Chapter
၁၉
ဝဵင်းယေႇရုသလႅမ်ႇတလေႆႈလွတ်ႈ
၁ ၶုၼ်လူင်ႁေႇၸၵိငိၼ်းၵႂၢမ်းၼၼ်ႉသေယဝ်ႉၸၵ်ႉသိၵ်ႇၶူဝ်းၼုင်ႈမၼ်းသေလႄႈဢဝ်ၶူဝ်းၼုင်ႈၼင်ပေႃၼုင်ႈမႆႊသေလႄႈၶဝ်ႈၵႂႃႇၵႃႈၼႂ်းပိၵ်ႉမၢၼ်ႇထႃႇဝရႃႉၽြႃးဢေႃႈ။
၂ မၼ်းပွႆႇၸႂ်ႉဢေးလျႃႇၵိမ်ႇၵေႃႉဢၼ်ဢုပ်ႉၵႃႈၼိူဝ်ႁၢင်ႈႁေႃၶမ်းဢိၵ်ႇတင်းၸရေးလူင်သေႇပၼဢၼ်ပဵၼ်ယိတ်ႉပရေႃးႁိၵ်ႈဢၼ်ဢသၢၵ်ႈယႂ်ႇၼၼ်ႉႁႂ်ႈၶဝ်ၼုင်ႈမႆႊၶူဝ်းၼုင်ႈၼင်ပေႃသေလႄႈၵႂႃႇၵႃႈတီႈပရေႃးၽႅတ်ႈဢိသႃႇယဢၼ်ပဵၼ်လုၵ်ႈၸၢႆးဢႃႇမုတ်ႉၼၼ်ႉဢေႃႈ။
၃ ၶဝ်ဢွၼ်ၵၼ်လၢတ်ႈတီႈမၼ်းလႄႈဝႃႈ၊-ၶုၼ်လူင်ႁေႇၸၵိသင်ႇလၢတ်ႈမႃးလႄႈဝႃႈၸမ်း၊-ဝၼ်းမိူဝ်ႈၼႆႉပဵၼ်ဝၼ်းတုၵ်ႉၶႃႉဝၼ်းဢၼ်လႆႈၶၢမ်ႇတၢင်းဢၼ်သင်ႇသွၼ်သုင်းမႃႉဝၼ်းဢၼ်လႆႈၶၢမ်ႇတၢင်းဢၼ်သေႉသွမ်းဢေႃႈ။ႁွတ်ႈထိုင်ၶိင်ႇဢၼ်ၵိူတ်ႇလဵင်ႉလုၵ်ႈလႄႈဢမ်ႇမီးႁႅင်းဢၼ်ႁႂ်ႈပေႃးၵိူတ်ႇလဵင်ႉလုၵ်ႈလႆႈ။
၄ ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈမႂ်းငိၼ်းၵႂၢမ်းၸွမ်ႈသိုၵ်းၶုၼ်ႁေႃၶမ်းဢႃႇသုရိပွႆႇၸႂ်ႉမႃးႁႂ်ႈလႆႈမႃးသေႉသွမ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉလႄႈႁႂ်ႈၽြႃးပဵၼ်ၸဝ်ႈသုင်းမႃႉမၼ်းၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈမႂ်းငိၼ်းၵႂၢမ်းၼၼ်ႉသေၵမ်းလူၺ်ႈ။မႂ်းၵေႃႈသူးတွင်းႁဵတ်းပထၼႃႇပုၼ်ႈၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇဝႆႉယူႇၼၼ်ႉသေၵမ်း၊ဝႃႈၼင်ႇၼႆဢေႃႈ။
၅ ၼင်ႇၼၼ်လႄႈၶုၼ်လူင်ႁေႇၸၵိၸိူဝ်းၼၼ်ႉႁွတ်ႈထိုင်ၵႃႈတီႈဢိသႃႇယသေယဝ်ႉဢိသႃႇယၶိုၼ်းလၢတ်ႈတီႈၶဝ်လႄႈဝႃႈ၊-ဢွၼ်ၵၼ်ၶိုၼ်းလဝ်ႈလၢတ်ႈတီႈၸဝ်ႈသူလႄႈဝႃႈ၊-
