Chapter
၂၀
ႁေႇၸၵိမီးတၢင်းၶႆႈတၢင်းပဵၼ်
၁ ၼႂ်းၶိင်ႇမိုဝ်ႉဝၼ်းၸိူဝ်းၼၼ်ႉႁေႇၸၵိပဵၼ်တၢင်းၶႆႈတၢင်းပဵၼ်လႄႈၸမ်တၵ်းတၢႆဢေႃႈ။ပရေႃးၽႅတ်ႈဢိသႃႇယလုၵ်ႈၸၢႆးဢႃႇမုတ်ႉၼၼ်ႉမႃးၸူးတီႈမၼ်းလႄႈၶိုၼ်းလၢတ်ႈဢမိင်ႉၸဝ်ႈလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၸီႇယၢင်ႇမႄးႁႅၼ်းဢမူႉႁိူၼ်းမႂ်းဝႆႉတႃႉ။မႂ်းတၵ်းလႆႈတၢႆဢေႃႈ။ဢသၢၵ်ႈမႂ်းတၵ်းဢမ်ႇလႆႈလိပ်း၊ဝႃႈၼင်ႇၼႆယဝ်ႉ၊ဝႃႈၼင်ႇၼႆဢေႃႈ။
၂ မၼ်းၵေႃႈဝၢႆႇၼႃႈၸူးၽႃသေလႄႈသူးတွင်းတီႈထႃႇဝရႃႉၽြႃးလႄႈဝႃႈ၊-ထႃႇဝရႃႉၽြႃးတီႈၶႃႈ။
၃ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၶႃႈၸဝ်ႈပႂ်ႉသႅတ်ႉၸႃႇယူႇ၊ပႃးတင်းႁူဝ်ၸႂ်ဢၼ်ၸေးၸုမ်ႇယူႇသေလႄႈၵႂႃႇမႃးယူႇၵႃႈတီႈၽၢႆႇၼႃႈၸဝ်ႈႁဝ်းလႄႈၵမ်ၵျၢင်ႉဢၼ်လီဢၼ်ငၢမ်းသိုဝ်ႈၼႃႈတႂ်ႈတႃၸဝ်ႈႁဝ်းၼၼ်ႉသေၵမ်းတီႈၶႃႈ။ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊ဝႃႈၼင်ႇၼႆလႄႈႁေႇၸၵိႁႆႈႁွင်ႉၼႃႇလူင်လၢင်ယူႇဢေႃႈ။
၄ ၸူဝ်ႈဢၼ်ဢိသႃႇယဢမ်ႇပႆႇဢွၵ်ႇပူၼ်ႉၵႃႈၼႂ်းၶိုင်ႈၵၢင်ဝဵင်းၼၼ်ႉၸိုင်ၼုၵ်ႈၵပၢတ်ႈထႃႇဝရႃႉၽြႃးႁွတ်ႈထိုင်မႃးၵႃႈတီႈမၼ်းလႄႈဝႃႈ၊-
၅ မႂ်းဝၢႆႇၶိုၼ်းၵႂႃႇၸူးတီႈႁေႇၸၵိၵေႃႉဢၼ်ပဵၼ်ၵူၼ်းဢွၼ်ႁူဝ်ၵူၼ်းၵဝ်တင်းလၢႆၼၼ်ႉလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈပေႃႈမႂ်းတႃႇဝိတ်ႉၼၼ်ႉမီးဢမိင်ႉလႄႈဝႃႈၸမ်း၊-ၵဝ်ငိၼ်းၵႂၢမ်းသူးတွင်းပထၼႃႇမႂ်းယဝ်ႉ။ၼမ်ႉတႃမႂ်းၵေႃႈၵဝ်ႁၼ်ယဝ်ႉ။ၵဝ်ႁႂ်ႈတၢင်းၶႆႈတၢင်းပဵၼ်မႂ်းႁၢႆလႄႈပေႃးပူၼ်ႉသၢမ်ဝၼ်းၸိုင်မႂ်းတၵ်းလႆႈၶိုၼ်ႈႁိူၼ်းထႃႇဝရႃႉၽြႃးဢေႃႈ။
