Chapter
၃
မေႃႇၽလုၵ်ႉၽိုၼ်ႉ
၁ ၼႂ်းပီႊဢၼ်ယုဝ်ႇသၽတ်ႉၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသိပ်းပၢႆပႅတ်ႇပီႊၼၼ်ႉယုဝ်ႇရၢမ်ႇလုၵ်ႈၸၢႆးဢႃႇႁပ်ႉၼၼ်ႉၸႃႉၼင်ႈႁၢင်ႈၼင်ႈႁေႃမိူင်းဢိသရေႇလၵႃႈၼႂ်းဝဵင်းသမႃႇရိလႄႈဢုပ်ႉပိူင်ႇၸၢမ်ႇၸႃးသိပ်းပၢႆသွင်ပီႊဢေႃႈ။
၂ မၼ်းၼၼ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။ၵူၺ်းၵႃႈမၼ်းဢမ်ႇႁဵတ်းမိူၼ်ၸိူဝ်ႉၼင်ႇပေႃႈမၼ်းမေႈမၼ်းၸိူဝ်းၼၼ်ႉ။မၼ်းပႄႇၽဵဝ်ႈပႅတ်ႈသဝ်တီႈၵူဝ်းၵႂၢႆႇပႃႇလဢၼ်ပေႃႈမၼ်းႁဵတ်းၼၼ်ႉဢေႃႈ။
၃ ၼႂ်းဝႃႈၼၼ်သေၵေႃႈမၼ်းယင်းၸပ်းၸွမ်းဢပျႅတ်ႈတူႉၸရိူၵ်ႈဢၼ်ယေႇရူဝ်းပုမ်ႇလုၵ်ႈၸၢႆးၼေႇပတ်ႉႁဵတ်းၼၼ်ႉလႄႈႁႂ်ႈၵူၼ်းမဵဝ်းဢိသရေႇလတင်းလၢႆၽိတ်းပိူင်ႈၼၼ်ႉဢေႃႈ။မၼ်းဢမ်ႇပႄႇဢမ်ႇပႅတ်ႈဢပျႅတ်ႈၸိူဝ်းၼၼ်ႉ။
၄ မေႇသႃႇၶုၼ်လူင်မေႃႇၽၼၼ်ႉပဵၼ်ၵေႃႉဢၼ်လဵင်ႉထိင်းသူဝ်းလႄႈလႆႈတၵ်းလႆႈဢဝ်ၶူၼ်သူဝ်းဢွၼ်ႇသႅၼ်တူဝ်တင်းသူဝ်းပေႃႈသႅၼ်တူဝ်ပၼ်တီႈၶုၼ်ႁေႃၶမ်းဢိသရေႇလဢေႃႈ။
၅ မိူဝ်ႈဢၼ်ဢႃႇႁပ်ႉတၢႆၼၼ်ႉၸိုင်ၶုၼ်လူင်မေႃႇၽၼၼ်ႉလုၵ်ႉၽိုၼ်ႉၶုၼ်ႁေႃၶမ်းဢိသရေႇလဢေႃႈ။
၆ မိူဝ်ႈၼၼ်ႉၶုၼ်လူင်ယုဝ်ႇရၢမ်ႇဢွၵ်ႇသေၵႃႈၼႂ်းဝဵင်းသမႃႇရိလႄႈၼပ်ႉဢၢၼ်ႇဢဝ်ၸရၢင်းၵူၼ်းမဵဝ်းဢိသရေႇလတင်းသဵင်ႈတင်းလူင်ဢေႃႈ။
၇ မၼ်းသင်ႇၶေႃႈၵႂၢမ်းၵႂႃႇၵႃႈတီႈယုဝ်ႇသၽတ်ႉၶုၼ်ႁေႃၶမ်းယုတၼၼ်ႉလႄႈဝႃႈ၊-ၶုၼ်လူင်မေႃႇၽၼၼ်ႉလုၵ်ႉၽိုၼ်ႉတေႃႇၵဝ်ၶႃႈယဝ်ႉ။ၸဝ်ႈတၵ်းၸွမ်းလူၺ်ႈၵၼ်တင်းၵဝ်ၶႃႈၵႂႃႇတိုၵ်းမိူင်းမေႃႇၽႁိုဝ်၊ဝႃႈၼင်ႇၼႆလႄႈမၼ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ၵဝ်ၶႃႈတၵ်းၶီႇသိုၵ်းၶိုၼ်ႈၵႂႃႇဢေႃႈ။ၵဝ်ၶႃႈၼႆႉပဵၼ်မိူၼ်ၸိူဝ်ႉၼင်ႇၸဝ်ႈယူႇ၊ၵူၼ်းၵဝ်ၶႃႈၸိူဝ်းၼႆႉပဵၼ်မိူၼ်ၸိူဝ်ႉၼင်ႇၵူၼ်းၸဝ်ႈၸိူဝ်းၼၼ်ႉယူႇသေလႄႈမႃႉၵဝ်ၶႃႈတင်းလၢႆၵေႃႈပဵၼ်မိူၼ်ၸိူဝ်ႉၼင်ႇမႃႉၸဝ်ႈၸိူဝ်းၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၈ မၼ်းသမ်ႉထၢမ်လႄႈဝႃႈ၊-ႁဝ်းတၵ်းၶီႇသိုၵ်းၸွမ်းသဵၼ်ႈတၢင်းလႂ်ၶိုၼ်ႈၸူး၊ဝႃႈၼင်ႇၼႆလႄႈယုဝ်ႇႁမ်ႇၶိုၼ်းလၢတ်ႈလႄႈဝႃႈ၊-ၸွမ်းသဵၼ်ႈတၢင်းထိူၼ်ႇဢေးတုမ်ႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၉ ၼင်ႇၼၼ်လႄႈၶုၼ်ႁေႃၶမ်းဢိသရေႇလ၊ၶုၼ်ႁေႃၶမ်းယုတ၊ၶုၼ်ႁေႃၶမ်းဢေႇတုမ်ႇၸိူဝ်းၼၼ်ႉၽွမ်ႉၵၼ်ၶီႇသိုၵ်းၵႂႃႇလႄႈလဵပ်ႈၵႂႃႇၶၢဝ်းတၢင်းၸဵတ်းဝၼ်းသေယဝ်ႉဢမ်ႇမီးၼမ်ႉပုၼ်ႈဢၼ်ၵူၼ်းသိုၵ်းတင်းလၢႆဢိၵ်ႇတင်းတရိၵ်ႈသၢၼ်ႇဢၼ်ပႃးတီႈၶဝ်ၼၼ်ႉၸိူဝ်းၼၼ်ႉတၵ်းၵိၼ်ၼၼ်ႉဢေႃႈ။
၁၀ ၶုၼ်ႁေႃၶမ်းဢိသရေႇလလၢတ်ႈလႄႈဝႃႈ၊-ဢလူဝ်၊ဢလူဝ်၊ထႃႇဝရႃႉၽြႃးႁွင်ႉဢဝ်ႁဝ်းၶုၼ်ႁေႃၶမ်းသၢမ်ပႃးၼႆႉမႃးႁႂ်ႈလႆႈဢဝ်ဢၢပ်ႈပၼ်ၵႃႈၼႂ်းမိုဝ်းၵူၼ်းမေႃႇၽတင်းလၢႆလူင်ပေႇ၊ဝႃႈၼင်ႇၼႆဢေႃႈ။
၁၁ ယုဝ်ႇသၽထၢမ်လႄႈဝႃႈ၊-ပုၼ်ႈဢၼ်ႁဝ်းတၵ်းလႆႈတွင်ႉထၢမ်တီႈထႃႇဝရႃႉၽြႃးၸိုင်ၵႃႈတီႈၼႆႉဢမ်ႇမီးပရေႃးၽႅတ်ႈထႃႇဝရႃႉၽြႃးသေပႃးႁိုဝ်၊ဝႃႈၼင်ၼႆလႄႈၶုၼ်ႁေႃၶမ်းဢိသရေႇလၵေႃႉၼိုင်ႈလဝ်ႈလၢတ်ႈလႄႈဝႃႈ၊-ဢေးလိသေးလုၵ်ႈၸၢႆးသႃႇၽတ်ႉၵေႃႉဢၼ်ပဵၼ်တိၼ်ပဵၼ်မိုဝ်းဢေးလိယၼၼ်ႉမီးၵႃႈတီႈၼႆႉၶႃႈဢေႃႈ။