၆ ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ယႃႇပေၵူဝ်ပေႁႄၵွပ်ႈပိူဝ်ႈၵႂၢမ်းဢၼ်မႂ်းလႆႈငိၼ်းၶႃႈၶုၼ်ႁေႃၶမ်းဢႃႇသုရိသေႉသွမ်းၵဝ်ၼၼ်ႉ။
၇ ၵဝ်တၵ်းဢဝ်ၸႂ်သၽေႃးတၢင်ႇၸိူဝ်ႉတၢင်ႇဢၼ်သႂၢင်းသႂ်ႇပၼ်ၵႃႈၼႂ်းမၼ်းလႄႈမိူဝ်ႈဢၼ်မၼ်းငိၼ်းသတၢင်းသဵင်ၶၢဝ်ၼၼ်ႉၸိုင်မၼ်းတေၶိုၼ်းမိူဝ်းၵႂႃႇၵႃႈတီႈမိူင်းတူဝ်ၸဝ်ႈၵဝ်ႇဢေႃႈ။ၵဝ်တၵ်းႁႂ်ႈမၼ်းတၢႆလူၺ်ႈလၢပ်ႇလႅဝ်းၵႃႈၼႂ်းမိူင်းတီႈယူႇမၼ်းၼၼ်ႉဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၈ မိူဝ်ႈၼၼ်ႉၸွမ်ႈသိုၵ်းလူင်ငိၼ်းလွင်ႈဢၼ်ၶုၼ်ႁေႃၶမ်းဢႃႇသုရိဢွၵ်ႇသေၵႃႈတီႈဝဵင်းလႃႇၶိသၵႂႃႇယဝ်ႉၼၼ်ႉၸိုင်မၼ်းၶိုၼ်းမိူဝ်းၵႂႃႇလႄႈႁူပ်ႉထူပ်းၶုၼ်ႁေႃၶမ်းၼၼ်ႉတိုၵ်းတေႃးဝဵင်းလိပၼယူႇဢေႃႈ။
၉ လိုၼ်းၼၼ်ႉၶုၼ်ၶုၼ်ႁေႃၶမ်းလႆႈငိၼ်းပိူၼ်ႈလဝ်ႈလၢတ်ႈလွင်ႈတိရိၵ်ႉၵဢၼ်ပဵၼ်ၶုၼ်လူင်ၵုသၼၼ်ႉၶီႇသိုၵ်းမႃးႁႂ်ႈလႆႈတိုၵ်းတေႃးမၼ်းၼၼ်ႉၸိုင်မၼ်းပွႆႇၸႂ်ႉၽူႈတၢင်းတူဝ်တင်းလၢႆၵႂႃႇၵႃႈတီႈၶုၼ်ႁေႇၸၵိလႄႈႁႂ်ႈလႆႈလဝ်ႈလၢတ်ႈဝႃႈ၊-
၁၀ ၵႂၢမ်းဢၼ်သူတၵ်းလႆႈလၢတ်ႈတီႈႁေႇၸၵိၶုၼ်လူင်ယုတၼၼ်ႉၸမ်း၊-ယႃႇပေႁႂ်ႈၽြႃးဢၼ်မႂ်းဢိင်ပိုင်ႈၼၼ်ႉပႅတ်ႉလႅၼ်မႂ်းလႄႈဝႃႈ၊-ဝဵင်းယေႇရုသလႅမ်ႇတၵ်းဢမ်ႇလႆႈႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းဢႃႇသုရိၵူၺ်း၊ဝႃႈၼင်ႇၼႆၼၼ်ႉသေၵမ်း။
၁၁ တူၺ်းလူ။မႂ်းလႆႈငိၼ်းလွင်ႈဢၼ်ၶုၼ်ႁေႃၶမ်းဢႃႇသုရိတင်းလၢႆႁဵတ်းတီႈမိူင်းတင်းသဵင်ႈတင်းလူင်လႄႈယႃႉပႅတ်ႈမူတ်းမူတ်းသဵင်ႈသဵင်ႈယဝ်ႉၼၼ်ႉဢေႃႈ။
