Chapter
၅
တုတ်ႈၼႄႇမၼ်ႇႁၢႆၶႅၼ်း
၁ ၼေႇမၼ်ႇၶုၼ်ႁူဝ်သိုၵ်းလူင်ၶုၼ်ႁေႃၶမ်းသုရိၼၼ်ႉပဵၼ်ၵေႃႉဢၼ်လႆႈၼႃႈလႆႈတႃတီႈၸဝ်ႈမၼ်းလႄႈမီးၵုင်ႇမီးမူၼ်ႈဢေႃႈ။လွင်ႈမၼ်းၸမ်းထႃႇဝရႃႉၽြႃးဢဝ်တင်းမၼ်းလႄႈပၼ်ဢၶႂၢင်ႉႁႂ်ႈလႆႈပႄႉၼႅင်ႇမိူင်းသုရိၼၼ်ႉယဝ်ႉ။မၼ်းပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢေႃႈ။
၂ ၵူၺ်းၵႃႈမၼ်းပဵၼ်တုတ်ႈဢေႃႈ။မီးၽဝ်ႇၼိုင်ႈၵူၼ်းသုရိတင်းလၢႆႁဵတ်းပဵၼ်မုၵ်ႉပဵၼ်ၸိူဝ်းသေလႄႈၶီႇသိုၵ်းၵႂႃႇသေယဝ်ႉတီႉလႆႈမေႈယိင်းဢွၼ်ႇၵေႃႉၼိုင်ႈသေၵႃႈၼႂ်းမိူင်းဢိသရေႇလမႃးဢေႃႈ။မၼ်းၼၼ်ႉလႆႈၶၢမ်ႇႁဵတ်းၶႃႈတီႈမေးၼေႇမၼ်ႇၼၼ်ႉယူႇဢေႃႈ။
၃ မၼ်းလၢတ်ႈတီႈၸဝ်ႈၼၢင်းမၼ်းလႄႈဝႃႈ၊-ပေႃးၸဝ်ႈၵဝ်ၶႃႈၼၼ်ႉလႆႈႁွတ်ႈထိုင်ၵႃႈတီႈပရေႃးၽႅတ်ႈဢၼ်မီးယူႇၵႃႈတီႈဝဵင်းသမႃႇရိၼၼ်ႉၸိုင်တုတ်ႈဢၼ်ၸပ်းတီႈမၼ်းၸဝ်ႈၼၼ်ႉတၵ်းႁၢႆၶႅၼ်းယူႇၶႃႈဢေႃႈ၊ဝႃႈၼင်ၼႆဢေႃႈ။
၄ ၼေႇမၼ်ႇၵေႃႈၶဝ်ႈၸူးၵႃႈတီႈၸဝ်ႈမၼ်းလႄႈလဝ်ႈလၢတ်ႈလႄႈဝႃႈ၊-မေႈယိင်းဢွၼ်ႇဢိသရေႇလၼၼ်ႉလၢတ်ႈၸိူဝ်ႉၼင်ႇၼႆၸိူဝ်ႉၼင်ႇၼၼ်တီႈၶႃႈဢေႃႈ၊ဝႃႈၼင်ၼႆဢေႃႈ။
၅ ၶုၼ်ႁေႃၶမ်းသုရိၵေႃႈမီးဢမိင်ႉလႄႈဝႃႈ၊-ၵႂႃႇတႃႉ၊ၵႂႃႇတႃႉ၊ၵဝ်တၵ်းပၼ်လိၵ်ႈၵႂႃႇၵႃႈတီႈၶုၼ်ႁေႃၶမ်းဢိသရေႇလဢေႃႈ၊ဝႃႈၼင်ၼႆလႄႈမၼ်းဢဝ်ငိုၼ်းသိပ်းတလၢၼ်ႇတၢၼ်ႇ၊ၶမ်းႁူၵ်းႁဵင်ၵျၢပ်ႈ၊ၶူဝ်းၼုင်ႈသိပ်းၸုမ်ႇၵႂႃႇသေယဝ်ႉဢဝ်လိၵ်ႈၼၼ်ႉသႂၢင်းၶဝ်ႈၵႃႈတီႈၶုၼ်ႁေႃၶမ်းဢိသရေႇလဢေႃႈ။
