Chapter
၁၀
ဢဝ်ၵူၼ်းႁိူၼ်းၵူၼ်းယေးဢႃႇႁပ်ႉတၢႆ
၁ ပိူဝ်ႈဢၼ်ဢႃႇႁပ်ႉမီးလုၵ်ႈၸၢႆးသိပ်းဢဵတ်းၵေႃႉၵႃႈၼႂ်းဝဵင်းသမႃႇရိၼၼ်ႉလႄႈယေႇႁုတႅမ်ႈလိၵ်ႈပၼ်ၵႂႃႇၵႃႈတီႈဝဵင်းသမႃႇရိၸူးၵႃႈတီႈၽူႈဢုပ်ႉဝဵင်းယေႇၸရေႇလဢၼ်ဝႃႈၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆဢိၵ်ႇတင်းၶဝ်ၸိူဝ်းဢၼ်ႁဵတ်းလဵင်ႉႁဵတ်းလူလုၵ်ႈၸၢႆးဢႃႇႁပ်ႉၸိူဝ်းၼၼ်ႉၼၼ်ႉလႄႈဝႃႈ၊-
၂ ၶိင်ႇမိူဝ်ႈဢၼ်လိၵ်ႈၼႆႉႁွတ်ႈထိုင်တီႈသူၼၼ်ႉၵမ်းလဵဝ်ပိူဝ်ႈဢၼ်လုၵ်ႈၸၢႆးၸဝ်ႈသူတင်းလၢႆမီးလူၺ်ႈၵၼ်တင်းသူလႄႈၵူၼ်းသိုၵ်းၶီႇမႃႉလႂ်ဝဵင်းဢၼ်မၼ်ႈၶိူင်ႇလၢၵ်ႈၼၢၵ်ႈၸုမ်ႇလႂ်မီးတီႈသူၼၼ်ႉလႄႈ
၃ ဢွၼ်ၵၼ်လိူၵ်ႈၵဵပ်းဢဝ်ၵေႃႉဢၼ်ယိင်ႈၶႅၼ်းလီမျၢတ်ႈထုၵ်ႇဢၢပ်ႈသပေိူၼ်ႈၼၼ်ႉၵႃႈၼႂ်းလုၵ်ႈၸၢႆးၸဝ်ႈသူၸိူဝ်းၼၼ်ႉသေလႄႈဢဝ်တၢင်ႇၵႃႈၼိူဝ်ရႃႇၸႃႉပလၢင်ႇၸဝ်ႈပေႃႈမၼ်းသေလႄႈတိုၵ်းသိုၵ်းပုၼ်ႈမဵဝ်းၸိူဝ်ႉၶိူဝ်းၸဝ်ႈသူတႃႉ၊ဝႃႈၼင်ႇၼႆဢေႃႈ။
၄ ၶဝ်ၼၼ်ႉၵူဝ်ၼႃႇလူင်လၢင်လႄႈလၢတ်ႈလႄႈဝႃႈ၊-တေႃႈၵႃႈၶုၼ်ႁေႃၶမ်းသွင်ပႃးယင်းဢမ်ႇၸုၵ်းဢမ်ႇၶၢမ်ႇၵႃႈတီႈၽၢႆႇၼႃႈမၼ်းလႆႈလႄႈႁဝ်းၼႆႉတၵ်းၸုၵ်းၶၢမ်ႇလႆႈၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။
