Chapter
၆
တႃမၢတ်ႇၽူးၼိူဝ်ၼမ်ႉ
၁ မီးၽဝ်ႇၼိုင်ႈၵူၼ်းမဵဝ်းပရေႃးၽႅတ်ႈတင်းလၢႆလၢတ်ႈတီႈဢေးလိသေးဝႃႈ၊-တူၺ်းၶႃႈလူ၊တီႈဢၼ်ႁဝ်းၶႃႈယူႇလူၺ်ႈၵၼ်တင်းၸဝ်ႈႁဝ်းမိူဝ်ႈလဵဝ်ၼႆႉၼႆႉၵိတ်ႇၵႅပ်ႈၼႃႇပုၼ်ႈႁဝ်းၶႃႈဢေႃႈ။
ၶႅၼ်းတေႃႈႁႂ်ႈႁဝ်းၶႃႈလႆႈၵႂႃႇၵႃႈတီႈယေႃႇတၢၼ်ႇၼၼ်ႉလႄႈၽွမ်ႉၵၼ်ဢဝ်မႆႉၸိင်ယေႈၵေႃႉယေႈလႅမ်ႈသေယဝ်ႉ၊တႄႇႁဵတ်းႁိူၼ်းပုၼ်ႈဢၼ်ႁဝ်းၶႃႈတၵ်းယူႇၼၼ်ႉသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၶိုၼ်းလၢတ်ႈလႄႈဝႃႈ၊-ဢွၼ်ၵၼ်ၵႂႃႇတႃႉ၊ဝႃႈၼင်ႇၼႆဢေႃႈ။
၃ ၼႂ်းၶဝ်ၼၼ်ႉၵေႃႉၼိုင်ႈတွင်းပၢၼ်ႇလႄႈဝႃႈ၊-ၶႅၼ်းတေႃႈယႃႇပတွပေ်ႇထဵင်သေၵမ်းၶႃႈ။ၸဝ်ႈႁဝ်းၶႅၼ်းတေႃႈၵႂႃႇလူၺ်ႈၵၼ်တင်းႁဝ်းၶႃႈသေၵမ်းၶႃႈ၊ဝႃႈၼင်ႇၼႆလႄႈမၼ်းၵေႃႈၶိုၼ်းလၢတ်ႈလႄႈဝႃႈ၊-ၵဝ်တၵ်းၵႂႃႇၸွမ်းဢိူဝ်ႈ၊ဝႃႈၼင်ႇၼႆလႄႈၵႂႃႇလူၺ်ႈၵၼ်တင်းၶဝ်ဢေႃႈ။
၄ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈယေႃႇတၢၼ်ႇၼၼ်ႉၸိုင်ၶဝ်ဢွၼ်ၵၼ်ၽၼ်းမႆႉဢေႃႈ။
၅ ၵူၼ်းၵေႃႉၼိုင်ႈၼႂ်းမိူဝ်ႈဢၼ်မၼ်းယင်းတိုၵ်ႉၽၼ်းမႆႉယူႇၼၼ်ႉႁူဝ်တႃမၢတ်ႇမၼ်းတူၵ်းၵႂႃႇၵႃႈၼႂ်းၼမ်ႉလႄႈမၼ်းႁွင်ႉသႅၼ်ႇလႄႈဝႃႈ၊-ဢလူဝ်၊ဢလူဝ်၊ၸဝ်ႈဢိူၺ်း။ပဵၼ်ၶွင်ဢၼ်ယိမ်ပိူၼ်ႈမႃးၶႃႈဢေႃႈ၊ဝႃႈၼင်ႇၼႆဢေႃႈ။
၆ ၵူၼ်းၽြႃးပဵၼ်ၸဝ်ႈထၢမ်လႄႈဝႃႈ၊-တူၵ်းၵႃႈတီႈလႂ်၊မိူဝ်ႈဢၼ်ဝႃႈၼင်ႇၼႆၸိုင်ၵေႃႉၼၼ်ႉၼႄပၼ်တီႈဢၼ်တူၵ်းၼၼ်ႉတီႈမၼ်းလႄႈမၼ်းတႅပ်းၽၼ်းၶွၼ်ႉလႅမ်ႈၼိုင်ႈလႄႈၶျႃးတူၵ်းသႂ်ႇၵႃႈတီႈၼၼ်ႉသေယဝ်ႉလဵၵ်းၼၼ်ႉၽူးမႃးဢေႃႈ။
