Chapter
၂၁
မၼႃႇသေႇၶုၼ်ႁေႃၶမ်းယုတ
၁ မၼႃႇသေႇၼၼ်ႉမိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉဢသၢၵ်ႈမၼ်းလႆႈသိပ်းသွင်ပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇႁႃႈသိပ်းႁႃႈပီႊဢေႃႈ။ၸိုဝ်ႈသဵင်မေႈၸဝ်ႈၸမ်းပဵၼ်ႁိပ်ႉသၽဢေႃႈ။
၂ မၼ်းၼၼ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၼင်ႇထုင်းၸၢမ်ႇဢၼ်လီႁင်ႈဢဵတ်ႇသဵတ်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈမဵဝ်းဢိသရေႇလတင်းလၢႆၼၼ်ႉဢေႃႈ။
၃ မၼ်းမႄးၵုမ်းမႄးႁဵတ်းထႃႇၼႃႉတီႈသုင်ဢၼ်ၸဝ်ႈပေႃႈမၼ်းႁေႇၸၵိယႃႉပႅတ်ႈၸိူဝ်းၼၼ်ႉလႄႈတႄႇႁဵတ်းယိတ်ႉပလၢင်ႇပုၼ်ႈၽြႃးပႃႇလလႂ်၊ႁဵတ်းသဝ်ဢႃႇသရမိူၼ်ၸိူဝ်ႉၼင်ႇဢၼ်ဢႃႇႁပ်ႉၶုၼ်ႁေႃၶမ်းဢိသရေႇလႁဵတ်းၼၼ်ႉလႂ်ႁဵတ်းဝတ်ႈတီႈၶိူင်ႈပိူငႃ်ႉၵၢင်ႁၢဝ်ၵႃႈမီးလႄႈၵူဝ်းၵႂၢႆႇဢေႃႈ။
၄ ၵႃႈၼႂ်းႁိူၼ်းထႃႇဝရႃႉၽြႃးဢၼ်ထႃႇဝရႃႉၽြႃးမီးဢမိင်ႉဝႃႈ၊-ၵဝ်တၵ်းႁႂ်ႈၼႃႇမႃႉၸိုဝ်သဵင်ၵဝ်တႄႇယူႇၵႃႈၼႂ်းဝဵင်းယေႇရုသလႅမ်ႇသေႇသေႇဢေႃႈ၊ဝႃႈၼင်ႇၼႆၵေႃႈမၼ်းႁဵတ်းယိတ်ႉပလၢင်ႇတင်းလၢႆဢေႃႈ။
၅ မၼ်းတႄႇႁဵတ်းယိတ်ႉပလၢင်ႇပုၼ်ႈၶိူင်ႈပိူင်ၽႃႉၵၢင်ႁၢဝ်ၵႃႈမီးၼၼ်ႉၵႃႈၼႂ်းတမ်ႇတိူင်းႁိူၼ်းထႃႇဝရႃႉၽြႃးတင်းသွင်ထၢပ်ႈဢေႃႈ။မၼ်းႁႂ်ႈလုၵ်ႈၸၢႆးမၼ်းလႆႈၶၢမ်ႇတၢင်းဢၼ်ဢဝ်ၽႆးလႄႈပုၵ်ႉၸေႃႇဢေႃႈ။
၆ မၼ်းၸၢင်ႊတူၺ်းပေႇတၢင်ႇၵႃႇလႃးလႄႈသုင်းသွင်ႇဢတၢတ်ႈဢၼ်ၸၢင်ႈၸေႃႉၸၢင်ႈႁဵတ်းၼၼ်ႉသေလႄႈပၼ်ဢၶႂၢင်ႉတီႈၽိူဝ်ႉၶဝ်ၽီၶဝ်ဢေႃႈ။မၼ်းႁဵတ်းတူႉၸရိူၵ်ႈၼမ်ၼႃႇသိုဝ်ႈၼႃႈတႂ်ႈတႃထႃႇဝရႃႉၽြႃးႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉမၼ်းၸဝ်ႈဢေႃႈ။
၇ မၼ်းဢဝ်ရုၵ်ႉထူႉဢၼ်ႁဵတ်းႁႂ်ႈမိူၼ်ၵၼ်တင်းသဝ်ဢႃႇသရဢၼ်မၼ်းလုမ်းလႃးမႄးႁႅၼ်းၼၼ်ႉသေလႄႈတၢင်ႇဝႆႉၵႃႈၼႂ်းႁိူၼ်းၸဝ်ႈဢၼ်ထႃႇဝရႃႉၽြႃးမီးဢမိင်ႉတီႈတႃႇဝိတ်ႉတင်းလုၵ်ႈၸၢႆးၸဝ်ႈသေႃးလမုၼ်ႇဝႃႈ၊-ၵဝ်တၵ်းႁႂ်ႈၼႃႇမႃႉၸိုဝ်ႈသဵင်ၵဝ်တႄႇယူႇၵႃႈၼႂ်းႁိူၼ်းၸဝ်ႈၼႆႉဢိၵ်ႇတင်းဝဵင်းယေႇရုသလႅမ်ႇဢၼ်ၵဝ်လိူၵ်ႈၵဵပ်းဢဝ်ၵႃႈၼႂ်းမဵဝ်းဢိသရေႇလၵူႈမဵဝ်းဢၼ်ယူႇတႃႇသေႇၼၼ်ႉဢေႃႈ။
၈ ပိၵ်ႉသမ်ႉမၼ်းၸဝ်ႈမီးဢမိင်ႉဝႃႈပေႃးၵူၼ်းမဵဝ်းဢိသရေႇလတင်းလၢႆပႂ်ႉၵမ်ပႂ်ႉၸွမ်းႁႂ်ႈလႆႈၵမ်ၵျၢင်ႉၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉဢၼ်ဝႃႈၵႃႈၼင်ႇတြႃးဢၼ်ၶႃႈၵဝ်မုဝ်းသေႇသင်ႇလၢတ်ႈဝႆႉၼၼ်ႉၸိုင်၊ၵမ်းလိုၼ်းၵဝ်တၵ်းဢမ်ႇႁႂ်ႈတိၼ်မဵဝ်းဢိသရေႇလၶဝ်လႆႈယၢင်လႆႈပႆဢွၵ်ႇသေၵႃႈၼႂ်းမိူင်းဢၼ်ၵဝ်ပၼ်တီႈပူႇၶဝ်မွၼ်ႇၶဝ်ၼၼ်ႉဝႃႈၼင်ႇၼႆၼၼ်ႉဢေႃႈ။ၶဝ်ၼၼ်ႉဢမ်ႇထွမ်ႇဢမ်ႇဢဝ်။
၉ မၼႃႇသေႇတိုၵ်းယူင်းၸူဝ်းဢဝ်ၶဝ်ႁႂ်ႈၶဝ်ႁဵတ်းလွင်ႈတၢင်းဢၼ်ယိင်ႈၶႅၼ်းႁၢႆႉမိူၵ်ႈၼႃႇသေတၢင်းဢၼ်ၵူၼ်းၵူႈၸိူဝ်ႉၵူႈမဵဝ်းဢၼ်ထႃႇဝရႃႉၽြႃးယႃႉၽဵဝ်ႈပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆၸိူဝ်းၼၼ်ႉႁဵတ်းၼၼ်ႉဢေႃႈ။
၁၀ ပိူဝ်ႈၼႆလႄႈထႃႇဝရႃႉၽြႃးဢဝ်ၶႃႈမၼ်းၸဝ်ႈပရေႃးၽႅတ်ႈတင်းလၢႆမီးဢမိင်ႉလႄႈဝႃႈၸမ်း၊-ၵွပ်ႈပိူဝ်ႈဢၼ်မၼႃႇသေၶုၼ်ႁေႃၶမ်းယုတႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉလႄႈ
၁၁ ႁဵတ်းတူႉၸရိူၵ်ႈလိူဝ်တွၼ်းၼႃႇသေၵူၼ်းဢႃႇမေႃးရိမိူဝ်ႈဢွၼ်တၢင်းမၼ်းၼၼ်ႉၸိူဝ်းၼၼ်ႉဢိၵ်ႇတင်းၵွပ်ႈပိူဝ်ႈဢၼ်မၼ်းဢဝ်ရုၵ်ႉထူႉသၢင်းထူႉမၼ်းလႄႈႁဵတ်းႁႂ်ႈၵူၼ်းယုတ
တင်းလၢႆၽိတ်းပိူင်ႈၼၼ်ႉလႄႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလမီးဢမိင်ႉလႄႈဝႃႈ၊-
