Chapter
၂၃
ယေႃႇသုၶိုၼ်းႁဵတ်းပတိၺိၺ်ႇ
၁ မိူဝ်ႈၼၼ်ႉၶုၼ်ႁေႃၶမ်းပွႆႇၸႂ်ႉလႄႈႁႂ်ႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမိူင်းယုတတင်းဝဵင်းယေႇရုသလႅမ်ႇတင်းသဵင်ႈတင်းလူင်ၸူႉၵၼ်တုမ်ၵၼ်လႄႈၶုၼ်ႁေႃၶမ်းၶိုၼ်ႈၵႃႈၼိူဝ်ႁိူၼ်းထႃႇဝရႃႉၽြႃးဢိၵ်ႇလူၺ်ႈၵၼ်တင်းၵူၼ်းမိူင်းယုတတင်းသဵင်ႈတင်းလူင်
၂ ၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်ယိတ်ႉပရေႃးႁိၵ်ႈလႂ်၊ပရေႃးၽႅတ်ႈလႂ်၊ၵူၼ်းတင်းသဵင်ႈတင်းလူင်ၸဵမ်လႅၵ်ႉၸဵမ်ယႂ်ႇၸိူဝ်းၼၼ်ႉလႄႈဢဝ်ၵႂၢမ်းၵျၢမ်းလိၵ်ႈပတိၺိၼ်ႇတြႃးဢၼ်ထူပ်းႁၼ်ၵႃႈတီႈႁိူၼ်းထႃႇဝရႃႉၽြႃးၵႃႈမီးၼၼ်ႉၽတ်းဢၢၼ်ႇႁႂ်ႈႁူၶဝ်လႆႈငိၼ်းဢေႃႈ။
၃ ၶုၼ်ႁေႃၶမ်းၵေႃႈၸုၵ်းယူႇၵႃႈတီႈႁိမ်းသဝ်သေလႄႈႁဵတ်းတိၵ်ႈထၢၼ်ႇၵႃႈတီႈၽၢႆႇၼႃႈထႃႇဝရႃႉၽြႃးလူၺ်ႈလွင်ႈဢၼ်မၼ်းတၵ်းၸွမ်းလင်ထႃႇဝရႃႉၽြႃးလႄႈဢဝ်တင်းႁူဝ်ၸႂ်သဵင်ႈသဵင်ႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးမၼ်းၸဝ်ႈ၊သၢၵ်ႈသေႇမၼ်းၸဝ်ႈထုငိ်းင်ႈတြႃးမၼ်းၸဝ်ႈၸိူဝ်းၼၼ်ႉသေလႄႈႁႂ်ႈၵႂၢမ်းပတိၺိၼ်ႇဢၼ်ပႃးၵႃႈၼႂ်းၵျၢမ်းလိၵ်ႈၼၼ်ႉလႆႈတႄႇယူႇၼၼ်ႉဢေႃႈ။ၵူၼ်းတင်းသဵင်ႈတင်းလူင်ၵေႃႈဢွၼ်ၵၼ်ႁပ်ႉတုင်းဢဝ်တၢင်းဢၼ်ႁဵတ်းတိၵ်ႉထၢၼ်ႇၼၼ်ႉဢေႃႈ။
၄ လိုၼ်းၼၼ်ႉၶုၼ်ႁေႃၶမ်းၸီႇယၢင်ႇႁႂ်ႈၶုၼ်ယိတ်ႉပရေႃးႁိၵ်ႈႁိလၶိဢိၵ်ႇတင်းယိတ်ႉပရေႃးႁိၵ်ႈမုၵ်ႉၸိူဝ်းတုတိယတင်းလၢႆတင်းၶဝ်ၸိူဝ်းဢၼ်ပႂ်ႉၽၵ်းတူၼၼ်ႉယႃႉပႅတ်ႈၶိူင်ႈယိပ်းၶိူင်ႈတိုဝ်းဢၼ်ႁဵတ်းပုၼ်ႈၽြႃးပႃႇလသဝ်ဢႃႇသရၸိူဝ်းၼၼ်ႉဢွၵ်ႇသေၵႃႈၼႂ်းပိၵ်ႉမၢၼ်ႇထႃႇဝရႃႉၽြႃးသေလႄႈဢဝ်တုတ်ႇၽႆးပႅတ်ႈၵႃႈၼွၵ်ႈဝဵင်းယေႇရုသလႅမ်ႇၵႃႈတီႈၵၢင်ပၢင်ႇၵေႇတြုၼ်ႇလႄႈဢဝ်တဝ်ႊမၼ်းၵႂႃႇၵႃႈတီႈဝဵင်းပေႇသလဢေႃႈ။