၇ မၼ်းလၢတ်ႈလႄႈဝႃႈ၊-ယိပ်းဢဝ်တႃႉ၊ဝႃႈၼင်ႇၼႆလႄႈၵေႃႉၼၼ်ႉၵေႃႈယိုၼ်းမိုဝ်းမၼ်းလႄႈယိပ်းဢဝ်ဢေႃႈ။
ဢေးလိသေးႁႂ်ႈမၢၵ်ႇတႃၵူၼ်းသုရိမွတ်ႇ
၈ မီးၽဝ်ႇၼိုင်ႈၶုၼ်ႁေႃၶမ်းသုရိႁဵတ်းသိုၵ်းတေႃႇမိူင်းဢိသရေႇလလႄႈတိူင်ႇပၢင်ႇၵၼ်တင်းၶႃႈၵူၼ်းမၼ်းလႄႈဝႃႈ၊-ၵဝ်တၵ်းၶျႃးတပ်ႉၵႃႈတီႈၸိူဝ်းၼၼ်ႉၵႃႈတီႈၸိူဝ်းၼႆႉဢေႃႈ၊ဝႃႈၼင်ႇၼႆဢေႃႈ။
၉ ၵူၼ်းၽြႃးပဵၼ်ၸဝ်ႈၼၼ်ႉပွႆႇၸႂ်ႉၵူၼ်းၵႂႃႇၸူးတီႈၶုၼ်ႁေႃၶမ်းဢိသရေႇလလႄႈဝႃႈ၊-ႁဵတ်းသတိလူၺ်ႈလွင်ႈဢၼ်တၵ်းၵႂႃႇၸူးၵႃႈတီႈၸိူဝ်းၼၼ်ႉသေၵမ်း။ၵူၼ်းသုရိတင်းလၢႆယင်းတိုၵ်ႉလူင်းမႃးၸူးၵႃႈတီႈၼၼ်ႉယူႇဢေႃႈ၊ဝႃႈၼင်ႇၼႆလႄႈ
၁၀ ၶုၼ်ႁေႃၶမ်းဢိသရေႇလၵေႃႈဝေႈပိူင်တီႈၸိူဝ်းၼၼ်ႉၵႃႈၼင်ႇဢၼ်ၵူၼ်းၽြႃးပဵၼ်ၸဝ်ႈပၼ်သတိၼၼ်ႉလႄႈလႆႈၵၢင်းလွတ်ႈၽေးပွၵ်ႈၼိုင်ႈသွင်ပွၵ်ႈဢမ်ႇၵႃးလၢႆပွၵ်ႈၼမ်ၼႃႇဢေႃႈ။
၁၁ ၵွပ်ႈပိူဝ်ႈလွင်ႈၼၼ်ႉလႄႈၶုၼ်ႁေႃၶမ်းသုရိၸႂ်မႆႈၶႆႈၸႃႉတေႃးသဢွၵ်ႇၼႃႇလႄႈႁွင်ႉဢဝ်ၶႃႈၵူၼ်းမၼ်းလႄႈထၢမ်ဝႃႈသူယင်းဢမ်ႇလၢတ်ႈၼႄၵဝ်ၽူႈလႂ်ယူႇၽၢႆႇၶုၼ်ႁေႃၶမ်းဢိသရေႇလၼၼ်ႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၶႃႈၵူၼ်းမၼ်းၵေႃႉၼိုင်ႈလဝ်ႈလၢတ်ႈလႄႈဝႃႈ၊-ဢမ်ႇၸႂ်ႈၼင်ႇၼၼ်ၶႃႈၸဝ်ႈၶုၼ်လူင်။