၁၂ မိူဝ်ႈဢၼ်ဝႃႈၼင်ႇၼႆၸိုင်ယုဝ်ႇသၽတ်ႉၵေႃႈလၢတ်ႈလႄႈဝႃႈ၊-ၼုၵ်ႉၵပၢတ်ႈထႃႇဝရႃႉၽြႃးမီးတီႈမၼ်းၼၼ်ႉဢေႃႈ၊ဝႃႈၼင်ႈၼႆသေလႄႈၶုၼ်ႁေႃၶမ်းဢိသရေႇလဢိၵ်ႇတင်းယုဝ်ႇသၽတ်ႉတင်းၶုၼ်ႁေႃၶမ်းဢေးတုမ်ႇၸိူဝ်းၼၼ်ႉဢွၼ်ၵၼ်လူင်းၸူးၵႃႈတီႈမၼ်းၼၼ်ႉဢေႃႈ။
၁၃ ဢေးလိသေးလၢတ်ႈတီႈၶုၼ်ႁေႃၶမ်းဢိသရေႇလလႄႈဝႃႈ၊-ၶႃႈၸဝ်ႈၸၢပ်ႈသႅင်ႇၵၼ်တင်းၸဝ်ႈႁဝ်းၸိူဝ်ႉၼင်ႇႁိုဝ်။ၵႂႃႇၸူးၵႃႈတီႈပရေႃးၽႅတ်ႈပေႃႈၸဝ်ႈႁဝ်းဢိၵ်ႇတင်းပရေႃးၽႅတ်ႈမေႈၸဝ်ႈႁဝ်းၸိူဝ်းၼၼ်ႉတႃႉ၊မိူဝ်ႈဢၼ်ဝႃႈၼင်ႇၼႆၸိုင်ၶုၼ်ႁေႃၶမ်းသၢမ်ပႃးၼၼ်ႉၵေႃႈလၢတ်ႈလႄႈဝႃႈ၊-ထႃႇဝရႃႉၽြႃးႁွင်ႉဢဝ်ႁဝ်းၶုၼ်ႁေႃၶမ်းသၢမ်ႇပႃးမႃးႁႂ်ႈလႆႈဢဝ်ဢၢပ်ႈပၼ်ၼႂ်းမိုဝ်းၵူၼ်းမေႃႇၽတင်းလၢႆလူင်ပေႇ၊ဝႃႈၼင်ႇၼႆလႄႈဢေးလိသေးၵေႃႈလၢတ်ႈလႄႈဝႃႈ၊-
၁၄ ၵႃႈၼင်ႇဢၼ်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးဢၼ်ၶႃႈၸဝ်ႈၵူဝ်းၵႂၢႆႇၼၼ်ႉဢသၢၵ်ႈလိပ်းယူႇၼၼ်ႉသင်ၶႃႈၸဝ်ႈဢမ်ႇထွၵ်ႈလူၺ်ႈၼႃႈယုဝ်ႇသၽတ်ႉၶုၼ်ႁေႃၶမ်းယုတၸိုင်ၶႃႈၸဝ်ႈဢမ်ႇၶႂ်ႈတူၺ်းၶႂ်ႈႁၼ်ၸဝ်ႈႁဝ်း။ႁွင်ႉဢဝ်ၵူၼ်းလဵတ်းတိင်ႇမႃးတီႈၶႃႈတႃႉ၊ဝႃႈၼင်ႇၼႆဢေႃႈ။
၁၅ မိူဝ်ႈဢၼ်ၵူၼ်းလဵတ်းတိင်ႇၼၼ်ႉလဵတ်းတိင်ႇယူႇၼၼ်ႉၸိုင်မိုဝ်းထႃႇဝရႃႉၽြႃးႁွတ်ႈထိုင်ၵႃႈၼိူဝ်မၼ်းလႄႈမၼ်းၼၼ်ႉလၢတ်ႈလႄႈဝႃႈ၊-ထႃႇဝရႃႉၽြႃးမီးဢမိင်ႉဝႆႉၸမ်း၊-ၶုတ်းႁဵတ်းၶုမ်ႁဵတ်းလုၵ်းၵႃႈတီႈပၢင်ႇႁူၺ်ႈၼႆႉၼမ်ၼမ်တႃႉ။
၁၆ လွင်ႈမၼ်းၸမ်းထႃႇဝရႃႉၽြႃးမီးဢမိင်ႉလႄႈဝႃႈ၊-သူယင်းဢမ်ႇႁၼ်ၽူၼ်ႁၼ်လူမ်းလႄႈပၢင်ႇႁူၺ်ႈၼႆႉတၵ်းတဵမ်ဝႆႉတင်းၼမ်ႉလႄႈ