၆ ၵႂၢမ်းဢၼ်ပႃးၵႃႈၼႂ်းလိၵ်ႈၼၼ်ႉဝႃႈၸမ်း၊-ၵဝ်ၶႃႈပွႆႇၸႂ်ႉၶႃႈၵဝ်ၶႃႈၼေႇမၼ်ပႃးဢဝ်လိၵ်ႈၼႆႉၵႂႃႇႁႂ်ႈၸဝ်ႈႁဝ်းႁဵတ်းႁႂ်ႈတုတ်ႈမၼ်းႁၢႆၶႅၼ်းၶႃႈဢေႃႈ၊ဝႃႈၼင်ၼႆဢေႃႈ။
၇ ၶုၼ်ႁေႃၶမ်းဢိသရေႇလၽတ်းလိၵ်ႈၼၼ်ႉသေယဝ်ႉၸၵ်ႉသိၵ်ႇၶူဝ်းၼုင်ႈမၼ်းလႄႈဝႃႈ၊-ၵဝ်ပဵၼ်ၽြႃးဢၼ်ပိူင်ႇပၼ်ပိူင်ႇၼုၵ်ႈဢသၢၵ်ႈလႄႈမၼ်းပွႆႇၸႂ်ႉၵေႃႉၼႆႉမႃးတီႈၵဝ်ႁႂ်ႈၵဝ်ႁဵတ်းႁႂ်ႈတုတ်ႈမၼ်းႁၢႆၶႅၼ်းလႆႈႁိုဝ်။တူၺ်းလူး။လွင်ႈၼႆႉမၼ်းၶႂ်းႁႃတၢင်းၽိတ်းသႂ်ႇတီႈၵဝ်ထၢၼ်ႇလႂ်ဢၼ်ဝႃႈၼၼ်ႉတႃႉ၊ဝႃႈၼင်ၼႆဢေႃႈ။
၈ ဢေးလိသေးၵူၼ်းၽြႃးပဵၼ်ၸဝ်ႈၼၼ်ႉငိၼ်းလွင်ႈဢၼ်ၶုၼ်ႁေႃၶမ်းဢိသရေႇလသိၵ်ႇၶူဝ်းၼုင်ႈမၼ်းၼၼ်ႉလႄႈမၼ်းသင်ႇၵႂၢမ်းၵႂႃႇလၢတ်ႈထိုင်တီႈၶုၼ်ႁေႃၶမ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းသိၵ်ႇၶူဝ်းၼုင်ႈၸဝ်ႈႁဝ်းၶႃႈ။ႁႂ်ႈမၼ်းမႃးၵႃႈတီႈၵဝ်ၶႃႈသေၵမ်း။မၼ်းတၵ်းလႆႈႁူႉလွင်ႈဢၼ်ပရေႃးၽႅတ်ႈမီးၵႃႈၼႂ်းမိူင်းဢိသရေႇလၼႆႉဢေႃႈ၊ဝႃႈၼင်ၼႆဢေႃႈ။
၉ ပိူဝ်ႈၼႆလႄႈၼေႇမၼ်ႇၼၼ်ႉပႃးဢဝ်လေႃႉရထႃးမၼ်းဢိၵ်ႇတင်းမႃႉမၼ်းတင်းလၢႆမႃးလႄႈၸုၵ်းယူႇၵႃႈတီႈၽၵ်းတူႁိူၼ်းဢေးလိသေးဢေႃႈ။
၁၀ ဢေးလိသေးၵေႃႈပွႆႇၸႂ်ႉၵူၼ်းၸူးတီႈမၼ်းလႄႈလၢတ်ႈဝႃႈ၊-မႂ်းၵႂႃႇလႄႈဢၢပ်ႇၼမ်ႉၵႃႈၼႂ်းၼမ်ႉႁွင်ႊယေႃႇတၢၼ်ႇတေႃႇထိုင်ႁွတ်ႈၸဵတ်းပွၵ်ႈတႃႉ။ၼိူဝ်ႉၼင်ႇမႂ်းတၵ်းလႅၵ်ႈလၢႆလႄႈမႂ်းတၵ်းလႆႈမူတ်းသ်ႂမႃးဢေႃႈ၊ဝႃႈၼင်ၼႆဢေႃႈ။