၅ ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈ၊ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်တင်းလၢႆၶဝ်ၸိူဝ်းဢၼ်ႁဵတ်းလဵင်ႉႁဵတ်းလူတီႈလုၵ်ႈၸၢႆးဢႃႇႁပ်ႉၸိူဝ်းၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈၵႂႃႇတီႈယေႇႁုလႄႈဝႃႈ၊-ႁဝ်းၶႃႈၸိူဝ်းၼႆႉပဵၼ်ၶႃႈၸဝ်ႈႁဝ်းလႄႈတၵ်းဢွၼ်ၵၼ်ႁဵတ်းၸွမ်းၵႃႈဢၼ်ၸဝ်ႈႁဝ်းမီးဢမိင်ႉၼၼ်ႉၶႃႈဢေႃႈ။ၶႃႈၸဝ်ႈၸိူဝ်းၼႆႉတၵ်းဢမ်ႇဢဝ်ၽူႈလႂ်သေၵေႃႉသေၵူၼ်းႁဵတ်းၶုၼ်ႁေႃၶမ်းတီႈၶႃႈ။ႁဵတ်းၸွမ်းၵႃႈဢၼ်ထုၵ်ႇတႃၸဝ်ႈႁဝ်းၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၆ မၼ်းၵေႃႈသမ်ႉတႅမ်ႈလိၵ်ႈပၼ်ၵႂႃႇထႅင်ႈလႄႈဝႃႈ၊-ပေႃးသူယူႇၽၢႆႇၵဝ်လႄႈထွမ်ႇဢဝ်ၵႂၢမ်းၵဝ်ၸိုင်သူဢွၼ်ၵၼ်ဢဝ်ၵွၵ်းႁူဝ်ၶဝ်ၸိူဝ်းဢၼ်ပဵၼ်လုၵ်ႈၸၢႆးၸဝ်ႈသူၸိူဝ်းၼၼ်ႉသေလႄႈမႃးၵႃႈတီႈၵဝ်ၵႃႈၼႂ်းဝဵင်းယေႇၸရေႇသၼႆႉဝၼ်းမိူဝ်ႈၽုၵ်ႈၶိင်ႇၼႆႉၼၼ်ႉတႃႉ၊ဝႃႈၼင်ႇၼႆဢေႃႈ။လုၵ်ႈၸၢႆးၶုၼ်ႁေႃၶမ်းၸိူဝ်းၼၼ်ႉၼပ်ႉပွင်းၵၼ်မီးၸဵတ်းသိပ်းၵေႃႉလႄႈဢွၼ်ၵၼ်မီးယူႇၵႃႈတီႈၵူၼ်းယႂ်ႇၵူၼ်းလူင်ၵူၼ်းဝဵင်းဢၼ်လဵင်ႉလူၶဝ်ၼၼ်ႉဢေႃႈ။
၇ မိူဝ်ႈဢၼ်လိၵ်ႈၼၼ်ႉႁွတ်ႈထိုင်တီႈၶဝ်ၼၼ်ႉၸိုင်ၶဝ်ဢွၼ်ၵၼ်ဢဝ်လုၵ်ႈၸၢႆးၶုၼ်ႁေႃၶမ်းၸိူဝ်းၼၼ်ႉတၢႆတင်းၸဵတ်းသိပ်းၵေႃႉလႄႈဢဝ်ၵွၵ်းႁူဝ်ၶဝ်သႂ်ႇၵႃႈၼႂ်းပဵတ်ႈၼႂ်းၵူၺ်သေလႄႈပၼ်ၵႂႃႇတီႈမၼ်းၵႃႈၼႂ်းဝဵင်းယေႇၸရေႇသဢေႃႈ။
၈ ၵူၼ်းဢွၼ်ႇၵေႃႉၼိုင်ႈမႃးလဝ်ႈလၢတ်ႈတီႈမၼ်းလႄႈဝႃႈ၊-ၶဝ်ဢွၼ်ၵၼ်ဢဝ်ၵွၵ်းႁူဝ်လုၵ်ႈၸၢႆးၶုၼ်ႁေႃၶမ်းၸိူဝ်းၼၼ်ႉမႃးတီႈၶႃႈယဝ်ႉ၊ဝႃႈၼင်ႇၼႆလႄႈမၼ်းလၢတ်ႈလႄႈဝႃႈ၊-ႁဵတ်းသွင်ၵွင်လႄႈဢဝ်ၵွင်ဝႆႉၵႃႈတီႈႁူးၽၵ်းတူဝဵင်းတေႃႇထိုင်ႁွတ်ႈၶိင်ႇၵၢင်ၼႂ်တႃႉ၊ဝႃႈၼင်ႇၼႆဢေႃႈ။
