Chapter
၁၅
ဢႃႇၸရိၶုၼ်ႁေႃၶမ်းယုတ
၁ ၼႂ်းပီႊဢၼ်ယေႇရူဝ်းပုမ်ႇၶုၼ်ႁေႃၶမ်းဢိသရေႇလၸၢမ်ႇႁၢင်ႈၸၢမ်ႇႁေႃသၢဝ်းၸဵတ်းပီႊၼၼ်ႉဢႃႇၸရိလုၵ်ႈၸၢႆးၸဝ်ႈဢႃႇမၸိၶုၼ်ႁေႃၶမ်းယုတၼၼ်ႉၸႃႉၼင်ႈႁၢင်ႈၼင်ႈႁေႃဢေႃႈ။
၂ မိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသိပ်းႁူၵ်းပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇႁႃႈသိပ်းပၢႆသွင်ပီႊဢေႃႈ။ၸိုဝ်သဵင်မေႈၸဝ်ႈၸမ်းပဵၼ်ယေႇၶေႃႇလိၵူၼ်းယိင်းဝဵင်းယေႇရုသလႅမ်ႇဢေႃႈ။
၃ မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ်ၸဝ်ႈပေႃႈမၼ်းဢႃႇမၸိႁဵတ်းၼၼ်ႉဢေႃႈ။
၄ ၵူၺ်းၵႃႈမၼ်းဢမ်ႇပႄႇပႅတ်ႈထႃႇၼႃႉတီႈသုင်တင်းလၢႆလႄႈၵူၼ်းတင်းလၢႆယင်းဢွၼ်ၵၼ်ပုၵ်ႉၸေႃႇယိၸ်ႉလႄႈဢဝ်ၼၢမ်ႇသႃႇတုတ်ႇၽႆးၵႃႈတီႈထႃႇၼႃႉတီႈသုင်ၸိူဝ်းၼၼ်ႉယူႇဢေႃႈ။
၅ ထႃႇဝရႃႉၽြႃးပၼ်တၢမ်တီႈၶုၼ်ႁေႃၶမ်းၼၼ်ႉလႄႈမၼ်းပဵၼ်တုတ်ႈလႄႈလႆႈယူႇၵႃႈတီႈႁေႃလင်ၼိုင်ႈၶေႃၶေႃႁင်းၵူၺ်းမၼ်းတေႃႇထိုင်ႁွတ်ႈထၢၼ်ႈပေႃးတၢႆဢေႃႈ။ယုဝ်ႇထမ်ႇလုၵ်ႈၸၢႆးၸဝ်ႈၼၼ်ႉလႆႈဢုပ်ႉၵႃႈၼိူဝ်ႁေႃၸဝ်ႈလႄႈၸီႇယၢင်ႇဢမူႉတီႈၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။
၆ လွင်ႈတၢင်းဢႃႇၸရိဢၼ်ယင်းၵိုတ်းယင်းၵျၢၼ်ႇလွင်ႈတၢင်းၵႃႈဢၼ်မၼ်းႁဵတ်းပဵၼ်ၸိူဝ်းၼၼ်ႉတႅမ်ႈရဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။
၇ ဢႃႇၸရိၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶဝ်ဢဝ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉၵႃႈၼႂ်းဝဵင်းတႃႇဝိတ်ႉဢေႃႈ။ယုဝ်ႇထမ်ႇလုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ၸႃႇၶရိၶုၼ်ႁေႃၶမ်းဢိသရေႇလ
၈ ၼႂ်းပီႊဢၼ်ဢႃႇၸရိၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆပႅတ်ႇပီႊၼၼ်ႉၸႃႇၶရိလုၵ်ႈၸၢႆးၸဝ်ႈယေႇရူဝ်းပုမ်ႇၼၼ်ႉဢုပ်ႉပိူင်ႇၸၢမ်ႇၸႃးမိူင်းဢိသရေႇလၵႃႈၼႂ်းဝဵင်းသမႃႇရိႁူၵ်းလိူၼ်တဵမ်တဵမ်ဢေႃႈ။