၁၁ ၼေႇမၼ်ႇၸႂ်မႆႈၶႆႈၸႃႉလႄႈဢွၵ်ႇၵႂႃႇသေလႄႈလၢတ်ႈဝႃႈ၊-တူၺ်းလူ။ၵဝ်ထၢင်ႇဝႃႈပရေႃးၽႅတ်ႈၼၼ်ႉတၵ်းဢွၵ်ႇမႃးလႄႈၸုၵ်းယူႇၵႃႈတီႈႁိမ်းၵဝ်၊ႁွင်ႉႁႃၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈမၼ်းလႄႈဢဝ်မိုဝ်းမၼ်းမုင်းၵႂႃႇမုင်းမႃးၵႃႈၼိူဝ်တီႈႁွႆးၸဵပ်းသေလႄႈႁဵတ်းႁႂ်ႈတုတ်ႈႁၢႆၶႅၼ်းဢေႃႈ။
၁၂ ၼမ်ႉႁွင်ႈဢႃႇပၼၼမ်ႉႁွင်ႊၽႃႇမိူင်းထမ်ႇမသႅတ်ႉၸိူဝ်းၼၼ်ႉယိင်ႈၶႅၼ်းလီၼႃႇသေၼမ်ႉႁွင်ႈဢိသရေႇလၵႃႈမီးဢမ်ႇၸႂ်ႈႁိုဝ်။ၵဝ်ဢၢပ်ႇၼမ်ႉၵႃႈၼႂ်းၼမ်ႉႁွင်ႈၸိူဝ်းၼၼ်ႉလႄႈတၵ်းဢမ်ႇမူတ်းသ်ႂလႆႈႁိုဝ်၊ဝႃႈၼင်ၼႆသေလႄႈၸႂ်မႆႈၶႆႈၸႃႉသေယဝ်ႉဝၢႆႇၶိုၼ်းလင်ဢေႃႈ။
၁၃ ၶႃႈၵူၼ်းမၼ်းသမ်ႉဢွၼ်ၵၼ်သုတ်ႉၸပ်းသုတ်ႉၸူးလႄႈလဝ်ႈလၢတ်ႈလႄႈဝႃႈ၊-ပေႃႈႁဝ်းၶႃႈဢိူၺ်း။ပေႃးပရေႃးၽႅတ်ႈၸီႇယၢင်ႇႁႂ်ႈၸဝ်ႈႁဵတ်းလွင်ႈတၢင်းဢၼ်ယႂ်ႇဢၼ်လူင်သေၸိူဝ်ႉသေပိူင်ႈၸိုင်ၸဝ်ႈႁဝ်းတၵ်းႁဵတ်းဢမ်ႇၸႂ်ႈၶႃႈႁိုဝ်။
၁၄ ပေႃးမၼ်းၸီႇယၢင်ႇဝႃႈဢၢပ်ႇၼမ်ႉလႄႈႁွတ်ႈထိုင်တၢင်းဢၼ်မူတ်းသ်ႂတႃႉ၊ဝႃႈၼႆၸိုင်ယိင်ႈၶႅၼ်းလီႁဵတ်းၼႃႇလူင်လၢင်ဢမ်ႇၸႂ်ႈၶႃႈႁိုဝ်၊ဝႃႈၼင်ၼႆလႄႈမၼ်းၼၼ်ႉၵေႃႈလူင်းၸူးလႄႈဢဝ်တူဝ်မၼ်းၸူမ်ႇၵႃႈၼႂ်းၼမ်ႉႁွင်ႊယေႃႇတၢၼ်ႇတေႃႇထိုင်ႁွတ်ႈၸဵတ်းပွၵ်ႈၸွမ်းၵႃႈၼင်ႇဢၼ်ၵူၼ်းၽြႃးပဵၼ်ၸဝ်ႈလၢတ်ႈၼၼ်ႉသေယဝ်ႉၼိူဝ်ႉၼင်မၼ်းၼၼ်ႉလႅၵ်ႈလၢႆၵႂႃႇလႄႈပဵၼ်ၸိူဝ်ႉၼင်ႇၼိူဝ်ႉၼင်ႇလုၵ်ႈဢွၼ်ႇၼၼ်ႉလႄႈမၼ်းႁွတ်ႈထိုင်တၢင်းဢၼ်မူတ်းသ်ႂဢေႃႈ။
