Chapter
၇
၁ ဢေးလိသေးလၢတ်ႈလႄႈဝႃႈ၊-ဢွၼ်ၵၼ်ထွမ်ႇငိၼ်းၵႂၢမ်းထႃႇဝရႃႉၽြႃးတႃႉ။ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ဝၼ်းမိူဝ်ႈၽုၵ်ႈမိူဝ်ႈၶိင်ႇၼႆႉၼၼ်ႉတၵ်းဢွၼ်ၵၼ်ၶၢႆၽွင်ၶဝ်ႈမုၼ်းၵျုင်ႇယေႈသီႇပေႇငိုၼ်းယေႈၵျၢပ်ႈသၶေႇလ၊ၶဝ်ႈသၢၼ်မူႉယေႃးယေႈၶႂၢႆးယေႈၵျၢပ်ႈသၶေလၵႃႈတီႈႁူးၽၵ်းတူဝဵင်းသမႃႇရိဢေႃႈ၊ဝႃႈၼင်ႇၼႆဢေႃႈ။
၂ ဢမၢတ်ႈဢၼ်လႆႈၶၢမ်ႇတၢင်းဢၼ်ၶုၼ်ႁေႃၶမ်းဢိင်ယူႇၼၼ်ႉၶိုၼ်းလၢတ်ႈတီႈၵူၼ်းၽြႃးပဵၼ်ၸဝ်ႈၼၼ်ႉလႄႈဝႃႈ၊-တူၺ်းလူ။ပေႃးထႃႇဝရႃႉၽြႃးၽုၺ်ႇႁူးလၢင်းတဵၼႃ်ႉၵၢင်ႁၢဝ်ၸိုင်ၸၢင်ႊၶေးတၵ်းပဵၼ်ၸိူဝ်ႉၼင်ႇၼၼ်ယူႇဢေႃႈ၊ဝႃႈၼင်ႇၼႆလႄႈဢေးလိသေးၶိုၼ်းလၢတ်ႈလႄႈဝႃႈ၊-တူၺ်းလူ။မႂ်းတၵ်းဢဝ်တင်းမၢၵ်ႇတႃမႂ်းတူၺ်းႁၼ်ယူႇဢေႃႈ။ၵူၺ်းၵႃႈမႂ်းတၵ်းဢမ်ႇလႆႈၵိၼ်၊ဝႃႈၼင်ႇၼႆဢေႃႈ။
ပွႆႇၵူၼ်းမိူင်းလွတ်ႈ
၃ မိူဝ်ႈၼၼ်ႉၵူၼ်းတုတ်ႈဢၼ်ၼင်ႈယူႇၵႃႈတီႈႁူးၽၵ်းတူဝဵင်းသီႇၵေႃႉၼၼ်ႉတိူင်ႇပၢင်ႇၵၼ်လႄႈဝႃႈ၊-ႁဝ်းၼႆႉၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈတၵ်းလႆႈၼင်ႈယူႇၵႃႈတီႈၼႆႉတေႃႇပေႃးတၢႆ။
၄ ပေႃးႁဝ်းၶဝ်ႈၵႃႈၼႂ်းဝဵင်းၸိုင်ၵွပ်ႈပိူဝ်ႈဢၼ်ပဵၼ်တၢင်းၵိၼ်တၢင်းၶူပ်းၵႃႈပႅင်းလႄႈႁဝ်းတၵ်းလႆႈတၢႆၵႃႈတီႈၼၼ်ႉဢိူဝ်ႈ။ပေႃးႁဝ်းၼင်ႈယူႇၵႃႈတီႈၼႆႉၵေႃႈႁဝ်းတၵ်းတၢႆၵႃႈတီႈၼႆႉဢိူဝ်ႈ။ၵွပ်ႈၼႆလႄႈတႃႉႁဝ်းဢွၼ်ၵၼ်ၵႂႃႇၶဝ်ႈယူႇၽၢႆႇတပ်ႉသုရိၼၼ်ႉတႃႉႁဝ်း။ပေႃးၶဝ်ပၼ်ဢသၢၵ်ႈႁဝ်းလိပ်းၵေႃႈႁဝ်းတၵ်းလႆႈလိပ်းဢေႃႈ။