၅ မၼ်းပႄႇၽဵဝ်ႈပႅတ်ႈယိတ်ႉပရေႃးႁိၵ်ႈဢၼ်ၶုၼ်ႁေႃၶမ်းယုတၶၢၼ်းဝႆႉႁႂ်ႈလႆႈဢဝ်ၼၢမ်ႇသႃႇတုတ်ႇၽႆးၵႃႈတီႈထႃႇၼႃႉတီႈသုင်ၵႃႈၼႂ်းဝၢၼ်ႈဝဵင်းယုတတင်းလၢႆတင်းၵႃႈတီႈႁိမ်းဝဵင်းယေႇရုသလႅမ်ႇၸိူဝ်းၼၼ်ႉဢိၵ်ႇတင်းၶဝ်ၸိူဝ်းဢၼ်ဢဝ်ၼၢမ်ႇသႃႇတုတ်ႇၽႆးၵႃႈတီႈၽြႃးပႃႇလတီႈၸႃႉၸဵမ်ၵၢင်ဝၼ်း၊လိူၼ်၊ၵျူဝ်ႇရႃႇသီႇတင်းသဵင်ႈတင်းလူင်ၸိူဝ်းၼၼ်ႉဢေႃႈ။
၆ သဝ်ဢႃႇသရတင်းလၢႆၵေႃႈမၼ်းဢဝ်ဢွၵ်ႇသေၵႃႈၼႂ်းႁိူၼ်းထႃႇဝရႃႉၽြႃးလႄႈဢဝ်ၵႂႃႇၵႃႈၼွၵ်ႈဝဵင်းယေႇရုသလႅမ်ႇၵႃႈတီႈၼမ်ႉႁွင်ႈဢေးတြုၼ်ႇလႄႈတုတ်ႇၽႆးပႅတ်ႈၵႃႈတီႈၼမ်ႉႁွင်ႊဢေးတြုၼ်ႇၼၼ်ႉသေယဝ်ႉတွႆႇလႅဝ်တမ်လႅဝ်သေလႄႈဢဝ်မုၼ်ႈမၼ်းၽွင်မၼ်းပိုၼ်ၽႄသႂ်ႇၵႃႈၼိူဝ်သၢင်းၶႅင်းၶႃႈဝၢၼ်ႈၵူၼ်းမိူင်းတင်းလၢႆဢေႃႈ။
၇ ႁိူၼ်းတီႈယူႇပေႃႈမွၵ်ႇယႃႇၵႃႈၼႂ်းႁိူၼ်းထႃႇဝရႃႉၽြႃးတီႈဢၼ်မေႈယိင်းတင်းလၢႆတေႃးၽႃႈၵင်ႈပုၼ်ႈသဝ်ဢႃႇသရၼၼ်ႉၵေႃႈမၼ်းယႃႉတူၵ်းပႅတ်ႈဢေႃႈ။
၈ မၼ်းႁွင်ႉဢဝ်ယိတ်ႉပရေႃးႁိၵ်ႈဝၢၼ်ႈဝဵင်းယုတၸိူဝ်းၼၼ်ႉမႃးလႄႈႁဵတ်းႁႂ်ႈထႃႇၼႃႉတီႈသုင်ဢၼ်ယိတ်ႉပရေႃးႁိၵ်ႈတင်းလၢႆဢဝ်ၼၢမ်ႇသႃႇတုတ်ႇၽႆးၼၼ်ႉဢဝ်ၸႃႉၸဵမ်ဝဵင်းၵေႇပတေႃႇထိုင်ႁွတ်ႈဝဵင်းပေႇရသေႇၽတင်းလၢႆၼၼ်ႉလႆႈၵူဝ်ႈၵိူၵ်ႇဢေႃႈ။ထႃႇၼႃႉတီႈသုင်ႁူးၽၵ်းတူၵႃႈတီႈဢၼ်ၶဝ်ႈႁူးၽၵ်းတူယေႃႇသုဝူၼ်ႇဝဵင်းယေႇရုသလႅမ်ႇဢၼ်မီးၽၢႆႇတၢင်းသၢႆႉၵႃႈတီႈၽၵ်းဝဵင်းၼၼ်ႉၵေႃႈမၼ်းၵိူၼ်ႇယႃႉပႅတ်ႈဢေႃႈ။