၁၂ တူဝ်မႂ်းတၵ်းလွတ်ႈႁိုဝ်။ၽြႃးၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉယၢမ်ႈၵႄႇသႄႇၼုၵ်ႈဢဝ်ၶဝ်ၸိူဝ်းဢၼ်ပူႇၵဝ်မွၼ်ႇၵဝ်ယႃႉပႅတ်ႈဢၼ်ဝႃႈၵူၼ်းမဵဝ်းၵေႃးၸမ်ႇၵူၼ်းမဵဝ်းၶႃႇရၢၼ်ႇၵူၼ်းမဵဝ်းရေႇၸပိၵူၼ်းမဵဝ်းဢေးတိၼ်ႇဢၼ်မီးၵႃႈတီႈဝဵင်းတေႇလၸႃႇၸိူဝ်းၼၼ်ႉယဝ်ႉႁိုဝ်။
၁၃ ၶုၼ်လူင်ဝဵင်းႁႃႇမတ်ႉၶုၼ်လူင်ဝဵင်းဢႃႇပတ်ႉ၊ၶုၼ်လူင်ဢၼ်ဢုပ်ႉပိူင်ႇဝဵင်းသေႇၽရဝိမ်ႇ၊ၶုၼ်လူင်ဝဵင်းႁေႇၼ၊ၶုၼ်လူင်ဝဵင်းဢိဝႃႇၸိူဝ်းၼၼ်ႉမီးၵႃႈလႂ်၊ဝႃႈၼင်ႇၼႆဢေႃႈ။
တၢင်းသူးတွင်းႁေႇၸၵိ
၁၄ လိၵ်ႈၼၼ်ႉၸိုင်ႁေႇၸၵိႁပ်ႉၶၢမ်ႇဢဝ်ၵႃႈတီႈမိုဝ်းၽူႈတၢင်တူဝ်ၸိူဝ်းၼၼ်ႉလႄႈမၼ်းၽတ်းတူၺ်းသေယဝ်ႉႁေႇၸၵိၶိုၼ်ႈၸူးၵႃႈတီႈပိၵ်ႉမၢၼ်ႇထႃႇဝရႃႉၽြႃးလႄႈဢဝ်ၽႄႇၵီႈဝႆႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၁၅ မိူဝ်ႈၼၼ်ႉၶုၼ်လူင်ႁေႇၸၵိသူးတွင်းၵႃႈတီႈၽၢႆႇၼႃႈထႃႇဝရႃႉၽြႃးလႄႈဝႃႈၸမ်း၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢၼ်ၼင်ႈယူႇၵႃႈၼိူဝ်ၶေႇရုၽိမ်ႇၼၼ်ႉတီႈၶႃႈ။ၸဝ်ႈႁဝ်းပဵၼ်ၽြႃးပဵၼ်ၸဝ်ႈတီႈၶႃႈဢေႃႈ။ၸဝ်ႈႁဝ်းသူႇလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈၵူႈသိုင်ႇၵူႈမိူင်းၵႃႈဢၼ်မီးယူႇၵႃႈၼိူဝ်လိၼ်မိူင်းၼႆႉတီႈၶႃႈဢေႃႈ။ၸဝ်ႈႁဝ်းႁဵတ်းပဵၼႃ်ႉၵၢင်ႁၢဝ်တင်းလိၼ်မိူင်းတီႈၶႃႈဢေႃႈ။
၁၆ ထႃႇဝရႃႉၽြႃးတီႈၶႃႈ။ၶႅၼ်းတေႃႈႁေႉႁူၸဝ်ႈႁဝ်းလႄႈထွမ်ႇငိၼ်းသေၵမ်းတီႈၶႃႈ။ထႃႇဝရႃႉၽြႃးတီႈၶႃႈ။ၶႅၼ်းတေႃႈၽုၺ်ႇတႃမိုၼ်းတႃၸဝ်ႈႁဝ်းလႄႈလူတူၺ်းသေၵမ်းတီႈၶႃႈ။ထွမ်ႇငိၼ်းၵႂၢမ်းၸွမ်ႈသိုၵ်းဢၼ်ပွႆႇၸႂ်ႉမၼ်းလႄႈႁႂ်ႈလႆႈသေႉသွမ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉသေၵမ်းတီႈၶႃႈ။