၁၂ ပရေႃးၽႅတ်ႈဢေးလိသေးဢၼ်မီးၵႃႈၼႂ်းမိူင်းဢိသရေႇလၼၼ်ႉမၼ်းဢဝ်ၵႂၢမ်းဢၼ်ၸဝ်ႈႁဝ်းလၢတ်ႈၵႃႈတီႈၼႂ်းလုၵ်းၼွၼ်းၸဝ်ႈႁဝ်းၼၼ်ႉမွၵ်ႇလၢတ်ႈတီႈၶုၼ်ႁေႃၶမ်းဢိသရေႇလၶႃႈဢေႃႈ၊ဝႃႈၼင်ႇၼႆဢေႃႈ။
၁၃ မၼ်းၵေႃႈမီးဢမိင်ႉလႄႈဝႃႈ၊-ၵႂႃႇလွမ်တူၺ်းတီႈဢၼ်မၼ်းယူႇၼၼ်ႉတႃႉ။ၵဝ်တၵ်းပွႆႇၸႂ်ႉၵႂႃႇႁႂ်ႈလႆႈတီႉဢဝ်မၼ်းမႃးဢေႃႈ၊ဝႃႈၼင်ႇၼႆလႄႈပိူၼ်ႈလဝ်ႈလၢတ်ႈလႄႈဝႃႈ၊-မၼ်းၼၼ်ႉမီးၵႃႈတီႈဝဵင်းတေႃႇသၼ်ႇၶႃႈဢေႃႈ၊ဝႃႈၼင်ႇၼႆဢေႃႈ။
၁၄ မၼ်းပွႆႇၸႂ်ႉၵူၼ်းသိုၵ်းၶီႇမႃႉၵူၼ်းသိုၵ်းၶီႇလေႃႉရထႃး၊ႁူဝ်သိုၵ်းဢၼ်ယႂ်ႇၼႃႇၵႂႃႇၵႃႈတီႈဝဵင်းၼၼ်ႉလႄႈၶဝ်ၼၼ်ႉႁွတ်ႈထိုင်ၶိင်ႇၵၢင်ၶိုၼ်းလႄႈဢွၼ်ၵၼ်လွမ်ႉႁွပ်ႈဝဵင်းဝႆႉဢေႃႈ။
၁၅ ၶိင်ႇၵၢင်ၼႂ်ၸဝ်ႉၸဝ်ႉမိူဝ်ႈဢၼ်ၵူၼ်းဢွၼ်ႇၵူၼ်းၽြႃးပဵၼ်ၸဝ်ႈလုၵ်ႉလႄႈဢွၵ်ႇၵႃႈၼွၵ်ႈၼၼ်ႉႁၼ်ႁူဝ်သိုၵ်းဢၼ်ပႃးၵူၼ်းသိုၵ်းၶီႇမႃႉ၊ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉလွမ်ႉႁွပ်ႈဝဵင်းယူႇၼၼ်ႉလႄႈၵူၼ်းဢွၼ်ႇၼၼ်ႉလၢတ်ႈတီႈၸဝ်ႈမၼ်းလႄႈဝႃႈ၊-ဢလူဝ်၊ၸဝ်ႈဢိူၺ်း။တၵ်းႁဵတ်းၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။
၁၆ ဢေးလိသေးၶိုၼ်းလၢတ်ႈလႄႈဝႃႈ၊-ယႃႇပမေႆႈၸႂ်။ၶဝ်ၸိူဝ်းဢၼ်ယူႇၽၢႆႇႁဝ်းၼႆႉယိင်ႈၶႅၼ်းၼမ်ၼႃႇသေၶဝ်ၸိူဝ်းဢၼ်ယူႇၽၢႆႇၶဝ်ၼၼ်ႉဢေႃႈ၊ဝႃႈၼင်ႇၼႆသေလႄႈမၼ်းသူးတွင်းလႄႈဝႃႈ၊-