၉ ယိတ်ႉပရေႃးႁိၵ်ႈဢၼ်ၸၢပ်ႈသႅင်ႇၵၼ်တင်းထႃႇၼႃႉတီႈသုင်တင်းလၢႆၸိူဝ်းၼၼ်ႉယင်းဢမ်ႇလႆႈသုတ်ႉၸပ်းသုတ်ႉၸူးၵႃႈတီႈႁိမ်းယိတ်ႉပလၢင်ႇထႃႇဝရႃႉၽြႃးၵႃႈတီႈဝဵင်းယေႇရုသလႅမ်ႇလႄႈၶဝ်မီးဢၶႂၢင်ႉဢၼ်လႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈလူၺ်ႈၵၼ်တင်းပီႈၼွင်ႉၶဝ်ၵူၺ်းဢေႃႈ။
၁၀ မၼ်းႁဵတ်းႁႂ်ႈတီႈပုၵ်ႉၸေႃႇတေႃႇၽိတ်ႉဢၼ်မီးၵႃႈၼႂ်းၶူင်ႈႁူၺ်ႈလုၵ်ႈၸၢႆးႁိၼ်ႇၼုမ်ႇၼၼ်ႉၵူဝ်ႈၵိူၵ်ႇလႄႈဢမ်ႇႁႂ်ႈၽူႈလႂ်လႆႈဢဝ်လုၵ်ႈၸၢႆးမၼ်းလုၵ်ႈယိင်းမၼ်းၶၢမ်ႇတၢင်းဢၼ်ဢဝ်ၽႆးတုတ်ႇလႄႈပုၵ်ႉၸေႃႇတီႈၽြႃးမူးလွၵ်ႇၼၼ်ႉဢေႃႈ။
၁၁ မႃႉဢၼ်ၶုၼ်ႁေႃၶမ်းယုတတင်းလၢႆဢဝ်ပုၵ်ႉၸေႃႇတီႈဝၼ်းႄလႈဝႆႉၵႃႈတီႈႁူးၽၵ်းတူဝၢင်းႁိူၼ်းထႃႇဝရႃႉၽြႃးၵႃႈတီႈႁိမ်းႁိူၼ်းၼႃႇသၢမ်ႇမေႇလိၵ်ႉၵေႃႉဢၼ်လႆႈပႂ်ႉလႆႈထိင်းဝၢင်းၸဝ်ႈၼၼ်ႉၵေႃႈမၼ်းပႄႇၽဵဝ်ႈပႅတ်ႈလႄႈဢဝ်လေႃႉရထႃးဝၼ်းၸိူဝ်းၼၼ်ႉတုတ်ႇၽႆးပႅတ်ႈဢေႃႈ။
၁၂ ယိတ်ႉပလၢင်ႇဢၼ်မီးၵႃႈၼိူဝ်ဢၼ်မုင်ႈႁၼ်ၼိူဝ်တိူၵ်ႈၶုၼ်ဢႃႇၶတ်ႉလႄႈၶုၼ်ႁေႃၶမ်းယုတဢွၼ်ၵၼ်တႄႇဝႆႉႁဵတ်းဝႆႉၸိူဝ်းၼၼ်ႉဢိၵ်ႇတင်းယိတ်ႉပလၢင်ႇဢၼ်မၼႃႇသေႇတႄႇဝႆႉႁဵတ်းဝႆႉၵႃႈၼႂ်းတမ်ႇတိူင်းႁိူၼ်းထႃႇဝရႃႉၽြႃးသွင်တီႈၸိူဝ်းၼၼ်ႉၵေႃႈၶုၼ်ႁေႃၶမ်းၵိူၼ်ႇယႃႉတူၵ်းလႄႈတွႆႇလႅဝ်တမ်လႅဝ်သေလႄႈဢဝ်မုၼ်ႈမၼ်းၽွင်မၼ်းပႅတ်ႈတူၵ်းသႂ်ႇၵႃႈၼႂ်းၼမ်ႉႁွင်ႈဢေးတြႃၼ်ႇသေဢေႃႈ။