၁၅ ၼင်ႇၼၼ်သေယဝ်ႉမၼ်းဢိၵ်ႇတင်းၶဝ်ၵႃႈဢၼ်ၸွမ်းမၼ်းၸိူဝ်းၼၼ်ႉဢွၼ်ၵၼ်ၶိုၼ်းမႃးတီႈၵူၼ်းၽြႃးပဵၼ်ၸဝ်ႈလႄႈႁွတ်ႈထိုင်သေယဝ်ႉၸုၵ်းယူႇၵႃႈတီႈၽၢႆႇၼႃႈမၼ်းသေလႄႈတွင်းပၢၼ်ႇလႄႈဝႃႈ၊-မိူဝ်ႈလဵဝ်ၼႆႉၵဝ်ၶႃႈႁူႉလွင်ႈဢၼ်လိူဝ်သေၵႃႈၼႂ်းမိူင်းဢိသရေႇလၼႆႉၵႃႈၼိူဝ်လိၼ်မိူင်းၵႃႈမီးၼႆႉဢမ်ႇမီးၽြႃးပဵၼ်ၸဝ်ႈသသေူႇသေပႃးၼၼ်ႉၶႃႈယဝ်ႉ။ပိူဝ်ႈဢၼ်ပဵၼ်ၼင်ႇၼႆလႄႈႁပ်ႉတုင်းဢဝ်လၢၵ်ႈသွင်ႇတၢင်းလူႇတီႈၶႃႈၸဝ်ႈႁဝ်းၼႆႉသေၵမ်းၶႃႈ၊ဝႃႈၼင်ၼႆဢေႃႈ။
၁၆ ပရေႃးၽႅတ်ႈၵေႃႈလၢတ်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢၼ်ၵဝ်ၵူဝ်းၵႂၢႆႇၼၼ်ႉဢသၢၵ်ႈလိပ်းယူႇၼၼ်ႉၵဝ်တၵ်းဢမ်ႇႁပ်ႉဢမ်ႇဢဝ်သေၸိူဝ်ႉသေပိူင်ႈ၊ဝႃႈၼင်ႇၼႆဢေႃႈ။မၼ်းသမ်ႉတိုၵ်းယူင်းႁႂ်ႈႁပ်ႉၶၢမ်ႇဢဝ်သေၵေႃႈပရေႃးၽ်တ်ႈထဵင်ပႅတ်ႈဢေႃႈ။
၁၇ ၼေႇမၼ်ႇၵေႃႈလၢတ်ႈလႄႈဝႃႈ၊-ပေႃးပဵၼ်ၼင်ႇၼႆၸိုင်ႁႂ်ႈၶႃႈၸဝ်ႈလႆႈမီးဢၶႂၢင်ႉဢၼ်လႆႈဢဝ်လိၼ်တႃႇမႃႉလီႈသွင်တူဝ်ၼၼ်ႉတၢင်ႇႁၢင်ႈၵႂႃႇသေၵမ်းၶႃႈ။ဢဝ်ၼႆႉၵႂႃႇၼႃႈၶႃႈၸဝ်ႈႁဝ်းၼႆႉလိူဝ်သတေီႈထႃႇဝရႃႉၽြႃးၼၼ်ႉၶႃႈၸဝ်ႈတၵ်းဢမ်ႇပုၵ်ႉၸေႃႇယိၸ်ႉဢၼ်တုတ်ႇၽႆးယိၸ်ႉဢၼ်လႂ်သေၸိူဝ်ႉသေပိူင်ႈၵႃႈတီႈၽြႃးတၢင်ႇသူႇတၢင်ႇပႃးၼၼ်ႉၶႃႈယဝ်ႉ။
၁၈ ၼႂ်းဝႃႈၼၼ်သေၵေႃႈတီႈႁဵင်းၼိုင်ႈၸမ်းႁႂ်ႈထႃႇဝရႃႉၽြႃးပွႆႇလွတ်ႈဢပျႅတ်ႈၶႃႈၸဝ်ႈသေၵမ်းလူၺ်ႈ။ယၢမ်းမိူဝ်ႈဢၼ်ၸဝ်ႈၵဝ်ၶႃႈၶဝ်ႈၵႂႃႇၵႃႈၼႂ်းၵျွင်းၽြႃးရိမ်ႇမုၼ်ႇႁႂ်ႈလႆႈၵူဝ်းၵႂၢႆႇၵႃႈတီႈၼၼ်ႉၸိုင်မိူဝ်ႈဢၼ်မၼ်းဢိင်ၵဝ်ၶႃႈယူႇသေလႄႈၵဝ်ၶႃႈလႆႈၵူမ်ႈၵွမ်းတူဝ်ၸဝ်ႈၵဝ်ႇၵႃႈၼႂ်းၵျွင်းရိမ်ႇမုၼ်ႇၼၼ်ႉၸိုင်ႁႂ်ႈထႃႇဝရႃႉၽြႃးၼၼ်ႉပွႆႇလွတ်ႈဢပျႅတ်ႈၶႃႈၸဝ်ႈသေၵမ်းလူၺ်ႈ၊ဝႃႈၼင်ၼႆဢေႃႈ။
