Chapter
၂
ဢေးလိယလႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵၢင်ႁၢဝ်
၁ မိူဝ်ႈဢၼ်ၸမ်ၶိင်ႇဢၼ်ထႃႇဝရႃႉၽြႃးတၵ်းဢဝ်တင်းလူမ်းၽိဝ်ႁုင်ယွင်ႊဢဝ်ဢေးလိယၶိုၼ်ႈၵႃႈၼိူဝ်ၵၢင်ႁၢဝ်ၼၼ်ႉၸိုင်ဢေးလိယၼၼ်ႉၵႂႃႇၵႃႈတီႈဝဵင်းၵိလၵႃႇလႁူမ်ႈလူၺ်ႈၵၼ်တင်းဢေးလိသေးဢေႃႈ။
၂ ဢေးလိယၵေႃႈလၢတ်ႈတီႈဢေးလိသေးလႄႈဝႃႈ၊-မႂ်းၵိုတ်းယူႇၵႃႈတီႈၼႆတႃႉ။ထႃႇဝရႃႉၽြႃးပွႆႇၸႂ်ႉၵဝ်ၵႂႃႇၵႃႈတီႈဝဵင်းပေႇသလပုၼ်ႉဢေႃႈ၊ဝႃႈၼင်ႇၼႆလႄႈဢေးလိသေးၶိုၼ်းလၢတ်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉၵဝ်ၶႃႈဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းၶႃႈၵူၺ်း၊ဝႃႈၼင်ႇၼႆသေလႄႈသွင်ၶႃဢွၼ်ၵၼ်လူင်းၸူးၵႃႈတီႈဝဵင်းပေႇသလဢေႃႈ။
၃ ၵူၼ်းမဵဝ်းပရေႃးၽႅတ်ႈဢၼ်မီးၵႃႈတီႈဝဵင်းပေႇသလၸိူဝ်းၼၼ်ႉဢွၼ်ၵၼ်ဢွၵ်ႇမႃးႁႂ်ႈလႆႈႁပ်ႉႁူဝ်တၢင်းဢေးလိသေးလႄႈထၢမ်ဝႃႈ၊-လွင်ႈဢၼ်ထႃႇဝရႃႉၽြႃးတၵ်းၼုၵ်ႈဢဝ်ယေးလိယၽၢတ်ႇယၢၼ်သေၸဝ်ႈႁဝ်းၵႂႃႇဝၼ်းမိူဝ်ႈၼႆႉဢၼ်ဝႃႈၼၼ်ႉ၊ၸွင်ႇၸဝ်ႈႁဝ်းၶႃႈႁူႉႁိုဝ်၊ဝႃႈၼင်ႇၼႆလႄႈမၼ်းၵေႃႈၶိုၼ်းလၢတ်ႈလႄႈဝႃႈ၊-ၸႂ်ႈယဝ်ႉ၊ၵဝ်ႁူႉယူႇဢေႃႈ။ဢွၼ်ၵၼ်ယူႇတဵတ်ႇတဵတ်ႇတႃႉ၊ဝႃႈၼင်ႇၼႆဢေႃႈ။
၄ ဢေးလိယၵေႃႈလၢတ်ႈတီႈမၼ်းလႄႈဝႃႈ၊-ဢေးလိသေးဢိူၺ်း။မႂ်းၵိုတ်းယူႇၵႃႈတီႈၼႆႉတႃႉ။ထႃႇဝရႃႉၽြႃးပွႆႇၸႂ်ႉၵဝ်ၵႂႃႇၵႃႈတီႈဝဵင်းယေႇရိၶုဝ်းပုၼ်ႉဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၶိုၼ်းလၢတ်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉၵဝ်ၶႃႈဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းၶႃႈ၊ဝႃႈၼင်ႇၼႆသေလႄႈသွင်ၶႃဢွၼ်ၵၼ်ၵႂႃႇၵႃႈတီႈဝဵင်းယေႇရိၶုဝ်းဢေႃႈ။