၅ ပေႃးဢဝ်ႁဝ်းတၢႆၵေႃႈပဵၼ်ဢၼ်တၢႆၼင်ႇၵဝ်ႇဢေႃႈ၊ဝႃႈၼင်ႇၼႆသေယဝ်ႉ၊ၶဝ်ဢွၼ်ၵၼ်လုၵ်ႉၶိင်ႇၼႃႈႁူဝ်ၶမ်ႈလႄႈၵႂႃႇၸူးၵႃႈတီႈတပ်ႉသုရိဢေႃႈ။မိူဝ်ႈဢၼ်ၶဝ်ႁွတ်ႈထိုင်ၵႃႈတီႈၸဵင်ႇတပ်ႉၼၼ်ႉၸိုင်ၶဝ်ဢမ်ႇထူပ်းဢမ်ႇႁၼ်ၽူႈလႂ်သေၵေႃႉသေၵူၼ်း။
၆ လွင်ႈမၼ်းၸမ်းထႃႇဝရႃႉၽြႃးႁဵတ်းႁႂ်ႈတပ်ႉၵူၼ်းသုရိၼၼ်ႉလႆႈငိၼ်းသဵင်ၵူၼ်းသိုၵ်းၶီႇလေႃႉရထႃးၵူၼ်းသိုၵ်းၶီႇမႃႉဢၼ်ဝႃႈသဵင်ႁူဝ်သိုၵ်းဢၼ်ယႂ်ႇၼမ်ၼႃႇၼၼ်ႉသေလႄႈၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊-တူၺ်းလူ။ၶုၼ်ႁေႃၶမ်းဢိသရေႇလၼၼ်ႉၸၢင်ႈငႃးဢဝ်ၶုၼ်ႁိတ်ႉတိဢိၵ်ႇတင်းၶုၼ်ဢေႇၵႅပ်ႉတုတင်းလၢႆလႄႈမႃးတိုၵ်းတေႃးႁဝ်းယဝ်ႉ၊ဝႃႈၼင်ႇၼႆသေလႄႈ
၇ ၶဝ်ဢွၼ်ၵၼ်လုၵ်ႉၶိင်ႇၼႃႈႁူဝ်ၶမ်ႈၼၼ်ႉလႄႈၸုၼ်ႉပႅတ်ႈသုမ်ႉၶဝ်၊မႃႉၶဝ်၊မႃႉလီႈ၊တပ်ႉၶဝ်၊ၵႃႈဢၼ်မီးၼၼ်ႉသေလႄႈဢွၵ်ႇပၢႆႈႁႂ်ႈဢသၢၵ်ႈၶဝ်လႆႈလွတ်ႈဢေႃႈ။
၈ ၵူၼ်းတုတ်ႈၸိူဝ်းၼၼ်ႉႁွတ်ႈထိုင်ၵႃႈတီႈၸဵင်ႇႁူဝ်တပ်ႉၼၼ်ႉသေယဝ်ႉ၊ၶဝ်ႈၵႃႈၼႂ်းသုမ်ႉလင်ၼိုင်ႈသေလႄႈၵိၼ်ၶူပ်းသေယဝ်ႉဢွၼ်ၵၼ်ဢဝ်ငိုၼ်းၶမ်းၶိူင်ႈၼုင်ႈတၢင်းမႆၵႂႃႇသိူင်ႇမႅပ်းဝႆႉဢေႃႈ။ၶဝ်သမ်ႉၶိုၼ်းမႃးသေလႄႈၶဝ်ႈၵႃႈၼႂ်းသုမ်ႉတၢင်ႇလင်လႄႈၵႃႈတီႈၼၼ်ႉၵေႃႈၶဝ်သမ်ႉဢဝ်ဢုၵ်ႉၸႃႇၵႂႃႇသိူင်ႇမႅပ်းဝႆႉဢေႃႈ။