၉ ႁွတ်ႈထိုင်ၶိင်ၵၢင်ၼႂ်သေယဝ်ႉမၼ်းဢွၵ်ႇလႄႈၸုၵ်းလၢတ်ႈတေႃႇၵူၼ်းတင်းသဵင်ႈတင်းလူင်လႄႈဝႃႈ၊-သူဢမ်ႇမီးဢပျႅတ်ႈ။ၵဝ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းၸဝ်ႈၵဝ်သေလႄႈဢဝ်မၼ်းတၢႆယဝ်ႉ။ၶဝ်တင်းသဵင်ႈတင်းလူင်ၼႆႉၸမ်းၽူႈလႂ်ဢဝ်တၢႆ။
၁၀ သူဢွၼ်ၵၼ်ႁူႉၸႅင်ႈမၢတ်ႈတွင်းလွင်ႈဢၼ်ၵႂၢမ်းထႃႇဝရႃႉၽြႃးမီးဢမိင်ႉဝႆႉလူၺ်ႈလွင်ႈမဵဝ်းၸိူဝ်ႉၶိူဝ်းဢႃႇႁပ်ႉၼၼ်ႉဢမ်ႇလႆႈတူၵ်းၵႃႈတီႈလိၼ်သေၶေႃႈသေၵမ်းၼၼ်ႉတႃႉ။ထႃႇဝရႃႉၽြႃးႁဵတ်းၸွမ်းၵႃႈဢၼ်မၼ်းၸဝ်ႈဢဝ်ၶႃႈမၼ်းၸဝ်ႈဢေးလိယမီးဢမိင်ႉဝႆႉၼၼ်ႉယဝ်ႉ၊
၁၁ ဝႃႈၼင်ႇၼႆသေယဝ်ႉယေႇႁုဢဝ်မဵဝ်းၸိူဝ်ႉၶိူဝ်းဢႃႇႁပ်ႉၵႃႈဢၼ်ၵိုတ်းဢၼ်ၵျၢၼ်ႇၵႃႈၼႂ်းဝဵင်းယေႇၸရေႇလဢိၵ်ႇတင်းၵူၼ်းယႂ်ႇၵူၼ်းလူင်မၼ်းတင်းသဵင်ႈတင်းလူင်၊ပီႈၼွင်ႉမၼ်းတင်းလၢႆယိတ်ႉပရေႃးႁိၵ်ႈမၼ်းတင်းလၢႆတၢႆထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းဢေႃႈ။
၁၂ လိုၼ်းၼၼ်ႉမၼ်းၵႂႃႇၵႃႈတီႈဝဵင်းသမႃႇရိဢေႃႈ။မိူဝ်ႈဢၼ်မၼ်းႁွတ်ႈထိုင်ၵႃႈတီႈၸရွပ်ႈတီႈဢၼ်ၵႅတ်းႁႆးၶူၼ်သူဝ်းဢၼ်မီးၵႃႈတီႈႁိမ်းသဵၼ်ႈတၢင်းၼၼ်ႉၸိုင်မၼ်းထူပ်းႁၼ်ပီႈၼွင်ႉၸိူဝ်ႉၶိူဝ်းဢႃႇၶၸိၶုၼ်ႁေႃၶမ်းယုတၼၼ်ႉသေယဝ်ႉထၢမ်လႄႈဝႃႈ၊-သူပဵၼ်ၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉလၢတ်ႈလႄႈဝႃႈ၊-ႁဝ်းပဵၼ်ပီႈၼွင်ႉၸိူဝ်ႉၶိူဝ်းဢႃႇၶၸိဢေႃႈ။