၆ ၵဝ်တၵ်းသိုပ်ႇဢသၢၵ်ႈမႂ်းထႅင်ႈသိပ်းႁႃႈပီႊဢေႃႈ။ၵဝ်တၵ်းၵႄႇသႄႇၼုၵ်ႈဢဝ်မႂ်းဢိၵ်ႇတင်းဝဵင်းၼႆႉလွတ်ႈဢွၵ်ႇသေၵႃႈၼႂ်းမိုဝ်းၶုၼ်ႁေႃၶမ်းဢႃႇသုရိဢေႃႈ။ၵဝ်တၵ်းထွၵ်ႈလူၺ်ႈၼႃႈၵဝ်တင်းၼႃႈၶႃႈၵဝ်တႃႇဝိတ်ႉၼၼ်ႉသေလႄႈၵႅတ်ႇၶႄႁႄႉၵင်ႈဝဵင်းၼႆႉဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၇ ဢိသႃႇယၵေႃႈလၢတ်ႈလႄႈဝႃႈ၊-ဢဝ်မၢၵ်ႇလိူဝ်ႇသၢင်းၽေႃးဢၼ်ပဵၼ်ၵွၼ်ႈပဵၼ်မမ်ႈဝႆႉၼၼ်ႉမႃးတႃႉ၊ဝႃႈၼင်ႇၼႆလႄႈၶဝ်ၵေႃႈဢဝ်မႃးသေယဝ်ႉမၼ်းဢဝ်ဢၼ်ၼၼ်ႉဢုမ်ႇသႂ်ႇတီႈတုမ်ၸဵပ်းႁေႇၸၵိၼၼ်ႉဝႆႉလႄႈမၼ်းၼၼ်ႉသၢၵ်ႈသႃႇၶႅၼ်းမႃးဢေႃႈ။
၈ ႁေႇၸၵိၵေႃႈထၢမ်တီႈဢိသႃႇယလႄႈဝႃႈ၊-လၢၵ်ႈၶၼႃႇသၢၵ်ႈသေႇလွင်ႈဢၼ်ထႃႇဝရႃႉၽြႃးတၵ်းႁႂ်ႈတၢင်းၸဵပ်းၵဝ်ႁၢႆလႄႈပူၼ်ႉသၢမ်ဝၼ်းၼၼ်ႉၵဝ်တၵ်းလႆႈၶိုၼ်ႈႁိူၼ်းထႃႇဝရႃႉၽြႃးၼၼ်ႉတၵ်းမီးၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ဢိသႃႇယၵေႃႈလၢတ်ႈလႄႈဝႃႈ၊-
၉ လၢၵ်ႈၶၼႃႇသၢၵ်ႈသေႇဢၼ်ထႃႇဝရႃႉၽြႃးတၵ်းပၼ်တီႈၸဝ်ႈလူၺ်ႈလွင်ႈဢၼ်ထႃႇဝရႃႉၽြႃးတၵ်းႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉဝႆႉၼၼ်ႉၸမ်းၵွင်ႉငဝ်းတၵ်းလႆႈၵႂႃႇပႃႈၼႃႈသိပ်းယၢင်ႈႁိုဝ်၊တၵ်းလႆႈသုတ်ႉၶိုၼ်းၽၢႆႇလင်သိပ်းယၢင်ႈႁိုဝ်မိူဝ်ႈဢၼ်ဝႃႈၼင်ႇၼႆၸိုင်ႁေႇၸၵိၶိုၼ်းလၢတ်ႈလႄႈဝႃႈ၊-
၁၀ တၢင်းဢၼ်ၵွင်ႉငဝ်းတၵ်းလႆႈၵႂႃႇပႃႈၼႃႈၼၼ်ႉသိပ်းယၢင်ႈၼၼ်ႉပဵၼ်ဢၼ်ငၢႆႈဢေႃႈ။ဢမ်ႇၶႂ်ႈႁႂ်ႈပဵၼ်ၸိူဝ်ႉၼင်ႇၼၼ်ႈ။ႁႂ်ႈၵွင်ႉငဝ်းၼၼ်ႉသုတ်ႈၶိုၼ်းၽၢႆႇလင်သိပ်းယၢင်ႈသေၵမ်း၊ဝႃႈၼင်ႇၼႆဢေႃႈ။