၁၂ ၵဝ်တၵ်းႁႂ်ႈၽေးႁွတ်ႈထိုင်ၵႃႈၼိူဝ်ဝဵင်းယေႇရုသလႅမ်ႇတင်းမိူင်းယုတဢေႃႈ။ႁႂ်ႈႁူၶဝ်ၸိူဝ်းဢၼ်လႆႈငိၼ်းလွင်ႈတၢင်းၼၼ်ႉႁႂ်ႈပေႃးလႆႈၶူမ်းဢေႃႈ။ၵဝ်တၵ်းဢဝ်ၸိူၵ်ႈဢၼ်တႅၵ်ႈၵႃႈၼိူဝ်ၵူၼ်းမဵဝ်းသမႃႇရိတင်းၸိူဝ်ႉၶိူဝ်းဢႃႇႁပ်ႉၼၼ်ႉၶဵင်ၵႃႈၼိူဝ်ဝဵင်းယေႇရုသလႅမ်ႈဢေႃႈ။ၵဝ်တၵ်းႁဵတ်းတီႈဝဵင်းယေႇရုသလႅမ်ႇမိူၼ်ၸိူဝ်ႉၼင်ႇဢၼ်ၵူၼ်းၸဵတ်ႉဝၢၼ်ႇလၢင်ႉဝၢၼ်ႇလႄႈၸဵတ်ႉလၢင်ႉသေယဝ်ႉဢဝ်ၶႂၢမ်ႈဝႆႉၼၼ်ႉဢေႃႈ။
၁၄ ၵဝ်တၵ်းၸုၼ်ႉပႅတ်ႈဢမူၺ်ႇၵဝ်ဢၼ်ယင်းၵိုတ်းယင်းၵျၢၼ်ႇၼၼ်ႉလႄႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်သေယဝ်ႉၶဝ်ၼၼ်ႉတၵ်းပဵၼ်တီႈဢၼ်ရၢၼ်ႇသူႇၶဝ်တင်းသဵင်ႈတင်းလူင်ႁိမ်ဢဝ်ၼိၵ်ႈၸၢၵ်ႈငႅၼ်းသေးၼၼ်ႉဢေႃႈ။
၁၅ လွင်ႈမၼ်းၸမ်းသိုပ်ႇသိုပ်ႇတၢမ်ႈတၢမ်ၶဝ်ဢွၼ်ၵၼ်ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃၵဝ်လႄႈတိုၵ်းယူင်းတၢင်းၸႂ်မႆႈၶႆႈၸႃႉၵဝ်ၸႃႉၸဵမ်မိုဝ်ႉဝၼ်းဢၼ်ပူႇမွၼ်ႇၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ၊ဝႃႈၼင်ႇၼႆဢေႃႈ။
၁၆ မၼႃႇသေႇၼၼ်ႉၼွၵ်ႈသေဢပျႅတ်ႈဢၼ်မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈႁဵတ်းႁႂ်ႈမဵဝ်းယုတၽိတ်းပိူင်ႈၼၼ်ႉမၼ်းထွၵ်ႇလိူတ်ႈၶဝ်ဢၼ်ဢမ်ႇမီးဢပျႅတ်ႈၼၼ်ႉၼမ်ၼႃႇထၼ်ႈပေႃးႁႂ်ႈဝဵင်းယေႇရုသလႅမ်ႇတဵမ်ဝႆႉတင်းလိူတ်ႈဢဝ်ၵႃႈတီႈၸႃႉၸဵမ်ၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈဢေႃႈ။
၁၇ လွင်ႈတၢင်းမၼႃႇသေႇဢၼ်ယင်းၵိုတ်းယင်းၵျၢၼ်ႇလွင်ႈတၢင်းဢၼ်မၼ်းႁဵတ်းဢိၵ်ႇတင်းဢပျႅတ်ႈဢၼ်မၼ်းၽိတ်းပိူင်ႈၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။
၁၈ မၼႃႇသေႇၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းသူၼ်ဢူးယိၼ်ႇဢၼ်ၸၢပ်ႈသႅင်ႇၵၼ်တင်းႁေႃမၼ်းဢၼ်ဝႃႈသူၼ်ဢူးယဵၼ်ႇဢေႃႇၸၼၼ်ႉဢေႃႈ။ဢႃႇမုၼ်ႇလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ဢႃႇမုၼ်ႇၶုၼ်ႁေႃၶမ်းယုတ