၁၃ ႁဝ်းလူင်းၵႂႃႇႁႂ်ႈလႆႈတၵ်ႉလႆႈလၢတ်ႈလုၵ်ႈၸၢႆးၶုၼ်ႁေႃၶမ်းလႂ်တင်းလုၵ်ႈၸၢႆးၼၢင်းႁေႃၶမ်းလႂ်ဢေႃႈ၊ဝႃႈၼင်ႇၼႆဢေႃႈ။
၁၄ မၼ်းၵေႃႈဝႃႈ၊-တိၺွပ်းဢဝ်တူဝ်လိပ်းၶဝ်တႃႉ၊ဝႃႈၼင်ႇၼႆလႄႈၶဝ်ဢွၼ်ၵၼ်တိၺွပ်းဢဝ်တူဝ်လိပ်းၶဝ်ၼၼ်ႉလႄႈဢဝ်ၶဝ်တၢႆသီႇသိပ်းပၢႆသွင်ၵေႃႉၼၼ်ႉၵႃႈတီႈၶုမ်ႁူးဢၼ်မီးၵႃႈတီႈၸရွပ်ႈၵႅတ်းႁႆးၶူၼ်သူဝ်းၼၼ်ႉလႄႈဢမ်ႇႁႂ်ႈလႆႈၵိုတ်းၵျၢၼ်ႇဝႆႉသေၵေႃႉသေၵူၼ်း။
၁၅ မိူဝ်ႈဢၼ်မၼ်းဢွၵ်ႇသေၵႃႈတီႈၼၼ်ႉၵႂႃႇၸိုင်မၼ်းထူပ်းႁၼ်ယေႃးၼတပ်ႉလုၵ်ႈၸၢႆးရေႇၶပ်ႉမႃးႁႂ်ႈလႆႈႁပ်ႉႁူဝ်တၢင်းမၼ်းလႄႈမၼ်းတၵ်ႉလၢတ်ႈလႄႈထၢမ်ဝႃႈ၊-ႁူဝ်ၸႂ်မႂ်းသိုဝ်ႈလီရူဝ်းလီမိူၼ်ၸိူဝ်ႉၼင်ႇႁူဝ်ၸႂ်ၵဝ်သိုဝ်ႈလီရူဝ်းလီတေႃႇႁူဝ်ၸႂ်မႂ်းၼၼ်ႉႁိုဝ်၊ဝႃႈၼင်ႇၼႆသေယဝ်ႉယေႃႇၼတပ်ႉၶိုၼ်းလဝ်ႈလၢတ်ႈလႄႈဝႃႈ၊-သိုဝ်ႈရူဝ်းယူႇတီႈၶႃႈဢေႃႈ၊မိူဝ်ႈဢၼ်ဝႃႈၼင်ႇၼၼ်ၸိုင်မၼ်းလၢတ်ႈလႄႈဝႃႈ၊-ပေႃးၸိုဝ်ႈၸႂ်ႈၸိူဝ်ႉၼင်ႇၼႆၸိုင်ပၼ်မိုဝ်းမႂ်းမႃးတီႈၵဝ်တႃႉ၊ဝႃႈၼင်ႇၼႆလႄႈမၼ်းၼၼ်ႉပၼ်မိုဝ်းမၼ်းတီႈမၼ်းလႄႈမၼ်းတိုတ်းဢဝ်မၼ်းၼၼ်ႉတၢင်ႇသႂ်ႇၵႃႈၼိူဝ်လေႃႉရထႃးၵႃႈတီႈႁိမ်းမၼ်းသေလႄႈဝႃႈ၊-
၁၆ ၸွမ်းလူၺ်ႈၵၼ်တင်းၵဝ်လႄႈလူတူၺ်းလွင်ႈဢၼ်ႁူဝ်ၸႂ်ၵဝ်ႁႅင်းယႂ်ႇၽၢႆႇထႃႇဝရႃႉၽြႃးၼႆႉတႃႉ၊ဝႃႈၼင်ႇၼႆသေယဝ်ႉႁႂ်ႈမၼ်းၶီႇလေႃႉရထႃးမၼ်းဢေႃႈ။