၁၉ ပရေႃးၽႅတ်ႈၵေႃႈလၢတ်ႈလႄႈဝႃႈ၊-ၵႂႃႇၼိမ်ၼိမ်တႃႉ၊ဝႃႈၼင်ၼႆဢေႃႈ။ယၢမ်းမိူဝ်ႈဢၼ်မၼ်းယင်းဢွၵ်ႇၵႂႃႇဢမ်ႇပႆႇပေႃးၵႆလူင်လၢင်ၼၼ်ႉ၊ၵေႇႁႃႇၸိၵူၼ်းဢွၼ်ႇဢေးလိသေးၼၼ်ႉၵျၢမ်ႇပွင်ၼႂ်းၸႂ်မၼ်းလႄႈဝႃႈ၊-
၂၀ ၸဝ်ႈၵဝ်ၼႆႉယင်းဢမ်ႇႁပ်ႉၶၢမ်ႇဢဝ်ဢုၵ်ႉၸႃႇဢၼ်ၼေႇမၼ်ႇၵူၼ်းသုရိဢဝ်မႃးပၼ်ၼၼ်ႉလႄႈဢိတ်းလူမၼ်းၼႃႇလူင်လၢင်လူင်ပေႇ။ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉၵဝ်တၵ်းၶုၼ်ႇလႅၼ်ႈၸွမ်းလင်မၼ်းၵႂႃႇလႄႈဢဝ်သေၸိူဝ်ႉသေပိူင်ႈလူးၵွၼ်ႇဢေႃႈ၊ဝႃႈၼင်ၼႆသေယဝ်ႉၵေႇႁႃႇၸိၸွမ်းလင်ၼေႇမၼ်ႇၵႂႃႇဢေႃႈ။
၂၁ ၼေႇမၼ်ႇၼၼ်ႉႁၼ်လွင်ႈဢၼ်ၵေႃႉၼိုင်ႈလႅၼ်ႈၸွမ်းမၼ်းမႃးယူႇၼၼ်ႉလႄႈမၼ်းလူင်းသေၵႃႈၼိူဝ်လေႃႉရထႃးႁႂ်ႈႁႄႉႁပ်ႉလႄႈထၢမ်ဝႃႈ၊-လီယူႇၵူႈၸိူဝ်ႉၵူႈပိူင်ႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၶိုၼ်းလၢတ်ႈလႄႈဝႃႈ၊-လီယူႇၶႃႈဢေႃႈ။
၂၂ ၸဝ်ႈၵဝ်ၶႃႈပွႆႇၸႂ်ႉၵဝ်ၶႃႈမႃးလႄႈသင်ႇလၢတ်ႈဝႃႈ၊-မိူဝ်ႈလဵဝ်ၼႆႉၵူၼ်းၼုမ်ႇၵူၼ်းၵမ်ၵူၼ်းမဵဝ်းပရေႃးၽႅတ်ႈသွင်ၵေႃႉလုၵ်ႉသေၵႃႈတီႈႁၢၼ်ႉလွႆဢေးၽရိမ်ႇႁွတ်ႈမႃးတီႈၵဝ်ယဝ်ႉ။ပၼ်ငိုၼ်းတလၢၼ်ႇတၢၼ်ႇၼိုင်ႈဢိၵ်ႇတင်းၶူဝ်းၼုင်ႈသွင်ၸုမ်ႇတီႈၶဝ်သေၵမ်း၊ဝႃႈၼင်ႇၼႆယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ၼေႇမၼ်ႇၵေႃႈယင်းဢမ်တွပ်ႇဢမ်ႇထဵင်လႄႈၶိုၼ်းလၢတ်ႈဝႃႈ၊-