၉ ၵမ်းၼၼ်ႉၶဝ်လၢတ်ႈၵၼ်လႄႈဝႃႈ၊-ႁဝ်းၼႆႉဢမ်ႇႁဵတ်းဢၼ်လီဢၼ်ငၢမ်းလူင်ပေႇ။ဝၼ်းမိူဝ်ႈၼႆႉပဵၼ်ဝၼ်းဢၼ်မွၵ်ႇလၢတ်ႈသတၢင်းသဵင်ၶၢဝ်ႇဢၼ်လီလႄႈႁဝ်းယင်းဢမ်ႇမွၵ်ႇလၢတ်ႈလႄႈယူႇလူင်ပေႇ။ပေႃးႁဝ်းယူႇတေႃႇထိုင်ႁွတ်ႈမိူင်းလႅင်းၸိုင်ဢမူႉသေၸိူဝ်ႉသေပိူင်ႈတၵ်းႁွတ်ႈထိုင်ၵႃႈၼိူဝ်ႁဝ်းဢေႃႈ။
၁၀ ပိူဝ်ႈဢၼ်ပဵၼ်ၼင်ႇၼႆလႄႈႁဝ်းဢွၼ်ၵၼ်ၵႂႃႇလႄႈမွၵ်ႇလၢတ်ႈတီႈၵူၼ်းႁၢင်ႈႁေႃၸဝ်ႈတႃႉႁဝ်း၊ဝႃႈၼင်ႇၼႆသေယဝ်ႉ၊ၶဝ်ႈၵႂႃႇလႄႈႁွင်ႉသႅၼ်ႇတီႈၵူၼ်းပႂ်ႉၼွၵ်ႈၽၵ်းတူဝဵင်းသေလႄႈလၢတ်ႈတီႈၶဝ်ၼၼ်ႉလႄႈဝႃႈ၊-
၁၁ ႁဝ်းႁွတ်ႈထိုင်ၵႃႈတီႈတပ်ႉသုရိၼၼ်ႉမႃးယဝ်ႉလႄႈဢမ်ႇထူပ်းဢမ်ႇႁၼ်ၽူႈလႂ်သေၵေႃႉသေၵူၼ်းဢမ်ႇငိၼ်းသဵင်ၵူၼ်း၊ထူပ်းႁၼ်မႃႉလႂ်မႃႉလီႈလႂ်မတ်ႉၽုၵ်ႈဝႆႉယူႇသေလႄႈသုမ်ႉတင်းလၢႆၵေႃႈမီးပဝ်ႇဝႆႉယူႇပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ဢေႃႈ၊ဝႃႈၼင်ႇၼႆလႄႈ၊ၵူၼ်းပႂ်ႉၽၵ်းတူၸိူဝ်းၼၼ်ႉၵေႃႈႁွင်ႉသႅၼ်ႇလႄႈမွၵ်ႇလၢတ်ႈလွင်ႈၼၼ်ႉတီႈၵူၼ်းႁၢင်ႈၵူၼ်းႁေႃၸဝ်ႈၵႃႈၼႂ်းဝဵင်းၼၼ်ႉဢေႃႈ။
၁၂ ၶုၼ်ႁေႃၶမ်းလုၵ်ႉၶိင်ႇၵၢင်ၶိုၼ်းလႄႈလၢတ်ႈတီႈၶႃႈၵူၼ်းမၼ်းလႄႈဝႃႈ၊-ၵဝ်တၵ်းလၢတ်ႈပၼ်သူလွင်ႈဢၼ်ၵူၼ်းသုရိၸိူဝ်းၼၼ်ႉဢဵၼ်းဢၢၼ်းၶႂ်ႈႁဵတ်းၸိူဝ်ႉၼင်ႇႁိုဝ်တီႈႁဝ်းၼၼ်ႉဢေႃႈ။ၵွပ်ႈပိူဝ်ႈၶဝ်ႁူႉလွင်ႈဢၼ်ႁဝ်းဢိုပ်းယၢၵ်ႈၼၼ်ႉလႄႈၶဝ်ဢွၵ်ႇၵႃႈၼွၵ်ႈတပ်ႉလႄႈတဵတ်ႇမႅပ်းယူႇၵႃႈၼႂ်းထိူၼ်ႇသေလႄႈဝႃႈ၊-မိူဝ်ႈဢၼ်ၶဝ်ဢွၵ်ႇၵႃႈၼွၵ်ႈဝဵင်းမႃးၼၼ်ႉႁဝ်းတၵ်းတီႉၺွပ်းဢဝ်တူဝ်လိပ်းၶဝ်သေလႄႈၶဝ်ႈၵႃႈၼႂ်းဝဵင်းဢေႃႈ၊ဝႃႈၼင်ႇၼႆသေယဝ်ႉၶႃႈၵူၼ်းမၼ်းၵေႃႉၼိုင်ႈၶိုၼ်းလဝ်ႈလၢတ်ႈလႄႈဝႃႈ၊-