၁၇ မိူဝ်ႈဢၼ်မၼ်းႁွတ်ႈထိုင်ၵႃႈတီႈဝဵင်းသမႃႇရိၼၼ်ႉၸိုင်မၼ်းဢဝ်မဵဝ်းၸိူဝ်ႉၶိူဝ်းဢႃႇႁပ်ႉၵႃႈဢၼ်ၵိုတ်းဢၼ်ၵျၢၼ်ႇၵႃႈၼႂ်းဝဵင်းသမႃႇရိၼၼ်ႉတၢႆတေႃႇထိုင်ႁွတ်ႈထၼ်ႈပေႃးလူႉလႅဝ်ပႅတ်ႈတင်းသဵင်ႈတင်းမူတ်းၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃးမီးဢမိင်ႉတီႈဢေးလိယၼၼ်ႉဢေႃႈ။
ဢဝ်ပရေႃးၽႅတ်ႈၽြႃးပႃႇလတၢႆ
၁၈ လၢႆးသမ်ႉယေႇႁုႁႂ်ႈၵူၼ်းတင်းသဵင်ႈတင်းလူင်ၸူႉၵၼ်တုမ်ၵၼ်လႄႈလၢတ်ႈတီႈၶဝ်လႄႈဝႃႈ၊-ဢႃႇႁပ်ႉၼၼ်ႉႁဵတ်းဝတ်ႈတီႈၽြႃးပႃႇလဢိတ်းဢွၼ်ႇၼိုင်ႈၵူၺ်းဢေႃႈ။
၁၉ ယေႇႁုတၵ်းႁဵတ်းဝတ်ႈၼမ်ၼမ်ဢေႃႈ။ပိူဝ်ႈၼႆလႄႈႁွင်ႉဢဝ်ပရေႃးၽႅတ်ႈၽြႃးပႃႇလတင်းသဵင်ႈတင်းလူင်ဢၼ်ဝႃႈၶဝ်ၸိူဝ်းဢၼ်ပႂ်ႉဢမူႉမၼ်းဢိၵ်ႇတင်းယိတ်ႉပရေႃးႁိၵ်ႈမၼ်းတင်းသဵင်ႈတင်းလူင်ၼၼ်ႉမႃးတႃႉ။ယႃႇပေႁႂ်ႈၵိုတ်းၵျၢၼ်ႇဝႆႉသေၵေႃႉသေၵူၼ်း။ၵဝ်တၵ်းပုၵ်ႉၸေႃႇယိၸ်ႉလူင်တီႈၽြႃးပႃႇလဢေႃႈ။ၵေႃႉဢၼ်ၵိုတ်းၵျၢၼ်ႇဝႆႉၼၼ်ႉဢသၢၵ်ႈဢမ်ႇလႆႈလိပ်း၊ဝႃႈၼင်ႇၼႆဢေႃႈ။မိူဝ်ႈဢၼ်ဝႃႈၸိူဝ်ႉၼင်ႇၼၼ်ၸမ်းယေႇႁုႁဵတ်းပရီႉယေႇလႄႈၵျၢမ်ႇပွင်တၵ်းယႃႉပႅတ်ႈၶဝ်ၸိူဝ်းဢၼ်ၵူဝ်းၵႂၢႆႇၽြႃးပႃႇလၸိူဝ်းၼၼ်ႉပႅတ်ႈဢေႃႈ။
၂၀ ယေႇႁုသမ်ႉၸီႇယၢင်ႇထႅင်ႈလႄႈဝႃႈ၊-ဢွၼ်ၵၼ်မႄးႁႅၼ်းပွႆးထမ်ႇမႃႉပုၼ်ႈၽြႃးပႃႇလတႃႉ၊ဝႃႈၼင်ႇၼႆလႄႈၶဝ်ဢွၼ်ၵၼ်ပဝ်ႇသေႃႇဢေႃႈ။