၁၁ ပရေႃးၽႅတ်ႈဢိသႃႇယၵေႃႈသူးတွင်းတီႈထႃႇဝရႃႉၽြႃးလႄႈမၼ်းၸဝ်ႈႁႂ်ႈၵွင်ႉငဝ်းၼၼ်ႉသုတ်ႉၶိုၼ်းၽၢႆႇလင်သိပ်းယၢင်ႈလႄႈလူင်းၵႂႃႇၵႃႈတီႈၶူဝ်လႆဢႃႇၶတ်ႉၼၼ်ႉဢေႃႈ။
ၵူၼ်းမိူင်းပႃႇပုလုၼ်ႇ
၁၂ မိူဝ်ႈၶိင်ႇၼၼ်ႉမေႇရေႃႇတပ်ႉပႃႇလတၼ်ႇလုၵ်ႈၸၢႆးပႃႇလတင်းၶုၼ်လူင်ပႃႇပုလုၼ်ႇသုင်ႇပၼ်လိၵ်ႈမႅတ်ႈတႃႇဢိၵ်ႇတင်းလၢၵ်ႈသွင်ႇပုၼ်ႈႁေႇၸၵိၵွပ်ႈပိူဝ်ႈဢၼ်ၶဝ်လႆႈငိၼ်းလွင်ႈဢၼ်ႁေႇၸၵိပဵၼ်တၢင်းၶႆႈတၢင်းပဵၼ်ၼၼ်ႉဢေႃႈ။
၁၃ ႁေႇၸၵိႁပ်ႉႁွမ်းၽူႈတၢင်တူဝ်ၸိူဝ်းၼၼ်ႉလႄႈၼႄပျႃႉၶဝ်ၸႃႉၸဵမ်တိူၵ်ႈၽၼ်ႇတႃႇတီႈဢၼ်ဝႆႉၶိူင်ႈပိူင်ဢၼ်ထိူၵ်ႈၵႃႈထိူၵ်ႈၶၼ်၊ငိုၼ်းၶမ်း၊မဵဝ်းၼၢမ်ႇသႃႇ၊ၼမ်ႉမၼ်းၼၢမ်ႇသႃႇဢၼ်လီဢၼ်ငၢမ်း၊တိူၵ်ႈလၢၵ်ႈၼၢၵ်ႈဢိၵ်ႇတင်းဢၼ်မီးၼႂ်းၽၼ်ႇတႃႇၸဝ်ႈၵူႈၸိူဝ်ႉၵူႈပိူင်ၸိူဝ်းၼၼ်ႉဢေႃႈ။ၸႃႉၸဵမ်ၵႃႈၼႂ်းႁေႃၶမ်းလႄႈမိူင်းၸဝ်ႈၵူႈတီႈၵူႈလႅၼ်ၼၼ်ႉလွင်ႈတၢင်းဢၼ်ၶုၼ်ႁေႇၸၵိဢမ်ႇၼႄပျႃႉတီႈၶဝ်ၼၼ်ႉဢမ်ႇမီးသေၸိူဝ်ႉသေပိူင်ႈ။
၁၄ မိူဝ်ႈၼၼ်ႉပရေႃးၽႅတ်ႈဢိသႃႇယမႃးတီႈၶုၼ်ႁေႃၶမ်းႁေႇၸၵိလႄႈလဝ်ႈထၢမ်လႄႈဝႃႈ၊-ၵူၼ်းၸိူဝ်းၼႆႉလၢတ်ႈၸိူဝ်ႉၼင်ႇႁိုဝ်။ၶဝ်လုၵ်ႉသေၵႃႈတီႈမိူင်းလႂ်မႃး၊ဝႃႈၼင်ႇၼႆလႄႈႁေႇၸၵိၵေႃႈၶိုၼ်းလၢတ်ႈလႄႈဝႃႈ၊-ၶဝ်လုၵ်ႉသေၵႃႈတီႈဢၼ်ၵႆၼႃႇဢၼ်ဝႃႈမိူင်းပႃႇပုလုၼ်ႇၼၼ်ႉမႃးဢေႃႈ၊ဝႃႈၼင်ႇၼႆဢေႃႈ။
၁၅ မၼ်းသမ်ႉထၢမ်ထႅင်ႈလႄႈဝႃႈ၊-ၵႃႈၼႂ်းႁေႃၶမ်းၸဝ်ႈႁဝ်းၼႆႉၶဝ်ႁၼ်ၵႃႈသင်ယဝ်ႉ၊ဝႃႈၼင်ႇၼႆလႄႈႁေႇၸၵိၶိုၼ်းလၢတ်ႈလႄႈဝႃႈ၊-ၵႃႈဢၼ်မီးၵႃႈၼႂ်းႁေႃၶမ်းၼႆႉၶဝ်လႆႈႁၼ်ယဝ်ႉ။ၵႃႈၼႂ်းၽၼ်ႇတႃႇၸဝ်ႈၼၼ်ႉလွင်ႈတၢင်းဢၼ်ၵဝ်ဢမ်ႇၼႄပျႃႉတီႈၶဝ်ၼၼ်ႉဢမ်ႇမီးသေၸိူဝ်ႉသေပိူင်ႈ၊ဝႃႈၼင်ႇၼႆဢေႃႈ။