၁၇ သူဢိၵ်ႇတင်းသူဝ်းဝူဝ်းသူတင်းတရိၵ်ႈသၢၼ်ႇသူတၵ်းလႆႈၵိၼ်ဢေႃႈ။လွင်ႈတၢင်းၼၼ်ႉပဵၼ်လွင်ႈတၢင်းဢၼ်လဵၵ်ႉဢၼ်ဢွၼ်ႇၵႃႈတႂ်ႈတႃထႃႇဝရႃႉၽြႃးဢေႃႈ။
၁၈ ၵူၼ်းမေႃႇၽတင်းလၢႆၵေႃႈမၼ်းၸဝ်ႈတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းသူဢေႃႈ။သူတၵ်းလႆႈတိုၵ်းတေႃးယႃႉပႅတ်ႈဝဵင်းၵႃႈဢၼ်မၼ်ႈၶိူင်ႇဢိၵ်ႇတင်းဝဵင်းၵႃႈဢၼ်ႁၢင်ႊလီႁၢင်ႊငၢမ်းတင်းလၢႆလႄႈ
၁၉ ၽၼ်းတူၼ်ႈမႆႉဢၼ်လီသုင်းလီသွင်ႇၵႃႈမီးလူမ်ႉပႅတ်ႈဢေႃႈ။တၵ်းလႆႈဢဝ်လိၼ်ထိူမ်ပႅတ်ႈၼမ်ႉမေႃႇၵႃႈမီးလႄႈဢဝ်တင်းမၢၵ်ႇႁိၼ်ယႃႉၵႂၢၵ်ႈလိၼ်ဢၼ်လီၵႃႈမီးၸိူဝ်းၼၼ်ႉပႅတ်ႈဢေႃႈ၊ဝႃႈၼင်ႇၼႆဝႆႉယဝ်ႉဝႃႈၼင်ႇၼႆဢေႃႈ။
၂၀ ၵၢင်ၼႂ်ၶိင်ႇမိူဝ်ႈဢၼ်ပုၵ်ႉၸေႃႇၶိူင်ႈပုၵ်ႉၸေႃႇၽေႃးၸဵၼ်ႇၼၼ်ႉၼမ်ႉလုၵ်ႉသေၵႃႈတီႈသဵၼ်ႈတၢင်းဢေးတုမ်ႇလႆမႃးလႄႈတဵမ်မိူင်းဝႆႉတင်းမိူင်းဢေႃႈ။
၂၁ ၵူၼ်းမိူင်းမေႃႇၽတင်းသဵင်ႈတင်းလူင်ငိၼ်းလွင်ႈဢၼ်ၶုၼ်ႁေႃၶမ်းၸိူဝ်းၼၼ်ႉၶီႇသိုၵ်းမႃးၼၼ်ႉသေယဝ်ႉႁႂ်ႈၵူၼ်းဢၼ်ယိပ်းၵမ်လၢၵ်ႈၼၢၵ်ႈလႆႈလဵၵ်ႉလဵၵ်ႉယႂ်ႇယႂ်ႇၵႃႈမီးၼၼ်ႉၸူႉၵၼ်တုမ်ၵၼ်သေလႄႈၶျႃးတပ်ႉၶဝ်ႁႄႉယူႇၵႃႈတီႈၶွပ်ႇၼမ်ႉလႅၼ်လိၼ်ဢေႃႈ။
၂၂ မိူဝ်ႈဢၼ်ၶဝ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉၼၼ်ႉငဝ်းဢရွင်ႇၵၢင်ဝၼ်းထွင်ႇသႂ်ႇၵႃႈတီႈၼမ်ႉၼၼ်ႉလႄႈၵူၼ်းမိူင်းမေႃႇၽၸိူဝ်းၼၼ်ႉႁၼ်ၼမ်ႉဢၼ်မီးသိုဝ်ႈၶဝ်ၼၼ်ႉလႅင်ႊဝႆႉမိူၼ်ၸိူဝ်ႉၼင်ႇလိူတ်ႈၼၼ်ႉလႄႈၶဝ်လၢတ်ႈၵၼ်လႄႈဝႃႈ၊-ဢၼ်ၼၼ်ႉပဵၼ်လိူတ်ႈဢေႃႈ။
၂၃ ၶုၼ်ႁေႃၶမ်းၸိူဝ်းၼၼ်ႉၼင်ႇၵၼ်ၵၼ်ၽၼ်းၵၼ်လႄႈဢဝ်ၵၼ်တၢႆယဝ်ႉယူဝ်း။ၵူၼ်းမေႃႇၽႃႉၶဝ်ဢိူၺ်း။ဢွၼ်ၵၼ်ၵႂႃႇလႄႈႁိမ်ႁူင်ႇဢဝ်တႃႉ၊ဝႃႈၼင်ႇၼႆဢေႃႈ။