၂၁ ယေႇႁုပွႆႇၸႂ်ႉၵႃႈၼႂ်းမိူင်းဢိသရေႇလၵူႈတီႈၵူႈလႅၼ်လႄႈတပေးပႃႇလၵႃႈမီးၸိူဝ်းၼၼ်ႉယင်းဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းဢွၼ်ၵၼ်မႃးဢေႃႈ။ၶဝ်ဢွၼ်ၵၼ်ၶဝ်ႈၵႃႈၼႂ်းၵျွင်းပႃႇလလႄႈၵျွင်းပႃႇလၼၼ်ႉသတ်ႉတဵမ်ဝႆႉယူႇၸႃႉၸဵမ်ၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈဢေႃႈ။
၂၂ မၼ်းလၢတ်ႈတီႈၵေႃႉဢၼ်ပႂ်ႉထိင်းတိူၵ်ႈၶူဝ်းတိူၵ်ႈလဵင်းၼၼ်ႉလႄႈဝႃႈ၊-ဢဝ်ၶူဝ်းလဵင်းတၢင်းမႆႊဢွၵ်ႇပုၼ်ႈတပေးၽြႃးပႃႇလၵႃႈမီးၸိူဝ်းၼႆႉတႃႉ၊ဝႃႈၼင်ႇၼႆလႄႈမၼ်းၼၼ်ႉဢဝ်ၶိူင်ႈၼုင်ႈတၢင်းမႆႊဢွၵ်ႇဢေႃႈ။
၂၃ ယေႇႁုၶဝ်ႈၵႃႈၼႂ်းၵျွင်းပႃႇလလူၺ်ၵၼ်ႈတင်းယေႃႇၼတပ်ႉလုၵ်ႈၸၢႆးရေႇၶပ်ႉၼၼ်ႉလႄႈလၢတ်ႈတီႈတပေးပႃႇလၸိူဝ်းၼၼ်ႉလႄႈဝႃႈ၊-ဢွၼ်ၵၼ်ႁႃလႄႈလူတူၺ်းႁႂ်ႈဢမ်ႇလႆႈပႃးတပေးထႃႇဝရႃႉၽြႃးသေၵေႃႉသေၵူၼ်းလႄႈႁႂ်ႈမီးတပေးၽြႃးပႃႇလလၢႆလၢႆလွၼ်ႉလွၼ်ႉတႃႉ၊ဝႃႈၼင်ႇၼႆဢေႃႈ။
၂၄ ၼင်ႇၼၼ်လႄႈၶဝ်ဢွၼ်ၵၼ်ၶဝ်ႈၵႃႈၼႂ်းၵျွင်းႁႂ်ႈလႆႈပုၵ်ႉၸေႃႇၸႃႉၸဵမ်ယိၸ်ႉဢၼ်တုတ်ႇၽႆးလႄႈမဵဝ်းယိၸ်ႉတင်းလၢႆဢေႃႈ။ယေႇႁုဝႆႉၵူၼ်းပႅတ်ႇသိပ်းၵေႃႉၵႃႈတီႈၼွၵ်ႈသေလႄႈၸီႇယၢင်ႇလႄႈဝႃႈ၊-ပေႃးၶဝ်ၸိူဝ်းဢၼ်ၵဝ်ဢဝ်မႃးသႂ်ႇပၼ်ၵႃႈၼႂ်းမိုဝ်းသူၸိူဝ်းၼႆႉလႆႈလွတ်ႈၵႂႃႇသေၵေႃႉသေၵူၼ်းၸိုင်ဢသၢၵ်ႈၵေႃႉဢၼ်ႁႂ်ႈလွတ်ႈၼၼ်ႉတၵ်းလႆႈပဵၼ်ပုၼ်ႈဢသၢၵ်ႈၵေႃႉၼၼ်ႉဢေႃႈ၊ဝႃႈၼင်ႇၼႆလႄႈ၊
၂၅ မိူဝ်ႈဢၼ်မၼ်းႁဵတ်းတၢင်းဢၼ်ပုၵ်ႉယိၸ်ႉယဝ်ႉတူဝ်ႈယဝ်ႉၼၼ်ႉၸိုင်ယေႇႁုလၢတ်ႈတီႈၵူၼ်းသိုၵ်းပႂ်ႉႁၢင်ႈပႂ်ႉႁေႃတင်းလၢႆဢိၵ်ႇတင်းတပ်ႉမူးၸိူဝ်းၼၼ်ႉလႄႈဝႃႈ၊-ၶဝ်ၵႃႈၼႂ်းလႄႈဢဝ်ၶဝ်တၢႆတႃႉ။ယႃႇပေႁႂ်ႈလႆႈဢွၵ်ႇသေၵေႃႉသေၵူၼ်း၊ဝႃႈၼင်ႇၼႆလႄႈၶဝ်ဢွၼ်ၵၼ်ဢဝ်ၶဝ်ၼၼ်ႉတၢႆလူၺ်ႈၶူမ်းလၢပ်ႇၶူမ်းလႅဝ်းလႄႈၵူၼ်းသိုၵ်းပႂ်ႉႁၢင်ႈပႂ်ႉႁေႃတင်းလၢႆဢိၵ်ႇတင်းတပ်ႉမူးၸိူဝ်းၼၼ်ႉဢွၼ်ၵၼ်ဢဝ်တူဝ်တၢႆၶဝ်ဢွၵ်ႇပႅတ်ႈသေယဝ်ႉၶဝ်ႈၵႂႃႇၵႃႈတီႈဝဵင်းဢၼ်ၸၢပ်ႈသႅင်ႇၵၼ်တင်းၵျွင်းၽြႃးပႃႇလၼၼ်ႉသေလႄႈ
၂၆ ဢဝ်သဝ်တီႈၵူဝ်းၵႂၢႆႇတင်းလၢႆဢၼ်မီးၵႃႈၼႂ်းၵျွင်းပႃႇလၼၼ်ႉဢွၵ်ႇလႄႈတုတ်ႇၽႆးပႅတ်ႈဢေႃႈ။
၂၇ ၶဝ်ဢွၼ်ၵၼ်ၵိူၼ်ႇယႃႉသဝ်တီႈၵူဝ်းၵႂၢႆႇပႃႇလပႅတ်ႈလႄႈၵိူၼ်ႇယႃႉၵျွင်းပႃႇလပႅတ်ႈလႄႈဢဝ်ႁိၼ်ၸိူဝ်းၼၼ်ႉႁဵတ်းပဵၼ်ထၢင်လေႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၈ ၼင်ႇၼၼ်လႄႈယေႇႁုပႄႇၽဵဝ်ႈပႃႇလပႅတ်ႈသေၵႃႈၼႂ်းမိူင်းဢိသရေႇလဢေႃႈ။
၂၉ ၼႂ်းဝႃႈၼၼ်သေၵေႃႈယေႇႁုဢမ်ႇၸုၼ်ႉတူႉၸရိူၵ်ႈယေႇရူဝ်းပုမ်ႇလုၵ်ႈၸၢႆးၼေႇပတ်ႉဢၼ်ႁႂ်ႈမဵဝ်းဢိသရေႇလၽိတ်းပိူင်ႈဢၼ်ဝႃႈဝူဝ်းၶမ်းဢွၼ်ႇဢၼ်မီးၵႃႈတီႈဝဵင်းပေႇသလတင်းဝဵင်းတၼ်ႇၼၼ်ႉဢေႃႈ။
၃၀ ထႃႇဝရႃႉၽြႃးၵေႃႈမီးဢမိင်ႉတီႈယေႇႁုလႄႈဝႃႈၸမ်း၊-ၵွပ်ႈပိူဝ်ႈဢၼ်မႂ်းၵမ်ၵျၢင်ႉတၢင်းၵမ်တၢင်းၵျၢင်ႉဢၼ်သိုဝ်ႈတေႃႇသိုဝ်ႈၼႃႈတႂ်ႈတႃၵဝ်လႄႈႁဵတ်းလီလီငၢမ်းငၢမ်းဢိၵ်ႇတင်းၵွပ်ႈပိူဝ်ႈဢၼ်မႂ်းၸီႇယၢင်ႇတီႈမဵဝ်းၸိူဝ်ႉၶိူဝ်းဢႃႇႁပ်ႉၸွမ်းၵႃႈၼင်ႇဢၼ်ၵဝ်မီးဢလူဝ်ႇၼၼ်ႉလႄႈၸူဝ်ႈလုၵ်ႈပၢၼ်လၢၼ်မႂ်းတၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇမိူင်းဢိသရေႇလတေႃႇထိုင်ႁွတ်ႈသီႇသိုပ်ႇဢေႃႈ၊ဝႃႈၼင်ႇၼႆသေၵေႃႈ