၅ ၵူၼ်းမဵဝ်းပရေႃးၽႅတ်ႈဢၼ်မီးၵႃႈတီႈဝဵင်းယေႇရိၶုဝ်းၸိူဝ်းၼၼ်ႉဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈဢေးလိသေးလႄႈထၢမ်ဝႃႈ၊-လွင်ႈဢၼ်ဝႃႈထႃႇဝရႃႉၽြႃးတၵ်းၼုၵ်ႈဢဝ်ဢေးလိယၽၢတ်ႇသေၵႃႈတီႈၸဝ်ႈႁဝ်းၵႂႃႇဝၼ်းမိူဝ်ႈၼႆႉၼၼ်ႉၸွင်ႇၸဝ်ႈႁဝ်းႁူႉၶႃႈႁိုဝ်၊ဝႃႈၼင်ႇၼႆလႄႈမၼ်းၵေႃႈၶိုၼ်းလၢတ်ႈလႄႈဝႃႈ၊-ၸႂ်ႈယဝ်ႉ၊ၵဝ်ႁူႉယူႇဢေႃႈ။ဢွၼ်ၵၼ်ယူႇတဵတ်ႇတဵတ်ႇတႃႉ၊ဝႃႈၼင်ႇၼႆဢေႃႈ။
၆ ဢေးလိယၵေႃႈလၢတ်ႈတီႈမၼ်းလႄႈဝႃႈ၊-မႂ်းၵိုတ်းယူႇၵႃႈတီႈၼႆႉတႃႉထႃႇဝရႃႉၽြႃးပွႆႇၸႂ်ႉၵဝ်ၵႂႃႇၵႃႈတီႈၼမ်ႉႁွင်ႊယေႃႇတၢၼ်ႇပုၼ်ႉဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၶိုၼ်းလၢတ်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇ၊ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉၵဝ်ၶႃႈဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းၶႃႈ၊ဝႃႈၼင်ႇၼႆသေလႄႈသွင်ၶႃၵႂႃႇလူၺ်ႈရၵၼ်ဢေႃႈ။
၇ ၵူၼ်းမဵဝ်းပရေႃးၽႅတ်ႈႁႃႈသိပ်းဢွၼ်ၵၼ်ၵႂႃႇလႄႈၸုၵ်းယူႇၵႃႈတီႈဢၼ်ၵႆၵၼ်တင်းသွင်ၶႃၼၼ်ႉဢေႃႈ။သွင်ၶႃၼၼ်ႉၸုၵ်းယူႇၵႃႈတီႈႁိမ်းၼမ်ႉႁွင်ႊယေႃႇတၢၼ်ႇဢေႃႈ။
၈ ဢေးလိယဢဝ်ၽႃႈမႆႊမၼ်းၵဵၼ်ႁမ်းသေလႄႈပေႃႉယႅၼ်ႉသႂ်ႇၼမ်ႉလႄႈၼမ်ႉၼၼ်ႉတႅၵ်ႇဢႃႈပဵၼ်သွင်ၽၢၵ်ႇၵႂႃႇလႄႈသွင်ၶႃပႆၵႂႃႇၼိူဝ်လိၼ်ႁႅင်ႈၼႂ်းၵေႈၼမ်ႉလႄႈၶၢမ်ႈၵႂႃႇဢေႃႈ။