၂၄ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈတပ်ႉဢိသရေႇလၼၼ်ႉၸိုင်ၵူၼ်းမဵဝ်းဢိသရေႇလၸိူဝ်းၼၼ်ႉဢွၼ်ၵၼ်လုၵ်ႉလႄႈတိုၵ်းတေႃးယႃႉပႅတ်ႈၵူၼ်းမေႃႇၽၸိူဝ်းၼၼ်ႉထၼ်ႈပေႃးႁႂ်ႈၶဝ်လႆႈဢွၵ်ႇပၢႆႈဢေႃႈ။ၶဝ်ဢွၼ်ၵၼ်လိုပ်ႈၸွမ်းလမ်းၸွမ်းတေႃႇထိုင်ႁွတ်ႈမိူင်းမေႃႇၽလႄႈယႃႉၶဝ်ပႅတ်ႈဢေႃႈ။
၂၅ ၶဝ်ဢွၼ်ၵၼ်ၵိူၼ်ႇယႃႉဝဵင်းတင်းလၢႆပႅတ်ႈလႄႈၵူၼ်းၵူႈၵေႃႉဢွၼ်ၵၼ်ဢဝ်မၢၵ်ႇႁိၼ်ထႅမ်ႈသႂ်ႇၵႃႈၼိူဝ်ၼႃးဢၼ်လီၵႃႈမီးၸိူဝ်းၼၼ်ႉလႄႈၼႃးၸိူဝ်းၼၼ်ႉတဵမ်ဝႆႉတင်းမၢၵ်ႇႁိၼ်ဢေႃႈ။ၼမ်ႉဢွၵ်ႇႁူးၵႃႈမီးၵေႃႈၶဝ်ဢွၼ်ၵၼ်ဢဝ်လိၼ်ထိူမ်လႄႈၽၼ်းပႅတ်ႈတူၼ်ႈမႆႉဢၼ်လီသုင်းလီသွင်ႇၵႃႈမီးလူမ်ႉပႅတ်ႈဢေႃႈ။တီႈဝဵင်းၵိရႁရိတ်ႉၼၼ်ႉၵူၺ်းၶဝ်ဝႆႉၵိုတ်းဝႆႉၵျၢၼ်ႇမၢၵ်ႇႁိၼ်တင်းလၢႆဢေႃႈ။ၵူၺ်းၵႃႈၵူၼ်းမေႃယိပ်းၵၢင်ႇၵူင်ႇၸိူဝ်းၼၼ်ႉဢွၼ်ၵၼ်လႄႇပိုတ်းယိုဝ်းသႂ်ႇဢေႃႈ။
၂၆ ၶုၼ်လူင်မေႃႇၽႁူႉႁၼ်လွင်ႈဢၼ်ၶဝ်ဢမ်ႇၶၢမ်ႇတိုၵ်းၶၢမ်ႇတေႃးလႆႈၼၼ်ႉသေယဝ်ႉမၼ်းႁွင်ႉဢဝ်ၵူၼ်းဢၼ်ယိပ်းလၢပ်ႇၸဵတ်းပၢၵ်ႇသေလႄႈဢဝ်ႁႅင်းဢွၵ်ႇႁႂ်ႈလႆႈယႃႉတပ်ႉၶုၼ်ႁေႃၶမ်းဢေႇတုမ်ႇသေၵေႃႈဢမ်ႇယႃႉလႆႈ။
၂၇ ၵမ်းၼၼ်ႉမၼ်းဢဝ်လုၵ်ႈၸၢႆးတူၼ်ႈမၼ်းဢၼ်ထိူၵ်ႈၼင်ႈႁၢင်ႈၼင်ႈႁေႃတၢင်တူဝ်မၼ်းၼၼ်ႉသေလႄႈဢဝ်မၼ်းႁဵတ်းယိၸ်ႉဢၼ်တုတ်ႇၽႆးၵႃႈၼိူဝ်လမ်းဝဵင်းဢေႃႈ။တၢင်းၸႂ်မႆႈၶႆႈၸႃႉၸဝ်ႈႁွတ်ႈထိုင်ၵႃႈၼိူဝ်ၵူၼ်းမဵဝ်းဢိသရေႇလတင်းလၢႆလႄႈၶဝ်ဢွၼ်ၵၼ်ဝႆႉမိူင်းၼၼ်ႉသေလႄႈၶဝ်ၶိုၼ်းမိူဝ်းၵႂႃႇၸူးၵႃႈတီႈမိူင်းၶဝ်သေဢေႃႈ။