႇၸိူဝ်းၼၼ်ႉလႄႈဝႃႈ၊-ဢွၼ်ၵၼ်ဢဝ်မၼ်းဢွၵ်ႇသေၵႃႈၼွၵ်ႈထႅဝ်ၵူၼ်းသိုၵ်းသေလႄႈဢဝ်ၶဝ်ၸိူဝ်းဢၼ်ၸွမ်းလင်မၼ်းၼၼ်ႉတၢႆတႃႉ၊ဝႃႈၼင်ႇၼႆဢေႃႈ။လွင်ႈမၼ်းၸမ်းယိတ်ႉပရေႃးႁိၵ်ႈလႆႈလၢတ်ႈဝႆႉလႄႈဝႃႈ၊-ယႃႇပေဢဝ်မၼ်းတၢႆၵႃႈၼႂ်းႁိူၼ်းထႃႇဝရႃႉၽြႃးသေၵမ်း၊ဝႃႈၼင်ႇၼႆဝႆႉဢေႃႈ။
၁၆ ၶဝ်ဢွၼ်ၵၼ်ငိူင်ႉဝႄႈပၼ်တၢင်းတီႈမၼ်းလႄႈမၼ်းဢွၵ်ႇၸွမ်းသဵၼ်ႈတၢင်းမႃႉဢၼ်ၶဝ်ႈၸူးႁေႃၶမ်းၼၼ်ႉလႄႈၶဝ်ဢွၼ်ၵၼ်ဢဝ်မၼ်းတၢႆၵႃႈတီႈၼၼ်ႉဢေႃႈ။
၁၇ ယေႃႇယတၵေႃႈႁဵတ်းပတိၺိၼ်ႇၼႂ်းဝူင်ၵၢင်ထႃႇဝရႃႉၽြႃးတင်းၶုၼ်ႁေႃၶမ်းတင်းၵူၼ်းတင်းလၢႆႁႂ်ႈၶဝ်ပဵၼ်ၵူၼ်းထႃႇဝရႃႉၽြႃးဢေႃႈ။လၢႆးသမ်ႉမၼ်းႁဵတ်းပတိၺိၼ်ႇၼႂ်းဝူင်ၵၢင်ၶုၼ်ႁေႃၶမ်းတင်းၵူၼ်းတင်းလၢႆဢေႃႈ။
၁၈ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ဢွၼ်ၵၼ်ၵႂႃႇၵႃတီႈၵျွင်းပႃႇလလႄႈၵိူၼ်ႇယႃႉပႅတ်ႈဢေႃႈ။ဢွၼ်ၵၼ်ႁၵ်းႁိၵ်းယိတ်ႉပလၢင်ႇလႂ်တင်းရုၵ်ႉထူႉလႂ်ပႅတ်ႈတင်းသဵင်ႈတင်းမူတ်းလႄႈဢဝ်မၢတ်ႉသၢၼ်ႇဢၼ်ပဵၼ်ယိတ်ႉပရေႃးႁိၵ်ႈပႃႇလၼၼ်ႉတၢႆၵႃႈတီႈၽၢႆႇၼႃႈယိတ်ႉပလၢင်ႇၸိူဝ်းၼၼ်ႉဢေႃႈ။
၁၉ ယိတ်ႉပရေႃးႁိၵ်ႈၶၢၼ်းၶဝ်ၸိူဝ်းဢၼ်ဢုပ်ႉၵႃႈၼိူဝ်ႁိူၼ်းထႃႇဝရႃႉၽြႃးၼၼ်ႉသေယဝ်ႉ၊ႁွင်ႉဢဝ်ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇလႂ်၊တပ်ႉမူးလႂ်၊ၵူၼ်းသိုၵ်းပႂ်ႉႁၢင်ႈပႂ်ႉႁေႃလႂ်တင်းၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်သေလႄႈဢဝ်ၶုၼ်ႁေႃၶမ်းလူင်းသေလႄႈၵႂႃႇၵႃႈတီႈႁိူၼ်းထႃႇဝရႃႉၽြႃးၸွမ်းသဵၼ်ႈတၢင်းၽၵ်းတူပႂ်ႉၵင်ႈလႄႈၵႂႃႇသူင်ႇၵႃႈတီႈႁေႃၸဝ်ႈသေယဝ်ႉမၼ်းၼင်ႈၵႃႈၼိူဝ်ရႃႇၸႃႉပလၢင်ႇဢေႃႈ။
၂၀ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၸူမ်းသိူဝ်းလႄႈဝဵင်းတင်းဝဵင်းၵေႃႈမီးတၢင်းဢၼ်တဵတ်ႇလီၼိမ်လီဢေႃႈ။ၶဝ်ဢွၼ်ၵၼ်ဢဝ်ဢႃႇထလိၼၼ်ႉတၢႆလူၺ်ႈလၢပ်ႇလူၺ်ႈလႅဝ်းၵႃႈတီႈႁိမ်းႁေႃၸဝ်ႈဢေႃႈ။
၂၁ ယေႃႇသၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈၸဵတ်းပီႊဢေႃႈ။