၉ မိူဝ်ႈဢၼ်ၶၢမ်ႈၼမ်ႉႁွင်ႊၼၼ်ႉၵႂႃႇယဝ်ႉၼၼ်ႉၸိုင်ဢေးလိယလၢတ်ႈတီႈဢေးလိသေးလႄႈဝႃႈ၊-ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇတၢင်းဢၼ်ၼုၵ်ႈဢဝ်သေၵႃႈတီႈမႂ်းၵႂႃႇၼၼ်ႉၸိုင်ယွၼ်းဢဝ်သူးဢၼ်ၵဝ်တၵ်းလႆႈႁဵတ်းပုၼ်ႈမႂ်းၼၼ်ႉတႃႉ၊ဝႃႈၼင်ႇၼႆလႄႈဢေးလိသေးယွၼ်းလႄႈဝႃႈ၊-
၁၀ ႁႂ်ႈဝိၺိၺ်ႇၸဝ်ႈႁဝ်းၼၼ်ႉမီးၵႃႈၼိူဝ်ၵဝ်ၶႃႈသွင်ပုၼ်ႊသေၵမ်းလူၺ်ႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈလၢတ်ႈလႄႈဝႃႈ၊-မႂ်းယွၼ်းသူးဢၼ်လႆႈယၢပ်ႇၼႃႇၼၼ်ႉဢေႃႈ။ၼႂ်းဝႃႈၼၼ်သေၵေႃႈပေႃးမႂ်းလႆႈႁၼ်တၢင်းဢၼ်ၵဝ်လႆႈၶၢမ်ႇတၢင်းဢၼ်ၽၢတ်ႇယၢၼ်ၵၼ်တင်းမႂ်းၵႂႃႇၼၼ်ႉၸိုင်မႂ်းတၵ်းလႆႈသူးၼၼ်ႉဢေႃႈ။ပေႃးဢမ်ႇၼၼ်ဢမ်ႇလႆႈၵူၺ်း၊ဝႃႈၼင်ႇၼႆဢေႃႈ။
၁၁ ၼႂ်းမိူဝ်ႈဢၼ်သွင်ၶႃၸွမ်းတၢင်းၵႂႃႇလႄႈလၢတ်ႈတေႃႇၵၼ်ယူႇၸိူဝ်ႉၼင်ႇၼၼ်ယူႇၼၼ်ႉလေႃႉရထႃးၽႆးဢိၵ်ႇတင်းမႃႉၽႆးတင်းလၢႆၽုတ်းၽၢတ်းပေႃႇမႃးလႄႈဢဝ်သွင်ၶႃၽၢတ်ႇယၢၼ်ၵၼ်သေယဝ်ႉဢေးလိယၼၼ်ႉလႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ၵၢင်ႁၢဝ်လူၺ်ႈလူမ်းၽိဝ်ႁူင်သေဢေႃႈ။
၁၂ ဢေးလိသေးတူၺ်းႁၼ်ဢၼ်ၼၼ်ႉလႄႈႁွင်ႉသႅၼ်ႇလႄႈဝႃႈ၊-ပေႃႈၵဝ်ဢိူၺ်း။ပေႃႈၵဝ်ဢိူၺ်း။လေႃႉရထႃးဢိသရေႇလတင်းၸဝ်ႈမႃႉရထႃးဢိသရေႇလလူင်ပေႇ၊ဝႃႈၼင်ႇၼႆဢေႃႈ။လိုၼ်းသေၼၼ်ႉမၼ်းဢမ်ႇလႆႈႁၼ်ဢေးလိယယဝ်ႉ။မၼ်းယိပ်းၵမ်ၶူဝ်းၼုင်ႈမၼ်းသေလႄႈသိၵ်ႇၶၢၼ်ႇပႅတ်ႈသွင်ပွတ်းၵႂႃႇဢေႃႈ။
၁၃ မၼ်းၵဵပ်းဢဝ်ၽႃႈမႆႊဢေးလိယဢၼ်တူၵ်းသေၵႃႈတီႈမၼ်းမႃးၼၼ်ႉလႄႈၶိုၼ်းမိူဝ်းၵႂႃႇသေယဝ်ႉၸုၵ်းယူႇၵႃႈတီႈႁိမ်းၼမ်ႉႁွင်ႈယေႃႇတၢၼ်ႇသေလႄႈဢဝ်ၽႃႈမႆႊဢေးလိယၼၼ်ႉပေႃႉယႅၼ်ႉသႂ်ႇၼမ်ႉလႄႈဝႃႈ၊-
၁၄ ထႃႇဝရႃႉၽြႃးၽြႃးပဵၼ်ၸဝ်ႈဢေးလိယၼၼ်ႉမီးၵႃႈလႂ်၊ဝႃႈၼင်ႇၼႆသေလႄႈမိူဝ်ႈဢၼ်မၼ်းပေႃႉယႅၼ်ႉသႂ်ႇၼမ်ႉယဝ်ႉၼၼ်ႉၸိုင်ၼမ်ႉၼၼ်ႉတႅၵ်ႇဢႃႈပဵၼ်သွင်ၽၢၵ်ႇၵႂႃႇလႄႈဢေးလိသေးၶၢမ်ႈၵႂႃႇဢေႃႈ။