၁၇ ထႃႇဝရႃႉၽြႃးတီႈၶႃႈၶႅၼ်းတေႃႈၽုၺ်ႇမၢၵ်ႇတႃမၼ်းႁႂ်ႈမၼ်းလႆႈႁၼ်သေၵမ်းတီႈၶႃႈ၊ဝႃႈၼင်ႇၼႆလႄႈထႃႇဝရႃႉၽြႃးၽုၺ်ႇမၢၵ်ႇတႃၵူၼ်းဢွၼ်ႇၼၼ်ႉလႄႈမၼ်းႁၼ်လွႆၼၼ်ႉတဵမ်ဝႆႉတင်းမႃႉၽႆးလႂ်၊လေႃႉရထႃးၽႆးလႂ်ၵႃႈတီႈဢၼ်လဵပ်ႈႁွပ်ႈဢေးလိသေးၼၼ်ႉဢေႃႈ။
၁၈ မိူဝ်ႈဢၼ်ၶဝ်လူင်းၸူးၵႃႈတီႈမၼ်းၼၼ်ႉၸိုင်ဢေးလိသေးသူးတွင်းတီႈထႃႇဝရႃႉၽြႃးလႄႈဝႃႈ၊-ၶႅၼ်းတေႃႈပၼ်တၢမ်ႇႁႂ်ႈမၢၵ်ႇတႃၶဝ်ၸိူဝ်းၼႆႉမွတ်ႇသေၵမ်းၶႃႈ၊ဝႃႈၼင်ႇၼႆလႄႈမၼ်းၸဝ်ႈပၼ်တၢမ်ႇႁႂ်ႈၶဝ်တႃမွတ်ႇၵႂႃႇၸွမ်းၵႃႈၼင်ႇဢၼ်ဢေးလိသေးသူးတွင်းၼၼ်ႉဢေႃႈ။
၁၉ ဢေးလိသေးၵေႃႈလၢတ်ႈတီႈၶဝ်ၼၼ်ႉလႄႈဝႃႈ၊-ဢမ်ႇၸႂ်ႈသဵၼ်ႈတၢင်းၼႆႉၵူၺ်း၊ဢမ်ႇၸႂ်ႈဝဵင်းၼႆႉၵူၺ်း၊ၸွမ်းလင်ၵဝ်တႃႉ။ၵဝ်တၵ်းဢဝ်သူသူင်ႇပၼ်တီႈၵေႃႉဢၼ်သူႁႃၼၼ်ႉဢေႃႈ၊ဝႃႈၼင်ႇၼႆသေလႄႈဢဝ်ၶဝ်ၼၼ်ႉၵႂႃႇသူင်ႇၵႃႈတီႈဝဵင်းသမႃႇရိဢေႃႈ။
၂၀ မိူဝ်ႈဢၼ်ႁွတ်ႈထိုင်ၵႃႈၼႂ်းဝဵင်းသမႃႇရိၼၼ်ႉၸိုင်ဢေးလိသေးသူးတွင်းလႄႈဝႃႈ၊-ထႃႇဝရႃႉၽြႃးတီႈၶႃႈ။ၶႅၼ်းတေႃႈၽုၺ်ႇမၢၵ်ႇတႃၶဝ်ၸိူဝ်းၼႆႉႁႂ်ႈၶဝ်လႆႈႁၼ်သေၵမ်းၶႃႈ၊ဝႃႈၼင်ႇၼႆလႄႈထႃႇဝရႃႉၽြႃးၽုၺ်ႇမၢၵ်ႇတႃၶဝ်ၼၼ်ႉသေယဝ်ႉၶဝ်ၼၼ်ႉႁၼ်မႃးလႄႈႁူႉလွင်ႈဢၼ်ဝႃႈၶဝ်မီးယူႇၵႃႈၼႂ်းၵၢင်ဝဵင်းသမႃႇရိၼၼ်ႉဢေႃႈ။
၂၁ မိူဝ်ႈဢၼ်ၶုၼ်ႁေႃၶမ်းဢိသရေႇလႁၼ်ၶဝ်ၸိူဝ်းၼၼ်ႉၸိုင်မၼ်းထၢမ်တီႈဢေးလိသေးလႄႈဝႃႈ၊-ပေႃႈဢိူၺ်း။ၵဝ်တၵ်းလႆႈဢဝ်ၶဝ်ၸိူဝ်းၼႆႉတၢႆႁိုဝ်။တၵ်းလႆႈဢဝ်တၢႆႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းလၢတ်ႈလႄႈဝႃႈ၊-ယႃႇပေဢဝ်တၢႆၶႃႈ။