၁၃ ထႃႇၼႃႉတီႈသုင်ဢၼ်မီးၵႃႈတီႈၽၢႆႇၼႃႈဝၼ်းဢွၵ်ႇဝဵင်းယေႇရုသလႅမ်ႇၵႃႈတီႈၽၢႆႇတၢင်းၶႂႃဢၼ်သေႃးလမုၼ်ႇၶုၼ်ႁေႃၶမ်းဢိသရေႇလတႄႇႁဵတ်းပုၼ်ႈဢႃႇသတရိၵ်ႈၽြႃးၸိတုၼ်ႇဢၼ်လီႁင်ႈဢဵတ်ႇသဵတ်ႇ၊ၶေႇမုသၽြႃးမေႃႇၽဢၼ်လီႁင်ႈဢဵတ်ႇသဵတ်ႇမိလၵုမ်ႇၽြႃးဢမ်ႇမုၼ်ႇဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉၵေႃႈၶုၼ်ႁေႃၶမ်းႁဵတ်းႁႂ်ႈၵူဝ်ႈၵိူၵ်ႇပႅတ်ႈသေဢေႃႈ။
၁၄ မၼ်းႁၵ်းႁိၵ်းသဝ်တီႈၵူဝ်းၵႂၢႆႇတင်းလၢႆပႅတ်ႈလႄႈၽၼ်းသဝ်ဢႃႇသရၸိူဝ်းၼၼ်ႉလူမ်ႉပႅတ်ႈသေယဝ်ႉႁႂ်ႈတီႈဢၼ်တႄႇႁဵတ်းဝႆႉၸိူဝ်းၼၼ်ႉတဵမ်ဝႆႉတင်းလုပ်ႇၵူၼ်းတၢႆဢေႃႈ။
၁၅ ယိတ်ႉပလၢင်ႇဢၼ်မီးၵႃႈတီႈဝဵင်းပေႇသလဢိၵ်ႇတင်းထႃႇၼႃႉတီႈသုင်ဢၼ်ယေႇရုဝ်းပုမ်ႇလုၵ်ႈၸၢႆးၼေႇပတ်ႈ၊ဢၼ်ႁဵတ်းႁႂ်ႈမဵဝ်းဢိသရေႇလလႆႈၽိတ်းပိူင်ႈတႄႇႁဵတ်းဝႆႉဢၼ်ဝႃႈယိတ်ႉပလၢင်ႇဢိၵ်ႇတင်းထႃႇၼႃႉတီႈသုင်ၼၼ်ႉၵေႃႈမၼ်းၵိူၼ်ႇယႃႉတူၵ်းလႄႈဢဝ်ၽႆးတုတ်ႇထႃႇၼႃႉတီႈသုင်ၼၼ်ႉသေယဝ်ႉတွႆႇလႅဝ်တမ်လႅဝ်ပႅတ်ႈလႄႈဢဝ်ၽႆးတုတ်ႇသဝ်ဢႃႇသရတင်းလၢႆပႅတ်ႈဢေႃႈ။
၁၆ ယုဝ်ႇသိယၼၼ်ႉဝၢႆႇၶိုၼ်းလႄႈထူပ်းႁၼ်သၢင်းၶႅင်းဢၼ်မီးၵႃႈၼိူဝ်လွႆၸိူဝ်းၼၼ်ႉသေယဝ်ႉပွႆႇၸႂ်ႉၵူၼ်းၵႂႃႇဢဝ်လုပ်ႇၵူၼ်းတၢႆဢၼ်မီးၵႃႈၼႂ်းသၢင်းၶႅင်းၸိူဝ်းၼၼ်ႉဢွၵ်ႇသေလႄႈတုတ်ႇၽႆးၵႃႈၼိူဝ်ယိတ်ႉပလၢင်ႇလႄႈႁႂ်ႈၵူဝ်ႈၵိူၵ်ႇပႅတ်ႈၸွမ်းၵႃႈၼင်ႇၵႂၢမ်းထႃႇဝရႃႉၽြႃးဢၼ်ၵူၼ်းၽြႃးပဵၼ်ၸဝ်ႈဢၼ်လႆႈဢဝ်လွင်ႈဢမူႉၼႆႉလႄႈသင်ႇလၢတ်ႈဝႆႉၼၼ်ႉဢေႃႈ။
၁၇ မိူဝ်ႈၼၼ်ႉမၼ်းထၢမ်လႄႈဝႃႈ၊-မၢၵ်ႇႁိၼ်တီႈမၢတ်ႈတီႈတွင်းဢၼ်ၵဝ်ႁၼ်ၼႆႉၸမ်းပဵၼ်ၵႃႈသင်၊ဝႃႈၼင်ႇၼႆသေယဝ်ႉၵူၼ်းဝဵင်းၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊-ပဵၼ်သၢင်းၶႅင်းၵူၼ်းၽြႃးပဵၼ်ၸဝ်ႈဢၼ်လုၵ်ႉသေၵႃႈတီႈမိူင်းယုတမႃးလႄႈၽုၺ်ႇဢွၵ်ႇၼႄပျႃးတၢင်းဢၼ်ၶတ်းၵၼ်တင်းယိတ်ႉပလၢင်ႇပေႇသလဢၼ်ၸဝ်ႈႁဝ်းယႃႉပႅတ်ႈမိူဝ်ႈလဵဝ်ၼႆႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၶုၼ်ႁေႃၶမ်းလၢတ်ႈလႄႈဝႃႈ၊-ယႃႇမၼ်းတႃႉ။