၉ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ်ပူႇမၼ်းမွၼ်ႇမၼ်းႁဵတ်းၼၼ်ႉလႄႈယင်းဢမ်ႇၸုၼ်ႉပႅတ်ႈတူႉၸရိူၵ်ႈဢပျႅတ်ႈယေႇရူဝ်းပုမ်ႇလုၵ်ႈၸၢႆးၼေႇပတ်ႉဢၼ်ႁဵတ်းႁႂ်ႈမဵဝ်းဢိသရေႇလၽိတ်းပိူင်ႈၼၼ်ႉဢေႃႈ။
၁၀ သႃႇလုမ်ႇလုၵ်ႈၸၢႆးယႃႇၽိတ်ႉၼၼ်ႉလွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းလႄႈယႃႉမၼ်းပႅတ်ႈႁႂ်ႈထၼ်ႈပေႃးတၢႆၵႃႈတီႈၽၢႆႇၼႃႈၵူၼ်းတင်းလၢႆသေလႄႈၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။
၁၁ လွင်ႈတၢင်းၸႃႇၶရိဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉတႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၁၂ ၼင်ႇၼၼ်လႄႈထႃႇဝရႃႉၽြႃးမီးဢမိင်ႉဝႆႉတီႈယေႇႁုလႄႈဝႃႈ၊-ၸူဝ်ႈလုၵ်ႈပၢၼ်လၢၼ်မႂ်းတၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇမိူင်းဢိသရေႇလတေႃႇထိုင်ႁွတ်ႈသီႇသိုပ်ႇဢေႃႈ၊ဝႃႈၼင်ႇၼႆၼၼ်ႉတဵမ်ထူၼ်ႈယဝ်ႉဢေႃႈ။
သႃႇလုမ်ႇၶုၼ်ႁေႃၶမ်းဢိသရေႇလ
၁၃ ၼႂ်းပီႊဢၼ်ဢုဝ်ႇလိယၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆၵဝ်ႈပီႊၼၼ်ႉသႃႇလုမ်ႇၸႃႉၼင်ႈႁၢင်ႈၼင်ႈႁေႃလႄႈဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းသမႃႇရိလိူၼ်ၼိုင်ႈဢေႃႈ။
၁၄ မေႇၼႁိမ်ႇလုၵ်ႈၸၢႆးၵႃႇတိၼၼ်ႉလုၵ်ႉသေၵႃႈတီႈဝဵင်းတိရၸၶိုၼ်ႈၸူးလႄႈႁွတ်ႈထိုင်ၵႃႈတီႈဝဵင်းသမႃႇရိသေယဝ်ႉယႃႉပႅတ်ႈသႃႇလုမ်ႇလုၵ်ႈၸၢႆးယႃႇၽိတ်ႉၼၼ်ႉၵႃႈၼႂ်းဝဵင်းသမႃႇရိၼၼ်ႉႁႂ်ႈထၢၼ်ႈပေႃးတၢႆသေလႄႈၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။