၂၃ ဢဝ်ငိုၼ်းသွင်တလၢၼ်ႇတၢၼ်ႇၼၼ်ႉသေၵမ်း၊ဝႃႈၼင်ႇၼႆလႄႈဢဝ်ငိုၼ်းသွင်တလၢၼ်ႇတၢၼ်ႇသႂ်ႇၵႃႈၼႂ်းထူင်သွင်ႈလုၵ်ႈသေယဝ်ႉမတ်ႉၸပ်းလူၺ်ႈၵၼ်တင်းၶူဝ်းသွင်ၸုမ်ႇၼၼ်ႉလႄႈတၢင်ႇသႂ်ႇပၼ်ၵႃႈၼိူဝ်ၵူၼ်းဢွၼ်ႇမၼ်းသွင်ၵေႃႉသေယဝ်ႉ၊ႁႂ်ႈသွင်ၶႃဢွၼ်ႁူဝ်မၼ်းၼၼ်ႉၵႂႃႇဢေႃႈ။
၂၄ မိူဝ်ႈဢၼ်ႁွတ်ႈထိုင်ၵႃႈၼိူဝ်ၵုင်းလွႆၼၼ်ႉၸိုင်မၼ်းဢဝ်ဢုၵ်ႉၸႃႇၼၼ်ႉသေၵႃႈၼႂ်းမိုဝ်းသွင်ၶႃၼၼ်ႉသေယဝ်ႉသိူင်ႇမႅပ်းဝႆႉၵႃႈၼႂ်းႁိူၼ်းမၼ်းလႄႈပွႆႇသွင်ၶႃၼၼ်ႉၶိုၼ်းမိူဝ်းၵႂႃႇဢေႃႈ။
၂၅ မၼ်းၶဝ်ႈမႃးလႄႈၸုၵ်းၵႃႈတီႈၽၢႆႇၼႃႈဢေးလိသေးဢေႃႈ။ဢေးလိသေးၵေႃႈထၢမ်တီႈမၼ်းလႄႈဝႃႈ၊-ၵေႇႁႃႇၸိဢိူၺ်း။မႂ်းၵႂႃႇၵႃႈလႂ်မႃး၊မိူဝ်ႈဢၼ်ဝႃႈၼင်ႇၼႆၸိုင်မၼ်းၼၼ်ႉၶိုၼ်းလၢတ်ႈလႄႈဝႃႈ၊-ၶႃႈၸဝ်ႈဢမ်ႇၵႂႃႇၵႃႈလႂ်ၶႃႈ၊ဝႃႈၼင်ႇၼႆဢေႃႈ။
၂၆ ဢေးလိသေးလၢတ်ႈတီႈမၼ်းလႄႈဝႃႈ၊-မိူဝ်ႈဢၼ်ၵေႃႉၼၼ်ႉဝၢႆႇလူင်းသေၵႃႈၼိူဝ်လေႃႉရထႃးႁႂ်ႈလႆႈႁပ်ႉႁူဝ်တၢင်းမႂ်းၼၼ်ႉဝိၺိၺ်ႇၵဝ်ဢမ်ႇမီးလူၺ်ႈၵၼ်တင်းမႂ်းႁိုဝ်။ပဵၼ်ၶိင်ႇဢၼ်ၶၢမ်ႇဢဝ်ငိုၼ်းႁိုဝ်။ပဵၼ်ၶိင်ႇဢၼ်သိမ်းဢဝ်ၶူဝ်းၼုင်ႈတၢင်းမႆႊသူၼ်ဢူးယဵၼ်ႇသၢၼ်ႇလုၼ်ႇသူၼ်ဢူးယဵၼ်ႇၸပႅတ်ႉ၊သူဝ်း၊ဝူဝ်း၊ၶႃႈၵူၼ်းၸၢႆးၶႃႈၵူၼ်းယိင်းႁိုဝ်။
၂၇ ပိူဝ်ႈဢၼ်ပဵၼ်ၼင်ႇၼႆလႄႈႁႂ်ႈတုတ်ႈၼေႇမၼ်ႇၼၼ်ႉၸပ်းတီႈမႂ်းဢိၵ်ႇတင်းမဵဝ်းၸိူဝ်ႉၶိူဝ်းမႂ်းယူႇတႃႇသေႇသေၵမ်း၊ဝႃႈၼင်ႇၼႆလႄႈမၼ်းၼၼ်ႉပဵၼ်တုတ်ႈဢၼ်ၽိူၵ်ႇၶၢဝ်ဝႆႉမိူၼ်ၸိူဝ်ႉၼင်ႇမူၺ်ႁႃႇၼၼ်ႉယူႇသေလႄႈဢွၵ်ႇၵႂႃႇသေၵႃႈတီႈၸဝ်ႈမၼ်းၼၼ်ႉသေဢေႃႈ။