၁၇ ထႃႇဝရႃႉၽြႃးတီႈၶႃႈ။ၶုၼ်ႁေႃၶမ်းဢႃႇသုရိၸိူဝ်းၼၼ်ႉယႃႉၵူၼ်းၵူႈသိုင်ႇၵူႈမိူင်းဢိၵ်ႇတင်းၼမ်ႉၶဝ်လိၼ်ၶဝ်ပႅတ်ႈဢမၢၼ်ႇၶၼ်ပဵၼ်ၶႃႈဢေႃႈ။
၁၈ ၶဝ်ဢဝ်ၽြႃးၶဝ်တင်းလၢႆထႅမ်ႈတူၵ်းသႂ်ႇၵႃႈၼႂ်းၽႆးတီႈၶႃႈယဝ်ႉ။ၵွပ်ႈပိူဝ်ႈဢၼ်ၸိူဝ်းၼၼ်ႉဢမ်ႇပဵၼ်ၽြႃး၊ပဵၼ်မႆႉတင်းမၢၵ်ႇႁိၼ်ဢၼ်ၵူၼ်းဢဝ်မိုဝ်းႁဵတ်းၼၼ်ႉလႄႈၶဝ်လႆႈယႃႉပႅတ်ႈတီႈၶႃႈယဝ်ႉ။
၁၉ တေႃႈလဵဝ်ၼႆႉထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈတီႈၶႃႈ။လွင်ႈၼင်ႇႁိုဝ်ၵူႈသိုင်ႇၵူႈမိူင်းၵႃႈဢၼ်မီးၵႃႈၼိူဝ်လိၼ်မိူင်းၼႆႉၸိူဝ်းၼၼ်ႉတၵ်းႁူႉလွင်ႈဢၼ်ၸဝ်ႈႁဝ်းထႃႇဝရႃႉၽြႃးဢၼ်ဝႃႈၸဝ်ႈႁဝ်းသူႇလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈၼၼ်ႉၸိုင်ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်ဢွၵ်ႇသေၵႃႈၼႂ်းမိုဝ်းၶုၼ်ၼၼ်ႉသေၵမ်းတီႈၶႃႈ။ၶႃႈၸဝ်ႈတွင်းပၢၼ်တီႈၶႃႈဢေႃႈ၊ဝႃႈၼင်ၼႆဢေႃႈ။
သၼႃႇၶရိပ်ႉတၵ်းလႆႈတူၵ်းသုမ်း
၂၀ မိူဝ်ႈၼၼ်ႉဢိသႃႇယလုၵ်ႈၸၢႆးဢႃႇမုတ်ႉၼၼ်ႉသူင်ႇၶေႃႈၵႂၢမ်းၵႂႃႇၵႃႈတီႈၶုၼ်ႁေႇၸၵိလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈၸမ်း၊-ၵွပ်ႈပိူဝ်ႈဢၼ်မႂ်းႁဵတ်းပထၼႃႇတီႈၵဝ်လူၺ်ႈလွင်ႈသၼႃႇၶရိပ်ႉၶုၼ်ႁေႃၶမ်းဢႃႇသုရိၼၼ်ႉလႄႈၵဝ်ထွမ်ႇငိၼ်းၵႂၢမ်းမႂ်းယဝ်ႉ။
၂၁ ၵႂၢမ်းဢၼ်ထႃႇဝရႃႉၽြႃးမီးဢမိင်ႉလူၺ်ႈလွင်ႈမၼ်းၼၼ်ႉၸမ်း၊-ၵၢၼ်ႇၺႃႇလုၵ်ႈယိင်းသၢဝ်ၸိဢုၼ်ႇႁဵတ်းဢမ်ႇပေႃးၼင်ႇႁိုဝ်တီႈမႂ်းလႄႈႁဵတ်းပျၢၵ်ႈႁဵတ်းၶူဝ်မႂ်းယူႇဢေႃႈ။လုၵ်ႈယိင်းဝဵင်းယေႇရုသလႅမ်ႇငွၵ်းႁူဝ်ၶွၼ်းႁူဝ်တေႃႇမႂ်းဢေႃႈ။