၁၈ ယႃႇပေႁႂ်ႈၽူႈလႂ်ဢဝ်လုပ်ႇၵေႃႉၼၼ်ႉၶၢႆႉတီႈမၼ်း၊ဝႃႈၼင်ႇၼႆလႄႈၶဝ်ၼၼ်ႉႁႂ်ႈလုပ်ႇမၼ်းဢိၵ်ႇတင်းလုပ်ႇပရေႃးၽႅတ်ႈဢၼ်လုၵ်ႉသေၵႃႈတီႈဝဵင်းသမႃႇရိမႃးၸိူဝ်းၼၼ်ႉၵိုတ်းဝႆႉၵႃႈတီႈၼၼ်ႉဢေႃႈ။
၁၉ ႁိူၼ်းၵႃႈၼိူဝ်ထႃႇၼႃႉတီႈသုင်ၵႃႈတီႈဝၢၼ်ႈဝဵင်းသမႃႇရိဢၼ်ၶုၼ်ႁေႃၶမ်းဢိသရေႇလတင်းလၢႆတႄႇႁဵတ်းဝႆႉႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈၼၼ်ႉၵေႃႈၶုၼ်ယုဝ်ႇသိယပႄႇၽဵဝ်ႈပႅတ်ႈၸွမ်းၵႃႈၼင်ႇဢၼ်မၼ်းႁဵတ်းၵႃႈတီႈဝဵင်းပေႇသလၼၼ်ႉဢေႃႈ။
၂၀ ယိတ်ႉပရေႃးႁိၵ်ႈၵႃႈဢၼ်ၸၢပ်ႈသႅင်ႇၵၼ်တင်းထႃႇၼႃႉတီႈသုင်ၸိူဝ်းၼၼ်ႉၵေႃႈမၼ်းဢဝ်တၢႆပႅတ်ႈၵႃႈၼိူဝ်ယိတ်ႉပလၢင်ႇၸိူဝ်းၼၼ်ႉသေယဝ်ႉဢဝ်လုပ်ႇၵူၼ်းတၢႆတုတ်ႇၽႆးၵႃႈၼိူဝ်ယိတ်ႉပလၢင်ႇၸိူဝ်းၼၼ်ႉလႄႈၶိုၼ်းမႃးၵႃႈတီႈဝဵင်းယေႇရုသလႅမ်ႇဢေႃႈ။
၂၁ လၢႆးသမ်ႉၶုၼ်ႁေႃၶမ်းၵေႃႈမီးဢမိင်ႉတီႈၵူၼ်းတင်းသဵင်ႈတင်းလူင်လႄႈဝႃႈ၊-ဢွၼ်ၵၼ်ပႂ်ႉၵမ်ပႂ်ႉၸွမ်းပွႆးပႃသၶႃႇထႃႇဝရႃႉၽြႃးၽြႃးပဵၼ်ၸဝ်ႈသူၸွမ်းၵႃႈၼင်ႇဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈပတိၺိၼ်ႇတြႃးၼႆႉတႃႉ၊ဝႃႈၼင်ႇၼႆဢေႃႈ။
၂၂ ၸႃႉၸဵမ်ၸူဝ်ႈပၢၼ်ၵူၼ်းလူင်ၸီႇယၢင်ႇတြႃးဢၼ်ဢုပ်ႉပိူင်ႇမဵဝ်းဢိသရေႇလတင်းလၢႆၼၼ်ႉလႄႈၸူဝ်ႈပၢၼ်ၶုၼ်ႁေႃၶမ်းဢိသရေႇလတင်းၶုၼ်ႁေႃၶမ်းယုတၸိူဝ်းၼၼ်ႉ၊ဢမ်ႇပဵၼ်တၢင်းဢၼ်ပႂ်ႉၵမ်ပႂ်ႉၸွမ်းပွႆးပႃႇသၶႃႇၸိူဝ်ႉၼင်ႇၼၼ်သေပွၵ်ႈ။