၁၅ လွင်ႈတၢင်းသႃႇလုမ်ႇဢၼ်ယင်းၵိုတ်းယင်းၵျၢၼ်ႇလွင်ႈတၢင်းဢၼ်မၼ်းလွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းၶုၼ်ၼၼ်ႉတႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၁၆ မိူဝ်ႈၼၼ်ႉမေႇၼႁိမ်ႇတိုၵ်းတေႃးယႃႉပႅတ်ႈဝဵင်းတိၽသႃႇတင်းၵူၼ်းၵႃႈဢၼ်မီးၵႃႈၼႂ်းမၼ်းတင်းဢိူင်ႇမၼ်းဢၼ်မၼ်းပူၼ်ႉသဝေဵင်းတိရၸၵႂႃႇၸိူဝ်းၼၼ်ႉဢေႃႈ။မၼ်းတိုၵ်းတေႃးယႃႉပႅတ်ႈဝဵင်းၼၼ်ႉၵွပ်ႈပိူဝ်ႈဢၼ်ၶဝ်ဢမ်ႇၽုၺ်ႇၽၵ်းတူဝဵင်းပၼ်မၼ်းၼၼ်ႉဢေႃႈ။မၼ်းၽႃႇတွင်ႉမေႈယိင်းၵႃႈဢၼ်ပႃးသၼ်ႇထေႇၸိူဝ်းၼၼ်ႉၵႃႈၼႂ်းဝဵင်းၼၼ်ႉဢေႃႈ။
မေႇၼႁိမ်ႇၶုၼ်ႁေႃၶမ်းဢိသရေႇလ
၁၇ ၼႂ်းပီႊဢၼ်ဢႃႇၸရိၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆၵဝ်ႈပီႊၼၼ်ႉမေႇၼႁိမ်ႇလုၵ်ႈၸၢႆးၵႃႇတိၼၼ်ႉၸႃႉၼင်ႈႁၢင်ႈၼင်ႈႁေႃလႄႈဢုပ်ႉပိူင်ႇၸၢမ်ႇၸႃးမိူင်းဢိသရေႇလယူႇၵႃႈၼႂ်းဝဵင်းသမႃႇရိသိပ်းပီႊဢေႃႈ။
၁၈ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈယင်းဢမ်ႇၸုၼ်ႉပႅတ်ႈတူႉၸရိူၵ်ႈဢပျႅတ်ႈယေႇရူဝ်းပုမ်ႇလုၵ်ႈၸၢႆးၼေႇပတ်ႉဢၼ်မၼ်းႁႂ်ႈမဵဝ်းဢိသရေႇလၽိတ်းပိူင်ႈၼၼ်ႉလႄႈယူႇဢေႃႈ။
၁၉ ပုလၶုၼ်ႁေႃၶမ်းဢႃႇသုရိၼၼ်ႉမႃးတိုၵ်းတေႃးမိူင်းၸဝ်ႈလႄႈမေႇၼႁိမ်ႇဢဝ်ငိုၼ်းႁဵင်တလၢၼ်ႇတၢၼ်ႇပၼ်ပုလႁႂ်ႈလႆႈတၢင်းၸွႆႈတၢင်းထႅမ်တီႈမၼ်းလႄႈႁႂ်ႈႁႅင်းမၼ်းယႂ်ႇမႃးဢေႃႈ။
၂၀ မေႇၼႁိမ်ႇၽႃႇငိုၼ်းၵဵပ်းဢဝ်ငိုၼ်းတီႈမဵဝ်းဢိသရေႇလဢၼ်ဝႃႈတီႈၶဝ်ၸိူဝ်းဢၼ်မၢၵ်ႈမီးၵူႈၵေႃႉၵူႈၵူၼ်းယေႈၵေႃႉႁႃႈၶၼ်ပုၼ်ႈဢၼ်တၵ်းသၢၵ်ႈပၼ်တီႈၶုၼ်ႁေႃၶမ်းဢႃႇသုရိဢေႃႈ။ၵွပ်ႈပိူဝ်ႈၼင်ႇၼၼ်လႄႈၶုၼ်ႁေႃၶမ်းဢႃႇသုရိၼၼ်ႉဝၢႆႇၶိုၼ်းမိူဝ်းၵႂႃႇလႄႈဢမ်ႇယူႇၵႃႈတီႈမိူင်းၼၼ်ႉ။
၂၁ လွင်ႈတၢင်းမေႇၼႁိမ်ႇဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၂၂ မေႇၼႁိမ်ႇၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈပေႇၵႁိလုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ပေႇၵႁိၶုၼ်ႁေႃၶမ်းဢိသရေႇလ
၂၃ ၼႂ်းပီႊဢၼ်ဢႃႇၸရိၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃႁႃႈသိပ်းပီႊၼၼ်ႉပေႇၵႁိလုၵ်ႈၸၢႆးမေႇၼႁိမ်ႇၼၼ်ႉၸႃႉၼင်ႈႁၢင်ႈၼင်ႈႁေႃလႄႈဢုပ်ႉပိူင်ႇၸၢမ်ႇၸႃးမိူင်းဢိသရေႇလယူႇၵႃႈၼႂ်းဝဵင်းသမႃႇရိသွင်ပီႊဢေႃႈ။
၂၄ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈယင်းဢမ်ႇၸုၼ်ႉပႅတ်ႈတူႉၸရိူၵ်ႈဢပျႅတ်ႈယေႇရူဝ်းပုမ်ႇလုၵ်ႈၸၢႆးၼေႇပတ်ႉဢၼ်ႁဵတ်းႁႂ်ႈမဵဝ်းဢိသရေႇလၽိတ်းပိူင်ႈၼၼ်ႉလႄႈယူႇဢေႃႈ။
၂၅ ပေႇၵႃႇလုၵ်ႈၸၢႆးရေႇမလိႁူဝ်သိုၵ်းမၼ်းၼၼ်ႉလွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းလႄႈပႃးဢဝ်ၵူၼ်းမိူင်းၵိလတ်ႉႁႃႈသိပ်းၵေႃႉသေလႄႈယႃႉပႅတ်ႈမၼ်းဢိၵ်ႇတင်းဢၵေႃႇၽတင်းဢရေႇႁၼၼ်ႉၵႃႈၼႂ်းတပ်ႉႁေႃၸဝ်ႈၵႃႈတီႈဝဵင်းသမႃႇရိၼၼ်ႉႁႂ်ႈထၢၼ်ႈပေႃးတၢႆလႄႈၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။
၂၆ လွင်ႈတၢင်းပေႇၵႁိဢၼ်ယင်းၵိုတ်းယင်းၵျၢၼ်ႇလွင်ႈတၢင်းၵႃႈဢၼ်မၼ်းႁဵတ်းၼၼ်ႉၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
ၵေႇၵႃႇၶုၼ်ႁေႃၶမ်းဢိသရေႇလ
၂၇ ၼႂ်းပီႊဢၼ်ဢႃႇၸရိၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃႁႃႈသိပ်းပၢႆသွင်ပီႊၼၼ်ႉပေႇၵႃႇလုၵ်ႈၸၢႆးရေႇမလိၸႃႉၼင်ႈႁၢင်ႈၼင်ႈႁေႃလႄႈဢုပ်ႉပိူင်ႇၸၢမ်ႇၸႃးမိူင်းဢိသရေႇလယူႇၵႃႈၼႂ်းဝဵင်းသမႃႇရိသၢဝ်းပီႊဢေႃႈ။
၂၈ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈယင်းဢမ်ႇၸုၼ်ႉပႅတ်ႈတူႉၸရိူၵ်ႈဢပျႅတ်ႈယေႇရူဝ်းပုမ်ႇလုၵ်ႈၸၢႆးၼေႇပတ်ႉဢၼ်ႁဵတ်းႁႂ်ႈမဵဝ်းဢိသရေႇလၽိတ်းပိူင်ႈၼၼ်ႉလႄႈယူႇဢေႃႈ။
၂၉ ၼႂ်းၸူဝ်ႈပၢၼ်ပေႇၵႃႇၶုၼ်ႁေႃၶမ်းဢိသရေႇလၼၼ်ႉတိၵလတ်ႉပိလေႇသႃႇၶုၼ်ႁေႃၶမ်းသုရိမႃးလႄႈတိုၵ်းဢဝ်ဝဵင်းဢိယုၼ်ႇ၊ဝဵင်းဢပေႇလပိတ်ႉမႃႇၶႃႇ၊ဝဵင်းယႃႇၼေႃႇဝဵင်းၵေႇတေႇသဝဵင်းႁႃႇၸေႃႇဢိၵ်ႇတင်းမိူင်းၵိလတ်ႉမိူင်းၵႃႇလိလႄးမိူင်းၼပ်ႉထလိၵႃႈမီးၼၼ်ႉလႄႈသိမ်းဢဝ်ၶဝ်ၵႂႃႇၵႃႈတီႈမိူင်းဢႃႇသုရိဢေႃႈ။