၂၂ မႂ်းသေႉသွမ်းလႄႈလႃႇလင်ၽူႈလႂ်။မႂ်းဢဝ်သဵင်မႂ်းသႅၼ်ႇႁွင်ႉႁႃၽူႈလႂ်လႄႈမိုၼ်းတႃပူၼ်ႉပႅၼ်ၽႅၼ်သုင်ယူႇ၊တေႃႈၵႃႈၽြႃးဢၼ်မူတ်းၸၢင်ႇမဵဝ်းဢိသရေႇလၼၼ်ႉမႂ်းယင်းႁဵတ်းတေႃႇယူႇလူင်ပေႇ။
၂၃ မႂ်းဢဝ်တမၢၼ်ႇမႂ်းၸိူဝ်းၼၼ်ႉသေႉသွမ်းထႃႇဝရႃႉၽြႃးလႄႈလၢတ်ႈဝႃႈ၊-ၵဝ်ပႃးဢဝ်လေႃႉရထႃးၵဝ်ၼမ်ၼႃႇသေလႄႈၶိုၼ်ႈၵႃႈၼိူဝ်ပၢႆၸိၵ်းလွႆတင်းလၢႆၵႃႈၼိူဝ်ပႅမ်ႉလွႆလေႇပၼုၼ်ႇၸိူဝ်းၼၼ်ႉယဝ်ႉ။ၵဝ်ၽၼ်းပႅတ်ႈတူၼ်ႈဢႃႇရိတ်ႉမၼ်းဢၼ်သုင်ဢၼ်ယၢဝ်းတင်းလၢႆဢိၵ်ႇတင်းတူၼ်ႈမႆႉပႅၵ်ႇမၼ်းဢၼ်လီၼႃႇၸိူဝ်းၼၼ်ႉလူမ်ႉယဝ်ႉ။ၵဝ်ၶဝ်ႈႁွတ်ႈၶဝ်ႈထိုင်ၵႃႈၼႂ်းတီႈဢၼ်သွၼ်ႈဢၼ်ပိုင်ႈဢၼ်လိုၵ်ႉၼႃႇသပေိူၼ်ႈၵႃႈတီႈထိူၼ်ႇမၼ်းဢၼ်မီးမၢၵ်ႇမီးဝၢၵ်ႈလိူင်ႇၼမ်ၼႃႇၼၼ်ႉယဝ်ႉ။
၂၄ ၵဝ်လႆႈၶူတ်ႉၶုမ်ၶူတ်ႉလုၵ်းလႄႈၵိၼ်ၼမ်ႉဢၼ်ဢမ်ႇတွၼ်ႉယၢမ်ႈလႆႈၸိမ်းတူၺ်းၼၼ်ႉယဝ်ႉ။ၵဝ်တၵ်းဢဝ်တင်းၽႃႇတိၼ်ၵဝ်ႁႂ်ႈၼမ်ႉၵႃႈဢၼ်မီးၵႃႈၼႂ်းၼမ်ႉႁွင်ႊၼမ်ႉၵႄးမိူင်းဢေးၵႅပ်ႉတုၸိူဝ်းၼၼ်ႉႁႅင်ႈႁွင်ၵႂႃႇဢေႃႈ၊ဝႃႈၼင်ႇၼႆယဝ်ႉ။မႂ်းဢမ်ႇလႆႈငိၼ်းလွင်ႈဢၼ်ၵဝ်ၸီႇယၢင်ႇဢမူႉၼႆႉမိူဝ်ႈဢွၼ်တၢင်းၼၼ်ႉဢိၵ်ႇတင်းလွင်ႈဢၼ်ၵဝ်ပွင်မႄးဝႆႉမိူဝ်ႈဢွၼ်ၼႆႉၼၼ်ႉႁိုဝ်။
၂၅ မိူဝ်ႈလဵဝ်ၼႆႉၵေႃႈၵဝ်ၸီႇယၢင်ႇဝႆႉႁႂ်ႈမႂ်းပဵၼ်ၵေႃႉဢၼ်ယႃႉၽဵဝ်ႈပႅတ်ႈဝဵင်းဢၼ်မၼ်ႈၶိူင်ႇတင်းလၢႆၼၼ်ႉလႄႈႁႂ်ႈပဵၼ်ၵွင်မၢၵ်ႇႁိၼ်ဝႆႉၼၼ်ႉယဝ်ႉ။