၃၁ ယေႇႁုဢမ်ႇႁဵတ်းသတိႁႂ်ႈလႆႈပႃးတင်းႁူဝ်ၸႂ်သဵင်ႈသဵင်ႈသေၸွမ်းသဵၼ်ႈတၢင်းတြႃးထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉ။မၼ်းဢမ်ႇၸုၼ်ႉတူႉၸရိူၵ်ႈယေႇရူဝ်းပုမ်ႇဢၼ်ႁႂ်ႈမဵဝ်းဢိသရေႇလၽိတ်းပိူင်ႈၼၼ်ႉပႅတ်ႈ။
၃၂ ၼႂ်းၶိင်ႇၵႃႇလၼၼ်ႉထႃႇဝရႃႉၽြႃးႁဵတ်းႁႂ်ႈမိူင်းဢိသရေႇလၵႅပ်ႉၵႂႃႇဢေႃႈ။
၃၃ ႁႃႇၸေႇလတိုၵ်းတေႃးယႃႉၶဝ်ၵႃႈၼႂ်းၼမ်ႉၼႂ်းလိၼ်ဢိသရေႇလဢဝ်ၵႃႈတီႈၼမ်ႉႁွင်ႊယေႃႇတၢၼ်ႇၵႂႃႇၽၢႆႇဝၼ်းဢွၵ်ႇ၊မိူင်းၵိလတ်ႉတင်းသဵင်ႈတင်းမူတ်းၵူၼ်းမဵဝ်းၵတ်ႉ၊ၵူၼ်းမဵဝ်းရုပိၼ်ႇ၊ၵူၼ်းမဵဝ်းမၼႃႇသေတင်းလၢႆဢဝ်ၵႃႈတီႈဝဵင်းဢႃႇရေႃႇဢၼ်မီးၵႃႈၼႂ်းပၢင်ႇႁူၺ်ႈဢႃႇၼုၼ်ႇၵႂႃႇဢၼ်ဝႃႈမိူင်းၵိလတ်ႉတင်းမိူင်းပႃႇသၼ်ႇၸိူဝ်းၼၼ်ႉဢေႃႈ။
၃၄ လွင်ႈတၢင်းယေႇႁုဢၼ်ယင်းၵိုတ်းယင်းၵျၢၼ်ႇလွင်ႈတၢင်းၵႃႈဢၼ်မၼ်းႁဵတ်းပဵၼ်မႃးၸိူဝ်းၼၼ်ႉတႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၃၅ ယေႇႁုၼၼ်ႉၼွၼ်းလပ်းလူၺ်ၵၼ်တင်းပူႇမၼ်းမွၼ်ႇမၼ်းတင်းလၢႆလႄႈၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်းသမႃႇရိဢေႃႈ။ယေႃႇၶတ်ႉလုၵ်ႈၸၢႆးမၼ်းၼင်ႈႁၢင်ႈၼင်ႈႁေႃတင်းတူဝ်ၸဝ်ႈပေႃႈမၼ်းဢေႃႈ။ၶိင်ႇၵႃႇလၸူဝ်ႈပၢၼ်ဢၼ်ယေႇႁုယူႇၵႃႈၼႂ်းဝဵင်းသမႃႇရိလႄႈဢုပ်ႉပိူင်ႇၸၢမ်ႇၸႃးမိူင်းဢိသရေႇလၼၼ်ႉၸမ်းပဵၼ်သၢဝ်းပၢႆပႅတ်ႇပီႊဢေႃႈ။