၂၂ ၸွင်ႇၸဝ်ႈႁဝ်းတၵ်းဢဝ်ၶဝ်ၸိူဝ်းဢၼ်ၸဝ်ႈႁဝ်းဢဝ်တင်းလၢပ်ႇတင်းၵၢင်ႇသေလႄႈတီႉၺွပ်းလႆႈမႃးၼၼ်ႉတၢႆၶႃႈႁိုဝ်။ဢဝ်ၶဝ်ႈမုၼ်းတင်းၼမ်ႉတမ်းပၼ်ၵႃႈတီႈၽၢႆႇၼႃႈၶဝ်လႄႈႁႂ်ႈၶဝ်ၵိၼ်ၶူပ်းသေယဝ်ႉၶိုၼ်းမိူဝ်းၵႂႃႇၸူးၵႃႈတီႈၸဝ်ႈၶဝ်ၼၼ်ႉသေၵမ်းၶႃႈ၊ဝႃႈၼင်ႇၼႆလႄႈၶဝ်ပွင်ႁႅၼ်းတၢင်းၵိၼ်တၢင်းၶူပ်းၼမ်ၼႃႇလူင်လၢင်ပုၼ်ႈၶဝ်ၼၼ်ႉလႄႈႁႂ်ႈၶဝ်ၵိၼ်ၶူပ်းသေယဝ်ႉပွႆႇၶဝ်ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈၸဝ်ႈၶဝ်သေဢေႃႈ။
၂၃ လိုၼ်းၼၼ်ႉၵူၼ်းသုရိတင်းလၢႆဢမ်ႇႁဵတ်းမုၵ်ႉႁဵတ်းၸိူဝ်းသေလႄႈၶိုၼ်းမႃးတိုၵ်းတေႃးမိူင်းဢိသရေႇလထႅင်ႈယဝ်ႉ။
ၶဝ်ႈၵႃႈမၢၵ်ႇပႅင်းတီႈမိူင်းသမႃႇရိ
၂၄ လိုၼ်းၼၼ်ႉပိၼ်ႇႁႃႇတတ်ႉၶုၼ်ႁေႃၶမ်းသုရိၼၼ်ႉႁႂ်ႈႁူဝ်သိုၵ်းမၼ်းတင်းသဵင်ႈတင်းလူင်ၸူႉၵၼ်တုမ်ၵၼ်သေလႄႈၶီႇသိုၵ်းၶိုၼ်ႈၸူးလႄႈလွမ်ႉဝဵင်းသမႃႇရိဝႆႉဢေႃႈ။
၂၅ ၵႃႈၼႂ်းဝဵင်းသမႃႇရိၼၼ်ႉပဵၼ်ဢၼ်တၢင်းၵိၼ်တၢင်းၶူပ်းၵႃႈပႅင်ႈၼႃႇလူင်လၢင်လႄႈၶဝ်ၼၼ်ႉဢွၼ်ၵၼ်လွမ်ႉဝဵင်းၶၢင်းဝဵင်းဝႆႉတေႃႇထိုင်ႁွတ်ႈထၼ်ႈပေႃးၵွၵ်းႁူဝ်မႃႉလီႈယေႈလုၵ်ႈလႆႈၶၢႆဢဝ်ငိုၼ်းပႅတ်ႇသိပ်းၵျၢပ်ႈ၊ၶီႈၼူၵ်ႉတူႈယေႈပေႇငိုၼ်းႁႃႈၵျၢပ်ႈဢေႃႈ။
၂၆ ၼႂ်းမိူဝ်ႈဢၼ်ၶုၼ်ႁေႃၶမ်းဢိသရေႇလပႆၵႃႈၼိူဝ်လမ်းဝဵင်းၵႂႃႇယူႇၼၼ်ႉမေႈယိင်းၵေႃႉၼိုင်ႈႁွင်ႉသႅၼ်ႇတီႈမၼ်းလႄႈဝႃႈ၊-ၸဝ်ႈၶုၼ်လူင်တီႈၶႃႈ။ၵႄႇသႄႇၸွႆႈထႅမ်သေၵမ်းၶႃႈ၊ဝႃႈၼင်ႇၼႆဢေႃႈ။