၂၆ ပိူဝ်ႈၼႆလႄႈၵူၼ်းဝဵင်းၸိူဝ်းၼၼ်ႉႁႅင်းလဵၵ်ႉႁႅင်းၵေႇလႄႈမီးတၢင်းဢၼ်ၵႂင်ၸႂ်ယုင်ႈၸႂ်လႄႈၸႂ်လူႉယူႇဢေႃႈ။ၶဝ်ပဵၼ်မိူၼ်ၸိူဝ်ႉၼင်ႇတူၼ်ႈယိူဝ်ႈယႃႈၵႃႈၼႂ်းထိူၼ်ႇတူၼ်ႈၶဝ်ႈဢၼ်ၶဵဝ်တူၼ်ႈယိူဝ်ႈဢၼ်ဢွၵ်ႇၵႃႈၼိူဝ်မုင်းႁိူၼ်းဢၼ်ႁဵဝ်ႇတၢႆၸူဝ်ႈဢၼ်ဢမ်ႇပႆႇတၼ်းယႂ်ႇတၼ်းထူၼ်ႈၼၼ်ႉဢေႃႈ။
၂၇ ၵဝ်ႁူႉတၢင်းဢၼ်မႂ်းၼင်ႈတၢင်းဢၼ်မႂ်းၶဝ်ႈမႂ်းဢွၵ်ႇတၢင်းဢၼ်မႂ်းၸႂ်မႆႈၶႆႈၸႃႉႁွင်ႉႁိုတ်းတေႃႇၵဝ်ၸိူဝ်းၼၼ်ႉယူႇဢေႃႈ။
၂၈ ၵွပ်ႈပိူဝ်ႈတၢင်းဢၼ်မႂ်းၸႂ်မႆႈၶႆႈၸႃႉႁွင်ႉႁိုတ်းတေႃႇၵဝ်၊တၢင်းဢၼ်မႂ်းၸွၵ်ႈၵႃးၸႂ်သုင်ၼၼ်ႉၶိုၼ်ႈႁွတ်ႈၶိုၼ်ႈထိုင်ၵႃႈၼႂ်းႁူၵဝ်လႄႈၵဝ်တၵ်းဢဝ်သၢႆလင်သူၼ်ႇသႂ်ႇၵႃႈတီႈၶူႈလင်မႂ်းလႄႈဢဝ်ၵၵ်ႉသႂ်ႇသူပ်းမႂ်းလႄႈႁႂ်ႈမႂ်းၶိုၼ်းမိူဝ်းၵႂႃႇၸွမ်းသဵၼ်ႈတၢင်းဢၼ်မႂ်းမႃးၼၼ်ႉဢေႃႈ။
၂၉ ၼီႈမိၵ်ႉလၢၵ်ႈၶၼႃႇဢၼ်မႂ်းတၵ်းလႆႈမၢတ်ႈတွင်းဝႆႉၸမ်း၊သူတၵ်းလႆႈၵိၼ်မၢၵ်ႇႁူင်းဢၼ်ဢွၵ်ႇမႃးယႂ်ႇမႃးႁင်းၵူၺ်းမၼ်းၼၼ်ႉၼႂ်းပီႊၼႆႉဢေႃႈ။ၼႂ်းပီႊတုတိယၼၼ်ႉတၵ်းလႆႈၵိၼ်မၢၵ်ႇႁူင်းဢၼ်ဢွၵ်ႇသေၵႃႈၼႂ်းၼၼ်ႉဢေႃႈ။ၼႂ်းပီႊတတိယၼၼ်ႉဝၢၼ်ႇၸိူဝ်ႉဝၢၼ်ႇၽၼ်းလႄႈပၢတ်ႇၶဝ်ႈလႄႈၵိၼ်တႃႉ။သူၼ်ဢူးယဵၼ်ႇၸပိတ်ႉၵေႃႈၽုၵ်ႇလႄႈၵိၼ်မၢၵ်ႇမၼ်းတႃႉ။
၃၀ ၵူၼ်းမဵဝ်းယုတဢၼ်လွတ်ႈၽေးလႄႈၵိုတ်းၵျၢၼ်ႇဝႆႉၸိူဝ်းၼၼ်ႉတၵ်းယင်ႇႁၢၵ်ႈၵႃႈတႂ်ႈလႄႈမၢၵ်ႇၵႃႈၼိူဝ်လူးၵွၼ်ႇဢေႃႈ။
၃၁ ၶဝ်ၸိူဝ်းဢၼ်ၵိုတ်းၵျၢၼ်ႇဝႆႉၼၼ်ႉတၵ်းပေႃႇမႃးၵႃႈၼႂ်းဝဵင်းယေႇရုသလႅမ်ႇလႄႈၶဝ်ၸိူဝ်းဢၼ်လွတ်ႈၽေးၼၼ်ႉတၵ်းပေႃႇမႃးၵႃႈတီႈလွႆၸိဢုၼ်ႇဢေႃႈ။ဢလူဝ်း။ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉႁႅင်းယႂ်ႇၼႃလူင်လၢင်လႄႈၸီႇယၢင်ႇႁဵတ်းဢမူႉၼၼ်ႉဢေႃႈ။