၁၃ ႁႂ်ႈၵူၼ်းၵမ်ႈၽွင်ႈလႆႈဢဝ်မႃႉႁႃႈတူဝ်ဢၼ်ၵိုတ်းဢၼ်ၵျၢၼ်ႇဝႆႉၵႃႈၼႂ်းဝဵင်းၼႆႉၼၼ်ႉသေၵမ်းၶႃႈ။ၶဝ်ၸိူဝ်းၼၼ်ႉၸမ်းပဵၼ်ၸိူဝ်ႉၼင်ႇမူႇၽုင်မုၵ်ႉၸိူဝ်းၵူၼ်းမဵဝ်းဢိသရေႇလၵႃႈဢၼ်ယင်းၵိုတ်းယင်းၵျၢၼ်ႇၵႃႈၼႂ်းဝဵင်းၼႆႉၸိူဝ်းၼၼ်ႉၶႃႈယဝ်ႉ။ပဵၼ်ၸိူဝ်ႉၼင်ႇမူႇၽုင်မုၵ်ႉၸိူဝ်းၵူၼ်းမဵဝ်းဢိသရေႇလဢၼ်တၵ်းႁွတ်ႈထိုင်တၢင်းလူႉတၢင်းလႅဝ်ၼၼ်ႉၶႃႈယဝ်ႉ။
၁၄ ပွႆႇၸႂ်ႉၶဝ်ၵႂႃႇႁႂ်ႈလႆႈလူတူၺ်းသေၵမ်းၶႃႈ၊ဝႃႈၼင်ႇၼႆလႄႈၶဝ်ဢွၼ်ၵၼ်ဢဝ်လေႃႉရထႃးသွင်လင်တင်းမႃႉမၼ်းသေယဝ်ႉၶုၼ်ႁေႃၶမ်းပွႆႇၸႂ်ႉၶဝ်ၵႂႃႇၸွမ်းတူၺ်းမုၵ်ႉၸိူဝ်းၵူၼ်းသုရိၸိူဝ်းၼၼ်ႉလႄႈဝႃႈ၊-ဢွၼ်ၵၼ်ၵႂႃႇလႄႈလူတူၺ်းတႃႉ၊ဝႃႈၼင်ႇၼႆလႄႈၶဝ်ဢွၼ်ၵၼ်ၸွမ်းၵႂႃႇတေႃႇထိုင်ႁွတ်ႈၼမ်ႉႁွင်ႊယေႃႇတၢၼ်ႇဢေႃႈ။
၁၅ ၵႃႈၼႂ်းသဵၼ်ႈတၢင်းၵႃႈဢၼ်ၵႂႃႇၼၼ်ႉတဵမ်ဝႆႉတင်းၶူဝ်းၼုင်ႈတၢင်းမႆဢိၵ်ႇတင်းၶိူင်ႈပိူင်ဢၼ်ၵူၼ်းသုရိၶဝ်ပႅတ်ႈဝႆႉၼႂ်းမိူဝ်ႈဢၼ်ၶဝ်ၼႅတ်ႈပၢႆႈၶၼ်ၶၼ်ၽႂ်းၽႂ်းၼၼ်ႉဢေႃႈ။ၶဝ်ၸိူဝ်းဢၼ်ၶၢမ်ႇတၢင်းဢၼ်ပွႆႇၸႂ်ႉၵႂႃႇၸိူဝ်းၼၼ်ႉၶိုၼ်းမႃးလႄႈလဝ်ႈလၢတ်ႈထိုင်တီႈၶုၼ်ႁေႃၶမ်းဢေႃႈ။