၂၇ မၼ်းထၢမ်လႄႈဝႃႈ၊-ပေႃးထႃႇဝရႃႉၽြႃးဢမ်ႇၵႄႇသႄႇၸွႆႈထႅမ်မႂ်းၸိုင်ၵဝ်တၵ်းလႆႈဢဝ်ၵႃႈတီႈလႂ်မႃးလႄႈၵႄႇသႄႇၸွႆႈထႅမ်မႂ်း။တၵ်းလႆႈဢဝ်ၵႃႈၼႂ်းတလၢင်းယဵပ်ႇၶဝ်ႈၵႃႈၼႂ်းၶိူင်ႈၼူတ်ႈမၢၵ်ႇၸပိတ်ႉၼၼ်ႉလႄႈၵႄႇသႄႇၸွႆႈထႅမ်မႂ်းႁိုဝ်၊ဝႃႈၼင်ႇၼႆသေယဝ်ႉ၊
၂၈ ၶုၼ်ႁေႃၶမ်းသမ်ႉထၢမ်လႄႈဝႃႈ၊-မႂ်းမီးလွင်ႈတၢင်းၵႃႈသင်မိူဝ်ႈဢၼ်ဝႃႈၼင်ႇၼႆၸိုင်မၼ်းၼၼ်ႉလဝ်ႈလၢတ်ႈလႄႈဝႃႈ၊-မေႈယိင်းၼႆႉလၢတ်ႈတီႈၵဝ်ၶႃႈၸဝ်ႈလႄႈဝႃႈ၊-ဢဝ်လုၵ်ႈၸၢႆးမႂ်းဢၢပ်ႈပၼ်ႁဝ်းပုၼ်ႈဢၼ်ႁဝ်းတၵ်းၵိၼ်ဝၼ်းမိူဝ်ႈၼႆႉသေၵမ်း။ဝၼ်းမိူဝ်ႈၽုၵ်ႈၸိုင်ႁဝ်းတၵ်းၵိၼ်လုၵ်ႈၸၢႆးၵဝ်ဢေႃႈ၊ဝႃႈၼင်ႇၼႆလႄႈ၊ႁဝ်းၶႃႈဢွၼ်ၵၼ်တူမ်ႈလုၵ်ႈၸၢႆးၶႃႈၸဝ်ႈလႄႈၵိၼ်ၶႃႈဢေႃႈ။
၂၉ မိူဝ်ႈႁွတ်ႈထိုင်ဝၼ်းမိူဝ်ႈၽုၵ်ႈၼၼ်ႉၵဝ်ၶႃႈယွၼ်းတီႈမၼ်းႁႂ်ႈဢဝ်လုၵ်ႈၸၢႆးမၼ်းဢၢပ်ႈပၼ်ပုၼ်ႈဢၼ်ႁဝ်းတၵ်းၵိၼ်သေၵေႃႈမၼ်းဢဝ်လုၵ်ႈၸၢႆးမၼ်းသိူင်ႇမႅပ်းဝႆႉၶႃႈဢေႃႈ၊ဝႃႈၼင်ႇၼႆဢေႃႈ။
၃၀ ၶုၼ်ႁေႃၶမ်းငိၼ်းၵႂၢမ်းမေႈယိင်းၼၼ်ႉသေယဝ်ႉသိၵ်ႇၶူဝ်းၼုင်ႈမၼ်းလႄႈၼႂ်းမိူဝ်ႈဢၼ်မၼ်းပႆၵႃႈၼိူဝ်လမ်းဝဵင်းယူႇၼၼ်ႉၸိုင်ၵူၼ်းတင်းလၢႆတူၺ်းလႄႈလႆႈႁူႉႁၼ်လွင်ႈဢၼ်မၼ်းၼုင်ႈၼင်ပေႃတၢင်းၼႂ်းၸပ်းၼိူဝ်ႉၸပ်းၼင်မၼ်းၼၼ်ႉယူႇဢေႃႈ။