၂၃ ၼႂ်းပီႊဢၼ်ၶုၼ်လူင်ယုဝ်ႇသယၸၢမ်ႇႁၢင်ႈၸၢမ်ႇႁေႃသိပ်းပၢႆပႅတ်ႇပီႊၼၼ်ႉၶဝ်ဢွၼ်ၵၼ်ပႂ်ႉၵမ်ပႂ်ႉၸွမ်းပွႆးပႃသၶႃႇၼၼ်ႉတီႈထႃႇဝရႃႉၽြႃးၵႃႈၼႂ်းဝဵင်းယေႇရုသလႅမ်ႇဢေႃႈ။
၂၄ ၼွၵ်ႈသေၼၼ်ႉယုဝ်ႇသိယပႄႇၽဵဝ်ႈပႅတ်ႈၸႃႉၸဵမ်ၽိူဝ်ႉၶဝ်လႂ်၊ၽီၶဝ်လႂ်၊ရုၵ်ႉထူႉတေႇရပ်ႉလႂ်ရုၵ်ႉထူႉသၢင်းထူႉတင်းလၢႆဢိၵ်ႇတင်းလွင်ႈလီႁင်ႈဢဵတ်ႇသဵတ်ႇၵႃႈဢၼ်ထူပ်းႁၼ်ၵႃႈၼႂ်းမိူင်းယုတတင်းဝဵင်းယေႇရုသလႅမ်ႇၸိူဝ်းၼၼ်ႉႁႂ်ႈလႆႈပႂ်ႉၵမ်ပႂ်ႉၸွမ်းၵႃႈၼင်ႇၵႂၢမ်းတြႃးပိင်းၺၢပ်ႈတိဢၼ်တႅမ်ဝႆႉမီးယူႇၵႃႈၼႂ်းၵျၢမ်းလိၵ်ႈဢၼ်ယိတ်ႉပရေႃးႁိၵ်ႈႁိလၶိထူပ်းႁၼ်ၵႃႈၼႂ်းႁိူၼ်းထႃႇဝရႃႉၽြႃးၼၼ်ႉဢေႃႈ။
၂၅ ၶုၼ်ႁေႃၶမ်းဢၼ်ဢဝ်ႁူဝ်ၸႂ်သဵင်ႈသဵင်ႈတင်းတၢင်းၵတ်ႉတၢင်းၶၼ်ၵႃႈမီးပုတ်ႉၶၢႆႉမႃးၵႃႈတီႈထႃႇဝရႃႉၽြႃးၸွမ်းၵႃႈၼင်ႇဢၼ်မီးၵႃႈၼႂ်းတြႃးမုဝ်ႇသေႇၼၼ်ႉလႄႈမိူၼ်ၼင်ႇယုဝ်ႇသိယၼၼ်ႉဢမ်ႇယၢမ်ႈတွၼ်ႉမီးတွၼ်ႉပဵၼ်သေၸဝ်ႈသေပႃး။လိုၼ်းမၼ်းၵေႃႈဢမ်ႇတွၼ်ႉပေႃႇတွၼ်ႉမီး။
၂၆ ၼႂ်းဝႃႈၼၼ်သေၵေႃႈထႃႇဝရႃႉၽြႃးဢမ်ႇဝၢႆႇၶိုၼ်းသေၵႃႈတီႈတၢင်းၸႂ်မႆႈၶႆႈၸႃႉဢၼ်ႁႅင်းယႂ်ႇၼႃႇလူင်လၢင်ၼၼ်ႉလႄႈမၼ်းၸဝ်ႈၸႂ်မႆႈၶႆႈၸႃႉတီႈမဵဝ်းယုတၵွပ်ႈပိူဝ်ႈဢပျႅတ်ႈဢၼ်မၼႃႇသေႇၽိတ်းပိူင်ႈႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးၸိူဝ်းၼၼ်ႉ။
၂၇ ထႃႇဝရႃႉၽြႃးမီးဢမိင်ႉလႄႈဝႃႈ၊-ၵဝ်တၵ်းပႄႇပႅတ်ႈမဵဝ်းယုတသေၵႃႈတီႈသိုဝ်ႈၼႃႈတႂ်ႈတႃၵဝ်မိူၼ်ၸိူဝ်ႉၼင်ႇဢၼ်ၵဝ်ၸုၼ်ႉပႅတ်ႈမဵဝ်းဢိသရေႇလၼၼ်ႉလႄႈတၵ်းၸုၼ်ႉပႅတ်ႈဢၼ်ၵဝ်လိူၵ်ႈၵဵပ်းဢဝ်ၼႆႉဢၼ်ဝႃႈဝဵင်းယေႇရုသလႅမ်ႇဢိၵ်ႇတင်းႁိူၼ်းၸဝ်ႈဢၼ်ၵဝ်လၢတ်ႈလႄႈဝႃႈ၊-ၼႃႇမႃႉၸိုဝ်သဵင်ၵဝ်တၵ်းလႆႈတႄႇယူႇၵႃႈတီႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၈ လွင်ႈတၢင်းယုဝ်ႇသိယဢၼ်ယင်းၵိုတ်းယင်းၵျၢၼ်ႇဢိၵ်ႇတင်းလွင်ႈတၢင်းၵႃႈဢၼ်မၼ်းႁဵတ်းၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။
၂၉ ၼႂ်းၸူဝ်ႈပၢၼ်မၼ်းၼၼ်ႉၽႃႇရေႃးၼေႇၶေႃႇၶုၼ်ႁေႃၶမ်းဢေႇၵႅပ်ႉတုၶီႇသိုၵ်းၶိုၼ်ႈၸူးၶုၼ်ႁေႃၶမ်းဢႃႇသုရိတေႃႇထိုင်ႁွတ်ႈၼမ်ႉႁွင်ႈလူင်ဢုၽရတ်ႉလႄႈၶုၼ်လူင်ယုဝ်ႇသိယဢွၵ်ႇၵႂႃႇႁႂ်ႈလႆႈႁႄႉတၢင်းမၼ်းလႄႈၼႂ်းမိူဝ်ႈဢၼ်ၶုၼ်ၼင်ႇၵၼ်ႁူပ်ႉထူပ်းၵၼ်ၼၼ်ႉယူႇၼၼ်ႉၸိုင်ၶုၼ်ၼၼ်ႉၶႃႈၽၼ်းဢဝ်မၼ်းတၢႆၵႃႈတီႈဝဵင်းမေႇၵိတ်ႉတေႃႇသေဢေႃႈ။
၃၀ ၶႃႈမၼ်းၵူၼ်းမၼ်းၸိူဝ်းၼၼ်ႉဢဝ်မၼ်းတၢင်ႇၵႃႈၼိူဝ်လေႃႉရထႃးၸဝ်ႈသေလႄႈဢွၼ်ၵၼ်လုၵ်ႉသေၵႃႈတီႈဝဵင်းမေႇၵိတ်ႉတေႃႇဢဝ်တူဝ်တၢႆမၼ်းၵႂႃႇၵႃႈတီႈဝဵင်းယေႇရုသလႅမ်ႇလႄႈသၢင်းၵျူဝ်ႇၵႃႈၼႂ်းသၢင်းၶႅင်းမၼ်းဢေႃႈ။ၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်ဢဝ်ယေႃႇၶတ်ႉလုၵ်ႈၸၢႆးၸဝ်ႈယုဝ်ႇသိယၼၼ်ႉပၼ်ၽိၵ်ႈသိၵ်ႈသေလႄႈႁႂ်ႈမၼ်းပဵၼ်ၶုၼ်ႁေႃၶမ်းတၢင်တူဝ်ၸဝ်ႈပေႃႈမၼ်းဢေႃႈ။
ယေႃႇၶတ်ႉၶုၼ်ႁေႃၶမ်းယုတ
၃၁ ယေႃႇၶတ်ႉၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းသၢမ်ပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသၢမ်လိူၼ်ဢေႃႈ။ၸိုဝ်သဵင်မေႈၸဝ်ႈၸမ်းပဵၼ်ႁႃႇမုတႃႇလလုၵ်ႈယိင်းယေႇရမိၵူၼ်းဝဵင်းလိပၼဢေႃႈ။