၁၅ ၵူၼ်းမဵဝ်းပရေႃးၽႅတ်ႈဢၼ်ယူႇၵႃႈတီႈဝဵင်းယေႇရိၶုဝ်းလႄႈၸွမ်းလူၸွမ်းတူၺ်းၸိူဝ်းၼၼ်ႉႁၼ်မၼ်းသေယဝ်ႉ၊လၢတ်ႈၵၼ်လႄႈဝႃႈ၊-ဝိၺိၺ်ႇဢေးလိယၼၼ်ႉၵိင်းဝပ်ႉယူႇၵႃႈၼိူဝ်ဢေးလိသေးဢေႃႈ၊ဝႃႈၼင်ႇၼႆသေလႄႈဢွၼ်ၵၼ်ၵႂႃႇႁႂ်ႈလႆႈႁပ်ႉႁူဝ်တၢင်းမၼ်းလႄႈၶုပ်ႉမူပ်ႇၵႃႈၼိူဝ်လိၼ်ၵႃႈတီႈၽၢႆႇၼႃႈမၼ်းဢေႃႈ။
၁၆ ၶဝ်ၼၼ်ႉၵေႃႈဢွၼ်ၵၼ်လၢတ်ႈလႄႈဝႃႈ၊-တီႈၶႃႈၸဝ်ႈႁဝ်းၶဝ်မီးၶဝ်ၸိူဝ်းဢၼ်ႁႅင်းယႂ်ႇႁႃႈသိပ်းၶႃႈဢေႃႈ။ၶႅၼ်းတေႃႈပၼ်ဢၶႂၢင်ႉႁႂ်ႈၶဝ်လႆႈၵႂႃႇႁႃဢေးလိယၼၼ်ႉသေၵမ်း။ၸၢင်ႊၶေးဝိၺိၺ်ႇထႃႇဝရႃႉၽြႃးယုၵ်ႉယွင်ႈဢဝ်မၼ်းၵႂႃႇသေလႄႈၵႂႃႇၶျႃးမၼ်းဝႆႉၵႃႈတီႈၼႂ်းၶူင်ႈႁူၺ်ႈသတေီႈတီႈၶႃႈဢေႃႈ၊ဝႃႈၼင်ႇၼႆလႄႈမၼ်းၶိုၼ်းလၢတ်ႈလႄႈဝႃႈ၊-ယႃႇပပွေႆႇၸႂ်ႉၵႂႃႇ၊ဝႃႈၼင်ႇၼႆသေၵေႃႈ
၁၇ ၶဝ်ၼၼ်ႉဢွၼ်ၵၼ်ယွၼ်းဢၶႂၢင်ႉၼႃႇလူင်လၢင်တေႃႇထိုင်ႁွတ်ႈထၼ်ႈပေႃးတၵ်းပဵၼ်တၢင်းဢၼ်ဢူၵ်းဢၢႆတႃႇတလေႆႈထဵင်ၼၼ်ႉလႄႈမၼ်းၵေႃႈလၢတ်ႈဝႃႈ၊-ပွႆႇၸႂ်ႉၵႂႃႇႁႃတႃႉ၊ဝႃႈၼင်ႇၼႆဢေႃႈ။ၶဝ်ၼၼ်ႉပွႆႇၸႂ်ႉၵူၼ်းႁႃႈသိပ်းၵႂႃႇႁႃသၢမ်ဝၼ်းတဵမ်တဵမ်သေၵေႃႈလႄႈဢမ်ႇထူပ်းဢမ်ႇႁၼ်။
၁၈ မိူဝ်ႈဢၼ်ၶဝ်ႈဢွၼ်ၵၼ်ၶိုၼ်းမႃးတီႈမၼ်းၵႃႈၼႂ်းဝဵင်းယေႇရိၶုဝ်းၼၼ်ႉၸိုင်မၼ်းလၢတ်ႈတီႈၶဝ်လႄႈဝႃႈ၊-ၵဝ်လၢတ်ႈဝႃႈယႃႇပေၵႂႃႇသွၵ်ႈႁႃ၊ဝႃႈၼင်ႇၼႆယဝ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။
ႁဵတ်းႁႂ်ႈၼမ်ႉဝၢၼ်မႃး