၁၆ မိူဝ်ႈၼၼ်ႉၵူၼ်းတင်းလၢႆဢွၼ်ၵၼ်ဢွၵ်ႇလႄႈႁိမ်ဢဝ်တပ်ႉၵူၼ်းသုရိၸိူဝ်းၼၼ်ႉဢေႃႈ။ၼင်ႇၼၼ်လႄႈၶဝ်ဢွၼ်ၵၼ်ၶၢႆၽွင်ၶဝ်ႈၵျုင်ႇယေႈၶႂၢႆးငိုၼ်းယေႈၵျၢပ်ႈမႅၼ်ႈၸွမ်းၵႃႈၼင်ႇၵႂၢမ်းထႃႇဝရႃႉၽြႃးမီးၼၼ်ႉဢေႃႈ။
၁၇ ၶုၼ်ႁေႃၶမ်းဢဝ်ဢမၢတ်ႈဢၼ်လႆႈၶၢမ်ႇတၢင်းဢၼ်မၼ်းၸဝ်ႈဢိင်ၼၼ်ႉၶၢၼ်းဝႆႉႁႂ်ႈပႂ်ႉၽၵ်းတူဝဵင်းလႄႈၵူၼ်းတင်းလၢႆယဵပ်ႇမႅၼ်ႈမၼ်းၵႃႈၼႂ်းၽၵ်းတူဝဵင်းၼၼ်ႉလႄႈမၼ်းတၢႆဢေႃႈ။မႅၼ်ႈၸွမ်းၵႃႈၼင်ႇဢၼ်ဢွၵ်ႇသူပ်းၵူၼ်းၽြႃးပဵၼ်ၸဝ်ႈလၢတ်ႈဝႆႉမိူဝ်ႈဢၼ်တူဝ်ၶုၼ်ႁေႃၶမ်းလူင်းၸူးၵႃႈတီႈႁိူၼ်းမၼ်းၼၼ်ႉဢေႃႈ။
၁၈ ၼင်ႇၼၼ်လႄႈပဵၼ်ၸွမ်းၵႃႈၼင်ႇဢၼ်ၵူၼ်းၽြႃးပဵၼ်ၸဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ဝၼ်းမိူဝ်ႈၽုၵ်ႈမိူဝ်ႈၶိင်ႇၼႆႉၼၼ်ႉတၵ်းလႆႈဢွၼ်ၵၼ်ၶၢႆၽွင်ၶဝ်ႈၵျုင်ႇယေႈသီႇပေႇငိုၼ်းယေႈၵျၢပ်ႈသၶေႇလ၊ၶဝ်ႈသၢၼ်မူႉယေႃးယေႈၶႂၢႆးငိုၼ်းယေႈၵျၢပ်ႈၵႃႈၼႂ်းၽၵ်းတူဝဵင်းသမႃႇရိၼၼ်ႉဢေႃႈ၊ဢၼ်ဝႃႈၼၼ်ႉ၊ဢမၢတ်ႈၼၼ်ႉၶိုၼ်းလၢတ်ႈတီႈၵူၼ်းၽြႃးပဵၼ်ၸဝ်ႈလႄႈဝႃႈ၊-တူၺ်းလူ။
၁၉ ပေႃးထႃႇဝရႃႉၽြႃးၽုၺ်ႇႁူးလၢင်းတဵၼ်ၽႃႉၵၢင်ႁၢဝ်ၸိုင်ၸၢင်ႊၶေးတၵ်းပဵၼ်ၸိူဝ်ႉၼင်ႇၼၼ်ဢေႃႈ၊ဝႃႈၼင်ႇၼႆသေယဝ်ႉ၊မၼ်းၶိုၼ်းလၢတ်ႈလႄႈဝႃႈ၊-တူၺ်းလူ။မႂ်းၼႆႉတၵ်းလႆႈဢဝ်တင်းမၢၵ်ႇတႃမႂ်းတူၺ်းႁၼ်ယူႇဢေႃႈ။ၵူၺ်းၵႃႈမႂ်းတၵ်းဢမ်ႇလႆႈၵိၼ်၊ဝႃႈၼင်ႇၼႆၼၼ်ႉဢေႃႈ။
၂၀ လႆႈပဵၼ်မႃးတီႈမၼ်းၸိူဝ်ႉၼင်ႇၼၼ်ဢေႃႈ။ၵူၼ်းတင်းလၢႆယဵပ်ႇမႅၼ်ႈမၼ်းၵႃႈတီႈႁူးၽၵ်းတူဝဵင်းလႄႈမၼ်းၼၼ်ႉတၢႆသေဢေႃႈ။