၃၂ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈဢၼ်ပူႇမၼ်းမွၼ်ႇမၼ်းႁဵတ်းၼၼ်ႉဢေႃႈ။
၃၃ ၽႃႇရေႃးၼေႇၶေႃႇၼၼ်ႉဢဝ်မၼ်းတူၵ်းၵႅၼ်းဝႆႉၵႃႈတီႈဝဵင်းရိပလမိူင်းႁႃႇမတ်ႉႁႂ်ႈမၼ်းဢမ်ႇလႆႈၼင်ႈႁၢင်ႈၼင်ႈႁေႃၵႃႈၼႂ်းဝဵင်းယေႇရုသလႅမ်ႇလႄႈယွၼ်းဢဝ်ၶွၼ်ႇငိုၼ်းပၢၵ်ႇတလၢၼ်ႇတၢၼ်ႇ၊ၶမ်းတလၢၼ်ႇတၢၼ်ႇၼိုင်ႈၵႃႈတီႈမိူင်းယုတဢေႃႈ။
၃၄ ၽႃႇရေႃးၼေႇၶေႃႇၼၼ်ႉဢဝ်ဢေးလျႃႇလုၵ်ႈၸၢႆးယုဝ်ႇသိယႁႂ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းယုဝ်ႇသိယလႄႈတၢင်ႇပၼ်ၸိုဝ်မ်ႂႇဝႃႈယေႃႇယၵိမ်ႇဢေႃႈ။မၼ်းၼၼ်ႉဢဝ်ယေႃႇၶတ်ႉၵႂႃႇႁွတ်ႈထိုင်ၵႃႈတီႈမိူင်းဢေႇၵႅပ်ႉတုသေယဝ်ႉတၢႆၵႃႈတီႈၼၼ်ႉဢေႃႈ။
၃၅ ယေႃႇယၵိမ်ႇၽႃႇဢဝ်ၵဵပ်းဢဝ်ငိုၼ်းၵႃႈၼႂ်းမိူင်းတၢင်ႇမိူင်းႁႂ်ႈလႆႈသၢၵ်ႈပၼ်ၸွမ်းၵႃႈၼင်ႇဢၼ်ဢမိင်ႉၽႃႇရေႃးၼေႇၶေႃႇမီးၼၼ်ႉလႄႈလႆႈသၢၵ်ႈၶွၼ်ႇငိုၼ်းၶွၼ်ႇၶမ်းဢေႃႈ။မၼ်းယွၼ်းဢဝ်ငိုၼ်းၶမ်းႁိပ်ႈၼႃႇမႆႈၼႃႇတီႈၵူၼ်းဝၢၼ်ႈၵူၼ်းမိူင်းတင်းလၢႆၸွမ်းၵႃႈၼင်ႇတၢင်းဢၼ်ၽႃႇဢဝ်ၵဵပ်းဢဝ်တူၵ်းႁင်းၽႂ်ႁင်းမၼ်းႁႂ်ႈလႆႈသၢၵ်ႈပၼ်တီႈၽႃႇရေႃးၼေႇၶေႃႇဢေႃႈ။
ယေႃႇယၵိမ်ႇၶုၼ်ႁေႃၶမ်းယုတ
၃၆ ယေႃႇယၵိမ်ႇၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းႁႃႈပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသိပ်းပၢႆဢဵတ်းပီႊဢေႃႈ။ၸိုဝ်သဵင်မေႈၸဝ်ႈၸမ်းပဵၼ်ၸေႇပုတလုၵ်ႈယိင်းပေႇတေႇယၵူၼ်းဝဵင်းရူဝ်းမဢေႃႈ။
၃၇ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ်ပူႇမွၼ်ႇမၼ်းႁဵတ်းၼၼ်ႉဢေႃႈ။