၃၀ ၼႂ်းပီႊဢၼ်ယုဝ်ႇထမ်ႇလုၵ်ႈၸၢႆးဢုဝ်ႇၸိယၸၢမ်ႇႁၢင်ႈၸၢမ်ႇႁေႃသၢဝ်းပီႊၼၼ်ႉႁေႃးသေႇလုၵ်ႈၸၢႆးဢေးလႃႇၼၼ်ႉလွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းပေႇၵႃႇလုၵ်ႈၸၢႆးရေႇမလိလႄႈယႃႉပႅတ်ႈႁႂ်ႈထၢၼ်ႈပေႃးတၢႆသေယဝ်ႉၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။
၃၁ လွင်ႈတၢင်းပေႇၵႃႇဢၼ်ယင်းၵိုတ်းယင်းၵျၢၼ်ႇလွင်ႈၵႃႈဢၼ်မၼ်းႁဵတ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
ယုဝ်ႇထမ်ႇၶုၼ်ႁေႃၶမ်းယုတ
၃၂ ၼႂ်းပီႊဢၼ်ပေႇၵႃႇလုၵ်ႈၸၢႆးရေႇမလိႉၶုၼ်ႁေႃၶမ်းဢိသရေႇလၸၢမ်ႇႁၢင်ႈၸၢမ်ႇႁေႃသွင်ပီႊၼၼ်ႉယုဝ်ႇထမ်ႇလုၵ်ႈၸၢႆးၸဝ်ႈဢုဝ်ႇၸိယၶုၼ်ႁေႃၶမ်းယုတၼၼ်ႉၸႃႉၼင်ႈႁၢင်ႈၼင်ႈႁေႃဢေႃႈ။
၃၃ မိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းပၢႆသွင်ပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသိပ်းပၢႆႁူၵ်းပီႊဢေႃႈ။ၸိုဝ်သဵင်မေႈၸဝ်ႈၸမ်းပဵၼ်ယေႇရုသႃႇလုၵ်ႈယိင်းၸႃႇတုၵ်ႉဢေႃႈ။
၃၄ မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈၸွမ်းၵႃႈၼင်ႇဢၼ်ၸဝ်ႈပေႃႈမၼ်းဢုဝ်ႇၸိယႁဵတ်းၼၼ်ႉဢေႃႈ။
၃၅ ၵူၺ်းၵႃႈမၼ်းဢမ်ႇပႄႇပႅတ်ႈထႃႇၼႃႉတီႈသုင်တင်းလၢႆလႄႈၵူၼ်းတင်းလၢႆယင်းဢွၼ်ၵၼ်ပုၵ်ႉၸေႃႇယိၸ်ႉလႄႈဢဝ်ၼၢမ်ႇသႃႇတုတ်ႇၽႆးၵႃႈတီႈထႃႇၼႃႉတီႈသုင်ၸိူဝ်းၼၼ်ႉဢေႃႈ။မၼ်းႁဵတ်းၽၵ်းတူႁၢၼ်ႉၼိူဝ်တီႈႁိူၼ်းထႃႇဝရႃႉၽြႃးဢေႃႈ။
၃၆ လွင်ႈတၢင်းယုဝ်ႇထမ်ႇဢၼ်ယင်းၵိုတ်းယင်းၵျၢၼ်လွင်ႈတၢင်းဢၼ်မၼ်းႁဵတ်းၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတဢေႃႈ။
၃၇ ၼႂ်းၶိင်ႇမိူဝ်ႈၼၼ်ႉထႃႇဝရႃႉၽြႃးၸႃႉပွႆႇၸႂ်ႉရေႇၸိၼ်ႇၶုၼ်ႁေႃၶမ်းသုရိဢိၵ်ႇတင်းပေႇၵႃႇလုၵ်ႈၸၢႆးရေႇမလိၶီႇသိုၵ်းမႃးၵႃႈတီႈမိူင်းယုတဢေႃႈ။
၃၈ ယုဝ်ႇထမ်ႇၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉၵႃႈၼႂ်းဝဵင်းၸဝ်ႈပေႃႈမၼ်းတႃႇဝိတ်ႉၼၼ်ႉဢေႃႈ။ဢႃႇၶတ်ႉလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။