၁၉ ၵူၼ်းဝဵင်းၼၼ်ႉၸိူဝ်းၼၼ်ႉဢွၼ်ၵၼ်လဝ်ႈလၢတ်ႈတီႈဢေးလိသေးလႄႈဝႃႈ၊-တူၺ်းတီႈၶႃႈလူး။တီႈဢၼ်တႄႇႁဵတ်းဝဵင်းၼႆႉပဵၼ်တီႈဢၼ်သႃႇယႃႇလီငၢမ်းၵႃႈၼင်ႇဢၼ်ၸဝ်ႈႁဝ်းႁၼ်ယူႇၼႆႉတီႈၶႃႈဢေႃႈ။ၵူၺ်းၵႃႈၼမ်ႉဢမ်ႇလီၶႃႈ။လိၼ်ၵေႃႈၸၢင်ႊႁႂ်ႈဢွၵ်ႇမၢၵ်ႇဢွၵ်ႇႁူင်းၶႃႈ၊ဝႃႈၼင်ႇၼႆလႄႈမၼ်းၵေႃႈလၢတ်ႈလႄႈဝႃႈ၊-
၂၀ ဢွၼ်ၵၼ်ဢဝ်ၼမ်ႉတဝ်ႈဢၼ်မ်ႂႇလုၵ်ႈၼိုင်ႈဢဝ်ၵိူဝ်သႂ်ႇသေလႄႈဢဝ်မႃးတႃႉ၊ဝႃႈၼင်ႇၼႆလႄႈၶဝ်ဢွၼ်ၵၼ်ဢဝ်မႃးတီႈမၼ်းဢေႃႈ။
၂၁ မၼ်းဢွၵ်ႇၵႂႃႇၸူးၵႃႈတီႈၼမ်ႉဢွၵ်ႇႁူးၼၼ်ႉလႄႈဢဝ်ၵိူဝ်သႂ်ႇထွၵ်ႇသႂ်ႇလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵဝ်ႁႂ်ႈၼမ်ႉၼႆႉဝၢၼ်ဢေႃႈ။
၂၂ ဢဝ်ၼႆႉၵႂႃႇၼႃႈတၵ်းဢမ်ႇလႆႈမီးတၢင်းဢၼ်ႁႂ်ႈတၢႆတၢင်းဢၼ်ဢမ်ႇဢွၵ်ႇမဵတ်ႉဢွၵ်ႇႁင်းၼၼ်ႉ၊ဝႃႈၼင်ႇၼႆလႄႈၼမ်ႉၼၼ်ႉပဵၼ်ဢၼ်ဝၢၼ်ဢၼ်လီတေႃႇထိုင်ႁွတ်ႈဝၼ်းမိူဝ်ႈၼႆႉၸွမ်းၵႃႈၼင်ႇဢၼ်ဢမိင်ႉၸဝ်ႈဢၼ်ဢေးလိသေးသင်ႇလၢတ်ႈဝႆႉၼၼ်ႉဢေႃႈ။
၂၃ မၼ်းလုၵ်ႉသေၵႃႈတီႈဝဵင်းၼၼ်ႉၶိုၼ်ႈၸူးၵႃႈတီႈဝဵင်းပေႇသလလႄႈၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇတၢင်းပႆတၢင်းယူႇၼၼ်ႉလုၵ်ႈဢွၼ်ႇတင်းလၢႆဢွၼ်ၵၼ်ဢွၵ်ႇသေၵႃႈၼႂ်းဝဵင်းၼၼ်ႉမႃးလႄႈႁဵတ်းပျၢၵ်ႈႁဵတ်းၶူဝ်တီႈမၼ်းလႄႈဝႃႈ၊-ဢၢႆႈႁူဝ်ၵဵင်ႈဢိူၺ်း။ၶိုၼ်ႈတိၵ်းတိၵ်းတႃႉ။
၂၄ ဢၢႆႈႁူဝ်ၵဵင်ႈဢိူၺ်း။ၶိုၼ်ႈတိၵ်းတိၵ်းတႃႉ၊ဝႃႈၼင်ႇၼႆဢေႃႈ။မၼ်းဝၢႆႇတူၺ်းၶိုၼ်းလႄႈႁၼ်ၶဝ်သေယဝ်ႉမၼ်းဢဝ်ၼႃႇမႃႉၸိုဝ်သဵင်ထႃႇဝရႃႉၽြႃးၵိၼ်ႇဝႃႈတီႈၶဝ်လႄႈမီမေႈသွင်တူဝ်ဢွၵ်ႇသေၵႃႈၼႂ်းထိူၼ်ႇမႃးလႄႈၶူပ်းလုၵ်ႈဢွၼ်ႇၸိူဝ်းၼၼ်ႉတၢႆသီႇသိပ်းပၢႆသွင်ၵေႃႉဢေႃႈ။
၂၅ မၼ်းလုၵ်ႉသေၵႃႈတီႈဝဵင်းၼၼ်ႉၵႂႃႇၸူးၵႃႈတီႈလွႆၵရမေႇလလႄႈသမ်ႉလုၵ်ႉသေၵႃႈတီႈလွႆၼၼ်ႉမိူဝ်းၵႂႃႇၵႃႈတီႈဝဵင်းသမႃႇရိဢေႃႈ။