၃၂ ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉလူၺ်လွင်ႈၶုၼ်ႁေႃၶမ်းဢႃႇသုရိလႄႈဝႃႈၸမ်း၊-မၼ်းၼၼ်ႉဢမ်ႇလႆႈၶဝ်ႈၵႃႈၼႂ်းဝဵင်းၼႆႉ၊ဢမ်ႇလႆႈယိုဝ်းပိုၼ်ၶဝ်ႈၵႃႈၼႂ်းဝဵင်း၊ဢမ်ႇလႆႈၼႄပျႃးၶိူင်ႈဢၼ်ႁႄႉလၢၵ်ႈၼၢၵ်ႈၵႃႈတီႈၽၢႆႇၼႃႈဝဵင်း၊ဢမ်ႇလႆႈၵေႃႇလႆႈၵွင်တႅၼ်ႈလိၼ်ၵႃႈတီႈၼွၵ်ႈဝဵင်း။
၃၃ မၼ်းတၵ်းလႆႈၶိုၼ်းမိူဝ်းၵႂႃႇၸွမ်းသဵၼ်ႈတၢင်းဢၼ်မၼ်းမႃးၼၼ်ႉဢေႃႈ။မၼ်းဢမ်ႇလႆႈၶဝ်ၵႃႈၼႂ်းဝဵင်းၼႆႉ၊ဝႃႈၼႆထႃႇဝရႃႉၽြႃးမီးဢမိင်ႉဢေႃႈ။
၃၄ ၵဝ်တၵ်းထွၵ်ႈလူၺ်ႈၼႃႈၵဝ်တင်းၼႃႈၶႃႈၵဝ်တႃႇဝိတ်ႉၼၼ်ႉသေလႄႈမုင်းႁူမ်ႇဝဵင်းၼႆႉယူႇႁႂ်ႈလႆႈၵႄႇသႄႇၶျွတ်ႈဢဝ်ဝဵင်းၼႆႉဢေႃႈ၊ဝႃႈၼင်ႇၼႆဢေႃႈ။
၃၅ ၼႂ်းၶိုၼ်းၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးဢွၵ်ႇလႄႈပၼ်တၢမ်ႇဢေႃႈ။ၵူၼ်းၼႂ်းတပ်ႉဢႃႇသုရိတၢႆသႅၼ်ပႅတ်ႇမိုၼ်ႇႁႃႈႁဵင်ဢေႃႈ။မိူဝ်ႈဢၼ်ၵူၼ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉၼၼ်ႉၸိုင်ၵႃႈတီႈၼၼ်ႉပဵၼ်တူဝ်တၢႆတင်းသဵင်ႈတင်းလူင်ဢေႃႈ။
၃၆ ၼင်ႇၼၼ်လႄႈၸွမ်ႈသိုၵ်းၶုၼ်ႁေႃၶမ်းဢႃႇသုရိၼၼ်ႉလုၵ်ႉသေၵႃႈတီႈၼၼ်ႉဢွၵ်ႇၵႂႃႇသေယဝ်ႉ၊ၶိုၼ်းမိူဝ်းလႄႈယူႇၵႃႈတီႈဝဵင်းၼိၼေႇဝူၺ်ႇဢေႃႈ။
၃၇ လိုၼ်းၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉႁဵတ်းဝၢတ်ႈၵႃႈၼႂ်းပိၵ်ႉမၢၼ်ႇၼိသရွၵ်ႈၽြႃးမၼ်းၼၼ်ႉယူႇၼၼ်ႉၸိုင်လုၵ်ႈၸၢႆးမၼ်းဢႃႇတမြမ်ႇမလိၵ်ႉတင်းသရေႇၸဢဝ်မၼ်းတၢႆလူၺ်ႈလၢပ်ႇလႅဝ်းသေလႄႈဢွၵ်ႇပၢႆႈၵႂႃႇၵႃႈတီႈမိူင်းဢႃႇရရတ်ႉဢေႃႈ။လုၵ်ႈၸၢႆးမၼ်းဢေးသရႁတ်ႉတုၼ်ႇၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။