၁၆ မိူဝ်ႈၼၼ်ႉဢိသႃႇယလၢတ်ႈတီႈႁေႇၸၵိလႄႈဝႃႈ၊-ထွမ်ႇငိၼ်းၼုၵ်ႉၵပၢတ်ႈထႃႇဝရႃႉၽြႃးတႃႉ။
၁၇ ၶိင်ႇၵႃႇလႃႉမိုဝ်ႉဝၼ်းဢၼ်ၵႃႈဢၼ်မီးၵႃႈၼႂ်းႁေႃၶမ်းဢိၵ်ႇတင်းၵႃႈဢၼ်ပူႇၸဝ်ႈမွၼ်ႇၸဝ်ႈၸူႉသိမ်းဝႆႉတေႃႇထိုင်ႁွတ်ႈဝၼ်းမိူဝ်ႈၼႆႉတင်းသဵင်ႈတင်းလူင်ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈဝဵင်းပႃႇပုလုၼ်ႇၼၼ်ႉတၵ်းႁွတ်ႈထိုင်မႃးဢေႃႈ။ဢမ်ႇလႆႈၵိုတ်းလႆႈၵျၢၼ်ႇဝႆႉသေၸိူဝ်ႉသေပိူင်ႈ၊ဝႃႈၼႆထႃႇဝရႃႉၽြႃးမီးဢမိင်ႉဢေႃႈ။
၁၈ ၶဝ်တၵ်းဢဝ်လုၵ်ႈၸဝ်ႈလၢၼ်ၸဝ်ႈမႂ်းဢၼ်သိုပ်ႇဢွၵ်ႇတိူၼ်းဢွၵ်ႇတီႈမႂ်းမႃးၸိူဝ်းၼၼ်ႉၵႂႃႇလႄႈၶဝ်ၼၼ်ႉတၵ်းပဵၼ်ၵူၼ်းပႂ်ႉၵူၼ်းထိင်းၵႃႈၼႂ်းႁေႃၶမ်းၶုၼ်ႁေႃၶမ်းပႃႇပုလုၼ်ႇပုၼ်ႉဢေႃႈ၊ဝႃႈၼင်ႇၼႆဢေႃႈ။
၁၉ ႁေႇၸၵိၵေႃႈၶိုၼ်းလၢတ်ႈတီႈဢိသႃႇယလႄႈဝႃႈ၊-ၼုၵ်ႉၵပၢတ်ႈထႃႇဝရႃႉၽြႃးဢၼ်မႂ်းလႆႈပျၢၼ်ႇလႆႈလၢတ်ႈၼႆႉလီယဝ်ႉ၊ဝႃႈၼင်ႇၼႆဢေႃႈ။လွင်ႈမၼ်းၸမ်းမၼ်းလၢတု်ၼႂ်းၸႂ်မၼ်းလႄႈဝႃႈ၊-ပေႃးမီးတၢင်းဢၼ်ၼိမ်ဢၼ်လီ၊တၢင်းဢၼ်ပႂ်ႉသႅတ်ႈၸႃႇၼႂ်းၸူဝ်ႈပၢၼ်ၵဝ်ဢသၢၵ်ႈလိပ်းယူႇၼႆႉၸိုင်လီယဝ်ႉ၊ဝႃႈၼႆဢေႃႈ။
၂၀ လွင်ႈတၢင်းႁေႇၸၵိဢၼ်ယင်းၵိုတ်းယင်းၵျၢၼ်ႇလွင်ႈတၢင်းဢၼ်မၼ်းႁဵတ်းၼမ်ႉၼွင်တင်းတေႃႈၼမ်ႉလႄႈဢဝ်ၼမ်ႉသႂၢင်းၶဝ်ႈၵႃႈၼႂ်းဝဵင်းၸိူဝ်းၼၼ်ႉတႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။
၂၁ ႁေႇၸၵိၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈမၼႃႇသေႇလုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။