၁၉ ဢႃႇမုၼ်ၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉဢသၢၵ်ႈမၼ်းလႆႈသၢဝ်းသွင်ပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသွင်ပီႊဢေႃႈ။ၸိုဝ်သဵင်မေႈၸဝ်ႈၸမ်းပဵၼ်မေႇသုလမိတ်ႉလုၵ်ႈယိင်းႁႃႇရုတ်ႉၵူၼ်းယိင်းဝဵင်းယုတ်ႉပႃႇဢေႃႈ။
၂၀ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးမိူၼ်ၸိူဝ်ႉၼင်ႇဢၼ်ၸဝ်ႈပေႃႈမၼ်းမၼႃႇသေႇႁဵတ်းၼၼ်ႉဢေႃႈ။
၂၁ မၼ်းၸွမ်းသဵၼ်ႈတၢင်းၵႃႈဢၼ်ၸဝ်ႈပေႃႈမၼ်းၸွမ်းၼၼ်ႉလႄႈႁဵတ်းဝၢတ်ႈတီႈရုၵ်ႉထူႉသၢင်းထူႉဢၼ်ၸဝ်ႈပေႃႈမၼ်းႁဵတ်းဝတ်ႈၼၼ်ႉလႄႈၵူဝ်းၵႂၢႆႇဢေႃႈ။
၂၂ မၼ်းၸုၼ်ႉပႅတ်ႈထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇမၼ်းၼၼ်ႉသေလႄႈယင်းဢမ်ႇၸွမ်းသဵၼ်ႈတၢင်းထႃႇဝရႃႉၽြႃးလႄႈယူႇဢေႃႈ။
၂၃ ၶႃႈၵူၼ်းဢႃႇမုၼ်ႇတင်းလၢႆဢွၼ်ၵၼ်လွမ်ႁဵတ်းမုၵ်ႉႁဵတ်းၸိူဝ်းသေလႄႈဢဝ်ၶုၼ်ႁေႃၶမ်းတၢႆၵႃႈၼႂ်းႁေႃမၼ်းဢေႃႈ။
၂၄ ၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်ၽၼ်းတၢႆၶဝ်ၸိူဝ်းဢၼ်လွမ်ႁဵတ်းမုၵ်ႉႁဵတ်းၸိူဝ်းဢၼ်ယူႇၽၢႆႇၼိုင်ႈတင်းၶုၼ်ႁေႃၶမ်းဢႃႇမုၼ်ႇၼၼ်ႉလႄႈၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉဢဝ်ယုဝ်ႇသိယလုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
၂၅ လွင်ႈတၢင်းဢၼ်ဢႃႇမုၼ်ႇႁဵတ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။
၂၆ မၼ်းၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းၶုမ်ႁူးသၢင်းၶႅင်းမၼ်းၵႃႈၼႂ်းသူၼ်ဢူးယဵၼ်ႇဢေႃႇၸလႄႈယုဝ်ႇသိယလုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။