၃၁ မၼ်းလၢတ်ႈလႄႈဝႃႈ၊-ပေႃးၵွၵ်းႁူဝ်ဢေးလိသေးလုၵ်ႈၸၢႆးသႃႇၽတ်ႉၼၼ်ႉယင်းၸပ်းဝႆႉယူႇၵႃႈတီႈတူဝ်မၼ်းဝၼ်းမိူဝ်ႈၼႆႉၸိုင်ႁႂ်ႈၽြႃးပဵၼ်ၸဝ်ႈႁဵတ်းလိူဝ်တွၼ်းၼႃႇသေၼၼ်ႉၵႃႈတီႈၵဝ်သေၵမ်းလူၺ်ႈ၊ဝႃႈၼင်ႇၼႆဢေႃႈ။
၃၂ မိူဝ်ႈၶိင်ႇၼၼ်ႉဢေးလိသေးၼၼ်ႉၼင်ႈယူႇၵႃႈတီႈႁိူၼ်းမၼ်းဢေႃႈ။ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉၵေႃႈၼင်ႈယူႇလူၺ်ႈၵၼ်တင်းမၼ်းဢေႃႈ။ၶုၼ်ႁေႃၶမ်းပွႆႇၸႂ်ႉၵူၼ်းၵေႃႉၼိုင်ႈႁႂ်ႈၵႂႃႇဢွၼ်တၢင်းမၼ်းဢေႃႈ။ၸူဝ်ႈဢၼ်ၵူၼ်းၸႂ်ႉၵူၼ်းသွႆၼၼ်ႉဢမ်ႇပႆႇႁွတ်ႈထိုင်တီႈမၼ်းၼၼ်ႉၸိုင်ဢေးလိသေးလၢတ်ႈတီႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼၼ်ႉလႄႈဝႃႈ၊-ၸွင်ႇသူႁူႉႁၼ်လွင်ႈၵေႃႉဢၼ်ဢဝ်ၵူၼ်းတၢႆၼၼ်ႉပွႆႇၸႂ်ႉၵူၼ်းမႃးႁႂ်ႈလႆႈတႅပ်းဢဝ်ၵွၵ်းႁူဝ်ၵဝ်ၼၼ်ႉႁိုဝ်။ပေႃးၵူၼ်းၸႂ်ႉၵူၼ်းသွႆၼၼ်ႉႁွတ်ႈမႃးၸိုင်ဢိုတ်းႁပ်းၽၵ်းတူဝႆႉသေလႄႈဢီးၽၵ်းတူႁၢမ်ႈတပ်ႉႁႄႉၶႅၼ်မၼ်းဝႆႉတႃႉ။သဵင်တိၼ်ၸဝ်ႈမၼ်းမေႃးယူႇၽၢႆႇလင်မၼ်းဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။
၃၃ ၼႂ်းမိူဝ်ႈဢၼ်မၼ်းယင်းတိုၵ်ႉလၢတ်ႈၵၼ်တင်းၶဝ်ယူႇၼၼ်ႉၵူၼ်းၸႂ်ႉၵူၼ်းသွႆၼၼ်ႉႁွတ်ႈမႃးဢေႃႈ။ၶုၼ်ႁေႃၶမ်းၵေႃႈႁွတ်ႈထိုင်မႃးသေယဝ်ႉလၢတ်ႈလႄႈဝႃႈ၊-ဢမူႉၼႆႉပဵၼ်ဢမူႉဢၼ်ထႃႇဝရႃႉၽြႃးၸီႇယၢင်ႇဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵဝ်ယင်းတၵ်းလႆႈပႂ်ႉမုင်ႈပႂ်ႉမွင်းထႃႇဝရႃႉၽြႃးထႅင်ႈလူးၵွၼ်ႇ၊ဝႃႈၼင်ႇၼႆဢေႃႈ။